رواية إطلاق سراح مشروط للكاتبة روز الفياض الفصل السابع والعشرون
اخذت حسناء للبيت وطول الطريق تبجي اريد افتهم شكو شصاير متحجي بس تبجي وتشهك مثل الجهال.
نرفزتني صرخت عليها: اسكتيييي
ظلت حابسه شهكاتها وتبجي على كيف كلتلها بصياح: بدون بجي فهميني شكو. زين؟
كالت: وره ماوصلتني ورحت سوالي تحقيق هذا منو وشلون زوجج وشلون اتزوجتي وما وراج زلم وماعندج اهل وخاف مسويه مصيبه وماخذج كوه وساتر عليج.
تبجي وتحجي كسرت خاطري وضوجني الحجي إلى حاجيه هذا الثور ابن عم ابوها كلتلها: شبي هذا مخبل؟ طاح حظه.
وصلنه للبيت دخلنه راحت كبل لغرفتها.
امي شافتها تبجي خافت: شبيها حسناء؟ اتعاركتوا؟
حسام: مابيها شي.
امي: ليش تبجي شبيها؟ امها مريضه؟
كعدت حجيتلها القصه هم مثلي ضاجت واستغربت وظلت تدك صفنات وتكول الله يستر.
رحت للغرفه حتى ابدل واغسل دخلت لكيت حسناء بعدها تبجي.
ظليت واكف اباوعلها اتدنيت يمها باوعتلي ودنكت. رفعت وجها باوعت لخدها لان الجو بارد ضال الاثر بخدها احمر مال الضربه انعصر كلبي.
حسام: تأذيج؟
هزت راسها لا.
حسام: الله يطيح حظه. اني اعلمه.
حسناء: لا فدوه كافي هيج خل يولي خل يروح كافي هيج.
حسام: شلون خل يولي يضربج كدامي وتردين افوتها اله؟
حسناء: الله يخليك كافي خلي يولي عفيه خلي يروح منريد مشاكل.
سكتت واتنهدت بعدين خفت عليها لترجعلها ذيج الحاله من كد البجي كلتلها: الله كريم يصير خير ان شاءالله.
لزمت ايدي تتوسل كالت: كافي هاا متسوي شي بعد لخاطري؟
حضنتها كلتلها: مااسوي شي لتخافين.
هدأت شويه كلتلها: يعني هو شيريد هسه؟
حسناء: هو وره ماطلعت انت بدا يسألني شوكت اتزوجتي وشلون ومن هالحجي بعدين فجأه ظل يصيح ويغلط علينه وعلى امي ويكوللها بنتج اكيد سوت مصيبه غلطت وياه واخذها وعلى اي اساس تتزوج بدون علمنه وعلم ابوها واخوانها.
حسام: شكد غبي ادري هو وين جان اكو تواصل بينكم وبينهم وابوج واخوانج انتو غير عبالكم متوفين؟
حسناء: كلتله امي بس هو ظل يصيح ويغلط.
رجعت بجت كتلها: ضربج بعد؟ قبل لااجي هم ضربج؟
مجاوبت كلتلها: يعني ضربج؟
هزت راسها اي.
حسام: انكسرت ايده ان شاءالله.
مسحت دموعها كلتلها: كافي مو زين عليج هالبجي. زين اني مو اتصلت عليج ليش مجاوبتي وكلتيلي؟
حسناء: اخذ التليفون مني.
حسام: خلص خيولي فدوه لتبجين.
ظليت متكدر وضايج بس سكتت مااريد اخوفها واخوف امي واتمنيت اروح ارجع اطيح حظه بس لخاطر امي وحسناء واهلها مااريد اسوي مشكله.
كعدنه اتغدينه بهدوء محد يحجي خلصنه وكلت لحسناء تسويلي جاي.
كعدت اسولف ويه امي ونحجي بالي صار وامي تهدي بيه وتكولي ميخالف لخاطر حسناء واهلها منريد من اولها مشاكل زحمه وعيب وصاروا اهلنه ونسابتنه.
شويه واندك الجرس.
طلعت فتحت الباب لكيت الشرطه كلت ياستار.
اتوقعت نفس الموضوع مال المره إلى فاتت بس اتفاجأت هالمره بالموضوع.
وديان مشتكيه علي!
عقلي وكف. اكو مره متربيه وبت اصول تشتكي على زوجها؟!
حسيت الدنيا لفت بيه من سمعت صدمة عمري حسيتها.
اخذوني للمركز واتوقفت لان وديان مشتكيه علي انه اني معتدي عليها بالضرب.
حتى الضابط اتعجب من شافني وحجيتله الموضوع.
الضابط: والله يااخي ماادري شكولك بس هيج مره شلون متحملها؟ هيج وحده اني منك دقيقه وحده مااخليها على ذمتي.
حسام: سهله ان شاءالله بسيطه.
الضابط: هيج دعوه اصلا مو بصالحها حتى اذا متتنازل هم القاضي من يسمع المصايب إلى مسويتها راح يطلعك ويطيح حظها هي مع احتراماتي ولو خاف تزعل مني.
حسام: شزعل بعد شزعل بقى شي ينزعل عليه. هي المره إلى تشتكي على زوجها هاي ينزعل عليها؟
طبعا صارت هوسه وضجه بالعائله واهلي واهل وديان خبصه وروح وتعال وناس رايحه وناس جايه بهالاثناء ابن عم حسناء كمل الغركان غطه واجه هم اشتكى علي ونفس العذر الاعتداء بالضرب.
ظليت موقوف بس الخوف ذبحني مابين امي المريضه على ساعه من الهبطات يصير بيها شي ومابين حسناء ليروح هالكلب ابن عمها ياخذها من البيت غصبن عنها لو يضربها ويأذيها او من الخوف والتفكير والوضع إلى احنه بي ترجعلها الحاله إلى جانت بيها.
اتمنيت لو بس ينطوني ساعه اروح لوديان اكتلها واخلص من شرها واروح لابن عم حسناء هم اشوف شغلي وياه.
لهسه كلبي محترك لان هالحقير ضاربها بأي حق يضربها هم متزوجه وعد رجال وهم حامل شلون يسمح لنفسه وعلى اي اساس؟
واحد ثاني يسويها شغله عشائريه ويطيح حظه حتى بعد ميعيده ويسترجل على مره حامل.
بس لخاطر حسناء واهلها ولخاطر امي هم تخاف علي ومتريد تصير مشاكل بيني وبين ابو حسناء واخوانها من قبل لانتعرف عليهم ونشوفهم.
توسطت الناس والاهل بيني وبين ابن عمها حتى يجي يتنازل بس مقبل وشرطه الوحيد اطلك حسناء حتى ياخذها لاهلها هناك همه يعرفون شغلهم وياها على كولته.
حسام: يمعودين هذا ثور ميفهم شنو بكيفه هو اطلكها على اي اساس مرتي متزوجها على سنة الله ورسوله شنو طيحان الحظ هذا؟ خلي يسوي إلى يريده مااطلك وقسما برب العباد اذا عرفت متعرضلها لو لامها وخواتها ميلوم الا نفسه واصلا اني اكدر احقه عشائريا لان اعتدى علي وعلى زوجتي بدون حق ماله حق هو يحاسبها اني زوجها غصبن ماعليه.
والمحامي هم كال القضيه بس تصعد للقاضي تنتهي لان ماله حق هي زوجتي وهو ماله شي عدنه. وهم اني اكدر اشتكي عليه واحقه.