حكايات منار الحكاية 29 بعنوان تجارة كسبانة
السعادة مش في المال السعادة في الاموال السعادة في الاموال الكتير اوى ده اهم درس عملتهولي الحياة، الفلوس هتسهلك حاجات كتير وهتخلي الناس تعديلك حاجات كتير لانك معاك فلوس لان مصلحتهم معاك.
من اول صحابي المستغلين اللي كانو بيعدولي اي حاجة بعملها معاهم علشان انا بعزمهم كتير وبسلفهم كتير
وبعدهم المدرسين اللي كانو بيجولي لحد البيت وعمرى ما عاملت حد فيهم باحترام وكانو بيتحملو لان بابا كان بيدفعلهم تلت اضعاف فلوس الدرس
واخرهم حنين مراتى اللي متحملة كل حاجة بعملها علشان المستوى اللى انا معيشها فيه
متحملة رجوعى متاخر مكالماتى في التليفون بصوت واطى وانى اصلا مبسبهاش تمسك موبايلي.
هى من الاول محددة هدفها انها تبقي حرم دكتور ياسين عبدالله وعلشان كده كانت مركزة معايا وعاملة نفسها بتفرح لما بتشوفنى وعلشان كده بعدت عن سليم اللي كان المفروض انه اعز اصحابها لما انا بس لمحتلها انى مضايق من تعاملها معاه
وعلشان كده مستحملة انى بعاملها باهمال
عيد ميلادها جه ومع انى كنت عارف مجبتلهاش هدية غير بعدها بيومين وهى كان شكلها مضايق انا كنت جايبلها سلسلة ذهب واضح انها كانت عايزة هدية اغلي من كده.
احنا متجوزين من سنة ومخلفناش وهى الموضوع ده شاغلها جامد طبعا عايزة تخلف منى وتجيب عيال يورثونى وتضمن انى فلوسي متروحش لحد تانى
زيها زى امى زى كل الناس ميهمهمش غير الفلوس وعلشانها يستحملو اي حاجة حتى الخيانة يستحملوها مدام فيه فلوس ومستوى معيشة عالي وانا موفرلها ده جدا البيت فيه بدل الشغالة اتنين عايشة في مستوى اعلي من المستوى اللي كانت عايشة فيه قبل متجوزها بكتير بتاخد منى مصروف كبير مكنتش بتاخد ربعه حتى من عمى قبل منتجوز.
جايبلها عربية بسواق يوديها مكان ما تحب
حياتها معايا هى مكنتش تحلم بيها وتمن سكوتها علي عمايلي ومعاملتى ليها انا بدفعهولها واكتر منه كمان
حنين تبقي بنت عمى والدها يبقي ابن عم ابويا يعنى يعتبر عمى.
رجعت البيت الساعة اتنين بالليل كالعادة دخلت اخد شاور خرجت لقيتها ماسكة جاكيت البدلة بتاعتى
حنين:ايه ده يا ياسين
ياسين بعدم اهتمام:ايه
حنين:دول تذكرتين سينما...هو انت روحت السينما
ياسين:مش التذاكر في ايدك يبقي روحت
حنين:روحت مع مين
ياسين:بتسألى ليه
حنين:انا مراتك وحقى اعرف
ياسين:انتى تسألي في اللي انا اسمحلك تسألى فيه بس وتعرفى اللي انا عايزك تعرفيه بس ومهما اعمل انتى مش من حقك تحاسبينى واظن انى بديكى مقابل لكل ده ومقابل مناسب اوى.
حنين:مقابل ايه ده اللي ممكن تديهولى علشان خيانتك
ياسين:مقابل ايه بجد بتسالي
مقابل مادى معيشك في مستوى مكنتيش تحلمى بيه
مقابل اجتماعى بقيتى حرم الدكتور ياسين عبدالله
اللي مفيش حد ميتمناش يناسبه اللي مفيش بنت مبتحسدكيش عليه
حنين:انت فاكر انى اتحملت كل اللي انت عملته قبل كده علشان اللي انت قلته ده
ياسين ببرود:طبعا امال هتكونى اتحملتيه ليه.
حنين:علشان حبيتك علشان خليتك حلمى الوحيد علشان كنت مفكرة انك النور وسط الضلمة اللي كنت عايشة فيها طول عمرى علشان كنت مفكرة انك الفرحة اللي عشت طول عمرى اتمناها علشان كنت بخاف من كل حاجة في حياتى وبخاف من كل الناس ما عدا انت ويا رتنى خوفت منك
لما جبتلي هدية بعد عيد ميلادى بيومين انا اتضايقت لانك نسيته وانت اكيد فكرتنى زعلت علشان كنت عايزاك تجبلي حاجة اغلي صح.
انا استحملت اهمالك وبعدك عنى علشان قلت ان يمكن انا اللي حلمت بيك واستنيت منك كتير وبالغت في احلامى وانك ملكش ذنب قلت ان ده اسلوب حياتك وانا هشاركك حياتك مهما كانت وقلت ان حياتى معاك مهما كانت اكيد احسن من حياتى قبلك واكيد احلي من اي حياة كان ممكن اعيشها مع اي حد غيرك قلت انك حلمى اللي اتحقق ومش هضيعه من ايدى بعد ما وصلتله.
ياسين:وسكتى علي خيانتى علشان بتحبينى
حنين:لا علشان كنت خايفة اتكلم كنت خايفة اعرف كنت خايفة اكتشف انك اسوء من ابويا وانى هربت من جحيم لجحيم اكبر منه
ياسين:
حنين وهى بتضربه في صدره:انت معندكش قلب اللي بيدق جوا ضلوعك ده مش قلب
انت مخدتش بالك انى مبخرجش كتير يعنى مبتباهاش بالعربية والسواق اللي انت جبتهم
مخدتش بالك انى اتعلمت الطبخ من الشغالتين اللي انت جايبهم وبقيت بطبخ علشانك.
مخدتش بالك انى بجيب بأغلب الفلوس اللي بتديهالي هدايا ليك وانى لو جبت حاجة لنفسي بجيبها علي زوقك انت وافضل ادعى ربنا تعجبك عليا
ياسين:وسليم اللي بعدتى عنه لما بس لمحتلك انى بضايق من تعامله معاكى
حنين وهى بتقعد عالسرير وبتعيط:انت مفكر انى خسرته علشان انت قلت كده
انا خسرته علشان قالي انه بيحبنى وانه اكتشف كده لما اتخطبتلك مع انه كان عارف انى بحبك من قبلها لانى كنت حكياله لانه اعز اصحابي انا مكنش ليا غيره ولما قالي اسيبك وقالي انه بيحبنى وهيقدرنى وهكون سعيدة معاه وانه هيخلينى انساك وانه ميقدرش يعيش من غيرى دوست انا علي قلبه وقولتله انى بحبك ومش ممكن احب حد غيرك وهو سافر سابلي مصر كلها وبعد لانه مكنش هيقدر يشوفنى وانا بكون لحد غيره.
خسرت اعز اصحابي علشانك وانت شايفنى مجرد واحدة انانية مادية ميهمهاش غير الفلوس
طيب ودعايا لربنا ان ابقي حامل واجيب منك ولاد يعوضونى عن كل اللي شفته من ابويا اللي طول عمره مبيهموش غير نفسه واخويا اللي كان زيه ولما فاق وقرر يتغير اول حاجة عملها انه ساب البيت وراح عاش فى مرسى مطروح.
انت تعرف انه عرض عليا اروح اعيش معاه وانا رفضت علشان مبعدش عنك علشان افضل قدامك يمكن تشوفنى بجد وتحس بيا
فسرت بإيه زعلي اننا مخلفناش ايه فكرت انى عايزة اجيب ولاد يورثوك صح ما انت بالنسبالى مجرد خزنة فلوس بقي وانا همى اكوش علي كل اللي فيها
طيب كفاية كلام عن مشاعرى علشان انت معندكش قلب يحس او يفهم اللي بقوله
نتكلم بالعقل وبلغة الفلوس اللى انت مبتفهمش غيرها.
انا اتقدملى قبلك واحد جارنا اغنى منك هو اه كان اكبر منى باتناشر سنة بس اكيد مكانوش هيفرقو مع واحدة مادية حقيرة زيى وانا رفضته من غير مقعد معاه حتى تفتكر ليه
سليم اعز اصحابي اللي هاجر استراليا ده مش تقريبا في نفس مستواك المادى تفتكر متجوزتوش ليه وهو شكلا احلي منك
علشان انت دكتور مثلا وعندك عيادة كبيرة وشغال في مستشفى خاص كبير مش مهم سليم مهندس يعنى انت مش احسن منه ده لو حسبناها من ناحية الوجاهة الاجتماعية اللي انت بتفكر بيها بوجهة نظرك القاصرة والسطحية.
علي الاقل سليم عنده قلب مش زيك سليم كان بيسمعنى وبيضحكنى وبيشيل معايا همومى كان اقربلي من كريم اخويا واحن عليا منه ومن ابويا ومنك كان شايفنى صح كان بيحبنى وكسرت قلبه علشانك علشان واحد شايفنى مجرد واحدة طماعة علشان واحد معندوش حاجة يديهالي غير الفلوس خسرت واحد كان مستعد يدينى عمره كله.
ياسين:خلاص اسكتى
حنين وهى بتعيط اكتر:لا مش هسكت انا بعت الغالي بالرخيص يا ريتنى ماحبيتك يا ريتنى ما خسرته علشانك يا ريتنى ما اتجوزتك انت ازاي تتجوزنى وانت شايفنى حقيرة اوى كده
يا اخى كانت غارت فلوسك وشغلك ومستواك المادى والاجتماعى وفضلي قلبك اعمل ايه انا بكل ده وانت معندكش قلب يفيدنى بايه كل ده
ياسين:
حنين وهى بتكسر هداياه ليها:انا ميلزمنيش البرفانات الغالية اللى انت جبتها دى ... والساعات دى مش عايزاها...وكل الهدوم دى متسواش عندى..انا مش عايزة كل ده ولا عايزاك خلاص
ياسين:قصدك ايه.
حنين وهى بتطلع شنطة سفر بتحط فيها هدومها:يعنى انا همشى من جحيمك اللي انت مفكر انه جنة ده
ومتقلقش مش هاخد اي حاجة انت جبتهالي او اي حاجة جبتها انا لنفسي بفلوسك لانى مش عايزة اي حاجة تفكرنى بيك هخرج من بيتك زى ما دخلته ربنا ينتقم منك يا ياسين يا رب تحس باللي انا حساه دلوقتى ده يا رب تيجى اللي توجعلك قلبي زى ما وجعتلي قلبي وكسرته عمرى مقدرت ادعى عليك برغم كل اللي عملته قبل كده كنت دايما بدعى ربنا يصلحك ليا كنت دايما بسال نفسي ايه اخرة حبي ليك وانا حساه مبيقلش برغم كل اللي بتعمله كنت بقول ان ملوش اخر وانى عمرى مهقدر ادعى عليك بس انت اثبتلى ان ليه اخر واخره اللي انت قلته ده اخره انك شايفنى بالصورة دى اخره انك دوست علي قلبي وعلي كرامتى وعلي حلمى اللي اتضح انه كابوس
وطلعت اقدر ادعى عليك حسبي الله ونعم الوكيل فيك ربنا ينتقم منك.
امى الله يرحمها كانت بتقولي ان اللي بيحب حد مبيقدرش يدعى عليه وانا خلاص بقيت اقدر ادعى عليك لانى بقيت بكرهك يا ياسين بكرهك وهفضل اكرهك وادعى عليك طول عمرى طلقنى يا ياسين طلقنيييييى
ياسين:لا مش هطلقك
حنين:انا مش عايزة منك اي حق من حقوقي بارياك من كل حاجة بس خلصنى منك والشبكة واي ذهب انت جبتهولي جوا انا مخدتوش وبقيت هداياك انا كسرتها ارحمنى بقي وطلقنى وروح اشتريلك واحدة تانية بفلوسك انما انا مش للبيع يا دكتور ياسين
ياسين وهو بيقفل باب الشقة بالمفتاح:قلت مش هطلقك انسى وطلعى فكرة الطلاق دى من دماغك
حنين:وانا مش هعيش معاك يوم واحد كمان.
ياسين:وانا بقولك انك مش هتعتبي خطوة واحدة بره البيت ده
حنين:يبقي هنتحر هموت نفسي انت مش هتجبرنى اعيش معاك بقولك انا بكرهك بكرهك ايه مبتحسش وفهمتها انما كمان مبتسمعش ومبتفهمش طلقنى وروح اشتريلك واحدة تانية وخونها براحتك وسكتها بفلوسك انما انا لا انت ولا فلوسك تلزمونى
ياسين:انا مش هطلقك يا حنين وانتى عمرك مهتبقي لحد غيرى انتى فاهمة هتعيشي معايا لاخر يوم في عمرك
حنين وهى بتفتح باب البلكونة: يبقي النهاردة هيبقي اخر يوم في عمرى
ياسين وهو بيمسكها وبيهزها من كتافها:ايه للدرجة دى الحياة معايا صعبة انا امى استحملت اكتر من كده في حياتها مع ابويا ومسابتوش غير بس لما حصلتله ازمة مادية وراحت اتجوزت واحد اكبر منها بتلاتين سنة ومسالتش عنى وابويا رجع تانى زى الاول وطلع من ازمته المادية بس هى خلاص كانت جربت مستوى اعلي ومش هتضحى بالمستوى ده ولا حتى علشانى.
عايزانى افكر فيكى ازاى وانا امى عملت كده وابويا دايما يقولي قيمتك هى فلوسك لو ضاعت منك هتضيع انما طول ما انت معاك الفلوس يبقي معاك كل حاجة خصوصا لما تكون ذكى وعارف تكبر فلوسك ازاى وعارف تستغلها ازاى ساعتها الناس هتعملك الف حساب وهيتحملو منك اي حاجة
حنين:انا متحملتكش علشان فلوسك ومش هفضل معاك علشانها انا هسيبك هخرج من جحيمك ده هروح اعيش مع اخويا انا تعبت يا ياسين وانت النهاردة خلتنى عرفت ان تعبي كان عالفاضى وانا مش هقدر اتحمل صدقنى مش هقدر انا ابويا دمر فيا حاجات كتير واللي هو مدمروش دمرته انت قضيتو عليا انتو الاتنين
ياسين وهو بيكسر فى فازات وشمعدانات البيت:وانا مدمرتش ان امى ميهمهاش غير الفلوس ده مدمرنيش ان ابويا لما كنت بنقص في اي مادة كان بيضربنى بعدد الدرجات اللي بنقصها ده مدمرنيش لما كان بيهينى لما اي حد نعرفه من سنى يجيب درجات اعلي منى ده مدمرنيش لما مكنش عندى حد يهتم باكلي ولبسي وياخد باله منى لو تعبت غير الشغالين انما لا امى موجودة اصلا ولا ابويا فاضيلي ده مدمرنيش علي الاقل انتى امك كانت بتحبكم وسابتكم غصب عنها ربنا اختارها انما انا امى سابتنى بمزاجها يا حنين فاهمة يعنى ايه بمزاجها.
حنين:اهدى طيب يا ياسين
ياسين وهو بيعيط:مضايقاكى اوى الصورة اللي شايفك بيها واجعاكى اوى افكارى عنك طيب فكرتى فيا متخيلة انا احساسي ايه وانا عارف ان من غير فلوسى محدش هيعملي حساب ومن غير شغلي محدش هيحترمنى وان كل حاجة في حياتى بسبب الفلوس بيتى وعيادتى وعربيتى وصحابي وحتى مراتى ومحدش جنبي علشان هو عايز يبقي جنبي علشانى انا علشان ياسين مش علشان فلوسى ومركزى حاسة بقد ايه وجعانى فكرة انى من غيرهم مليش قيمة ومش هيكون جنبي حد
حنين وهى بتديله مناديل:متعيطش لان دموعك دى مخليانى مضايقة من كل الناس اللي في حياتك وسببولك كل ده
ومخليانى كمان ناسية غضبي ووجعى منك ومركزة في وجعك انت وده مينفعش.
ياسين:ليه
حنين:علشان غضبي بيهدى ووجعى بيقل وانا محتاجاهم علشان اقدر ابعد عنك بص يا ياسين اللي والدك رباك عليه غلط قيمتك مش في الفلوس ولا حاجة قيمتك في افعالك في تأثيرك في حياة اللي حواليك الفلوس مش هتشتريلك صحاب وزوجة الصحاب اللي بجد ملهمش سعر اغلي من اي فلوس ممكن تكون معاك زى سليم كده انما الصحاب اللي بفلوس دول مش صحاب ميستاهلوش الكلمة دى وميستاهلوش تعرفهم
والزوجة لو اشتريتها بفلوسك تبقي مش زوجة تبقي عبدة لفلوسك ولما تلاقي حد غيرك يدفعلها اكتر هتروحله وتبقي عبدة لفلوسه هو ومش شرط تخسر فلوسك ولا حاجة الفكرة انها مفيش حاجة هتملا عينيها ومهما كنت غنى دايما هيكون في الاغنى
حب اهلك ليك مش هتشتريه الفلوس والا كنت انا حبيت ابويا بدل ما انا بكرهه لانه عمره مفكر فيا او في اخويا ومبيفكرش غير في نفسه او كنت انت حبيت والدك بدل ما انت تقريبا مقاطعه كده وبتفضل بالاربع شهور متشفوش عادى.
كان سليم اشترا حبي ليه او حتى كنت انا اشتريت حبك
الفلوس مبتشتريش حب الناس يا ياسين
ياسين:هو انتى بطلتى تحبينى بجد وبقيتى بتحبي سليم
حنين:هبطل احبك يا ياسين وسليم انا بحبه بس كاعز اصحابي كاخويا اللي امى مجابتهوش
ياسين:بس هو حبك
حنين وهى بتضحك:اه شفت مع انى مكنتش بديله فلوس وهو كان اغنى منى اساسا علشان تعرف بس ان الحب مش بالفلوس
ياسين:هو حبك ليه
حنين:علشان ربنا كاتبله يحبنى الحب مبيكنش باسباب.
بس لو محفظناش عليه واهتمينا بيه بيموت وعلشان كده سليم نسينى وخطب في استراليا عرفت كده من والدته هى متعرفش انى كسرت قلبه وانه سافر بسببي سليم محكلهاش فبتتعامل معايا عادى عرفت منها انه خطب وانه حتى احتمال ينزل مصر قريب ويتجوزو هنا اللي خطبها مصرية بس بتحضر ماجستير بره
ياسين:انتى يهمك تعرفي اخباره
حنين:لأننا اصحاب كمان فرحت لما عرفت انه نسينى وقلبه اللي كسرته جبرته وفرحته واحدة تانية
ياسين:تفتكرى نسيكى بجد
حنين:اه سليم مش هيخطب واحدة وهو بيفكر في واحدة تانية هو راجل بجد ومستحيل يجرحها ويكسر قلبها
ياسين:بتتكلمى عنه كأنه حاجة كبيرة وقيمته غالية عندك امال محبتيهوش ليه
حنين:علشان ربنا مش كاتبلي احبه
ياسين:وكاتبلك تحبينى انا.
حنين وهى بتضحك:ايه ده اقتنعت انى بحبك ومش علشان فلوسك اتجوزتك واتحملت معاملتك ليا ده تطور كبير
ياسين:متهزريش وانا بتكلم جد
حنين:مش فارقة كلام جد من هزار يا ياسين خلاص هى خلصت كده
ياسين:ليه
حنين:علشان انا اختارتك تكون حلمى الوحيد وانت صحتنى علي كابوس علشان انت اسوء من ابويا علي الاقل ابويا مخانش امى وهى عايشة ولا عرف عليها ستات ومتجوزش غيرها غير بعد ما ماتت هو اينعم تقريبا بيتجوز كل تلت اربع شهور واحدة بس علي الاقل مخانهاش وعلي الاقل مبيعملش حاجة حرام دول مراتاته انما انت حرام عليك.
انا فشلت يا ياسين فشلت انى املا قلبك فتحبنى وفشلت انى املا عينك فمتشوفش غيرى
ياسين:مين قالك انك فشلتى
حنين:لو اللي احنا فيه ده مش فشل امال ايه الفشل بقي
ياسين:انا مخونتكيش يا حنين انا كنت بوهمك انى بخونك بوهمك انى بكلم عليكى ستات وبخرج معاهم وبسبكها بانى مبسبكيش تمسكى موبايلي حتى النهاردة انا جبت التزكرتين بتوع السينما علشان بس تشوفيهم وتفكرينى روحتها مع واحدة انما والله العظيم انا عمرى ما خونتك
حنين:وعملت كده ليه
ياسين:علشان كنت فاكرك اتجوزتينى علشان فلوسي علشان فاكرك وفاكر كل الستات زى امى علشان اشوفك هتعملي ايه كان نفسي ترفضى كان نفسي تقوليلي لا تمنعينى اعمل كده علشان تتوجعى زى مانا واجعنى احساس انك معايا علشان فلوسي.
حنين:لا اطمن انا اتوجعت اكتر بكتير انا كنت شايفاك عوضى عن كل اللي عشته كنت بانية عليك احلام كتيرة مكنش فيه حلم واحد انت مش شريكى فيه حلمى ان يكونلي بيت بجد واعمل عيلة احبها وتحبنى انى افرح وارتاح وانسي كل اللي عشته قبل كده وانت باللي كنت بتعمله ده كنت بتهد كل احلامى دى فوق راسي واحدة واحدة بالبطئ يعنى وده بيوجع اكتر من انك تهدها فوق راسي مرة واحدة.
ياسين:انتى مش هتسبينى يا حنين
حنين:انا مش هقدر اعيش معاك يا ياسين
ياسين:هتغير والله هتغير هثق فيكى مش هوجعك تانى هنخلف ونجيب ولاد نربيهم سوا صح نعملهم كل اللي متعملناش نديهم كل اللي اتحرمنا منه هقدرك وهفرحك وهريحك بس انتى ادينى فرصة انا بحبك يا حنين وحياة ربنا بحبك وده اللي كان مزود احساسي بالوجع منك انى بحبك وفاكر انك مبتحبنيش بس خلاص هصلح غلطى اللي كسرته فيكى هجبره اللي هديته في احلامك هبنيه تانى هعوضك عن اللي عشتيه قبل كده كله وهسيبك تعوضينى انا محتاجلك تعوضينى يا حنين محتاجلك تفضلي بتحبينى وبتدعيلي اوعى تبطلي تحبينى اوعى تدعى عليا اوعى تكرهينى.
انا بحبك ومش هقدر احب غيرك ولا هقدر اورى وجعى وضعفي ده لحد غيرك متسبنيش لانى من غيرك هبقي لوحدى ومليش حد انا مفيش غيرك بيحبنى بجد
انتى لسه بتحبينى يا حنين اللي قولتيه ده بسبب وجعك منى بس انتى لسه بتحبينى صح
حنين:احنا محتجاين نلم اللي احنا كسرناه ده حسنية ونعمة مينفعش يجو يلاقو البيت مدشدش كده
ياسين:انتى مش هتسبينى يا حنين انا مستغناش عنك ومش هسيبك تسبينى انا بحبك والله العظيم بحبك
حنين بابتسامة:حلوة مش هسيبك تسبينى دى عجبتنى.
ياسين:مش هتسبينى يا حنين
حنين:اسيبك ازاى بس وانت قفلت الباب بالمفتاح اطير من البلكونة يعنى
ياسين:انتى مش هتسبينى علشان انا قفلت الباب
حنين:لا انا مش هسيبك علشان انا مش هقدر اسيبك وابعد عنك يا ياسين
ياسين بابتسامة:غضبك راح ووجعك اختفى
حنين:وجعك خلانى نسيتهم ورجعت من تانى مش فارق معايا غيرك وعايزة افرحك وانسيك كل ده واعوضك عنه
ياسين بابتسامة:بجد
حنين بابتسامة:بجد انا بحبك
ياسين:خدى الفازة دى
حنين:ليه
ياسين:اكسريها الاحساس حلو ومريح
حنين:لا ازايز البرفان احسن وبتخلي ريحة المكان احلى
ياسين:خلاص انا هكسر ازازة برفان من بتوعى وانتى اكسرى الفازة
حنين:تمام موافقة جدا
ياسين:يلا مع بعض واحد اتنين تلاتة.
دشششششششش
ياسين:انا بحبك
حنين:وانا كمان بحبك
ياسين:هشترى قلبك اللي زى الماس ده بحبي هدفع عمرى كله تمن انك تقضى معايا بقية حياتك وتفضلي جنبي
حنين بابتسامة:علي بركة الله وانا موافقة بقيت تاجر شاطر
وانا هخليك دايما حلمى الوحيد وهتبقي شريكى في كل حاجة جاية في حياتى هخفف عنك وجعك وهبنى معاك زكريات حلوة تاخد مكان كل الذكريات الوحشة ده وعد منى ليك
ياسين بابتسامة:وانا مصدقك وواثق في كلامك من غير ما توعدينى.
بعد سنة حنين بقت حامل مع ان مكنش في اي حاجة تمنع اننا نخلف بس ربنا مأرادش ان يحصل حمل غير بعد مواجهتتا دى بسنة
سنة كانت كل حاجة فيها اتغيرت حنين بقت مرتاحة اكتر معايا بتعمل علشانى كتير حياتها كلها بقت علشانى ودايما محسسانى ان مفيش عندها اهم منى ولا اغلي منى دايما شايف حبها ليا في عينيها وحاسس بيه في كل تصرفاتها وكلامها.
وانا كنت اتغيرت فهمت ان الفلوس مبتشتريش السعادة بدليل انى قبل كده عمرى مكنت مبسوط وان الناس اللي بيحبوك بجد متشتريهمش ليك الفلوس
الفلوس حاجة مهمة ومهمة اوى كمان ومن غيرها فعلا الحياة صعبة والحوجة مرة بس الفلوس مش اهم حاجة في الحياة في حاجات كتير مهمة زيها وحاجات كتير اهم منها زى السيرة الكويسة بين الناس زى العمل الصالح اللي مش هيفضل غيره بعد ما نموت في الدنيا ولا هينفعنا غيره في اخرتنا.
زى حب الناس وراحة البال وزى السعادة اللي بجد
مع الوقت انا غيرت معاملتى مع ابويا بقيت بعامله احسن بكتير وسامحته علي التربية القاسية اللي ربهالي علشان ولادى يكونو بارين بيا
وحنين كمان بقت كده مع والدها بتعامله كويس علي قد ما تقدر هو اينعم متغيرش ولسه بيتجوز كتير ومبيفكرش غير في نفسه بس هى بتعامل فيه ربنا وعلاقتها باخوها اتحسنت كتير اوى وبقت احلي واقوى من الاول بعده عن ابوهم خلاه نفسيا احسن وبقي مقدر ان حنين بتحاول تقربله فبقي بيقرب هو كمان واتجوز وخلف بس مرجعش يعيش معانا وفضل عايش فى مرسى مطروح زى ما هو بس بيجى كتير اجازات ومع الوقت بقي بيسال علي والدهم بيسال قليل شوية لانه مقدرش يسامحه بس بيسال علي الاقل قبل كده مكنش بيسال عنه خالص اهو كده اهون شوية.
وانا مسالتش عن امى مقدرتش مع انى حاولت بس هى عمرها ما سألت عليا ولا اهتمت تعرف عنى حاجة فكان صعب اوى عليا اسأل انا عليها بس كنت واخد قرار لو هى حاولت تشوفنى او تسال عليا ولو لمرة واحدة مش هعاملها وحش والصراحة هى عمرها محاولت هى فعلا نسيتنى وعاشت حياتها
سليم رجع مصر بس علاقته بحنين مرجعتش زى الاول بصراحة انا اللي طلبت منها ده انا فعلا بغير منه ومن صداقتهم ومن المكانة اللي هو واخدها عندها ومن انه في يوم حبها وكان عايزها تفسخ خطوبتها منى علشانه وحنين قدرت غيرتى ومحاولتش ترجع صداقتهم زى ما كانت
انا وهى خلفنا تقى وبعدها باربع سنين جبنا يحيى و بعده بسنتين جبنا اخر العنقود جميلة
وكنا واخدين قرار ولادنا مش هيشوفو اللى شفناه ومش هيعيشو اللي عشناه مع اهالينا عوضناهم وعوضنا نفسنا بيهم عن كل اللي شفناه واديناهم كل اللي اتحرمنا منه.
وانا بقيت بعرف قيمتى من حبهم ليا بحدد مكانتى في الدنيا واهميتى بحب حنين وولادنا ليا مش برصيدى في البنك ولا بمكانتى في المجتمع مكانتى في قلوبهم بقت اهم عندى
انا طبعا بشتغل وبتعب علشان اوفرلهم حياة كريمة حياة ميحسوش فيها انهم اقل من حد ولا يحتاجو حاجة ومقدرش اعملهالهم بس كمان بحاول اربيهم صح ابنيهم صح مش بس ابنيلهم عمارات واجمعلهم فلوس واهدهم هما واطلعهم مرضي نفسيين مش واثقين في نفسهم ولا في حد
وحنين معايا وبتساعدنى في كل ده هى شريكتى في كل ده شريكتى في حياتى بكل الحلو والوحش اللي فيها.
وانا كمان شريكها في حياتها بكل ما فيها وفضلت حلمها الوحيد الحمد لله ده عمره متغير
وانا كلي علي بعضي ليها ولولادنا انا مليش غيرهم ربنا يياركلى فيهم ويديمهم في حياتى نعمة ومصدر للسعادة وعوض عن كل اللي عشته قبل كده
حنين وبيتنا وولادنا هما تجارتى الكسبانة اللي مش ممكن تخسر ده اهم واصدق واحلى درس اتعلمته في حياتى كلها.