رواية إطلاق سراح مشروط للكاتبة روز الفياض الفصل الأول
صافن وافكر تاليت هالموضوع شنو؟
عمري 35 سنه مو زغير بالعكس جبير ويمكن جبير حيل بالنسبه الها.
شلون قبلت اتزوج وحده عمرها 17 سنه بعدها طفله. شنو هالانانيه العندج وديان تزوجيني على كيفج وعلى مزاجج علمود الاطفال بس باختيارج وبشروطج.
واني شنو هالسلبيه إلى اني بيها شنو تكول وشنو تقرر اوافق صحيح مااحب ازعلها ومااريد ازعل الحجي ابوها صاحب فضل علي بعد الله سبحانه وتعالى بس مز هيج.
شغلني عنده جنت طالب بالمدرسه وساعدني حتى اكمل دراستي وزوجتي وديان بنته الوحيده ومن كبر سلمني معرض الاثاث اني اديره وهو اتقاعد وخله كل شي بيدي بس لازم يكون إلى رأي ودور.
صار 15سنه من اتزوجت وديان الله رزقنه مره بنيه وايام واتوفت وبعدها الله ماكتبلنه ننرزق باطفال.
مامرتاح مثلي مثل اغلب المتزوجين هموم الحياه متخليني ارتاح عندي اخت وحده متزوجه بديالى ووالدي متوفي من جنت بالمدرسه وامي مره جبيره وعاجزه.
وديان رغم كل هالسنين وكل الغيره إلى عدها بس مااحسها تحبني بس عدها حب التملك وتحب المظاهر هواي.
اسأل نفسي مرات اني احبها لو لا بس ماالكه جواب يريحني.
ماادري شلون فجأه قررت اريد اطفال ووديان ماعدها مشكله بس سبحان الله ميصير عدها حمل.
وفجأه هي هم قررت تروح تخطبلي بنيه على ذوقها واختيارها يتيمه مهجرين هي وامها وخواتها 2 ابوها واخوانها اثنين قتلوهم الدواعش.
سكنوا يمنه بالمنطقه والناس ساعدتهم فراش وملابس واكل وشرب الحمدلله بعد اكو رحمه ونخوه بهذا البلد.
مااعرف منو إلى مدلي وديان عليها بس اتوقع صديقاتها بالدوام حزب الناتو ههه.
راحت شافتها وخطبتها حتى بدون مااشوفها ومافكرت يمكن متعجبني.
بس وديان مو سهله شخصيتها قويه واني مخليها براحتها مااتذكر يوم فرضت عليها شي ومن وافقت على زواجي مو محبة بيه ولا بالاطفال.
بس لخوفها اني اتزوج من وراها او اطلكها وتخاف اذا اني اختار اختار وحده احلى واحسن منها.
وطبعا اشترطت علي مااشوفها ليوم العقد وبعد الزواج اروحلها ليله بالاسبوع كافي حسب كلامها اذا الموضوع بس علمود الاطفال.
وافقت حتى لو يوم بالاسبوع اريد طفل كبرت وهذا حقي بس خايف ومتردد لان البنيه عمرها 17 سنه خاف اظلمها وياي شنو ذنبها.
من شفتها بالعقد مبينه بريئه ومتعرف شي وماشايفه شي من الدنيا.
وحسب مافهمت من وديان اصلهم من القرى بعيدين عن المركز وناس بسيطين حيل الاب وولده جانوا يشتغلون عماله حتى يطلعون لكمة حلال ويعيشون مستورين بس بتعبير وديان: فكور ماشايفين ومعدان اذا الاب وولده جانوا عماله يعني كاتلهم الجوع شتتوقع يعني قابل الاميره ديانا بعدين هذا هو المطلوب وحده فقيره بت فكر تجي هنا لاتشرط ولاتتشرط تاكل لكمتها وتحمد الله وتشكره عالعيشه بهيج بيت وبهيج نعمه شتريد اكثر بعد.
حسام: عيب شهالحجي شنو الفقير ينكال عنه فكر المهم شغل حلال مياكلون حرام بعدين اني جنت فقير يعني هم فكر على كولتج.
وديان: انت غير انت جانت عندك ظروف وابويه ساعدك ووكفت على رجليك وهسه انت عندك اكبر معرض اثاث بكل بغداد مو صح وصح الفضل الاول والاخير لابويه بس هم انت شاطر.
حسام: وهمه لو جانت عدهم فرصه مثلي يمكن جان صاروا مثلي واحسن بس مو كل الناس الله يكتبلها النجاح والموفقيه بحياتها كل شي بالحياه رزق.
دائما جانت تنظر للناس بفوقيه وتعالي وتتعامل ويه الاقل منها بالمستوى المادي على انهم ناس ماشايفين واستغلاليين ومصلحجيه وطمعانين بيها.
نظرتها للحياه سطحيه.
اكبر اهتماماتها شكلها حلو وبكامل اناقتها ومحد لابس مثلها كون من تروح للدوام الكل ينبهر بكشختها.
ماانكر هي حلوه بس هم المكياج واللبس اله دور والصالون إلى رايحه جايه عليه بدون حساب.
ماحاسبتها بيوم على طبه او طلعه ولا على صرف ولا حتى على اهمالها للبيت وحياتنه الزوجيه ولاحتى اهمالها إلى اني زوجها.
طول الوقت تحجي بالتليفون واذا حجينه شويه فاغلب حجيها انتقادات للناس حتى لصديقاتها.
الصبح بالدوام والعصر بالجم ومابينهم اما بالصالون او رايحه لاهلها نادرا ماتكون موجوده بالبيت.
اتمنى يوم ارجع الظهر الكاها منتظرتني عالغدا وطابختلي اكله اني احبها ومنتظرتني بلهفه.
ومع ذلك ساكت ومااعترضت بيوم مااعرف ليش شنو سبب هالسلبيه إلى عندي يجوز احبها؟
يجوز، مرات تحب شخص بس بسبب مشاغل الحياة والبرود إلى يصير بالعلاقه يخليك متحس اذا جنت تحبه او لا.
هذا تفكيري وقناعتي او يمكن تبريراتي لنفسي حتى اقنع وارضى بوضعي.
اليوم من ارجع عندي عروس جديده مسكينه بهالعمر تتزوج وواحد اكبر منها بهلكد عمر يمكن بسبب الحاجه امهم متكدر تصرف عليهم بس بنات 3 وحاطه بسطيه بالباب وتبيع حلويات عالجهال.
حقها منين تجيب الهم مصرف والعيشه تكطم الظهر وهي مره وحدانيه.
لاحول ولاقوة الا بالله.
اتمنى مااظلمها كافي الظلم إلى هي بي عيشتهم اكبر ظلم ساكنين بغرفه مهتريه في مكان يفترض يسمى بيت تجاوز بس هو بالحقيقه عباره عن غرفه وحمام وجوله داخل الغرفه يطبخون عليها.
جزاهم الله خير الناس إلى سكنوهم بيها بدون مقابل.
والله يستر من تجي اليوم للبيت وديان شلون راح تتعامل وياها.
اتمنى تتفهم وضعها وتفهم انه حسناء طفله وطفله يتيمه ومحرومه.
الله يستر.