قصص و روايات - قصص رومانسية :

رواية قصة عشق الجزء الثاني للكاتبة سحر فرج الفصل الأول

رواية قصة عشق الجزء الثاني للكاتبة سحر فرج كاملة

رواية قصة عشق الجزء الثاني للكاتبة سحر فرج الفصل الأول

النور شقشق وطلع النهار على العرسان بعد ما قضوا ليله جميله والحاج صفوان والحاجه انعام زى عاويدهم كانوا صحيوا من بدرى وخدوا بعضهم وخرجوا من اوضتهم ونزلوا على تحت واول لما نزلوا اتصدموا لما شافوا عدى وفهد كل واحد فيهم نايم على كنبه والأنيل انهم لسه بالبدل بتاعه فرحهم .
الحاج صفوان بص للحاجه انعام وقال .. البلاوى دى بتعمل ايه هنا فى وقت زى ده وايه القرف اللى حواليهم فى كل حته ده وكمان باللبس الفرح .

الحاجه انعام بصدمه ردت وقالت .. العلم علمك يا حاج .. وقربت من الشباب وبدات تصحيهم بس ما قدرتش تصحيهم من كتر التعب اللى كانوا هما فيه من الشرب .
الحاج صفوان بكل عصبيه قرب هو منهم وبعكازه بدا ينغز فيهم جامد لحد لما صحيوا وفتحوا عيونهم بالعافيه وبصوا لبعض .
عدى باستغراب هرش فى راسه و بص لفهد وقال
انت مين ياض.

فهد بصله هو كمان باستغراب اكتر وقال انت اللى مين يااااض .
وكل ده والحاجه انعام واقفه بتتفرج عليهم هما الاتنين .
الحاج صفوان بصوت عالى و بكل غضب رفع عكازة عليهم وقال .. انتم كمان لسه هاتتعرفوا على بعض اودااااامى ليله صباحيتكم يا بهايم والله لا اموتكم ليليتكم سودا منى منك ليه .
ولسه هايقرب منهم ويضربهم بالعكاز الا جرى عدى بسرعه ووراه فهد على طول زى الصاروووووووخ .
عدى بخوف بص لفهد وقال .. اجرى يا فهد بسرعه.

فهد حاول يفوق نفسه ودعك فى عينه جامد ورد وقال .. الله يخرب بيتك يا عدى ده النهار طلع وقعتك سودا ملك هاتقول عليا ايه دلوقتى وجرى بسرعه ورا عدى .
الحاج صفوان بصوات عالى وبعصبيه قال .. خد ياض خد ياااااض منك لييييييييييه والله هاموتك منك ليه .
والله لا هاطلع عينكم .. والله لا هاطخكم بالسلاح النهارده ويكون موتكم على يدى يا بهايم .. تعال ياض منك ليه هنا انا مش بنده عليكم ولا ايه ؟
الحاجه انعام بخوف على صحه الحاج صفوان لما شفته كده قربت منه وبحنيه قالت ... اهدى يا حاج واستهدى بالله وحياتى عندك .. وهما هايجوا اودامك اهو بس انت اهدى كدة واقعد لا تقع منينا بسبب شويه عيال مجانين .

الحاج صفوان بغضب وبدا ينهج جامد من الصوت العالى والنرفزه من عدى وفهد فارد على الحاجه انعام وقال ... هما فعلا طلعوا شويه عيال ومكنش ينفع انى اجوزهم من البنات .. انا اتاكدت دلوقتى انهم مش رجاله ولا يعرفه حاجه عنها وطلعوا عيال ... علشان ينزلوا يشربوا القرف اللى كان معاهم ده ويسيبوا عرايسهم فى ليله دخلتهم لوحدهم .
وينكدوا عليهم فى ليله زى دى .

الحاجه انعام بحزن هى كمان ردت وقالت .. تعال يا زفت منك ليه هنا وكلموا جدكم واطلبوا منه انه يسامحكم .. هم ياض منك ليه .
الشباب من كتر خوفهم لما شافوا الحاج صفوان بيزعق كده لاول مرة ليهم وشافوه منظره وغضبه .. جم بسرعه وهما مكسوفين من اللى عملوه ووقفوا اودام الحاج صفوان اللى كان متعصب اوى .
وقالوا بكل خوف ورعب .. نعم يا جددددى .
كل اللى كان فى السرايه كان صحى على صوت الحاج صفوان وهو بيزعق ليهم واتخضوا وخافوا لا يكون حد حصله حاجه من اللى فى البيت او تكون الحاجه انعام تعبانه . .

صلاح وحسين وعصام وكمان حريمهم خرجوا من اوضهم بسرعه وبدؤا يسألوا بعض فى ايه ؟ وايه اللى بيحصل ده والحاج صفوان صوته عالى كده ليه ؟ ونزلوا جرى على تحت علشان يشوفوا ايه اللى بيحصل على الصبح كده وابوهم بيزعق ليه بالمنظر ده .
قصى وسليم وكمان فارس كانوا صحيوا على صوت الحاج صفوان وزعيقه .
فالبسوه هدومهم وخرجوا من اوضهم بسرعه وسألوا بعض عن اللى بيحصل ومحدش فيهم كان عارف .

وسمعوا صوت جرى عمامهم على تحت بسرعه .. فاستغربوا وخافوا اكتر وتوقعوا ان فيه نصيبه حصلت فاجريوا هما كمان ونزلوا على تحت على طووول .
واول لما الكل نزل اتصدموا لما شافوا عدى وفهد لسه لابسين البدل بتاعه فرحهم وشكلهم متبهدل وواقفين زى العيال الصغيرة اودام الحاج صفوان وشكلهم عامل مصيبه كبيرة .
فقربوا منهم وبصول ليهم باستغراب وعيونهم جت على الكوبيات والازايز اللى كانت على الارض وتوقعوا هما هببوا ايه .
وقضوا ليله دخلتهم فين .. وعرفوا سبب زعيق جدهم صفوان بالمنظر ده .
قصى بص لجده وقال .. خير يا جدى العيال دى هببت ايه ومزعلينك كده ليه على الصبح ؟

الحاج صفوان خد نفس كبير علشان يهدا ويقدر يتنفس ورد وقال .. البلاوى .. البهايم .. اللى مش متربين .. اللى المفروض تكون صباحيتهم النهارده وكان فرحهم و دخلتهم امبارح .. نزلت دلوقتى انا وجدتكم ولاقينا كل واحد فيهم مخمود على كنبه ببدلة فرحه لسه .. والمصيبة السودا البلاوى اللى شربوها هنا فى السرايه ! .
اناااااا ؟ انا سرايه الحاج صفوان السيوفى اللى حج بيت ربنا يتشرب فيها القرف ده .. حسبى الله ونعم الوكيل فيك يا عدى انت وفهد .. يا خساره تربيتى فيكم .
وقام وقف وبكل غضب بص لعدى وفهد و قال ..

جبتم الحاجات دى منين ياض منك ليه .. جبتوها منين انطقوا بدل ما اموتكم دلوقتى اودام الكل .
صلاح راح جنب ابوه ومسك ايده وقال .. اهدى يا ابوى علشان خاطرى .. صحتك مش اد الزعيق ده كله ..وحياتى يا ابوى ابوس ايدك هما عيال ناقصين تربيه متزعلش نفسك .

سليم بخوف على منظر جده هو كمان قال .. معلش يا جدى شويه عيال وغلطوا وهما اكيد ميقصدوش اللى هما هببوه ده .
عدى بخوف رد وقال .. اه والله يا جدى .. احنا قولنا دى ليله فرحنا والشباب بتعمل كده كلها وقلنا نهيص ونشرب بوق واحد بس وبعدها كل واحد هايطلع على اوضته ويروح لعروسته على طول .
فهد بخوف هو كمان رد وقال .. معلش يا جدى حقك عليا .. والله انا كنت فى اوضتى مع عروستى وزفت الطين اللى اسمه عدى ده هو اللى جه وخدنى لتحت وشربنا .. وانا ولا كان فى دماغى اشرب اى حاجه من كل ده .

عدى بصدمه لما سمع فهد بيقول كده عليه رد وقال .. يا سلام ده على اساس انك لسه نغه صغير وانا ضربتك على ايدك وشربتك الحاجه الاصفره دى بالعافيه يا سى فهد .. انت عاوز تطلع منها وتلبسهالى لوحدى ولا ايه .
عصام بكل غضب قرب من عدى ولسه كان عاوز يمسكه يضربه لولا حسين وصلاح مسكوه وقال.. اخرس يا زفت الطين انت خالص بدل ما امسكك دلوقتى واطلع عينك واطلع عليك القديم والجديد علشان انا قرفت منك ومن المصايب بتاعتك ... كل اللى هببته ده وليك عين تتكلم كمان يا بايظ انت .

عدى بهبله اللى اتعودنا عليه رد وقال .. هو كان حصل ايه بس يا ابوى .. انا قولت انا عريس وهاهيص شويه علشان اعرف احكى الحواديت كويس لهدى .
الكل اتفاجاه بكلام عدى وفجاه اتفتحوا كلهم فى الضحك على كلامه ده الا الحاج صفوان اللى قام وقف ومسك العكاز وكان عاوز يضربه بيه وقال .. حواديت .. حواديت ايه يا بايظ يا فاشل يا اهبل انت يا قليل الربايه يا معفن .. دقنى اهى لو عرفت تحكى حاجه لحد .

وبعدين انت ملكش عندى عروسه ولا انت ولا البقف اللى واقف جنبك ده ... انا هاربيكم من الاول انت وهو .. واعتبروا نفسكم متجوزتوش لسه سامع انت وهو ولا مش سامع ... لما تكبروا وتعقلوا كده وتبقوا رجاله عاقله .. يبقى ساعتها افكر ان ليكم بنات عندى .. لكن بمنظركم ده والمصيبه الى عملتوها دى ... ملكوش عندى بنات واااااصل .

الحاجه انعام .. معلش يا حاج علشان خاطرى انا .. تسامحهم المرة دى وهما مش هايعملوها تانى .. وهايتعلموا الادب وهايحلفوا ما يشربوا القرف ده تانى .
الحاج صفوان رد وقال .. لا يا حاجه .. سامحينى انا مش هاقدر .. لازم اعاقبهم على عملتهم السوده دى ويعرفوا ان الله حق .. وهاربيهم من الاول وجديد لانى عرفت النهارده انى معرفتش اربيهم .
عدى انت بتتكلم جد يا جدى .

ولا بتهزر معانا ؟ ولا يمكن دى اشتغاله وبتهزروا معانا صح قول انكم بتهزروا قول يا جدى انك بتهزر اما انت عليك حركات يا صفوان
قصى بعصبيه .. ما تتلم يا حيوان انت واحترم نفسك شويه .
الحاج صفوان بصله بغيظ ورد وقال .. بتكلم جد يا اهطل انت مش بتفهم ولا ايه ياض انت ؟ ولا تحب اقوم افهمك بمعرفتى ؟
عدى وفهد اتصدموا من القرار ده وبصوا لبعض وفهد قال .. عجبك كده يا وش الفقر انت .. انت السبب ربنا يخدك .

عدى ... انا وش فقر يا بوز الغراب انت .. ما انا قولتلك بوق واحد ونطلع اوضنا علشان هدى سايبها لوحدها وانت ما صدقت كراره واتفتحت لحد ما اتصطلنا وخلصنا كذا ازازة
فهد بغيظ .. انا برضه ده انت كداب اوى يا شيخ .
الحاجه انعام .. جرى ايه ياض منك ليه.. انتم بتتعاتبوا فى ايه يالا كل واحد يطلع على اوضته ومشفش وش حد فيكم .. زمان الناس جايه علشان يهنوا ويباركوا للعرسان فى الصباحيه .

عدى بص لفهد بغيظ وفهد كذلك بصله بكل عصبيه وبتوعد ولسه عدى وفهد هايطلعوا على فوق الا وسمعوا ...
الحاج صفوان بصوت عالى وغضب بيقول .. اقف يا زفت عندك انت وهو .. مفيش نوم فى السرايه من هنا ورايح غير لما اربيكم الاول .
عدى وفهد بصوا لبعض باستغراب ووقفوا مكانهم وقالوا .. اومال هنام فين يا جدى!
الحاج صفوان رد وقال .. عندكم الزريبه تناموا فيها من النهارده علشان تعرفوا تحكوا حواديت كويس مع البهايم .. يااا بهايم .

كل اللى كانوا موجودين اتصدموا تانى من قرار الحاج صفوان ده وبالذات عدى وفهد اللى الصدمه لجمتهم ومقدروش ينطقوا ولا يقولوا بم حتى .. وخدوا بعضهم وخرجوا على بره فى الجنينه .
واول لما خرجوا الحاجه انعام بصت لجوزها وقالت .. حرام عليك كده يا حاج ... شباب وغلطت وماتوصلش انهم يناموا فى الزريبه مع البهايم .. انت قلبك كبير سامحهم المرة دى .

صلاح هو اللى رد عليها وقال .. الحاج صفوان عنده حق يا حاجه .. العيال دى عاوزة تتعلم الادب من اول وجديد .. مش كفايه حسرة البنات وزعلهم ونومهم لوحدهم من غير عرسانهم ليله دخلتهم .
وبص لفاتن مراته وقال .. اطلعى يا فاتن ينوبك صواب وشوفى البنات واطمنوا عليهم زمانهم زعلانين اوى .
وفعلا فاتن بحزن خدت بعضها وطلعت على فوق علشان تطمن على البنات .

الحاجه انعام بصت لقصى وسليم وفارس وابتسمت وقالت .. صباحيه مباركه يا عرسان يا زينه الشباب .. معلش العيال العفشه دى واللى هببوه نسونى اقولكم صباحيه مباركه يا حابيبى .
سليم راح بكل حب وحنيه وحضن جدته وقال .. الله يبارك فيكى يا جدتى .. ربنا يخليكى لينا وما نتحرمش منك ابدا .
قصى قرب هو كمان وباس ايديها وباس راسها وبعدها حضنها وقال .. الله يبارك فيها يا روح قلبى ربنا يخليكى لينا ويطول لنا فى عمرك .
فارس قرب وحضنها وباس ايديها وقال .. الله يبارك فيكى يا جدتى وربنا يخليكى لينا يارب .
انتى وجدى .

الحاجه انعام بحب وعيون فرحانه بيهم ردت وقالت .. يالا يا حبيبى انت وهو كفايه عليكم كده .. ومعلش صوت جدكم وزعقيه مع البهيم عدى وفهد صحاكوا ونزلكوا على ملى وشكم .. اطلعوا على اوضكم زمان البنات قلقانه عليكم ومش عارفين ينزلوا .. واستريحوا و فوقوا كده كلكم والفطار هايطلع لحد عندكم فى اوضكم .
قصى .. لا يا جدتى هانزل كلنا ونفطر مع بعضنا زى كل يوم .. حد يطول يلاقى لمه عيله زى دى والحب ده ويقول ليها لا .
الحاجه انعام .. ما اتحرمش منكم يا قلب جدتك وربنا يفرحكم ويسعدكم .. وبعدها الشباب خدوا بعضهم كلهم وطلعوا على فوق وكل واحد راح على اوضته وقفل الباب وراه .

فاتن كانت طلعت زى ما طلب منها صلاح ودخلت الاول على الاوضه بتاعه ملك علشان تطمن عليها .. بس اول لما دخلت اتصدمت لما لقيتها نايمه على السرير بفستان فرحها .. فاصعبت عليها اوى وقعدت جنبها وبدات تصحيها بشويش .. ملك ملك يا حبيبتى .. فوقى يا قلب امك انا عارفه كل ده كان مكتوبلك فين بس يا حبيبتى .. فوقى يا حبيبه قلبى .
ملك بدات تفوق وتفتح عنيها وقالت .. ايه بس يا ماما عاوزة انام اصل ما نمتش طول الليل .
كنت مستنيه !

وفجاه افتكرت ان امبارح كان يوم دخلتها هى وفهد وافتكرت لما دخلوا الاوضه وقفلوا الباب وشويه وعدى خبط عليهم وفهد استاذن منها ونزل معاه وفضلت كتير مستنياه لحد ما راحت فى النوم بفستان فرحها ودمعتها على خدها .. وبصت لأمها بذهول وقالت ... هو فهد فين وليه مجاش بات معايا يا ماما ؟ مش انا وهو اتجوزنا والمفروض ننام مع بعض فى اوضه واحده وامبارح كان فرحنا ودخلتنا .. وبدموع بصت لامها وقالت .. اوعى يكون فهد رجع فى كلامه يا ماما اوعى وحياتى عندك يكون مش عاوزنى وجدى غصب عليه يتجوزنى .

فاتن صعبت عليها بنتها وكسرة قلبها فى ليله زى كده وقالت .. اهدى يا حبيبتى اهدى محصلش اى حاجه هو بس فضل سهران مع عدى لحد الصبح وجدك وجدتك لقوهم نايمين تحت على الكنب وزعق ليهم وطردهم من السرايه وقرر يعاقبهم وانهم يناموا من النهارده فى الزريبه مع البهايم علشان اللى هببوه امبارح وبالذات معاكى انتى وهدى .
ملك بصدمه انتى بتقولى ايه ...

وقبل ما ملك تتكلم كانت دخلت الحاجه انعام علشان تطمن عليها هى كمان وقربت منها وقالت .. صباح الخير يا ملك يا بتى . وانا عارفه انك زعلانه وجيت اقولك حقك عليا انا يا نور عينى وقربت منها وخدتها فى حضنها وبصت لها وقالت .. احب اقولك ان جدك خد لكم طاركم من البلاوى دى وهايعلمهم الادب من اول وجديد .
قومى يا حبيبتى وغيرى فستانك ده وامك معاكى اهى هاتساعدك وانا هاروح اشوف هدى اللى قاعده لوحدها من امبارح هى كمان واخدها فى حضنى والله يكون فى عونكم يا حبايبى .

فاتن .. خليكى يا حاجه وانا اروح لها بنفسى دى هدى بنتى برضه زيها زى ملك بالضبط وانتى عارفه انا بعزها اد ايه .
الحاجه انعام .. لا يا فاتن انا اللى هاروح لها يا حبيبتى وخليكى مع ملك انتى هى محتجاكى دلوقتى تكونى جنبها .
فاتن .. اللى تشوفيه يا حاجه .. وانا هاخلص مع ملك واروح لها على طوووول .
وفعلا قامت الحاجه انعام وخرجت من الاوضه وقفلت وراها وراحت لاوضه هدى اللى كانت اوضتها جنب ملك على طول وفتحت الباب ودخلت وقفلت وراها .

واول لما دخلت صعبت عليها هدى اوى اول لما شافتها نايمه على الكرسى بفستان فرحها .. فقربت منها وفضلت تبص ليها وفى ملامحها البريئه ودموعها غصب عنها نزلت وقالت .. واخده نفس ملامح امك يا حبيبتى وانتى نايمه والظاهر كمان هايكون حظك زيها بالضبط .. ومدت ايديها على شعرها برقه وقالت .. امك وحشتنى اوى يا هدى .. كان نفسى تكون موجوده فى يوم زى ده وتفرح بيكى وبأخوكى سليم كان زمانها فرحانه اوى اوى يا حبيبتى .

هدى من صوت جدتها ولمسه ايديها لشعرها فتحت عنيها بشويش واستغربت وجود جدتها انعام اودمها وعدلت نفسها وقعدت وقالت .. جدتى .. انتى بتعيطى ليه .. فى حد حصله حاجه ولا ايه وفى لحظه افتكرت اللى حصل معاها امبارح وخروج عدى من الاوضه وبصت على نفسها ولقت نفسها لسه بالفستان بتاع الفرح .
جدتى فى ايه متخوفنيش وفين عدى مرجعش من امبارح زى ما وعدنى ليه .

الحاجه انعام مسحت دموعها وبكل حنيه شدت هدى لحضنها وقالت .. متخافيش يا قلب جدتك من جوه .. كلنا بخير وعدى كمان بخير .. كل الحكايه ان ...
وبدات تحكى لهدى على كل اللى حصل وعلى عقاب الحاج صفوان ليهم هما الاتنين .
هدى بغيظ ردت وقالت .. بقى كده يا جدتى .. عدى وفهد عملوا كده .. ماشى .. ماشى يا عدى .. انا هاوريك هدى هاتعمل فيك ايه .
علشان تبقى تسيبنى فى ليله زى كده ابات فيها لوحدى وتنزل تشرب القرف اللى انتم شربتوه ده .. وحياتك عندى يا عدى لاهوريك مين هى هدى .

الحاجه انعام ردت وقالت .. جدعه يا هدى يا بتى .. انا خوفت لا تزعلى وما يعجبكيش حكم جدك وعقابه ليهم .. بس طلعتى جدعه وقويه زى جدتك انعام وانا اللى بقولك اهو .. عدى ده لازم يتربى من اول وجديد وانا اهو اللى بقولك الواد ده مش هايتربى غير على ايدك انتى فاهمه يا هدى .. اوعى تضعفى اودامى ويضحك عليكى بكلمتين وتسامحيه بسهوله .. طلعى عينه الاول علشان يعرف قيمتك ويعرف انه غلط لما سابك فى يوم زى ده .

هدى .. متخافيش عليا يا جدتى .. انا الجرح اللى جرحه ليا فى الليله دى .. عمرى ما هاقدر انساه طول عمرى .. انا هاوريه مين هى هدى الجبلاوى بنت صالح ونعمه .
الحاجه انعام بحنيه ردت وقالت .. ايوا كده انا اهو اللى بقولك خدى حقك منه وعلميه الادب .. ودلوقتى يا حبيبتى قومى وغيرى فستانك وادخلى الحمام وخدى حمام دافى كده والبسى وانزلى لينا على تحت كلنا مستنينك انتى وملك علشان نفطر مع بعضنا كلنا .
هدى .. حاضر يا جدتى .. هاخلص الحمام واروح لملك اوضتها واجبها وانزل ليكم على تحت على طول .

الحاجه انعام .. اسيبك بقى يا بتى واروح استعد علشان اقابل الناس اللى هاتيجى تبارك فى الصباحيه كمان شويه .. وزمان اهل ضحى هايجولها بالصباحيه علشان يطمنوا عليها ولازم اكون فى استقبالهم .
وعلشان خاطرى يا حبيبتى .. اوعى تجيبى لحد منهم سيرة على اللى حصل من عدى وفهد امبارح فهمانى يا حبيبتى مش ناقصين فضايح من حد .
هدى خدت نفس طوييييل وقالت .. فهماكى يا جدتى متخافيش .

وقامت الحاجه انعام وخدت بعضها وفتحت الباب وخرجت من الاوضه وسابت هدى لوحدها ونزلت على تحت .
هدى قامت وقفت وراحت اودام المرايه وشافت نفسها بفستان الفرح وقالت .. ماشى يا عدى .. ماشى يا ابن خالى اما خليت ايامك الجايه كلها سودا مبقاش انااااا .
وفى الزريبه وفى وسط البهايم بعد ما الحاج صفوان طردهم من السرايه... كان قاعد عدى وفهد ومش طايقين نفسهم هما الاتنين وعمالين يتخانقوا ويرموا اللوم على بعض فى اللى حصل معاهم امبارح .

فهد .. الله يخرب بيتك يا شيخ انت السبب فى كل اللى حصل معايا ده .. انت اللى جتلى وختنى من عروستى ونزلتنى على تحت عند رفاعى .. انا كان مالى بيك وباللى كنت عاوز تعمله .. عاوز تشرب وتعمل دماغ كنت روحت انت وعملت لوحدك ومالكش دعوة بيا يا عم .. تقول عليا ملك ايه دلوقتى بعد ما سيبتها فى ليله زى كده لوحدها الله يخرب بيتك معرفتك يا شيخ .

عدى بعصبيه رد وقال .. بقولك ايه انا مش ناق مش كفايه جدك واللى عمله معانا .. هو انا كنت ضربتك على ايدك وختك بالعافيه من عروستك ... ما انت اللى سمعت كلامى ونزلت على طول معايا وروحنا لرفاعى وجبنا الازايز وشربنا لحد ما روحنا فى النوم وكنت كل لما اقولك كفايه يا فهد كده وتعال نطلع للبنات زمانهم قلقانين علينا تقولى الكاس ده وبس ونطلع على طول .. صح ولا انا بكدب .

فهد بزعيق .. انا برضه اللى قولت كده ... ما انت كمان من اول كاس شربته وقولتلك كفايه كاس واحد ويالا نطلع او انا اللى هاطلع وخليك انت وكمل شرب .. وانت اللى مسكت فيا لحد ما اتنيلنا وفضلنا نشرب لحد ما نمنا .
عدى بغيظ رد وقال .. خلاص اديك اعترفت اهو فماتقولش انا السبب ماشى يا اسطى وسيبنى بقى فى القرف اللى انا فيه .. زمان هدى بتقول عليا ايه دلوقتى انا كمان.

فهد بصله بقرف وقال .. هى هدى لوحدها . قول زمان ملك هى كمان بتقول عليا ايه انا كمان دلوقتى
عدى بص حواليه وعيونه جت على البقر والجاموس اللى موجود فى الزريبه وقال .. هو احنا فعلا هانام هنا زى ما جدى قرر مع البهايم دى وهانفضل بلبسنا ده ؟
فهد .. انا عارف يا اخويا ما انت اللى عارف جدك ودماغه والكلمه الى بيقولها مابيرجعش فيها تانى ابدا واحمد ربنا انها رسيت على كده وبس .. الدور والباقى فى البنات يا ترى هايسمحونا على اللى احنا عملناه ده ولا لاااااا .

عدى رد وقال .. هى ام الحواديت اللى عملت فينا كده .. الله يخرب بيت الحواديت وسنيننهااااااا .
وفجاه...

الفصل التالي
جميع الفصول
روايات الكاتب
روايات مشابهة
الآراء والتعليقات على الرواية
W