رواية إطلاق سراح مشروط للكاتبة روز الفياض الفصل السادس والعشرون
حسام: شغلي كيد النساء العندج مو النساء عدهم كيد انتي كيدج وينه؟
حسناء: هههه ماعندي يمكن عطلان.
حسام: مو هو اني ليش احبج لان ماعندج كيد ومتحتاجينه وياي لان انتي كاعده هنا بنص كلبي ومتربعه.
واشرت بأيدي على كلبي و??????
رحت للمعرض هوايه شغل متعطل بقيت اشتغل محسيت بالوقت بعدين اتصلت امي تسألني وين صرت انتبهت الساعه صار 2 الظهر واني مرايح للبيت اكيد جاعوا وهم ينتظروني.
العصر اخذت حسناء للدكتوره اتطمنه عالطفل وعرفنه انه راح يصير عدنه ولد ان شاءالله.
حيل فرحت من عرفت جنس الطفل مو لان ولد المحروم يريد بس طفل مو مهم ولد لة بنيه لان اثنينهم نعمه بس فرحان لان عرفت جنسه جنت متشوق اعرف حتى ابدي اتخيله وافكر بأسمه وادلع حسناء بأم فلان الحمدلله رب العالمين.
طلعنه من الدكتوره رحنه للسوك خليتها براحتها تشتري اليعجبها.
اغلب الاشياء إلى اخذتها للطفل مو الها فرحانه.
بعدين اخذتها اشتريتلها محبس ذهب ردت افرحها وفعلا اتفاجأت وفرحت.
بعدين مرينه اخذنه عشا ورجعنه للبيت.
امي: ها بشروا شنو كالت الدكتوره؟
حسام: الحمدلله كل شي تمام ان شاءالله.
امي: الحمدلله.
حسناء: خاله حيصير عندج حفيد ولد ان شاءالله.
امي: صلاوات على محمد صلاوات على محمد الحمدلله ربي من خليتني عايشه حتى اشوف هاليوم.
الله يكومج بالسلامه يمه ويترس حضنج جهال ان شاءالله.
بعدين دارت علي كالت: الله يفرح بيها وبالي ابطنها ويجعله من الابناء البارين ياربي.
كمت بست ايدها وراسها كلتلها: رضاج عني اهم من كل شي انتي اذا راضيه عني الله يرضى عني وينطيني.
امي: راضيه عليك من كل كلب ولسان حبيبي والله يرضى عليك ان شاءالله ويوفقك ويخليك مرتك وابنك يارب.
حسام: ويخليلياج يارب ومايحرمني من دعواتج.
بالليل خابرت ام حسناء على حسناء كلتلها انه قبل شويه جاي واحد من ولد عمها الهم ولاكيهم بعدما كانوا يدورون عليهم لان من انهزموا بقى مصيرهم مجهول ماكو تواصل بينهم وبين اهلهم لمدة سنتين.
خلال هالسنتين جانوا يدورون عليهم لان همه هم مهزومين ومهجرين وكايللهم انه ابو حسناء واخوانها موجودين ومابيهم شي بس محجوزين هناك ميكدرون يجون ومنتظرين بلكي يحررون مناطقهم عن قريب ويكدرون يجون.
فرحت حسناء حيل واحنه هم فرحنه على فرحها كلتلي: حبيبي ميخالف باجر توديني لاهلي حتى اشوف ابن عمي واسلم عليه؟
حسام: صار تدللين.
حسناء: مامصدكه ابوي واخواني بخير وسالمين معقوله؟
حسام: ان شاءالله سالمين شوفي اليوم شلون كله اخبار حلوه.
حسناء: اي والله الحمدلله والشكر الف الحمدلله سنتين ماكو ولاخبر كلنه ماتوا كتلوهم اكيد سبحانك ربي.
نامت مبتسمه كوه نامت لنص الليل وهي تسولف وتضحك فرحانه واحنه فرحانين خبر ميتصدك من ينفقدلك شخص لسنين وتعايش مع فكرة موته وفجأه تكتشف انه عايش وموجود يمكن مسألة وقت حتى ترجع تلتقي بي.
ااااه يالعراقيين شكد شفتوا ضيم ومآسي...
ثاني يوم من الصبح كعدتني اتريكنه وديتها لاهلها نزلتها ونزلت سلمت على ابن عمها بس من شفته اتفاجأت ولد شاب جبير بعمري يطلع وامها مره كلتلي ولد عمامها اصغر منها.
رحت لشغلي بس وصلت اتصلت بيها: الو.
حسناء: الو هلا حبيبي.
حسام: حسنائي هذا ابن عمج جبير اشو مو زغير؟
حسناء: يعني شنو جبير مو زغير؟
حسام: يعني امج قبل فتره كلتلي ولد عمامج كلهم زغار اصغر منج بس هذا رجال شاب بكدي تقريبا.
حسناء: هههه صحيح بس هذا مو ابن عمي اللح هذا ابن عمي ابوي.
حسام: هااا كولي هيج.
حسناء: ايي بس احنه علاقتنه بيهم قويه.
حسام: بس تره متباتين يعني الظهر واني راجع امر عليج زحمه وين تبقين هي غرفه وحده.
حسناء: اي ميخالف بس هو اصلا مااظنه يبقى لان على كولتك هي غرفه.
حسام: تمام اذن نلتقي الظهر ان شاءالله.
حسناء: ان شاءالله.
خلصت شغلي الساعه 1 اتصلت عليها مجاوبت رجعت اتصلت هم مجاوبت بعدين انغلق الجهاز.
خفت ركبت السياره ورحتلها وصلت دكيت الباب مره مرتين محد فتحه بس اسمع صوت صياح رجال يصيح واسمع صوت امها تكله: صل على محمد شبيك اتخبلت.
دكيت الباب حيل فتحه ابن عمها شافني كال: نعم؟ خير؟
اتعجبت كلت هذا شبي مو الصبح شفته وسلمت عليه.
حسام: السلام عليكم اجيت اخذ حسناء.
رد علي كال: روح منا ماكو حسناء.
حسام: شنو؟ شنو ماكو حسناء؟
كال: ماكو حسناء بعد دور وجهك وروح.
اجت امها لزمته من ايده كلتله: صل على محمد خلي البنيه تروح ويه زوجها.
كال: متروح وماكو بعد زوجها ويالله انت هم روح منا.
عصبني ونرفزني ومافاهم شي منه شبي هذا كتله بعصبيه: اريد مرتي وينها؟ جاي اخذها شنو روح منا بكيفك؟
كال: ما إلك مره عدنه.
حسام: شنو يعني مالي مره شنو بكيفك انت؟
كال: اي بكيفي وروح ولي منا.
دفعني وام حسناء لازمه ايده وتجر بي وتتوسل اني رأسا ضربته بوكس وكع.
ام حسناء ظلت تصرخ واني وهو ظلينه واحد يضرب اللاخ طلعت حسناء تبجي هي وخواتها وتجر بيه وتصرخ وصاروا بينه هي وامها وخواتها لحدما اتفاككنه.
اشو هذا راسأ رجع سحب حسناء من ايدها وضربها كف ودفعها كللها: فوتي جوه وحسابج بعدين.
اني من شفته مد ايده عليها راسأ رجعت هجمت عليه واستلمته ضرب.
هو يضربني واني اضربه لحدما اتدخلوا الجيران وفرغونه.
كمت اني جريت حسناء للسياره وكتله: بسيطه اني اعلمك،.