رواية غوثهم يا صبر أيوب ج2 للكاتبة شمس محمد الفصل السادس والثلاثون
كان يُقال دومًا في العرب قديمًا
مما يدل على قوة بلاغتها في الكلام،.
إذا نزلت في أرضهم فأرضهم، وإذا نزلت في دارَهم فدارهِم، وإذا نزلت في حيّهم فحيِّهم، وفي الحقيقة أحيانًا أَظُنكِ امرأة عربية من قديم الزمان وكأنكِ أندلسية الفؤاد، فحينما قابلتُكِ صُدفةً بالطريق أصبحت خُطاكِ هدًا لي وأضحت هي الطريق بذاته، وحينما ساقتني الحياة إليكِ وأمسيت في أرضكِ راضيتيني وفي مقر الروح آنستيني، ويوم أن تواصلت المُقل ببعضها بعينيكِ حييتيني، حينها أدركت أن الروح للروحِ تطمئن وأنتِ وحدكِ من بين كل العالم من شعرت بقربها أنها أن الروح للروح تَحن، كُتِبَ الوصال بين أفئدتنا، والإطمئنان أهديناه لبعضنا، والروح للروح ناغمتها وكأن المقر وجدته عند رفيقتها هُنا، لذا كرر الفؤاد دعوته بألا يُحكم بيننا بالغياب، ولا توصد في أوجه حُبنا الأبواب، فاللهم أكتب لنا مكانًا في جنتك سويًا كما كتبت لنا اللقاء في الأرض بغير حساب.
الحق دومًا يعود بكل الطُرقات مهما كانت، وأكثر الحقوق التي تعود هي تلك التي يسعْ خلفها مُطالبٌ يُقدم الاستبسال بكل ثنايا روحه، لذا عند عودة الحقوق لأهلها لا تتعجب، بل خُذ العِبرة من أهلها وتمسك بحقك، فإذا لم تسعْ أنتَ من سيفعلها غيرك ويسترد لك ما سلبه منك الآخرون؟
تلقى سامي الصفعة الجديدة فوق وجهه صارخًا بغلٍ دفنه في قلبه كما تُدفن الأجساد أسفل الرُكام، وقد ضرب هاتفه بعرض الحائط حتى تهشم ثم ألقى السُباب البذيء يلعن به يوسف وابنه أيضًا وقد هرول له عاصم من فوق الدرج كأنه يقفزه ثم سأله بدهشةٍ جلية من تحوله المُريع:
مالك يا سامي؟ حصل إيه لكل دا؟
صرخ فيه بإنهيارٍ وإنفعالٍ جمٍ مصحوبٍ بنظراتٍ مشتعلة كما الجمر وكأن أحطاب القرى تأججت بيها النيران المُضرمة بداخل صدره:.
ابن خد نادر وخد كل حاجة عنده حتى حسابه في البنك، طلع مرتبلها من بدري وفتح عليا النار مع نزيه اللي مصمم ياخد حق بنته بعد اللي البيه حيلة أمه عمله، قولي أهدا إزاي ولا أجيب عقل منين وأنا كل يوم في فضيحة شكل ومشكلة أكبر؟ نادر بيحط صوابعي تحت ضرس يوسف والتاني ما صدق رسمله دور الحنية، يوسف عمل اللي عيشت عمري كله خايف منه، وكان الحل إننا نقتله، بس أنتَ مرضيتش.
شمله عاصم بنظرةٍ كريهة ثم أندفع بصوتٍ حاد يهدر في وجه رفيقه كأن النيران توقدت فيه هو الآخر:.
هي كل ما حاجة تحصل تقول كنا نقتله؟ نقتل مين؟ دا كان عيل صغير لسه، آه أنا عندي مشكلة معاه لأنه نفس حماقية أبوه، بس مش لدرجة أقتل عيل، وأنتَ بنفسك حاولت قبل كدا وفشلت، سيب نادر أنا هرجعه بطريقتي ليك من تاني، وسيبك من يوسف علشان دلوقتي إحنا مش قده، دا واحد معاه نَعيم الحُصري ومعاه عبدالقادر العطار يعني الاتنين دول عندهم جيوش تنهش لحم اللي يقرب منهم، متتهورش وتعمل حاجة تخليك تخسر تاني، ابنك أنا هرجعهولك تاني.
تنهد سامي يُهديء من روعه قليلًا ويُطفيء نيران الغليون المتقد بداخله ثم هبط بجسده فوق الأريكة يمسح وجهه بينما مادلين فوقفت فوق الدرج تتابع ما يحدث بعينين لامعتين بوميض التشفي الخالص وهي تلتقط هذا المشهد وأرسلته ل يوسف، فكُرهها لذاك البغيض تضمره في قلبها منذ أن خطت بقدميها مقر العمل ووجدته يحاول إبعادها عن عاصم لذا كانت تشعر بالنصر الخفي وكأنها هي من استردت الحق لنفسها بنفسها.
كتبت فوق المقعد رسالة تمازحه بها ثم تحذره:
ريحة شياطه واصلة لعندك أكيد، بالشفا عليه هو يستاهل فعلًا كل خير، فهم ناجي المحامي بس يفضل على نفس كلامه لحد ما الإجراءات تخلص لأنه أكيد هيحاول يتصرف تاني، متنساش دي.
تمام، متقلقيش أنتِ.
هكذا أرسل لها ثم ولج المِصعد لكي يتوجه إلى شقته ينعم بالنوم ولو قليلًا بعد يومٍ أتعبه وواجه به الكثير والكثير وقد نجح في إخفاء كل شيءٍ يؤلمه، وما إن وصل عند أعتاب شقته وصله صوت الصيحات والغناء فعقد حاجبيه وتوجه نحو الأعلى ليجد أصوات النساء عالية وقد وجد الباب مُغلقًا لكنه ميز صوت غناء زوجته المرمري، وصوت ضحكة ضُحى العالية بصوتٍ رنانٍ جعله يبتسم ساخرًا ثم نزل شقته وهو يسخر من نعيم الجهل الذي يعيش فيه البعض تاركين خلفهم البعض يُعاني في جُب شقاء المعرفة.
في الأسفل توقفت سيارة أيهم وقد سبقه شقيقه نحو البيت برفقة الصغير لكي يُطمئن والده فيما أنتظر أيهم زوجته وشقيقته ومعهما جنة أيضًا وما إن نزلن له أبتسم هو لهن وهتف يمازحهن بقوله:
فرفشتوا؟
كتمت نِهال ضحكتها وكذلك فعلت شقيقته فيما استأذنت منهم جنة بالرحيل لكنه أنتبه لها وهتف بثباتٍ:
استني هوصلك مش هينفع تمشي لوحدك دلوقتي، أركبي يلا معاهم علشان والدك برضه ميزعلش لما ترجعي لوحدك كدا بليل.
أومأت موافقةً ثم جلست بجوار آيات في الخلف فيما أقترب من زوجته يسألها بنبرةٍ ضاحكة رغم محاولته لوأد تلك الضحكة:
فرفشتي يا نِهال؟
أومأت برأسها موافقةً فيما مال هو يسألها بنبرةٍ خافتة:
طب هينوبنا حظ من الفرفشة دي؟ ولا هو أنا ماليش نفس خالص يعني وهفضل في نكد مع الذكريات؟ والله أنا لُقطة حرام تضيعيني منك، استثمري فيا طاقتك أحسن، أنا أولى من الغريب.
أدهشها بحديثه لكنها أشارت على كلتا عينيها وهتفت تُجاريه في الحديث بقولها المرح بعض الشيء:
عيوني ليك يا أيهم هو أنا أقدر أقولك لأ؟
أدهشته بما تفوهت به ثم تركته وفتحت باب السيارة تستقر فوق المقعد المجاور له وقد جلس هو وأدار المُحرك ثم أنتبه لشقيقته في الخلف يهتف بتحذيرٍ خفي:
خلي بالك بس يا آيات علشان اللي بيرجع في كلامه مناخيره بتكبر أوي، أنا قولت أعرفك بس علشان متنسيش.
عقدت آيات ملامحها وجعدت جبينها باستنكارٍ لما يتفوه به وقد لمحت نِهال مقصده من الحديث من خلال نظراته فيما قاد هو السيارة بعدما ومض بجفنه لزوجته خفيةً دون أن يلتقط غيرها حركته تلك وكأنها تورطت مع هذا المُتحذلق.
في بعض الأوقات يصبح لكَ حقًا دون أن تعرفه أنتَ، حينها تصبح الحقوق واجبًا لكَ وفرضًا على من سلبها أن يردها لكَ، لكن ما يساور العقل حينها من شكوكٍ هي تلك التساؤلات التي تساور العقل؛ هل كل الحقوق أهلها يستحقونها؟
أنتهت الرحلة في وقتٍ قياسيٍ وقد عاد الإثنان من محافظة الإسكندرية وقد توجها نحو شقة نجلاء بعد منتصف الليل معهما الطعام الخاص بهما وقد أرسل تَيام رسالة لأمه يخبرها بقدوم صديقه معه وقد تحدث بيشوي بضجرٍ من العمل والتوقيت وكل شيءٍ:
ياريتني ما قولت لأمي إني هبات هناك أهي مشيت وراحت تبات عند يولا يلا يا عم خلينا ناكل علشان أنام، وأدي آخرة اللي يسمع لتاجر بعد كدا.
كان مُتذمرًا بسبب إضطراب سير العمل وإنتهائه في وقتٍ مُغاير للوقت الأساسي مما أوجب عليهما الرحيل لمحافظة القاهرة ثانيةً وقد خرجت ني ين من الشُرفة تَضبُط الحجاب فوق رأسها ثم هتفت بتهكمٍ لاذعٍ:
خير؟ مش قولت إنك هتبات في إسكندرية؟
أنتبه لها كلاهما وقد هتف تَيام ببرودٍ ردًا عليها:.
وربنا أراد ويسر علينا الشغل وجينا، يبقى نبات ليه هناك بقى؟ بعدين ماما فين؟ هي مبتنامش وأنا مش هنا وأنا كلمتها وقولتلها إني راجع تاني.
سخرت منه بملامحها وشملته بنظرة تقليلٍ ثم نظرت لرفيقه وتحدثت بنفس التهكم اللاذع لكن تلك المرة بإهانةٍ صريحة لهما:.
وهو دا يسمحلك تجيب في البيت اللي أنتَ عاوزه وتقلبها تكية؟ مش المفروض تراعي صحاب البيت وإنك مالكش الحق فيه زي الأول؟ إيه عذرك دلوقتي؟ الأول وماكنتش تعرف لكن دلوقتي خلاص عرفت إنك مالكش حق هنا، لو عندك دم أمشي خلاص، هي مُحرجة بس أنا مبتحرجش.
كانت تتحدث بكرهٍ صريحٍ له ولم تُبال بما فعله حديثها في قلبه لكنه قرر أن يُناطحها بنفس طريقتها فرفع صوته يهدر بإنفعالٍ ثأرًا لكرامته المهدورة:.
أنتِ مالكيش إنك تتكلمي أصلًا، غصب عنك وعن الكل هي أمي ومش هسيبها ولو كنت ناوي بعد كلامك دا مش هسيبها وأنتِ مالكيش حق تتدخلي بيني وبينها، هي أمي ولو أنتِ مش مقدرة دا أنا مقدره، وغصب عن عيلتكم كلها مش هسيبها.
رأته يدافع ويتحدث وحينها طالت قلبها نيران الغيظ منه فضحكت تستهزيء به ثم صفقت بكلا كفيها معًا بحركةٍ سوقية وتحدثت بنبرةٍ تهكمية عالية:.
لا يا راجل؟ صدقتك يا واد كدا، أنتَ قاعد بس لحد ما تضمن إنها تسلمك كل حاجة وتديك الورث والفلوس والشقة وتبقى كوشت على كله خلاص، عمال تلعب في دماغها وتعلقها بيك علشان تسرسب منها اللي معاها كله، بس على مين يا بابا؟ دا أنتَ قبل ما تاخد جنيه واحد هكون خالعة عينيك، مش برضه بابا طلع راجل مبسوط وغني؟ مروحتلوش ليه؟ ولا هو قالك لم الغَلة وتعالى ويبقى زيادة الخير خيرين؟
بالطبع هي كغيرها من البشر لا يهمهم إلا الأموال وسوء الظن في الآخرين خوفًا على الأموال والنقود وقد زاغ بصره وظل يُتابعها بعينيه مصدومًا كمن تلقى ضربة فوق رأسه من الخلف وقد وقف بيشوي بصمتٍ يحاول تمالك نفسه قبل أن تمر الدقائق ويصفعها فوق وجهها، وإبان حرب النظرات تلك خرجت نجلاء من الداخل وحينها توجهت الأنظار نحوها وهي تسأل بنبرةٍ جامدة:
هو إيه اللي بيحصل؟ في إيه.
خشى عليها أن تعلم بما حدث فأقترب منها يهتف بلهفةٍ:
مفيش يا ماما، هي خالتو بس مستغربة إننا رجعنا وكانت بتهزر معانا وصوتنا على شوية، أدخلي كملي نوم أنتِ بس، ولا أقولك أقعدي كُلي معانا إحنا جايبين أكل حلو وعامل حسابك.
قلبه لازال بريئًا يتراجع عن تهور القرارات بمجرد نظرةٍ ممن تسبب في حزنه وقد تدخلت ني ين تهتف بنفس الطريقة التي لا تُحتمل حتى من مجرد النطق:.
لأ يا شيخ؟ تصدق إنك حرباية بتتلون ياض أنتَ؟ أكيد مش هتقولها إنك شتمتني وغلطت فيا وعليت صوتك كمان، طبعًا هتخاف تغضب عليك وتحرمك من اللي أنتَ حاطط عينك عليه، بس دا بعينك قبل ما تطول قشاية واحدة بس، ويا أنا يا أنتَ هنا بقى.
ألتفت لها بعينين مُتقدتين وهتف بنبرةٍ هادرة:.
ما تخرسي في ليلتك دي، قولتلك مش عاوز أسمع صوتك ومتدخليش بيني وبينها، وبتتكلمي بأنهي أصل؟ وأنتِ كل اللي همك الفلوس وخلاص، هاتيلي مرة خوفتي عليها علشان هي أختك ولا علشان بتحبيها، كل كلامك علشان الفلوس واللي عندها وبس، يا ستي خديهم وأنا هديكِ قدهم عشر مرات بس مشوفش وشك تاني في حياتي.
قبل أن يُكمل حديثه أتته صفعة من كف ني ين فوق وجهه تُصمته بها وقد توسعت عيناه ما إن طال كفها شطر وجهه وأرتجف قلبه يستشعر قوة الإهانة التي تعرض لها وقد صرخت نجلاء وهي تُعنف شقيقتها وتدفعها بعيدًا عن ابنها وحينها تدخل بيشوي يسحب رفيقه ثم هدر في وجه نجلاء بغضبٍ:.
أنا كل مرة كنت باخد صفه هو علشان بحسه بيتعب نفسه وسطكم، بس بعد اللي حصل دا أبقي قابليني لو شوفتيه تاني، ولولا العيبة ولو كانت أختك دي راجل كنت رديت القلم عشرة فوق وشها، بس أنا هعمل بأصلي، وأنتِ لما تفوقي لنفسك وتقدري قيمته أبقي دوري عليه تاني، ودلوقتي أبوه أولى بيه منكم، والله يعينكم بقى لما يعرف.
تهديده كان سلاحًا واراه خلف كلماته الغاضبة ثم سحب رفيقه الذي هربت عبرات من بين أهدابه كأنه صغيرٌ تشرد ليلًا أسفل المطر ولم يجد المأوى الذي يلتحد به، كانت مشاعره مُتصدعة كنهرٍ جارفٍ تصدع باطن الأرض أسفله وأدى إلى شقه بطريقةٍ أخرجت الدماء من باطن الروح.
سار مع رفيقه دون أن يعي لنفسه ولا لأي شيءٍ إلا الإهانة التي تلقاها على يد تلك المرأة ثم أتت الذكريات كضيفٍ ثقيل الوجود تذكره بكم الإهانات التي تعرض لها منذ صغره وتواجده في تلك العائلة وهو يعامل بأصله الذي لا يعلمه سواهم وأنه مجرد فتى لقيط تعطف عليه شقيقتهم.
في الأعلى ظلت تبكي وهي تصرخ باسمه من فوق الدرج وتتوسله ألا يرحل عنها وقد ألتفتت لشقيقتها تصرخ في وجهها بإنهيارٍ:.
ليه كدا حرام عليكِ، دا أنا ما صدقت أرتاح لما يعرف الحقيقة وبرضه يفضل معايا، ليه بتحرميني منه يا ني ين أنا ماليش غيره وهو لسه ميعرفش حاجة عن الدنيا دي غيري، دا واحد ساب أبوه علشاني، منك لله علطول مكرهاه في عيشته.
سحبتها الأخرى لداخل الشقة ثم أغلقت الباب ونطقت بإندفاعٍ بلغ أشده في الصدى والوصول:.
ما كفاية بقى يا نجلاء فوقي لنفسك، سيبتي العيلة وسيبتي كل حاجة علشانه حتى أخواتك نفسهم، خلاص دورك خلص كدا، هو لقى أبوه وخلاص مش هيفضلك عليه، وفلوس أبوه مش هتخليه محتاجلك تاني، أكبري بقى وبصي حواليكِ، هو مشي من هنا مش هيرجع تاني هنا، فوقي بقى، وعلى فكرة هو لو عنده دم بجد مش هيرجع تاني هنا، لو رجع يبقى كل همه الشقة والفلوس.
توسعت عينا نجلاء وهي تستشف حقد شقيقتها على ابنها وقد أولتها ظهرها وهي تقول بصوتٍ مختنقٍ:
الصبح تروحي لجوزك وعيالك يا ني ين وموضوع ابني مالكيش دعوة بيه، إن شاء الله ياخد روحي كمان معاه بس يبقى كويس، ولو على اللي عندي مبقاش محتاجه خلاص، أنا اللي محتاجاه علشان أنا اللي ماليش غيره، عن إذنك يا أختي يا كبيرة.
تركتها وولجت غُرفتها ثم أغلقت الباب وهي تبكي فوق الفراش مع نفسها وكأنها تُدرك لتوها أنه وبكل آسفٍ ضاع منها وتفرقت طرقاتهما سويًا وتقطعت السُبل التي تألفت فيها القلوب مع بعضها رغم غُربتهما عن بعضهما من الأساس، أنتحبت وتقطعت أنفاسها باكيةً وهي تتمنى أن يعود لها رغم أنها في كل مرةٍ كانت تُخطيء وتتمادى بسبب حبها لعائلتها.
بعد مرور الكثير من الوقت أوقف بيشوي سيارته أمام بوابة بيت نَعيم وقد تحدث مع مُحي الذي وقف في إنتظارهما وما إن وصلا له أقترب منهما واستنبط حال شقيقه فسأل بحيرةٍ ساورت عقله:
هو ماله يا بيشوي؟ حصل حاجة؟
حرك رأسه نفيًا ثم هتف بثباتٍ يُطمئنه:
متقلقش هو بس تعب شوية بسبب السفر والشغل فقولت أجيبه هنا أحسن علشان والدك ميقلقش عليه، خلي بالك منه وحاول تخليه ياكل علشان هو ماكلش، عن إذنكم.
سلمه رفيقه الذي أمتن له بنظراته ثم بادله الوداع وقد لاحظ شقيقه أنه ليس على ما يُرام وقبل أن يسأله هتف تَيام بصوتٍ مُتعبٍ كحال روحه المصفوعة وكبريائه المكسور:
أنا نفسي أنام ممكن؟
أومأ له شقيقه موافقًا ثم أرشده لحيث غرفته وما إن ولجها فتح له الخزينة وأخرج منها ثيابًا بيتية ثم أشار لحيث المرحاض وهتف بهدوءٍ تام وحنوٍ يظهر فقط لأجل شقيقه:.
أدخل غير هدومك وألبس الترينج دا وأنا هنا معاك أهو هانزل أسخنلك الأكل وآجي، تحب أجيبلك علاج أو أقيسلك الضغط؟ يمكن دا اللي تعبك كدا؟
حرك رأسه نفيًا ثم ولج المرحاض وبعد دقائق خرج منه يجلس فوق الفراش وهو يتذكر صدى الصفعة فوق وجهه وكيف أصابت شموخه وسمو نفسه بتلك الطريقة التي كانت مثل القشة التي انتصفت في ظهر البعير وقد ولج له مُحي من جديد وهتف يمازحه بقوله:.
أنا عمري ما جيبت كوباية مياه لنفسي، تخيل علشانك سخنت الأكل وغرفته كمان، تصدق برضه فكرة أفتح بيها كلام مع الستات بعد كدا يمكن تجيب أسرع شوية.
أبتسم شقيقه مُرغمًا على ذلك وكأن الضحكة تُزاحم ملامحه المُقتضبة بحزنٍ ثم هتف بأسفٍ لكونه لن يستطع تناول الطعام:
تسلم إيدك بس أنا ماليش نفس والله، معلش بقى تعبتك وصحيتك، بس أنا حاليًا عاوز أنام بس مش عاوز حاجة تانية والله، ينفع أنام بس شوية وبكرة ناكل مع بعض.
نحى مُحي الطعام جانبًا ثم سأله بترددٍ:
طب ينفع أبات معاك هنا النهاردة؟
ياريت.
هكذا جاوبه تَيام بلهفةٍ يُرحب بإقتراح شقيقه الذي أراده هو وقد ركض له مُحي حتى اهتز الفراش وهتف تَيام ساخرًا بضحكةٍ مكتومة:
بالراحة يا أخي السرير عليه أقساط.
ضحكاتهما علت في الغرفة وقد ضمه له تَيام الذي تناسى حزنه إلى حدٍ ما ثم طوق شقيقه بكلا ذراعيه والآخر وضع رأسه فوق كتفه ينعم بالسلام مع شقيقه ويسلب من الوقت ما سبق وسُلِبَ منه، الأخوة دومًا حتى لو كان الفارق بينهما بوسع السماء والأرض يصبحون ملجأ الأمان في أكثر لحظات الإحتياج، كعضوٍ واحدٍ إذا اشتكى منه جزءٌ تألمت لأجله بقية الأجزاء.
يُقال أن الضجيج هو الصوت الغير مرغوب فيه، فالأمر يُصبح إجبارًا على المرء وإلزامًا له، لذا في بعض الأوقات لا يُحتمل الضجيج الذي لا يتوقف بداخل الرأس، ولا الأصوات التي تنشب عنها فوضى عارمة كأنها ثورة غير سلمية ينتج عنها الخراب في أرجاء المدينة التي كانت عامرة ثم طالها الخراب.
في صبيحة اليوم الموالي بعد شروق الشمس مباشرةً. خرج يوسف من المسجد بعد أداء فريضة الفجر ثم توجه إلى جواد مباشرةً بعدما علم أن هذا هو الوقت المناسب لكليهما بسبب الأعمال المنكوبة فوق كاهلهما، وقد وصل إلى هناك بعد ظهور الشمس علنيًا بلمعتها الذهبية الفاقعة وقد ولج العيادة له، الأمر تلك المرة كان أسهل وأيسر من السابق حيث أعتاد على العيادة سريعًا وولج الغُرفة وجلس في الموضع المخصص له فسأله الآخر بثباتٍ وطريقةٍ أقرب للعملية:.
أظن أنتَ من نفسك فاهم إنك محتاج للمكان دا، فبراحتك خالص أنا بسمعك أهو وعاوزك تتكلم وتقول كل اللي نفسك فيه وأي حاجة تخطر على بالك، وبعدها أنا هسألك.
تنهد يوسف وأغمض عينيه ثم هتف بضياعٍ:.
إمبارح أنا عملت حاجات كتير أوي، بس صحيت من النوم مش راضي عن أي حاجة من دي، استغربت نفسي أوي، أنا كنت واخد قرار إني لا يمكن أساعد نادر وساعدته، وقولت لا يمكن أسمع ل فاتن وأساعدها بس إمبارح أنا اتصرفت كل التصرفات من غير وعي، مجرد ما أتعصبت عملت اللي عملته كله، والصبح كل حاجة أتكررت قدامي كأنها كُرباج بيجلدني، السؤال هنا إزاي أرضي اللي جوايا كلهم، أنا دلوقتي مش طايق وش نادر وإمبارح كنت بساعده! أنتَ مُتخيل أنا بيحصل فيا إيه؟
كان ضائعًا وتائهًا وسط نفسه، الحرب عاتية عليه وهو لا يملك لها سلاحًا، الطاقة لديه فرغت تمامًا وأضحى مستنزفًا ككلٍ، الكثير والكثير أصابه وعاد له برفقة الذكريات وقد حمحم جَواد بقوةٍ ثم داهمه بسؤالٍ لم يتوقعه:
قولي يا يوسف أنتَ لسه فاكر أصعب لحظة عدت في حياتك؟ أكتر موقف لسه مخليك بتتكهرب لما تفتكره.
أبتلع يوسف لُعابه وأغمض عينيه يهرب من تلك الذكرى التي تشكلت كلوحة حزينة في عينيهِ ثم هتف بصوتٍ مبحوح:.
اليوم اللي صحيت فيه على صريخ فاتن لما خبر الحادثة جه، كنت نايم ساعتها علشان عندي إمتحان وصحيت الفجر على البيت كله صريخ وصويت والدنيا مبهدلة، كنت فاكره حلم، أكيد دا حلم يعني، لحد ما دخل عاصم وقف قصادي وقالي أبوك وأمك وأختك ماتوا في الحادثة، وأنتَ مبقاش ليك حد، لحد دلوقتي أنا مش ناسي شكلي وأنا بحرك راسي مش مصدق وبجري وأصرخ يمكن يكون مقلب زي ما بابا كان بيعمل ويهزر معايا، كل يوم كنت بقعد بليل مستنيهم يرجعوا، مستنيهم يحضنوني، مستني حد منهم ييجي ياخدني وأموت بعدها زيهم، وحاولت كتير أموت نفسي بس نفسي كان طويل، أنا مموتش بجسمي، بس روحي ماتت كل يوم وأنا معاهم لوحدي.
وأكتر مرة حسيت فيها بكسرة نفس لما تعبت وفضلت أرجع وسخنت منهم و حكمت ساعتها خليتهم أدوني الدوا وسابوني، أفتكرت بابا قبل ما يموت بأسبوع تقريبًا كنت تعبان برضه زي كدا بس هو فضل حاضني لحد الصبح، وبعدها قُمت جيبت الهدوم من الدولاب علشان أنام فيها كأن حد بيحضني، يمكن مش دول أصعب حاجة، بس إحساسي فيهم مش بنساه ولا هقدر أتخطاه، أنا لحد دلوقتي.
تهدج صوته وظهرت الغصة في منتصف الحلق فابتلعها وهتف مُكملًا بتعبيرٍ عن مخاوفه:
لحد دلوقتي بخاف لسه، وكنت خايف أجيلك هنا تقولي إني مريض بالوهم وإن مفيش غَالية ولا قمر ولا حتى عهد وإن دول مش موجودين أصلًا غير في خيالي أنا، ولحد دلوقتي لسه بشكك في وجودهم علشان كدا مش بقبل فكرة إني مريض، لأن لو وجودهم دا مرض مش حابب أخف منه.
فهم جواد سببًا من أسباب هروبه مؤخرًا وحجم التشتت الذي أصابه وقد ترك له مساحة كافية ووافية للتعبير وحينها تنهد يوسف وحرك رأسه نحو جواد يسأله بإضطرابٍ جلي:
هما موجودين صح؟
أبتسم له جواد وراوغه بقولهِ:
فلنفترض إنهم وهم، هتعمل إيه؟
تبدلت تعابير يوسف ورفع حاجبه يهتف بوقاحةٍ:
هكسر عضمك علشان أنتَ السبب.
كتم جواد ضحكته ثم أعتدل في جلسته ونقل حديثه لخط الجدية حيث هتف بنبرةٍ عملية ثابتة يزيح بها مخاوفه:.
أولًا هما مش وهم، سواء والدتك أو أختك أو حبيبتك فهما مستحيل يكونوا وهم، هما ناس طبيعية عايشين معاك بيشاركوك يومك وحياتك عادي، دي فكرة مزروعة في عقلك الباطن اللي بقى ليه سُلطة في حياتك تخليه يحركك، فدي فكرة محتاجين نلغيها تمامًا، بإيه بقى؟ إنك تزود مساحة دورهم في حياتك، بحيث يكونوا رادع لمخاوفك ويكونوا وسيلة تمحي تتحكم بيها في إنفعالاتك.
استحوذ بكلماته على انتباه يوسف الذي أنصت له بأذنيه وأمعن له التركيز بعينيه وكانت ملامحه تسأل بكلمةٍ واحدة فقط وهي بمعنى وكان الآخر فصيحًا بما يكفي لكي يلتقطها فجاوب مُفسرًا لسابق حديثه:.
يعني مثلًا لو قولنا من بين كل الأسباب اللي بتعاني منها في إضطرابك السبب دا ياخد نسبة 35 في سبب إنفعالاتك وهي إن الفكرة دي عمالة تدور في راسك وتشغلك، فالحل إنك تستخدم الواقي منها وتهاجمها بدليل قاطع، يعني لو مثلًا في القانون قاعدة بتقول إن البينة على من أدعي يعني اللي بيتهم حد بحاجة هو اللي عليه يجيب الدليل، يبقى أنتَ تخلي عقلك يجيب دليل قاطع وينفي بيه الوهم دا، زي إنك تزود وقتك معاهم، تشحن ذكرياتك وسطهم، تديهم وقت كافي تقعد وسطهم وتسمع مشاكلهم وتحلها معاهم، أو حتى مجرد مشاركات عادية عائلية حتى لو مشاكل بينك وبينهم زي أي أسرة طبيعية، دا هيدي للعقل الواعي فرصة إنه يرد على عقلك الباطن، وبكدا نكون قضينا على أهم حاجة بتشتتك، النصيحة التانية بقى، إنك الفترة دي والجاية تحديدًا تفضل وسطهم أكتر، ومتسيبش المكان وتبعد، وهتفهم ليه بعدين.
لم يرد المُزايدة فوق كاهله بل أراد أن يُعالجه بطريقةٍ نسبية وقد سحب دفترًا من جواره وهتف بثباتٍ يتنافى مع مطلبه:
ممكن تشتمني حاليًا أو تنتقدني؟
عقد يوسف حاجبيه ثم رفعهما ما إن أدرك المطلب وسأله باستنكارٍ رافقته لمحة سُخرية أقرب للتهكم:
أنتَ مجنون يا جواد عاوز تتهزأ ليه؟
سحب الآخر نفسًا عميقًا ثم دون الشتمة وطالبه بالمزيد قائلًا:
معلش تاني، ولو عاوز تقول أي حاجة تعيب فيا قولها.
أعتدل يوسف فوق المقعد المفرود ليصبح في وضع الجلوس ثم هتف بسخريةٍ يُقلل من الآخر:
فيه إنك دكتور فاشل، أرتاحت كدا؟
ضحك الآخر وأومأ له موافقًا ثم دون الكلمة ووضع الدفتر نُصب عيني الآخر الذي رفع كفه يمسح فوق وجهه ثم سأله بنفاذ صبرٍ من تلك الألاعيب السخيفة التي تحتاج عقلًا ساذجًا:
دا إيه بقى؟ في تالتة تالت إحنا؟ أشتمك تردلي الشتيمة في ورقة؟ ودي أروح بيها فين؟ عند الأخصائية الإجتماعية؟
ضحك جواد على رد فعله الحانق ثم أضاف مُفسرًا كطبيبٍ ماهرٍ فيما يفعل:.
أنا بستخدم غضبي منك بطريقة تانية، يعني دلوقتي أنتَ غلطت فيا وقللت مني وأتهمتني بالفشل رغم إنك عارف إني عكس الصفة دي تمامًا، وعلشان كدا قولتها تخرج بيها جزء من غضبك، أنا كان ممكن أنفعل وأرد عليك بغضب برضه، بس أنا خرجت الكلمة بأقرب وسيلة دفاعية، أنتَ بقى بتحب الكتابة فممكن تكتب مخاوفك كلها في ورق يعني أبدأ مثلًا بورقة أكتب فيها إنك خايف أختك تطلع مش موجودة وأكتب مشاعرك ناحيتها، بعدها أيد دا كله بوجودك معاها، تتكلموا وتضحكوا وتهزروا، ولو لاقيت نتيجة كررها مع والدتك ومع كل حد فيه خوف بيواجهك ناحيته.
رمش يوسف مستنكرًا وباغته بسؤالٍ غير متوقعٍ:
وهو دا ليه علاقة بحالتي أصلًا ولا مجرد طريقة لتحدي الخوف وخلاص، مش قصدي تقليل منك، بس دا ليه علاقة بالإضطرابات اللي عندي أصلًا؟
كان السؤال شبه مهتزًا وكأن صاحبه يخشى كثرة المحاولات وقد أبتسم له الآخر ما إن استشف قلقه وحرصه على حالته وعلى علاجه الذي كان يهرب منه:
دا أول نوع علاج هبدأ بيه معاك، اسمه.
علاج مستند إلى تعقل أو بلغة علم النفس اسمه (MBT) دا علاج مهم جدًا بيساعدك تلاحظ الأمور وتفهمها كويس بمنظور تاني بدل اللي متخزن في عقلك، بيخليك تشوف الأمور والأوضاع من صورة تانية تخالف الصورة الموجودة وبتظهر لعقلك وتهاجم أفكارك، ودا هدفه يولد عندك التعقل قبل التصرف، يعني بدل التصرفات الهوجائية اللي بتكون عنيفة منك، تكون فيه تصرفات تانية أهدا شوية مُرتبة عن اللي قبل كدا، ودا لأن السبب اللي مخليك تتصرف بعنف اساسه صورة غلط واخدها للأمور، تمام؟
أومأ يوسف بتفهمٍ له وقد ألتفت جواد يسحب من خلفه ورقة يدون بها العلاج وتفاصيله ونفس المطالب الذي أرادها منه ثم أخبره بما يتوجب عليه فعله وحينها تحرك يوسف من موضعه وأنتصب في وقفته يسحب نفسًا عميقًا فأوقفه الطبيب مستفسرًا:
قولي أحسن دلوقتي؟ لما أتكلمت أرتاحت شوية؟
كان يعلم الجواب مُسبقًا حيث لاحظ هدوء كفه من الإرتجافة وصفاء عينيه الغائمتين قبل مجيئه، كما لاحظ الاستقرار الذي أضحى واضحًا أكثر مما سبق على نفسهِ، وكل شيءٍ تبدل عن سابقه لكن يوسف أبتسم له بصفاءٍ ونطق يؤنب رأسه حينما أشار عليها قائلًا:
منها لله دي هي اللي كانت معطلاني.
أنهى حديثه ثم رحل بعد الإتفاق على الموعد الثاني وخرج يتوجه نحو عمله بعدما شعر بشعاع الأمل يُضاء في داخله شيئًا فشيءٍ وخاصةً حينما أختص الأمر بهاجس الخوف الأكبر الخاص بعائلته التي فكرة تواجدهم أضحت وحدها تؤلم روحه ونفسه.
بعض الأشخاص يتولد لهم الشر بداخل أنفسهم كارهين غيرهم وما يأتيهم من خيرٍ، ليس لشيءٍ واحدٍ فحسب، وإنما كارهين فكرة التفوق عليهم في نفس الوقت الذي يفتقر هو فيه للجُهد، هؤلاء هم اللذين يفرضون الحروب على غيرهم ومتمسكين بالحروب لأجل نفسهم، ولك أنتَ التخيل من الرابح في حربٍ طرفيها مُقاتلٍ مُجتهدٍ ومرتزقة مُتسكعٍ.
في مقر الجمعية التعاونية الخاضعة لاسم المسجد الموجود بحارة العطار كان عبادة هُناك يقف وسط حقائب بلاستيكية ومنتجات غذائية خاصة بالتبرع للمُحتاجين وقد ولج له رجلٌ كبير السن لحيته طويلة بيضاء وقد هتف يؤنبه بقوله:
يا عبادة يابني أنتَ أمين على الحاجات دي، دي رزق عباد ومسئول عنه عباد الحاجة دي متسلمتش والوقت اتأخر، شوف العناوين وحد يروح يوصلهم يابني، إنما كدا حرام والناس مستنية.
طالعه الرجل بفظاظةٍ ونطق بتواقحٍ في الكلمات:
وأنا هلف عليهم ولا إيه، إيه الدلع دا؟ المفروض ييجوا هنا ياخدوا الحاجة بتاعتهم، بعدين أنا مش ذنبي إنهم مش عارفين المواعيد بتاعتهم إيه، المفروض كل واحد يدور على مصلحته يا شيخ صَالح أديك شايف كام حاجة فوق كتافي.
تعجب الرجل من هجومه وشعر بالضيق يستولى على رحابة صدره كأنها مساحة خضراء واسعة يزحف فوقها خراب الإعصار، وقد نطق بغلبٍ على أمره:.
يابني الله يهديك، أيوب الباشمهندس اللي وراه مشاغل بالكوم كان بيروح لحد الناس بنفسه ويديهم الحاجة وعمره ما سمح ليهم يتهانوا ولا يحسوا بإهانة وقلة قيمة، حرام عليك دا رزق ناس بتعيش عليه من الشهر للشهر ولُقمة حلال بياكلوها، أنا عارف موظفين إيه دول؟
الحال برمتهِ لم يُعجب، تلك المساجد التي تُحرم على أهلها وتصبح مجالًا لغيرها، الأمر مؤخرًا أضحى ملحوظًا في المُتاجرة بالخير وباسم الخير لسبيل المصالح الشخصية وقد أغتاظ عبادة ما إن ذُكر اسم أيوب أمامه ونطق بفظاظةٍ تزايدت عن سالفها:.
وأنا ماليش دعوة بحد يا شيخ صالح اللي عاوز حاجة ييجي ياخدها نفسه أنا ورايا مصالح وأكل عيش وقاعد مستني، وبعدين لما هو أيوب خَير أوي كدا، شالوه ليه وجابوا حد مكانه؟ إلا إذا كان غلطان في حاجة؟ بعدين هو هيعمل كدا لله في لله؟ أكيد مستفيد كتير طبعًا.
في تلك اللحظة أتاه صوتٌ من حيث لا يَحتسب وخاطبه بقسوةٍ وإندفاعٍ قائلًا:.
مستفيد دعوات الناس اللي أمثالك مش بيطولوها ولا بيشوفوها، بعدين سيادتك مستغرب ليه إن أخويا راجل محترم وشالوه من هنا؟ ماهو علشان أمثالك يفضى ليهم الأماكن دي ويسوقوا فيها، بس ملحوقة الناس قدموا فيك شكاوي وبما إني هنا مسئول زيي زيك فحضرتك كتر خيرك مالكش مكان هنا تاني، وحاجة الناس أنا هوصلها بمعرفتي، بس حضرتك متحول للتحقيق علشان تعرف كويس بعد كدا تقل أدبك وتغلط، وبالمناسبة، الحاجات اللي خدتها والفلوس اللي استلفتها بتاعة الغلابة برضه أتعمل تحقيق بيها، خلي عندك دم بقى وأمشي بدل ما ورب الكعبة أفضحك.
هذا هو صاحب الحق وهذه هي قوته، وهذا هو الابن الكبير في العائلة الذي سعى لأجل حق شقيقه وقد سقط قلب الآخر من محله ووقف تائهًا فيما هتف الشيخ صالح بحزنٍ:.
شوف يابني، ربنا سبحانه وتعالى عالم ومُطلع، أنتَ مديت إيدك على فلوس الغلابة ومديت إيدك في أكلهم ورزقهم واستحليت الحرام، وروحت بلغت عن غيرك علشان يمشوه من هنا، بس صدقني ربك عادل، وأنتَ استهونت بنظرته ليك وأنا هقولك حاجة واحدة بس، العباد مش شايفين وفي غفلة، بس ربك لا بيغفل ولا بينام، روح الله يسامحك ويهديك، وأنا هستر عليك.
قبل أن يتحدث أوقفه أيهم الذي أشار له بعلامة الصمت ثم فتح الباب الخشبي الصغير وأخرجه منه وقد تنهد بثقلٍ وألتفت للرجل يهتف بنبرةٍ أكثر ثباتًا:.
تسلم يا حج صالح وكويس إنك عرفتني، أنا هوصل الحاجة للناس وبالنسبة ل أيوب هيرجع بعد يومين بالكتير، كلمتله حد تبعنا وهو قالي يومين الدنيا تهدا ويرجع تاني، ويارب ييجي موظف محترم وكتر خيرك إنك عرفتني إنه بيمد أيده على حاجة الغلابة، أظن دي مش هقبلها طول عمري ولو مشي بضهره يتمنى نسامحه، إلا الحرامي.
ربت الرَجل فوق كتفه مستحسنًا شهامته ثم هتف بنبرةٍ هادئة:.
والله يابني ما كنت رايد أفضحه، بس شكله ناسي إن دي فلوس يتامى وستات غلابة ورجالة عاجزة علشان كدا ساق فيها، إنما الحج عبدالقادر طول عمره هو بيته أهل أصول وكرم اللي يديه باليمين، ايديه الشمال متعرفهوش، وخليك أنتَ ماسك التوزيع والفلوس، و أيوب يرجع مكانه تاني يأم بالناس، أنا عن نفسي بحب أصلي وراه وأحب الحارة وصوته بيرفع الآذان فيها، ربنا يبعد عنه المؤذيين وينصره على كل حاقد وظالم.
تنهد أيهم ثم آمن خلف دعاء الرجل وأنتظر حتى وصله الكشف باسماء الناس الذي يتلقون المُساعدة من أهل الحارة ثم فهم ما يتوجب عليه فعله، وقد طلب رقم ابنه وأمره أن يحضر له لمكان المسجد وبعد دقائق وصله إياد فأبتسم له والده وأشار على الحقائب وهو يقول بنبرةٍ ضاحكة:
هستغلك وهتيجي معايا نوزع الحاجة دي لأهلها وأفرجك الموقع الاستراتيجي للحارة، إيه رأيك في الفكرة دي؟
ضحك له إياد وحمل الحقيبة فوق كتفه وهتف بشقاوةٍ مرحة يمازح والده بها:
عادي، كنت بروح مع أيوب كتير وكل مرة كان بيعلمني حاجة جديدة، وقالي كل ما أحس نفسي هستكبر وأبقى جاحد على النعم، آجي أعمل خير وأوصله للناس، يلا أنتَ بس معايا علشان أنا عارفهم كلهم بيت بيت.
ضحك هو لابنه رغم دهشته من حديثه لكنه يعلم جيدًا السبب في ذلك فلولا وجود شقيقه معه وإسهامه في تربيته لابنه لما كان أصبح على ماهو عليه، لكنه أحسن صُنعًا حينما ترك له حُرية التصرف كما يُريد في ابنه لينشأ بتلك الطريقة الصالحة، ليصبح نسختين من والده وأيضًا يحمل صفات عمه.
لا تشغل عقلك بما لا يستحق أن تشغله ودع لنفسك منفسًا للحُرية فالنار تأكل في نفسها إن لم تجد ما تأكله، لا تَحكم على غيركَ بما لا تعلمه، وأترك يدك من ذنبٍ تقترفه وأبتعد عن طريقٍ إن كنت لا تعلم كيف تسير فيه تأثمه.
في بيتٍ كبيرٍ وسط غيره من المباني التي يتباهى بها ساكنيها في منطقةٍ راقية يظن من ولجها أنه خير من يقطن فيها يجلس نزيه برفقة شقيقه الكبير صاحب المنصب الرفيع حكوميًا ويحتل مكانةً كُبرى وسط غيره من رجال الأعمال والسطوة والنفوذ وقد نطق بصلدةٍ يوبخ شقيقه قائلًا:.
مينفعش يا نزيه! بنتك غلطت وتصرفاتكم كانت غلط كلها، هو لو راح وقال موضوع إنها أجهضت نفسها دا هتبقى كارثة لأن دي جريمة بيتعاقب عليها، ولو أتكلم عن موضوع يوسف وقال إن كان فيه حاجة بينهم هتبقى فضيحة لأن فيه كتير عارفين إن شهد كانت مرتبطة ب يوسف أظن أنتوا تهدوا خالص الفترة دي، وبنتك ملهاش دعوة بحاجة خالص، وخليها تسافر يومين ولا حاجة، أقولك؟ هاتها مع نورهان بنتي الفترة دي وأهي الدنيا تهدا شوية، بس أي تصرف من غير ما ترجعولي أنا هقطع نفسكم، مش عاوز فضايح كل شوية.
وبخ شقيقه وأهانه ثم نفث هواء سيجاره وهتف بلباقةٍ عملية:
وبالمناسبة صح، بالنسبة لشغلك أنا لسه معرفش هو مبلغ فين ولا مين بس لو قدرت أتصرف هعمل كدا، مقدرتش يبقى أنتَ برضه متتصرفش ولو كدا أنا جاهز أشتري اللي عندك قبل ما تخسر كل حاجة، وآخر حاجة تاني بنتك هتفضل تحت عينيا وفي بيتي أحسن، يا كدا يا مش عاوز منك تدخلني في شيء يخصك نهائيًا.
تنهد الآخر وأومأ له موافقًا وقد نزلت شهد من فوق الدرج وخلفها الخدم يحملون أمتعتها وبجوارها كانت تنزل أمها وقد هتفت هي بثباتٍ:
أنا جاهزة يا أنكل وكل حاجتي حضرتها.
أنتبه لها عمها وأشار لها أن تتبعه وقد ودعت هي والديها وخاصةً أمها ثم تحركت من البيت برفقة عمها الكبير حتى تهدأ الأوضاع عن تفاقمها الأخير بعدما قامت بنشر إعتذارٍ لطليقها وتحدثت أن السبب في ذلك سوء تفاهم نشب بينهما بفعل بعض الحاقدين، والآن هي تُساق نحو طريقٍ لا تعلم هي نهايته، فربما تكون بنفسها ذاهبة لأبواب النار.
في بعض الأحيان يؤلمنا الجزء أكثر من الكُل، وتُتعبنا الروح أكثر من الجسد، لكن إذا كان المُتألم هو قطعة أخرى من الروح فحينها تموت الروح لأجل أعزائها ويفقد القلب ثباته، ليتحول وجيفه الفرح إلى رجيف الهلع والحزن.
لاحظ نَعيم مجيء ابنه صباحًا وجلوسه معهما في البيت وقد تعجب كثيرًا مما حدث ونظرًا لحكمته استنبط أن هناك مجهولٌ يسير في قلبه ويُثير فيه القلق لذا أنتظر قدوم الشباب من العمل ثم جلس في غرفة مكتبه ومعه تَيام الذي كان يشعر بالقلق من نظرات والده وقد هتف الآخر بثباتٍ:.
بص يا تَيام أنا أبوك وأنتَ حتة مني، قدامك أهم كلهم مفيش واحد قدر يخبي عني حاجة حتى إيهاب نفسه رغم كل الهيبة دي وخوف الناس منه بسبب قوته ودفاعه عن الحق بس عمره ما حط عينه في عيني وكدب عليا، يوسف نفسه اللي عامل زي البحر الغويط بييجي عندي ويعري نفسه خالص، كلهم حتى أخوك مُحي بس أنا عاوزك تقولي مين مزعلك ومخليك متضايق كدا، أخوك قالي إنك راجع تعبان ومعاك بيشوي وكلمته قالي إنك مخنوق والأفضل تقولي حصل إيه بدل ما أعرف أنا، هتكدب عليا؟ ولا لسه مش عاوز تأمنلي؟
حديثه أحزن ابنه الذي شعر أن والده هو آخر الأماكن لديه مؤخرًا وقد هتف بلهفةٍ يستجديه حينما قبض على كف والده:
متقولش كدا والله أنا ماليش غيرك وعمري ما هعتبرك غريب عني، بالعكس أنا لو فيه حاجة مزعلاني هقولك أنتَ علشان واثق إنك عمرك ما هترضالي الزعل، بس أنا مش عاوز أزعلك ومش عاوز الدنيا تكبر عن حجمها، صدقني أنا بخير.
لم يقتنع والده بحديثه وقد هتف بقوةٍ أكبر وهو يمسح فوق خصلاته العالية مُمررًا كفه فيها لتُضفي حنانًا فوق مشاعره:
وأنا علشان كدا بقولك عرفني في إيه، والله لو مش عاوزني أعمل أي حاجة بس أسمعك أنا عيوني ليك بس قولي مالك يا حبيب بابا.
أمام تلك الجُرعة الهائلة من الإطمئنان والحنان تنهد بثقلٍ ثم هتف بصوتٍ مُضطربٍ ضائعٍ:.
أنا هقولك علشان أنا بحبك وكل يوم بحس إني حتة تانية منك، أنا والله مش أناني ومش وحش بس تعبت، هما مش قابلني وسطهم ومحسسني إني مليقش بيهم، يا شايفني عيل لقيط أختهم بتعطف عليه، يا شايفني حرامي عاوز أنصب عليها، وأنا والله بحبها هي وعاوزها هي، محدش فيهم مستوعب إنها أمي، حتى لما قررت في لحظة شيطان أسيبها قلبي مطاوعنيش، وهي، روحها فيهم هما، بتختارهم وبتحبهم وعمرها ما بعدت عنهم، بس أنا مش هقبل يتقل مني كدا كتير، أنا عندي عزة نفس ومقبلش حد يهيني.
توقف الحديث على طرف لسانه وقبل أن يقوم بفك العُقدة ويستأنف حديثه فُتِح الباب وظهر من خلفه مُحي الذي هتف بنبرةٍ عالية منفعلة كأنه يهدر بغضبٍ أعمى:.
أنتَ ليه مقولتش إن أختها مدت إيدها عليك وضربتك؟ مقولتش ليه من إمبارح إنها طردتك من بيتها؟ سِكت ليه عن اللي حصل منهم؟ لو هما فاكرين إنهم أدوك حاجة يبقوا غلطانين ولو هي شايفة إنها أتكرمت عليك بحاجة تبقى غلطانة، علشان أنتَ بعد كل دا لسه بتختارها وقاعد معاها وسايبنا، بس لا عاش ولا كان اللي أيده تتمد عليك.
توسعت عينا نعيم ومرر نظراته بين الاثنين فوجد تَيام يُطالعه بخوفٍ وقد هتف هو يستفسر من صغيره بقوله غاضبًا:
مين اللي قالك الكلام دا؟ وعرفته منين؟
أنتبه له مُحي وثبت عينيه على والده يهتف بنبرةٍ جامدة:
بيشوي لما لقاني بلح عليه وبسأله هو حصله إيه وليه معرفش ينام قالي إن دا حصل منهم وبسببهم تعب إمبارح، وهو مقالش بس بعد كدا هو هيفضل معانا هنا، هي خسرته ودي مش أول مرة حد منهم يهينه، إنما توصل للضرب لأ.
أدرك نَعيم أن هذا ما حدث وأيقن ان ابنه كان سيخفي عنه ما حدث لذا ضرب الأرض بعصاه غضبًا ثم وقف خرج من مكتبه ووقف في بهو البيت ونادى على الشباب الذين حضروا عدا إسماعيل الذي كان في عمله وقد رفع صوته يهدر بإنفعالٍ:.
فرحك يا سراج هيكون يوم الجمعة ومعاك فرح تَيام كمان، أنتوا الاتنين أخر معاكم أسبوع من الليلة دي، ودا كلام مش هرجع فيه، وأنتَ يا إيهاب بكرة تحضر نفسك علشان هنروح للحج عبدالقادر نبلغه بتقديم الفرح، أما مُحي و مُنذر فمهمتكم تجهزوا للحنة ليلة الخميس، عاوزها ليلة السمان كلها تتكلم عنها، ودا آخر كلامي، مفهوم؟
وجه أوامره للجميع حتى حركوا رأسهم بموافقةٍ فيما ألتفت هو لابنه وما إن تواصلت المُقل ودار بينها الحديث المُعاتب من كليهما للآخر هتف نَعيم بصوتٍ خفيضٍ عن سابقه:.
أنا بعمل اللي يريحك أنتَ حتى لو مش فاهمه، ولو هما مش عارفين أنتَ مين أنا هعرفهم، وكتر خيري أوي كدا إني سايبك ليها بعد كل العمر دا، إنما توصل للإهانة بالشكل دا، مش هقبلها، ولولا إنها ست أنا كنت قطعت إيدها الاتين، بس ملحوقة، بكرة يعرفوا مين أنتَ وابن مين.
وقفت سمارة بجوار زوجها تُطالع نَعيم بشفقةٍ وكأنها هي وحدها من تعلم بألمه ومرضه وقد أتضح ذلك من رجفة كفه فوق العصا فمالت على أذن زوجها وهتفت بنبرةٍ خافتة:
بقولك إيه يا أخويا، ما تروح كدا تهديه ودخلوا يرتاح شوية ويهدا علشان هو تعبان ومتعصب وأيده بتترعش، وخلي تَيام معاه برضه وأنا هعمله كوباية عصير، يلا بسرعة أحسن يقع من طوله، ويتعب أكتر.
أنصت لها زوجها وراقبه بعينيهِ ليجد حديثها مُحقًا فأومأ موافقًا ثم تحرك له ووقف بجواره يُهديء من غضبه بقوله:
طب وحد الله وهدي نفسك وتعالى معايا واللي عاوزه كله هعمله، تعالى بس يلا عاوزك في كلمتين ضروري وفهمني عاوز إيه أعمله كله من دلوقتي لو تحب.
أجاد الدور في إمتصاص غضبه كما يفعل دومًا ثُم تحرك خلفه حينما أولاه نَعيم ظهره وتوجه نحو مكتبه بهيبةٍ ورأسٍ مرفوعٍ فيما وقفوا الشباب ينظرون لبعضهم بحيرةٍ تائهين عدا تَيام الذي جلس فوق المقعد وهو يمسك رأسه بكلا كفيه حائرًا في أمرهِ وفيما أصابه مؤخرًا وأصاب حياته قلبها رأسًا على عقبٍ.
كالنجوم في السماء تلمع الأعين بلقاء من تُحب، وكالأطفال نحن نسعد ونفرح برؤية من نُحب، خاصةً إن كانت الرؤية غير متوقعةٍ وكان اللقاء للروح من بعد شوقٍ هو الأحب.
وقف يستند على سيارةٍ ما وهو يدخن سيجاره في إنتظار ظهورها من خلف البوابة الحديدية لكي تُعلن عن إنتهاء عملها وقد شعر بالملل في إنتظارها لكنه أطمئن ما إن وجد الأضواء أغلقت في العيادة ثم بعدها ظهرت هي فأبتسم بخفةٍ حتى وقفت عهد أمامه تسأله بتعجبٍ:
مقولتليش إنك جاي يعني النهاردة.
حرك كتفيه لها ثم هتف بصوتٍ هاديءٍ بعض الشيء لكي يُنافي الحماس فيه:.
أنا لسه مخلص شغلي وقولت آجي أخدك بدل ما تروحي لوحدك بليل، بعدين فرصة نتمشى مع بعض شوية، بعدين وحشتيني يا ستي، إيه موحشتكيش خالص؟
أبتسمت له ثم جاورته وهي تقول بصدقٍ:
لأ وحشتني طبعًا، حتى وأنتَ معايا بتوحشني.
رفع حاجبيه بغير تصديق فيما سارت هي تتقدمه هربًا من إحراجها بسبب حديثه فيما جاورها هو وسارا جنبًا إلى جنبٍ بجوارها يتذكر بداية علاقتهما سويًا ثم توسعت بسمته شيئًا فشيءٍ وهتف بصوتٍ رخيمٍ دافيء:.
أفتكرت أول أيام أتعرفنا فيها على بعض كنت كل مرة بستغرب أنتِ إزاي كدا، مُذهلة وقوية وقادرة تكملي تاني عادي، لما كنت معاكِ في الأول وشوفت عمايل عيلتك كنت بستغرب إزاي بتكملي لوحدك وتصرفي على البيت ورغم كدا برضه مش عاوزة توقفي طريقك، ولحد دلوقتي برضه مكملة رغم إن واحدة مكانك معاها فلوس فأقرب حاجة تعملها إنها توقف شغل خالص، بس أنتِ شيلتي الفلوس لأختك علشان تأمني مستقبلها وقابلة تكملي شغل، يعني أنتِ تركيبة حلوة من وفاء الخيول وبراءة الطيور.
ضحكت له وحركت رأسها للأمام تسأله بحماسٍ:
علشان كدا قولت إني شبه شيريهان؟
توقف عن السير ووقف يُطالعها وهو يقول بصدقٍ:.
هتصدقيني لو قولتلك إنك متتقارنيش بغيرك في أي حاجة؟ حتى أنا مش شبهك ومش زيك، أنا أضعف منك مليون مرة ومش سريع في التخطي زيك، يمكن أنتِ و شيريهان كان عندكم أسباب كافية تخليكم تقوموا بس قومتوا، إنما أنا قومتي كانت بتاخد وقت أوي ولسه بتاخد وقت لحد دلوقتي ومش عارف بعمل الصح ولا الغلط يا عهد ومش عارف أنا بعمل إيه.
أخبرها عن ضياعه فيما رفعت هي كفها تقبض على كفه بأصابعها ثم نطقت بلهفةٍ تُطمئنه بما يزيح عن كاهله العبء:
بس قُمت، قُمت تاني ووقفت على رجلك وكل مرة أنتهت فيها حكايتك كنت بتبدأ حكاية جديدة، لو محتار أوي أنتَ وقفت على رجلك ولا لأ، أفتكر إن أنا من بين كل الناس أخترتك أنتَ وبس، دا سبب كفاية يعني يخليك تكون فخور بنفسك أني أخيرًا تنازلت ووفقت عليك يعني.
ضحك بوجهٍ مُشرقٍ حتى جلجلت ضحكته عاليًا ثم نظر لها من جديد يشملها بعينيهِ ثم باغتها بقوله الذي شعرت أنه ينطقه لمرته الأولى:
عهد أنا بحبك بجد، يمكن مش بقولها كتير ولا بعبر بس أنا مش بعرف أقولها، بحب اللي قدامي يحسها، وعلشان كدا أنا مش بكررها كتير، بس أتمنى تكوني مصدقاها وحاسة بيها وإني مش بقولها تقضية واجب، أنا بقولها علشان أنا مبرتاحش غير لما نهاية يومي وطريقي توصلني ليكِ أنتِ.
تلك المرة ينطق بمشاعر جديدة وكأنه شخصٌ جديد ولد بتلك المشاعر في داخله لتصبح نبرته مميزة لذلك الحد بينما هو فأقترب منها يُلثم جبينها ثم أشار لها أن يرحلا سويًا وقد حركت رأسها موافقةً بخجلٍ ثم سارت معه جنبًا إلى جنبٍ نحو البيت بينما هو فكان غارقًا في تفكيره بشأن المفاجأة الجديدة التي قام بتحضيرها لأجل زواجهما لكنه تريث ريثما ينتهي كل شيءٍ كما دبر وخطط له.
في مكانٍ ما بوسط حارة العطار.
كانت قمر برفقة أيوب يتجولان سويًا ويقوما بشراء العديد من الأشياء وهو يُشاركها كل شيءٍ في الإختيار وفيما تُريد وقد كان هو من يختار وينتقي حتى خرج من قوقعة حزنه رويدًا رويدًا وبدأ ينسْ ما كان يشغل عقله والفضل في ذلك بعد إرادة الخالق رجع لها هي، وقد أنتهيا من شراء الأشياء وأعادا التجول من جديد فلمح بعينيهِ عربة تختص بنبات الذُرة المشوي فأشار لها برأسهِ وسألها بشغفٍ جم:
تاكلي دُرة مشوي؟
أومأت له موافقةً بحماسٍ ثم توجهت معه نحو العربة ووقفت بجوراه وهو يختار لها واحدٌ ثم أختار لنفسه وهو يبتسم فوجدها تسأله بإهتمامٍ:
خلاص أعتبرك مش زعلان؟
توسعت بسمته وهو ينظر لها ثم حرك رأسه نفيًا وهتف بصوتٍ دافيء:.
بالعكس، أنا من أول ما كلمتيني علشان ننزل وفضلتي تشاركيني كل حاجة معاكِ وأنا مش زعلان، يمكن مستغرب ويمكن محتار بس مش زعلان والله، أقولك طيب سر محدش يعرفه خالص؟ علشان تعرفي إني بقدر أشاركك أنتِ وبس.
حركت رأسها بحماسٍ وتأهبٍ في إنتظار المزيد منه لتجده سحب نفسًا عميقًا وهتف بوجعٍ ما إن تذكر حياته السابقة:.
ساعة لما كنت في المُعتقل وخرجت بعد كتب كتابنا أنا جوة كنت بردد اسمك وأفتكر إنك بقيتي مراتي وأكيد هخرج وأكون معاكِ هنا، هما جوة قالولي إن فيها سنين مش شهور حتى زي أول مرة، بس جوايا حاجة قالتلي إني هخرج وأشوفك وعيني تقابل عيونك، كنت حاسس إنهم دافيين أوي وحنينين زي صاحبتهم، بس كلمة حق والشهادة لله أنتِ وعيونك حلوين وتتحبوا.
ضحكت له بخجلٍ ثم رفعت كفها تُرفرف به أمام وجهها بسبب السخونة المُتدفقة إلى رأسها من فرط الخجل بينما هو سألها بنبرةٍ ضاحكة:
أنتِ أتكسفتي ولا إيه؟
أومأت له موافقةً بعُجالةٍ مما جعله يضحك عليها ثم تحرك معها من المكان وهو يمسك في يده الحقائب بينما هي فكانت تشعر بالسعادة وهي تجاوره والمارين يلقون عليه التحية ويرحبون به ويدعون الخالق لكي يبارك لهما، وما إن أوقفها أمام البناية تنهد بعمقٍ ثم قال بصدقٍ:.
مش عارف من غيرك كان ممكن أعمل إيه بس أنا أكيد كنت هقفل على نفسي زي كل مرة، المرة دي بقى أنتِ واقفة قدام زعلي وش لوش وكسبتي كمان، الحمدلله على نعمة وجودك ألف مرة، والحمدلله إن ربنا رزقني بيكِ أنتِ وفتح أبواب قلبي علشان تكوني أنتِ الفتنة والغواية.
من جديد تضحك بسببه وكأنها تحتاج فقط لدليل يُثبت لها أنها كافية له وتليق برجلٍ مثله وقد قرأ في عينيها تلك النظرة فأقترب يمسك كفها ثم ضغط عليه وأضاف بتأكيدٍ لما سبق وتفوه به:
مفيش ست في كل الدنيا دي ممكن تخليني أحبها زي ما حبيتك، زي ما برضه عيني مخانتنيش وعملتها وشافت حد غيرك، فأطمني يا قُطة بقى علشان أنا مواريش غيرك أنتِ.
لا يا شيخ؟ أنا مش سايبك مُكتئب يا عم أنتَ؟
كان هذا حديث يوسف الذي وصل مع زوجته ورأى شقيقته مع زوجها وقد ألتفت له الآخَر وهتف بنبرةٍ ضاحكة:
ماهو أنا بعالج الإكتئاب أهو.
كان حديثه مرحًا إلى حدٍ ما مما جعل يوسف يشير لشقيقته ومعها زوجته بالصعود ثم وقف أمام رفيقه الذي حرك رأسه مستسفسرًا فهتف الآخر بثباتٍ:
عاوزك معايا في مشوار مهم، وأعتبره مضاد إكتئاب برضه يا مطروف العين.
بدا وكأنه يسخر منه لكن الآخر لم يُمررها فجاوره وهو يهتف بسخريةٍ لكي يُمازحه هو الآخر أو رُبما يرد له طريقته:
وماله، يلا يا غَريب.
الإثنان دومًا رغم كل شيءٍ بينهما إلا أن التشابه بينهما كبيرٌ بما يكفي ليخلق الأُلفة بينهما، وكعادتهما يسيران بجانب بعضهما مُتكاتفين والأعين تطلع عليهما سويًا بجوار بعضهما وكأنهما بطلان مغواران يقاتلان لأجل حماية المدينة من كل شرٍ.
في بعض الأوقات تمتليء الحقول ببعض الأزهار المتروكة في الفراغ بغير صاحبٍ، والأمين فقط هو من يرعاها ويحافظ عليها لأجل من يستحقها، والوضيع هو من يختلس الحِراك لوسط الحقل حتى ينتزع تلك الزهور ويأخذ منها رحيقها.
الفرح والسعادة كلاهما صفات تملأ القلوب وخاصةً تلك القلوب المُتعبة التي كانت تنتظر الفرح مثل قلب إسماعيل الذي كان يقود سيارته وهو يستمع لأحاديث ضُحى الكثيرة وقد تعجب هو من عدد ساعات يومها لكي تحدث تلك المغامرات خلاله أثناء أول يومٍ بالعمل من بعد عقد قرانها، وقد وصلها صوتها وهي تُقلد الفتاة بميوعةٍ حين قالت:.
لأ وجيالي بكل برود تقولي أنا ماجيتش علشان البنات قالوا إن كتب الكتاب على الضيق خالص، بس معرفش إنك عاملة فرح كبير أوي كدا، صحيح خطيبك اللي كان متصور معاكِ عند الخيل دا شكله لذيذ؟ بس على مين مسكتش ليها.
قرر أن يُجاريها فسألها بنبرةٍ ضاحكة:
شاطرة يا روحي، قولتيلها إيه بقى؟
قولتلها لأ مش خطيبي دا جوزي وأتكيت أوي على الكلمة كدا علشان تحترم نفسها، وقولتلها هو مش لذيذ بس، هو حنين وجميل ولَطيف وبيحبني أوي، ربنا يعوضك بواحد زيه يا رب يتمنالك الرضا ترضي، هي علشان حقودة وفاكرة نفسها محور الكون وأي راجل بيدوب في جمالها أتخرست، دا علشان أنتَ زي القمر وشيك ووسيم وباين إنك فرحان أوي بيا وكلهم قالوا كدا.
هكذا جاوبته بتلقائيةٍ جعلته يضحك عليها بصوتٍ عالٍ ثم مسح وجهه وهتف يمازحها:.
أنتِ مش بس مطرقعة، أنتِ كمان واقعة؟
أثناء ما كان يتحدث معها لاحظ تجمع بعض الناس في وسط الطريق مما أوقف سيره فهتف هو بلهفةٍ:
بقولك إيه شكلها حادثة على الطريق، أقفلي هنزل أشوف في إيه كدا وهرجع أكلمك، سلام.
قبل أن يُغلق هتفت هي بعُجالةٍ تستوقفه:
استنى بس، خلي بالك من نفسك وأمشي علطول وأنا هستناك تكلمني وتطمني يلا، خلي بالك من نفسك.
أبتسم هو إثر إهتمامها البائن وخوفها عليه وقد تحرك من سيارته بهيبةٍ نحو الناس يخفي شغفه نحو معرفة المزيد وقد توسعت عيناه ما إن وقعت على فتاةٍ مُلقاة في الأرض بوجهٍ أزرق وبطنٍ فارغة بعدما سُرِقَت أعضائها!
سقط قلبه وهو يرى فتاة هزيلة صغيرة العمر والحجم مُلقاة فوق الأرض على الطريق مجهولة الهوية وقد نُزِعت عنها الحياة بأكثر الطُرقات وحشية، وقد ترقرق الدمع في عينيه وعجز عن التحرك، ففي العام والمتعارف عليه للموت حُرمة لا يُنكرها إلا من فجر، فماذ إذا كان الموت وحشيًا بتلك الطريقة؟ بالطبع تهرع القلوب العبرات وتنزف دمًا، وبكل آسفٍ هذه الفتاة هي نفسها صاحبة المصير البائس الذي كُتِبَ عليها منذ أن وُلِدت، فتاة تشبه الزهور لكن وبكل آسفٍ وضعت في الحقل الخاطيء.