رواية نيشان للكاتبة روز الفياض الفصل الخامس عشر
هو اذا اني اتعجبت على نفسي هو شلون بعدين بكل الحالات اليوم غير اليوم شافني بفستان العرس شافني عروس يعني مو مريم مال يوميه اليوم مريم زوجته.
اشرلي بيده تعالي.
حسيت كلبي وكع برجليه مااتدنيت دخلت ميس كالت: المصوره هسه تجي دتحجي بالتليفون.
قيس هم بعده يحجي بالتليفون.
ميس: مريوم شطالعه اليوم اميره قليل والله احلى عروس شفتها بحياتي شهالنزاكه.
مريم: ياعمري ميوستي لو ماانتي وياي مااعرف اسوي شي.
ميس: اكولج؟
مريم: امم؟
ميس: شوفي قيس شلون يباوعلج من جوه ليجوه اثاريه مو هين هههه.
مريم: هههه لج ليسمعج.
ميس: قابل مجذبه دوري بس وشوفي شلون يباوع.
مريم: لج استحي كافي.
ميس: الله عليج دوري سوي نفسج على اساس ارتبلج الاكليل.
ضحكت بس درت على كيف بقيت مدنكه حتى متبين مقصوده بعدين رفعت راسي باوعلته شفته يباوعلي ويرجع يدنك والتليفون بيده.
درت على ميس كتلها: عفيه تليفون صار ساعه يحجي.
دخلت المصوره اخذنه لقطات حلوه وحده منهم كلتله ارفع البدله على اساس شايلها.
قيس: ليش يعني مااشيلها هي؟
المصوره: هههه اخاف ثكيله.
ضحكنه اني وميس هو باوعلي وغمزلي كال: لا اشيلها مو ثكيله. وحتى لو ثكيله.
استحيت متت من المستحه من شالني.
ميس والمصوره يضحكون هو مبتسم بعدين من خلصنه صعدنه بالسياره حتى يوصلنه اني وميس لبيت ليث مناك يجون ياخذوني.
بالطريق لزم ايدي احس كلبي يدك مثل هاي الفرقه مال الطيران مدري الدفوف.
ميس وليث كدام يسولفون ومشغلين اغاني واني وقيس هدوء كل شويه يدك تليفونه مره عمي مره غيث مره ماادري منو.
بعدين من وصلنه قريب البيت اتدنه يمي كال: هاي وين جانتلك قيس؟
مافهمت قصده رفعت البرنص التفتت عليه باوعتله كتله: شكو؟ شنو هي؟
قيس: انتي.
ابتسمت كتله: جنت اني بالطابق فوك وانت جوه ههه.
قيس: صحيح بس جنتي ظامه هالجمال للعريس لان جنت اخوج الجبير وانتي اختي الزغيره.
سكتت ضجت هسه وكته اخوج واختي هسه وكتها مواضيع الاخوه.
وصلنه ونزلتني ميس ودخلنه وهمه راحوا يجيبون الزفه.
بيبي من شافتني هي وامي خلصوها بجي بالليل من خلص العرس احنه حاجزين بالفندق اني مطلبت من قيس اي شي يخص الخطوبه او الزواج ماعدا الفندق كتله عالاقل نبقى ليلتين وافق.
لان جنت مستحيه ومااريد اغث زيد هو انتهى بالنسبه إلى وانتقمت منه ومااريد ازيد عليه اكثر كافي هيج.
من دخلنه للغرفه بالفندق طبعا ويانه امي وامه وبيبي نزعت البدله انطيتها لامي ولبست قميص نوم.
بيبي كلتلي مدام انتي كاعده اقري سورة النصر.
راحوا ودخل هو كعد يمي اني مدنكه ميته من الخجل يعني فد شي مو طبيعي كاعده بقميص نوم يم قيس.
لزم ايدي باسها وباس راسي كلي: سني يوجعني.
ضحكت كتله: بسم الله الرحمن الرحيم.
قيس: والله صحيح.
مريم: هههه ادري شسوي قابل جايبه الادوات وياي.
قيس: مو خوش دكتوره انتي المفروض تحسبين حساب الحالات الطارئه.
مريم: هههه تعذرني لان ماسامعه بأحد بليلة عرسه سنه يأذيه.
قيس: اني.
مريم: هههه معناها اكتبلك مسكن وتروح تجيبه من الصيدليه.
قيس: يالله ميخالف امري لله.
مريم: تحجي صدك؟
قيس: اي والله.
طلع ورقه وقلم من جيبه كتبتله اسم المسكن وراح يجيبه.
ظليت اضحك بيني وبين نفسي.
رجع دخل غسل وبدل وصلى وبعدين اتعشينه وشرب المسكن.
ظل الليل كل يارايح ياجاي يتمشى انقهرت عليه بس المسكن قوي المفروض هسه يبين مفعوله.
نعست الظاهر اليوم ماكو شي لان سنه يأذيه كمت فتحت شعري ومسحت المكياج واتغطيت ونمت.
هو محجه شي بقى يحوس بالغرفه.
غفيت كعدت الصبح لكيته نايم بره عالقنفه انقهرت عليه.
كعد راح غسل وصلى واجه كعد يمي جنت اباوع عالتلفزيون.
جابوا الريوك اتريكنه بدون كلام بعدين كتله: شلون صار سنك بعده يأذيك؟
قيس: لا الحمدلله احسن.
مريم: مانمت البارحه خلصتها رايح جاي.
قيس: اي والله لحدما بين مفعول المسكن يالله نمت. هاي فوائد الزواج من دكتوره اسنان ههه.
ابتسمت كتله: معناها لازم افكر جديا اخلي عندي عده احتياط وين مااروح هههه.
قيس: المفروض هههه.
خلصنه رحت لبست بجامه ورديه ورفعت شعري ذيل حصان عالي وخليت مكياج خفيف ورجعت كعدت بس مو يمه هو كاعد على القنفه يباوع فلم واني رحت كعدت عالقنفه المقابيله ظلينه نباوع عالفلم ونعلق ونضحك رغم الفلم ميضحك بس يمكن من التوتر.
اذن الظهر صلينه وبعدين طلبنه الغدا اتغدينه وراها طلب جاي شربنه وبعدين كعدنه نباوع مسرحية مدرسة المشاغبين شبعنه ضحك عليها.
لحدما خلصت صار العصر حيل كال: كومي خل نطلع.
كمت لبست فستان وخليت مكياج عادي ونزلنه.
رحنه اتمشينه بالمول بعدين كعدنه بالفود كورت طلبنه فنكر.
قيس: مريم؟
باوعتله كتله: امم؟
قيس: ابرار البارحه اجت.
جفلت شجابها اكيد سمعت حنتزوج كالت ارجع احسن واكعد على كلبهم.
مريم: شوكت؟
قيس: الصبح من جنتي بالصالون.
مريم: اييي؟