رواية إطلاق سراح مشروط للكاتبة روز الفياض الفصل الثالث
اباوعلها نايمه من كدما بيضا خدودها بيهم نمش مديت ايدي لخدها اتحسس النمش ليش إلى بشرتهم بيضا يكون بيهم شي غريب يشد المقابل يراقبهم.
اتحركت شويه وهي مثل الطفل اتكورت وخلت راسها بصدري وحضنت نفسها.
ضحكت على كيف وحضنتها رغم مااعرفها بس حسيت هي إلى زوجتي وشايله اسمي حسيت بشعور مفتقده من زماان من سنين لانه اني و وديان كل واحد ينام وحده.
رغم كل شي يمكن احب وديان لان وديان حلوه وكشخه انيقه حيل ومهتمه بنفسها الى درجه.
لذلك يمكن ماارفضلها طلب ولااحب ازعلها وكل طلباتها اوامر.
ثاني يوم الصبح كعدت الساعه 9مثل كل يوم لان المعرض ينفتح ب10.
شميت ريحة جاي مهيل وبيض استغربت باوعت يمي حسناء ماكو.
كمت رحت غسلت ومريت لغرفة امي ماكو سمعت صوتها هي وحسناء بالمطبخ.
حسام: صباح الخير.
امي وحسناء: صباح النور.
اباوع عالطاوله مسويه سفره تشهي من الصبح واحد يتريك رغم اني مامتعود اتريك بس كعدت اتريكت وشربت جاي.
حسام: يالله اني اروح تردون شي؟
امي: سلامتك.
باوعت لحسناء: وانتي حسناء تردين شي؟
حسناء: سلامتك.
حسام: الله يسلمج. اذا ردتي شي اتصلي حتى اجيبه وياي او اخلي واحد من العمال يوصله للبيت.
سكتت ماحجت.
طلعت للمعرض وبقيت للساعه 1 ورجعت للبيت اول ماطبيت كفختني ريحة الاكل.
ابتسمت اول تالي ارجع للبيت الكه احد طابخلي لكمه.
حسناء: الله يساعدك.
حسام: الله يساعدج انتي مبين اليوم مستلمه المطبخ الريحه كفختني من الباب.
حسناء: طبعا لعد شلون. طالع من الصبح اكيد ترجع جوعان.
احس وجودها غريب بالبيت يمكن احتاج وقت حتى اتعود عليها.
عالغدا تسولف هي وامي امي شكلها حبتها وهي اصلا محتاجه احد يونسها ويحجي وياها.
للعصر اجت وديان جنت نايم سمعت صوتها تصيح على لاكيشا وبعدين اتغيرت نبرة صوتها الى استهزاء هذا إلى حسيت بي يمكن تحجي ويه حسناء.
طلعت من الغرفه شفت حسناء وامي كاعدين ووديان واكفه على راسهم تستجوب حسناء: اشوفج اليوم طابخه ومنظفه هههه اول مره اشوف عروس بيوم صباحيتها تركض للطبخ والنفخ هههه حقج حقج.
حسناء ساكته وامي ردت على وديان: اي والله يايمه حقها بنيه نادره ونظيفه وتعرف واجباتها وتعرف حق الزوج.
وديان: حق الزوج شنو ياكل وينام؟
امي: اقل شي يرجع للبيت يلكه مرته طابختله لكمه مرتبه فراشه غاسله هدومه.
وديان: هاي قبل خاله على ايامكم المره تشتغل خدامه للرجال.
حسناء: يعني امي وامج خدامات؟
دارت عليها حسناء وردت عليها بعصبيه: يمتى دخلت القصر امس العصر.
البارحه اجيتي لهالبيت شبسرعه طلع لسانج؟
بعدين امي اني وين وامج وين لتقارينين بينج وبين احد بهالبيت. افتهمتي حبابه؟
بعدين احنه شمتفقين مو لاارى لااسمع لااتكلم؟ يعني بعدج زغيره لتتليكفين وتسوين نفسج نادره تره الخدامه مو نادره بس هذا واجبها.
واكف اسمع حجيهم او بالاحرى حجي وديان وردود امي عليها لان حسناء بعد مافتحت حلكها بحرف ظلت تسمع مغثة وديان وساكته.
استغربت هاي يمكن مثلي سلبيه لا تحجي ولاتعترض.
اني رجال يمكن اختلف واتحمل ويمكن اذا عصبت يتغير اسلوبي بس هاي شلون راح تتحمل اسلوب وديان المستفز؟
يمكن تطلع مو هينه من بنات هالوكت الزغار إلى يعرفون كل شي اكثر من الكبار ويعرفون يمشون امورهم بكل ثقه الله اعلم.
لازم اتصرف وياها مثل ماكالت وديان ماانطيها مجال واخليها تتقوى علي واكبر راسها خليها هيج فقيره لاتهش ولاتنش.
كافي علي وديان ومزاجيتها.
مر اول شهر اني مرتاح بحياتي ماعايش هيج دلال ملابسي مغسوله مكويه ومرتبه واكلي كل وجبه بوقتها.
طبخها طيب شوكت اتعلمت تطبخ وهي بهالعمر وشلون امها جانت تخليها تطبخ متخاف عليها!
خلال هالشهر عرفتها من النوع القنوع ابد مطلبت مني اي شي حتى رصيد متطلب مصرف متطلب اي شي خاص الها مطلبت ومجانت تعترض على اي شي حتى على تصرفات وحجي وديان.
وديان جانت من تكون موجوده بالبيت تخلصها اوامر على حسناء طبخي هيج وسوي هيج ونظفي هذا وغسلي ذاك.
جانت تنفذ بدون نقاش.
وديان جانت حتى بملابسها تدخل لتلبسين هيج هذا ضيق وهذا مو حلو لونه عليج وهذا ذوق معدان.
صحيح هي لبسها بسيط بس حقها البنيه لاطالعه ولاماشيه ولاشايفه سوك ورغم وديان جان لبسها كله عالموديل ومخصر وضيق حتى بره البيت بس جانت مانعه حسناء تلبس كدامي هيج لبس عبالك اني غريب مو زوجها.
امي جانت كل كلمه من وديان تباوعلي بعتب بس مالي خلك احجي واسوي هوسه وخاف وديان تزعل والحجي ابوها هم يزعل علي ومااريد ازعلهم.
وكلت هم نسوان بينهم يتفاهمون مااتدخل احسن خليني متفرج.
كاعدين عالعشا وديان كالت: حسناء اخذي صحنج يم لاكيشا روحي اتعشي او يم خالتي بالغرفه اني وحسام متعودين ناكل وحدنه لان نحجي حجي خاص.
باوعتلها مو لهدرجه شنو تروح تاكل ويه الخدامه.
حسناء باوعتلي انصدمت حسيتها او يمكن انتظرت مني رد فعل بس شافتني ساكت كامت اخذت صحنها وراحت يم لاكيشا.
ردت احجي واعترض بس لساني عبالك مشلول ولاحرف طلع مني.