رواية إطلاق سراح مشروط للكاتبة روز الفياض الفصل التاسع
من رجعنه للبيت طبعا وديان زعلانه لان دافعت عن حسناء وابوها مقبل على كلامها وتصرفها.
وصلتها للبيت ورحت للمعرض.
من وصلت اتصلت بحسناء: هلو حسناء شلونج؟
حسناء: الو هلو. الحمدلله.
حسام: شخبارج؟
حسناء: بخير.
ابتسمت احب من تكول بخير رغم كل إلى ديصير وياها ياريت وديان تصير مثلها.
حسام: شنو الاخبار؟
حسناء: اخبار شنو؟ ماكو اخبار؟
حسام: اخباركم بالبيت؟
حسناء: ماكو شي خالتي اتغدت ونامت.
حسام: وانتي؟
سكتت بعدين كالت: اني هم.
حسام: وديان وين؟
حسناء: مااعرف يمكن بغرفتها. تريد تحجي وياها؟
حسام: لا لو اريد احجي وياها اتصل عليها بس اني اتصلت بيج لان اريد احجي وياج مو ويه احد ثاني.
بقت ساكته كتلها: حقج علي اعرف وديان تغثج بكلامها واني اليوم حجيت لابوها ومقبل عليها ويريد يجي يطيب خاطرج.
هم بقت ساكته.
حسام: حسناء؟
سمعت صوت شهكه مخنوكه يمكن بجت انقهرت غمضت عيوني واني اسب نفسي على سلبيتي وياها.
حسام: حسناء تسمعيني؟
حسناء: اسمع.
حسام: زعلانه مني؟
حسناء: لا.
حسام: اكيد؟
حسناء: اكيد.
حسام: معناها شحتسويلنه عشا؟
حسناء: كيفك انت شنو مشتهي؟
حسام: والله تردين الصدك كلش مشتهي بتيته وطماطه بس كون الطماطه محتركه شويه اكلتها عدكم عبالك اول مره اكلها.
حسناء: هههه بس هاي تدلل.
حسام: انتي ورده.
حسناء: علمود البتيته وطماطه صرت ورده هههه.
هي كالتها بشقى بس اني انغثيت حسيت صدك شكد اني ظالمها لدرجة اول مره اسمعها كلمه حلوه واول مره امدحها ورغم هذا ضحكت ونست كل إلى صارالبارحه واليوم.
بالليل رجعت دخلت من باب المطبخ ادري بيها تسوي عشا وجنت جايبلها عطر وبيجامه على ذوقي.
دخلت على كيف هي واكفه تكطع بصل وتمسح بعيونها.
حضنتها التفتت بخوف كالت: والله راح تسوي بيه جلطه يوميه تكمزني ليش هيجي؟
بست خدها كتلها: التوبه بعد مااكمزج.
راح ابدل واغسل واجيب امي حتى نتعشى سوا.
حسناء: ان شاءالله.
جبت امي واجيت لكيتها مضبطه السفره وكل شي كامل كعدت وامي يمي هي اباوعلها مسويه لفه زغيره الها خلتها بصحن واخذته رادت تروح تاكل بغير مكان كتلها: وين رايحه متتعشين؟
ردت بصوت ناصي: اتعشى بغرفتي.
حسام: لا ابقي اتعشي ويانه.
حسناء: لا انتو اخذوا راحتكم.
امي: تعاي يمه تعاي شنو تاكلين بغرفتج احنه عائله ناكل كل احنه سوا الميعجبه هو يروح ياكل بغير مكان.
بقت واكفه متعرف شنو تسوي تكعد لو تروح باوعتلي محتاره لزمتها من ايدها وسحبتها كتلها: تاكلين وياي متاكلين ويه لاكيشا ولا وحدج.
كعدت يمي مستحيه.
بدينه ناكل دخلت وديان باوعتلنه كالت: هذا عشاكم؟ مااحب اني هيج اشياء مسويه رجيم.
امي: سويلج لفه خيار وطماطه واكليها احسنلج.
حسناء ضحكت واني هم ضحكت على حجي امي وديان ضاجت طلعت من المطبخ مااتعشت ويانه.
خلصنه عشا ورحنه نباوع عالاخبار حسناء جابتلنه جاي وكعدت يمي.
الاخبار جانت مزعجه ومنها خبر عن مجموعة شباب ذابحيهم الدواعش.
ملتهين نباوع الاخبار وسمعتها بجت على كيف التفتت شفتها تمسح دموعها.
حسام: شبيج؟ ليش تبجين؟
حسناء: مابيه شي بس اتذكرت اخواني وابوي يمكن هسه هيج ذبحوهم.
كلبي وجعني من حجيها حضنتها ظلت تبجي بحضني وامي تبجي وياها خطيه.
وره ماسكتت وديت امي لغرفتها وانطيتها دواها وردت اطلع كالت: حسام؟
حسام: ها يوم؟
امي: اليوم انت صرت زين لاتتراجع انت الرجال بهالبيت وانت صاحب الكلمه خلي الله بين عيونك. رفقا بالقوارير يمه.
حسام: ان شاءالله يمه.
رجعت باوعت على وديان تحجي ويه وفاء صديقتها بالتليفون.
وفاء عبالك فرد من العائله تعرف كل شي عنه وديان متضم عنها شي وتمشي برأيها لذلك مااحبها احسها خبيثه.
وديان: شوفيلي حل راح اموت اريد حل.
ماادري شنو الموضوع بس وديان جانت عصبيه ومااعرف شنو رد وفاء عليها بس رجعت كلتلها: اي شي ميخالف بس بسرعه لان مااتحمل وجودها بعد شوفي حل، هاا اي بس شلون اوصلهن هناك؟، اوكي فكري انتي ورتبي وكوليلي بس بسرعه عفيه راح اموت.
مااهتميت لكلامها دوم سوالفها ومواضيعها تافهه وسطحيه هي ووفاء كله غيبه وانتقادات للبنات البقيه حتى لصديقاتهم مو مهم المهم همه بالمقدمه بكل شي.
رحت لحسناء لكيتها تريد تنام.
اتمددت يمها كتلها: لتنامين.
حسناء: ليش شكو؟
حسام: ماكو بس جبتلج حاجه وان شاءالله تعجبج.
فرحت وكعدت كالت: شنو؟
انطيتها البيجامه والعطر بس مافرحت بالعكس ضاجت.
حسام: شبيج؟
حسناء: عندي اشكال البيجامات مثلها.
حسام: وليش متلبسيهم؟
حسناء: وديان تضوج واصلا بالخطبه اشترطت علي ماالبس لبس حلو وضيق لو قصير وانت موجود.
حسام: ليش بكيفها هي؟ انتي تلبسين إلى يعجبج مدام اني قابل مالج علاقه بيها.
حسناء: والعطر. مااخذ عطور من احد.
حسام: ليش شبي العطر بعد مو حلو معجبج؟
حسناء: لا حلو وعجبني بس اخاف يكولون العطر يسبب فراك واني مااريد افاركك.
ضحكت على برائتها كتلها: من كل عقلج تصدكين بهالسوالف هاي اني قبل شكد جبت عطور لوديان اشو ماتفاركنه صارلنه 15 سنه سوا ههههههه.
حسناء: اي اصدك طبعا.
حسام: زين عوفي العطر هسه اريد اشوف البيجامه عليج كومي لبسيها.
كامت لبستها وبقت واكفه تباوعلي مستحيه كتلها: تخبل عليج لتنزعيها ومنا وهيج لبسي إلى يعجبج مالج علاقه بحجي وديان. زين؟
ابتسمت وهزت راسها اي واجت حضنتني كالت: شكد احبك.
ماجاوبتها بس ابتسمت وبست راسها بعدين كتلها: يالله تعاي خل انام نعست وبسببج صرت مااعرف انام وحدي.
باوعتلي كالت: وليش تنام وحدك؟