رواية إطلاق سراح مشروط للكاتبة روز الفياض الفصل الرابع والعشرون
بقيت حاضنها وامسح على شعرها اتأمل ملامح وجها.
هذا الوجه إلى غابت عنه الحياه ذيج الفتره الحمدلله من انتهت وان شاءالله متنعاد.
اتذكرت وديان شكد فرق بينها وبين حسناء الحمدلله ربي من انطيتني زوجه تحبني وتخاف علي بعد هالعمر يمكن لان صبرت هوايه على وديان وعلى موضوع الاطفال الله عوضني بحسناء.
كمت سبحت وحلقت حتى ارتاح وانسى سالفة التوقيف وايامه السوده رغم مجان ناقصني شي الولد مقصروا وحتى الضابط جان خوش ولد.
بس الحريه غير وواحد ابيته غير.
كعدت امي العصر اتفاجأت من شافتني وظلت تبجي ساعه وحسناء تبجي وياها ضحكت كلتلها: شيسموها هاي؟
امي: يمه الحمدلله من شفتك قبل لااموت.
حسام: اسم الله عليج شنو تموتين بعدج شابه.
ضحكت وغمزت لحسناء.
امي: لا اموت من القهر. منرالقهر اموت مال وديان.
استغربت كلتلها: شبيها وديان؟ شسوت؟
حسناء ساكته متحجي.
امي: يمه برعه مرتك برعه متخاف ولاتحترم ولاتقدر ولايوكف بعينها احد لاجبير ولازغير لارجال ولامره.
امي تحجي بعصبيه وحجيها غثني اكيد وديان مسويتلها سالفه لو مصيبه.
حسام: يالله سترك. شكو يمه شسوت؟
حسناء كامت ماادري وين راحت.
امي التفتت علي كالت: هدت علينه البارحه بالليل هنا وظلت تحجي وتغلط على البنيه واهلها وظلت تحجي وتعير بيهم لفوا ونزل وفكور ومن حجيها اليفشل حجي مينسكت عنه وراحت.
وكامت المره تريد تاخذ بناتها وترجع لبيتها بالليل لو اني اتوسلت بيها وحلفتها وكلتلها ازعل اذا طلعتوا.
كوه قبلت تبقى انوب كعدت الصبح لكيتها ماخذه بناتها ورايحه لبيتها.
فشلتنه الله لايوفقها شوفلك حل يمه هاي مو مره هاي مرمره قبل الحجي عدل وجنت تستحي منه ولو هو الرجال الله يرحمه ميرضى عليها.
بس هسه الله اخذ امانته بعد ظلت بكيفها تتصرف ولازم تحطلها حد شنو محد تارس عينها؟ نشتغل عدها؟
اتنهدت كلش ضجت وديان راح تجلطني مصختها وتجاوزت حدودوها كلت لامي: هينه يمه وسهله ان شاءالله حسابها عندي اني اعلمها مو على كيفها تتصرف وتحجي هذا بيتي واستقبل بي إلى يعجبني واذا ميعجبها خل تبقى ابيت اهلها.
واذا على ام حسناء وخواتها اني اروح واطيب خاطرهم ان شاءالله ليظل بالج.
كمت رحت شفت حسناء وين لكيتها بالغرفه كاعده صافنه وحاطه ايدها على خدها.
حسام: شتسوين كاعده هنا وحدج؟
كعدت يمها كلتلها: لتضوجين وديان اني اعلمها واحاسبها على كل الكلام إلى كالته.
هذا بيتي يعني بيتج وبيتج يعني بيت اهلج يجون بأي وقت محد يحقله يمنعهم او يسمعهم كلمه مو حلوه. زين؟
هزت راسها زين.
ادري بيها مقهوره ومغثوثه مو سهله واحد الناس تعيره بفقر لو بأصل لو بمرض لو بشكله.
كلها اشياء خارجه عن ارادته ماله ذنب ولادخل بيها.
بس اكو ناس هيج شايفه نفسها عالفاضي نافخه نفسها ومسويه لنفسها برستيج وهم بدون اخلاق ولايملكون ذرة حيا او مخافة الله مو شرط تكون زوجه اولى او ثانيه إلى تتصرف بهالشكل.
ممكن تكون ام زوج او اخت زوج او صديقه او عمه او خاله او زوج حتى إلى المفروض تكون كرامة زوجته من كرامته.
كمت بدلت ملابسي ورحت لوديان بدون مااتصل دخلت للبيت بدون ماادك الباب على اعتبار محد موجود غريب بس وديان والحجيه امها.
فتت للهول شفت الحجيه امها لازمه سبحتها وكاعده عالسجاده سلمت وكعدت يمها بهدوء وهي تسبح وتدعي.
اسمع صوت وديان تحجي ويه وحده بالصاله مالتهم عدها خطار.
من صوتها عرفتها وفاء صديقتها تسولف وتضحك بصوت عالي.
جنت كاعد ويمي عالقنفه جنطة وديان ودك تليفونها على كيف اكثر من مره.
فتحت الجنطه حتى اطلع تليفونها وانطيه للحجيه امها توديه الها بس اتعجبت من شفت تليفوني إلى ضاع مني بجنطتها.
اتخبلت بايكه تليفوني معقوله؟
حسيت شبت بيه نار كوه سيطرة على اعصابي كمت وكفت وظليت رايح جاي يم باب الصاله منتظرها مااكدر اكعد بعد.
سمعت صوتها يقترب وهي تسولف وتضحك يمكن راح تفتح الباب بس صدمني كلامها إلى سمعته: ختولي الله ياخذها عبالي خلصت منها بزونه بسبع ارواح شسوي واخلص منها بالله كليلي؟
وفاء: شتسوين اكثر عمل وسوينه وجن ودزينه واشباح ووحوش ماخلينه شنسويلها بعد هههههههه.
وديان: الله ياخذها الظاهر عملج مو زين مو يكولون هو النكس اقوى شي لعد وينه اشو جنها صل كل شي مابيها البارحه من شفتها لا وبطنها صايره شكبرها كبر.
فتحت الباب واني واكف اسمع حجيهم اثنينهم وانصدموا من شافوني...
وفاء رأسا باوعت لوديان بخوف وسلمت وطلعت بدون متباوعلي ووديان وجها ظل ينطي الوان.
طلعت وره وفاء للباب واتأخرت اكيد خافت خاف سمعت الحجي.
دخلت مبتسمه ابتسامه صفرا خايفه ومرتبكه كالت: ها طلعت الحمدلله عالسلامه؟ شوكت اجيت؟
مجاوبتها بس طلعت التليفون وخليته كدامها باوعتلي كالت بارتباك: هذا تليفونك خابرني واحد لاكيه وانطيته العنوان وجابه إلى للدوام اليوم.
حسام: منو هذا إلى لكاه انطيني رقمه خل اتصل بيه اشكره.
وديان: مسحت رقمه وسويتله حظر حتى ليرجع يدك علي.
حسام: وين جان صارله شهر توه اتذكر يرجعه؟
وديان: مو زين رجعه؟
حسام: ليش مكلتيلي حسناء مريضه مو امها اتصلت بيج اكثر من مره؟
وديان: نسيت.
حسام: نسيتي مره مرتين؟ يوم يومين؟
وديان: اني فارغتلها بياحال جنت مو ابويه جان مريض وبالعنايه؟
حسام: هذا مو عذر عرفتي بيها شنو جانت حالتها وسكتي.