قصص و روايات - قصص رائعة :

رواية إطلاق سراح مشروط للكاتبة روز الفياض الفصل الثالث عشر

رواية إطلاق سراح مشروط للكاتبة روز الفياض الفصل الثالث عشر

رواية إطلاق سراح مشروط للكاتبة روز الفياض الفصل الثالث عشر

اتعشينه وكعدنه نباوع عالتلفزيون سحبت حسناء يمي بحضني لان حسيتها خايفه مني يمكن عبالها اتعامل كله بالضرب والعصبيه.
حسام: حسنائي؟ ساكته؟
هزت راسها ماكو شي.
بست خدها كتلها: شتفكرين؟
هزت راسها ماكو شي.
حسام: اليوم كله بالاشاره ماكو حجي. كولي حبيبتي شبيج؟
حسناء: ماكو شي والله.
حسام: يعني مو خايفه مني؟
سكتت شويه بعدين حضنتني كالت: ليش اخاف؟
حسام: لان ضربتج وقبل شويه هم ضربت وديان؟

بقت ساكته معناها فعلا خايفه كتلها: لتخافين مني اني مااضرب ابد بس هالمره استثناء انتي يمكن جنت مو بوعيي من كدما مشغول بالي وضايج مو قصدي اضربج ولا حسيت بنفسي اصلا يعني عصبيتي طلعت بالغلط عليج.
ووديان استحقتها وهاي اول مره امد ايدي عليها من اتزوجنه لليوم والظاهر جان لازم من زمااان اسويها.
فلا تخافين من الوحش ههه.
حسناء: ياوحش؟ انت مو وحش.

حسام: انتي حسناء معناها اني الوحش مثل المسلسل قبل جان يطلع اسمه الحسناء والوحش ههه.
خلت راسها بحضني كالت: احبك حتى لو وحش واريد ابني يطلع يشبهك هادئ وحنون.
اتذكرت موضوع الحمل ابتسمت وخليت ايدي على بطنها كتلها: اذا تحبيني صدك اريدج تديرين بالج على نفسج وتهتمين بأكلج ونومج وماكو بعد شغل بالبيت. زين؟
حسناء: ان شاءالله.
حسام: هالكلام اتمنى مااضطر اعيده مره ثانيه. ازعل عليج اذا صارله شي.
حسناء: منو؟

حسام: الوحش الزغير هههههه.
امي فرحت بخبر حمل حسناء حيل لدرجة مانامت اجتنه للغرفه حتى توصي حسناء نفس الوصايا إلى وصيتهم اني الها.
نمنه بهدوء وراحه رغم كل إلى صار بس بالليل واني نايم حسيت بشي كاعد على صدري اريد اتنفس مااكدر.
كعدت مرعوب ومخنوك ميت من الرعب باوعت لحسناء نايمه شفتها مامتغطيه غطيتها وحضنتها بس حسيتها تتحرك هواي تتكلب اكثر من الطبيعي.

كعدت باوعتلها وجها عابس وهي نايمه شويه وظلت تحجي حجي مامفهوم عرفتها هم تتحلم.
حسام: حسناء؟..
فتحت عيونها بسرعه عبالك جانت كاعده بس مغمضه.
شهكت حيل وكعدت عدل وكشت مني وفتحت عيونها على وسعهم.
ظليت اباوعلها مستغرب شبيها.
حسام: اسم الله حبيبتي شبيج؟
ماحجت شي بس تباوعلي مثل الشايفه جني.
حسام: حسناء حبيبتي شبيج اسم الله حلم هذا لتخافين.
مديت ايدي ردت الزمها صرخت.

كعدت عدل متعجب معقوله بعدها نايمه نايمه وهي كاعده يعني اكو هيجي شي؟
حسام: حبيبتي شبيج اني حسام لتخافين اني يمج محد يكدر يأذيج.
متحجي ولاترمش حتى مثل الصنم بقيت كاعد كبالها وهي هم كاعده ماادري شسويلها مااعرف شبيها بقت هيجي يمكن نص ساعه مااتحركت.
بعدين حسيت بيها بدت ترجع تغفى الى ان غفت فعلا وهي كاعده غمضت عيونها ونامت.
بقيت كاعد كبالها متعجب من إلى صار شبيها شنو شافت من حلم ورعبها لهدرجه اعوذ بالله.

حسيتها ترجف يمكن بردت من التكييف رجعتها بفراشها بهدوء وغطيتها وهي نايمه متدري بشي.
ظليت كاعد شويه بعدين قريت المعوذات الها والي ونمت.
الصبح كعدت على صوت ضحكها هي وامي ولاكيشا بالمطبخ.
كمت غسلت ورحت تريكت وياهم كتلها: ها حسناء شلونج اليوم؟
حسناء: الحمدلله بخير.
امي: عساج.
حسام: والله البارحه خوفتيني.
حسناء: منو اني؟
حسام: اي تتحلمين مدري شنو تحجين وانتي نايمه وبس كعدتج كمزتي وصرختي علي.
حسناء: اني؟ شوكت؟

حسام: اي والله انوب اصلا اني جنت كاعد مفزوع ومخنوك عبالك واحد جان كاعد على صدري انوب انتي جملتيها.
حسناء: والله ولااتذكر تحجي صدك؟
حسام: خبلتيني وبس الزمج تصرخين ظليتي كاعده على حيلج وتباوعيلي لحدما غفيتي ورجعت سحبتج بالفراش وغطيتج.
حسناء: هههههه معقوله؟
حسام: اي والله صدك خوفتيني يعني اول مره اشوف واحد نايم بس عيونه مفتوحه.

امي: اسم الله اسم الله خاف حلمانه حلم يخوف اقري المعوذات قبل النوم يمه وخلي جوه راسج قران.
حسناء: ان شاءالله خاله بس مااتذكر اي شي والله.
خلصت ريوك ووصيتها ترتاح ووصيت امي ولاكيشا يراقبوها خاف متسمع الكلام وبعدين رحت لشغلي.
كملت اليوم عادي والظهر رجعت للبيت اتغديت ونمت.
العصر اتصل علي الحجي ابو وديان يريد يعرف موضوع المشكله بيني وبين وديان شنو.

حجيتله الموضوع والرجال اتفهم وكان من جانبي واعتذر للمره الثانيه عن قلة ادب بنته واسلوبها بالتعامل والكلام.
طلعت للمعرض جان عندي استلام بضاعه ومشغول جدا.
وتليفوني مابطل يدك كل دقيقه خليته صامت حتى اكدر اخلص شغلي.
بعدين من خلصت طلعت التليفون ردت اتصل على حسناء واتطمن عليها اتفاجأت لكيت لاكيشا متصله علي 30 مره جمدت كلت امي صار بيها شي.
رأسا اتصلت جاوبت لاكيشا كتلها: الو شبيها امي؟

لاكيشا: مابيها سي بس مدام.
اني هنا كلبي انعصر كلت يمكن مسمعت الكلام وكامت تشتغل واجهضت.
حتى ماسمعت شنو كالت لاكيشا شبيها حسناء راسأ سديت التليفون وطلعت للبيت كوه وصلت جسمي كله يرجف.
دخلت اركض امي كاعده على كرسيها يم باب غرفة حسناء وبيدها القران وتقرا بصوت عالي.
اريد اوصل لباب الغرفه من الخوف مااكدر اتدنيت لامي خليت ايدي على جتفها صدقت ورفعت راسها كالت: الحك مرتك مو صاحيه اليوم بيها شي.

صدمني حجي امي ومافهمت منه ولاكلمه مديت راسي بالغرفه ماشفت حسناء بس الغرفه صايره مهرجان كل شي مشمور بالكاع والتحف مكسره والعطور ماباقي شي.
دخلت للغرفه مااعرف شصاير بس اريد اشوفها وين.
فتت على كيف لكيتها وره الجربايه نايمه بالكاع ومخليه خدها عالكاع بس شافتني مدت ايدها إلى.
راسا شلتها خليتها عالفراش.
حضنتني ساكته متحجي بس فاتحه عيونها.

الفصل التالي
جميع الفصول
روايات الكاتب
روايات مشابهة