رواية إطلاق سراح مشروط للكاتبة روز الفياض الفصل الخامس والعشرون
وديان: شيصير بيها خل يصير ميخصني مو مسؤوليتي ومفارغتلها اني ولا اشتغل عدها حتى ابلغك لو ابلغ غيرك.
حسام: وبأي حق تجين البارحه وتتعاركين وياها وويه امها وخواتها وتغلطين عليهم وتسمعيهم هيجي كلام؟
وديان: والله حقي اسوي اليعجبني ابيتي واني محذرتها ومحذرتهم قبل ميعتبون بيتي ويجون تريد تشوفهم هي تروح تولي الهم.
رفعت حواجبي من صلافتها كلتلها: سمعيني زين وديان البيت بيتي من يصير بيتج طردي اليجيج بكيفج براحتج لان هاي اخلاقج بس ابيتي مالج اي حق تتصرفين مدام اني موجود وامي موجوده انتي مالج كلمه حالج من حال حسناء لتفكرين نفسج احسن منها. افتهمتي؟
ردت علي بعصبيه ونتر كالت: لاوالله احسن منها.
حسام: بشنو احسن منها بالسحر؟
صفنت عرفتني سمعت كلامهم هي ووفاء كالت: ياسحر هذا؟ تريد تذب علي بلوه؟
حسيت روحي شطت من العصبيه ضغطت على اسناني حيل كوه لازم نفسي كلتلها: ولج شكد شفت بشر متحيونه وحقيره بس مثلج ماكو ماشفت. شنو من كلب عندج سحر ولج سحر تاليها تسوين تردين تموتيها؟ ليش شسوتلج؟ مو ابطنها طفل جان خفتي الله بي عالاقل.
وديان: مالي علاقه لابسحر ولابغيره هي مريضه اني شكو؟ عساها.
ذبحني انكارها وبرودها ولسانها إلى شطوله وحجيها المستفز لزمتها من شعرها ظلت تصرخ والحجيه تدفع بيه بس اني فقدت استلمتها كف وره الثاني لحدما تعبت اني ودفعتها.
ظلت الحجيه تبجي وتصيح علي متعرف شنو الموضوع كمت اريد اطلع كلتلها: الله لايوفقج ولايرضى عليج ويشلع كلبج مثلما شلعتي كلبي واذيتي هالفقيره وشلعتي كلبها وحتى هالطفل اله حوبه وراح تطلع بيج وتشوفين.
درت اطلع كالت: الله لايوفقكم انتو اثنيكم انت وياها ان شاءالله. اني الك حسام اني اعلمك منو وديان.
درت ردت ارجع اضربها بس الحجيه وكفت بيني وبينها.
طلعت واجت امها تركض وراي تبجي تريد تعرف شكو.
جنت بقمة العصبيه وتعبان ومحترك كلبي من حجيها ومالي خلك احجي بس استحيت من امها وحجيتلها السالفه.
ظلت امها فاتحه عيونها متعجبه متكدر تصدك بتها هيجي تسوي كالت: لا مستحيل خاله مستحيل مو لهدرجه كالوا تغار منها بس مو تأذيها هيجي.
حسام: خاله انتي حاجه بيت الله وبعدج بعدة موت انتي هسه مو جنتي كاعده على سجادتج وسبحتج بيدج وسمعتي حجيهم هي وهاي الحقيره وفاء؟
سكتت كلتلها: سمعتي لو لا؟ بصلاتج وصومج سمعتي لو لا؟
سكتت مكالت اي شي استحت شتحجي وشتكول بعد.
خليت وطلعت رجعت للبيت مخنوك وروحي طالعه.
دخلت شفت حسناء تسوي عشا ويمها لاكيشا تساعدها فتت بدون مااسلم كبل للغرفه وسديت الباب واتمددت اريد ارتاح شويه بعدني معصب ونار شابه بصدري مع الاسف كل هالضرب مابرد كلبي بيها بس بسيطه ان شاءالله.
دخلت حسناء واني صافن شسوي ويه وديان وشلون أدبها.
حسناء: ها حبيبي؟ شبيك؟
كمزت لان جنت صافن ورديت عليها بعصبيه ونتر: حسناء لتدوخيني رجاءا مفارغلج هسه.
حسيت ملامح وجها اتغيرت محجت اي شي خلت وطلعت.
ظليت كاعد بمكاني منزعج من وديان ومنزعج من نفسي ليش ماذبحتها وبردت كلبي.
استغفرت ربي ومسحت وجهي بأيديه اتذكرت حسناء يمكن زعلت خل اروح اشوفها هي وضعها ميتحمل زعل وضوجه وكآبه لاحول ولاقوة الا بالله.
مالكيتها بالبيت كلت اكيد بره بالحديقه طلعت شفتها كاعده تبجي كعدت يمها وخليت ايدي على جتفها كلتلها: ليش كاعده هنا انتي متحسين بالبرد؟
مجاوبتي. درت وجها علي كلتلها: شيصير لو اتحملتي عصبيتي شويه؟ والله تعبان وضايج ومتضايق حيل.
ردت اكوللها انه وديان وره كل إلى صار وياها بس مكدرت مطاوعني كلبي اخوفها اكثر واصدمها.
حسام: زين الدنيا بارده فوتي جوه وابقي زعلانه لتحجين وياي.
لزمت ايديها قالب ثلج حسيتهم: ايديج ثلج متحسين بيهم؟ البرد هذا مو زين عليج متتحملينه.
خلت راسها على جتفي كالت: لما انهزمنه جان شتا وبااارده ولما وصلنه للجيش بقينه وياهم اول يومين بالبرد ماكو بيوت ولامخيمات ولا فراش دافي.
شفناهم شلون ينامون عالتراب بالبرد وكل واحد منهم عنده بطانيه وحده هي فراش وهي غطا.
وشافونه بنات زغار وامي ويانه انقهروا علينه نزعوا قماصلهم وانطونياها وبقوا هيجي بالبرد.
بعدين من نقلونه اتعودنه عالبرد جنت الف رجليه بعلاكه نايلون قبل لا البس جواريب حتى مااحس بالبرد.
هسه هذا هنا ميعتبر برد.
حجيها مؤلم الله يعين النازحين بالخيم شكد شافوا ضيم وعذاب.
سكتنه شويه بعدين: حسنائي؟
باوعتلي كالت: امم؟
حسام: اممم ??.
بليلتها نمت مرتاح الحمدلله وفكرت باجر الصبح اروح افتح المعرض واشوف شخباره والعصر اخذ حسناء للدكتوره وعاجبني افاجأها بهديه.
اذا طلعنه من الدكتوره من وكت اخذها للسوك واشتريلها شنو يعجبها.
الصبح كعدتني حسناء حسيت نفسي بعدني نعسان واريد ارجع انام بعد سحبتها يمي كلتلها: نامي شعندج كاعده من الصبح؟
حسناء: الساعه 9ياصبح بعد.
حسام: ميخالف نامي.
حسناء: سويتك ريوك متريد تتريك؟
حسام: لا مااريد اتريك.
حسناء: لعد شتريد؟
فتحت عيني باوعتلها كلتلها: انتي.
ضحكت كتلها: ليش تضحكين مو انتي سألتيني شنو اريد؟
حسناء: مو هيج قصدي ههههه.
حسام: لعد شقصدج؟ يعني هسه طلعت اني اريدج وانت مترديني؟ معناها راح اروح لوديان.
سكتت واتغير وجها كلتلها: ها اشو سكتي؟ ضجتي؟
حسناء: لا ليش اضوج حقك هذا وحقها.
حسام: مو خوش زوجه انتي مستسلمه فد مره متغارين على زوجج ليش هيجي؟
حسناء: يعني شسوي؟