رواية نيشان للكاتبة روز الفياض الفصل التاسع
مرت عمي: اي صحيح بس شكول لاختي وهاي زعلت واخذت بناتها وراحت.
بيبي: اختج تعرف بتها وتعرف لسانها وتعرف بينه نريدله وليد يشيل اسمه.
وبتها زعلت الجلاب السود الزعلوا وبعد مارضوا ان شاءالله.
ضحكت نورس اني باوعتلها بيبي هم ضحكت امي وعمي ابتسموا.
بيبي: اصلا بعد الحجي الحجته مااقبل تدخل لهذا البيت بعد هذا البيت يتعذرها مدام طلعتنه ماعدنه شرف هالمتستحي.
وره مانزلوا بالليل امي ونورس واخواني ناموا واني بقيت كاعده ادرس بالغرفه دك تليفوني زيد.
مجاوبته رجع دك خليته صامت ظل يتصل رديت.
مريم: الو؟
زيد: الو مريم منو يمج اريد احجي وياج.
مريم: شتريد؟ مابينه حجي.
سكت شويه بعدين كال: مريم لتتزوجين قيس.
مجنت متوقعه كلامه سكتت كال: مريم دتسمعيني؟
مريم: اسمع.
زيد: لتتزوجين قيس اترجاج لتتزوجينه.
صبت دموعي اختنكت كتله: ليش؟
زيد: شنو ليش؟ شلون يعني تتزوجين اخوي؟
يعني شلون اتحمل اشوفج زوجة اخوي من كل عقلج؟
انقهرت من حجيه كتله: انت اختاريت انت عفتني واتخليت عني وهم جاي تحاسبني؟
زيد: تدرين بيه احبج والله بس مو بيدي شسوي؟
مريم: واني هم مو بيدي.
زيد: لخاطر ربج لتقبلين تردين تموتيني؟
مريم: انت بنظري متت فماكو فرق.
زيد: اتزوجي اي واحد ثاني بس مو اخوي مريم لتخبليني.
مريم: مو من حقك تحاسبني وتطلب مني اي شي بعدين الموضوع انتهى اني هسه بحكم المخطوبه لاخوك ولو سمحت لترجع تتصل برقمي ليروح قيس عبالنه اكو بينه شي احبك لو تحبني مثلا لاسمح الله.
سديت التليفون بسرعه ماانتظرت اسمع رده مااكدر اسيطر على دموعي بعد هيج حقاره ونذاله مشايفه بحياتي.
يكولي احبج ويكولي اتزوجي اي واحد ثاني بس مو اخوي غير حب هذا إلى يخليك تكدر تنطق وتتحمل تشوفني متزوجه واحد ثاني غيرك اخوك او غريب ماكو فرق وهو انت مقبلت بيه شلون الغريب وشنو هالوقاحه والجرأه إلى عندك حتى تطلب مني هيج طلب وجماله تكولي احبج ولتموتيني شنو هالانانيه معقوله كل هذا يطلع منك واني جنت احبك يمكن إلى صار مو بسيط بس الحمدلله إلى كشف حقارتك ونذالتك.
خلصت الليل ابجي والصبح كلت لامي انتي وصليني مااريد قيس يوديني فشلانه من اللي صار ومن الحجي إلى كالته مرته ومن كل إلى صار بسببي.
لبسنه ونزلنه وطلعنه نمشي للشارع اتصل قيس على امي كلتله طلعنه وصلنه للشارع شويه بعدنه واكفين وكف هو بسيارته يمنه ونزل.
قيس: خلص عمه رجعي انتي اني اوصلها.
امي: ياعمه تعبناك واذيناك وسوينالك مشكله ويه مرتك خلص بعد كافي عليك هيجي كفيت ووفيت.
قيس: رجعي عمه رجعي اني اوصلها ماله داعي هالحجي من ارجع بالليل نحجي ان شاءالله.
بقت امي واكفه هو فتحلي الباب ولزمني حتى اصعد بالسياره.
صعدت وامي سكتت واستحت رجعت للبيت واحنه رحنه.
قيس: لوما متصل ابقى كاعد انتظرج؟
مالي خلك احجي بس كتله: راح من بالي اتصل واكولك.
قيس: لا راح من بالج ولاشي. اصلا ماله داعي هالحركه اني طالع للدوام بيج وبلياج يعني مطالع علمودج حتى تستحين.
مريم: مو مستحيه.
سكت ماحجه ولا اني طول الطريق ساكتين.
وصلني وراح.
دخلت محاضرتين وره بعض بعدين جان عندي ريست ظليت كاعده بمكاني ميس اليوم مااجت ظليت وحدي اتصل قيس.
قيس: الو
مريم: الو هلو
قيس: هلو شلونج اليوم؟
اختنكت شلوني بعد زفت حالتي همزين ميس ماجايه مااريدها تشوفني ابجي.
مريم: الحمدلله.
قيس: عندج بعد محاضرات؟
مريم: هسه ريست لمدة ساعتين وراه محاضره اخيره.
قيس: معناها انتي وين؟
مريم: وين بعد كاعده بالقسم ميس مااجت اليوم ومااكدر اتحرك بحدي واستحي اطلب من احد يساعدني مااريد اصير مصلحجيه بس وقت الحاجه احجي وياهم.
قيس: ههه خوش يالله اني جاي شويه واوصل يمج بس اشوف ولد عندي شغله وياه واجيلج.
شويه واجه قيس سلم وكعد بعدين طلعنه كعدنه بره بالكافتيريا.
قيس: ماادري شحجي شلون اطلع الحجي؟
مريم: شتحجي هو بقى شي ينحجي واذا اكو واحد لازم يحجي فأكيد اني لان اني سبب هاي المصايب كولها.
قيس: ماكو مصايب ولاشي سهله. بس البارحه مصختها ابرار كولش يعني تجاوزت كل الخطوط الحمر.
مريم: صحيح بس مااكدر الومها حقها اي وحده بمكانها راح تسوي هيج.
قيس: مو صحيح بس هو غلطي اني جنت دائما اسكتلها من تحجي وتصيح لو من اول مره مأدبها جان تعلمت تحترم الناس وتثمن الكلمه قبل متحجيها يعني البارحه اتعاركت وياج وويه امي وابوي ووياي وويه زيد ومتعاركه ويه امج والحجيه ممبقيه احد.
طاحت دموعي كتله: ساعة السوده الرجعت بيها لو ادري هيج يصير والله ماارجع خليهم يكتلوني ويذبوني للجلاب ولا كل اللي صار.
قيس: يمعوده لتكبرين الموضوع مو مستاهله.
مريم: هو الموضوع اصلا جبير واحس الكل ينظرلي على انو اني خاينه عمي وعمتي وابرار ونورس وزيد كلهم واني اصلا احس نفسي مسويه جريمه.
قيس: جريمتيش تره إلى صار بيبيتج وامج وامي وابوي وزيد ونورس وحتى سجاد كل العائله جانا يتمنون يصير حتى يخلصون منها ومن لسانها.
مريم: اني اكول لو تروحلها وتحجيلها على القصه كولها احسن حتى تقتنع والله يهديها وترجع للبيت بدون مشاكل.