رواية للعشق وجه آخر للكاتبة سحر فرج الفصل الخامس عشر
فارس مسك موبيله بسرعه ورن عليها بس للاسف لقاه مغلق
الكل بدأ يتوتر وبدأ كل واحد يدور في مكان وكأن الارض انشقت وبلعتها
اتجمعوا كلهم تانى بعد ما لفوا مدينه الملاهى كلها والكل كان بيدور في كل شبر فيها.
سلمى: احنا غلطنا اننا سبناها لوحدها ودخلنا كلنا بيت الرعب.
كان المفروض حد فينا يفضل معاها.
همس بدأت تعيط وكرم بيهدى فيها وقالها هنلاقيها انشاء الله اهدى بقى.
عبد الرحمن، طيب نعمل ايه دلوقتى نبلغ الشرطه ولا نعمل ايه.؟
فارس: لا شرطه ايه احنا لازم نرجع ندور تانى.
عبير: طيب ايه رايكم نتصل في البيت ونقولهم علشان يدوروا معانا.
فارس: تسمحى تسكتى انتى خالص دلوقتى ونقطينا بسكاتك.
احنا لو اتصلنا بالبيت الدنيا هاتتقلب وممكن جدتى يحصل لها حاجه من الخوف عليها.
عبد الرحمن: طيب ايه رايك يا فارس هاتصل انا بالهام وكأنى بتصل عادى اطمن عليهم كلهم.
فارس: اللى تشوفه اعمله يا عبد الرحمن.
عبد الرحمن مسك موبيله ورن على الهام أخته.
عبد الرحمن: الو ازيك يا حبيبتي عامله ايه واخباركم كلكم ايه.
الهام: الحمد لله يا عبد الرحمن انتم عاملين ايه والبنات همس ويسر عاملين ايه معاكم.
عبد الرحمن.؟ الحمد لله يا الهام كلنا بخير.
الهام: طمنى على يسر عامله ايه اوعى تكون تعبانه لسه.
عبد الرحمن: لا تمام كويسه والكل كويس سلام بقى علشان هانكمل لف في الملاهى.
فارس وسلمى في بوق واحد.
ايه ده يعنى يسر ما روحتش
هاتكون راحت فين طيب.
كرم، أهدوا كده يا جماعه وخلينا نفكر هانعمل ايه.
همس: يا ترى انتى فين يا يسر وفضلت تعيط جامد وسلمى بتهدى فيها.
همس: يسر يا عمتو. يسر هاقول ايه لماما دلوقتى.
يسر كانت قاعده في العربيه من ورا وريهام عماله تكلمها وتتعرف عليها.
فلاش باك.
يسر وهي ماسكه الموبيل ولقيته فصل شحن كانت بدأت تزهق وقررت انها ترجع على البيت.
وهي ماشيه في الملاهى لقيت واحد وواحده ماشين وبيتكلموا مع بعض.
يسر: لو سمحتوا ممكن اعرف لو حبيت اروح موقف العربيات اللى بتودى على قريه الجبلاوى أروح ازاى.
ريهام: ايه ده انتى من قريه الجبلاوى.
يسر: لا ابدا انا عمى وجدتى القصر بتاعهم هناك.
وانا كنت هنا مع ولاد عمى بس توهت عنهم.
عمر: ايه ده انتى بنت اخو الحاج حسين؟
يسر: اه انت تعرفه؟
عمر: يا بنتى احنا بيتنا لازق جنب القصر على طول وكنا مروحين دلوقتى انا واختى ريهام.
ريهام: ايه ده اهلا بيكى يا: وسكتت.
يسر: انا يسر
ريهام: وده عمر اخويا صاحب كرم وفارس.
يسر: اهلا بيكم.
طيب ممكن تورونى موقف العربيات اللى هنا.
عمر: وعربيات ليه احنا معانا العربيه بتاعتى وياريت تيجى معانا واحنا نوصلك في سكتنا.
يسر: بس هاتعبكم معايا.
ريهام: ولا تعب ولا حاجه احنا طلعنا معارف اهو وعيب نسيبك لوحدك ونمشى.
يسر: تمام انا موافقه.
ركبت معاهم العربيه وبدؤوا يتعرفوا على بعض اكتر واتصحبت على ريهام وعرفتها انها في كليه صيدله هي وهمس اختها وأنهم عايشين في اسكندريه.
وصلوا بالعربيه اودام القصر ونزلت يسر وعزمت عليهم انهم يدخلوا معاها جوا بس هما اعتذروا وريهام اتفقت معاها انها هاتعدى عليها باليل ويسهروا مع بعضهم.
ودعتهم يسر ودخلت على جوا واول لما دخلت استغربوا اوى انها راجعه لوحدها.
الهام: ايه ده انتى لوحدك ليه يا يسر فين الباقى؟
يسر: حكت لامها وجدتها وملك مرات عمها كل اللى حصل.
وقالت لهم انها زهقت ورجعت من غير ما تعرف حد منهم.
الهام: وازى تعملى كده يا يسر زمانهم بيدوروا عليكى في كل حته دلوقتى.
اكيد علشان كده عبد الرحمن اتصل بيا وكلمنى.
انا لازم اتصل بيه دلوقتى واطمنهم انك رجعتى.
الهام مسكت موبيلها واتصلت على اخوها. بس ما كنش بيرد عليها.
عبد الرحمن لما موبيله رن ولقى انها الهام خاف يرد عليها.
ملك: خير يا الهام رد عليكى؟
الهام لا يا ملك؟
ملك طب استنى انا هاتصل بفارس.
اتصلت ملك بفارس واول لما رد عليها.
ملك: ايوا يا فارس انتم فين؟
فارس، بصوت مخنوق. ايوا يا امى احنا لسه في الملاهى قاعدين شويه ليه في حاجه.
ملك: يسر رجعت يا فارس هاتوا بعضكم وتعالوا بسرعه.
فارس: بتقولى ايه يا امى يسر روحت.
ملك: ايوا يا فارس يسر اهى قاعده اودامى.
فارس، رجعت ازاى المجنونه دى.
ملك: مش وقته يا فارس هاتوا بعضكم وتعالوا.
فارس قفل الموبيل وطمن الكل أن ملك روحت.
عبد الرحمن: طب ازاى؟ روحت ازاى دى؟
رجعوا على القصر ودخلوا على جوا.
وملك بدأت تحكى ليهم على كل اللى حصل مع يسر.
فارس: يعنى هي كويسه؟
ملك: اه يا فارس هي كويسه وطلعت مع مرات عمك على فوق.
حسين كان راجع من برة ولقى الحوار ده شغال واستغرب هما بيتكلموا على مين.
حسين: خير يا جماعه في حاجه.
عبير: اه يا عمى حسين يسر تاهت مننا وقعدنا ندور عليها ولفينا الدنيا عليها واتاريها رجعت على البيت من غير ما تقول لحد فينا.
حسين: ازاى يا فارس وانت يا كرم كنتم فين لما بنت عمكم تتوه عنكم؟ انتم رجاله انتم اخص عليكم.
كرم: عجبك كده يا عقربه وقعتى الدنيا في بعضها يا عبير هانم.
فارس: عندك حق يا حاج أحنا غلطانين واوعدك انها مش هاتتكرر تانى.
طلع الكل على فوق علشان يغيروا هدومهم بعد ما حسين اداهم درس كويس.
جه الليل وريهام جت زى ما وعدت يسر علشان يقعدوا مع بعض وتتعرف على همس اختها.
يسر: اهلا وسهلا بيكى يا ريهام نورتى.
ريهام: الله يخليكى يا يسر.
فين همس عاوزة اتعرف عليها شوقتينى أنى اتعرف عليها؟
يسر خدت ريهام وطلعت على اوضتها هي وهمس اللى كانت بتتكلم مع كرم في التليفون وقفلت معاه اول لما يسر جت.
يسر: همس دى ريهام اللى كلمتك عنها.
همس، اهلا وسهلا بيكى يا ريرى.
ريهام: اهلا بيكى انتى يا همس. ايه ده انتم شبه بعض اوى اوى.
وانتم الاتنين احلى من بعض.
يسر شكرا يا ريهام انتى اللى قمر.
فضلوا قاعدين مع بعض ويتكلموا عن حاجات مروا بيها وقربوا من بعض اوى وريهام كانت فرحانه انها اتعرفت عليهم.
طلع نهار يوم جديد وكانت يسر واقفه في شباك اوضتها وسرحانه في الشمس والنور وجمال جنينه القصر.
فارس كان صحى من بدرى وكان بيلعب رياضه في الجنينه.
وكان لابس فانله كت موضحه عضلات دراعه وبنطلون ترنج وده اللى لفت نظر يسر وفضلت باصه عليه وهو بيلعب وسرحت معاه. وفيه وفي شهامته ورجولته
وكان فارس طويل وشعره اسود ناعم وعيونه بنى فاتح.
وده اللى لفت نظر يسر وكأنها اول مرة تشوفه.
فارس بيرفع رأسه لقى يسر واقفه في الشباك فسلم عليها وقالها صباح الخير وابتسم لها.
يسر من جواها فرحت اوى أنه اخيرا ابتسم لها وكلمها.
وخدت بعضها ونزلت على تحت تروح تشوفه في الجنينه.
ويا دوبك لسه خارجه الجنينه وهي مبتسمه وفرحانه اوى بصت واتفزعت من اللى شافته
يا ترى يسر شافت ايه وايه اللى خلاها تتصدم من اللى شفته.