قصص و روايات - قصص هادفة :

حكايات منار الحكاية 21 بعنوان مترخصوش الغالي

حكايات منار بقلم منار محمود

حكايات منار الحكاية 21 بعنوان مترخصوش الغالي

 مرح وهى بتخبط على باب الحمام :ياللى جوا انتى كويسة...طيب فيكى ايه طيب...بتعيطى ليه...بصي مينفعش تفضلى تعيطى جوا كده الحمام ممكن اي حد فى البنات يدخله وانتى صوت عياطك عالى... طيب ايه رايك تخرجى وانا اوديكى مكان تعيطى فيه براحتك...يينتى هتتفضحى بعياطك ده وهيكسرو عليكى الباب ويقتحمو الحمام...اخرجى وانا هخليكى تكملي عياط والله متقلقيش ...يا..الحمد لله خرجتى

بعد ما خدتها فى حتة مستخبية في جنينة الكلية
مرح وهى بتحط ايدها على كتفها :انتى كده ضهرك للناس ووشك ليا عيطى براحتك
نيفين وهى بتحضنها وبتعيط جامد :انا تعبت والله حرام عليه هو بيعمل فيا كده ليه انا عملتله ايه غلطت فى حقه فى ايه ده انا حبيته ومتمنيتش من الدنيا غيره
مرح وهى بطبطب عليها :ميستاهلش دموعك دى ولا يستاهل حبك
نيفين :انتى تعرفى بتكلم عن مين

مرح :من غير ما اعرف مدام واجعك لدرجة انك بتعيطى بالطريقة دى في حضن واحدة متعرفيهاش يبقي ميستاهلش لا دموعك ولا حبك لو كان يستاهلهم مكنش هيوجعك مكنش هيخليهم ينزلو
نيفين وهى بتخرج من حضنها :انا اسفة
مرح :انتى بتتاسفى ليه اه علشان قلتلك انك بتعيطى في حضن واحدة متعرفيهاش يا ستى بسيطة نتعرف انا مرح
نيفين باستغراب :ها
مرح وهى بتضحك :اسمى مرح مش باين عليا ولا ايه ده انا حتى ليا نصيب كبير من اسمى ومرحة جدا ودمى زى السكر
نيفين وهى بتضحك :انتى مش معقولة بس معاكى حق انتى عسل خالص

مرح :عسل..عسل ايه انتى بتكلمى بنت اختك
احترمينى انا بكالريوس وانتى شكلك لسه ورور
نيفين باستغراب :ورور ... يعنى ايه ورور
مرح :يعنى مستجدة فرقة اولى يعنى
نيفين بانبهار :صح عرفتى منين
مرح :سهلة بتعيطى من قلبك كده بكل قوة تبقي اكيد لسه اول سنة في الكلية دى وفى الغالب ده اول خازوق تلبسيه في حياتك براءة المستجدين دى يراها اي كفيف يعنى
نيفين بحزن :اول خازوق هو انا لسه هلبس خوازيق تانية

مرح :كتيييييييير بس لو كنتى ذكية هتلبسي خوازيق مختلفة ومش هتلبسي نفس الخازوق مرتين
نيفين :مفيش حاجة اعملها علشان ملبسش في خوازيق
مرح :لا فى طبعا روحي عيشى في صحرا مفيهاش ناس بس حتى ساعتها هيطلعلك تعلب الصحرا يخزوقك فمدام كده كده هتتخزوقى خليكى وسطنا وخلاص
نيفين وهى بتضحك :اقنعتينى ..انتى بجد مرح اسم على مسمى ..هو احنا ممكن نبقي اصحاب
مرح :احنا خلاص بقينا اصحاب احكيلي بقي مين اللي بتعيطى علشانه ده
نيفين وفى دموع بتتجمع فى عينيها :مورى

مرح :مين مورى
نيفين :زميلي هنا فى الكلية
عرفتو في اول يوم ليا فى الكلية مكنش ليا اصحاب غيره انا مبعرفش اتكلم مع حد بس هو اللي جه واتكلم معايا الاول وبقينا اصحاب بعد اسبوع قالي انه بيحبنى وقلتله وانا كمان انا اصلي بصراحة كنت اتعلقت بيه وباهتمامه بيا
قضينا شهر حلوين مع بعض وانا فرحانة جدا وبعدين بدء يطلب منى نخرج بره الجامعة سوا وانا رفضت اكتر من مرة راح سابنى وارتبط بهايدى بنت معانا فى الدفعة وعمال يضايقنى بيها بينزل صور كتير ليهم عالفيس والانستا مع بعض دايما في الجامعة بيجو سوا وبيمشو سوا
وانا لوحدى انا معرفش حد غيره في الكلية

ومن شوية كان جايبلها بوكيه ورد كبير اداهولها قدام كل الدفعة وانا لقتنى مش قادرة اتحمل وجريت عالحمام اعيط
مرح :ده عيل نايتى وملزق ميستاهلش ولا دمعة من عيونك
ده اخره انك تعيطى من ندمك انك عرفتى عيل زيه في يوم من الايام انما تعيطى علشانه لا صدقينى ميستاهلش
كمان سؤال بقي سى مورى ده اسمه الحقيقي ايه
نيفين :مراد
مرح :لا حلو اسم مراد وتحسيه اسم راجل كده
هو لايق عليه مورى فعلا

المهم انا عايزاكى تطلعى مورى ده من دماغك خالص انتى بقي عندك صاحبة اهو وعايزاكى كمان تحاولي تتعرفي علي البنات اللي حواليكى وان شاء الله تكونى معاهم صداقات
بس انا عايزة اعرف انتى رفضتى تخرجى معاه ليه
نيفين :علشان دى خيانة لثقة اهلي فيا
مرح :وارتباطك بيه مش خيانة لثقتهم
انتى عملتي الصح لما رفضتى تخرجى معاه عايزاكى تعملى الصح كله بقي وتعرفي ان مفيش حاجة اسمها ارتباط دى خيانة لربنا ولثقة اهلك فيكى وكمان خيانة للانسان اللي هيكون جوزك واللي صدقينى مش هيكون واحد من العيال الملزقة بتاعت نرتبط دى هيكون راجل بجد هيغليكى ويجيلك لحد البيت مترخصيش انتى نفسك علشان عيال متستاهلش.

اتفقنا
نيفين بابتسامة :اتفقنا ..هو ..هو انا ممكن اخد رقمك
مرح :ممكن طبعا كلمينى بعد اتناشر بالليل برد عادى
نيفين وهى بتضحك :بسهولة كده
مرح :يبنتى انا جاية فى اي مصلحة
احمدى ربنا ان دكتور محمد مجاش النهاردة
نيفين :ليه
مرح :علشان لو كان جه كان زمانى قاعدة هموت من الملل في محاضرته وكان زمانك لسه قلباها مناحة في الحمام
نيفين وهى بتضحك :لا الحمد لله انه مجاش
علشان اتعرف عليكى انا سعيدة بمعرفتك
مرح :وانا كمان سعيدة بمعرفتك يا نيفين
نيفين :ممكن اسالك سؤال
مرح :اتفضلى

نيفين :هو انتى ليه اسمك مرح انا اول مرة في حياتى اسمع الاسم ده
مرح :امى ومرات عمى خلفونى انا وبنت عمى في نفس اليوم وبابا كان عايز يسمينا اسامى تؤم عمى سمى بنته فرح فبابا سمانى مرح
نيفين :لا بس اسمك حلو اوى بجد
مرح :لا ومختلف تقريبا انا الوحيدة في مصر اللى اسمى كده انا عمرى مقابلت واحدة بنفس اسمى
نيفين :مش بس اسمك وشخصيتك كمان انا عمرى مقابلت حد زيك كده
مرح :علشان تعرفى ان ربنا بيحبك وعلشان كده وقعنى في طريقك

نيفين :احلى وقعة دى ولا ايه
انا للاسف لازم ارجع احضر المحاضرة التانية مينفعش افوتها زى الاولى
مرح :انتى فوتى محاضرة علشان مورى
اخص عليكى ميستاهلش يبنتى ميستاهلش
طيب فوتيها علشان نايمة علشان تروحى تاكلي انما علشان مورى خسارة فيه
نيفين بابتسامة :اخر مرة اعملها
مرح :وعد
نيفين :وعد

فى بيت جمال عم مرح
مرح :اخوكى ده ياما واقع على دماغه وهو صغير ياما واقع علي دماغه وهو صغير
بقي والدتك تكلمه انها تخطبله ميريهان بنت خالتك جميلة جميلات عيلتكم فاتنة العصر الحديث الموزة اللي تقفيل لبنانى دى ويرفض يبنتى دى رقيقة رقة مشفتهاش على حد ده انا بحسها زى ما تكون علبة بيتيفور ده انا بخاف اسلم عليها جامد لايديها تطلع فى ايدى ولا حاجة
اخوكى الجاحد ده اتجرأ وقال لا لعلبة البيتيفور دى
ده المفروض يتجلد في ميدان عام علشان يبقي عبرة لمن لا يعتبر
فرح وهى بتضحك :خلاص كفاية يا مرح مش قادرة بطنى وجعتنى من كتر الضحك

وبعدين ماما كانت بس بتجس نبضه
مرح :وهو ده عنده قلب علشان يبقاله نبض ده مبيحسش ده رفض ميريهان ميريهااااااااااان
ده هيشرب الندم كاسات كاسات بعد كده على اللي عمله ده
فرح وهى بتضحك :يستى يمكن عينه علي حد تانى
مرح :وهو ده عنده نظر علشان يحط عينه علي حد تانى
ده ضيع فرصة عمره

فرح :مش للدرجة دى يا مرح زياد وميريهان عمر ما كان في بينهم توافق ومش الشكل بس اللى مهم الله يخربيت كده هتبورينا
مرح :مين دى اللي تبور فشر ده انتى ست البنات يا فرح ويا سعده يا هناه اللى هياخدك مننا
فرح :تسلميلي يا قلبي وانتى كمان زى القمر والف من يتمناكى
مرح : يظهر واحد من الالف دول بدل ما العملية ناشفة كده
فرح وهى بتضحك :بكرة العملية تبقي طرية يا ختى
مرح :ادينا مستنين

روحى اعمللنا القهوة بقي من ايدك الحلوة دى وانا هفتح نت علي ما تيجى
فرح :من عينيا حاضر

مرح وهى بتشوف رسايل جايالها على الماسينجر
لقت زياد باعتلها رسالة
زياد : انا واقع على دماغى وانا صغير يام لسان عايز قطعه
مرح :الله مش بتتطبطر عالنعمة
كمان انت مش هتبطل تلمع اوكر بقي انت كبرت عالحركات دى
زياد :نعمة للي عايزها للي هى نصيبه.

كمان مش محتاج المع اوكر انتو بتتكلمو في البلكونة وانتى صوتك يسمع اللي في المريخ مش بس يسمعنى وانا في اوضتى اللي جنب اوضتكم
مرح :للي عايزها وللي هى نصيبه ده انت عينك على واحدة تانية بقي زى ما فرح بتقول
زياد :مش عينى اللي علي واحدة تانية
قلبى اللى علي واحدة تانية
مرح :اوبااااا ابو شيماء اتهور
زياد باشا بيقول كلام رومانسي اشهد يا زمان سجل يا تاريخ
ودى مين بقي اللى قلبك عليها

زياد :مش هقولك كمان وطى صوتك انتى والحيوانة التانية مش عارف انام
مرح :مش هتقولي طب انا بقي مش بس هعلي صوتى ده انا هعمل فرح فى البلكونة وورينى هتعمل ايه
زياد :ولا يهمنى هحط سدادات فى ودانى وانام وهسيبك انتى لفضولك يقتلك
مرح :كده برضه يا زياد اهون عليك
زياد :شوفى مع انى عارف ومتاكد انك بتجرى ناعم علشان اقول بس كالعادة نجحتى لا متهونيش عليا يا مرح هقولك بس مش دلوقتى اتفقنا
مرح :عارفة انى مش هطلع منك بعقاد نافع ومضطرة استنى اتفقنا.

بعد شهرين
زياد بقلق :مرح انتى بتعيطى ليه
مرح وهى بتسمح دموعها بسرعة :ايه يا عم زياد هو انت علشان قلقت من نومك وقايم بعماسك في عينك هتشوفنى بعيط سلامة نظرك مرح متعيطش تقريبا معنديش قنوات دمعية اصلا علشان اعيط واتشحتف ومناخيرى تحمر بقي زي البنات الكيوت
زياد :خلصتى
ردى عليا بقي بتعيطى ليه
مرح :انت مأقنعكش اللى قلته
زياد :ولا صدقت منه حرف واحد
فمن غير البروباجندا دى كلها متزوديش قلقي وقولي مالك بتعيطى ليه
مرح :اصل....وانا فى فرح ليلي النهاردة ...شفت ..يعنى شفت...
زياد :شوفتى ايه يا مرح

مرح ودموع بتتجمع فى عينيها :شفتها وباباها بيبوس راسها وهى بتبوس ايده وشفت مامتها وهى بتعيط علشان خلاص ليلي هتتجوز وهتسيب البيت وسمعت باباها وهو بيوصى جوزها عليها وبيأمنه عليها
زياد :
مرح وهى بتعيط :هو انا مين هيبوس راسي يوم فرحى يا زياد هبوس ايد مين طيب مين اللى دموعها هتنزل من الحزن على فراقى ..مين..مين هيوصى جوزى عليا مين هيجبلي حقى منه لو جه عليا طيب انا ليه لوحدى بابا وماما ليه مش معايا
زياد :مرح انتى عارفة ان ده قضاء ربنا وعمى ومرات عمى كانو بيحبوكى اكتر من نفسهم بس ده عمرهم يا مرح عمرهم وخلص وربنا استرد امانته هنقول لربنا لا مينفعش هنعترض على قضاءه
مرح :استغفرك ربي واتوب اليك لا طبعا بس..بس هما وحشونى اوى يا زياد قلبي بيوجعنى اوى علشانهم
زياد :حقك يوحشوكى ولحد ما ربنا يجمعنا بيهم فى الجنة هيفضلو يوحشوكى ويوحشونا انتى عارفة ان عمى كمال مش بس كان تؤام بابا لا ده كان روحه
اللي مصبر بابا علي فراقه هو انك جيتى عشتى معانا بابا شايف عمى فيكى ده انتى اغلى عنده منى انا والبت فرح

مرح :عارفة
زياد :ولما انتى عارفة بتقولى انك لوحدك ليه يعنى انا وبابا وماما وفرح معاكى وتقولي انك لوحدك ينفع برضه
مرح بابتسامة :لا مينفعش ربنا ما يحرمنى منكم ابدا
زياد بابتسامة :ولا يحرمنا منك
مرح وهى بتقوم علشان تدخل تنام :سورى على وصلة النكد اللي عملتهالك دى
تصبح على خير
زياد : مرح
مرح بصتله :نعم يا زياد
زياد :مرح من حقها تعيط لانها انسانة وعندها مشاعر وقلب مفيش اطيب منه
كمان وانتى معيطة ومناخيرك حمرا من العياط شكلك كيوت وحلو اوى بجد
مرح :
زياد بحرج :تصبحى على خير
مرح بتوهان :وان...وانت من اهل الخير

هو فى ايه زياد ماله ابن عمى من اتنين وعشرين سنة اللي هما كل عمرى وعايشين سوا من سنتين من بعد ما بابا مات
وقبله بتلت سنين كانت ماما ماتت وفضلت انا وبابا عايشين لوحدنا لانى وحيدة مليش اخوات بعد موت ماما بسنتين بابا كمان مات وجيت عشت مع عمى
زياد اكبر منى بسنتين طول عمرنا علاقتنا ببعض عادية وتلت اربعها رخامة علي بعض اصلا
اول مرة يقول حاجة توترنى كده
انا اتكسفت اول مرة فى حياتى احس انى مكسوفة من زياد اول مرة يقول حاجة واحس ان دقات قلبى زادت بعد ما سمعتها
مش بس كلامه نظرة عينه فيها حاجة مختلفة زى لمعة
لمعة حلوة اوى معقول زياد يكون بيحبنى لا لا مش معقول
انا زيى زى فرح بالنسباله وكمان هو كده بالنسبالى
بس لو كده انا اتوترت ليه من كلامه كمان هو شكله مكنش علي بعضه

نمت بعد تفكير طوييييل ورحت الكلية رجعت البيت لقيت عمى بيفاتحنى فى ان زياد متقدملى وبيقولى ان براحتى واي قرار انا هاخده هو هيكون فى صفى وان لو زياد ابنه فانا زيى زى فرح واكتر كمان
فضلت يومين بفكر بخرج من اوضتى انا وفرح علشان اروح الكلية بس
كنت بحاول مشوفش زياد علشان اقدر افكر واخد قرار من غير تشويش وهو احترم رغبتى دى ومحاولش يحتك ييا خالص
انا استخرت اكتر من مرة وكنت بحس براحة وكل ما اجى افكر فى زياد الاقي مفيش فى دماغى حاجة غير لمعة عينه وكلامه ليا فى اخر مرة اتكلمنا فيها
كاننا عمرنا ما اتكلمنا غير المرة دى

وكل ما افكر احس انى فرحانة ومكسوفة هو انا عارفة ان طول عمرى مجنونة بس دلوقتى اتأكدت قلت لعمى انى موافقة ليه علشان حسيت انى عايزة اشوف اللمعة دى تانى فى عينين زياد وعايزة اسمعه تانى بيقولى كلام يفرحنى ويكسفنى ويزود دقات قلبي مش قلتلكم انى اتأكدت انى مجنونة
وافقت وزياد طلب من عمى انه عايز يتكلم معايا لوحدنا
وعلشان احس انى في اختلاف بين الوضع اللي احنا فيه ده ووضعى بانى اساسا عايشة معاهم
زياد خدنى انا وفرح وخرجنا نتغدى بره
سبنا فرح لوحدها عالترابيزة وقمنا نتمشى ونتكلم
زياد فضل دقيقة ساكت وانا كل شوية ابصله اشوف اللمعة في عينه افرح وارجع ابص قدامى وبعد دقيقة زياد اتكلم
زياد :انا مش اسف علي كلامى ليكى اخر مرة
بس انا عارف انى مكنش ينفع اقوله

بقالى سنين ماسك نفسك ومحافظ عليكى من كل الناس واولهم نفسي بس طاقتى بدات تقل وصبرى بيخلص
فكان لازم افاتح بابا للمرة العاشرة انى اتقدملك
انا قلتله قبل كده كتير بس هو كان مصر ان لما تخلصى دراستك بس المرة دى انا الحيت جامد لانى الوضع ده فعلا بقى صعب ولا يحتمل بالنسبالى وهو قالى انه هيفاتحك في الموضوع ولو رفضتى فخلاص الموضوع منتهى بس رفضك مكنش هيبقي نهاية للموضوع ده كان هيبقي نهاية ليا انا
بس الحمد لله انتى وافقتى

وانا طلبت اتكلم معاكى لوحدنا وبقولك كل ده دلوقتى لانى طمعان فى موافقتك علي اكتر من الخطوبة انا عايز نكتب الكتاب لحد ما تخلصى السنة دى وتتخرجى
انا فعلا مش ندمان على اللى قلتهولك استغفرت عنه طبعا بس فى جزء جوايا كده لا ندمان ولا مضايق بالعكس
وجزء تانى مضايق علشان زى مقلتلك انا محافظ عليكى من كل الناس واولهم نفسي وعلشان انتى امانة في رقبتى انا وبابا
فانا بقترح انك توافقى علي كتب الكتاب وتخلصينى من صراع الجبابرة اللي جوايا ده
مش عايز اندم علي حاجة هقولهالك يا مرح وعندى كلام كتير عايز اقوله ومعتقدش انى هقدر اكتمه جوايا
فيا ريت تحسي بابن عمك الغلبان وترأفى بيه وتوافقى علي كتب الكتاب

بصى انا مبحاولش أاثر علي قرارك خالص ابسلوتلى مش انا ومش اخلاقى معاكى من يوم ليوم ونص تفكرى براحتك وتستخيرى وتقولى انك موافقة
مرح وهى بتضحك :لا واضح انك مبتحاولش تأثر على قرارى خالص وسيبلى حرية تفكير مطلقة وغير مشروطة
تعالى طيب نرجع لفرح علشان نتغدى زمانها بتدعى علينا علشان جعانة واحنا اتأخرنا عليها

انا كنت فرحانة بكلامه لا فرحانة ايه انا كنت طايرة بكلامه
والله كان هاين عليا اقوله انى موافقة بس مسكت نفسي وبعد يوم ونص المدة الطويلة جدا اللى هو حددها قلت انى موافقة
انا اساسا لما عمى فاتحنى فى الموضوع واستخرت كنت بستخير فى جواز مش فى خطوبة ايه متفاجئين ليه احنا خلاص اتفقنا انى مجنونة فمفيش داعى للتفاجئ
المهم انا استخرت تانى في اليوم ونص اكتر من مرة والحمد لله فضلت مرتاحة
واتكتب كتابنا انا وزياد

زياد وهو بيبوس راس مرح :بارك الله لنا وبارك علينا وجمع بيننا فى خير
وعد عمرك مهتحسي انك لوحدك ابدا طول ما انا عايش
وانا عن نفسي مستعد ابوس راسك كل يوم
وبابا من يوم ما وافقتى عليا وهو بيوصينى عليكى ولو فكرت ازعلك بس هيقطعنى حتت ويرمينى في المالح
ومن غير ما هو يوصينى بوصى نفسي انا مصدقت اصلا
مرح وهى بتعيط :تسلملي ومتحرمش منك ابدا يا رب
زياد وهو بيمسح دموعها :حلوة اوى الدعوة وهى بصيغة المفرد ليا لوحدى اللهم امييييييين يا رب العالمين

بعد ما خلصت كلية بشهر كنا متجوزين انا وزياد
نيفين حضرت الفرح انا وهى بقينا اصحاب جامدين
وحتى بعد ما انا اتخرجت فضلنا اصحاب بنتكلم كتير فى الموبايل وبنتقابل وهى اتغيرت بقي ليها اصحاب فى الكلية بس انا اقربلها منهم وهى عندى بعد فرح علي طول
لان فرح بالنسبالى مش بس صاحبتى وبنت عمى لا دى تؤمى من اب وام تانيين
حكيت لنيفين حكايتى انا وزياد علشان تعرف الفرق بين الراجل اللى بجد اللي هيحافظ عليكى من كل الناس واولهم نفسه حتى لو كنتم عايشين تحت سقف نفس البيت
وبين مورى العيل الملزق اللي هيفضل عيل وملزق حتى لو بقي عنده خمسين سنة الرجولة دى اصلها طبع مش بالسن ولا بخانة النوع اللي فى البطاقة
وعلشان كده الراجل بيقي راجل من صغره

والعيال الملزقة بتفضل عيال ملزقة حتى لو كبرت وشعرها كله بقى ابيض
وهى فهمت الدرس وحافظت على نفسها لحد ما جه الانسان اللى يستاهلها
وهى فى سنة تالتة اتخطبت لواحد جارها وبعد الكلية اتجوزو
واتاكدت بنفسها بعد ما عرفته ان مورى واللى زيه عيال ملزقة
لأن جوزها راجل بجد راجل تقدر تامنه علي نفسها وتبنى معاه بيت وتعمل معاه اسرة

قلوبكم مش اي حد يملكها حياتكم مش اي حد يدخلها اهتمامكم مش اى حد ياخده ضعفكم مش اي حد يشوفه واسراركم مش اي حد يعرفها
انتو غالين قلوبكم وحياتكم واهتمامكم وضعفكم واسراركم غالين وغالين اوى كمان اوعو ترخصوهم علشان حد ميستاهلش

قصص مشابهة:
الآراء والتعليقات على القصة
قصص و روايات مختارة