قصص و روايات - قصص رومانسية :

رواية ما بعد الرحيل للكاتبة ياسمين أحمد الفصل الثالث

رواية ما بعد الرحيل بقلم ياسمين أحمد

رواية ما بعد الرحيل للكاتبة ياسمين أحمد الفصل الثالث

طه أخد عيلته ورجعوا بيتهم بعد ماقضوا وقت حلو وجميل فى عزبة المنصورى وكانوا فى قمة السعادة .
طه: ياااااه شوفتى يافوزية النعيم اللى فية محمد المنصورى واولادة اللى عايشين فية بسم الله ماشاء الله عندهم العزبة دى بتساوى الالاف ربنا يبارك لهم .
فوزية بضحك: جرى اية ياراجل انت بتحسدهم ولااية .

طه: لا طبعا يافوزية انا عمرى ما بحسد حد انا بتكلم عامة انهم من عيلة غنية اوى .
فوزية: ربنا يزيدهم كمان وكمان والصراحة الراجل صاحب العزبة دة راجل كريم جدا ومابيبخلش علينا فى حاجه .
مايسة ساكتة ومش بترد وابوها لاحظ سكوتها وشرودها .

طه: مالك يابنتى من ساعة مارجعنا وانتى ساكتة يعنى وماقلتيش رايك فى العزبة وجمالها واستقبال محمد بية وترحيبة بينا .
مايسة: عادى يابابا هاتكلم اقول اية ربنا يسعد الجميع .
طه: امال مالك يابنتى من ساعة مارجعنا وانتى شاكلك مش مظبوط.
مايسة: الصراحة يابابا الراجل صاحب العزبة اكرمنا اخر كرم بس آآآآ .
طه: بس اية يابنتى ماتتكلمى.

مايسة: مش عارفة يابابا ابنة طريقة باصتة ليا مش عاجبتنى كان بيبصلى بطريقة غريبة اوى وكل ماارفع عينى فى وشة الاقية مبتسم ليا ودة فى حد ذاته نرفزنى .
طه: يابنتى انتى مكبرة الموضوع اوى لية ماتقوليش انه بيعتبرك زى اختة انا شايف انك واخدة الامور بحساسية زيادة اوى .
مايسة: مش عارفة يابابا يجوز يكون كلامك صح بس نظراتة ليا ماكنتش مطمنانى حاسة انها نظرات شخص معجب مش نظرات عادية بالمرة.
طه: يابنتى جاسم خاطب بنت زى القمر يبقى هايبصلك ليه بس .

فوزية اتعصبت وحطت ايدها حوالين وسطها واتكلمت بنرفزة: ويعنى بنتك مش قمر دى قمر 14 ونص كمان.
طه: انا مقصدش يافوزية انتى مالك انتى وبنتك كبرتوا الموضوع كدة لية انا بقول انة خاطب واحدة تانية يبقى هايبص لبنتك لية وبعدين تعالى هنا مش بنتك مخطوبه لابن عمتها.
فوزية بحدة: ايوة دة صحيح وحتى لو مش مخطوبه بنتك يتمناها اى حد يا طه .
طه: لاحول ولاقوة الابالله انا قلت حاجه انا برد على كلام بنتك انة بيبصلها بطريقة مش عاجبتها وكل اللى قلتة انه مرتبط يبقى هايعجب بمايسة لية .
مايسة: صدقنى يابابا هو اكتر من مرة باصلى وانا تجاهلتة ومرة تانية وانا وماما رايحين العزبة وكذا مرة واحنا عندهم دة انا كنت حاسة انه هايأكلنى بعينية بس بالرغم من كل دة الا انه وسيم جدا عينة فيهم سحر غريب جدا لهم حق البنات يموتوا علية .

طه: بقولك اية يامايسة يابنتى نصيحة واسمعيها منى بلاش تحلمى بجاسم وارضى بخطيبك وبس اعتبرية مجرد اخ وبس جاسم لايمكن يفكر فيكى اولا لانة خاطب واحدة تانية واكيد بيحبها دة غير انهم ناس اغنية جدا واحنا يدوبك ناس على قد حالنا فبلاش تحلمى باكتر من كدة .
مايسة بتريقة: لاطبعا يابابا انت بتقول اية انا انا ابص لجاسم دة انسان مغرور ومتكبر شايف نفسة انة وسيم ودنجوان عصرة يقدر يعلقنى زى مابيعلق باقى البنات بابا حبيبى متخافش بنتك مش من السهل حد يوقعها فى غرامة بسهولة.

طه: والله ياخوفى يابنتى يجى عليكى يوم وتتعلقى بية وتحبية ولو دة حصل انتى اكتر واحدة هاتتعذب فى حبة لانه هايبقى حب من طرف واحد ارجوك يابنتى اعتبرية موقف وعدى وانسى جاسم تماما .
مايسة: بابا حبيبى اولا جاسم مش هو الراجل اللى يملى عينى اللى يعلق بنات الناس فى حبة ويتخلى عنهم دة مش ممكن ابدا انى افكر فية ثانيا بقى وده الاهم انى بحب وائل ابن عمتى وبحبة جدا كمان ومعنديش اى استعداد انى احب غيرة .

طه: ربنا يكملك بعقلك يابنتى انا عارف انك عاقلة وبتوزنى الامور صح .+

فى الوقت دة كان هانى طالع السلم بينهج ومش قادر ياخد نفسة: اااااااااااة يانى انا تعبت بقى من السلم دة
فوزية: ادى الله وادى حكمتة يابنى هانعمل اية حظنا اننا ساكنين فى اخر دور .
هانى: ماهو لو كانت العمارة دى فيها اسانسير كانت بقت ارحم بدل مابطلع كل مرة لحد مابينقطع نفسى .
طه: معلش يابنى ربنا يفرجها ويتوب علينا من وجع القلب دة .
هانى: بقولك اية يابابا .
طه: قول يابنى .
هانى: انا عندى فكرة حلوة .
طه: خير يارب ايه هى ؟

هانى: انا بفكر اشترى شقة ملك بدل الشقة اللى عاملة زى الخرابة دى وتكون دور تانى او بالكتير تالت وتكون واسعة والواحد ياخد فيها راحتة واهم من دة كلة يبقى فيها اسانسير .
طه:ايوة يابنى بس شقة بالمواصفات دى هاتجيبها منين انت عارف يابنى اننا مانحتكمش على ربع الملبغ دة يبقى ازاى بس .
هانى: يابابا انا عارف ومش ناسى وعلشان كدة انا عملت حسابى كويس ومعايا قرشين كويسين هادفع جزء من الملبغ والجزء التانى هاقسطة .
طه: يابنى انت سقف طموحاتك كبيرة اوى انت عارف اقل شقة دلوقتى تسوى كام مش اقل من ربع او نص مليون وفى شقق بتوصل لميلون تقدر تقولى الملبغ اللى معاك قد اية 100 الف 200 انا مش بقولك الكلام دة بحبطك بس بلاش تحلم بحاجه انت مش قدها حاليا .

هانى بضحك: وان قلتلك انى معايا نص المبلغ دة هاتقول اية .
طه بص لابنة باستغراب: اوعى يابنى تكون مديت ايدك للحرام ولا سرقت .
هانى: يابابا يا حبيبى انت حضرتك ازاى تفكر ان ابنك ممكن يمد ايدة ويسرق لا طبعا انا مش ممكن اعمل كدة انا الحمد لله يابابا بفضل الله بحوش من يوم مااشتغلت كابتن طيار والحمد لله المرتبات هناك كويسة جدا وقدرت ادبر مبلغ كويس يخلينا نسيب البيت اللى عايشين فية دة ونقعد فى شقة كويسة تليق بينا ونعيش زى بقية الخلق.

طه: ربنا يزيدك من نعيمة يابنى بس اهم حاجه انك ماتكونش بتضحك عليا .
فوزية بماقطعة:الشهادة لله هانى مافيش زية ياابو هانى ابنك راجل محترم وعينة مليانة ماتخافش علية .
طه: ربنا يسترها معاك يابنى ... ولسة هايكمل كلامة جرس الباب رن وهانى قام فتح الباب وكان وائل ابن عمتهم وخطيب مايسة دخل والقى عليهم السلام ؟
وائل: السلام عليكم ورحمة الله وبركاتة .
فوزية وطه: وعليكم السلام ورحمة الله وبركاته اتفضل يابنى .
وائل بسماجة: ازيك ياعمى ازيك يامرات عمى .
فوزية: الحمد لله يابنى كويسين ازى الست والدتك .

وائل: كويسة الحمد لله ... سكت شوية وبعدين بص لهانى ورد بسماجة: ازيك ياهانى .
هانى وهو بيكلم نفسة: ياريتنا كنا افتكرنا مليون جنية كانوا جم على طول .
وائل قرب منه وبص لة: يعنى مردتش عليا .
هانى بص له بضيق: اه اهلا ياوائل ازيك وازى عمتى .
وائل بتحدى: الحمد لله ياهانى انا كويس وعمتك كمان كويسة انت اللى فينك من زمان محدش يعنى بيشوفك
هانى ببرود: اهو مشاغل بقى عقبالك كدة لما تشتغل وتفلح .
وائل: هايحصل ياهانى وقريب اوى هالعب بالفلوس لعب .
هانى بتريقة: ماشى لما نشوف .
وائل: امال فين مايسة حبيبتى .

هانى بنرفزة: اية يااخينا انت ماتتلم اية حبيبتى دى انت نسيت نفسك ولااية .
وائل: لا ياهانى بس انت اللى نسيت انى ابقى خطيب اختك وبحبها .
هانى بضيق:اللهم طولك ياروح بص ياوائل انت ابن عمتى اه وخطيب اختى لكن بطل رخمتك دى ويارب نفهم انت فى بيت عمك لما تبقى مايسة فى بيتك ابقى قولها ياحبيبتى وياروحى انما دلوقتى لا .
وائل بحزن مصطنع: شوفتى يامرات عمى هانى بيكلمنى ازاى .

فوزية: خلاص ياهانى بطل بقى .
هانى: ياماما ... وقرب منها وهمس فى ودنها: دة عيل خنيق اوى ياماما .
فوزية بنفس الهمس: عيب ياهانى دة ضيف عندنا وابن عمتك وخطيب اختك على الاقل اعمل احترام ليا انا وابوك .
هانى بقلة حيلة: حاضر ياماما انا سكت اهوة .
مايسة كانت فى اوضتها واول ماسمعت صوت وائل طلعت جرى علشان تقابلة وسلمت علية وهو سلم عليها ومسك ايديها وباسهم وهانى اتنرفز .
هانى: اية حيلك حيلك اية يااخينا انت ماتلم نفسك ولااحنا مش مالين عينك ولااية ماتحترم نفسك وتقعد بادب وسيب ايد اختى .
وائل وهو مصر على استفزازة وقرب من مايسة اكتر علشان يبوسها: لا طبعا ياهانى دة انتو فوق راسى والله بس مايسة حبيبتى ووحشتنى بس ...وقرب منها اكتر علشان يبوسها هانى اتعصب علية وشد اختة بعيد عنه ووقف قدام وائل .

هانى بعصبية: وحشاك وقلنا ماشى لكن تقرب منها علشان تبوسها لا ياشاطر انت مش شاقطها من شارع الهرم اما تبقوا تتجوزوا ابقى اعمل اللى انت عاوزة .
مايسة: خلاص ياهانى خلاص ياوائل فضوها سيرة بقى .
وائل: اعمل اية بس ياحبيبتى اصلك واحشانى اوى ... بص لهانى وكان بيغيظة ولولا ان هانى كان عامل احترام لابوة وامة كان ضربة لكن مسك نفسة علشان ماينفعلش علية .
هانى بعصبية:وبما انك ملهوف اوى على اختى اوى كدة مش يدوبك تعجل بالجواز ولااية .
وائل بتفكير وحاول يغير من الموضوع: ها اه طبعا طبعا اكيد ان شاء الله فى اقرب فرصة بس لازم اكون نفسى الاول .
طه: كلام اية دة اللى بتقولة يابنى .

هانى بيكلم ابوة وبيبص لوائل بحدة: استنى يابابا دة بيقول لما يكون نفسة الاول ... قرب من وائل اكتر وكان عينة بطق شرار: ولما انت متنيل على حبة عينك ومستنى لحد ماتكون نفسك كنت بتخطب اختى ليه 3 سنين ها افهم ابقى .
وائل بحزن مصطنع: عاجبك كدة ياعمى شايف هانى بيكلمنى ازاى .
طه: اسكت انت ياهانى انا اللى بتكلم .
هانى: ايوة يابابا بس .

طه: انا قلت خلاص انا اللى اتكلم تبقى تسكت خالص ... هانى سكت وطه وجه كلامة لوائل.
طه: ماتاخذنيش يابنى هانى معاة حق لما انت لسة ماكونتش نفسك يبقى لية معلق البنت وخاطبها 3 ستنين ومخليها ماترتبطش بحد غيرك .
وائل: ياعمى ارجوك بس افهمنى انت عارف ظروفنا صعبة قد اية يعنى تقريبا زى ظروفكم ويمكن اكتر .
مايسة بحدة: لا بقى انا عازوة افهم يعنى اية معنى كلامك دة انت بتهزر صح .
وائل: لا يامايسة انا مش بهزر انا محتاج فترة علشان اقدر احوش قرشين اتجوزك بيهم .
مايسة: وهو انت مش كنت حكيتلى انك لك ورث من باباك الله يرحمة .

وائل بعدم تبرير: حصل ياحبيبتى بس اصل الورث دة لسة مجاش وانا كنت جاى علشان اقولك تصبرى عليا شوية كمان .
هانى بتريقة: وان شاء الله هاتصبر عليك وتستناك لحد امتى .
وائل بتريقة مماثلة:لحد ماياذن ربنا بقى اسيبكم تفكروا فى كلامى لانى بصراحة شايف ان الكلام مش هايجيب اى نتيجة دلوقتى بالعكس دى الامور هاتتعقد زيادة سلام عليكم ... مشى ورزع الباب وراة .
مايسة كانت واقفه مصدومة وعمالة تبكى وبعدين بصت لاخوها: بص بقى ياهانى لو وائل مشى ومرجعش مش هاسامحك ابدا فاهم مش هاسامحك ... وسابتهم ودخلت اوضتها وفضلت تعيط كتير .
طه: لية يابنى كدة تمشى ابن عمتك زعلان منا يابنى انت اكتر واحد عارف ان اختك بتحبة اوى ومتمسكة بية لية تزعلة وتزعلها منك .
هانى: يابابا وائل دة انسان سمج مابينزليش من زور وبصراحة كدة ومن الاخر هو بيلعب بمشاعر اختى ولابيفكر فى جواز ولابتاع انا خايف عليها جدا لانى عارف مايسة عاملة زى حتة البسكوتة رقيقة وحساسة جدا اللى زى وائل دة مايستاهلهاش.

فوزية: ياعينى عليكى وعلى بختك يابنتى .
طه: حظ بنتك زى الفل يافوزية بس الصبر ياجماعة وانت ياهانى ادخل صالح اختك وراضيها بكلمتين .
هانى: حاضر يابابا هاروح اصالحها بس لازم حضرتك تبقى عارف انى انا مش يهمنى فى الاول والاخر غير مصلحة اختى وسعادتها .
طه: ربنا يخليكم لبعض ياولاد .
هانى: ويخليك لنا يابابا ياحبيبى انت وماما يارب ... ومشى علشان يصالح اخته راح لحد اوضتها خبط ودخل .
هانى: الجميل لسه زعلان صح .
مايسة مسحت دموعها: انا بحب وائل اوى ياهانى .

هانى: انا عارف والله ياقلب اخوكى بس بصراحة الواد ده خنيق ودمة تقيل اوى على قلبى بس علشان خاطرك انتى بس نديلة فرصة تانية .
مايسة: بجد ياهانى .
هانى وباس راسها بحنان: بجد ياحبيبتى مايسة انتى اختى الوحيدة وابقى فرحان لفرحك .
مايسة: طب ادعيلى والبنى ياهانى انا عارفة ان مافيش اطيب من قلبك اللى مافيش زية .
هانى بحنان: ربنا يسهل يامايسة واللى فية الخير ربنا يقدمة .

فى قصر المنصورى
كانت ندى اخدت موبايلها علشان تكلم حازم .اول ماشاف رقمها رد عليها بسرعة .
حازم: ازيك ياندوش ياحبيبتى .
ندى: الحمد لله ياحازم انا كويسة ازيك انت وحشتنى اوى اوى .
حازم: وانتى كمان والله ياقلب حازم .
ندى: طمنى على دراعك عامل اية دلوقتى .
حازم: هاكون عامل ازاى يعنى ياندى اخوك منه لله مفترى كسرلى دراعى وادينى متجبس اهوة .
ندى: معلش ياحازم حقك عليا انا اللى حطتيك فى الموقف دة .
حازم: كله يهون علشان خاطر عيونك ياجميل ... سكت شوية وبعدين كمل: ندوش عاوز اقولك حاجه .
ندى:قول حبيبى .

حازم: اممممممممم ايه رايك يعنى لو اتجوزنا عرفى .
ندى من صدمتها معرفتش ترد او حتى تتكلم .
حازم: اية يا حبيبتى روحتى فين .
ندى: انت بتتكلم بجد ولا بتهزر يعنى اللى سمعتة منك دلوقتى صحيح انت عاوز تتجوزنى عرفى وتحطنى قدام الامر الواقع طب واهلى .
حازم: ندى انا بحبك وعاوزك جنبى النهاردة قبل بكرة ياترى انتى عندك حل تانى .
ندى: اه طبعا ليا انت ليه ماتجيش وتتطلبنى رسمى من بابا واخويا ونتجوز قدام الناس كلها .

حازم بتفكير: ايوة ياحبيبتى بس اخوكى مش بيطقنى دة حتى لما حبيت اغيظة وحطيت ايدى على كتفك بس كسرلى دراعى فما بالك بقى لو جيت واتقدمت لك رسمى هايعمل فيا اية بصى ياندى مافيش قدامنا غير الحل دة موقتا وساعتها اهلك مش هايقدروا يعملوا اية حاجه غير انهم يوافقوا على جوزانا ساعتها بس هاتجوزك رسمى .
ندى: بس انا بقى معترضة على المبدأ نفسة ياحازم انا مش هاقبل انى احط وشهم فى الارض بسبب قرار جنونى ومتسرع مش هاقبل ان اخويا وبابا يبقوا مطاطين راسهم لازم تبقى كل حاجه فى النور مش فى الضلمة كأننا حرامية بنعمل حاجه واحنا عارفين انها غلط .
حازم بزهق: بقولك اية ياندى اذا لقيتى حل تانى ابقى بلغينى بيه سلام بقى ياقلبى .
قفل معاها التليفون وفضلت ندى تعيط وتبكى طول الليل وخايفة ان حازم يضيع من ايديها .

تانى يوم جاسم نزل من شغلة وقرر فى فترة الراحة دى يقابل اصاحبة فى كفتريا جنب الشغل فجأة لمح داليا ماشية مع واحد ولما شافها جن جنونة ساب اصاحبة وقام بسرعة يلحقها راح لحد عندهم وكان بيبص لداليا نظرات حارقة كفيلة انها تترعب منه وكان بيبص اللى ماشى معاها وهو هياكله بأسنانة وبصوت كلة غضب .
جاسم: مين ده ياداليا ؟
داليا بارتباك: دة دة دة شريف ابن خالتى .
جاسم: اه قولتلى ابن خالتك بس انا بقى مايهمنيش ابن خالتك دة .

شريف بضيق: لابقى سورى لو سمحت حاسب على كلامك وبعدين مين سيادتك علشان تكلمنى باللهجة دى وبالاسلوب دة .
جاسم بتريقة: المفروض انا اللى اسالك السؤال دة وبما انك ابن خالتها فبأى حق تمشى مع واحدة وانت عارف انها مخطوبة وبتحب خطيبها .
شريف بتريقة مماثلة: اه قولتلى انت بقى تبقى خطيب داليا مش كدة بس تصدق انا خوفت منك الصراحة ههههههههههه.
جاسم بعصبية:انت بتضحك على اية ها شايفنى اراجوز قدامك مثلا .

شريف بص لجاسم من فوق لتحت: لاطبعا لاسمح الله ... سكت شوية وبص لداليا وكمل كلامة: بس الصراحة ياداليا انتى ذوقك وحش اوى بقى بتسيبنى وتروحى لدة ...وشاور بايدة على جاسم فما كان من جاسم غير انه لوى دراع شريف وكان هايكسرها بس افتكر لما حصل نفس الموقف مع حازم وكان شريف بيتوجع اوى من قبضه جاسم على ايدة .
شريف: اه سيب ايدى يامتوحش .
جاسم: ماشى انا مستعد اسيبك فى حالة واحدة بس بانك تبعد عن داليا نهائى ومالكيش دعوة بيها ولو فكرت مجرد التفكير انك تيجى جنبها تانى مش هايحصلك كويس مفهوم.
شريف: بس انا ابقى ابن خالتها .
جاسم: وانا خطبيها وحبيبها واتفضل بقى اتكل على الله من هنا .
شريف: طب سيب ايدى وانا هامشى .

وفعلا جاسم ارخى ايدة من على دراع شريف وسابة ومشى وجاسم التفت لداليا وعينه بطق شرار
جاسم: ممكن افهم بقى ازاى تخرجى مع الواد دة وبعدين تعاليلى هنا شريف دة شغال اية ولا وظيفته اية بالظبط .
داليا: يبقى ياسيدى كابتن طيار وله اصحاب واحد اسمة هانى وواحد اسمة مجد وبعدين حبيبى انت بتغير عليا من ابن خالتى حبيبى شريف بالنسبة ليا ابن خالتى وزى اخويا مش اكتر ولااقل .
جاسم: كان المفروض تستاذنى الاول من باباكى اوحتى منى قبل ماتروحى معاة فى اى حته وبعدين لما هو زى اخوكى ماشية معاة لية .

داليا: ابدا ياقلبى هو كان عندنا من شوية وانا كنت نازلة اعمل شوية شوبنج واجيب لبس وهدوم ليا وهو اصر عليا انه يروح معايا بس ادى كل الحكاية .
جاسم بحدة: بصى بقى ياداليا لو شوفتك بتكلمية تانى او ماشية معاة اعتبرى خطوبتنا مفسوخة تمام .
داليا بخبث: لا طبعا حبيبى وهو انا اقدر برضة على زعلك حقك عليا ...وباستة من خدة وكملت: ها لسه زعلان ؟
جاسم بمكر: يعنى لسة شوية .
داليا قربت ورجعت باستة من شفايفة: اظن كدة اتصالحنا .
جاسم بصلها: ثبتينى انا عارف على العموم خلاص شوفى بقى كنتى عاوزة تيجبى اية وانا اجيبهولك .
داليا بأببتسامة نصر: حبيبى ياجاسم ربنا يخليك ليا... وركبت معاة العربية واخدها لأكبر مول تجارى وراح جاب لها هدوم كتيرة ودفع حسابهم ورجعها الفيلا بعد مااطمن عليها واول مادخلت كان ابوها فى انتظارها .

محمود بعصبية: مالسة بدرى ياهانم تقدرى تفهمنى كنتى فين لحد دلوقتى ؟
داليا: كنت مع جاسم يابابى .
محمود باستغراب: انتى يابنتى مش كنتى نازلة الصبح مع شريف رجعتى مع جاسم ازاى ؟
داليا: لا دى حكاية طويلة اوى بص ياسيدى ... وقعدت وحكت لابوها كل اللى حصل وكملت كلامها:شوفت بقى يابابى جاسم جابلى هدوم قد اية مش قلتلك انة اكبر كنز ومش ممكن افرط فية .
محمود: والله لو شاطرة وقدرتى تخلية على الحديدة مافيش مانع .
داليا بخبث: لا من الناحية دى اطمن يابابى انا هافضل وراه لحد ماافلسة واخلية يقول حقى برقبتى علشان مش ينافسك فى السوق تانى بس الصبر .

فى شركة جاسم المنصورى كان جاسم رجع علشان يكمل شغلة بعد الاستراحة دخل مكتبة وبعدها بشوية دخل امجد الشركة وراح على مكتب جاسم .
امجد: ازيك ياجاسم معلش اعذرنى اتاخرت شوية كنت مشغول .
جاسم: ولايهمك ياامجد المهم طمنى مافيش اخبار جديدة ؟
امجد: للاسف ياجاسم فى شركة من اللى بنتعامل معاهم لغت اتفاقها معنا .
جاسم: لية بقى دة احنا لنا وزننا فى السوق لية تلغى اتفاقها معنا واحنا عمرنا مابنقصر مع حد وتحديدا مع الشركة دى .
امجد: اللى سمعتة منهم قال اية ياسيدى اننا مش بنوفى بالتزامتنا معاهم دة غير الطلبية بتاعة اللحوم بيقولوا انها اتاخرت فاضطروا يلغوا الاتفاق الموقع مابين الشركتين شركتنا وشركتهم .
جاسم: طب خد ابعت لهم الفاكس دة حالا .
امجد: فية اية الفاكس دة ياترى؟

جاسم: فية انى بعت لهم اعتذار رسمى لهم وبعت لهم الطلبية اللى كانوا عاوزينها واظن كدة معدش لهم حجة يلا قبل ما ياخدوا اى اجراء ضدنا .
امجد: بس كل دة بسبب الشرط الجزائى اللى هما حطوة .
جاسم: معلش كل شركة ولها شروطها يلا ابعت لهم الفاكس دة حالا .
امجد: طول عمرى اقول انك ذكى وبتعرف تماشى امورك حاضر ياسيدى امرك...وفعلا امجد بعت الفاكس بسرعة وكان رد الشركة المنافسة بانهم تراجعوا عن الغاء القرار الصادر ضد شركة جاسم بسبب تاخر الطلبية ونجح جاسم انه ينقذ مايمكن انقاذة .

امجد: برافووو عليك ياكبير .
جاسم: امجد انا جاسم المنصورى يعنى مش اى كلام ولسة ماتخلقش اللى يقدر يلوى دراعى بالغصب او يقف ضدى .
امجد: ربنا يصلح الحال ويهديك .

خلصت حلقتنا بس ياترى اية اللى مخبياة الايام من ناحية ابطالنا ياترى الامور هاتبقى فى صالحهم ولا هاتبقى ضدهم تابعونى

الفصل التالي
جميع الفصول
الآراء والتعليقات على الرواية