رواية إطلاق سراح مشروط للكاتبة روز الفياض الفصل الثاني عشر
بستها من خشمها كعدت.
حسام: صح النوم.
حسناء: بيش الساعه؟
حسام: خليتينه اليوم بدون عشا.
حسناء: لا والله؟
رفعت راسها تريد تكعد كتلها: وين؟ نامي طلبت اكل اليوم من بره انتي ارتاحي تكعدين من الصبح لليل تشتغلين اليوم اوف.
حسناء: ليش ماكعدتني اخاف خالتي جاعت خطيه هي اتغدت من وكت.
حسام: امي تعرفيها متاكل شي ثكيل بالعشا هسه اكيد لاكيشا سوتلها اجبان وعشتها ويمكن نامت.
حسناء: شكد عيب.
حسام: ليش عيب؟ قابل هي شنو شغلها هنا اشو بس امي الباقي كله انت مخلصته.
حسناء: اقصد عيب من خالتي.
حسام: حسناء؟
باوعتلي كالت: نعم؟
حسام: اريد طفل شوكت؟
حسيت ملامحها بهتت يمكن ضوجتها بس مو قصدي شي.
يمكن لان عرفت نفسي احبها ظليت احجي وياها بأريحيه بدون حواجز ولاخوف ولاخجل ولاتفكير.
حسناء: الله كريم.
حسام: اريد بنيه وولد واثنينهم يشبهوج.
وعدهم شامه مثل شامتج.
ابتسمت وكعدت تريد تكوم كتلها: وين؟
حسناء: اريد اروح للحمام واريد اروح اشوف خالتي فشله.
كامت واني هم كمت عبرت من يمي تريد تطلع دارت علي ابتسمت وفجأه حسيت لونها انخطف وعيونها ماادري شصار بيها مالحكت اوصل يمها وكعت.
حسام: حسناء.
حاجيتها ضربتها على خدها: حسناء. حسناء، حسناء.
ماكو متتجاوب شلتها خليها عالجربايه وجبت عطر شممتها بلكي تحس.
ماحست، حسيت من الخوف نشف دمي.
كمت فتحت بطل المي وغسلت وجها. حسيت بيها اتحركت.
حسام: حسناء؟ حبيبتي حسناء؟
بدت تفتح عيونها الحمدلله حضنتها كتلها: رعبتيني.
حسناء: شكو؟
حسام: ماكو شي حبيبتي لتخافين بس الظاهر دختي وكعتي.
حسناء: وكعت؟ ليش؟ اول مره تصير عندي واوكع.
حسام: يمكن من التعب انتي دتضغطين على نفسج هوايه بشغل البيت منا وهيج لازم ترتاحين اكثر وتنامين اكثر.
حسناء: اكو شي بس اخاف اكول.
حسام: ليش؟ شكو؟ كولي؟
حسناء: اخاف.
حسام: ليش تخافين كولي شكو؟
حسناء: اريد اتأكد بالاول.
حسام: احجي شكو؟
حسناء: الشهريه فاتتني.
حسام: ويعني؟
حسناء: يمكن حامل.
كالتها بخجل حسيت كلبي رجف من سمعتها كتلها: من شوكت؟
حسناء: هذا ثاني شهر.
حسام: وليش ماحجيتي؟ غير تحجين حتى نروح نسوي تحليل فحص اي شي حتى نتأكد.
حسناء: اخاف.
حسام: من شنو؟
حسناء: اخاف يطلع مجرد تأخير عادي وماكو حمل.
حسام: عادي تصير عندج خربطه.
هزت راسها لا.
حسام: معناها ماكو تأخير عادي واحتمال جبير حامل.
ماحجت خجلانه.
بست راسها كتلها: حتى لو ماكو حمل احبج ماراح تتغير محبتي الج.
حسناء: ولا تقل؟
حسام: مستحيل تقل.
حسناء: ميخالف باجر تاخذني اسوي تحليل؟
حسام: لا.
حسناء: ليش؟
حسام: هسه نروح.
اخذتها ورحنه للمستشفى سوينه تحليل حمل وفعلا طلعت حامل.
شكد جنت فرحان بس حسيتها فرحانه اكثر مني.
رجعنه للبيت من فرحتي ماخليتها تنزل تمشي للبيت شلتها ودخلتها.
دخلنه لاكتنه وديان بوجهنه فتحت عيونها لان شافتني شايل حسناء.
وديان: ياربي دخيلك.
نزلت حسناء كتلها: روحي حبيبتي بدلي وارتاحي حتى نتعشى.
راحت حسناء لغرفتها ووديان بقت واكفه وتباوع لحسناء لحدما دخلت بعدين دارت علي: ماعرفتك؟
حسام: ليش؟
وديان: هاي انت حسام نفسك زوجي؟
حسام: لا مو نفسي بدلوني ههه.
وديان: اي والله الظاهر هيجي صار. معقوله إلى شفته مااكدر استوعب.
وين حجينه واتفاقنه؟ هاي إلى بس تريد جهال منها؟ اشو شايلها على كلبك؟ حتى ماحملت ولاخلفت بعدها وهيج؟ شلون لو حملت شتسوي بيك اكثر؟
حسام: شمسويه هي اصلا حتى تسوي بعد؟ اليوم جايه حاميه.
وديان: لا والاحلى فوتي حبيبتي. من شوكت صارت حبيبتك؟
حسام: وديان حسناء حامل خفي عليها شويه ماله داعي بالرايحه والجايه تسمعيها حجي مثلها مثلج انتي زوجتي وهم هم زوجتي ومااريد اكون ظالم واشيل ذنبها.
وديان: لا انت مو صاحي والله هاي ساحرتلك مستحيل انت حسام إلى اعرفك زعطوطه هلكدوتها كدرت تضحك عليك؟
حسام: ودياااان.
صرخت بوجها.
وديان: لك ياوديان يابطيخ روح شوف نفسك شلون متغير هاي بعدها ماجابتلك جهال وهيج صاعده على جتافك ومدندله رجليها شلون لو حامل صدك وجابتلك طفل شيصير بيك بعد اكثر.
راسأ ضربتها كف بكل قوتي لدرجة على صوت الضربه حسناء فتحت باب غرفتها وظلت واكفه مستغربه ومصدومه وخايفه هاي ثاني مره ينعاد المشهد بس هالمره مو وياها ويه وديان.
هالمره بكامل وعيي وبكامل قوتي العقليه لا ضايج ولا محتار ولا مشغول بالي.
هالمره وديان مصختها وجان لازم تتوقف عند هذا الحد.
وديان: تضربني علمود هايه؟
وتأشر بأيدها على حسناء كتلها: واكص لسانج مره ثانيه اذا مااحترمتي نفسج وتأدبتي.
وديان: بسيطه حسام بسيطه اني اعلمك انت وهاي القرويه. اذا مارجعتك الكف عشره مااطلع وديان بنت امي وابوي.
حسام: شتسوين سوي افتهمتي والي ماتطولينه بأيدج طوليه برجلج.
دخلت وديان اخذت جنطتها وسويج سيارتها وطلعت وهي تهدد وتتوعد وتلغط وتصيح راحت لاهلها.
دخلت كعدت بالصاله حسناء بقت بمكانها متحنطه ماحجت شي ولا اتحركت بس تباوعلي يمكن خايفه مني.
اشرتلها تعالي وامي صاحت من غرفتها: شكو شصار حسام؟ حسام؟ شبيكم يمه؟
راحتلها حسناء ماادري شنو كلتلها بس طولت يمها.
كسرت واهسي وديان وخربت فرحتي كمت رحت بدلت ملابسي وبعدين رحت لامي حجيتلها إلى صار اتفاجأت: ها حسناء اشو طلع غير حجي؟
حسناء: اي خاله موضوع ميخصني ميجوز احجيه مو صح هو لازم يحجيلج مو اني.
امي: الله يهديك يايمه شجاك بهاالليل خليتها تطلع وهاي مو صاحيه عبالك هي الطفله تروح تندعم لو يصيرلها شي شنكول لاهلها شلون خليناها طلعت.
حسام: خليها جان لازم تتأدب مصختها سكتلها هوايه بس مفاد احترمتها هوايه لخاطر اهلها وهم مافاد لهنا وكافي.