رواية مقبرة الحب الأول للكاتبة جيهان عيد الفصل الخامس والسبعون
هند: بابا ما اتجوزش بعد ما ماما ماتت زى ما قولت لك، بابا أتجوز وهي عايشة، حب بنت صغيرة وسابنا واتجوزها، ماما انحسرت على نفسها وماتت، تانى أسبوع بابا جاب مراته تعيش مكان ماما وعلى حاجتها.
كانت هند تحكى وهي تبكى حتى علا صوت نحيبها، ضمتها عزة إليها برفق وقالت: يا حبيبتى الله يرحمها.
هند: ماما تعبت قوى مع بابا، بدأت معاه من الصفر زى أى ست أصيلة، ولما ربنا كرمه راح يمتع واحدة تانية بخيره.
عزة: عشان كدة عايزة تاخدى أى واحد من بيته؟
هند: هما أحسن من ماما؟
عزة: لا طبعا، بس أنتى أحسن من مرات أبوكى، اللى انكوى من حاجة ما يحرقش غيره بيها، عموما إحنا لازم نروح لدكتور نفسانى يا هند.
هند: هينسينى ماما؟ هينسينى اللى بابا عمله؟ أنا بأضحك قدامكوا لكن نار جوايا، كل يوم أنام معيطة على ماما.
عزة: ما حدش بينسى اللى منه، أنا مثلا عمرى ما نسيت والدتى الله يرحمها، ولا والدى مع أنى ما شوفتهوش، ولا أختى، أهو الدكتور على الأقل هيخليكى تكونى طبيعية، تعيشى زى أي بنت في سنك، تميلى ناحية المناسب ليكى.
ذهبت هند مع عزة لطبيبة نفسية استطاعت بشكل كبير أن تجعلها تتخطى ما مر بها.
وكالعادة عندما تنجح قناة على اليوتيوب تحاول وسائل الأعلام استقطاب صاحبها مستغلة شهرته، حاولت أكثر من قناة التعاقد مع عزة لكنها رفضت كل العروض، عملها بقناة اليوتيوب لا يتطلب منها مغادرة منزلها، أما العمل بالقناة التلفزيونية يحتاج منها الذهاب إلى أستوديو مدينة الإنتاج الإعلامى لتسجيل الحلقات، وهي غير مستعدة لترك بناتها لحظة واحدة، حاولوا إغرائها بزيادة مبلغ العقد، لكنها رفضت وكالعادة لجأت إلى استشارة صديقاتها.
مديحة: غلطانة يا عزة إنك رفضتى، الشغل في التليفزيون حاجة تانية، أنتى متابعينك على اليوتيوب عددهم كام؟ اتنين مليون؟ تلاتة مليون؟ في التلفزيون انتى بتظهرى على مية مليون و أكتر في مصر لوحدها غير بقية الدول.
سلوى: وكل حلقاتك تقدرى تنزليها على قناتك على اليوتيوب وتستفيدى برضو منها.
عزة: أنا ما تفرقش معايا الماديات وانتوا عارفين.
سلوى: يا عزة مش كل الناس عندها نت.
عزة: ما أقدرش أسيب بناتى وبنت أختى خمس ساعات وأكتر كل يوم.
منى: ما البنات معاهم.
عزة: أنا لازم أتابع بناتى بنفسى، ما أقدرش أعتمد على أى حد غيرى.
مديحة: انتى معقدة الأمور ليه؟ هو انتى هتفضلى طول عمرك هنا في الزقازيق؟ معلش لكى مين هنا؟
عزة: أخص عليكى، ليا انتوا.
مديحة: يا حبيبتى إحنا هنفضل إخوات وأصدقاء طول العمر ؛ لكن إحنا نحب لك الخير، انتى اتنقلتى نقلة كبيرة، وما ينفعش تفضلي عايشة في شقة إيجار في الزقازيق.
عزة: قصدك إيه؟
مديحة: كان لازم تشترى شقة يا عزة.
عزة: منين؟ والله اللى جاى على قد الرايح.
سلوى: عارفين إن مصاريفك كتير، وإنك بتعملى خير كتير، وشغلك في القناة هيساعدك تكترى الخير ده.
مديحة: تقدرى تشترى شقة في أكتوبر أو حتى تأجرى على ما ترتبى امورك، وكدة هتوفرى وقت المواصلات ومش هتغيبى عن بناتك إلا مدة الحلقة.
بالفعل قبلت عزة العمل بإحدى القنوات التي طلبت التعاقد معها، ومن مبلغ العقد اشترت شقة صغيرة قريبة من مدينة الإنتاج الإعلامى واستوديوهاتها.
أطلت عزة على المشاهدين لأول مرة في رمضان مثل الشيخ عبد الرحمن، وفي نفس القناة التي يقدم برنامجه بها.