رواية إطلاق سراح مشروط للكاتبة روز الفياض الفصل التاسع والعشرون
حسام: يمكن احبها او يجوز تعودت عليها بس احبج اكثر.
شبكتني وباست خدي كالت: ادري بيك تحبني واني احبك اكثر اموت عليك.
حجيت لامي امي هم سكتت محجت شي.
حسام: شبيج سكتي مثل جنتج؟
باوعت امي لحسناء مستغربه.
حسناء: مالي علاقه تره.
امي: ادري مالج علاقه ومتأكده انتي لو بيج اذيه وبيج كطاعه جان ماأذتج هي.
بس اني مجنت اتمنى الامور توصل للطلاك بس هي اخذت الجزاء إلى تستحقه محد يتحمل مره مثلها وماكو وحده مؤدبه ومتربيه ومحترمه تسوي إلى سوته.
هاذي الحقيقه حتى لو مؤلمه. براحتك يمه انت سوي إلى تشوفه مناسب مدام مابي حرام انت تعرفني مااحب الظلم ومااريدك تكون ظالم وادري بيك ومتأكده انت مو ظالم وعندك مخافة الله وتعرف حدود ربك اذا شايف تصرفك هذا هو الصحيح فاني وياك مو عليك اني هم ماارضالك هالاذيه وميهون علي اشوفك مشلوع كلبك ولايرضيني إلى سوته ولو بنتي إلى مسويه هيج لاي سبب جان هم مارضيت وطيحت حظها.
ظلت امي تحجي ومن حجيها موافقتني على إلى سويته ومأيدتني رغم امي من النوع إلى دائما مع الجنه ضد الابن.
قررت باجر الصبح اخابر لاخو وديان بأمريكا واكوله ينطيها خبر راح امشي بأجراءات الطلاق بصوره رسميه.
بالليل اتصلوا اهل حسناء ابوها واخوانها سلموا علي واتحمدولي السلامه وتأسفوا من إلى سواه ابن عمهم.
واتشكروا مني لان اتجاوزت عن إلى سواه ومسويتها شغله عشائريه او اشتكيت عليه رغم هو الغلطان.
بالليل هم اجو الجيران والاهل وظلينه على هالحال لمدة اسبوع خطار 24 ساعه ناس تجي تتحمدلي السلامه.
امي خافت على حسناء من التعب كلتلي: استحي اكوللها خل امج وخواتج يجون وياج يساعدوج بالبيت انت كوللها.
حسام: ان شاءالله.
امي: اني والله هالايام ابالي فكره ماادري اذا تعجبك وتقبل بيها لو لا؟
حسام: فكرتيش؟
امي: اني اكول ام حسناء وخواتها بدل مكاعدين بهالغرفه وممرتاحين اصلا بيها وبحدهم ماوياهم رجال وهمه نسوان وحدهم وخواتها زغار والدنيا تخوف وهمه محسوبين علينه هسه ومحسوبين بمسؤوليتك وبأمانتك فليش ميجون يسكنون بالطابق الفوك هو بي غرفتين خليهن الهم وحمام اكو بس مطبخ يحتاجون ودرج خارجي.
وديان حتى لو مطلكتها مترجع هنا بعد واصلا مترهم هي وحسناء بنفس البيت بعد كل إلى صار. فشتكول؟
عالاقل امها وخواتها وعينهم عليها ويساعدوها احسن من الغريب ورادين عنها وعني الوحشه.
سكتت شويه بس عجبتني الفكره شلون ممفكر بيها.
حسام: خوش فكره يمه ياريت بس خاف ميقبلون همه نفسهم عزيزه.
امي: لا يقبلون لخاطر بتهم بدل ميظلون بقلق عليها وهي هم تظل بقلق عليهم ويانه احسن وأءمن.
انت كول لحسناء وهي تقنع امها ان شاءالله واني هم راح احاجيها حتى متنحرج مني وتستحي.
حسام: ان شاءالله اليوم احاجيها.
حجيت ويه حسناء حسيتها استحت وانحرجت مني.
حسام: حبيبتي ليش هيجي تستحين مني احنه اهل اهلج اهلي انتي مو تحبين امي وتعتبريها امج؟
حسناء: اكيد الله يعلم.
حسام: زين معناها ليش تستحين وتنحرجين تره اني هم احب امج وهم اعتبرها مثل امي وخواتج خواتي الزغار يعني احنه اهل المفروض مابينه احراج وخجل المفروض متجاوزين هيج اشياء ونتصرف بأريحيه.
سكتت بس حسيتها اقتنعت بالليل رجعت اكدت عليها قبلت وكالت راح تكول لامها هالحجي وتشوف.
اقنعنه ام حسناء وقبلوا يجون يسكنون ويانه بالطابق الفوك واجوا الحمدلله وجنت مشغول وياهم ضبطتلهم الطابق الفوك ورتبته وطلعتلهم درج حتى براحتهم ميحسون بالاحراج من عدنه.
وقررت افتح معرض اثاث خاص بيه وبديت بالمشروع كل هالامور منستني موضوع الطلاق لكن شغلتني لان الاولويه للاهم ثم المهم عندي اول شي امي وحسناء واهلها وهسه امنت عليهم لان في حال صار شي لاسمح الله مثل المرتين إلى فاتوا ماابقى بقلق وخوف لان اهل حسناء وياهم.
ثانيا باب رزقي جان لازم استعجل بي والحمدلله الله وفقني بي وتسهلت الامور.
ثالثا وبالاخير موضوع الطلاق واجراءاته.
اتصلت بأخو وديان وبلغته حتى بعد عداني العيب.
بس جوابه صدمني: حسام متكدر تطلكها لوديان.
حسام: ليش يابه على راسها ريشه لو طلعت مظلومه؟
اخوها: لا لاعلى راسها ريشه ولامظلومه تستاهل وكل الحق وياك واحنه منلومك وغيرك ميسكتلها ونعرف شكد اتحملتها واتحملت دلعها وممنونين منك ونعرف متحصل واحد مثلك ومثل اخلاقك ومتأكدين من هالشي.
والله شاهد الحجيه تخابرني تبجي عليك بواجي.
انت ابنها واخونه مو بس نسيبنه وعشرت عمر ونحبك ونعتبرك واحد من عدنه الله يشهد بس شنسوي بعد الله ابتلانه بوديان ولعلمك والله من يوم إلى صار اني محاجي وياها رغم اني كتلك طلكها لزوجتك الثانيه وحاولت اقنعك بس الله يشهد هذا من محبتي الك ومااريد نخسرك انت طول عمرك جنت شايل الحجي الله يرحمه وساد مكانه وشايل المسؤوليه وحدك.
بس المشكله طلاكك باطل لان وديان حامل بالشهر الثالث.
ظليت فاك حلكي من الحجي إلى سمعته لااعرف احجي ولااعرف شكول.
ظليت ساكت والولد يحجي.
اخر شي اتعذرت منه وكتله اجو خطار بعدين ارجع اتصل بيه ونحجي ان شاءالله.
سديت التليفون ظليت اضرب اخماس بأسداس هاي السالفه منين طلعتلي ياحمل هذا صارلنه 15 سنه متزوجين الا هسه من طلكتها طلعت حامل!
بس ياترى صدك حامل لو هاي حركه وفلم حتى مااطلكها ويخرب برستيجها كدام الناس؟
الك الله ياحسام...