قصص و روايات - قصص هادفة :

حكايات منار الحكاية 30 بعنوان كلام حلو

حكايات منار بقلم منار محمود

حكايات منار الحكاية 30 بعنوان كلام حلو

داليا:خد
سيف:ايه ده
داليا:حلة محشى هيكون ايه يعنى زى ما انت شايف شيكولاتة
سيف:جايبهالي ليه
داليا:علشان انت بتحبها
سيف:البنات بس اللي بتحبها.

داليا:الشيكولاتة بتزود هرمون السعادة وبتقلل المشاعر السلبية واظن انها قبل متعمل كده مش هتطلع بطاقة هرمونات السعادة تشوف اذا كانت هرمونات بنت ولا ولد
سيف:كالعادة كلامك منطقى بس مين قالك انى مضايق
داليا:انا عارفة ان هندسة كانت حلمك مع انك مكنتش مستعد تتعب بجد علشان تحقق الحلم ده بس برضه هى كانت حلمك واكيد هتزعل لما حلمك ده ميتحققش
كمان مدام قعدت عالسلم قعدة البؤساء دى تبقي مضايق معروفة يعنى
سيف وهو بياكل الشيكولاتة:يلا اهو كله بيطلع في الغسيل.

هتعدي هيجرى ايه يعنى
داليا:هى اكيد هتعدى زى ما كل حاجة بتعدى بس لازم تفكر كويس هتعمل ايه وتحسبها صح علشان تعدى بنجاح ومتندمش بعد كده ها هتكتب ايه في الرغبات
سيف:احلى حاجة انك بتتعاملى بجدية مع مشاكلي اكتر منى
داليا:ماهو مش هينفع احنا الاتنين نعتبرها مشاكل تافهة
المهم مجاوبتش سؤالي هتكتب ايه في الرغبات
سيف:مش عارف انتى رايك اكتب ايه
داليا وهى بتفكر:مش عارفة بالظبط تكتب ايه ..تكتب ايه...تكتب ايه
سيف:قولي انت وصلتى لفكرة.

داليا:عرفت منين
سيف:مدام بصيتى قدامك وركزتى وبعدين عينك وسعت شوية كأنك بتبحلقي في حاجة وبقي في علي وشك نص ابتسامة كده يبقي وصلتى لحل للي كنتى بتفكرى فيه المهم فكرتى في ايه
داليا:بص انت ممكن تدخل حاسبات ومعلومات انت بتحب الكمبيوتر والبرمجة كمان مجالات شغلها كتير
وممكن تدخل كلية تربية رياضية وتفتح جيم انت برضه بتحب الحكاية دى
سيف:مين فيهم احسن بالنسبالك
داليا:المهم مين فيهم احسن بالنسبالك انت
سيف:يعنى مش فارق معاكى ادخل دى ولا دى.

داليا:لا انت كده كده ابن عمى دخلت حاسبات دخلت تربية رياضية مش هتفرق معايا
سيف:يبقي حاسبات وبعدها نكتب تربية رياضية تمام
داليا:تمام انا هدخل شقتنا علشان ورايا كيمياء مش عايزة اذاكرها اساسا
سيف:وهتذاكرى ليه مدام مضايقة كده وكمان انتى لسه بدأه دروس الاسبوع ده والدراسة مبدأتش لسه اصلا يعنى لسه بدرى ومعاكى وقت
داليا:علشان انا لو كسلت مرة هكسل بعدها مليون مرة مينفعش الموضوع يمشي حسب حالتى المزاجية انا عايزة ادخل صيدلة يبقي اتعب علشانها اللي مش هيتعب علشان احلامه يبقي عمره مهيحققها يا سيف.

سيف:ربنا يوفقك وتحققى كل اللي نفسك فيه
داليا:اللهم امين بعد اذنك
سيف:داليا
داليا وهى بتبصله:ايوه
سيف:انتى عارفة اننا كمان كام سنة هنتجوز صح
داليا:وانت عارف ان ده مستحيل وعلي جثتى انه يحصل صح
سيف:هيحصل وهتشوفى
داليا:مستحيل وهتشوف انا هروح اذاكر سلام

بعد عشر شهور
سيف:يبنتى اضحكى
داليا:اضحك ازاى وانت جايبنى الملاهى وانا عندى امتحان بعد بكرة بدل ما اقعد اذاكر
سيف:انتى مذاكرة كويس يا داليا انا متاكد انك مذاكرة المنهج كله بدل المرة اتنين وتلاتة وحليتى كل امتحانات السنين السابقة كمان ومش محتاجة تذاكرى اكتر
انتى محتاجة تهدى وتقللي توترك
داليا:ومينفعش اقلله وانا بذاكر يعنى
سيف وهو بيضحك:لا انتى كده هتزوديه مش هتقلليه.

وبعدين مش انتى اللي قولتيلي انك مضايقة ومش عارفة تعملي ايه
داليا:ويا ريتنى مقلتلك اديك اقنعت ماما واستأذنتها وجبتنى هنا وخلتنى سبت مذاكرتى ومش فاهمة ماما ازاى توافقك علي حاجة زى كده
سيف:علشان عارفة ان كلامى صح وانك لو فضلتى في التوتر ده هيجرالك حاجة قبل الامتحان
داليا:ولو برضه توافق وكمان ترضى انى اجى معاك لوحدى.

سيف:وانا يعنى هاكلك مرات عمى بتثق فيا والاهم من كده بتثق فيكى
داليا:مش مسئلة ثقة يا سيف دى مسئلة حلال وحرام
سيف:تعالي نلعب طيب نبدء بالساقية انا عارف انك بتحبيها
داليا:ماشي يلا

بعد تلت سنين
فى شقة عبدالرحمن والد داليا
سيف وهو بيضحك:ايه يينتى اللي انتى عملاه في نفسك ده ماسكة مج النسكافية بايد وطبق الخضار بايد وحطا السندويتش في بؤك ايه المنظر المسخرة ده طيب هاتى السندويتش اللي فى بؤك ده علشان تعرفي تتكلمى
داليا بصدمة:انت..انت بتعمل ايه هنا
سيف:عادى جاى اقعد معاكم شوية
داليا وهى بتبص علي هدومها وبتجرى من قدامه علي اوضتها:يا خبر ابيض
سيف:يبنتى اهدى محصلش حاجة لكل ده

بعد دقيقتين وسيف بيخبط علي باب اوضة داليا
سيف:داليا انتى مش هتخرجى تقعدى معايا
داليا:
سيف:داليااااا
داليا:لا مش هخرج يا سيف وامشي دلوقتى علشان انا لا طايقة نفسي ولا طايقاك
سيف:يينتى جرا ايه بس لكل ده امال لو مكنتيش لابسة ترينج رياضي اصلا ولا يمت للبس البنات بصلة كنتى عملتى ايه ده حتى...
داليا وهى بتقاطعه بصوت عالى:سيييييف بس متتكلمش وامشي بقولك
سيف:انا همشي دلوقتى بس هنكمل كلامنا بعدين

بعد عشر دقايق داليا كانت بتكلم والدتها
كريمة:ايه يا داليا خلتينى قفلت المكالمة مع خالتك ليه
داليا بغضب بتحاول تتحكم فيه:ماما انتى ازاى تدخلى سيف البيت من غير متعرفينى انه هنا ومن غير متجبيلي اسدال وانا في المطبخ اخرج بيه بدل ما انا خرجت بشعرى وبلبس البيت ينفع كده
كريمة:وفيها ايه يعنى ده ابن عمك وانتو متربين سوا وسيف مفيش في اخلاقه
داليا:لا يا ماما فيها كتير فيها انه حرام ومينفعش فيها ان سيف مش اخويا فيها انى مش هينفع اقول لربنا معلش اصلنا متربين سوا وهو اخلاقه كويسة ومحترم الحلال والحرام مينفعش فيهم اللي انتى بتقوليه ده يا ماما ثم كمان سيباه لوحده فى الصالة ودخلتى الصالون تكلمى خالتى يعنى كمان سيبانا لوحدنا.

كريمة:اعمل ايه يعنى التليفون رن مردش عليه
كمان متحبكيهاش اوى كده يا داليا
داليا:متهونيهاش انتى اوى كده يا ماما ارجوكى اللي حصل ده ميتكررش تانى كريمة:خلاص ماشي كمان اللي حصل ده كان صدفة ومش مقصود يعنى
داليا:تمام يا ماما بس علشان خاطرى بعد كده تنبهينى علشان اللي حصل ده ميحصلش تانى
كريمة:خلاص يا داليا خلصنا بعد كده هعرفك

 

بعد اسبوعين
سيف:هتفضلي ساكتة كتير حصل ايه لضيقك ده كله مش فاهم فيها ايه يعنى
داليا:فيها انه مكنش ينفع يحصل يا سيف متجننيش انت وماما هى كمان بتقولي ما انتو متربين سوا وانت مفيش في اخلاقك وده اي كلام ومينفعش كانت رضعتك وخلتك اخويا في الرضاعة وخلصتنى وقتها مكنتش هفتح بؤى اصلا انما غير كده لا
سيف:قطع لسانك مين دول اللي يبقو اخوات في الرضاعة بعد الشر فكرى في كلامك قبل متقوليه ومتحرقيش دمى يا داليا كمان مضايقك اللي حصل وشايفة انه حرام بسيطة يا ستى بكرة نجوز ويبقي حلال
داليا:اولا انا مش شايفة انه حرام هو حرام فعلا

ثانيا قلتلك كتير قبل كده انه اللي في دماغك ده مش هيحصل ثالثا حتى لو ده حصل وانا بقول مثلا يعنى ساعتها الحلال مش هيمحى الحرام اللي حصل قبله من غير منستفغر عنه ونعترف انه كان حرام ومينفعش فهمت يابو العريف
سيف:فهمت كمان انا مش قبل ما اجى دايما برن عليكى قبلها المرة دى اول مرة انسي من فرحتى وسيادتك نكدتى عليا
داليا:فرحتك ليه هو..انت اتقبلت في الشركة اللي كنت عملت فيها انترفيو
سيف:ايوه وسعادتك نكدتى عليا وانا اول معرفت نزلت جرى علشان اعرفك لأ ومش بس كده من ساعتها مبتخرجيش من البيت ولا بتردى علي مكالماتى ولا رسايلي ليكى خلتينى استأذنت مرات عمى نخرج واتحايلنا عليكى انا وهي ربع ساعة علشان تتكرمى وتتعطفي عليا وتوافقى.

داليا:مانا اتضايقت من اللي حصل يا سيف ..وكمان..بصراحة اتحرجت
سيف:امال لو مكنتيش لابسة ترينج رياضي اصلا
داليا وهى بتقاطعه:متتكلمش في الموضوع ده تانى وانساه علشان بجد بيضايقنى
سيف:لا خلاص وعلي ايه انا جايبك المول علشان تعملي شوبينج وتفكى كده

بعد ساعة
سيف:كفاية كده تعالي نروح نتغدى انا جوعت
داليا:تمام اسبقنى انت عالعربية وانا هدخل الحمام واجى
سيف:ماشي

بعد ربع ساعة في عربية سيف
داليا:اتفضل
سيف:ايه دى
داليا بابتسامة:دى هدية الشغل الجديد مبروك
سيف:علشان كده طرقتينى وكدبتى وقولتى انك هتروحى الحمام
داليا:لا انا مكدبتش الكدب حرام انا روحت فعلا وبعدها جبتلك الهدية مش هتفتحها
سيف بابتسامة:هفتحها حاضر..الله ساعة تسلمى يا ديمو
داليا:كنت متأكدة انها هتعجبك عمرى مشفت في حياتى حد بيحب الساعات قدك كمان انت مش هتبطل تقولي ديمو دى يرضيك اقولك يا سيفو
سيف:يا ستى قوليها انا نفسي ومنى عيني تقوليها
داليا:وانا بحب اسمى وبضايق لما تقولها فمتقولهاش واطلع بينا علي مطعم بقي انا جعانة اوى.

بعد شهر
داليا بغضب:سيييييف بتحطنى قدام الامر الواقع وبتتقدم ومفرقش معاك المليون مرة اللي قلتلك فيهم مش هينفع اعمل ايه انا دلوقتى ليه تخلينى ارفضك ليه تحرجنى مع عمى ومرات عمى يا سيف
سيف:وليه ترفضى اصلا يا داليا بصى انا بكرة هجيلكم البيت ونتكلم وش لوش احسن

تانى يوم
سيف:انتى عارفة اننا لازم نتجوز مش علشان اللي فى دماغك لا علشان انا وانتى الحياة بنا هتبقي متوافقة
داليا:متوافقة من حيث ايه بقي
سيف:يعنى مثلا انتى بتحبى صفار البيض وانا بحب البياض انتى بتحبي صدر الفرخة وانا بحب الورك احنا هنبقي متفقين في حياتنا ومش هنتخانق علي حاجة انتى مش شايفة احنا ازاى بنكمل بعض...خلاص بلاش البصة بتاعتك دى هتنيل اتكلم جد
داليا:يا ريت تتكلم جد.

سيف:انا محتاجلك في حياتى يا داليا انا باخد كل حاجة بسهولة ومستهتر انما انتى ذكية
داليا:انا مش ذكية يا سيف انا مجتهدة وبتعب كتييييير اوى علشان احقق اللي انا عايزاه انما انت اللي ذكى وتقدر توصل للي انت عايزه بأقل مجهود بس انت للأسف بتكسل حتى تبذل اقل مجهود ده
سيف:ايوه هو ده اللي انا بتكلم عنه انتى عاقلة يا داليا وراسية كده ودماغك توزن بلد انا اغلب قراراتى باخدها معاكى ولما بكون في مشكلة ببقي عارف ان انتى اللي هتحليهالي.

وانتى واخدة الدنيا جد زيادة عن اللزوم ماشية فيها بالعقل بس ولاغية اي حاجة تانية انتى محتاجانى علشان اوريكى اللي انتى مش شايفاه في الدنيا علشان اخليكى تعبرى عن اللي جواكى وميفضلش جواكى لحد متطبي ساكتة او يجرالك حاجة من الخنقة وانا محتاجك علشان مضيعش حياتى باستهتارى
احنا محتاجين نبقي مع بعض حياتنا هتبقي احسن لما نبهت علي بعض وكل واحد فينا يبقي شبه التانى شوية الأثر اللي كل واحد فينا هيسيبه في حياة التانى هيخلي فيها توازن والتوازن ده انا محتاجه وانتى كمان محتاجاه.

داليا:كلامك نظريا صح
سيف:وعمليا كمان صح
داليا:بس ما احنا ممكن نلاقي ناس تانية تخلي في حياتنا توازن برضه
سيف:وليه ندور لحد منلاقي والله اعلم بقي نلاقي ولا منلاقيش ما احنا عندنا بعض ليه التعب
داليا:مش عارفة
سيف:فكرى يا داليا فكرى كويس وخدى وقتك وانا هستناكى.

انا سيف عندى تلاتة وعشرين سنة وداليا تبقي بنت عمى
اخويا الكبير متجوز اختها الكبيرة الفرق بينهم تمن سنين واخويا الوسطانى متجوز اختها الوسطانية والفرق بينهم خمس سنين وانا وداليا الفرق بنا سنة واحدة بس
احنا تلت رجالة وهما تلت بنات وكأنها متظبطة بالسنتى اننا نتجوز من بعض
عمى والد داليا مات من سبع سنين.

داليا مفكرة انى عايز اتجوزها علشان ده المفروض زى ما اخواتى اتجوزو اخواتها وعلشان كده دايما بترفض في كلامها اللي بتقوله كتير واللي عمرى مصدقته دايما حاسس انه مش ده اللي جواها دايما شايف في عينيها عكس اللي بيقوله لسانها انا بحبها الغبية دى مفكرانى هتجوزها علشان ده المفروض او علشان عمى مات ومفاضلش غيرها وغيرى وهتجوزها وفاءا لعمى بس ده مش حقيقي انا هتجوزها علشان بحبها وفائى لعمى ميخلنيش اتجوزها انا كنت صغير لما مات ومكنش ليا معاه ذكريات كتير كمان حتى لو علشان كده عرضت عليها الجواز اصر عليها ليه واتمسك بيها ليه رغم كلامها ده الا لو كنت بحبها وبحبها اوى كمان.

ادينى خدت خطوة واتقدمت وكلمتها بالعقل يا رب توافق بقي انا مش ضامنها هى لسه بتقاوح ولسانها بيقول كلام عكس اللي فى عينيها انا احساسى انها مش هترفض وانها عمرها ما كانت رافضة اصلا من جواها معقول احساسي بيها يكون غلط
تانى يوم كان بابا بيبلغنى ان داليا رفضتنى نزلت شقتهم وانا مش شايف قدامى من الغضب منها ومن خيبة الامل علي احلامى اللي هى هدتها كان لازم اتكلم معاها كان لازم افهم عملت كده ليه بالسرعة دى ليه مديتش نفسها فرصة تفكر ليه رفضانى اوى كده ليه احساسي بيها طلع غلط.

خبط وطنط كريمة فتحتلي طبعا الهانم مش عايزة تشوفنى
طلبت منها تندهالي وجت
سيف:طنط كريمة ممكن تسيبيبنا لوحدنا خمس دقايق بس
كريمة بحزن:خلاص بقيت طنط كريمة يا سيف مبقتش كراملة اتغيرت معايا والله يينى انا حاولت اقنعها متعملش كده هى اللي ركبت دماغها انما انت عارف انى بحبك زى ابنى يا سيف
سيف:انا اسف يا كراملة والله مش قصدى انتى كراملة بداليا او من غيرها وانا كمان بحبك حقك عليا
كريمة:ولا يهمك يا حبيبى انا هروح اعملك الشاى
سيف:هتفضلي ساكتة كده كتير
داليا:والله انت اللي طالبنى تتكلم معايا يبقي انت اللي المفروض تتكلم
سيف:عملتى كده ليه.

داليا:انا..انا حرة وقلتلك قبل كده كتير ان ده مش هيحصل انت اللي مسمعتليش ده غلطك مش غلطى
سيف:عارفة انا كنت فاكر ان عندك عقلين ونص قلب وكنت قابل بيكى وعندى استعداد اساعدك تتغيرى بس طلعت غلطان انتى معندكيش قلب اصلا يا داليا وهتندمى علي اللي عملتيه ده وهتعيشي حياة زيك قاسية ومفيهاش احساس حياة شبهك حياة تستاهليها ووعد منى ليكى يا بنت عمى هتحضرى خطوبتى اخر الاسبوع ده علشان انتى متستاهليش ازعل عليكى يوم واحد حتى وسيبتها ومشيت وطلعت شقتنا طلبت من امى تشوفلي عروسة وهى كلمتنى عن واحدة بنت صاحبتها وانا فورا روحت واتقدمت وقبل اخر الاسبوع كنت خاطبها وداليا عديمة القلب والاحساس جت الخطوبة بعد خطوبتى بتلت شهور بدأت احس بالمصيبة اللي وقعت نفسي فيها بغضبي من داليا.

خطيبتى انسانة وحشة انانية ومبيهمهاش غير نفسها سيئة فعلا طبعا مش اسوء من داليا لان مفيش حد اسوء من داليا بس مكنش ينفع اكمل معاها ففسخت الخطوبة وبعد خمس شهور خطبت تانى واحدة قريبتنا بس من بعيد ودى هى اللي فسخت الخطوبة بعد شهرين كانت بتحب واحد جارهم ومقدرتش تكمل معايا ففسخت خطوبتها منى واقنعت اهلها واتمسكت بيه واتخطبتله الحقيقة انا مضايقتش ومفرقش معايا بالعكس انا فرحتلها اكيد هى كده مبسوطة اكتر ربنا يسعدهم ببعض
وبعد اربع شهور خطبت لتالت مرة واحدة اخت صاحبي.

فضلنا مخطوبين تمن شهور بصراحة هي كانت بتحاول تقربلي بكل الطرق كانت بتحاول تدخل حياتى بس انا مقدرتش مسمحتلهاش تدخل قلبي ولا تقرب منى كل محاولاتها انا كنت بقابلها بالرفض غصب عنى والله مش بمزاجى انا عارف انها متستاهلش اعمل كده فيها وداليا متستاهلش اعمل كده علشانها بس مش بمزاجى ولا بإرادتى قلبي اختار داليا ورافض اي حد غيرها مش عارف اتخيل حياتى مع حد تانى.

انا اللي سيبتها لانى كنت حاسس انى بظلمها حاسس تجاهها طول الوقت بالذنب انا مستاهلش اللي هى بتعمله علشانى وهى تستاهل واحد احسن منى واحد يفرح باللي هى بتعمله علشانه لما سيبتها هى قالتلي انى انسان كويس هى كانت تعرفنى وبتسمع عنى من اخوها ومش فاهمة انا ليه عملت فيها كده ليه أذيتها بالشكل ده مكنش عندى حاجة اقولهالها.

غير انها تستاهل واحد احسن منى وان غصب عنى وانى بسيبها علشان مأذيهاش اكتر من كده لانها فعلا متستاهلش
ساعتها هي قالتلي ان انا كمان مستاهلش اكون شخص مؤذى وانى صعب عليا اعمل فيها كده وقتها حسيت بالندم هى فعلا انسانة متتعوضش بس اعمل ايه في قلبي الغبي اللي مش راضي غير بداليا ومش شايف غيرها
داليا اللي حضرت خطوباتى التلاتة مفوتتش فيهم واحدة داليا اللي مفرقش معاها اللي عملته فيا بدم بارد داليا اللي كونى مبقتش بتعامل معاها خالص مأثرش فيها نهائي داليا اللي معندهاش قلب قلبي انا عايزها ومش عايز غيرها
خدت قرار انى مش هخطب علي الاقل مش دلوقتى اي واحدة هخطبها انا فعلا هظلمها معايا وانا نفسي مش عايز غير داليا انا عارف انها متستاهلش بس مش عارف اعمل ايه في نفسي.

كتير كنت بشوف داليا قاعدة مكانى عالسلم اللي عند شقتهم
كنت بستغرب هى بتعمل كده ليه خصوصا انها كانت بتكون سرحانة وشكلها حزين ولو سمعت صوت خطواتى طالع او نازل تقوم جرى تدخل شقتهم انا كنت بقعد في المكان ده علشان هى تخرجلي ونتكلم انا وهي انما هى بتقعد ليه
في مرة كنت طالع احنا عايشين في بيت واحد داليا تحت وانا فوقها واخواتنا متجوزين في شقق فوقنا في نفس البيت احنا بيت عيلة المهم كنت طالع وهى كانت قاعدة وسرحانة لدرجة انها مخدتش بالها انى طالع عديت من جنبها وطلعت كام سلمة وبعدين مقدرتش ولقتنى نزلتهم ووقفت قدامها
سيف:انتى قاعدة كده ليه.

داليا:
سيف وهى بيطرقع بصوابعه قدام وشها:بقول قاعدة كده ليه
داليا وهى بتفوق من سرحانها:سيف
سيف:اه سيف مجاوبتيش سؤالي قاعدة كده ليه
داليا:هو انا اقدر اقولك حاجة
سيف بسخرية:دكتورة داليا بجلالة قدرها عايزة تقولي انا حاجة
داليا بحزن وندم:انا اسفة يا سيف اسفة بجد انت كان عندك حق في كل حاجة قولتها ما عدا حاجة واحدة
سيف:حاجة ايه دى بقي ان شاء الله
داليا:مش مهم المهم تعرف انى اسفة وتحاول تسامحنى حتى لو انا مستاهلش بس انت قلبك طيب ويقدر يسامحنى انا بجد اسفة.

وسابتنى ودخلت شقتهم بسرعة وانا مستغرب كلامها ومتفاجئ من اعتزارها اللي حسيته حقيقي وطالع من قلبها كمان حسيت انها غير انها ندمانة هى كمان حزينة بس خلاص انا مبقتش بثق في احساسي خصوصا مع داليا بس هى هتعمل كده ليه هتستفاد ايه مفهمتش
عدى شهر وداليا كان اتقدملها عريس مش عارف بالظبط رقم كام هى اتقدملها كتير في الاول كانت بترفض من غير متقعد معاهم وبعدين بقت بتقعد معاهم مرة واحدة وبعدين ترفض اسوء حاجة انى كنت بضايق وبغير لما اعرف انها قاعدة مع واحد منهم وبيتكلمو وبضايق لما بفكر انها ممكن توافق هو انا عارف ان اللي هيتجوزها هيلبس لبسة سودا وربنا يكون فى عونه بس برضه غصب عنى كنت بضايق وللأسف بغير مع انى بطلت اتعامل مع داليا بس عمرى معرفت ابطل اغير عليها.

هى رفضت اللي متقدم ده حتى من غير متقعد معاه ابويا كان مضايق خصوصا ان داليا كانت اتخرجت خلاص وفعلا رفضت ناس كتير بس مكنش بيجبرها علي حاجة علشان متحسش باليتم من بعد موت عمى انا بقي فرحت لما هى عملت كده عارف انى غبي وحمار بس اعمل ايه والله غصب عنى فرحت وبعدين فكرت حتى لو رفضت مية واحد كمان ما هى مسيرها يجى واحد وتوافق عليه لقتنى زى المغفل غضبان ومضايق وروحت بسرعة جدا قلت لبابا انى عايز اتقدم لداليا تانى
وقلت في نفسي لو اتزفتت رفضت تانى انا لازم اخرجها من قلبي ومن حياتى بجد المرة دى.

مش هتجوز واحدة اظلمها معايا واغلط غلطة المرة اللي فاتت بس كنت هسيب البيت وابعد او حتى اسافر بره واسيب البلد كلها
بابا كلم مرات عمى وفي نفس اليوم داليا وافقت ومطلبتش حتى انها تتكلم معايا خلال يومين كنا جبنا الشبكة وعملنا الخطوبة ودبلتى بقت في ايد داليا طبعا مش محتاج اقولكم قد ايه كنت فرحان مع انى فضلت كتير بفكر نفسي باللي هى عملته فيا بس مجرد مبصتلها وشوفتها فرحانة ودبلتى في ايديها لقتنى فرحان فرحان بجد فرحان فرحة محسيتش ربعها في ولا خطوبة من التلت خطوبات اللي فاتت.

بعد الخطوبة لقتنى مش عارف اتعامل مع داليا مش طايق اتكلم معاها عدل زى اي اتنين مخطوبين كنت بتجاهلها كتير واهتمامى بيها قليل كنت بجد بعاملها معاملة وحشة اوى تقريبا كده كنت بدفعها تمن اللي هى عملته فيا قبل كده
مكنتش قادر ابطل اعاملها بالاسلوب ده وهى كانت ساكتة ومتحملة وده كان غريب بالنسبالي داليا مبتسمحش للهوا يعدى من جنب كرامتها بس فعلا كانت مستحملة منى كل حاجة من غير متشتكى.

طلبت نكتب الكتاب بصراحة كنت دايما خايف انها تسبنى وعلشان كده مكنتش هرتاح غير بكتب الكتاب وهى وافقت واتكتب كتابنا وبرضه كنت فرحان جدا كده داليا بقت علي اسمى بس برضه كنت بعاملها وحش مع انها كانت بتوحشنى اوى لو عدى يوم مشوفتهاش فيه وكنت بحس انى فرحان وانا بتفرج علي صورنا سوا او وانا ببص علي دبلتها اللي في ايدى بس لما كنت بشوفها او بتكلم معاها كنت ببين عكس كده
في مرة كنا رايحين نشوف العفش في معرض من معارض الموبيليا بس انا قلت انى مش عاجبنى حاجة وقلت نبقي نجى يوم تانى نشوف وهى كالعادة وافقت ومشينا واحنا راجعين البيت في عربيتى اتكلمنا.

داليا:بس كده الفرح مش هيكون قبل تلت اربع شهور علي الاقل
سيف:ميبقي بعد تلت اربع شهور ولا ستة ولا حتى سنة هتفرق ايه يعنى
داليا بنبرة حزينة:معاك حق هتفرق ايه

وفضلت ساكتة طول الطريق وصلنا البيت ودخلت شقتهم وانا كنت طالع شقتنا بس مقدرتش حسيت انى فعلا زودتها نزلت شقتهم وخبطت ومرات عمى فتحتلى

سيف:كراملة زوجتى الحبيبة بنتك فين
كريمة:في البلكونة روحلها وانا هروح اعملك الشاى
سيف:حبيبتى يا كراملتى
دخلت بلكونة الصالون وهى كانت واقفة بصا للشارع ومديانى ضهرها
سيف:داليا
داليا:
اتعصبت اوى انها مرديتش عليا
سيف بصوت عالي شوية:لما اكون بكلمك تردى عليا احسنلك
داليا:ممكن نتكلم بعدين انا مش قادرة اتكلم دلوقتى
سيف:مش بمزاجك ولما اكلمك تبصيلي داليا ايه ده انتى بتعيطى فى ايه
داليا:
سيف:حصل ايه انا اول مرة اشوفك بتعيطى.

داليا وهى بتعيط اكتر:بس دى مش اول مرة اعيط يا سيف انا بعيط بقالي سنتين من اول مرة خطبت فيها وانا برجع اوضتى اقفلها عليا واعيط كل مرة كنت بتخطب جديد وجعى انا كان بيتجدد وعياطى كان بيكتر وحتى بعد ما اتخطبنا انا وانت كنت بعيط وحتى بعد ما كتبنا الكتاب لسه بعيط انا عارفة انى استاهل اللي انت بتعمله بس امتى هتحس انك خرجت كل اللي جواك امتى غضبك منى هينتهي هترجع تحبنى امتى يا سيف انا مستعدة استناك العمر كله واتحمل منك اللي بتعمله ده واكتر بس تسامحنى وتصفالي بس ترجع تحبنى انا والله ندمت واتوجعت وعارفة انى غلطت ودفعت تمن غلطى ولسه مستعدة ادفعه بس ترجعلي تانى سيف بتاع زمان وترجعنى من تانى داليا بتاعت زمان انت وحشتنى تخيل وحشتنى وانت معايا وحشتنى ووحشتنى نفسى معاك انا تعبت يا سيف تعبت بجد تعبت ومش عارفة اعمل ايه انسيك بيه غلطى في حقك واثبتلك بيه انى بحبك واخليك ترجع من تانى تحبنى.

سيف وهو بيمسح دموعها بايده:بطلى عياط ولما انتى بتحبينى واحساسي بيكى كان صح رفضتينى ليه لما اتقدمت
داليا:علشان كنت خايفة منك خايفة تموت واتوجع عليك زى ما اتوجعت علي بابا وانا قررت انى مش هتوجع تانى علي حد بعده خايفة تكون بتجوزنى علشان بس احنا ولاد عم زى اخواتى واخواتك متجوزو خايفة وكنت حاسة انك بتاع بنات علشان كلامك الحلو اللي كنت بتقولهولي ده ميطلعش من واحد ملوش تجارب وخايفة منك لانى عارفة انك مش مسئول وعمرك متمسكت بحاجة ولا تعبت علشان حاجة وانا كنت محتاجة حد يتعب علشانى وعلشان كده رفضتك من غير حتى ما افكر ولا استخير لأنى كنت حسا انى هوافق انا فعلا كنت مبسوطة انك اتقدمتلي بس بعد ما انت مشيت وانا افتكرت كل مخاوفي دى لقتنى بكلم عمى وبقوله انى مش موافقة.

سيف:كلنا هنموت يا داليا وبدل متخافي اموت عيشي معايا وعلشانى ولو علي حكاية انى بجوزك علشان احنا ولاد عم وبس فده اكيد غلط والا مكنتش اتمسكت بيكى واتقدمت رغم رفضك المستمر وكلامك اللي زى السم اللي كنتى بتقوليهولي وكلامى الحلو اللي كان مخليكى مفكرانى بتاع بنات ده كان بيطلع من قلبي كان بيطلع علشانك انتى وبس ومطلعش لاى واحدة غيرك وبالنسبة لانى عمرى متمسكت بحاجة دى فانا اتمسكت بيكى حتى بعد ما رفضتينى قلبي اتمسك بحبك ورفض تدخله بعدك اي واحدة انا اتمسكت بيكى غصب عنى ومع انى حاولت اخرجك من جوايا واطلعك من قلبي الا انى مقدرتش مع انى خطبت بدل المرة تلاتة وبرضه مقدرتش انتى ظلمتينى وظلمتى نفسك وخلتينى اظلم واحدة ملهاش اي ذنب.

داليا:عارفة انا اسفة بس واللي انا دفعت تمن غلطى ده غالي اوى مش بيقولو خبطتين في الراس توجع انا بقي اتخبطت تلت مرات علي قلبي كل مرة كنت بتخطب فيها كنت بحس انى اتخبطت في قلبي وانه بيوجعنى اوى وقبلها لما بعدت عنى وبطلت تتعامل معايا الحياة من غيرك صعبة اوى يا سيف صعبة ولا تحتمل وتمثيلي انى كويسة من غيرك ده كان صعب اوى عليا والله وكله كان كدب انا عمرى مكنت كويسة من غيرك انا مبكنش كويسة غير وانا معاك انت كان عندك حق في كل حاجة قولتها ما عدا حاجة واحدة هى انى معنديش قلب لانى عندى قلب حبك وعمره محب غيرك عندى قلب عمر محد غيرك سكنه عندى قلب عايزك انت وبس وعلشان كده رفضت كل اللي اتقدمولي عندى قلب وجعته بإيدى لما رفضتك قبل كده بس والله العظيم انا بحبك وعمرى محبيت ولا هحب غيرك ومحتاجاك يا سيف محتاجاك تسامحنى وتصفالي وترجع تحبنى علشان ارتاح لانى تعبت والله العظيم تعبت وندمت علي اللي عملته ودفعت تمنه غالي اوى هو انت مش هتقدر ترجع تحبنى تانى
سيف:مش محتاج ارجع احبك تانى لانى مبطلتش احبك اولانى كمان اول مرة تعبرى عن مشاعرك وتفتحيلي قلبك وتتكلمى معايا كتير كده.

داليا:علشان مشاعرى دى تعبتنى وهى جوايا ومبتطلعش ووجعتنى لما مسمعتلهاش وبعدت عنك وقلبي ده اتفتحلك واتفتح علي ايدك انت وبس
سيف بابتسامة:بقيتى بتقولي كلام حلو اوى يا داليا
داليا:قولى يا ديمو بقالك كتير مقولتهاليش
سيف:مش انتى قولتى انك بتضايقي لما بقولهالك
داليا:كنت بكدب زى ما كدبت في حاجات كتير قولتها وعملتها انا بحب اسمعها منك وبحبها لانك انت وبس اللي بتقولهالى
سيف بابتسامة:انا بحبك يا ديمو
داليا وهى بتعيط:انا اسفة علي اللي عملته
سيف:خلاص بقي والله قبلت اسفك ومسامحك بطلي عياط
انا كمان اسف علي معاملتى ليكى.

داليا وهى بتمسح دموعها:لا متتأسفش انا استاهل كل اللي انت عملته ده غلطى وكان لازم ادفع تمنه واكفر عنه
سيف:وخلاص دفعتى تمنه وكفرتى عنه ننسي بقي اللي فات ونركز في فرحنا اللي هيبقي كمان شهر ده
داليا بصدمة:شهر ايه مش هنلحق طبعا احنا مجبناش حاجة فى العفش وانا ناقصنى حاجات كتير في الجهاز
سيف:العفش هننزل ننقيه واللي ناقص في جهازك هنكمله وكلمة كمان هتجوزك بكرة هنا مع كراملة ونبقي نكمل شقتنا بقي علي مهلنا بعد الجواز
داليا بسرعة:لا وعلي ايه شهر شهر وان شاء الله نلحق.

سيف:ايوه كده مبتجيش غير بالعين الحمرا
داليا بابتسامة:لا وانت الصادق بحبك وعايزة نتجوز النهاردة قبل بكرة
سيف بسرعة:احنا فيها نتجوز النهاردة
داليا وهى بتضحك:قصدى نتجوز كمان شهر مش تلت شهور ايه مبتصدق تمسك في كلمة
سيف وهو بيضحك:بصراحة اه اعمل يعنى بحبك ومستنى بقالى كتير وزهقت
داليا:خلاص هانت كلها شهر هى ماما فين كل ده بتعملك شاى
سيف وهو بيضحك:كراملة حبيبتى سيبانا على راحتنا كمان مضايقة من ايه انتى باب الصالون مفتوح واحنا واقفين في البلكونة يعنى في الشارع واساسا اساسا انتى مراتى.

داليا وهى بتضحك:لا متفهمنيش صح انا بس قلقانة عليها امى ومليش غيرها
سيف وهو بيمسكها من قفاها:سمعينى تانى كده قولتى ايه
داليا بخوف مصطنع:قصدى مليش غيرها وغيرك يا سيفو
سيف:اه بحسب فكرتينى صحيح ساعة مشوفتك وانتى خارجة من المطبخ بسندويتش في بؤك ومج في ايدك وطبق فيه خضار في الايد التانية كان ايه لازمته المنظر المسخرة ده
داليا:بكسل اروح المطبخ مرتين فبجيبهم مرة واحدة بالطريقة دى
سيف وهو بيضحك:وانا اللي فكرت هيكون عندك مبرر قوى
داليا وهى بتضحك:وهو في مبرر اقوى من كده برضه
سيف:لا الكسل مبرر قوى فعلا زوجتى الغالية
داليا:بالظبط كده يا زوجى الغالي

انا وداليا اتجوزنا بعد شهر واسبوعين برغم محاولاتى المستميتة اننا نخلص قبل كده بس فعلا ملحقناش وبعد اربع شهور داليا بقت حامل وخلفنا نيرة وبعدها باربع سنين خلفنا نوران
وداليا بقت بتعبرلي عن مشاعرها مبتخبيهاش جواها لانها فهمت ان الكلام اللي مش بيتقال ده ممكن يسبب سوء فهم كبير منقدرش نصلحه وفهمت كمان ان الكلام والتعبير عن المشاعر راحة وسعادة ليا وليها كلامها ليا بيزود ثقتى في نفسي وفيها وبياأكدلي حبها زى ما كلامى بيفرحها وبيطمنها
الكلام الحلو بيفرح القلب وبيطمن الروح وبيأكد للي بنحبهم حبنا ليهم وبيعرفهم قيمتهم عندنا وبيزود ثقتهم بنفسهم.

كمان احنا بنحب بودانا واكيد اللي هيكون قريب مننا هو اللي بيعبر عن حبه لينا بكلامه وشايفين حبه كمان في افعاله الكلام بس مش كفاية ولا دليل علي الحب في ناس بياعين كلام حلو الافعال كمان مهمة جدا علشان تثبت ان الكلام الحلو ده حقيقي ومش مجرد كلام وخلاص احنا محتاجين الاتنين الكلام الحلو والافعال اللي تأكده وتثبته
انا مش بس محتاج كلام داليا انا محتاجها كلها علي بعضها في حياتى انا حياتى متنفعش من غير داليا مكنتش هكون مرتاح ولا مبسوط مع واحدة غيرها مكنش هيكون في حياتى توازن ولا هى كانت هتكون مبسوطة ولا مرتاحة مع واحد غيرى وبرضه حياتها مكنش هيكون في توازن
احنا محتاجين بعض احنا الاتنين وبنحب بعض احنا الاتنين ربنا يديمنا لبعض ويديملنا ولادنا ويبارك فيهم.

الفصل التالي
جميع الفصول
روايات الكاتب
روايات مشابهة