رواية إطلاق سراح مشروط للكاتبة روز الفياض الفصل الثاني
اليوم وديان تروح تجيب حسناء من بيت اهلها هي تجيبها اني مااروح هذا شرط من شروط وديان.
بدون زفه وهالسوالف وكل امور الزواج مهر ومدري شنو وديان اتفاهمت عليها وياهم وجان مهر بسيط ومطلبوا اي شي ناس تريد الستر.
ماادري شلون لازم اتصرف ويه البنيه اليوم من تجي وديان راح تروح لاهلها اليوم تبات ونبقى بالبيت اني وامي وحسناء ولاكيشا.
لاكيشا خدامه مثل مايكولون جبناها لان امي تحتاج احد يكون وياها بالبيت لان عاجزه ووديان مو من النوع الخدوم واصلا ممتواجده بالبيت اغلب الوقت واني هم عندي شغل اطلع الصبح وارجع الظهر بعدين ارجع العصر اطلع ارجع بالليل.
لاكيشا مسؤوليتها الاولى امي ثم البيت بس متلحك امي مره جبيره ومن النوع المتطلب متبطل طلبات.
لاكيشا يمها 24 ساعه مرات ارجع الكه لاكيشا مسويه شي بسيط للغدا لكن اغلب الاوقات لو اكل بالمعرض لو من ارجع نطلب من المطعم.
باوعت للساعه ب6 هسه اكيد وديان راحت تجيب حسناء من بيت اهلها.
اني هم لازم اليوم اطلع من المعرض من وكت اكيد وديان تعوف حسناء وحدها وتطلع الله يستر بس.
الساعه ب8 طلعت من المعرض على اساس اروح للبيت بس بقيت واكف اباب المعرض اخذ وياي شي للبيت لو لا؟
شآخذ مثلا كل شي موجود بالبيت الثلاجه متروسه خيرات ربي.
ركبت سيارتي ورحت بنص الطريق وكفت اخذت عشا ودوه لامي ورحت للبيت.
وصلت لكيت وديان موجوده تحجي بالتليفون خليت العشا عالطاوله وفتت جوه اباوع وين حسناء.
ماشفتها يمكن بغرفتها اخذت الدوه لامي ورحت سلمت عليها وانطيتها دواها وكعدت يمها كتلها: يمه ادعيلي.
امي: الله يفتحها بوجهك يايمه ويرزقك بالذريه ان شاءالله.
حسام: شفتيها حسناء يمه؟
امي: لا والله ماشفتها سمعت صوت وديان تحجي بصوت عالي بس ماادري ويامن وسمعت بعد صوت وحده ثانيه مااعرفها منو تضحك هم بصوت عالي.
اتنهدت وبقيت ساكت.
امي: شبيك يايمه المثلك اليوم فرحان عريس هههه.
حسام: عريسيش يمه البنيه زغيره طفله.
امي: صل على محمد ولاتخلي هالافكار براسك ماكو طفله بهالوكت والمره بسرعه تكبر مو مثل الرجال.
حسام: اخاف ظلمناها؟
امي: استغفرالله ظلميش قابل انت اجبرتها اشو حتى متعرفهم ولاتندلهم. روح يمه روح لمرتك ولتفكر هيج تفكير انت بس صير عادل بينهن حتى الله يوفقك.
حسام: الله كريم يمه الله كريم.
كمت رحت لغرفة حسناء دكيت الباب ودخلت شفتها كاعده عالجربايه ومدنكه سلمت وفتت كعدت يمها.
حسام: شلونج حسناء؟
حسناء: الحمدلله بخير.
حسام: عساج بخير.
حسيت نفسي حتى مااعرف احجي شحجي وياها مااعرفها هو اسبوع خطبه وعرس وحتى من رحنه عقدنه وديان ويانه بس عقدنه اخذتها رجعتها لبيت اهلها.
اباوعلها مدنكه مارفعت راسها شجعت نفسي: شبيك حسام مرتك على سنة الله ورسوله قابل بالحرام استغفر الله وانت هلكد مرتبك ومستحي وخايف.
انت الرجال لازم تشجعها حتى هي هم متخجل منك وتستحي لازم تخليها تتعود عليك انت هسه زوجها.
اباوعلها ملابسها بسيطه فستان لونه عنابي ولابسه شال اسود.
وديان ماقبلت تخليها تلبس بدلة عرس وتروح للصالون.
حسام: حسناء؟
رفعت راسها باوعتلي: نعم؟
ملامحها مرتبه عيونها بيها لون فاتح وخشمها زغير وحلكها بس بيضا بشرتها حيل يمكن بياض بشرتها مفهي ملامحها طاغي على ملامحها.
حست بيه صافن عليها رجعت دنكت.
بلعت ريكي وكتلها: مجوعانه؟ كومي خل نطلع نتعشا.
كمنه رحنه نتعشا مالكيت وديان يمكن راحت اسمع صوت سيارتها بره.
كعدنه عالطاوله نتعشا واني طلبت من لاكيشا تجيب امي تتعشا ويانه حتى تطري الجو وتسولف ويه حسناء.
اجت امي وبدينه ناكل حسناء مستحيه اباوعلها مامدت ايدها عالاكل بس تجاوب على اسئلة امي.
ماحبيت احرجها واضغط عليها اني هم اكلت شويه وكمت من الاكل.
بقيت اباوعلها مخليه ايديها بحضنها ولمحت بيدها الحلقه ابتسمت.
ماادري ليش مو مستوعب هاي مرتي يمكن لان غايتي من عالزواج الاطفال وبس او يمكن لان كلام وديان انزرع بدماغي: حسام شبيك مو انت تريد تتزوج علمود الاطفال خلص هاي البنيه مناسبه خل تجيبلك طفل طفلين وبعدين الله وياها بعد على شنو هالتفكير؟
حسام: بهالبساطه يعني؟
وديان: حسام انت بياعالم عايش؟ عالمك هذا مال الاصول والمثاليات والعيب والحرام تره ميفيدك بالعكس يضرك.
مو زين وقبلت تتزوج وهالزواج مااريد احد يعرف بي اني محجيت لاحد بس لوفاء وهي دلتني عليها.
حسام: وهي قبلت بهالحجي؟
وديان: منو؟
حسام: البنيه؟
وديان: من كل عقلك اروح اكوللها هالحجي طبعا متقبل.
حسام: اي بس هذا غش.
وديان: حسام لتدوخني مافارغه اني لحسناء ومدري منو شنو هالناس المهمه إلى لازم افكر بيهم وانطي واخذ بالحجي وياهم تحمد ربها هنا تعيش بنعيم اكل وشرب ويمها خدامه بعد شتريد اكثر. ورجاءا لتخبلها علينه هي ماشايفه فكر فلا تفتح عيونها وتخليها بكيفها وبراحتها.
خليني اني اتعامل وياها انت كتر نفسك عن هالامور. زين؟
سكتت واتنهدت ماادري تاليتها شنو هالسالفه.
خلصنه عشا ولاكيشا اخذت امي لغرفتها واني اخذت حسناء ورحنه للصاله.
تباوع عالتلفزيون بهدوء وبدون حركه عبالك متحنطه.
حسام: حسناء ليش لابسه حجاب بالبيت نزعيه وارتاحي منه.
مدت ايدها بحركه آليه فتحت حجابها بس ماشالته.
هي تباوع عالتلفزيون واني اباوع عليها.
شويه وكع حجابها انتبهت على شعرها بي لون مو اسود حيل.
مديت ايدي ولزمت ايدها ورحنه لغرفتنه...