رواية إطلاق سراح مشروط للكاتبة روز الفياض الفصل الثامن والعشرون
كدروا اهلي يحصلون رقم ابو حسناء واخوانها من ابن عمها الشفيه واتصلوا بيهم وشرحولهم الموضوع.
واني هم سمحولي احجي وياهم سلمت عليهم وعرفتهم على نفسي وحجيتلهم كل الموضوع من اوله لاخره.
بالبدايه حسيتهم خايفين وحقهم لان بعيدين وميعرفون اني منو ولايعرفون كلامي صحيح لو لا ولايعرفون اي شي واصلا هم مجانوا يعرفون مصير حسناء وامها وخواتها بعدما هزموهم.
جانوا متوقعين ان همه هم انقتلوا يمكن لزموهم الدواعش وقتلوهم.
الطرفين جانوا عدهم نفس التوقعات لبعض ومكملين حياتهم على هالاساس.
لذلك كان الموضوع مفاجأ بالنسبه الهم وخصوصا موضوع زواجي من حسناء.
الحمدلله اتفهموا الموضوع بعدما تأكدوا من كلامي وكلام اهلي من حسناء وامها.
وعرفوا اني رايدها ومشتريها وماعندي استعداد اطلكها.
بس ابن عمها الغبي مقبل يتنازل وبالنهايه طلعت النتيجه بصالحي بعدما حققوا وياي ووياه وانتهينه من قضية ابن عم حسناء وراح رجع لاهله بعدما فشل نفسه وماحصل غير الملامه والرزاله من الكل حتى اهله.
بقت قضية وديان إلى متقبل تتنازل هم بس طلعوني بكفاله الى ان تخلص.
حسام: خلوها يمعودين لحد يروحلها ويكبر راسها ويتوسل بيها خلوها براحتها اني اريدها تبقي الدعوى حتى بعدين اني احاسبها خوش حساب.
كالوا: لا عيب ونريد نلم الموضوع وهاي فضيحه والناس اذا عرفوا شيكولون عنه وانتو اهل ولخاطر الحجيه امها والحجي الله يرحمه ولخاطر امك انت هم.
حسام: لهنا وكافي بعد ورحوا كوللها حسام يكولج لتتنازلين اني مااريدج تتنازلين بقيها الدعوى واني اعلمج بعدين.
طبعا الناس إلى تروح وترجع متحجي كل الحجي تخاف تصير مشاكل اكبر والاغلبيه تحاول تصلح الوضع رغم قناعتهم انه ماكو مره متربيه تسوي إلى سوته وديان.
وماكو رجال عنده كرامه يقبل باللي صار ويسكت.
كالوا: لا هي قبلت تتنازل بس عدها شرط واذا مقبلت معناها انت مخير مابين شغلك والحلال والمعرض ومابين القضيه.
حسام: شنو بالله شرطها هم الها عين وتتشرط بعد؟ والله عين صلفه بس مو صوجها صوجي اني انطيتها مجال اكثر من اللازم وخليها استقوت وحسبت نفسها احسن من الناس وشتسوي حقها وماعليها حساب.
كالوا: شرطها تطلك مرتك الثانيه لان تكول هي إلى تسوي مشاكل بينكم هي من اجت وطبت للبيت بدت المشاكل.
سكتت شجاوبهم بالله وشحاجيهم.
حسام: هسه هيجي طلعت السالفه؟ هي بريئه وحسناء هي إلى تسوي مشاكل؟
والله عجيب هاي مو صاحيه تجذب الجذبه وتصدكها.
المحامي من عرف كلي: موقفك قوي مااتصور القاضي بعدما يسمع كل شي يحكم لصالحها بس حلا للموقف وبدل ماالشغله تطول وتصير فضايح اكثر وتخسر شغلك وحلالك وروح وتعال والناس كلها تدري وتصير قصه كلها تحجي بيها طلك زوجتك الثانيه وبعدين رجعها حتى لو بدون علم وديان.
حسام: من كل عقلك؟
المحامي: كتلك موقفك قوي بس اني احجي هسه بصفتي صديق مو محامي احجي من باب العيب والاصول هيج سالفه ملازم تستمر فشله يااخي وعيب فضيحه والله.
اني لو منك والله هيج اسوي اطلك الثانيه فتره وانوب ارجعها بدون علم الاولى.
حسام: عمي انتو شبيكم اطلك مرتي من كل عقلكم.
المحامي: يااخي رجعها بعدين ليش تخسر المشيتين.
ظلوا اهلها يحاولون يقنعوني اهون الموضوع واجاريها بعيدا عن الفضايح وحتى اخوها من امها إلى بامريكا اتصل يتعذر ويتأسف ويحاول يقنعني الم الموضوع على اساس هو هم حاجي وياها ومقتنعه انه هي تتنازل.
اتعجبت شبيها الناس كلتلهم: هو جواب واحد ومراح اغيره او اتراجع عنه مااريدها تتنازل. وحسناء مااطلكها. وخلي المعرض الها الله الرزاق.
بس وديان طالك...
طبعا صارت هوسه وانكلبت الدنيا كلها صارت مصلحه اجتماعيه براسي.
وبعدين فجأه وديان راحت اتنازلت يمكن بسبب الملامه ونظرة الناس الها لان بعد مااصدك وديان تحترم احد زوج او اب او اخ او ايا كان او تحترم عشرت عمر او قرابه وصلة رحم او حتى عدها مخافة الله.
من طلعوني بكفاله جنت ملهوف عالطلعه اريد اشوف امي وحسناء واريد اتطمن عليهم واريد اطلك وديان رسمي بعد خلص مابيها رجعه.
ارتاحيت من رجعت للبيت وشفت امي وحسناء بخير ومابيهم شي سالمين والحمدلله بس مجانوا يعرفون اني طلكت وديان.
حسام: حبيبتي شلونج؟
حسناء: الحمدلله بخير.
ضحكت احبها من تكول بخير رغم كل شي تحسسني بالقناعه.
حسام: شلونه ابني؟
حسناء: الحمدلله زين.
حسام: يتحرك؟
حسناء: اي هسه ديتحرك.
سحبت ايدي وخلتها على بطنها.
حسيت بحركته شعور يغمر الانسان بالسعاده الله يرزق كل محروم يارب.
حسام: الله يكومج ويجيبه بالسلامه ان شاءالله.
حسناء: الحمدلله الله هداها لوديان واتنازلت يمه البيت كئيب وظلمه بدونك وخاله تخلصها بجي على كل وجبه من تشوف مكانك.
حسام: طلكتها.
ظلت تباوعلي يمكن مسمعتني او مستوعبت.
حسام: طلكت وديان.
فتحت عيونها وظلت ساكته.
حسام: متحجين شبيج؟
حسناء: شحجي؟ مااصدك.
حسام: ليش؟ شنو إلى سوته شويه؟
حسناء: مو قصدي بس اقصد يعني انت تحبها.
حسام: اييي؟
حسناء: اي.
غثتني حجايتها تخيلتها تكولي انت متعود على قلة ادبها وعدم احترامها او متعود تتقبل منها كل شي كل تصرفاتها وحجيها بدون متعترض اشمعنى هسه؟
كلتلها بعصبيه: تدرين اصلا اني ليش اتعاركت وياها وضربتها؟ علمودج انتي لان عرفت إلى صار بيج ومرضج هي سببه السحر إلى جان بيج هي المسؤوله عنه.
وتدرين ليش طولت هلكد بالتوقيف؟ لان رادتني اطلكج حتى تتنازل.
وتدرين ليش هسه اني بدون شغل؟ لان خيروني بينج وبين شغلي والمعرض.
وبكل هالمواقف اختاريتج انتي واختاريت ابني.
حسناء: زين ليش صرت عصبي اني شحجيت؟
يمكن فعلا مجان قصدها إلى فهمته يمكن لان ضميري لحد الان يأنبني لان سمحت بيوم من الايام لوديان تسمعها كلام وتتعالى عليها.