رواية هو والجميلات الجزء الأول للكاتبة سحر فرج الفصل الختامي

نور كانت خرجت من المستشفى بعد الولاده وكانوا جهزوا الفيلا علشان يعملوا سبوع حلو اوى لبنتهم اللى سموها: مليكة
كانت طالعه حلوة لمامتها عيونها ملونه وشعرها اصفر وعسوله.
الكل كان فرحان وسعيد بيها وخاصه يوسف ونور.
ملك كانت دائما قافله على نفسها اوضتها وكانت حالتها صعبه جدا وصحتها في النازل بعد فشل كل المحاولات اللى امها وابوها عملوها علشان ترجع تانى زى الاول.

وكانت كل فترة تتصل على سيف علشان تطمن عليه لكن للاسف سيف من كتر شغله نسى الحب لفترة وكان كل همه مستقبله وبس.
يوسف كانت صعبانه عليه ملك وحاول يدخل لها اكتر من مرة بس للاسف ملك كانت رافضه نهائى انها تشوفه.
باب اوضه ملك خبط ودخلت نور وهي شايله مليكه على اديها.
نور: مليكه جت علشان تشوف عمتها ملك بدام عمتها مش عاوزة تشوفها.
ملك: فرحت اوى لما شافت مليكه وخدتها من نور وفضلت تبوس فيها وده اللى خلى نور تعيط.

ملك بدأت تعيط هي كمان بس بسبب سيف.
نور قربت منها وخدت مليكه وسابتها على السرير وخدت ملك في حضنها.
ملك: بحبه اوى يا نور ومش هقدر اعيش من غيره ومحدش حاسس بيا خالص حتى يوسف اخويا الوحيد.
نفسى اعرف ايه سبب كرهه لسيف بالمنظر ده.
انا بموت من جوايا يا نور بموت كل ثانيه وكل وقت وانا بعيده عن سيف بموت يا نور بموت.
ارجوكى يا نور اعملى حاجه وحاولى تساعدينى انى اكون مع سيف.

كلمى يوسف واعرفى منه سبب رفضه ايه ارجوكى يا نور.
نور كان قلبها بيتقطع على منظر ملك وعلى الحاله اللى هي وصلت ليها دى بسبب حبها لسيف.
بس في نفس الوقت ماقدرتش تشرح لملك سبب كره يوسف لسيف بس قررت انها تتكلم معاه بعد سبوع مليكه علشان خاطر ملك.
ناس كتير جت من اهلهم واصحابهم وحضروا السبوع وكان جميل جدا وفي منتهى الروعه وجالها هدايا كتير جدا.
خلص السبوع والناس مشيت بس يوسف كان نقصه حاجه وهي ملك أخته الوحيده.

اللى بقاله فتره نفسه يشوفها ويطمن عليها بس هي للاسف رافضه الموضوع ده.
قعدت جنبه نور وبدأت تتكلم معاه.
نور: يوسف كنت عاوزة اتكلم معاك في موضوع مهم.
يوسف: اوى اوى يا حبيبتى اتفضلى.
نور: ملك يا يوسف لو شوفتها هاتصعب عليك جدا حالتها بقت صعبه جدا ولو شوفتها مش هاتعرفها.
يوسف: انا عارف وحاسس بس مش قادر اعمل لها حاجه وهي رافضه انها تشوفنى بقالها شهور على كده.

نور: طيب شوف ايه سبب كده وحاول تشوفها عاوزة ايه وتعمله ليها دى مهما كان اختك الوحيده يا يوسف وانت بقيت اب واكيد هاتحس باختك والعذاب اللى هي حاسه وعايشه فيه.
يوسف: قصدك موضوع سيف.
انتى يا نور اللى بتقولى كده انتى يا نور.
نور: موضوع سيف انتهى بالنسبه ليا يا يوسف من زمان وبقيت انت ومليكه كل حاجه ليا في الدنيا دى.
حاول تنسى الماضى يا يوسف زى ما انا نسيته.
يوسف: انتى متاكده من كلامك ده يا نور.

نور: وانت عندك شك في كده يا يوسف.
انت بقيت حياتى وعمرى وقلبى يا يوسف انت سندى وحبيبى وابوا بنتى.
يوسف حضنها وخدها في حضنه وفضل يبوس فيها ووعدها أنه يشوف حل لموضوع ملك أخته وان شاء الله يحاول يسعدها على اد ما يقدر.
عدى كام يوم وسيف كان في الشركه مع خالد في اوضته بيناقشوا اخر التطورات في المشروع الجديد اللى دخلوا فيه.

لانه هو ده المشروع اللى كانوا بيحلموا بيه وهو ده اللى هايخلى ليهم اسم كبير في عالم العقارات والمشروعات الكبيرة.
فجاه السكرتيرة دخلت وبلغت سيف أن فيه شخص عاوز يقابله ضرورى.
سيف بلغها انها تدخله.
دخل الضيف واول ما دخل أستغرب سيف وخالد من الضيف ده اللى هو كان يوسف.
سيف: يوسف اهلا بيك غريبه انك تيجى ليا هنا.
خالد: اهلا يوسف فينك يا ابنى بقالنا كتير ما شوفناش بعض.

يوسف: اهلا يا سيف واهلا يا خالد وحشنى والله.
يوسف: انا اسف أنى جيت من غير ميعاد بس كنت عاوزك يا سيف في موضوع مهم جدا.
خالد: طيب اسيبكم انا يا رجاله واروح لبابا اشوفه كان عاوزنى في ايه.
سيف: اوى اوى اتفضل يا يوسف.
يوسف: انا جاى مخصوص علشان موضوع ملك اختى يا سيف.
ملك من ساعه اخر مرة انت كنت عندنا وهي حالتها صعبه جدا وصحتها في النازل بسببك وبسبب حبها ليك.

اكيد انت مستغرب أن انا بالذات اللى يجى يقولك الكلام ده وانت اكتر واحد عارف سبب رفضى ليك.
بس مهما كان دى اختى الوحيده ومش هاقعد اتفرج عليها وهي بتموت كل شويه بسبب بعدك عنها.
وبالنسبه للى كان بينك وبين نور زمان انا اتاكدت أنه أصبح ماضى وانتهى.
لو لسه عاوز ملك يا سيف وعاوزها تكون شريكه حياتك انا موافق.

سيف: انا بالنسبه ليا كل اللى كان بينى وبين نور أصبح ماضى وكل اللى بفكر فيه دلوقتى هو مستقبلى علشان اكون في مستوى يليق بملك اختك.
انا هاجى واخطبها من اول وجديد يا يوسف وانت من النهارده اخ ليا وبالنسبه للماضى نحاول ننساه كلنا ونبدا صفحه جديده ونور بالنسبه ليا أصبحت مجرد اخت وبس.
يوسف قرب من سيف وخدوا بعض بالاحضان واتفق معاه أنه يزورهم في البيت باليل هو وأخته ووالدته.
يوسف: اه طبعا تنورونا في اى وقت.

رجع يوسف على الفيلا وبلغ الكل بالخبر ده وطلع على اوضه اخته ودخل.
ملك: انت ايه اللى دخلك هنا اطلع برا مش عاوزة اشوفك تانى.
يوسف: اهدى يا حبيبتى انا عندى ليكى خبر حلو اوى هايفرحك.
ملك: قولتلك اطلع برة. اطلع برة مش عاوزة اشوفك.
يوسف: سيف جاى باليل علشان يخطبك وانا موافق يا ملك يا حبيبتى عليه.
ملك: انت بتقول ايه انت بتتكلم جد يا يوسف.
يوسف: ايوا يا روح قلب اخوكى سيف هايجى ويخطبك النهارده هو ومامته.

ملك خدت اخوها بالحضن وفضلت تعيط اوى من كتر الفرحه ويوسف عيط هو كمان على فرحه أخته.
سيف بلغ والدته واخته مي بالخبر ده واستغربوا اوى أنه رجع تانى يتكلم في موضوع ملك ده وكويس أن جنه كانت مش موجوده المرة دى.
الام: انت متأكد يا سيف من الموضوع ده.
انا كان نفسى تاخد جنه بنت خالك اللى بتحبك من زمان اوى وبترفض كل العرسان اللى بيجولها علشانك انت.

مي: فعلا والله يا سيف جنه بتحبك اوى على فكرة وانت عمرك ما حسيت بيها ولا اديتها ريق حلو ابدا.
سيف: انتم بتقولوا ايه جنه دى بعتبرها زى مي بالضبط وعمرى ما فكرت انها تكون زوجتى.
الام: خلاص يا ابنى اللى يريحك وربنا يوفقك في حياتك والف مبروك.
مي: اللى تشوفه يا سيف بس كان نفسى تديها فرصه.
سيف: خلاص يا مي مالوش لازمه الكلام وربنا هايرزقها بشخص أفضل منى أن شاء الله.

الكل بدأ يستعد لاستقبال سيف وفعلا كان وصل سيف اللى كان طالع زى القمر
طول بعرض وجسم في منتهى الروعه وشعر فظيع وبقى شكله احلى من زمان بكتير.
نور كانت مع ملك في أوضتها بتساعدها وكانت طالعه حلوة اوى.
الام رحبت بالضيوف وسلمت هي والاب على سيف ووالدته ومى أخته وكان في استقباله معاهم يوسف.

الاب: اهلا يا سيف يا ابنى اسمك بقى مشهور ومعروف في الشركات كلها ما شاء الله عليك ما كنتش متخيل انك هاتكون كده بالسرعه دى.
فجاه دخلت نور ومعاها مليكه وملك وسلموا على الكل.
مي طبعا كانت سمعت عن نور من سيف بس ما كنتش تعرف انها بالحلاوة والجمال ده كله.
ملك سلمت على ام سيف وعلى مي وقربت من سيف ونظراتهم وعيونهم قالوا كل شىء لبعض.

قعدت نور وملك وبدأوا يتكلموا على الخطوبه والاب وافق وقرروا أنه يكون جواز على طول.
سيف كان خد فيلا جديده ضمن المشاريع اللى بتنفذها الشركه وهي دى اللى هايعيشوا فيها مع امه واخته مي.
الاب والام رحبوا بكده وحددوا ميعاد الفرح اللى هايكون بعد شهر من دلوقتى.
عدى كام يوم من المقابله دى وجنه كانت عرفت الخبر ده بس كانت في حاله وحشه اوى وكانت حزينه جدا على سيف وعلى جوازه.

عدى الشهر وكان خلاله تجهيز الفيلا الجديده للعرسان اللى فرشوها احلى فرش وكانت في منتهى الروعه.
وكانت نزلت ملك ونور ومى واختاروا فستانها وكان في منتهى الجمال والشياكه.
خالد كان بلغ سيف أنه عاوزه في موضوع مهم جدا وسيف سمعله واتفاجاه من اللى قاله خالد اللى هو جوزاه من مي أخته.
لانه معجب بيها من اول مرة شافها ومن شخصيتها وأدبها.
سيف استغرب من الطلب ده وقاله نأجلها دلوقتى لحد بعد الفرح بتاعه.

وأنه عمره ما هيلاقى زوج لاخته اكتر منه لأنه بيعتبر خالد بالنسبه ليه اخ وصاحب وصديق عشرة سنين طويله وأكيد عارفه وعارف شخصيته كويس اوى.
جه يوم الفرح وكانت ملك ونور ومى في البيوتى سنتر وكانوا كلهم طالعين حلوين جدا وزى القمر كلهم وفي منتهى الجمال.
سيف كان ركب عربيته وراه يوسف وخالد في عربياتهم وراحوا علشان يجيبوا العروسه ونور ومى.

وصل سيف عند البيوتى سنتر ونزل من عربيته ونزل يوسف وخالد اللى كانوا طالعين زى القمر هما التلاته كل واحد لابس بدلته و طلعوا للبنات على فوق.
نور كانت شايله مليكه الصغيرة وكانت ملبساها فستان ابيض صغير وحطلها توكه صغيره في شعرها وكانت عامله زى الملايكه.
قرب منها يوسف وباس راس نور وشال مليكه عنها.
خالد سلم على مي اللى انكسفت اوى منه بس سلمت عليه.
خالد: عقبالك يا مي.
مي: عقبالك انت كمان يا خالد.

سيف: مش وقتك خالص يا سى روميو أنت اخلص وامشى اودامى.
يوسف كان دخل مسك ايد ملك اللى ما شاء الله عليها كانت أميرة وهي لابسه فستانها الأبيض وتاج على رأسها ووصلها لحد ايد سيف.
سيف مسك اديها وباسها وقالها مبروك يا حبيبتى.
الكل نزل على تحت وسيف ركب عربيته هو وعروسته.
يوسف ركب عربيته هو ونور وبنته.
خالد استأذن من سيف أن مي تركب معاه عربيته وسيف وافق على كده.

وصلوا الشباب كلهم لحد الفندق اللى هايتم فيه الفرح والكل كان واقف في استقبالهم.
ام سيف واخوها بس للاسف جنه ما حضرتش الفرح وما كنتش هاتقدر تشوف حبيبها وهو بيتجوز واحده تانيه.
ام يوسف وباباه واحمد كانوا في استقبال الضيوف والاهل.
زمايل ملك من الجامعه وأصدقاء سيف وناس كتير تبع شغله.
الفرح بدا والكل كان فرحان وسعيد والموسيقى كانت شغاله والكل بيرقص عليها.
المأذون جه وتم كتب الكتاب واخيرا ملك وسيف اتجوزوا.

يوسف كان واقف هو ونور مع بعض طول الفرح لحد ما خلص.
سيف فتح عربيته ومسك ايد ملك وركبها وركب هو كمان وراحوا على عش حبهم.
وصلوا الفيلا بتاعتهم وشالها سيف لحد الاوضه ونزلها براحه على الأرض.
سيف قرب من ملك ومسكها من وسطها وقالها.
اخيرا يا حبيبتى بقيتى ملكى وبتاعتى وأنا وانتى تحت سقف واحد.
ملك: انا مش مصدقه يا سيف.
سيف: روح سيف وقلب سيف وعيون سيف.
بحبك اوى اوى يا ملك.
ملك: وانا كمان بحبك اوى اوى اوى يا سيف.

وغرقوا في حبهم وعشقهم وراحوا عالم تانى خالص كله حب وعشق ولهفه سعادة.

تمت