حكايات منار الحكاية 22 بعنوان اختيار صعب

حكايات منار الحكاية 22 بعنوان اختيار صعب

 بلال:جنة انتى مش هتسيبينى صح
جنة:بلال انت شايف الوقت مناسب للسؤال ده احنا بنختار قاعة علشان نعمل فرحنا فيها تفتكر ده وقت او مكان تسالنى فيه السؤال ده
بلال باصرار:اه وقته ومكانه وجاوبى سؤالى يا جنة

جنة:مية مرة جاوبته قبل كده مية مرة يا بلال من يوم ما اتخطبنا وانت بتسألهولى وانا بجاوبك وحتى بعد ما كتبنا الكتاب برضه بتسأله وانا بجاوبك ودلوقتى واحنا خلاص فاضل علي فرحنا شهر ولا اتنين بتسالنى نفس السؤال
انا عارفة انك اتلسعت من الشوربة وعلشان كده بتنفخ فى الزبادى بس كفاية انا تعبت
تمن شهور وانت بتسألنى السؤال الغلط
تمن شهور وانا بحاول اثبتلك انى غيرهم انى استاهل ثقتك وانى عمرى مهسيبك انا مقدرش اسيبك افهم بقي انا لو اقدر مكنتش قبلت ارتبط بيك من الاول وكنت جنبت نفسي كل الوجع ده بس انا مقدرش لو اقدر كنت عملتها انما انا مقدرش والله ما اقدر افهم بقي وارحمنى
بلال:جنة انا
جنة قاطعته:بلال من فضلك روحنى انا تعبانة وبعدين نبقي نشوف موضوع القاعة ده

روحنى وفضلنا ساكتين لحد ما وصلنا دخلت شقتنا واول ما اتأكد انى دخلت والباب اتقفل طلع شقتهم
بلال جارى ساكن فى الشقة اللى فوقنا هو واهله
هو جارى واعز اصحابى وخطببي وجوزى وكل حاجة ليا في الدنيا لا هو مش كل حاجة فى الدنيا هو الدنيا نفسها من يوم ما وعيت عالدنيا وبلال هو الدنيا بالنسبالى
احنا متربين سوا هو اكبر منى بتلت سنين
انا اعرف عنه كل حاجة

بلال وهو في تالت سنة في الكلية حب بنت معاه فى كليته والمفروض انها كانت بتحبه كان حلمه يكمل معاها عمره بس هى اتخلت عنه وعن حلمه وحولته لكابوس وسابت بلال واتخطبت لواحد تانى بعد ما كانو بقالهم اكتر من سنة ونص مرتبطين بلال ساعتها فضل يجى سنة مكتئب
اساسا مرحش الجامعة بعد خطوبتها يجى شهر ونص وبالعافية انا اقنعته ان حرام يخسر سنة من عمره علشانها لو شال السنة خصوصا انها سنة التخرج هى متستاهلش اقتنع بكلامى ورجع يحضر بس نفسيته مكنتش كويسة تعبت اوى معاه علي ما نسيها ورجع زى الاول

وقت ما بلال ارتبط بيها انا كنت غيرانة كنت حاسة انى مضايقة بس وقتها انا فسرت ضيقى ده انه غيرة علي اعز اصحابي اللي انشغل عنى لان بلال فعلا انشغل عنى ومكناش بنتكلم زى الاول ولو اتكلمنا بيكون اغلب كلامه عنها
كمان انا وقتها كنت ثانوية عامة فقلت ان طبيعي الثانوية وضغوطها بتخلى الواحد حساس شوية زيادة
المهم بعدها بتلت سنين بلال حب تانى واحدة زميلته في البنك اللى شغال فيه وخطبها فضلو مخطوبين سنة وبعدين هى سابته واتجوزت واحد اكبر منها بعشرين سنة علشان غنى وهيعيشها فى مستوى احسن بكتير من اللى بلال هيعيشها فيه

طول سنة خطوبتهم دى انا كنت بتعذب
كل ما بلال كان بيكلمنى عنها كنت بحس بطنى بتوجعنى اوى وكأنها هتتفرتك من كتر الالم
كل ما اشوفهم سوا او حتى اشوف صور ليهم اعيط تقريبا كنت بعيط كل يوم وكنت بنام كتير كنت بهرب بالنوم من الواقع اللي واجع قلبي
بلال بعد ما سابته كان مصدوم فيها ومخنوق وطبعا انا وقفت جنبه زى ما طول عمرى واقفة جنبه وهو كمان طول عمرى واقف جنبي
عدى ست شهور وبلال رجع تانى زي الاول
بس احنا فضلنا زى ما احنا اعز اصحاب وبس

انا وقتها كنت اتخرجت من سبع شهور وكل ما كان اهلي يكلمونى عن عريس كنت برفض
بس فكرت مع نفسي هو انا برفض ليه بلال مش بيحبنى ومش هيحبنى طول عمرى قدامه وهو في المرتين اللي حب فيهم حب غيرى وحلم يكمل حياته مع غيرى
وحتى دلوقتى برضه محبنيش هفضل لحد امتى مستنية حاجة مش ممكن تحصل وقتها قبلت اتخطب واتخطبت لواحد زميلى فى المدرسة اللي انا شغالة فيها
فضلنا مخطوبين اربع شهور مدخلش فيهم حياتى
مش بسببي ولا بسبب حبى لبلال المشكلة فيه هو كان عملي اوى وجوده خلا حبى لبلال يزيد مش يقل
فى اي مقارنة بينه وبين بلال بلال اللي كان بيكسب

ده عرفنى قيمة بلال ومميزاته اكتر
جيت اكحلها عميتها اتخطبتله علشان انسي بلال خلانى احبه اكتر
كنت عايزة انهى الموضوع مش هينفع نتجوز وانا جوايا اللي جوايا لبلال ده ومن غير بلال انا مقدرش اعيش حياتى مع واحد عملي وعايش حياته بالورقة والقلم بالشكل ده
بس مكنتش عارفة انهيه ازاى وربنا حلها من عنده
خطيبي جاله عقد عمل بره وكان عايز نجوز ونسافر انا رفضت السفر واتفسخت خطوبتى والحمد لله
انا مكنتش مضايقة خالص بالعكس انا كنت مبسوطة ومرتاحة لانى بفكر في بلال من غير ما احس بالذنب وبحبه من غير محس انى بعمل حاجة غلط
بعد ما فسخت خطوبتى بتلت شهور كنت بتكلم انا وبلال
ساعتها لاول مرة سالنى سؤال انتى مش هتسيبينى ده

بلال:جنة انتى مش هتسيبينى ولا هتبعدى عنى صح
جنة:ايه اللي طلعه في دماغك السؤال ده
بلال:جاوبى سؤالى
جنة:بلال انا بتعلق بالحاجات وبالاشخاص اللي في حياتى
بزعل لما هدوم عندى تصغر عليا او يجرالها حاجة وميبقاش ينفع البسها تانى
موبابلي مجبتش غيره غير لما كان خلاص فعلا هنج وبقي بيفصل وهو تسعين في المية فكان لازم اجيب واحد جديد
تفتكر لما اكون بتعلق بالحاجات بالشكل ده يبقي هبعد عنك او اسيبك ازاى
بلال:ممكن متبعديش بمزاجك ممكن حد يبعدك

اعمل ايه انا ساعتها
جنة:انت بتقدر البلا قبل وقوعه ليه
خلاص شايفنى هتجوز ولا جايلي عقد عمل بره فبتفكر هتعمل ايه من غيرى
بلال:وانا لسه هستنا لحد ما ده يحصل
جنة:ما كان هيحصل وانا اللي رفضت اتجوز واسافر متقلقش نفسك عالفاضي
بلال:لا اقلق وده مش عالفاضي انتى مينفعش تبعدى عنى
جنة:مش هبعد يا بلال وابعد ليه اصلا
بلال:احنا لازم نتجوز

جنة بصدمة:نت..نتجوز ازاي يعنى وليه
بلال:نتجوز زى ما كل الناس بتتجوز يا جنة
وليه علشان احنا طول عمرنا في ضهر بعض لما بيبقي عندك مشكلة مبيحلهاش معاكى غيرى ولما بكون انا في مشكلة او مضايق مبلاقيش غيرك جنبي
احنا حتى جربنا نرتبط بناس تانية والمواضيع مكملتش يبقي نرتبط ببعض علشان نضمن اننا نفضل في حياة بعض على طول ومحدش فينا يجى حد ويبعده عن التانى
جنة:تفتكر اللي انت قلته ده سبب كفاية يخلينا نتجوز
بلال:اه واكتر من كفاية كمان
انا جربت ارتبط عن حب مرتين وفشلت

وانتى جربتى بالعقل وفشلتى
يبقي ممكن ننجح سوا
جنة:تصدق اقنعتنى
بلال:بجد
جنة:اه بجد كلامك فيه وجهة نظر عميقة وتحسه مهم
بلال:يعنى موافقة
جنة:موافقة

ووافقت وانا كنت طايرة من الفرح اخيرا انا وبلال هنتخطب اخيرا حلم عمرى هيتحقق
ومن يوم الخطوبة وهو بيسالنى السؤال ده
كل ما يكون مبسوط يسالهولي ولو مضايق وحزين يسالهولى ولو شفت في عينيه حب ليا لسانه بيعبر عن حبه بالسؤال ده
انا كنت عارفة انى هتعب شوية مع بلال وان تمن اللي حصله انا اللي هدفعه تمن ثقته وحبه لاتنين ميستاهلوش انا اللي هدفعه وقبلت لانى مكنش ينفع مقبلش
انا مش شايفة راجل فى الدنيا كلها غيره
ولا هعرف احب ولا اتجوز غيره
قلت ان تعبي في قربه هيكون اهون من تعبي في بعده

بس الحقيقة ان الاتنين واحد ويمكن في قربه اكتر
لانه جنبي ودايما خايف اسيبه لانه مبيثقش فيا لانه لحد دلوقتى مقاليش بحبك ولانى برضه مقلتهاش ليه
انا فاهمة انه غصب عنه وانه مش قاصد يعمل فيا كل ده بس انا حقيقي تعبت الحياة مش حياة لا في بعده ولا فى قربه وهو خايف اسيبه كده وانا مش عارفة اعمل ايه
بعد ما رجعت انا كنت نمت طبعا علشان اهرب من كل الافكار والمشاعر دى قمت الساعة اتنين بالليل كنت عطشانة وجعانة كمان كلت وعملت لنفسي نسكافية وخدته وخرجت البلكونة اشربه فيها لقيت راندا اختى في البلكونة بتعيط

جنة بقلق:راندا مالك بتعيطى ليه ايه اللي حصل
راندا وهى بتحضنها وبتعيط اكتر:انا سيبت تامر
جنة وهى بطبطب عليها اهدى واحكيلى ايه اللى حصل

تامر بغضب:تقدى تفهمينى ايه ده
راندا:معرفش
تامر:واحد باعتلي رسالة يشكر فيكى وفي ادبك واخلاقك ويقول قد ايه انى محظوظ بيكى وان ربنا بيحبنى علشان خطبتك وبقيتى من نصيبي وان غيرى كتير اتمناكى بس مش كل الناس محظوظة وربنا بيحبها زيى
ده ايه بقى قصة حب قديمة ومكملتش
راندا:لا طبعا انا معرفوش انت عارف كويس انى قبلك مكنتش اعرف حد

تامر:انتى مفكرة انى هصدقك وهو لو مكنش في بينكم قصة حب كبيرة وكبيرة اوى كمان ومحروق انك سيبته واتخطبتيلي هببعتلي الكلام ده ليه
راندا:وهو لو في بينا قصة حب وهو محروق انى سيبته علشانك هيبعتلك الكلام ده بس ليه مش كان بعتلك اسكرينات لكلام بينا ولا بعتلك صور لينا مع بعض
ولا هو اتقي الله وخاف يفضحنى فبعتلك الكلام ده بس
اللى عمل كده انا معرفوش بس هو واضح انه يعرفك ويعرف ان حركة خايبة زى دى هتنجح وهتحققله اللي هو عايزه
تامر:وايه بقي اللي هو عايزه
راندا وهى بتقلع دبلتها:ده

واضح انها واحدة كنت انت تعرفها وزى ما انت قلت محروقة انك سيبتها علشانى او يمكن انت مسيبتهاش وهى غيرانة عموما تشبع بيك انت متلزمنيش
انا فسرت كل تصرفاتك معايا قبل كده انها غيرة بس لا دى مش غيرة ده شك وانا مش هقضي حياتى معاك اثبتلك انى انسانة محترمة واهلي عرفو يربونى ولا هدفن نفسي بالحيا مع واحد شكاك زيك انا احسن من كده بكتير وانت متستاهلش اعمل في نفسى كده علشانك.

تامر:راندا انا..
راندا قاطعته:متقولش حاجة مفيش حاجة هتقولها هتفرق معايا شبكتك هتوصلك

راندا وهى بتعيط:وخليت بابا يوصل لاهله شبكته وهداياه
انتى كان عندك حق يا جنة ده شك كل اللي كان بيعمله شك مش غيرة باسورد الفيس اللي كان عايزه لبسي وخروجى باذنه وخط سيرى اللي كان لازم يعرفه كله شك وقلة ثقة مش غيرة واهتمام
جنة وهى بتمسح دموعها:وخلاص انتى عملتى الصح احمدى ربنا يا حبيبتى انه نجاكى منه

راندا:الحمد لله
جنة:انتى عندك كلية الصبح قومى نامى ميستاهلش دموعك دى يا قلبي وان شاء الله ربنا هيعوضك باللي يستاهلك
راندا:معاكى حق انا هنام تصبحى على خير
جنة:وانتى من اهل الخير يا حبيبتى

راندا اختى اصغر منى باربع سنين وتامر ده اخو صاحبتها انا مستريحتلوش من اول مشفته
هو كان زوق اوى معانا من ساعة ما جه اتقدملها بس انا دايما كنت حاسة انه بيمثل
نصحت راندا تفكر كويس في الموضوع بس هى مسمعتليش كانت مبهورة بيه هو اصله شكله حلو ولسانه احلي وسهل اوى الناس تنخدع فيه خصوصا البنات
اتخطبو وبدء يتحكم فيها وهى كانت بتسمع كلامه
وماشية وراه عميانى ومهما كنت انصحها مكنتش بتسمعلي
ولو سمعتلي يجى هو بكلامه الحلو واهتمامه يهد كل اللي بنيته فانا قررت انى هخلي راندا تشوفه علي حقيقته
تفهم انه انسان شكاك ومش بيثق فيها ولا في نفسه

انا اللي بعت الرسالة من حساب فيك وبعد ما بعتها عملتله بلوك والحمد لله فكرتى نجحت هما مخطوبين من شهرين وهى ملحقتش تحبه ساعتها الموضوع كان هيبقي اصعب
اللى زى تامر ده ميستاهلش ان الواحدة تتعب علشانه هو فعلا انسان مش كويس وللاسف اللى زيه كتير والبنات اللي بيتخدعو فيهم كتير ربنا يكفينا شرهم
انما بلال يستاهل التعب فعلا يستاهل بس انا حسا انى طاقتى خلصت سؤاله ده بيخلص طاقتى وبيهد اي حاجة حلوة تانية بيعملها علشانى كأنه استيكه واحدة واحدة بيمسح الحاجات الحلوة انا خايفة يقدر يمسحها كلها وميفضلش غيره

اللى قال ان فى حب ملوش اخر كداب
كل حاجة في الدنيا ليها اخر مهما كانت كبيرة ومهما كانت مهمة وغالية برضه ليها اخر ولو محفظناش عليها ممكن جدا نوصل لاخرها
حبى الجامد لبلال حبي اللى مأثرش فيه انه حب غيرى مرتين وخطب غيرى مرة حبى ليه اللي مقلش حتى لما انا نفسي اتخطبت لغيره
حسا ان اخرته هتبقى علي ايد سؤاله ده
عدم ثقته فيا وخوفه المستمر من انى اسيبه
حساهم هيموتو اللى جوايا ليه
انا لسه بحبه ولسه مش شايفة فى الدنيا كلها راجل غيره
بس مش حسا انى هقدر اعيش معاه

هفضل بهرب بالنوم وانا مش عايزة اهرب بالنوم منه
انا عايزة اهربله هو من كل حاجة مضايقانى
يعنى هبقى بهرب بالنوم وهو بيحب وخاطب غيرى وبرضه وهو خاطبنى وهنتجوز ابقى بهرب بالنوم
مسكت موبايلى لقيت بلال متصل بيا كتير بس انا كنت عاملة الموبايل صامت مقدرتش اقفله بصراحة فعملته صامت لانى برضه مكنتش هتحمل اسمعه بيرن عليا ومردش
ولقيته باعتلى رسالة كاتب فيها
اللى بيفهمك هياخدك على قد عقلك
واللي بيحبك هياخدك على قد قلبك

وانا ربنا راضى عنى وبيحبنى لان اللي بتحبنى واللي بتفهمنى نفس الانسانة عارف انى تعبتك ومقدرش اوعدك انى مش هتعبك تانى بس اللي اقدر اوعدك بيه انى احبك اكتر من نفسى واثق فيكى اكتر من نفسي لانك تستاهلي الثقة يا جنتى انتى ومفيش غيرك يستاهل ثقتى
قريت الرسالة يجى عشرين مرة وفى دموع فى عينى بلال كلمنى ورديت مجرد مسمعت صوته لقتنى بعيط
بلال بخوف:جنة انتى بتعيطى ليه هو انا كنت مضايقك اوى كده حقك عليا يا حبيبتى انا اسف والله انا بحبك ومليش غيرك انا اسف
جنة وهى بتتشحتف:قو..قول...قولها تانى
بلال:انا اسف والله اسف

جنة:ل..لا مش دى قو..قول انك بتحبنى
بلال:بحبك يا جنة يا اعز اصحابي يا عشرة عمرى ياللى طول حياتى كنتى عوض ليا من ربنا واحنا صغيرين كنتى عوض عن انى مليش اخوات ودلوقتى بقيتى عوض عن اللي شفته بسبب غيرك واتحملتينى وانا غصب عنى بدفعك انتى تمنه
انا بحبك يا جنة بحبك اوى بحبك قد كل حاجة خلقها ربنا يا احلى حاجة خلقها ربنا
جنة:بجد يا بلال
بلال:بجد جدا يا اغلي حاجة في حياة بلال
استنى بقي لما اسئلك السؤال الصح
انتى بتحبينى يا جنة صح
جنة:صح

بلال:لا ايه الاجابات المختصرة دى جاوبى عدل يا جنة
جنة:بحبك اوووووى بعشقك جداااااا يا بلال
بلال:ايوه كده اهى دى الاجابات النموذجية
ننزل بكرة نكمل لف علشان القاعة اللي هنتجوز فيها
جنة:ننزل طبعا مننزلش ليه

الثقة اهم حاجة فى علاقتك باى حد سواء اهلك او صحابك او جوزك او مراتك او ولادك
الثقة اهم حاجة مفيش علاقة ممكن تقوى وتستمر طول العمر لو مفيهاش ثقة حتى لو كان ماليها الحب
الحب من غير ثقة ملوش لازمة
كأنك بتحوش في حصالة مخرومة
تفضل تحوش فيها ومطمن ووقت ما تتزنق في فلوس تلاقيها فاضية ومفيهاش حاجة

انا وبلال اتجوزنا وخلفنا جميلة ومحمد
بلال بقي بيثق فيا بيثق في حبى ليه وانى مقدرش ولا عايزة ابعد عنه
وبقى بيثق في نفسه في انه يستاهل يحب ويتحب واللي يحبها تفضل جنبه ومتسيبهوش
ثقته فى نفسه رجعت بعد ما كانت اتهزت بسبب اللى حصله
وانا اخيرا بقالي ملجأ اهربله غير النوم بلال بقى ملجأى وحلم عمرى اللى اتحقق
وانا بقيت جنته دايما بيناديلي كده وحتى مسجلنى كده على موبايله
وراندا بعد الكلية اتقدملها ابن خالتنا حكمت عقلها ووافقت عليه وركزت فى افعاله علشان تعرفه بجد
وبعد كده قلبها اللي استلم القيادة وحبته وهو يستاهل حبها

لو علاقتكم بحد ناقصها الثقة اعرفو ان العلاقة دى مصيرها الفشل مهما طالت وعدى عليها وقت هتنتهى لان اساسها مش قوى وعلشان كده مش هتتحمل وهتنهار مع اول اختبار بجد
الحب عمره مكان ضمان لاستمرار علاقة
والثقة اهم من الحب
لو معرفتوش تجمعو في علاقتكم بحد بين الحب والثقة
واتخيرتم بين الحب والثقة انا عارفة ان الاختيار صعب بس صدقونى ساعتها الصح انكم تختارو الثقة
لان الثقة اهم وهى اللي بتدوم