رواية إطلاق سراح مشروط للكاتبة روز الفياض الفصل الثلاثون
سديت التليفون وبقيت ماادري شسوي هذا يحجي صدك لو هذا فلم؟
زين شكول لامي وحسناء؟
رحت لامي اركض باوعتلها بغرفتها بحدها ماكو حسناء ولا لاكيشا دخلت وسديت الباب.
هي متمدده شافتني سديت الباب كعدت كالت: شكو؟
حسام: ماكو شي شبيج.
وضحكت من خوفي وصدمتي مااعرف شلون ابدي الموضوع وشنو اتصرف.
امي: كول شتريد؟
حسام: جنت احجي ويه رافد اخو وديان.
امي: ايي؟
حسام: اي علمود موضوع الطلاك بس كلي طلاكم باطل.
امي: هاا اشتغلت لعبات وديان؟
حسام: سمعي يمه سمعي اول وبعدين كولي لعبات.
امي: ليش بالله باطل شبيها حامل خوما حامل؟
حسام: اي بالضبط.
امي: شنو بالضبط؟
حسام: حامل.
امي ظلت صافنه بوجهي ممصدكتي عباله اتشاقى يمكن بعد كالت: ها حسام حنيت؟ منك لو منها هذا الفلم؟
حسام: شحنيت اكولج رافد خابرني يكولي حامل وعليها 3شهور.
امي: يعني من جانت هنا مو صح؟
حسام: اي بالضبط.
صفنت امي وكل شويه وكالت: سبحانك ربي من طلكها يالله.
حسام: هسه شلون؟
امي: شمدريني يايمه بعد اذا حامل صدك معناها كلام الرجال صحيح طلاكم باطل يعني بعدها على ذمتك مرتك مثل مايكولون.
حسام: ايييي مثل مايكولون بس بالحقيقه شلون؟
اتنهدت امي كالت: والله ماادري هذا اللون بعد.
حسام: مااشتهي اباوع بوجها.
امي: حقك بس بعد شتسوي لازم تروحلهم وتشوف السالفه شنو تفتهم الموضوع صدك لو جذب اذا صدك شلون تتصرف تجي هنا لو تبقى يم امها شوف شلون بعد تتفقون على حياتكم.
حسام: اووف اووف.
امي: حسناء تدري؟
حسام: لا بعدني ماكلتلها وماادري شكول.
امي: بعد هو قابل بأيدك اذا صدك بعد هذا امر ربك وهذا ضناك حاله من حال ابنها.
حسام: اي طبعا اكيد بس هسه عبالها اني تراجعت مااريد اطلك وديان حنيت على كولتج.
امي: اي صحيح بس بعد شنسوي بعد هي اذا حامل اول وتالي راح يبين، قابل انت تدري.
عفت امي محتاره ومتعجبه مثلي ورحت لحسناء حتى احجيلها.
حسام: شتسوين؟
حسناء: مااسوي اتفرج على شغلات النونو شوف شلون حلوات.
كعدت يمها كتلها: اخو وديان خابرني قبل شويه.
حسناء: شيريد؟
حسام: علمود موضوع الطلاك، يكول الطلاك باطل.
راسأ ذبت إلى بأيدها ودارت علي تباوع حسيتها محتاره شتكول فكلتلها: وديان حامل عليها 3شهور.
حسناء: حامل؟
هزيت راسي اي وهي سكتت معلقت بشي.
حسام: سبحان الله.
كالعاده ماعدها رد فعل بقت ساكته واني هم ملحيت عليها ولا اتناقشت بالموضوع وياها.
ظليت متردد مااعرف شنو اسوي وشلون اروح لوديان واكعد واحجي وياها بعد كل إلى سوته؟
بعدين رحت لان ماكو شي ثاني اكدر اسويه ولازم الحجي يكون وجها لوجه.
رحت لبيت اهلها فتحت امها الباب ورحبت بيه دخلتني للصاله البيت هدوء يمكن وديان طالعه كالمعتاد.
بدينه نحجي اني وامها حجت نفس الحجي إلى حجاه اخوها واني اسمع بعدين كالت: خل اروح اكعد وديان حتى تتفاهم انت وياها بس فدوه خاله بهدوء مو بعصبيه وصياح حتى توصلون لحل يرضيكم اثنينكم.
هزيت راسي كلتلها: ان شاءالله.
اجت وديان سلمت وكعدت واني صحت على امها كلتلها: حجيه انتي هم كعدي حتى كل شي يكون كدامج.
كعدت وبدينه نحجي وبدت وديان تبرر إلى صار وتحاول تتعذر كلتلها: اني جاي علمود موضوع الحمل مو علمود اي موضوع ثاني اني اجيت حتى اعرف اذا صدك حامل.
باوعت هي لامها يمكن جانت متوقعه اجي طاير من السعاده واخذها بالحضن وانسى كل إلى سوته ونرجع عادي كأنه مصاير شي.
برغم كل شي اني فعلا فرحان بخبر الحمل مهما كان هذا هم ابني وماله ذنب.
اتفقنه تبقى ويه امها ساكنه واني مااقصر وياها ان شاءالله اقوم بكل واجباتها هي والطفل.
اباوعلها بطنها شويه مبينه بس مبين على وجها تعب الحمل.
والي فهمته من خلال كلامها وكلام امها انه هي تاركه الدوام علمود الحمل.
اتعجبت!
هاي وديان الانانيه تركت دوامها علمود الحمل مااصدك.
رجعت للبيت متعجب ومستغرب.
مرت الايام بهدوء مابين حسناء ووديان جنت مااروح يم وديان وابات اروح بس شويه اشوفها واطمئن عليها وعالطفل وارجع.
حسيت هي تحاول تغير اسلوبها وطريقة تعاملها بس مااكدر ارجع اتصرف وياها بصوره طبيعيه تماما.
جانت من تروح كل شهر للدكتوره حتى تشوف وضعها ووضع الجنين تتصل تطمني او تدز مسج تحجيلي التفاصيل.
وجانت حامل ببنيه وفرحت حيل لان ربي رزقني هيج رزق ولد وبنيه بنفس الوقت.
وديان جانت جدا فرحانه بالحمل رغم انه هي طول عمرها متحب الاطفال وماعدها احساس بالمسؤوليه لكن سبحان الله يمكن لان هذا الطفل طفلها.
بعد مرور3 شهور حسناء دخلت بالتاسع ووديان بالسادس.
خلال هالاشهر إلى مرت وديان جانت غير انسانه هادئ حبابه متجيب طاري حسناء خير شر، ومن اروح جانت تلزم بيه عالغدا لو عالعشا بحجة تسويلي واهس عالاكل.
استحي افشلها رغم كلبي شايل عليها لهسه بس التغيير إلى مبين عليها مخليني لين شويه وياها وبنفس الوقت التفكير بمصير بنتي ذبحني.
يعني اني اتمنى طفل كل هالسنين ومن الله ينطيني2اتعافى واخلي الثاني يعيش بعيد عني؟
بنفس الوقت صعب علي ارجع اتصرف طبيعي ويه وديان مجروح منها جرح جبير وكلما اتذكره يضيك صدري.
بالليل حسناء حست بآلام الولاده اخذناها اني وامها ورحنه للمستشفى.
صوتها من تصرخ من الالم خبلني هيج الولاده صعبه ومؤلمه؟
لهذا السبب الجنه تحت اقدام الامهات اذا بس الولاده هيج فمابالك بما بعد الولاده؟
وره تقريبا ساعتين جابت بس الولد طلع متوفي ابطنها الحبل السري على ركبته اثناء الولاده.