قصص و روايات - قصص رائعة :

رواية إطلاق سراح مشروط للكاتبة روز الفياض الفصل الحادي والثلاثون

رواية إطلاق سراح مشروط للكاتبة روز الفياض الفصل الحادي والثلاثون

رواية إطلاق سراح مشروط للكاتبة روز الفياض الفصل الحادي والثلاثون

حسناء نفسيتها تعبت واني جنت اتعس منها بعد كل هالتعب والصبر هيج يصير اللهم لااعتراض على حكمك.
انطونياه حتى ادفنه اباوعله انعصر كلبي هذا وهو طفل مالحكت اشوفه فاتح عيونه ويباوعلي ولا لحكت اشوفه يضحك ولا لحكت اسمعه يناغي ولاربيت وهيجي معصور كلبي ومقهور ومختنك شلون باللي يربي ويكبر وتالي يموت يستشهد لو ينقتل بدون سبب الله يساعد الاباء والامهات.

والامهات اكثر من الاباء تعب الحمل والولاده وبعدين التربيه والتعب والسهر وتالي يروح تعبها...
برغم كل التعاسه إلى جنت بيها بس خفت على حسناء تنتكس صحتها فقررت اخذها سفره تغير جو شويه حتى تنسى وتلتهي بلكي تنسى الموضوع.
من رجعنه بعد اسبوع رجعنه لحياتنه طبيعي.
من عرفت وديان باللي صار حسيتها شمتانه بحسناء رغم هي مكالت شي.
بقت وديان حامل وجدا فرحانه بالحمل بصوره مو طبيعيه.
امي: حسام تعال اريد احجي وياك.

رحت وراها لغرفتها وكعدنه نحجي كالت: يمه شلونها وديان؟
حسام: الحمدلله تمام.
امي: شراح تسوي هسه؟
حسام: بشنو؟
امي: بوديان بعدك تريد تطلكها؟ هسه هي ابطنها طفله وحرام هالطفله بينك وبينها.
حسام: الله كريم يمه بعد وكت على هالحجي بعدها توها راح تدخل بالسابع.
امي: ميخالف فكر لخاطر الطفله مو لخاطرها.
طلعت من يم امي محتار بكلامها شلون ابقيها بعد كل إلى سوته؟ وشلون اطلكها وبنتي عدها؟

وراها بكم يوم دخلت وديان بالشهر السابع وجان عدها الم بسيط وخايفه اتصلت بيه الحجيه امها واخذناها للدكتوره كالت تقلصات تحتاج راحه وتبقى نايمه.
واحنه راجعين وديان رادت شغلات من غرفتها فأخذتهم لبيتنه عالسريع وصلنه حسناء واختها الزغيره جانوا كاعدين بالحديقه فنزلت وديان واني والحجيه امها بقينه بالسياره.
وره ربع ساعه رجعت واخذتهم لبيت اهلها.

من رجعت للبيت بالليل حسناء جانت كولش ضايجه ومبين عليها باجيه سألتها شبيج شكو كالت ماكو شي فكرت يمكن بعدها متأثره عالطفل وخصوصا شافت وديان اليوم من اجت حامل وبطنها جبيره.
حسام: حسنائي ليش هيجي ساكته اليوم ونايمه من وكت؟
حسناء: ضوجه كلت انام احسن.
حسام: زين مشتاقلج؟
ضحكت كالت: والمطلوب؟
حسام: المطلوب??.

وره شهر تقريبا حسيت بحسناء تعبانه وجها اصفر ومالها خلك ومن تسوي اي شغل بالبيت انتبهت عليها توكف شويه ترتاح وبعدين ترجع تكمل سألتها: شبيج؟
حسناء: ماادري والله بس احس جسمي يرجف يمكن فقر دم.
حسام: تردين اوديج اليوم للدكتور؟
حسناء: لا امي كالت راح تأخذني.
حسام: اي مو مشكله اني اخذكم اوصلكم واروح للمعرض العصر جهزي نفسج.
حسناء: ان شاءالله.

العصر وصلتهم للدكتور ورحت للمعرض للمغرب وهمه بعدهم كلما اتصل تكول بعدنه بعدين اتصلت كالت: خلصنه وراجعين للبيت.
حسام: زين ليش مااتصلتوا اني اجي ارجعكم.
حسناء: لا شيجيبك اخذنه تكسي.
حسام: زين شنو كال الدكتور؟
حسناء: من ترجع نحجي هسه احنه بالسياره.
بالليل من رجعت للبيت لكيتهم كاعدين بالحديقه امي وحسناء وامها وخواتها مسوين عشا وكاعدين بالحديقه منتظريني حتى نتعشا سوه.

سلمت ودخلت حتى اغسل وابدل واجي اتعشى وياهم بس قبل لا ادخل صحت على حسناء.
اجت وراي كلتلها: ها شنو كلج الطبيب؟
ابتسمت كالت: مستعجل.
حسام: غير اطمئن، شكال؟
حسناء: سوالي فحوصات وتحاليل مثل مااتوقعت نسبة دمي نازله بس حامل.
جنت داغير ملابسي من كالت حامل عبالي تتشاقى التفتت عليها ضحكت كلتلها: عبالي صدك.
حسناء: هو صدك.
حسام: كولي والله؟ تحجين صدك؟
حسناء: ههههه والله العظيم.

صدك فرحت الحمدلله شي غريب بعد مرور شهر واحد بس سبحان الله.
حضنتها كلتلها: مبروك والله هالمره يمكن فرحتي اكبر من المره الاولى الله يسهل عليج ولايضيعلج تعب ان شاءالله.
حسناء: امين يارب العالمين.
طلعنه اتعشينه وكعدنه نسولف ونضحك الحمدلله خبر حمل حسناء السريع والغير متوقع بهالوقت غير الجواء الكئيبه إلى بالبيت بعد إلى صار.
الساعه ب3 الفجر اتصلت الحجيه ام وديان علي وديان يمكن عدها ولاده.

رغم انه هي بالشهر الثامن بس جان عدها ولاده مبكره.
جابت بنيه خلوها بالخدج سميناها امنيه.
بقت لثاني يوم بالمسشتفى وبعدين طلعناها للبيت بس الطفله بقت.
امي ظلت تلح على موضوع وديان تريدني انسى موضوع الطلاك لخاطر امنيه.
من اجت امي لوديان تتحمدلها السلامه وتشوفها فتحت الموضوع وبدينه نحجي وديان ساكته محجت اي شي.

وره كم يوم رحت حتى احجي وياها وحدي واوضحلها انه الامور ماعادت مثل الاول واي غلطه ثانيه منها مااسامحها واي تصرف عدائي تجاه حسناء مراح اسكت.
بس فاجأتني اول ماحجيت وكلتلها: راح انسى إلى صار ونفتح صفحه جديده لخاطر امنيه.
وديان: بس حتى نكون واضحين من البدايه حسام اني مااتحمل تبقى وياك حسناء.
صفنت عليها بعد فوك شينها كوات عينها.

رجعت كملت كالت: لو اني لو هي انت اصلا اتزوجتها علمود الجهال وهاي صار عدنه بنيه الحمدلله وهي ابنها مات يعني مابقى شي يربطك بيها بعد تكدر تطلكها ونعيش حياتنه بعد براحتنه.
ظليت صافن شنو هالبرود إلى عدها.
طلكها ابنها مات!
مجاوبتها ماعندي جواب عفتها وطلعت.
رجعت للبيت واني افكر بحجيها هي متعرف بحسناء حامل من جديد يمكن جان اتخبلت او يمكن جان رجعت سوتلها سحر او فد شي ثاني حتى تخلص منها ومن إلى ابطنها.

بالليل قبل العشا رحت لامي لغرفتها وكعدت احجيلها الحجي إلى حجيناه اني ووديان: شرطها اطلك حسناء بما انه اني اتزوجتها علمود الاطفال وابنها مات فمابقى شي يربطنه على كولتها.
راسا دخلت حسناء.

الفصل التالي
جميع الفصول
روايات الكاتب
روايات مشابهة