رواية إطلاق سراح مشروط للكاتبة روز الفياض الفصل الحادي والعشرون
خفت من كلامه بس رحت صحت للرجال جارنه إلى جان ويانه لان بقى برا ينتظر.
وطلبت من ام حسناء تصيح لاحد من الجيران.
راحت صاحت جارهم هو وابنه دخلوا للغرفه وامها خطيه واكفه خايفه ودموعها على خدها.
اشرلي الشيخ طلعها طلعتها بره كتلها: خاله انتي اخذي البنات وكعدوا بالسياره احسن لتظلون واكفين هنا بالبرد.
انطيتها السويج ودخلت وسديت باب الغرفه.
كل احنه واكفين 4 زلم والشيخ.
حسناء تباوعلنه بدون اي تعابير على وجها لاهي خايفه ولاهي مستغربه ولاهي تعرفنه ولاهي متعرفنه ماادري شتفكر.
اشترلنه الشيخ لزموها.
رحت اني كعدت وراها وحوطتها بأيديه الاثنين.
التفتت علي باوعتلي وابتسمت ابتسامه غريبه وعيونها بدا لونهم يصير احمر.
اجوا الولد لزموها من رجليها بدت تتفس حيل وتطلع اصوات.
الشيخ بدا يقرا بصوت عالي وهي كلما يعلي صوته يقوى نفسها ويعلى صوتها الى ان ظلت تصرخ.
وترافس برجليها وايديها 4 زلم احنه بالكوه لازميها هي تصرخ واني ابجي من اشوفها شلون تتلوى من الالم وبنفس الوقت خفت من كدما تتحرك وتضرب جسمها بكل قوه بالكاع خاف الطفل يتأذه لو يصير عدها نزف او شي.
استمر الوضع ساعتين انهد حيلنه بيهم كل قوه وحيل ماظل عندي حسيت ايديه من جتافي اتشلعت من كدما لازمها كوه وهي تقاوم.
ظل الشيخ يسألها ويحاجيها وهي تصرخ ويقرا عليها الى ان انهارت فد مره ووكعت متدري بشي بعد.
بس من جان يسألها الكلام كان موجه للجن إلى متلبسها فمن ضمن الاسئله إلى سألها اله: شتريد منها ومنو سلطك عليها؟
جاوبت: مااريد منها شي همه يردون هم ودوني عليها.
الشيخ: منو وداك؟
-مره ودتني.
حاول الشيخ يعرف منو مكدر بس المهم انه طلع منها وارتاحينه منه.
الشيخ: خلص عمي هاي طلع منها ان شاءالله هذا سمعتوه كلكم شنو كال لان هو إلى يحجي مو هي هذا جن يهودي مسلطيه عليها والي مسلطته وحده مره وانتو اعرف بوضعكم بعد.
ممنوع المغرب تسبح او تبجي او تسمع اغاني ممنوع تتواجد بأماكن بيها صريخ وعزا وبجي.
ودائما قران شغال بالبيت وخصوصا المغرب.
وبعد تعليمات ثانيه ووصايا اخرى.
طلعوا الجماعه ورحت صحت لام حسناء وخواتها ساعدوني شلناها خليناها بفراشها وغطيناها وشغلنه قران يمها.
دنكت بست ووصيت امها وخواتها عليها وطلعت رحت اوصل الشيخ.
رجعت الشيخ للحله ورجعت مهدود حيلي ميت من التعب ونعساان بس اخلي راسي على المخده اغفى بس مااكدر ارتاح بدون مااروح اشوف حسناء شلون صارت.
كبل رجعت لبيت اهلها لكيتها بعدها نايمه وجها اصفر.
حسام: شنو هاي رحت واجيت وهي نايمه؟
ام حسناء: الله يساعدها من البارحه منامت وجسمها تكسر من الضرب.
حسام: الحمدلله على كل حال.
ام حسناء: الحمدلله.
حسام: يالله خاله اني اروح ارتاح تعبان واريد اغسل واصلي وانام هم اني منايم صارلي يومين علمودها.
ام حسناء: روح خاله الله وياك الله يساعدك انت كل التعب عليك.
حجيتلهم الحجي إلى كاله الشيخ والتعليمات حتى ينتبهون عليها وان شاءالله انتهى الموضوع.
طلعت رحت لبيتنه تعبااانه بشكل وجسمي كله يوجعني ومهدود حيلي.
ونعساااان وجوعاان.
دخلت للبيت ويه اذان العشا سبحت واتعشيت وصليت وكعدت يم امي احجيلها تفاصيل اليوم وحالة حسناء.
خلصت ورحت كبل نمت ميت من التعب محسيت بشي منا للصبح نمت مثل القتيل.
اول ليله انام بهيجي راحه بدون ماافكر بحسناء خاف تأذي نفسها لو يصيرلها شي وبدون ماافكر باجر المن اوديها لو منو اجيبه الها يمكن يكدر يعالجها.
ربي الك الحمد والشكر.
الصبح كعدت على صوت القران عالي بالبيت امي الظاهر هم صارت بيها خوفه بسبب إلى صار.
توني غسلت وكعدت اريد اتريك واندك جرس الباب.
طلعت فتحته لكيت سيارة شرطه استغربت نزلوا منها شرطه 2 كال واحد منهم: انت حسام عبد الحميد؟
حسام: اي نعم اني اتفضل؟
كال: عليك القاء القبض.
حسام: القاء قبض؟ ليش؟
كال: تعرف فلان الفلاني؟
حسام: اي نعم اعرفه.
كال: هو مقدم شكوى عليك انت عليك فلوس بضاعه مامسددها.
ظليت صافن فعلا الرجال اله فلوس عندي بس اني لاناسي ولا متناسي بس جنت مشغول وتليفوني ضاع فماكو اي تواصل بينه والمعرض مسدود.
بس جان يكدر يعرف الوضع لو سائل عني ويعرف الظروف مو صعبه يعني.
انغثيت منه شدعوه عليه قابل اول مره نتعامل وياهم احنه.
اترخصت من الشرطي ودخلت غيرت ملابسي وكلت لامي وطلعت رحت وياهم.
بالمركز حجيتلهم كل شي كالوا منكدر نسوي اي شي لان الرجال المشتكي مسافر وهيج موضوع لازم يتم على اساس حل وتسويه مابينكم او اذا متدفعله معناها الشكوى تبقى قائمه واوراقك تتحول للقاضي وتنحكم.
ظليت متعجب شنو هالسرعه إلى تمشي بيها الامور شبسرعه وصلوها للقاضي.
وشهاليوم إلى اوله هيج دوخة راس مالحكت ارتاح من موضوع حسناء طلعلي موضوع المعرض والفلوس.
حسام: لا يابه ادفع ماعندي مشكله بس غير الرجال يجي؟
بعدين اني مو صاحب المعرض صاحبه اتوفى صار شهر لذلك انشغلت حجيتلكم القصه.
ولازم اطلع حتى اسحب فلوس وادفع للرجال.
كالوا: ميصير تطلع لحدما يجي صاحب الدعوه راح تبقى بالتوقيف.
وبقيت بالتوقيف 15 يوم لحدما رجع الرجال من السفر.
خلال هالفتره بالي يم امي وحسناء جانوا اصدقائي يجوني يشوفني خاف محتاج شي ويطمنوني على امي.