رواية أحببت بصيرته للكاتبة مريم نصار الفصل التاسع والعشرون
ف الحاره.
ابو سلامه قاعد ع القهوه.
طلعت المحامى: رايح ع المكتب. وشاف ابوسلامه. وقال سلام عليكم يا معلم.
ابو سلامه: أهلا اهلا. بمحامى حارتنا. ايه ياراجل مختفى فين كدا؟ انا قولت هو خلع من غير ما يدفع الايجار هههههههه. ده العقد هيتجدد الشهر الجاي يامتر!
طلعت: قعد هههه لا يا معلم وانا اقدر بردو. انا بس كنت مسافر البلد. جدى تعيش انت.
ابو سلامه: لا حول ولاقوة إلا بالله. البقيه ف حياتك يامتر. ايييه كلنا لها.
طلعت: حياتك الباقيه يمعلم. ايه اخبار الحاره.
ابو سلامه: ليه بس يامتر العكننه دى ع الضهر. اخبار زى الزفت...
طلعت: بعدم فهم خير يامعلم حصل حاجه معاك؟
ابو سلامه: هو مش حصل معايا. بس حصل ف العماره بتاعتى القديمه جمبك بالظبط.
طلعت: ايه يامعلم ده لغز ومطلوب منى احلو. ياترى قصدك ايه؟
ابو سلامه: ومالو نقولك الل حصل. انا سمعت امبارح بليل أهل الحاره وهما بيقولو إن الواد علاء ابو سمره. إبن جابر انت عارفه مش كدا؟
طلعت: هز راسه ايوه هو ف حد مايعرفوش. المهم ماله يامعلم؟
ابو سلامه: حكاله ع كل حاجه...
طلعت: بصدمه كبيره اييييه؟ وقال بلهفه. وفتون حصلها حاجه؟ احم قصدى الانسه فتون والانسه سحر حصلهم حاجه؟
ابو سلامه: علمى علمك يامتر. بس الل عرفته إن فتون مرجعتش البيت من امبارح. وسحر ف المستشفى. وعلاء اتقبض عليه.
طلعت: بقلق. طيب يامعلم مش واجب بردو تروح المستشفى للشيخ محمد وتقف معاه ف الظروف دى. وكمان نعرف الانسه فتون فين؟ مش يمكن علاء كمان ضربها بالمطوه وف المستشفى ولا حاجه؟..
ابو سلامه: بعدم إهتمام. اروح فين يامتر؟ وانا فاضي اروح ادور وأسأل. يكش يولعو كلهم. دى عماره هم بالناس الل فيها والايجار بلمو بالعافيه. الود ودي يطلعو منها ونشوف ناس الاجا كدا. لامؤخذه يامتر انت بره الناس دي. وبتدفع وقتى وقبل معادك. اه ياريت كل السُكان زيك يامتر.
طلعت: تسلم يامعلم، وطلع ظرف اتفضل يا معلم ده ايجار الشهر الل فات. وده ايجار نص شهر من الل احنا فيه.
ابو سلامه: شد الظرف بسرعه. ايوه كدا يامتر اهو ده الكلام الصح. مش تقولى حاره وناس. بس عدم لامؤخذه. ليه دفعت نص شهر بس من الجديد؟
طلعت: بصراحه يمعلم انا عايز أوسع ع نفسي يعنى انا بدور دلوقتي ع مكتب أكبر من ده لان زى ما انت شايف بيجيلى زباين كتير والمكتب صغير. وبعد ما اشوف المكتب وننهى العقد هدفع الباقى.
ابو سلامه: بدهشه اييه شقه ونص يرمح فيها الخيل صغيره؟ وقال جواه يادى الغم. وبص ليه يامتر تزعلنا منك كدا؟ ده المكتب واسع دى يعتبر شقتين مفتوحين ع بعض ازاى الكلام ده بقى ياجدع؟
طلعت: بحرج معلش يا معلم انا ادرى بشغلى انا عايز اجيب سكرتير. واكبر المكتب بتاعى. يعنى لازمنى ع الاقل اوضتين كمان ع الشقه دى. انا اسف طبعا ياريت متزعلش منى يامعلم. وانا قولت اقولك من دلوقتي عشان تشوفلك مستأجر جديد ودى الأصول. وانا فعلا هكلم السمسار انهردا يشوفلى مكان اكبر وزي ما ياخد مش مهم. بس ف نفس الحاره بردو. انا زباينى كلهم من أهل الحى. وقام وقف يلا سلام عليكم يامعلم. ومشي.
خالد: وحنين وصلو فاطمه البيت.
حنين: ادتلها كل علاجها. وقالت حمدالله ع سلامتك يا بطه نورتى بيتك.
فاطمه: قاعده ع الكنبه بتعب. تسلمي يانونا. قومي يابنتى معلش هتعبك اعملى ل خالد كوباية قهوه.
حنين: بصت ل خالد. وقامت حاضر.
خالد: قام وقف وبص ل فاطمه. لا شكرا انا شربت ف الشركه. انا هنزل شويه وراجع ع طول مش هتاخر.
حنين: زعلت أنه متجنبها تماما.
فاطمه: رايح فين يبنى؟ انت متعرفش حد هنا.؟
خالد: متقلقيش عليا شويه وراجع بعد اذنكم. وخارج.
حنين: جريت عليه بسرعه عند الباب. خالد رايح فين؟
خالد: باصص قدامه. رايح اجيب اكل علشان تتغدو. ده بعد اذنك يعنى.
حنين: بحرج. طيب ينفع اجي معاك؟
خالد: اتنهد زي ما تحبى. بس بطه هتقعد لوحدها كدا؟
حنين: بحماس متقلقش انا هتصرف. استنانى ثوانى. ودخلت بسرعه جابت الشطنه. اسمعى يابطه انا هنزل مع خالد وهرجع معاه. وانا هنادي ع نوسه تقعد معاكي اشطا.
فاطمه: ضحكت بصمت ع لهفتها. وقالت ماشي ياحبيبتى روحي وربنا معاكو.
حنين: ضحكت بفرحه وباستها ف خدها تسلمى لقلبى يابطتى. يلا سلام. وجريت وطلعت من باب الشقه وقالت ل خالد ثوانى هطلع انادى ع نوسه.
خالد: نفخ بديق. وهز راسه ماشي.
حنين: طلعت وقالت ل نوسه. وسهير قالت إنها هتنزل هي ونوسه يقعدوا معاها. وحنين نزلت.
خالد: شافها نازله. اتحرك ونزل قدامها. وركب العربيه.
حنين: نزلت وركبت جمبه.
خالد اتحرك وطلع ع الطريق يدور ع مطعم وساكت خالص.
حنين: متغاظه من سكوته. وكمان محرجه من نفسها. وقال بحرج. خالد ممكن نتكلم شويه؟
خالد: مردش وركن ع جمب. خير؟
حنين: خالد انت بتتعامل معايا برسميه اوى كدا ليه. انا مش واخده عليك كدا. وبعدين ياخالد الموقف الل حصل ده كان غصب عني.
خالد: اولا انا بتعامل معاكي عادي جدا! انتى بتسالى وانا برد عليكي.
ثانيا انا معلقتش ع موقفك واظن افتكر انى قولت ده حقك تشكي فيا.
حنين: بزعل لا ياخالد انا مشكتش فيك.
خالد: مالوش لازمه انك تكدبى عليا ياحنين لانى انا صريح معاكي من البدايه.
حنين: بتوتر. خالد اسمعنى وافهمنى ارجوك. انت فعلا قولتلى ع كل حاجه وصارحتنى. بس غصب عني والله. انا اول ما سمعت صوتها وطريقة كلامها مستحملتش وحسيت انى مش شايفه قدامى. وفعلا كانت غيره. ايوه والله العظيم بغير عليك. بس بعدها وانا ف الطريق فكرت ف حجات كتير. والشيطان خلانى اشك.
احم. قصدى خلانى افكر في الكلام الل قولته ليا قبل كده. بس صدقنى ياخالد والله كان غصب عني.
خالد: زعق ولحد امتى هيفضل غصب عنك تشكي فيا. انتى بتعاقبينى ع صراحتى معاكي؟
انا من يوم ما عرفتك ووافقتي تقبلينى بكل عيوبى وبتغير عشان نفسي وعشانك.
غيرت رقم الفون. وغيرت التليفون الارضي ف الشقه. كل وقتى بيعدى قدام عينيكى.
اى مشوار ليكى وحتى لو اهلك معاكي انا بكون موجود معاكي.
اغلب الوقت بنتكلم ع الفون. حتى وانا بنام بكلمك. واول ما اوصل الشركه بكلمك وانتى بتكلمينى.
يعنى انا كل حاجه تخصنى وكل تفاصيل حياتى قدام عينيكي. لانى انا عايز كدا. انا مكتفى بيكى. لقيت فيكى الل ملقتوش ف حد.
منا كان ممكن اخطبك من غير ما اتكلم كلمه واحده وحشه ف حقى. وعمرك ما كنتى تعرفى اى حاجه.
وضحك بتريقه. تعرفى انا مفكر كل ده هزار والبنت الل حبتها بتغير عليا فعلا. ولما شوفتك داخله المكتب زي الاعصار. قلبى فرح جدا. وإحساس جديد اتولد جوايا.
انتى ليه مش عايزه تصدقى انها كانت نزوه وغصب عنى. ظروفى الل مريت بيها كانت اكبر منى.؟
ولحد امتى كل ما بنت ف الشغل تكلمنى أو ارد عليها هكون ف دايرة الشك انى بخونك وع علاقه بيها.؟
اسمعى ياحنين انا طول عمرى واضح وصريح جدا. وبتعامل مع كل الناس بطبيعتى بضحك وبهزر وبقف مع الل محتاجلى. وبصد اى حد انا عايز اصده. يعنى متعودش اعيش وانا عامل حساب إنى وانا بكلم حد ممكن اكون محل شك. لأ لأ انا مش هقبل انى اكون كدا ابدا.
حنين: بتسمعه. وجواها مصدقاه لانه من يوم ما خطبها وهي معاه خطوه بخطوه. واتخضت من صوته وهو بيزعق. ودموعها نازله بصمت. لانها شكت فيه ومش هينفع تكدب ولا تغير احساسها وقتها. هي فعلا شكت فيه. وكمان مي فتون حكيالها عنها انها قد ايه بريئه وعفويه جدا. ونزلت وشها ف الارض وعيطت بصوت واطي.
خالد: خلص كلامه. وماسك الدريكسيون بغضب وباصص قدامه. وسمع صوت عياطها. نفخ بديق. ومسح وشه بايديه. طيب انتى بتعيطى ليه دلوقتي؟
حنين: بشهقات. عشان انت بتزعق.
خالد: اتنهد بتعب وقال طيب اهدى وبطلى عياط. وصعبت عليه اوى. وابتسم انتى بتعيطى زي العيال كدا ليه؟
حنين: رفعت عينيها ليه. والله ياخالد غصب عني. حط نفسك مكاني. انا لو، ومكملتش.
خالد: مش هينفع احط نفسي مكانك. لانى لو بشك فيكى ذره واحده استحاله احبك أو اخليكى ع اسمى. وانتى عمرك ما تكونى كدا ابدا.
انا بحبك ياحنين. وعمرى ما فكر انى اخسرك. وعمرى ما اخونك ابدا. انتى عايزه محسن ومهجه يقولو عليا ايه خاين؟ ومستقبلهم يدمر بسببى لأ طبعا.
حنين: ابتسمت بحب. وبعدها كشرت بعدم فهم. محسن؟ ومهجه. مين دول؟
خالد: مسح دموعها. وقال انتى متعرفيش مين محسن ومهجه؟ دول عيالنا إن شاء الله.
حنين: شهقت بدهشه ايييييه؟ انا ولادي هتسميهم محسن ومهجه. ده من رابع المستحيلات يحصل.
خالد: كاتم الضحكه. انتى تؤمرى. سيد ومديحه. ايه رأيك.
حنين: صكت ع أسنانها بغيظ. مين سيد ومديحه دول كمان. لالا انت مالكش دعوه بالاسماء انا الل هختار.
خالد: هز راسه ماشي ياستي اختارى برحتك كفايه أنهم هيبقو حته منك.
حنين: قلبها دق بحب. خالد.
خالد: عيونه.
حنين: انا اسفه. انى اتصرفت بالغباء ده. بس. عايزاك تتأكد انى بغير عليك. والل هتقرب منك ياخالد انا هعمل منها شاورما سوري اشطا.؟
خالد: ضحك بصمت. ومسك كف أيدها وباسه. اشطا يقلب خالد.
حنين: شدت أيدها بسرعه. واتكسفت جدا. احم يلا بقى علشان منتاخرش ع بطه.
خالد: اتنهد بحب. ومالو يقلبى ف ثوانى نجيب الغدا ونرجع ع طول. وشغل العربيه وساق. بس بقولك ايه تعالى اجبلك عصير قصب. بتحبيه؟
حنين: ههههه ايوه بموت فيه.
خالد: بغيظ بتموتى فيه؟ طيب وحيات امك ما انتى شاربه عصير قصب تانى. غير لما تكرهيه.
حنين: ههههههه يالهوى انت متعرفش انا مبكرهش ف حياتى قد عصير القصب. هههههههه
خالد: هههههههه ايوه كدا اتظبطى.
ف المستشفى.
بعد صلاة العصر. الكل خرج من المسجد. وسلمو ع بعض.
محمد: شاف سهير داخله المستشفى وشايله حجات كتير وراح يشيل معاها ودخلو المستشفى ورايحين ل سحر.
سليم: ها يا طاهر فهمت هتعمل ايه بالظبط؟
طاهر: اومرك ياسليم باشا. انهارده إن شاء الله كل حاجه هتكون ع تليفون سعادتك.
سليم: ابتسم بخبث. تمام اوى. تعالى بقى نطلع ونفذ الل قولت عليه. علشان ناخد الانسه فتون ونوصلها البيت.
طاهر: اتفضل ياباشا. واتحركو.
سميره: بتتألم اه ياضهرى. الله يسامحك ياعصام يبنى.
محمد: اله ماتهدى شويه. ابنك بيشوف اكل عيشه. وحد قالك تنزلى تشترى الحجات دي كلها. متصربعه ع ايه. ده الفرح ممكن يتأجل مش شايفه بنتك لسه تعبانه.
سميره: شهقت. تف من بوقك ياحج. الدكتور قال كلها اسبوع وسحر تبقى زي الفل. ايه لزمتها تاجله؟
وعوجت بوقها. ولا يمكن عشان ست فتون حالتها النفسيه وحشه. انا عارفه جت تشوف بنتى ليه؟ مش كفايه هي السبب في الل حصلها. طول عمرها و، ومكملتش من نظرة محمد ليها.
محمد: وقف وبصلها بنظرة غضب. وبعدها قال يعنى ارمي عليكى اليمين عشان ترتاحي.؟
سميره: بغيظ مكبت. خلاص ياخويا. محقوقالك انت والست الدكتوره.
محمد: ماشي. وشاف الممرضه خارجه من باب الاوضه. وقال تعالى هندخل لسحر وفتون. ولو سمعتك رميتى كلمه ضايقتى بيها فتون قسما بالله ياسميره ل...
سميره: خلاااص ياحج والله هاتكتم خااالص.
محمد: عين العقل. تعالى الباب مفتوح اهو. وقربو من الباب ووقفو مكانهم الاتنين بصدمه.
سميره: بتسمع كلام سحر ومش مصدقه وتنحت وعينها مفتوحه ع الاخر ولطمت ع خدها...
محمد: واقف مصدوم وقلبه بيدق بسرعه. وعينيه تايهه مابين حقيقه أو خيال. ومش مستوعب الل بيسمعه بنتي؟ سحر بنتى عملت كل ده؟
فتون: شهقت بصوت عالى. لما شافت محمد وسميره واقفين. وقالت بصوت مبحوح عم محمد!؟
سحر: بتعيط بشهقات. وسمعت صوت فتون و فتحت عينيها بسرعه وبصت ع الباب. واتصدمت بزهول وفتحت عينيها ع الاخر. ب. بابااا!؟ ماما!؟
محمد: من الصدمه الشنط وقعت من ايدو وواقف مزهول.
فتون: شافت رد فعل محمد وسميره اتاكدت انهم سمعوا كل حاجه. وهزت راسها يمين وشمال بلاء مستحيل.
سليم: جه من وراهم. حج محمد اعرفك المقدم أحمد الوكيل.
محمد: لف بتوهان وسلم عليه وهو مش واعي وتفكيرو مشلول.
فتون: شهقت. وهمست ل سحر. سحر اوعي تنطقى بأي كلمه. اعملى الل بقولك عليه.
سحر: غمضت عينيها بتعب واستسلمت للواقع وقالت مش هينفع خلاص يافتون. انا انتهيت.
فتون: بغيظ اسمعى الل بقولك عليه. وانا هتصرف مع عمي واتعدلت بسرعه.
المقدم: دخل ل سحر. مساء الخير. انا المقدم أحمد الوكيل. وجاى اتكلم معاكي يا انسه سحر كلمتين. واعرف منك ايه الل حصل؟
سحر: فتحت عينيها بتعب شديد. وبصت ل فتون.
فتون: بصتلها بتحذير انها متقولش حاجه. وهزت راسها ليها بطمنها.
المقدم: سأل سحر والكل واقف وحسن وزينهم. وقالت زى ما فتون طلبت منها بصعوبه جدا.
ومحمد قاعد وحاطط راسه بين ايديه بصدمه حقيقيه.
وسميره ماكنتش فاكره إن بنتها ممكن تفكيرها يوصل انها تتكلم مع علاء وتوصل للمرحله دى.
والمقدم استأذن وخرج. وسليم خرج معاه وسلم عليه.
وبعدها زينهم ورجالة الحاره روحو ما عدا حسن.
سحر: عيونها متعلقه ع ابوها. ودموعها نازله بخوف كبير وندم اكبر. وحاسه إن ابوها هيقتلها.
فتون: واقفه بتفكر ف طريقه تقنع بيها عمها محمد بس ازاى؟ ده شكله مصدوم جدا.
سليم: رجع ومهتمش لعياط سحر. وقرب من فتون. يالا بينا يافتون عشان اوصلك. انتى سايبه والدتك لوحدها.
فتون: هزت راسها لحظه واحده ياسليم. واتحركت عم محمد. خالتى ام عصام. انا عايزه اتكلم معاكم لوحدنا شويه.
سليم: فونه رن وكانت داليا سكرتيرة شريف ف الشركه.
وطلع يتكلم ف الطرقه. الو ايوه اذيك ياداليا جبتى رقمى منين؟ ايه مصطفى هوارى الل عطاهولك؟ وهو عند شريف بيعمل ايه؟ لأ لأ عادى المهم ف حاجه مهمه؟ والله هتتجوزى الف مبروك. وطاهر ماشي جمبه.
حسن: قعد جمب سحر. ومستغرب هي بتعيط كدا ليه؟
محمد: رفع راسه وعيونه لمعت بدموع وبص ل فتون ب آسف كبير.
فتون: شافت الوجع ف عينيه. ومسكت أيدو قوم معايه لو سمحت.
محمد: قام بتعب وبص ل سحر نظرة خيبة أمل وخذلان كبير ونزل راسه ف الأرض بسببها.
سحر: مستحملتش نظرة ابوها وامها ليها وعيطت بصوت عالى. ومهتمتش لوجود حسن.
فتون: طلعت معاهم. ووقفو بعيد. وفتون اتاكدت إن مفيش حد موجود. وشافت سليم واقف بيتكلم بعيد ف الفون. وبصت ل محمد وسميره وقالت بتوتر. ا. انا. عم محمد بصراحه. ا. انا و.
محمد: بص ليها بخجل. وقال بوجع. متقوليش حاجه يافتون انا وسميره سمعنا كل حاجه...
وقال بتعجب. سحر بنتى!؟ بنتى انا تعمل كدا ويطلع منها كل ده؟ قوليلى ياسميره انى بحلم. قوليلى قوم يامحمد انت شايف كابوس.
وغمض عينيه بتعب. ليه ياسحر يابنتى ليه؟ تأذينى وتدمرينى ليه؟ انا مش مصدق. والله ممصدق بنتى انا ومتفقه مع مييين؟ مع ابن جابر. مع البلطجى.
وفُجرها يوصل للخبث ده وأنها تتحول لشيطان وتفكر بطريقته وتبعت صور متركبه لحسن. وخبط كف ع كف لا إله إلا الله. لا إله إلا الله.
وبص ل فتون. انا لا يمكن اسامحها. انا هقتلها بايديا دوووول. انا لازم اغسل عارى بايدى.
وبص ل سميره الل واقفه تعيط. اللوم كله عليكى بس فات أوانه الكلام ده.
انا الشيخ محمد الل الناس كلها بتحلف بأخلاقه وتربيته ف الحاره. ع اخر الزمن هبقى مقال للناس. تنهش ف لحمى وانا حي.؟
وحسن اول ما يعرف هيطلقها وهي مكتوب كتابها. لااااااء ده الموت ليا اهون الف مره من اعيش يوم وابقى موطى راسي. وعيونه لمعت بدموع. وصك ع اسنانه لييييه ياسحر ليييييه.
فتون: بتعيط. ومسكت دراع محمد وقالت وحد الله يعم محمد الله يخليك اهدى شويه واسمعنى للآخر.
محمد: نزل راسه بسرعه يدارى دموعه. لا اله إلا الله. سيدنا محمد رسول الله.
فتون: مسحت دموعها. وقالت إيه ياعم محمد مين فينا يعنى مابيغلطش.
انا معاك إن سحر غلطت. بس والله. والله العظيم سحر ندمانه. واكبر دليل ع ندمها ده انها كانت عايزه تعترف للكل بكل حاجه. بس انا لا يمكن اخلى ده يحصل ابدا...
سميره: بتعيط. وسمعت فتون وبصت ليها بزهول ع موقفها مع سحر
فتون: كملت. عم محمد. سحر عيله صغيره.
وبعدين، وبعدين.
وغمضت عينيها بحيره ومش عارفه تقول ايه ولا لاقيا كلام تقوله عشان تقنعه.
وهزت راسها وقالت والشيطان ضحك عليها. كانت طايشه. والشيطان علاء ده ضحك عليها بكلمتين وطلب منها انها تساعده عشان يتقدملى. وتقنعنى انى اوافق عليه.
ايوه صدقنى. وحسن مش لازم يعرف ابدا.
اسمعنى ياعم محمد. حسن لو عرف هيطلق سحر. ودي لوحدها مش سهله وانا عمرى ما هسمح بكدا ابدا.
ولو حد عرف بالل حصل انا نفسي هتفضح والناس هتتكلم عليا. يعنى انا وسحر ف خطر من الناس لو عرفوا.
وانا وحسن سبنا بعض عشان مفيش رابط مابينا. صدقنى مالوش علاقه بالل حصل.
وصدقنى سحر اتغيرت خالص ولازم تاخد فرصه. سحر عرفت كل حاجه ع حقيقتها.
عرفت فين الصح والغلط. عرفت الحلال من الحرام.
واكبر دليل انها جواها مليان خير. ضحت بحياتها عشاني. ايوه. سحر أنقذت حياتى. وشافت المطوه وكنت أنا المقصوده. وهي مخافتش من الموت ووقفت قدامى. دي لوحدها تغفر كل اخطاءها. وكل الناس بتغلط.
وربنا خلقنا ف الدنيا وعارف إن الل بيعمل ذنب وبيتوب عنه ربنا بيقبله. وانت شيخ وحافظ لكتاب الله. وربك قال.
بسم الله الرحمن الرحيم.
إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِنْ قَرِيبٍ فَأُولَئِكَ يَتُوبُ اللَّهُ عَلَيْهِمْ وَكَانَ اللَّهُ عَلِيمًا حَكِيمًا صدق الله العظيم.
وقال كمان. بسم الله الرحمن الرحيم.
إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ
صدق الله العظيم.
وهقولك استشهاد تالت. ربنا قال. بسم الله الرحمن الرحيم.
فَمَنْ تَابَ مِنْ بَعْدِ ظُلْمِهِ وَأَصْلَحَ فَإِنَّ اللَّهَ يَتُوبُ عَلَيْهِ إِنَّ اللَّهَ غَفُورٌ رَحِيمٌ
صدق الله العظيم...
فتون: واقفه دايخه. وحاولت تقاوم. وكملت بتعب
ربنا الل خلقنى وخلقك وخلق سحر والكون كله. بيغفر الذنوب جميعا.
انت مش هتغفر ذله ل سحر؟ وحتى لو كانت كبيره.
بس تابت خلاص. تاابت المفروض نقف جنبها ونساعدها تعدى المرحله دى. سحر بتمر ب وقت صعب المفروض ندعمها وتعرف وتدوق حلاوة التوبه بعد الذنب.
ارجوك ياعم محمد. سامح سحر. عاتبها مش هقولك لأ. لان ده حقك. لكن متجيش عليها لدرجه انها تيأس.
بنتك محتجالك. وهي ف حضنى وغرقانه ف دمها قالتلى قولى لابويا ميزعلش منى. قولى لامى تسامحنى. مفكرتش ف نفسها اكتر ما فكرت ف انها ازاى ترفع راسك. صدقنى سحر ندمت. وانا مسامحه ف حقى. بما إن ربنا سترنى. وستر سحر ليه احنا تفضح نفسنا مدام الموضوع كله محصلش. يبقى ندفنه. وسيدنا عمرو قال ايه ياعم محمد؟
محمد: مغمض عينيه وبيسمع فتون. ومش مستغرب جدعنتها وشاهمتها.
وقلبه بيغلى من تصرف بنته ولحد دلوقتي مش قادر يستوعب الل حصل والل سمعه. وسمع الآيات القرآنيه. واتنهد وقال جواه استغفر الله العظيم و اتوب اليه.
وكلام فتون اثر فيه. وهز راسه وقال
سيدنا عمر رضي الله عنه قال: إِنَّ لِلَّهِ عِبَادًا يُمِيتُونَ الْبَاطِلَ بِهَجْرِهِ، وَيُحْيُونَ الْحَقَّ بِذِكْرِهِ.
فتون: ابتسمت بتعب. وقالت وده معناه: التحذير من نقل الباطل وانت عارف قصدى كويس صح ياعم محمد.؟
محمد: مسح دمعه نزلت ع خدو بسرعه. وهز راسه. صح. صح يافتون يابنتى. لله الامر من قبل ومن بعد.
فتون: بفرحه يعنى افهم من كلامك ده. إن حسن مش هيعرف وجوازة سحر هتم ف ميعادها.
محمد: مش عارف يبتسم. وقال سبيها ع الله يابنتى.
فتون: ونعم بالله طبعا. بس انا عايزه منك وعد دلوقتي انك تصون سري. ولما تعاتب سحر تكون حكيم معاها. وتخلى الدنيا ماشيه زى ما ربك مرتبها.
محمد: اتنهد بتعب. وهز راسه اوعدك يافتون يابنتى. ولازم اسكت عشان الفضيحه الل انا هكون فيها. وكمان انا عايزك اتأسفلك على، ومكملش.
فتون: قاطعت كلامه. وبعدين ياعم محمد. ف حد بيعتذر لبنته. ولا عاش ولا كان الل يخلى الشيخ محمد يعتذر.
وضحكت بتمثيل. الحمد لله انها جت ع قد كدا. وربك ديما رحيم عظيم بينا. والل مكتوب هنشوفه احنا مش بأيدينا حاجه.
وربنا قال. بسم الله الرحمن الرحيم.
قُلْ لَا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ إِنْ أَنَا إِلَّا نَذِيرٌ وَبَشِيرٌ لِقَوْمٍ يُؤْمِنُونَ )
محمد: هز راسه صدق الله العظيم.
فتون: بصت ل سميره الل دموعها نازله زى المطر. ومنزله راسها ف الأرض. وزعلت علشانها. وقربت منها ورفعت راسها. ومسحت دموعها. وحدى الله ياخالتى أم عصام. سحر زى الفل وهتفرحي بيها قُريب جدا إن شاء الله.
سميره: بتعيط بهستريا. ومش مصدقه. جمال وطيبة قلب فتون. ومش قادره ترد عليها.
فتون: بصت ليهم. انا لازم اروح دلوقتي عشان امى لوحدها. يلا سلام عليكم. واتحركت. وجواها وجع كبير.
الشيخ محمد. باصص ع فتون وقال.
إنَّ الكِرامَ وإن ضاقت مَعيْشتُهم
دامتْ فَضيلتُهم والأصلُ غلَّابُ.
سليم: قفل المكالمه. وماشي ف الطرقه سمع صوت فتون. ووقف مكانه. وسمع كل كلام فتون ومحمد. ورغم أنه مخنوق جدا من كل حاجه. إلا أن فتون كلامها مهما كان بيدخل ع قلبه. وحس من صوتها انها تعبانه. واتحرك بسرعه قبل ما تشوفه. لما قالت إنها هتمشي.
فتون: جواها مجروح ومرهقه جدا. واقفه قدام اوضة سحر. ومدخلتش عندها لانها مش قادره تتحمل وجع اكتر من كده.
سليم: جه من وراها وقرب وهمس ف ودنها بحب مش يلا نروح بقى انتى مااكلتيش.
فتون: اتخضت. وقلبها دق من قربه منها. وبعدت خطوه. وهزت راسها ايوه ياريت نروح.
سليم: تمام بس قبل ما نمشي عايز اطلب منك طلب.
فتون: بعدم فهم. طلب ايه؟
سليم: بصراحه كنت عايزك انتى وبطه تيجو تقعدو مع فريده.
فتون: كشرت عينيها انا وماما نقعد عندكو؟ ده الل هو ازاى؟
سليم: اتنهد وقال. فتون انتى امبارح اتعرضتى لموقف صعب جدا و كان ممكن يحصلك اى حاجه. والمرادي ربنا ستر.
مين عارف بكره يحصل ايه؟ وكمان انتى دلوقتي مش ف آمان ممكن علاء ده يكون متفق مع حد من البلطجيه صحابو ويحاولو يأذوكي.
انتى مش هينفع تقعدى هناك لوحدك بعد كده. انا هوصلك الحاره. ونقعد شويه وتجيى معايا انتى وبطه. واطمنى انا عندى شقه هقعد فيها. واى حاجه انتى عايزاها اطلبيها بس المهم إنك متقعديش ف الحاره بعد انهردا.
فتون: مغمضه عينيها وبتسمعه. واتمنت أنه يقولها أنه خايف عليها. او يطمنها بحبه ليها. واتنهدت بتعب. وقالت متشكرا جدا ياسليم. لكن انا ما ينفعش اسيب الحاره. واروح ف اى مكان.
سليم: بغيظ مكبت ليييه يافتون؟ ايه المميز ف الحاره بعد الل حصل فيها.؟ ليه منشفه دماغك؟ انتى متعرفيش انا كنت عام، وسكت.
فتون: ليه دى بقى؟ عشان دى الحاره الل اتربيت فيها.
كبرت يوم بيومه فيها مسافرتش يوم وبعدت عنها. ليها احساس مميز وشعور مختلف عن اى حاره تانيه.
فيها بيتى الل بحبه اكتر من نفسي. بيت بابا الله يرحمه الل اتجوز وعاش فيه. فتحت عينيه لقيته ف الحاره. ف الشقه.
انا عمرى ما اتخيل انى ابعد عن الحاره واهلها. قضيت سنين عمرى كلها فيها.
ناسها وقفو جمبى كلهم اهلى وانا بنتهم. فيها عشره وولاد اصول. فيها ناس بتقدر. وتقف جمب اى حد عايز مساعده.
مش معنى إن فيها جزء فاسد زى علاء. انى انسي كل حاجه فيها. انا مش هسيب الحاره يسليم. وانا زى ما ربنا وقف جمبى ف كل الل فات. ف انا ع يقين بأن ربنا هيكون ديما جمبى ومعايا ف الل جاى.
سليم: هز راسه بتفكير. ماشي يا فتون. زى ما تحبى.
فتون: بتعب انا بجد دايخه ومش قادره اقف وكمان جعانه مش هنروح بقى.
سليم: غصب عنه ابتسم. و نفسه يتكلم ويقولها انه بيعشقها مش بيحبها بس. ومقدرش يتكلم. ولعن نفسه.
فتون: اتحركت ومحتاره من عقلية سليم وخوفو الواضح عليها. وعدم اعترافه بحبه ليها.
وسليم ماشي جمبها بحظر. وبيفكر ازاى يعترف بحبه ليها.
بعد شويه ف القسم.
م / احمد: ف المكتب مع ظابط عمرو بيتكلموا ف القضيه.
الباب خبط.
العسكرى. دخل ومعاه جابر وعلاء. وقال تمام يافندم. المتهمين.
م/ احمد. هز راسه. سيبهم وروح انت.
العسكرى: تمام يافندم. وخرج وقفل الباب.
جابر: واقف مرعوب وهيعملها ع نفسه.
علاء: واقف وجواه قلقان. لكن قال مش هبقى انا لوحدى.
م / احمد: قام وقف قدام علاء. وماسك 3 ورقات ف ايدو. وبص ل علاء وقال تعرف ايه الل ف الورق ده يا ابو سمره؟
علاء: بلع ريقه بخوف. وا، وانا هعرف منين ياباشا.
م / احمد: ومالو الل مش عارف نعرفه ولا ايه ياعمرو.
ظابط عمرو: قام وقف وطلع مسدس وقال تحت امرك يا باشا. وهي يعنى دى اول مره نعرف فيها الل عايز يعرف. وضحكو هههههههه
جابر وعلاء: خافو جدا.
م/ احمد: بص يابو سمره. اول ورقه دي فيها تاريخك الاسود من يوم مااتولدت لحد دلوقتي.
وفيها شهود شهدو عليك وكلهم بالإجماع متفقين إنك لامؤخذه ومش تمام وبلطجى وشمام ومُدمن وبتاع بنات وا. وا. وا. حجات كتير اوى تشرف بجد انت وابوك العره ده.
اما بقى تانى ورقه. دى من الطب الشرعي وانك حاولت تقتل سحر محمد. يعنى شروع ف قتل.
وكمان تعدى ع فتون مهران بمحاولة خطف واغتصاب. ده غير حالة السُكر وكمان سلاح أبيض. وغيرو وغيرو.
اما بقى الورقه التالته دى. فيها اقوال المجنى عليهم. وعلى سواق التوكتك. وكمان رجل الأعمال سليم بدر الدين. أمممم دا انت كدا رايح ف طريق الل يروح مبيرجعش. دا انت هتعفن ف السجن. يابو سمره.
جابر: نزل ع ركبه بتوسل ابوس ايدك ياباشا انا ماليش ذنب. وابنى مكنش ف وعيه. وعمل كل حاجه وهو مش دريان بحاجه. ابنى غلط ومش هيكرر غلطه. خلونى اكلم المحامى ابوس ايدك ياباشا.
م / احمد: ضحك ابنك ايه؟ غلط ومش هيكرر غلطه. هههههههههه ده ع أساس أنه ضرب صاحبه بالقلم مثلا؟
بس متقلقش لانه بعد مايشوف ويعيش معانا احلا سنين عمره مش هيكرر الل عمله.
وانت كدا كدا هتروح دلوقتي ياجابر. وفيك تجيب بدل المحامى عشره ابنك القضيه لابساه. لابساه. وبصراحه بقى انا حبيت علاء ابنك اوى. اه واد جدع كدا. ولازم اعمل معاه الصح ف الحجز مش كدا ياعمرو ولا ايه؟
ظابط عمرو: ينهار ابيض ياباشا. ده كدا علاء هيعدى الفولت المطلوب. يلا الله يرحمه بقى. حد قاله يمشي غلط؟ شيل يمعلم.
علاء: بغيظ. لا بقى انا مش هروح لوحدي. كل حاجه انا عملتها سحر كانت شريكه فيها. وانا عايز اقابل حسن خطيبها ولامؤاخذه.
م / احمد: حط ايدو ف جيبه. اممم طيب احكى يابو سمره سامعك. سحر شريكه معاك ازاى؟
جابر: بسرعه. لا ياباشا علاء بيخرف متصدقوش ياباشا. اكتم ياعلاء ماتلبسش نفسك ف الحيط.
علاء: لااا. سحر ياباشا شريكتى وانا معايا ليها محادثات وصور وصوت وصوره ع اتفاقها معايا.
م / احمد: جميل طيب فين الادله دي. واحنا هنحجز سحر فورا.
علاء: بغيظ كبير سحر مسحتهم ياباشا. وكسرت الموبيل وكل حاجه فيه راحت. صدقنى ياباشا والله العظيم انا مابكدبش عليك.
ظابط عمرو: قرب منه وضربه بوكس جامد. وقال يعنى انت بروح امك ف الاول تقول سحر وفتون ضحكو عليك. والل نعرفه انك ابن كلب واطي. ودلوقتي تقول سحر متفقه معاك؟
شويه شويه يلاا تقول انى انا كمان متفق معاك متركز ياروح امك. وزعق بصوت عالى جدا. عندك ادله بكلامك ده ولا لاااء؟
علاء: بيتالم. وخاف وهز راسه لأ لأ ياباشا ماعنديش ادله. بس والله العظيم صدقنى انا، ااااااه ووقع ع الأرض. والبوكس ده كان من م/ احمد وكان بقوه مضاعفه.
م / احمد: بص ل عمرو وقال بغضب. الواد دا انهردا يبات ف برميل التلج مفهوووم ياعمرو.
ظابط: عمرو. تحت امرك ياباشا. اعتبروا حصل.
م / احمد: بص ل علاء دي البدايه بس ياروح امك. انا هخليك تمشي تلف حواليك من الرعب. وبص ل جابر. وزعق وانت اطلع بره. ابنك هيتعرض بكره ع النيابه يلااا بره.
ف نفس الوقت. ف المستشفى.
سحر. بتعيط بقلب موجوع. وحسن كل الل فهمه انها خايفه من أثر الحادثه. وبيهدى فيها.
محمد: دخل عند سحر. ومبصش عليها. وقال ل حسن. يلا ياحسن. هات مراتك عشان نرجع ع البيت. وسابهم وخرج.
سميره: دخلت وعيونها حمرا من العياط. وبتساعد سحر من غير ما تتكلم عشان حسن موجود.
سحر: بتبص ع امها ب أمل. لكن شافت إن مفيش امل. واستسلمت للفضحيه.
وبعدها خروجو. ووصلو الحاره. وشافو عربية سليم وخالد قدام العماره.
محمد: دخل البيت وقعد بتعب ع الكنبه ومتكلمش.
حسن: استاذنهم وطلع فوق ياخد دش ويغير هدومه
سحر: دخلت البيت واترمت تحت رجلين ابوها تعيط بوجع واتاسفت بندم كبير وذل.
وقالت كلام كتير انها ندمانه وخايفه تموت وربنا غضبان عليها. واتكلمت بشهقات ف حق فتون بالخير. ووطت وباست ع رجل ابوها وامها. وبتتالم بوجع كبير. وبعدها سكتت ومتحركتش.
محمد: مش قادر يتكلم ودموعه نازله ع بنته. ومش قادر يسامحها. وشاف سحر وهي بتبوس ع رجله. وبتتالم. واتخض لما شاف الاسدال عليه دم مكان الجرح. وسحر سكتت مره واحده. وقلبه بيدق بسرعه وخاف.
سميره: بتعيط بخوف من شكل الدم. وبتحرك سحرك. ولقتها مغمى عليها. وشهقت بصدمه.
محمد: وسميره شالو سحر بسرعه. ومحمد خرج ينادى ع الدكتور شكرى.
سميره: رفعت هدوم سحر. وشافت إن الجرح اتفتح جزء منه. وقلبها بيدق برعب ع بنتها. وكانت هتطلع تستغيث ب فتون. بس ماجالهاش جراه تطلع. وفضلت تعيط جمب بنتها.
الدكتور: شكرى جه بسرعه مع محمد. وشاف الجرح. وخيط الجزء الل اتفك. وعقم ليها الجرح. وعطاها ابره مهدئه.
وقال ل محمد لازم سحر تبعد عن التوتر لأن واضح من وشها انها كانت منهاره ومعيطه. واظن إن الجرح اتفتح من تأثير العياط. ف ارجوكم حاولو تخلوها هاديه وكمان علشان الجرح ميتعرضش للتلوث ويحصل مضاعفات اكبر.
محمد: شكر الدكتور. وشكرى خرج.
سميره: قعدت جمب محمد. واعتذرت كتير. واترجته أنه يسامح سحر لوجه الله.
محمد: اتنهد بتعب. وهز راسه وقال أنا مسامحها. وهتكلم معاها اول ما تفوق. بس ادعى انتى إن ربنا يسامحها.
عند فتون:
سليم: واقف قدام شقة فتون بيعمل مكالمه مهمه جدا. وقال ايوه ع العنوان الل انا قولتلك عليه تمام. شكرا يا رامز. سلام وقفل.
فتون: اول ما دخلت البيت قلبها دق بخوف وافتكرت علاء ووقفت مكانها.
سليم: اتحرك وواقف جمبها وحس بيها بتنهج بسيط. وسألها مالك يافتون؟
فتون: بتلعثم. خايفه. لأ لأ مفيش حاجه.
سليم: حس بيها وقرب منها يطمنها. وقال متخافيش. انا معاكى. ومد ايدو ووصل لكف أيدها.
فتون: حست بيه واتكسفت. وسابته ودخلت بسرعه وحضنت فاطمه من الخوف. وفاطمه ضمتها لقلبها بحب كبير وفرحه اكبر.
وسليم دخل وسلم ع خالد وفاطمه وحنين. وقعد. وفاطمه رحبت بيه جدا.
خالد: جاب كفته مشويه وكباب وعيش وسلطات. وبيجهز كل حاجه مع حنين. لأن سليم وفتون وصلو. ونزلو اكل ل طاهر.
فاطمه: انا الفرحه مش سيعانى. الحمد لله يارب إن بنتى بخير. إن شاء الله اول ما اقوم ع حيلى كدا وافوق لا اوزع رز بلبن ع أهل الحاره كلها...
خالد: الله الله هو ده الكلام الصح. وكترى زبيب ماشي.
سليم: ههههه يخربيت طفاستك.
حنين: حطت الاكل ع الصنيه. وقالت تعالى ياخالد شيل الصنينه انا جعانه اوى.
خالد: قام. وماله يستى عشان خاطر بطه بس.
فاطمه: قاعده وواخده فتون ف حضنها. وقالت شاله يخليك يا خالد يبنى. والله من غيرك انت وسليم مش عارفه كان حصل معانا ايه؟
سليم: ياريت بجد متقوليش كدا تانى. انا وخالد ولادك. واحنا معملناش حاجه. وابتسم بمكر وقال الحج محمد بيقول انى الملاك الحارس ل فتون...
خالد: صفر بصوت واطى الله يسهلو ايوه ياعم. ف يوم وليله بقيت ملاك. وانا التنين المجنح.
كلهم ضحكو.
فتون: خرجت من حضن فاطمه واتكسفت ومردتش واكتفت بابتسامه.
فاطمه: بصراحه ياسليم يبنى. الشيخ محمد مكدبش انت ربنا بعتك ملاك وانقذت بنتى. ربنا ينجيك ياسليم يبنى ويريح بالك يارب.
سليم: ابتسم. آمين. وبص ع خالد بعشوائيه. ايه يبنى مش هنتغدى ونروح ولا ايه؟ فتون لازم تستريح.
خالد: طبعا ياعم. ده انا صارف ومكلف. هههههههههه.
حنين: خرجت من المطبخ وماسكه ازازة الميا. طيب ايه ياعم التنين يالل صارف. انا هموت م الجوع والمغرب قرب يدن.
خالد: قعد طيب ياموزتى. يلا ياجماعه بسم الله عشان يبقى عيش وكفته. والكل ضحك. وقعدو ياكلو.
فتون: من جواها خايفه ع مبسوطه ع زعلانه. خايفه ع موضوع سحر. ومبسوطه إن سليم أنقذها ومعاها طول اليوم. وزعلانه أنها لحد دلوقتي سليم رافض حبها. واتنهدت بوجع. وعملت السندوتشات وقدمتها ل سليم بحب كبير. وكبرياء ف نفس الوقت.
بعد الاكل. شربو قهوه.
حنين: تونا ياحبيبتى انا هفضل معاكى انهردا. انا قولت ل ماما وخالد وواقفو. هنسهر للصبح يمعلم ههههه.
فتون: من جواها خافت إن يحصل حاجه. وحنين تتعرض لحاجه وحشه زى سحر. ورفضت الفكره. وقالت. لأ. احم لأ ياحنين روحي انتى انا كويسه جدا. انا هاخد العلاج وانام ع طول. متشغليش بالك.
حنين: كشرت عينيها. اممم انتى مش عايزانى معاكى بقى.؟
فتون: ولا عمرى استغنى عنك ياحنين. بس بجد هنام. وانا كويسه متقلقيش. يلا قومى بقى خدى خطيبك واتكلى.
خالد: والله انتى بنت حلال يافتون يختى. انا هموت وانام. يلا ياحنين سيبى فتون تستريح وتبقى تعالى ف وقت تانى.
سليم: همس ف ودن خالد. وصل حنين وحصلنى ع البيت مفيش نوم.
خالد: بمكر. هو انا بوحشك بسرعه كدا ياسولى.
سليم: بغيظ. خبطه بدراعه ف جمبه. اسمع الكلام يافاشل عايزك ف موضوع مهم.
خالد: بيتالم منك لله يا سليم. ربنا ع المفتري. اما انشوف اخرتها معاك. وقام وقف يلا يابنتى انتى كمان.
سليم: ضحك بصمت.
فتون: ابتسمت بحب لما شافت ضحكته الل وحشاها. وبعدها فاقت وكشرت تانى.
حنين: سلمت ع فاطمه وفتون.
خالد: سلم ودعهم واخد حنين ونزلو.
فاطمه: شافت فتون وسليم. قاعدين. قامت. بعد اذنك ياسليم يبنى. هدخل افرد ضهرى شويه.
سليم: قاعد ومحرج. وكل شويه يحسس ع الساعه ويشوف الوقت. وقال قبل ما تدخلى انا كنت عايز اقولكم. ان ف حراسه امنيه هتيجى تقف قدام باب الشقه.
فتون: فتحت عينيها بدهشه اييه حراسه؟
فاطمه: يعنى ايه يبنى. ومين الل هيقف قدام الباب.
سليم: قام وقف. بصراحه يابطه انا بعد الل حصل ده. طلبت من فتون تيجى هي وحضرتك تقعدو مع فريده لحد ما نطمن اكتر. بس هي رفضت.
وانا وخالد وكل واحد هيرجع ع بيته.
وانا كلمت واحد صحبى وطلبت منه حراسه. وانا هكون مطمن اكتر. ياريت بجد لو بتعتبرينى ابنك تسبينى اتصرف.
الل زي علاء ده تعبان وممكن يكون متفق مع اى حد بره. انا بقول ممكن مش اكيد. ف انا بحب ديما اكون واخد كل احتياطاتي. ولما نشوف النيابه هتعمل ايه مع الكلب ده...
فتون: حست ببلاها. ومش عارفه تفرح ولا ايه الل بيحصل معاها.؟
فاطمه: بحيره. والله يبنى مانا عارفه اقولك ايه؟
سليم: ابتسم. تقولى ومالو يسليم يبنى. اعمل الل انت شايفه صح.
ايوه صحيح انا مش شايف بس ع الاقل لقيت طريقي. ههههه
فتون: اتنهدت بزعل. وقالت جواها بصيرتك اقوى من بصرك ياسليم.
فاطمه: زعلت علشانه. وبعدها قالت. مش بتشوف ايه؟ اسم الله عليك دا انت الوحيد الل انقذت بنتى. وكان عندها حق لما قالت سليم بيشوف بقلبه ياماما.
وربتت ع كتفه. وقالت اعمل الل تشوفه صح يبنى. وربنا يوقفلك ولاد الحلال. وحراسه حراسه اهو الواحد ينام وهو مطمن كتر خيرك يبنى...
سليم: هز راسه وابتسم. متشكر انك ادتيلى الحق ده.
فاطمه: عينيها ع فتون وقالت. متقولش كدا ربنا يعلم غلاوتك. انا هدخل اريح شويه. وسابتهم ودخلت وسابت الباب مفتوح. ومحتاره ف تصرفات سليم الل كلها رجوله وشهامه. وحبه واضح ومكشوف جدا. ودعت ربنا انه يصلح الاحوال.
فتون: بحرج احم. هو يعنى كان لازم الحراسه دى؟
سليم: عندك اعتراض؟
فتون: لأ معنديش بس ليه؟
سليم: هو ايه الل ليه؟
فتون: كانت هتقوله بتعمل كل ده ليه؟ بس تراجعت وقالت ليه حراسه.؟
سليم: عشان أنا اكون مطمن اكتر ع بطه واا. عليكى.
فتون: الكلام هرب منها. واتوترت.
سليم: فونه رن وكان رامز. وقاله إن الحراسه ف المكان الل طلبته. وقفلو.
سليم: فتح الباب ووقف معاهم. واتفق معاهم. وقال انا عايز منكم تقفو قدام باب الشقه دى. واى حد تشكو فيه بس علقوه. ورقمى معاكم اى حاجه تحصل كلموني حتى لو ف نص الليل. انا مش عايز اى خطر ولا اى اذي يحصل للعيله دى فاهمين كلامى طبعا.
كلهم. فاهمين يا باشا. اطمن حضرتك ومتقلقش. الهوانم ف آمان.
سليم: هز راسه تمام.
سليم: دخل وقفل الباب بسيط. وقال فتون. الجارد بره. وياريت متخرجيش. واى طلب تحتاجيه اطلبيه منهم فورا.
فتون: عيونها لمعت بدموع. ونفسها ترمى كل وجع السنين ف حضنه. نفسها يعترف. نفسها تتحامى فيه وهو حلالها. واتنهدت بتعب. ماشي ياسليم.
سليم: طيب انا همشي دلوقتي.
فتون: هزت راسها. ربنا معاك مع السلامه.
سليم: مسك الباب وخارج. بس لف ونده فتون؟
فتون: قربت منه نعم ياسليم؟
سليم: متنسيش تاخدى علاجك. وكمان ارتاحى ونامى كويس. ومتجيش الشركه عشان الجرح الل ف راسك.
فتون: هزت راسها ماشي ياسليم متشكره ل هتمامك.
سليم: من جواه مش عايز يمشي. وقال بلخبطه. احم لو معرفتيش تنامى أو سهرتى كلمينى. طمنينى عليكى ياريت.
فتون: غمضت عينيها بحب. ونفسها يعترف. وقالت إن شاء الله. لو صاحيه هطمنك.
سليم: ابتسم. يبقى هستنى اتصالك.
فتون: من جواها قالت ده انت واثق بقى طيب ماشي. وقالت تمام ربنا يسهل.
سليم: متنسيش انك وعدتى فريده انك هتتغدى معانا. بعد اسبوع تمام؟
فتون: ضغطت على شفايفها بحرج. وقالت إن شاء الله وانا عند وعدى.
سليم: من جواه هتيجنن ويقولها هتوحشينى ومش عارف ليييه مش قادر يعترف. وهرش ف قفاه. خلى بالك من نفسك.
فتون: وانت كمان خلى بالك من نفسك.
سليم: هيتحرك. باى.
فتون: اتنهدت بحب باى ياسليم. وهتقفل الباب.
سليم: لف ليها. فتون؟
فتون: مسكت الباب، وردت نعم ياسليم؟
سليم: اقفلى الباب كويس. ومتفتحيش لأى حد.
فتون: قلبها دق بحب. حاضر ياسليم.
سليم: اقفلى وانا واقف عشان اطمن وانزل.
فتون: بفرحه. قفلت الباب كويس.
سليم: ابتسم. ونازل ونبه ع الجارد تانى. وطاهر ساعده. وقال ل طاهر عملت الل قولتلك عليه؟
طاهر: حصل ياسليم باشا. وكل حاجه هتكون عند حضرتك انت وخالد باشا.
سليم: ضحك بسخريه وهز راسه تمام. ونزل. وركب العربيه. واتصل ع خالد. ايوه ياخالد. انت وصلت فين دلوقتي؟ طيب تمام تعالى ع الفيلا انا هكون منتظرك ف المكتب. لأ لأ متقلقش الشغل تمام. انا عايز منك حاجه مهمه جدا. وتكون عندى بكره ع مكتب الشركه. آه. ياعم ماشي. انا مش هعطلك. هههههه لا طبعا انت عبيط يالااا. ايوه خلاص ف انتظارك. سلام. وقفل...
بعد شويه.
خالد ف مع سليم ف المكتب. وشاف الموبيل. وقال بدهشه بكره؟ لا طبعا صعب جدا. والحاجات دى قدامها ع الاقل اسبوع ع ما اجهزها واجبهالك
انا مش فاهم حاجه؟ انت عايز تعمل كل ده ليه؟
سليم: قاعد ع كرسي المكتب. وبص قدامه وقال اسبوع وماله مفيش اى مشكله. انا هفهمك كل حاجه...
عند فتون.
فاطمه نامت من التعب بعد ما اطمنت ع فتون.
فتون: ف الحمام بتاخد شاور. وبتعيد احداث امبارح. من اول ما علاء خبط. ولمسته لخدها. وقربه منها. وغمضت عينيها بوجع. ودموعها نازله. وافتكرت لما شد حجابها. وقطع لها الفستان. وفتحت عينيها بسرعه وشهقت بسيط. وبعدت عن الميا تظبط أنفاسها. ورجعت وقفت تحت الميا. وعيطت بوجع كبير وحضنت نفسها. وجواها ميت سؤال وسؤال لييه؟ ليييه انا. ليييه انا. وعيطت كتير. وخلصت الشاور ولبست واتوضت. وخرجت من الحمام. وخايفه من مكان دم سحر. وبصت حواليها بخوف. وراحت تقفل باب الشقه بالمفتاح. واتخضت.
الحارس: من بره ف حاجه ياهانم؟
فتون: اتخضت. وقالت احم لأ مفيش حاجه.
الحارس: تمام يافندم لو احتجتى لحاجه احنا تحت امرك.
فتون: هزت راسها بتوتر. احم شكرا. وقفلت نور الصاله. ودخلت الاوضه وقفلت ع نفسها. ولبست الاسدال. وفرشت السجاده. وصلت. وهي ف السجود. عيطت بهستريا. ودعت ربنا كتير اوى. وبتشكرو أنه نجاها وحافظ عليها وع شرفها.
وافتكرت ابوها وعيطت كتير. إن كل حاجه وحشه بتحصل بعد وفاته. لكن صبرت نفسها بالدعاء. وخلصت صلاه. وقامت وجابت المصحف وحطته جمبها ع السرير. وقعدت. وضمت ركبها وحضنتها. ودموعها نازله. وقالت يارب لحد امتى؟ يارب انا خايفه. خايفه إن علاء ياذينى اكتر من كدا. يارب انا ماليش غيرك. حتى سليم. سليم واقف جمبى وساعدنى بس اكيد ف يوم هيبعد مدام مش معترف بحبه ليا.
انا بحبه اوى. انا مش شايفاه عاجز. سليم ليه مش قادر يفهم انى بحبه وهو كدا. بحبه بعيوبه قبل مميزاته. تصرافاته كلها حب. انقذنى وحافظ عليا. وخايف عليا وبيفكر ف مصلحتى. طيب لحد امتى. أهل الحاره مش هيسكتو. اكيد هيسالو ايه سبب وجود سليم الل ظهر مره واحده في حياتى. وكمان دخوله البيت هنا عندنا مش صح. انا من ساعة ما حبيته مابقتش عارفه ايه الصح من الغلط.؟
حبى ليه خلانى شايفه كل تصرفاته صح. بس لأ لأ. انهردا عمى زينهم قالى الجيران بتسأل مين سليم وخالد دول؟ واضطر يكدب عليهم.
بس لأ انا كدا هدخل ف دايرة الشك. لازم ابعد عن سليم. لازم يا هو يتغير ويقبل نفسه ع كدا ويقبلنى. يا اما أبعد ويشوف مُدرسه غيرى.
وعيطت اكتر انا مش عارفه افكر. مش عارفه اخد قرار. وبصت للمصحف. ومسحت دموعها. واخدت المصحف وغمضت عينيها واخدت نفس عميق. وفتحته عشوائي. وفتحت عينيها وجت ع أية.
بسم الله الرحمن الرحيم
لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا
فتون: هزت راسها بيقين. ونعم بالله. وغمضت عينيها تانى. وقلبت الصفحات وفتحت عينيها. وابتسمت براحه كبيره. لما شافت.
بسم الله الرحمن الرحيم
وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ
فتون: قالت الحمد لله. وقررت تانى. وفتحت عينيها. وضحكت بدموع. وقالت. بسم الله الرحمن الرحيم.
سَيَجْعَلُ اللَّهُ بَعْدَ عُسْرٍ يُسْرًا وكملت بدموع قراءة الورد من بعد الايه.
وبعد شويه. حست بدوخه وتعب. وقفلت المصحف. وسابته جمبها. وشدت الغطا عليها. وقرأت سورة الملك. ونامت بعمق.
عدى اسبوع كمان
ويبقى الحال كما هو عليه.
سحر: كل يوم والتانى تعتذر لابوها وامها. ومحمد كلمها وعاتبها وبكى بحرقه. ع خيبة الأمل. وكان كلامه مؤثر جدا. وسحر هتموت من التعب النفسي. وسميره واقفه بتعيط. واترجته أنه يسامحها. ومحمد سامحها ظاهريا عشان خاف عليها لأنها خست خالص وتعبانه. وواحده واحده شاف تغيير سحر. وبتحافظ ع الصلاه. وبدءت تقرأ ف القرآن. وده ريح الشيخ محمد شويه.
خالد: وحنين زى ما هما مناوشات وزعيق وضحك وهزار.
وانهردا. خالد جهز طلب سليم واتصل عليه وقاله انا جايب الظرف. وصاحب الل ف الظرف وجايلك ع الشركه.
سليم: رجع الشركه. ورفع الحراسه عن فتون بطلب منها عشان أهل الحاره. وبيطمن ع فتون يوميا ف الفون ومتقابلوش من اخر مره. والحمد لله الجرح بقى تمام.
واتصل عليها. دلوقتي. وبلغها إن علاء اكيد هايتحكم عليه بالمؤبد وفتون فرحت إن ربنا نصرها عليه.
وقالتله انها من بكره هترجع الشركه. وسليم قالها. بس اعملى حسابك. فريده عزماكى ع الغدا انهردا انتى وبطه وقلبه فرحان انه هيقابلها اخيرا. وكمان مستنى خالد والراجل الل معاه بفارغ الصبر.
فتون: قلبها دق بسعاده انها هتشوفه اخيرا. وقالتله لأ مش ناسيه. انا شويه كدا هنروح ل مدام فريده. وقفلو وكل واحد مبسوط جدا.
فتون: بعد ما قفلت دخلت لبست فستان رقيق جدا. ومبسوطه وجواها مشاعر متلخبطه. لكن الل مسيطر عليها شوقها ل سليم.
ولبست. وفاطمه كمان لبست. ولسه هتفتح باب الشقه.
الباب خبط. وفتحت. وكان ابو سلامه.
فتون: استغربت لانه واخد ايجار الشهر القديم كله. وقالت اهلا ياعم ابو سلامه.
ابو سلامه: ببرود. اهلا وسهلا.
فتون: بتعجب من طريقته لكن قالت. خير ياعم ابو سلامه؟
ابو سلامه: خير إن شاء الله. بصي بقى يافتون يابنتى. بقى خير ف سلامه. وسلامه ف خير. ومن غير زعل وكلام كتير. انتى قدامك اسبوع واحد وتفضيلى البيت ده.