حكايات منار الحكاية 23 بعنوان من عاب ابتلى

حكايات منار الحكاية 23 بعنوان من عاب ابتلى

 انا نغم عندى اربعة وعشرين سنة
لسه واكلة علقة موت من جوزى حالا ليه من غير سبب متجوزاه من سنتين ومن اول يوم جواز وانا بضرب من غير سبب هو اكيد مريض نفسي
ايه اللي خلانى اتجوزه ايه اللي وصلنى للى وصلتله ده
دى حكاية طويلة بدأت من وانا عندى تمنتاشر سنة
لما فارس ابن عمى رجع من السفر

هو كان سافر وانا عندى تلتاشر سنة سافر بره يشتغل
فضل خمس سنين مسافر مكنش بيرجع أجازات حتى
وبعدين رجع واستقر ومسافرش تاني
رجع وانا شفت فيه فارس احلامى حبيته واتمنيت يحبنى
بس هو عمره محبنى عمره مشافنى اكتر من اخته الصغيرة
هو اكبر منى بخمستاشر سنة عارفة انهم كتير بس بجد مش فارقين معايا
انا حافظت علي نفسي علشان فارس ودعيت كتير انه يحبنى انه يرجع يحب تاني لانى عرفت انه سافر اصلا علشان البنت اللي كان بيحبها اتخطبت واتجوزت غيره ساعتها هو ساب البلد كلها وسافر
فضلت اربع سنين بحبه مع نفسي ومستنية يحبنى زى ما بحبه بس هو محبنيش لما بقي عندى واحد وعشرين سنة
فارس خطب

زن مرات عمى وعمى وكل العيلة جاب نتيجة باين
خطب الهام جارتنا انا اتصدمت مفهمتش ازاى ده حصل
انا بقالي اكتر من تلت سنين بدعى ربنا يجعله من نصيبي في كل ركعة مبدعيش غير بالدعوة دى
انا طلعت صدقات كتير بنية ان ربنا يستجيبها
فى رمضان مكنش بيبقي ليا دعوة غيرها قبل الفطار
ازاى ده يحصل وليه

بعدها غلطت غلطت كتير كنت غضبانة من دعوتى اللي ربنا مستجبهاش وموجوعة علي فارس احلامى اللي خطب وهيتجوز غيرى
كانت اخر سنة ليا في الكلية عملت فيها اللي معملتوش في سنين عمرى كلها ضيعت نفسي
صاحبت واتكلمت في التليفون وخرجت من ورا اهلي
عملت حاجات حرام اعملها وبطلت اصلي
وبقيت احط مكياج في الكلية بس قبل ما ارجع البيت بمسحه ولبسى كان بيقي فوق جاكيت بقلعه وانا بره
لبسي بقي ضيق عن الاول ومختلف كمان
بس اهلي ميعرفوش حاجة من اللي كنت بعمله

وجامعتى كانت بعيدة ومن ستر ربنا ليا ستر ربنا اللى انا مستاهلهوش مكنش معايا حد من قرايبي في الكلية
فارس اتجوز وانا في الكلية قبل ما اتخرج بكام شهر
طبعا انا لا حضرت خطوبته ولا فرحه
من ساعة مخطب وانا بطلت اتعامل معاه وبقيت بتجنبه
بطلت حاجات كتير صح كنت بعملها كأنى بقيت واحدة تانية غير نغم اللي انا وكل الناس نعرفها
بعد الجامعة علي طول سمير جوزى اتقدملي وانا وافقت
مكنش فارق معايا هتجوز مين مدام مش فارس يبقي كله زى بعضه حياتى مع سمير جحيم من اول يوم
مع انه ميعرفش اللي كنت بعمله يعنى هو مفكر انى محترمة ومفيش في اخلاقي اتنين
عشت معاه سنتين بتهان فيهم بس

شتيمة وضرب وقلة قيمة بس انا كنت بسكت اهلي مكنوش هيطلقونى منه
كمان كنت حاسة انه سمير عقاب ربنا ليا عن كل الغلط اللي عملته عقاب انا استاهله وعلشان كده استحملت ومحاولتش اسيبه
ولا مرة طلبت منه الطلاق ولا مرة غضبت عند اهلي جزء منى كان مرتاح لفكرة انى بكفر عن ذنوبي اللي عملتها بس خلاص دلوقتى انا حسا انى كفرت عنها
عارفين ليه لان علقة الموت اللي خدتها كانت علقة موت فعلا موتت ابنى انا كنت حامل واجهضت سمير كالعادة ضربنى ومهموش انى حامل في ابنه والنتيجة ان ابننا مات قبل ما يتولد اصلا
من ساعة ما الدكتور قالنا وهو خرج من الاوضة وانا حسيت انى قلبي بيوجعنى كأنه اتخلع من مكانه ومع انى كالعادة معيطش بس حسا كأنى بموت انا مش عارفة اتنفس اظن وجعى ده كفاية يكون تكفير عن ذنوبي اللي عملتها
انا خلاص مش هعيش مع سمير يوم واحد كمان

بعد تلت ساعات قضاهم بره الاوضة دخل وهو باصص في الارض كأنه مش قادر يحط عينه في عينيا
فضل نص ساعة ساكت قاعد باصص في الارض وبس
فاتكلمت انا
نغم:سمير
مردش عليا مرفعش عينه من الارض فكررت ندايا تانى
نغم:سمير
سمير هو بيرفع عينه وبيبصلها:ااا...ايوه يا نغم
نغم:طلقنى
سمير بصدمة:ايه
نغم:ايه مسمعتش بقولك طلقنى يا سمير طلقنى
سمير:اول مرة تطلبيها
نغم:علشان مش هقدر أعيش معاك بعد اللي عملته

سمير:
نغم:ساكت ليه انت فاهم انت عملت ايه انت قتلت ابننا قتلت ابنك بايدك يا سمير
انا خليت الموضوع يمشي انى وقعت والوقعة هى اللي سببت الاجهاض اظن انت عارف كويس انى بسهولة جدا اثبت انه بسببك وانى لو رفعت قضية طلاق هكسبها من اول جلسة كفاية ان الجيران يشهدو بضربك ليا وايدى اللي كسرتها سبع مرات ورجلي اللي كسرتها تلت مرات

واخرها اللي عملته النهاردة بس انا مش عايزة كل ده يحصل انا استحملتك كتير يا سمير استحملتك كتير اوى وخلاص انت جبت اخرى أرجوك انا بترجاك تطلقنى
ارحمنى وطلقنى يا سمير
سمير بنبرة حزن:انتى...انتى طالق بالتلاتة وحقوقك كلها هتوصلك ومع انى عارف ان اللى عملته متداويهوش كلمة اسف بس انا اسف يا نغم والله العظيم اسف علي كل اللي عملته فيكى ابقي حاولي تسامحيني انا عارف انى مستاهلش بس ابقي حاولي يمكن تقدرى

اهلى جم اتصلت بيهم وجم وزعقو واعترضو لما عرفو انى اتطلقت بس انا قلتلهم انى بضرب بقالى سنتين ومش علشان مقولتش واشتكيت يبقي ميعرفوش ايه مش باين علي وشى اللي دايما بيكون مورم انى بضرب طيب الجبس اللي كل شهر والتاني مركباه ايه
قلتلهم ان المرة دى ابنى اللي مات المرة الجاية يمكن تبقي انا هيرتاحو ساعتها وهما موتونى علشان مش عايزين الناس تقول عليا مطلقة
ومع ان الكلام كان بيقتلنى وانا بقوله الا انى برضه معيطش
اهلي سكتو وسمير كان قبل ما يمشى دفع حساب المستشفى وانا رجعت بيت اهلي بس رجعته مطلقة مدمرة بماضى واجعنى وحاضر مشوه ومستقبل خايفة منه
اصل مستقبل ايه اللي ممكن يكونلى يعنى

بعد ما رجعت البيت فضلت شهر مبعملش حاجة غير انى بفكر فكرت فى كل حاجة عملتها في ربنا اللي بعدت عنه في نفسي اللي خسرتها وقررت اتوب
قررت ادى نفسي فرصة تانية
رجعت من تانى اصلى بس كنت حاسة كأنى ببدء من الاول في سنى ده وببدء من الاول
المهم بعد تلت شهور كنت الحمد لله التزمت من تانى في صلاتى وبقيت مبيفوتنيش فرض
وكنت بستغفر كتير عن كل الغلط اللي عملته

كنت عايزة اشتغل بس اهلي رفضو طبعا علشان انا مطلقة ومش بس خطوتى لا النفس اللي بتنفسه بحساب
مكنتش بخرج من البيت غير للجامع كنت بحضر دروس دين كنت بحاول اصلح غلطى وارجع نغم من تانى
هناك قابلت واحدة كانت صاحبتى اسمها هدى
انا بعدت عنها من تانية ثانوى لأنها اخلاقها اتغيرت كلمت شاب وبعده شاب واتنين وتلاتة انا بعدت عنها من غير حتى ما انصحها او حتى أفهم منها هى عملت كده ليه
شفت انها مبقاش ينفع تفضل صاحبتى

صحيح من عاب ابتلى ادينى عملت اللي هى عملته ويمكن اكتر كمان
بس هدى اختلفت لبسها اتغير تماما حتى كلامها اختلف
دى بقت بتحفظ قرءان وقربت تختم كمان
انا مكنتش عارفة اتكلم معاها ازاى تانى خصوصا انى فعلا زمان بعدت عنها كأنها جربة
بس هى جات واتكلمت معايا بكل حب
وقالتلي انها اتجوزت ومعاها عبدالرحمن وايمان

وانها اتغيرت في تانى سنة ليها في الكلية
لما شافت واحدة صاحبتها ماتت قدام عينيها
بتقولي خفت ولقيت نفسي بفكر مانا ممكن ابقي مكانها هقابل ربنا ازاى هقوله ايه انا معملتش اي حاجة حلوة اقابله بيها ساعتها قررت انى هتغير يمكن ربنا يقبل توبتى ويغفرلي قالتلي ان الموضوع كان صعب خصوصا انها بعدت عن صحابها علشان مرضيوش بتغييرها بالعكس كانو بيتريقو عليها فهى خافت تضعف بسببهم فبعدت عنهم وبقت لوحدها
فضلت يجى سنة ونص بتحاول لوحدها ومن غير ما حد يشجعها بالعكس الكل كان بيتريق خصوصا اهلها
هدى والدتها اتوفت ووالدها اتجوز

ومرات ابوها هى السبب في اللي هدى عملته
اول واحد كلمته هى قبلت تكلمه لانها كانت محتاجة تسمع كلام حلو محتاجة حد يهتم بيها
ومرات ابوها مكنتش بتنصحها ولا توعيها كل اللى كان مهم عندها ان هدى تعمل معاها شغل البيت وخلاص
ووالدها مكنش بيهتم برضه وعلشان كده هى اول واحد اهتم فتحتله قلبها واتعودت يكون في حياتها حد
واصحابها اللي عرفتهم كانو بيعملو زيها فكان عادى بالنسبالها
قالتلي لما بعدت عنهم لقيت ان مبقاش في حياتى حد انا مكنش ليا غيرهم
كنت بعيط وانا بدعى ربنا يقوينى ومضعفش وبدعى يرزقنى بحد يشجعنى انا تعبت وانا بحاول لوحدى وخايفة ارجع للى كنت فيه
وبعدها ربنا استجاب دعاها ورزقها بمحمد جوزها
اخته كانت معاها في الدروس اللي كانت بتاخدها في المسجد وهى اللي قالت لاهله عليها
واتجوزو وهى في رابع سنة في الكلية

لما جيت اتاسفلها انى بعدت زمان واتخليت عنها
لقتها بتقولي معتذرش انا مغلطش انا خفت علي نفسي وده حقى ساعتها انا حضنتها وقولتلها ان خلاص من هنا ورايح احنا اصحاب واكتر من الاول كمان
رجعت البيت وفضلت افكر انا غلطت لما بعدت عنها من غير ما انصحها واحاول أفهم هى بتعمل كده ليه لما شفت انى احسن منها وان مفيش فى اخلاقي ولما ربنا اختبرنى غلطت زيها واكتر
من بعد طلاقي بست شهور واهلي بيكلمونى في انى اتجوز تانى كان بيتقدملى ناس مش مناسبين
اللى عايزنى زوجة تانية وتالتة وفى اللي عايزنى رابعة كمان
وفى اللي حرفيا قد والدى واكبر وعايزنى ممرضة ليه في اخر ايامه

وفى اللي عايزنى خدامه ليه ولولاده
اهلي كانو موافقين علي اى واحد في دول
المهم انى مفضلش مطلقة كانو بيتخانقو معايا كتير علشان الموضوع ده
يعنى هو علشان مفضلش مطلقة ياما ابقي خدامة ياما ممرضة ياما اخد واحد من مراته وعياله علشان عينه زايغة
هو انا مش من حقي اتجوز بجد وابقي زوجة ويبقالي زوج واعمل عيلة مش من حقي افرح وارتاح
انا بقالي سنين لا فرحت ولا ارتحت
لما كنت بحب فارس مكنتش مرتاحة لانى كنت خايف ميحبنيش

ولما غلطت بعد ما خطب مكنتش مرتاحة ولا فرحانة لانه خطب كنت حاسة ان قلبي بيوجعنى كمان كنت عارفة انى بغضب ربنا وبرخص نفسي
ولما اتجوزت سمير لا كنت فرحانة ولا مرتاحة في حياتى معاه
وبعد ما اتطلقت منه لا مرتاحة ولا مبسوطة لا وكمان خايفة اهلي يجبرونى علي اي واحد من اللي بيتقدمو دول
انا تعبت والله العظيم تعبت ونفسي ارتاح وافرح بقي
يا رب فرحلي قلبي يا رب طمنلي خوفي
يا رب انا اسفة علي الغلط اللي عملته اقبل توبتى يا رب اكرمنى يا واسع الكرم والفضل يا رب عوضنى عن ابنى
يا رب انا طمعانة في رحمتك ارحمنى يا رب
دعيت ربنا وانا بصلى ومع انى كان نفسي اعيط بس معيطش مع ان العياط كان هيكونلي راحة
دموعي المحبوسة ومبتنزلش دى واجعة قلبي اوى

بعد طلاقى بسنة فارس ابن عمى اتقدملى
فارس من سنتين يعنى بعد جوازى بسنة عمل حادثة والهام مراته وسارة بنته ماتو بس هو عاش
او يمكن مات معاهم قلبه وروحه ماتو بس جسمه فضل عايش
ساعتها انا فكرت ان ربنا ممكن يكون خلا فارس ميتجوزنيش علشان مكنش مكان الهام واموت بعد سنتين من جوازنا انا وبنتنا
لما بفكر دلوقتى بحمد ربنا علي ان امورى في ايده سبحانه ومش في ايدى لانى فعلا معرفش الخير ليا فين
وبدعى ربنا يصبر فارس انا مبتكلمش معاه ومليش تعامل معاه اوى بس لما بشوفه من ساعة اللي حصل بحس انه كبر عجز عينيه فيها وجع وحزن هو انا من يوم ما وعيت عالدنيا وانا عمرى مشفت فارس عينيه فرحانة حتى بعد ما اتجوز الهام بس الحزن اللي فيهم زاد اكتر بكتير عن الاول
هو اكيد حاسس بالذنب لانه هو اللي كان سايق

بدعيله وبدعى لالهام بالرحمة وبستغفر ربنا علشان اعترضت علي حكمه واختياره وغضبت وغلطت بسبب غضبي
لما بابا قالي ان فارس متقدملي انا اتفاجات انا فعلا خرجته من حساباتى ومبقتش بدعى ربنا انه يحبنى او يبقى من نصيبي معقول بعد السنين دى كلها فارس متقدملي
بابا قالي ان المرة دى مليش حجة لا هو قد ابويا ولا هكون ممرضة ولا خدامة ولا هاخده من على مراته وعياله
قلتله اللي تشوفه وبابا بلغه بموافقتى وخلال شهر كنا متجوزين انا وفارس معملناش فرح طبعا
بس فارس اصر نكتب الكتاب ونعمل معاه حفلة صغيرة
واشترالى شبكة وفستان سواريه ابيض بدل فستان الفرح

دخلنا الشقة وقفت اتفرج عليها وانا بفكر ان دى شقتنا انا وفارس خلاص بقيت مراته وبقي جوزى
افتكرت وانا بدعى ربنا يرزقنى بيه وافتكرت لما عرفت انه هيخطب وافتكرت وانا بخرج مع شباب وبكلمهم من ورا اهلي وافتكرت سمير وهو بيضربنى وافتكرت الدكتور وهو بيقولى ان ابنى مات وافتكرت سمير وهو بيقولي انتى طالق وافتكرت اهلي وهما بيتخانقو معايا علشان الناس اللي كنت برفضهم وافتكرت وانا بدعى ربنا يرحمنى ويغفرلي ويفرحنى ويريح قلبي
كل ده عدى قدام عينى كأنه شريط سينما
ولقتنى بعيط بعيط جامد وبصوت عالي
وانهارت في الارض وانا بعيط
مش عارفة كنت بعيط على ايه بالظبط
على ان فارس اتجوز غيرى ولا على غلطى في حق ربنا ولا علي نفسي علي الاهانة وضرب سمير ليا ولا علي ابنى اللي مات جوايا قبل ما يشوف النور
ولا دى دموع الفرح اللي بيقولو عنها لانى اخيرا بقيت مرات فارس
ولا بعيط علي كل ده ما بعضه

معرفش بس اللي اعرفه انى بعيط ودى حاجة محصلتش من سنين كتير اوى
فضلت نص ساعة بعيط وفارس كان قاعد جنبي وبيكلمنى بس انا مكنتش سامعاه
بعد شوية كنت لسه بعيط بس كنت سامعاه بيقول ايه
فارس بخوف:انتى بتعيطى ليه طيب ردى عليا يا نغم انتى مجبورة عالجوازة دى صح والله انا قلتلهم ان خمستاشر سنة فرق كبير بينا بس والله عمى اكدلى انك موافقة وانه ماجبركيش ولا حاجة انا مش هجبرك على حاجة اللي انتى عايزاه انا هعمله ردى عليا طيب

كنت عايزة ارد بس صوتى مكنش راضى يطلع من كتر العياط
فارس بصوت عالي:بطلى عياط بقي
نغم:
فارس بصوت هادى:انتى عايزه ايه طيب لو عايزانى اطلقك انا هطلقك صدقينى انا هعملك اللي انتى عايزاه ومش هجبرك علي حاجة بس بطلي عياط وقولى انتى عايزة ايه حرام عليكى كده بقالك نص ساعة بتعيطى بوظتى اعصابي

ساعتها لقتنى مسكت ايده وحاولت اتكلم
نغم بصوت مبحوح:انا هفرح صح
فارس باستغراب:نعم
نغم:انا هفرح صح وهرتاح انا اخيرا هفرح وهرتاح

وقمت وقفت وانا عمالة الف في الشقة كلها وبتكلم
نغم:انا بقيت مراتك وانت بقيت جوزى وهفرح انت هتفرحنى يا فارس مش كده انا كمان عيطت الحمد لله واخيرا عيطت انا فرحانة اوى ودى شقتنا احنا هنعيش فيها سوا وربنا هيعوضني عن ابنى وهيعوضك عن سارة

قلبي بيقولي ان اول خلفة لينا هتبقي تؤام ولد وبنت وهنسميهم سارة ومالك انا هدعى ربنا وهو هيستجيب دعايا انا عارفة انه هيكرمنى وهيستجيب دعايا
انا...انا تعبت اوى لحد ما وصلت هنا تعبت اوى والله بس خلاص مفيش تعب تانى انت هتفرحنى صح وهتريحنى ومش هتضربنى يا فارس مش كده اوعدنى انك مش هتضربنى
فارس:
نغم:انا والله هسمع كلامك ومش هضايقك ابدا بس انت اوعدنى انك عمرك مهتمد ايدك عليا
فارس بقلق:نغم انتى كويسة
نغم:انا كويسة اوعدنى انت بس بالله عليك اوعدنى
فارس:اوعدك
نغم:انا كمان اوعدك انى هكون زوجة صالحة هسمع كلامك وهربي ولادنا احسن تربية ودايما هحاول اسعدك واكون احسن زوجة واحسن ام
مقولتيش ايه رأيك في فستانى
فارس:ها

نغم وهى بتلف حوالين نفسها:فستانى انت مقولتش رأيك فيه حلو صح عارف ده احلي فستان جبته في حياتى كلها
هو مش عاجبك ولا ايه
فارس:هو حلو وانتى محلياه اكتر
نغم انتى مالك
نغم:مالي في ايه
فارس:انتى كنتى بتعيطى كتير ومكنتيش بتردى عليا ودلوقتى شكلك فرحان وبتتكلمى كتير وبتقولي حاجات كتير انا مش فاهم حاجة
نغم:عايز تفهم ايه طيب
فارس:انتى مضايقة علشان اتجوزتينى
نغم:واضايق ليه علشان فرق العمر اللي بينا يعنى

مفرقش معايا وانا عندى تمنتاشر سنة هيفرق معايا دلوقتى
فارس انا مصدقت اننا اتجوزنا ان جيت للحق انا لسه مش مصدقة اننا اتجوزنا احنا اتجوزنا صح
فارس:اكيد صح امال في بيت واحد وبابه مقفول علينا ازاي يعنى لو مكناش اتجوزنا
طيب انتى قولتى انك فرحانة انك عيطى ليه
نغم:علشان اول مرة اعيط من سنين مع انى كتير كنت ببقي محتاجة اعيط بس دموعى مكنتش بتنزل
انا خضيتك علشان عيطت كتير صح انا اسفة حقك عليا بس تقريبا كده انا مصدقت فكنت بعيط علي كل حاجة معيطش عليها قبل كده
فارس:بجد ده السبب مش علشان اتجوزنا انا وانتى

نغم بابتسامة:انا فرحانة علشان اتجوزنا انا وانت ولو هعيط بسبب جوازنا يبقي هتبقي دموع الفرح زى ما بيقولو
فارس باستغراب:فرح ..دموع الفرح علشان اتجوزنا..يعنى انتى فرحانة
نغم بسعادة:جدا فرحانة جدا انا بحبك يا فارس ودعيت ربنا كتير اوى يرزقنى بيك والحمد لله ربنا استجاب بعد سنين كتير اينعم بس استجاب المهم انه الحمد لله استجاب
وسجدت لربنا شكر وفارس واقف متفاجئ وشكله مش فاهم اي حاجة
فارس باستغراب:يعنى انتى بتحبينى
نغم بابتسامة:بحبك اوى
فارس:من امتى

نغم:من وانا عندى تمنتاشر سنة
فارس بصدمة:نعم ومقولتليش ليه
نغم:اقولك ايه فارس انا بحبك ارجوك اتجوزنى
اكيد مينفعش اقولك كده
فارس:بس انتى طول عمرك شايفانى اخوكى الكبير
نغم:انا عمرى مشفتك اخويا الكبير ولا فرق معايا سنك
انت اللي طول عمرك شايفنى اختك الصغيرة
المهم انت مش هتصلى بيا ولا ايه يا زوجى الحبيب
فارس:شكلك مبسوط
نغم بسعادة:لانى مبسوطة فعلا اول مرة احس ان قلبي فرحان المهم يلا علشان نصلى ونبدء حياتنا بطاعة ربنا

بعد شهرين من جوازنا انا وفارس
شهرين كنت بحاول اصدق فيهم انى اتجوزته بجد
ساعات كنت افضل صاحية اتفرج عليه وهو نايم والمسه علشان اتاكد انه جنبي فعلا
كتير بتفرج علي صورنا سوا وبتصور معاه كتير اوى

بكلمه وهو في الشغل علشان اطلب منه حاجات يجببها وهو جاي او علشان اطمن عليه بس دى حجج انا بكلمه علشان يرد واسمع صوته واتاكد انه بقي جوزى وحقى اكلمه في اي وقت واطلب منه يجيب حاجات للبيت حاجات لبيتنا
المهم بعد شهرين عرفنا انى حامل
فارس من ساعة معرفنا مخلينى مبخرجش من البيت خالص غير علشان نروح للدكتورة وطبعا بيجى معايا
بس بنروح بتاكسي مبيرضاش نروح سوا بعربيته وهو اللي يسوق خايف يتكرر اللي حصل قبل كده مع الهام وسارة
انا كتير قلتله ان ده قضاء ربنا وقدره وانه ملوش ذنب

بس مكنش بيرضى وانا محاولتش اضغط عليه
عرفنا انى حامل فى توأم ساعتها انا فرحت وقلتله مش قولتلك اننا هنجيب مالك وسارة واديهم متاخروش علينا
طول شهور الحمل وفارس مخلينى مبعملش اي حاجة حتى جابلي شغالة علشان متعبش في شغل البيت ورفض انى اروح عند ماما وكان بياخد باله منى ومهتم بمواعيد متابعتى مع الدكتورة اكتر منى انا شخصيا
يوم الولادة انا ولدت الفجر مكنش معايا غير فارس واخوه

لما فقت من البينج لقيت فارس شايل علي ايده مالك وسارة وبيعيط اول مرة اشوف فارس بيعيط
فارس:مالك وسارة نورو الدنيا يا نغم ربنا عوضنا بيهم زى ما قولتى بقي عندى عيلة بقيت اب الحمد لله اخيرا بقيت اب انا هفرح وهرتاح صح ربنا هيعوضنى بيكم عن كل اللي حصلى قبل كده انا...انا تعبت اوى لحد ما وصلت هنا تعبت اوى والله بس خلاص مفيش تعب تانى احنا جبنا مالك وسارة وانتى معايا وبتحبينى وانا كمان بحبك انا بحبك اوى يا نغم
نغم بابتسامة:الحمد لله
ياه مكنتش متخيلة ان اول مرة أسمعها منك هتبقي حلوة اوى كده وانا كمان بحبك اوى يا فارس

واحنا راجعين البيت لأن فارس طبعا مرضيش اروح عند ماما بس هى جات قعدت معايا اسبوع
المهم فارس مكنش راضى يسوق احنا اللي جابنا كان اخوه فارس صحاه وخلاه يجى يسوق بينا واحنا راجعين فارس كان عايز برضه اخوه اللي يسوق بس انا اصريت ان هو اللي يسوق وقلتله ان اللي حصل كان قضاء ربنا وقدره وهو ملوش ذنب وانه لازم يرضى باللي حصل
وان ربنا الحافظ سواء كنا معاه في العربية او في اي حتة ربنا الحافظ وخوفه ده مش هيمنع مقدر ومكتوب انه يحصل وهو الحمد لله وافق وساق هو

بعد تلت سنين جبنا مروان وبعده بسنتين جبنا على
وبقا عندنا مالك وسارة ومروان وعلى

وانا حامل في مروان كنت بجيب هدوم للبيبي فارس اصر نجيبله هدوم جديدة ساعتها انا اديت هدوم سارة ومالك لبنت عمى علشان كانت حامل ونزلت معاه نجيب هدوم جديدة علشان مروان
ساعتها شفت سمير كانت اول مرة اشوفه من يوم ما اتطلقنا كان ماشي مع واحدة حامل وماسك ايدها بأيد وفي الايد التانية شايل شنط كتير واضح انها هدوم للبيبي
هو مشافنيش بس انا شفته شفت سعادته شكله مبسوط وهى كمان شكلها فرحان اكيد هو اتغير
ساعتها فكرت يمكن انا اتجوزت سمير علشان يعمل
يعمل فيا اللي عمله وبعدها يتغير لانه اكيد اتغير
اللي شفته ده مختلف عن سمير اللي كنت اعرفه

كل حاجة بتحصل في وقتها المناسب اللى ميعرفوش غير ربنا ولو محصلتش تبقي شر وربنا جنبهولنا
كل حاجة بتحصل بسبب ولسبب ومفيش حاجة بتحصل كده وخلاص ربنا دايما بيكون ليه حكمة من كل حاجة بتحصلنا
احنا كلنا محترمين وطيبين واخلاقنا مفيش منها بسبب ستر ربنا علينا ستر ربنا لو اتشال من علينا هتبان بلاوى
بلاوى جوانا وبلاوى عملناها فالحمد لله علي ستر ربنا
اوعو تشوفو نفسكم احسن من حد
لو عرفتم عن حد حاجة غلط بيعملها ادعوله ربنا يهديه وادعو لنفسكم ربنا يحفظكم ويكفيكم الشر
بس لا تشوفو نفسكم احسن منه ولا تتكبرو عليه
الجنة مبيدخلهاش متكبرين

كمان احساس وحش اوى لما تتحط في موقف اختبار لاخلاقك وايمانك اللي انت فرحان بيهم دول وتلاقي نفسك عملت زيه ويمكن اكتر منه كمان
احساس وحش بجد بتحس بقد ايه انت قليل وملكش اي قيمة خليكو دايما فاكرين ان من عاب ابتلي
ادعو ربنا دايما بالثبات
ادعو يثبتكم علي الصح اللي بتعملو
ادعو يثبتكم فى البعد عن الغلط اللي مبتعملهوش
ادعو دايما ومهما حصل ومهما عملتم لا تبطلو دعا ولا تبطلو صلاة الدعاء والصلاة باب مفتوح بينكم وبين ربنا اوعو تقفلو