رواية هو والجميلات الجزء الأول للكاتبة سحر فرج الفصل الرابع عشر

رضوى اتفاجأت ولمحت حد جاى من على بعد وقرب نحيتهم.
رضوى: امشى بسرعه يا سيف ملك جايه علينا وممكن تشوفنا ادخل الحمام بسرعه ارجوك.
سيف: ملك مين وامشى ليه؟
نور: امشى يا سيف بسرعه وانا هابقى افهمك على كل حاجه.
وفعلا مشى سيف ودخل على الحمام وقربت منهم ملك.
ملك: ايه يا نور ايه اللى اخركم كده ده انا قلقت عليكى وقلت اجى اشوف فيه ايه لا تكونى تعبتى وانتى مع رضوى لوحدكم.

ومين اللى كان واقف معاكم ده ملحقتش اشوف وشه؟
رضوى: بصت لنور وكانت خايفه لا تكون ملك شافت سيف وردت وقالت
ابدا يا ملك ده واحد كان بظروفها داخل على الحمام وانا سانده نور وعرض علينا المساعده بس نور ما رديتش.
ملك: طب كويس أن انا جيت يالا يا حبيبتى علشان ما نتأخرش عليهم اكتر من كده زمان ماما قلقانه عليكى.
وفعلا مسكت ايد نور هي ورضوى لحد ما وصلوا المكان المخصص للعزا وكان معظم الناس مشيت ومفيش حد كتير.

وبعد حوالى نصف ساعه كان جه يوسف هو وباباه واحمد اخو نور علشان يطمنوا عليهم ويخدوا بعضهم ويرجعوا على الفيلا.
وفعلا ركبوا العربيات وملك اتفقت مع يوسف أنها توصل رضوى على بيتها.
وركبت رضوى مع ملك العربيه وفضلوا يدردشوا شويه طول الطريق لحد ما وصلتها للبيت.
وفي عربيه يوسف كانت نور قاعده مش بتتكلم خالص وكان باين على ملامحها الإرهاق والتعب والحزن.

يوسف مسك اديها وباسها وحاول يخفف عنها شويه الحاله اللى هي كانت فيها.
وبعد شويه كانوا وصلوا على الفيلا وفتح لهم البواب الباب ودخلوا وركنوا عربياتهم ودخلوا على جوا.
نهله طلبت من الشغاله انها تجهز العشاء بسرعه علشان تعبانين اوى.
طلعت نور هي ويوسف على اوضتهم وبدؤوا يغيروا هدومهم ويوسف دخل وخد دوش علشان يفوق شويه.
نور كانت غيرت هدومها ودخلت هي كمان وخدت دوش بعد ما يوسف خرج من الحمام.

خلصت نور ووقفت اودام التسريحه علشان تسرح شعرها.
قرب منها يوسف وحضنها من من ضهرها وبدأ يبوسها من رقبتها بس في لحظه واحده كانت نور بعدت عنه.
نور: لو سمحت يا يوسف انا تعبانه ومش وقته خالص اللى انت بتعمله ده.
يوسف: قرب منها وحاول يطمنها وأنه مش قصده اى حاجه غير أنها وحشاه وبس.
نور: معلش يا يوسف حاول تستحملنى شويه انت مش حاسس باللى جوايا واللى انا حاسه بيه.

يوسف: ازاى تقولى كده يا نور لا طبعا حاسس بيكى وباللى جواكى وعارف اد ايه انتى زعلانه على مامتك.
واوعدك أنى هافضل جنبك دائما مهما يحصل انتى حياتى وعمرى وحبيبتى يا نور.
الباب خبط وكانت ملك هي اللى بتخبط.
يوسف قرب من الباب وفتح ولقى ملك في وشه.
يوسف: عاوزة ايه يا زفته انتى؟
ملك: زفته دى اخرتها عجبك كده يا نور شوفتى بيقول عليا ايه؟
نور: معلش يا ملك حقك عليا انا هو مش يقصد.

يوسف: لا انا قاصد دى بت رخمه ورزله كمان انتى ما تعرفهاش يا نور كويس وبعدين عاوزة ايه بقى يا ملك هانم.
ملك: العشاء جاهز يا أستاذ يالا انزلوا ومش وقت نحنحه وهيحححح فاهمنى وجريت بسرعه من اودامه.
يوسف جرى وراها لحد ما نزلوا على تحت وقامت ملك مستخبيه في ضهر احمد اخو نور.
يوسف: ابعد يا احمد انت عن البت دى لازم اوريها.
ملك: اوعى يا احمد ده متوحش اوعى تسيبنى ليه ارجوك.

احمد: حقك عليا انا يا يوسف علشان خاطرى دى ملك طيبه وغلبانه.
يوسف: ملك ايه؟
ده انت طيب اوى دى سوسه وانا لازم اوريها.
الاب: خلاص بقى يا اولاد الاكل هايبرد.
نهله: معلش المرة دى يا يوسف علشان خاطر احمد.
يوسف شاف نور نازله من على السلم ووشها مبتسم من اللى بيحصل فافرح من جواه اوى لانها ابتسمت من هزاره هو ملك.
يوسف: ماشى يا امى سماح المرة دى بس علشان خاطر احمد ونور كمان.

ملك: اخيرا اووووف عليك يا شيخ انسان بارد.
يوسف: انتى تانى يا بت لمى لسانك الطويل ده اللى عاوز قطعه.
الكل كان بيضحك عليهم وعلى طريقه كلامهم مع بعض وقعدوا علشان يتعشوا بعد يوم تعب وارهاق طويل.

في بيت سيف كان سيف رجع ودخل وغير هدومه وفضل قاعد في البلكونه بتاعه اوضته يفتكر كل اللى حصل من لحظه ما شاف نور والكلام اللى اتقال منه ومنها لحد ما سابهم ودخل الحمام لما ملك جت.
سيف كان سرحان ومحسش بالباب لما اتفتح ودخلت مي أخته علشان تطمن عليه.
مي: احم. احم ده انت في عالم تانى خالص وسرحان كمان.
مالك يا سيف في ايه؟ وايه اللى بتفكر فيه.
سيف: ايه ده انتى هنا من امتى ما حستش بيكى.

مي: انا هنا من شويه وخبطت على الباب وانت ما ردتش فدخلت علشان اطمن عليك واقولك أن الاكل جاهز.
سيف: لا مليش نفس يا مي كولوا أنتم بالهنا والشفا.
مي: بقى ماما قاعده من بدرى مستنياك لما ترجع وما رديتش تاكل وفي الاخر تقول ماليش نفس.
سيف: معلش يا مي روحى انتى وكلى مع ماما وجنه بجد ماليش نفس خالص وهنام علشان اصحى بدرى للكليه.
مي: ماشى يا سيف براحتك وانا هاروح اتعشى أنا وهما يالا سلام.

خرجت مي وسيف قام ونام على سريره بس مكنش عارف ينام خالص من كتر التفكير في كلام نور وكان قصدها ايه لما قالتله انت مش عارف حاجه وما تظلمنيش.

في اوضه نور ويوسف كانوا خلصوا اكلهم وطلعوا على اوضتهم وناموا على السرير.
نور تصبح على خير يا يوسف لانى فعلا تعبانه اوى وعاوزة انام.
يوسف: وانتى من اهله يا حبيبه يوسف وقلب يوسف من جوه.
فقرب يوسف من نور وفضل يلعب في شعرها علشان كان عارف هي اد ايه تعبت في اليوم ده وحاول أنه يساعدها أنها تنام على طول.
وفضل يحسس على شعرها بشويش بشويش لحد ما راحت في النوم خالص قام بايسها براحه من خدها ونام هو كمان.

عدى كذا يوم بعد وفاه ام نور وبدأت نور تهدى شويه عن الاول.
احمد اخوها بدأ يرجع المدرسه بتاعته علشان امتحاناته قربت وهو في الشهاده الاعداديه وعاوزة مزاكرة كتير.
نور ويوسف كانوا بدؤا يلبسوا علشان يروحوا للكليه مع بعضهم ودى كانت اول مرة يروحوا مع بعض بعد الجواز.
جهزوا نفسهم هما الاتنين ويوسف شاف نور واقفه بتسرح شعرها وخلص قام مقرب منها.

مسك نور وقربها منه وباسها ووعدها أنهم هايسافروا شهر عسل جديد بعد ما يخلصوا امتحاناتهم في الكليه في المكان اللى هي تختاره ونفسها تروحه.
نور: انت بتتكلم جد يا يوسف وهانسافر؟
يوسف: اه طبعا يا حبيبتى علشان نغير جو وتقضى شهر العسل اللى معرفناش نقضيه بسبب اللى حصل وعلشان كمان عاوز الففك العالم كله.

نزلوا على تحت وصبحوا على نهله وعلى باباه وكانت ملك هي كمان جاهزة علشان تروح جامعتها لأنها بقالها فترة مرحتش بسبب الظروف اللى هما كانوا فيها.
يوسف: ازيك يا بت يا ملك لابسه وراحه على فين دلوقتى؟
ملك: ابدا يا باشا عندى ميعاد في شارع الهرم في الكابريه اللى بشتغل فيه ايه رايك؟
يوسف: اصطبحى يا بلوة انتى ورودى كويس.
ملك: هاكون راحه فين يعنى راحه الجامعه يا ظريف.

يوسف: ما تقولى كده من الاول ولا لازم لسانك الطويل ده.
ملك: انا سكتالك بس علشان الموزة اللى جنبك دى وبتبص على نور.
نور: ههههههههه شكرا يا ملك ده من ذوقك يا حبيبتى.
يوسف: المهم اخلصى علشان متأخرناش يالا سلام.
نور: ثوانى يا يوسف علشان ناخد احمد نوديه على المدرسه في سكتنا واحنا رايحين الكليه.
ملك: لا انا اللى هاخد احمد امشوا انتم وانا اللى هاوصله في سكتى يا شباب.

نور: مش عارفه اقولك ايه يا ملك بجد وقربت منها ومسكتها وحضنتها.
ملك: ماتقوليش كده يا نور احمد ده اخويا الصغير.
نهله: ربنا يحفظكم ويبارك فيكم كلكم يا ولاد.
نور قربت من احمد وفتحت شنتطها وادتله فلوس علشان تبقى معاه وهو في المدرسه.
يوسف مسك ايد نور وخرجوا وركبوا عربيتهم وراحوا على الكليه.
ملك كانت خدت احمد في عربيتها وفضلوا يرغوا طول الطريق لحد ما وصلوا عند باب المدرسه وسلم على ملك ودخل على جوا.

ملك بعد ما اطمنت عليه أنه دخل من باب المدرسه ساقت عربيتها علشان كانت عاوزة تلحق اول محاضرة ليها علشان الدكتور بتاعها كان مش بيقبل اى حد يتأخر على المحاضرة.
وفجاه وهي سايقه وكانت سرعت السرعه شويه علشان تلحق المحاضرة طلع ليها شخص من شارع جانبى وخبتطه بالعربيه من كتر سرعت العربيه.
ملك اتخضت من اللى حصل ونزلت بسرعه علشان تطمن على الشخص اللى وقع على الأرض من شده الخبطه.

ملك قربت منه بسرعه وكان فيه ناس كتير اتلمت عليهم علشان يشوفوا ويطمنوا على الشخص اللى لقوه غرقان في دمه ورأسه عماله تنزل دم كتير.
ملك قربت منه واتصدمت لما شافت الشخص ده وما كنتش متوقعه أنه يكون...

يا ترى ملك خبطت مين بالعربيه واتصدمت لما شافته؟