قصص و روايات - قصص رومانسية :

عشقت خيالا بقلم حلا الشويكي

غلاف قصة عشقت خيالا بقلم حلا الشويكي

قصة خيالية عشقت خيالا بقلم حلا الشويكي

امي: راما ما بدك تتوظفي بقا ؟ لشو درستي لتقعدي بوشي هيك ؟
راما: بكرا رح روح قدم وظيفة لشركة امي ولا يهمك
امي: طيب لنشوف

رحت تاني يوم وقدمت للوظيفة وانا طالعة من باب الشركة صوت نادالي

يا انسة
راما: نعم في شي؟
لا بس ..
راما: انت مشبه علي شي ؟
لا بس حبيت دردش معك
راما: ليش هيك العالم عم يتطلعو فينا في شي غلط ؟!
انا خالد عمري 30 سنه وانتي ؟
راما: مو ضروري تعرف
طيب براحتك

شي شدني لهالشب بطريقة غريبة .. انا ما كنت بدي حب ولا شي .. كل همي الوظيفة من وين طلعلي خالد ؟

قبلوني بالوظيفة وبلشت داوم بعد شهر

اول ما وصلت الشركة كان خالد ناطرني عالباب تجاهلتو ومشيت
صار يناديلي ..
خالد: يا انسة
راما: لك اييي اييي نعم
خالد: شبك معصبه ؟
راما: ولا شي شبك وقفتي قدام العالم هيك شايف شلون عم يتطلعو علينا ؟
خالد: شو اسمك ؟
راما: اسمي راما وهلا فينك تتركني بحالي بدي روح لو سمحت

كملت طريقي والكل عم يتطلع فيني ... سمعت شي بيحكي هي شكلا مجنونه وسمعت شي بيقول شبهن الموظفات بس يجو بيصيرو يحاكو حالن .. تجاهلت حكي الكل وتابعت لشغلي وكنت كتير مبسوطه انو بعد كل هالمدة بعد التخرج قدرت اتوظف

وكل يوم صرت شوف خالد واقف عالباب وناطرني كل يوم
وكل ما يشوفني يحكي معي .. وكنت استغرب من نظرات الناس الي .. حس انو هالشب في شي مو مزبوط مشبوه لحتى الكل يتطلع فيني هيك لأني بحكي معو .. انا صرت حاول ما احكي معو ابدا ابدا
بس مع كلامو خلاني بلش حبو .. طلبت منو يفوت معي عالمكتب بس مارضي .. قلي انا مافيني .. لازم ضل هون انطرك

عزمتو شي يوم على مطعم نقعد في ونحكي لأشوف اخرتا معو .. وهيك بخلص من عيون العالم يلي بتلاحقني ازا حكيت معو .. عزمتو عالمطعم وطلبت 2 كوكتيل
الجرسون اتطلع فيني بإستغراب .. ليش 2 ؟ ناطرة حد انتي ؟ اتطلعت بخالد وقلتلو الي ولرفيقي مانك شايفو يعني ؟
نظرات الجرسون كلا استغراب حكالي براحتك وراح جاب الكوكتيل وضل نظراتو كلها تساؤلات .. بس انا مو فاهمه ليش كل هالقد مستغرب !

امي: شو خير انشالله راما عم شوفك عطول مبسوطه ؟
راما: اي الحمد لله مرتاحة بوظيفتي كتير
امي: اي الف الحمد لله .. بس حاسة في شي تاني !
راما: لا امي ما في شي تاني بس هيك

وكل يوم بشوف خالد على باب الشركة وبصبح عليه وبتابع لوظيفتي وبشتغل

كل يوم عم اتعلق فيه اكتر وكل يوم عم حبو اكتر

خالد: بحبك كتير
راما: وانا كمان بحبك
خالد: جد؟
راما: اي والله
خالد: يعني انا وانتي بنحب بعض بس ما خبرنا بعض لهلأ ؟
راما: اي .. اعطني رقم جوالك
خالد: (تلبك وما عاد عرف يحكي) ما معي جوال
راما:في حد بهالأيام ما معو جوال ؟
خالد: اي انا ما معي

اجا شب من بعيد بيقلي انسة ممكن اسالك سؤال ؟
استأذنت من خالد ورحت قربت من الشب قلتلو تفضل
سألني ازا معي امراض نفسيه او شي !
اكدتلو وانا معصبة انو ما فيني شي وتابعت لوظيفتي وضليت كل يومي مزعوجة

بس لازم لاقي مبررات لتصرفاتن معي .. مو مقبول يلي عم يصير

راما: خالد جيب جوال مشان نصير نحكي .. ما عاد فيني احكي معك قدام العالم والكل يتطلع فينا ما بعرف شو الغريب اني بحكي مع شب يعني ؟
خالد: شو بدنا بالعالم يا عمري .. المهم انا وياكي سوا
راما:شو اسمك الكامل انت؟
خالد: اسمي الكامل ؟ ليش !
راما: فضول
خالد: بس لا تسألي عني حد بالشركه اي
راما: ليش ؟
خالد: هيك ما بحب
راما: طيب حاضر
خالد: اسمي خالد عبد الله محمد جميل
راما: اها
خالد: (مسك ايدي وباسا) بحبك يا راما بحبك
راما: وانا بحبك .. بحبك

كان خالد ما بدو يجيب جوال لنحكي مع بعض .. وانا خجلانه اسأل الناس ليش هيك بتطلع فينا ونحن عم نحكي

كنت حس خالد في بعيونو حزن .. ما اعرف ليش بس حاول اتأمل عيونو قد ما فيني

كنت نايمة بالليل .. فتحت عيوني شفت جنبي انسان ملطخ دم .. عيونو مرعبات .. صار يشيل من الدم اللي على جسمو ويحط على وشي .. صرخت صرخة هزت البيت
اجت امي على صوتي
امي: بسم الله شبك ؟ وشو هالدم يلي على وشك ؟
راما: دم !؟(رحت عالمراي وتأكدت انو دم صرخت مرة تانية) يمكن خدشت وشي وانا نايمه !

خفت خبرا شو شفت تفكرني جنيت .. طلبت منا نام عندا بالغرفة ..طول الليل خايفة .. وما عرفت نام بلا ضو .. خفت كتير

تاني يوم الصبح جهزت حالي ولبست ورحت عالشغل بس كان وشي باين عليه التعب .. اجا خالد بدو يحكي معي قلتلو بنحكي بعدين .. بعد الدوام بنروح سوا على كافيه وبنحكي

بعد الدوام طلعنا انا وخالد على كافيه .. ونفس يلي صار معي بالمطعم .. طلبت 2 قهوة سألني الجرسون ليش 2 ؟ بس هالمرة كانت اعصابي تعبانه وعصبت عليه واخدت خالد وطلعنا من المكان استأذنت من خالد ورجعت للبيت

 

وانا بهالفترة صرت فعلا شك اني في بنظري شي غلط .. مرتين الجرسون ما يشوف خالد .. معقول خالد بيقدر يتخفى ؟
خلص يومي بشكل طبيعي .. ورحت توجهت لغرفتي لحتى نام .. طفيت الضو وتسطحت
فتحت عيوني لقيت حالي بمكان غير مكاني .. وعلى تخت مو تختي .. مكان كبير كتير والغريب انو كل المكان صور لخالد .. شفت خالد جاييني من بعيد وقف جنبي
خالد: لا تتركيني راما
راما: بس انا ما بدي اتركك
خالد: لما تعرفي حقيقتي رح تتركيني .. بس ازا تركتيني رح ااذيكي .. ما رح اتركك تعيشي مرتاحه ابدا

حسيت ببرد كتير .. صوت ريح ورعد .. وصحيت على صوت امي عم تفيقني ومرعوبه

امي: راما راما شبك راما
راما: شو في امي ؟
امي: كنتي عم تصرخي
راما: شفت .. شفت كابوس بس لا تخافي ما فيني شي
امي: وضعك ما عم يعجبني هالأيام
راما: ما فيني شي امي لا تخافي

لبست الصبحيات رحت على دوامي عادي .. دقتلي اختي المتجوزة وقالت رح تجي لعنا
أجت لعنا اختي .. ونامو اهلي كلون ونحنا سهرنا سوا بغرفتي
بعدا اختي غلبا النعس ونامت طفيت الضو ورجعت لنام قبل ما اوصل التخت حسيت بدوخة وصرت بعالم تاني .. ما بيشبه عالمي والغريب اني شفت خالد كمان مرة بس هالمرة كان كلو دم .. يعني اللي شفتو اول مرة وحط على وشي دم كمان كان خالد بس ما قدرت ميزو من العتمه ! كان كلو دم وقرب لعندي وانا خفت وصرت اهرب منو وهو يلحقني .. انا ما كنت بغرفتي وانا عم اهرب كنت بمكان ما بعرفو ابدا

فيقتني اختي وبتقلي ليش نايمه بنص الغرفة هيك ؟ اتطلعت حوالي قلتلها وين انا ؟ صارت تضحك علي وتقلي سافرتي بأحلامك مثلا ؟

خالد .. دم .. ما حدا شايفو .. لازم اعرف حقيقة خالد ! رموز عم تخليني فكر كتير مين هاد يلي عشقتو ؟

اختفى خالد ما عاد اجا عالشركه ابدا وانا صرت انطرو كتير مشان اسألو شو يلي عم يصير ؟

بعد غياب خالد لمدة شهر قررت اسأل بالشركة عنو .. يمكن حد بيعرفو ! خفت يكون صارلو شي او مرضان انا ما بعرف شي عنو بس كنت شوفو عباب الشركة ومرات اعزمو عمطعم او كافيه يعني ما معي عنوانو او رقم جوالو

رحت سألت المدير عنو وكان الجواب يلي صدمني .. لا مو بس صدمني وقهرني كمان !

 

راما: مرحبا استاذ
المدير: تفضلي راما
فتت وانا كتير ملبكة وخجلانة شو بدي قلو .. اخترعت كذبه انه معي الو امانه بدي وصلو ياها
راما: استاذ بدي اسألك
المدير: تفضلي استعجلي لأنه عندي شغل لو سمحتي انسة راما
راما: مارح طول عليك بس بدي اسألك عن خالد عبد الله محمد جميل
المدير: (ترك القلم من ايدو وتلبك وسألني فورا وصوتو عم يرجف) خالد ؟ انتي كمان بتسألي عن خالد ؟
راما: عفوا استاذ بس انا معي امانه بدي وصلو ياها مو اكتر
المدير: طيب طيب .. تفضلي اقعدي
شرب مي وصار يضرب على راسو خالد خالد خالد خااالد
راما: استاذ ازا ما بتعرف وين خالد خليني روح لشغلي
المدير: خالد مات من 5 سنين
راما: استاذ لا لا في شي غلط هاد الشب كل يوم بشوفو كنت على باب الشركة
المدير: في شي عم يحاول يعملو لينتقم
راما: ينتقم ! بس خالد شب طيب ما بيإذي حد
المدير: خالد انقتل

راما: انت مجنون ؟!
المدير: الزمي حدودك لو سمحتي انا مقدر صدمتك وانتي مو اول بنت يعمل معها هيك
راما: وشو صار باللي قبلي ؟ يعني جد خالد ميت ؟ يمكن تشابه اسماء ؟
صرت ابكي وارجف واحكي ابكي وارجف واحكي
المدير: لا يا بنتي مو تشابه اسماء .. الشب عيونو عسلي طويل واسمر شكلو وسيم صح ؟
راما: (وانا عم ببكي) .. صح استاذ صح
المدير: ماحدا فينا بيعرف شلون انقتل .. بس كان يشتغل عنا بالشركة ومن خمس سنين بتاريخ 17 مارس اجتنا اخبارية انه انقتل وما حد بيعرف كيف او مين قتلو
راما: 17 مارس يعني قبل شهر يعني يوم ما اختفى من حياتي وصار يجيني بالمنامات .. طيب وكيف عرفتو انو انقتل؟
المدير: بنت من الشركة خبرتنا ..
راما: ...

المدير: وكل بنت عرفت بالشي هاد انصدمت متلك ومنهن ما صدقوني كمان
راما: جد ؟ وشو صار معهن ؟
المدير: انا رح خبرك مشان تلاقي حل اي ؟ مو تخافي بس اطلعي من هون لعند شيخ فورا فهمتي ؟
راما: بس انا ما بدي اتركو انا بحبو
المدير: انتي ما عم تفهمي ؟ هاد مجرد خيال .. هاد مو انسان هاد روح انسان

صرت ابكي وقول ليش هيك صار معي .. يعني انا بس قررت حب .. يطلع بوشي خيال حبو .. لا وحبيتو بجد واشتقتلو بس بعد عني

المدير: كل يلي بقيو معو قتلهن .. ما حد عرف ليش بس هو روح شريرة بتقتل اي بنت بتتعلق فيه
راما: ...
المدير: بتطلعي من باب الشركة .. لعند شيخ فورا وشوفي شو الحل
راما: ما بدي اهلي يعرفو (تبكي)
المدير: طيب انا رح اعطيكي رقم شيخ وتابعي معو بالسر ازا بينفع

بعد الدوام رحت لعند الشيخ وخبرتو .. وخبرتو انو قتل بنات قبلي .. خبرني انو روحو بتعمل هيك انتقام لأنه حبيبتو يلي قتلتو ما في تفسير تاني للي عم يصير بسببو
وانو الحل الوحيد الرقية لأنه خلص روحو تعلقت فيني ولازم تطلع !

اول جلسة بالقراءة كانت صعبة كتير وفعلا والشيخ عم يقرأ انا غمضت عيوني

شفت خالد عم يتخانق مع بنت وطالعت سكين وطعنتو 4 طعنات ودفنتو بمكان متل الصحرا .. شفت خالد بيقلي ساعديني

فتحت عيوني وخبرت الشيخ بكل شي شفتو وحكالي روحو مو مرتاحة بسبب الظلم يلي تعرضلو وبدو منك تساعديه مشان اللي قتلتو تاخد عقابها .. وسألني ازا حفظت شكلا قلتلو اي وحفظت مكان قبرو

رحت للمدير وسألتو شو اوصاف البنت يلي خبرتن انو انقتل .. وطلعت هي البنت نفسا يلي قتلتو

خبرت الشيخ بكلشي و نصحني روح خبر الشرطه وفعلا خبرتن بكلشي ورحت معن لمكان جسد خالد المدفون .. فتحو القبر وشفت خالد .. اللي عشقت روحو وهو مجرد خيال
وكمشو البنت يلي قتلتو وحطوها بالسجن بحكم مؤبد

وسمعت انها قتلتو لأنه كانت بدها تتزوج غيرو شب غني وهو كان يحبها كتير وهددها يخبر اللي بدو يتزوجها بكلشي ازا تركتو وخافت انو يخبرو وقتلتو

وبعد هيك شفتو مرة وحدة بالمنام .. كان مبسوط كتير وقلي شكرا راما .. كل يلي قبلك رفضو يساعدوني لهيك قتلتن .. انتي ساعدتيني .. وكتير بتشكرك لأنه روحي ارتاحت وانا ارتحت بقبري

فقت من المنام عم ابكي .. اشتقتلو كتير .. وحبيتو عنجد بس كان مجرد خيال وهم عشتو واسعدني لفترة وساعدتو لأريح روحو وما عاد يموت حدا بسببو بعد هيك