رواية صراع الجبابرة للكاتبة روز الفياض الفصل الحادي والأربعون والأخير
لاجلك تجرعت مر الحياة وذل البشر.
لاجلك عانقت تلك النجوم البعيدة وتلك الاماني المستحيلة الشديدة.
---
ان اجد نفسي محاطةً بذراعيك في ذلك الصباح، تلك من اغلى امنياتي التي تحققت.
وجهك يضيء حياتي ويعطي لمعنى حياتي حياة.
ثاني يوم من الصبح اجه مؤيد وايهاب ذابحين ذبايح بسلامة ايوب.
اجوا خواته حتى يساعدونه لان منلحك عالخطار.
الصبح محد اجه غريب بس من العصر بدت الخطاطير تجي.
اتكسرت رجلينه من الوكفة عالسنك ومن الجاي رايحين جايين جايات.
كل التعب ينسي من اسمع صوت هلهولة محب فرحان بسلامته.
خالته وبنات خالته والجيران.
بالليل هم اجو مؤيد ونوارس ووياهم ابو مؤيد وامه.
امه مسلمت علي بس عالبنات وكعدت.
سألتهم خالتي: لعد وين اموري ليش مجبتوه وياكم؟
ابو مؤيد: شنجيبه ويانه، طفل متعلق بأمه.
سهاد جانت كاعده يمي كالت بصوت ناصي: اشتغلت الحقارة. متعلق بامه على اساس امه تدري بي. حقيرة.
ام ايوب: ميخالف هي ساعة زمان قابل راح يبات هو مشايفه صار شكد بس بالصور يشوفه يخاف عليه ميقبل نجيبه يمه.
ام مؤيد: خلي يصير زين ويروح يشوفه مابيها شي قابل اتزوج معناها ينسى ابنه.
ام ايوب: لا مينساه شلون ينساه ابنه ضناه وصله من كلبه بس غير بعد هي دكت رجلها بالكاع شيسويلها. قابل يظل يتوسل بيها.
مؤيد: مو وكته هسه هالحجي..
نريد نتعشه ههههه.
كمت اني والبنات نجهز العشا اجت ويانه نوارس احسها تباوعلي بس غلست منها.
صبينه للكل كلهم كعدوا سوا بس اني محبيت اكعد ويه ام منى ونوارس ومؤيد وحتى ابوه. كلهم جانت عيونههم وراي تتنقل.
اشرت لخالتي كتلها: خاله اني رايحة يم امي.
ام ايوب: ليش؟ متتعشين؟
شمه: لا مجوعانه انتو اتعشوا بالعافية اني عود بعدين اكل.
ام ايوب: لا شهالحجي انتي ضجتي من حجي بيت عمج مو؟
مالج علاقه بالحجي اتعشي اخذي العشا منا وروحي يم الحجيه وادم اتعشوا ومن يرحون اني اصيحلج.
رحت يم امي اتعشينه وبقينه نسولف وكمت غسلت ملابسها ونظفتلها البيت ونومت آدم ومحد صاحلي استغربت!
بقيت كاعده اباوع عالتلفزيون لحدما غفيت.
كعدت على صوت ايوب.
شمه: شكو؟
ايوب: ماكو شي جنت ادور عليج..
ماادري بيج هنا..
ليش نايمه هنا؟
شمه: نعست وغفيت.
خالتي كلتلي من يرحون اصيحلج بس مصاحتلي.
ايوب: يالله كومي، راحوا.
كمت شفت امي نايمه، طلعنه وسدينه الباب.
البيت هدوء جان محد موجود، دخلت للمطبخ اتفاجات بنوارس موجودة.
شافتني كالت: جنتي يم امج؟
شمه: اي.
نوارس: اي مو استغربت مشفتج عالسفره.
شمه: رحت شفت امي وابني.
ايوب جان واكف يم باب المطبخ بس هي متشوفه.
اخذت بطل مي من الثلاجة كالت: شلونه ايوب؟
شمه: وين اكو منه ايوب. فدوه كلبه الله يخليلياه يارب.
نوارس: هو جان متزوج حماتي.
شمه: ادري..
نوارس: اي بس انفصلوا لان مقبلت يتزوج عليها.
شمه: يعني قصدج طلكها علمودي؟
بسببي يعني؟
نوارس: لا اني مكلت هيج بس..
دخل ايوب كللها: بس هي ادبسز ولهذا السبب طلكتها.
مو ادمية.
بقت ساكته..
عفتهم وصعدت مااريد تصير مشكلة بينهم واكيد راح تندار القصة ويكولون شمه هي البدت وحجت وخلتهم يتعاركون.
وره شوية صعد هو بس محجه شي بس مبين عصبي.
محاولت احجي وياه او افتح وياه اي موضوع بي نكد لان راح نتعارك.
بقى طول الليل يتكلب ماادري شبي.
كلما اكعد الكاه كاعد.
شحجوا وهيجي ضاج؟
معقولة اتعارك هو ونوارس؟
بقى ضايج كم يوم وكلما اسأله يكولي ماكو شي.
وره اسبوع اجه ابو ايوب هو وعمه.
انصدمت من فتحت الباب وشفته بوجهي.
دخل سلم ولاعبالك مسوي شي.
دخلت ركض لخالتي مرعوبه كالت: منو؟
شمه: الحجي.
باوعتلي كالت: ياحجي؟
شمه: ابو ايوب. هو وابو مؤيد.
ام ايوب: اسم الله، خير شوراهم. هالعايلة مايجي منهم خير. المن جايبه وجاي. لتدخلين يمهم ولاتسلمين عليه هذا الشايب نكس.
راحتلهم واني رحت اسوي جاي.
ايوب جان نايم بعدها الساعة بالعشرة الصبح.
اجت خالتي كالت: سويلهم جاي.
شمه: سويت.
ام ايوب: خل نشوف شنو تاليتها، تروحين تكعدين رجلج لو اصعدله اني؟ خلينه نخلص منهم.
شمه: لا اروح.
رحت كعدته بس مكتله ابوه جوه كتله: الحجي ابو مؤيد هنا.
كعد غسل ونزل.
اسمع ابوه يحلف ويكوله ميدري بي مريض وليش محد كله وايوب ساكت.
خالتي رايحه راجعه تريد تعرف شكو.
شويه وصاحوا عليها.
راحت.
دخلوا وسدوا الباب.
صبيت الجاي واخذته الهم بس ايدي ترجف مكدرت اتحمل اشوف ابوه احس لعبانه نفسي منه وكلبي مشمئز.
فتح ايوب الباب اخذ الجاي ووجهه ميتفسر لاحاجاني ولا كلي ولاحتى باوعلي.
اخذ الجاي وسد الباب بوجهي.
رجعت للمطبخ كلت خل ابدي اسوي الغدا هاي العائلة ميتفسرون ولاينعرف وضعهم شنو.
فعلاً البيوت اسرار اليشوفهم من بره يكول عايشين بقمة السعادة لان عدهم خير بس من تعيش وياهم تنصدم.
الاب قصة بحده لاتنحجي لاتتسولف.
ايوب هو ومنى قصه اخرى.
نوارس هي وايوب قصة
وهكذا..
بقوا يمكن ساعتين مره يعلى صوتهم مره ينصه.
شويه واندك الباب الداخلي بينه وبين امي.
فتحته امي كالت: اريد اسبح خلي ادومي يمج.
اخذت ادم يمي وكعدته يمي بالمطبخ.
شوية وطلعوا باوعت شفت ابو ايوب وعمه بالحديقة يردون يرحون وايوب يمشي وراهم.
طلع ادم من شاف ايوب راحله يركض يعرفه ويحبه.
شافه عمه كله: بمكان متربي ابن الغريب ربي ابنك..
هذا مو ابنها؟
انعصر كلبي من حجايته.
ايوب: ماكو مشكلة جيبوا ابني واني اربيه..
احد كليللكم مااريد ابني؟
ابو ايوب: انت بعد وين تعترف بابنك انت مسطور، خوش سحر. مخليتك ماتندل دربك.
ايوب: اي صحيح.
عليمن اطلع بعد واعترف بابني.
ابو ايوب: شوف هذا حجيه، تربية سز. تربية نسوان.
ابو مؤيد: يالله يالله امشي خل نروح عود غير وكت نجي.
طلعوا وبقيت اني متحنطة ومغثوثه من حجيهم على آدم.
صارت دمعتي بطرف عيني.
من دخلوا ايوب وآدم رحت اخذت آدم منه ووديته لامي.
كلب الدنيا بالبجي وراي.
اخر شي اجه وراي يدك بالباب ظليت كاعده وره الباب وابجي.
سمعته خالتي كالت: شبي يبجي؟
شمه: علي.
ام ايوب: وليش تبجيه؟ فتحيله الباب طفل شلعتي كلبه. شتردين منه؟
شمه: لاخاله خليه.
بعدنه بالبداية واتعير ايوب بي..
سمعه ايوب كلي: شبي ادم؟
ام ايوب: يبجي عليها يريدها ومتقبل تفوته للبيت. والله شنو عيروا ايوب بي.
باوعلي كلي: ليش؟ شبيج وياه تره طفل.
راح فتحله الباب وشاله سكته.
رحت كعدت اخذتلي بجيه على حظي.
ايوب: شبيج؟
شمه: مابيه ايوب عوفني.
ايوب: اي غير افهم شكو؟ ليش تبجين؟ علمود الحجي الكاله ابوي؟ عود صدك؟!
شمه: عفيه ايوب مادام من البداية صار بيها معاير اني مااقبلها لابني ولااقبلها الك.
ايوب: شبيج حطيتي عقلج ويه الطفل متفهميني؟
شمه: احسن. ليش تحصل حجي من وراه ويكولون مربي ابن الغريب وعايف ابنه..
واني مااتحمل هيجي حجي لا عليك ولا على ابني.
بقى ساكت شويه كلي: هذا موابن الغريب هذا ابنج وحتى مكاعد ويانه يم بيبته باقي.
وانتي امه احرمه من امه يعني علمودهم؟
مو اني هم اب ومااقبل انحرم من ابني.
مو كل شي تسمعيه تتأثرين بي طنشي حتى نكدر نعيش.
صيري قوية حتى محد يكدر يأثر عليج وعلى حياتج..
بعدين اذا همه كالوا هيج هو شنو ذنبه طفل ويريد حضن امه.
هم هذا هدفهم يغثوج ويضوجوني ويحركون دمنه فالله يخليج لاتحققيلهم هدفهم ولاتخربين حياتنه بحساسيتج اني مااريدج ضعيفه وخوافه وتنغثين من اقل حجاية اريدج انت تغثيهم.
زين؟
بقيت كاعده وابجي على حظي وحظ ابني هم طفل وهم يتيم وهم مستكثرين عليه يربيه ايوب ويكسب بي اجر.
وره كم يوم هم نفس الاجتماع إلى صار بين ايوب وامه وابوه وعمه لكن هالمره بين امه وخواته ومن رجع صاحوله وياهم بالغرفة ووياهم نوارس.
مره من المرات سألته: شبيكم؟
ايوب: ماكو شي.
ديصالحونه اني نوارس..
نوارس جنت اني مااحجي وياها من يوم معرفت هي إلى راحتلج ويه منى.
حاولت تصالحني من عرفت بيه مريض بس مقبلت احجي وياها.
بس البنات حجوا وياها وامي.
من جانت تجي مااكعد يمها. لحدما ذاك اليوم اجت.
شمه: زين. يعني انتهى الموضوع؟
ايوب: انتهى.
وره اسبوع جنت اسبح بالحمام طلعت دخل ايوب للغرفة اخذ تليفونه ونزل ورجع فتح باب الغرفة كلي: لتنزلين جوه. ابقي هنا.
شمه: ليش؟
ايوب: بدون ليش لتنزلين.
رد علي بعصبيه وراح.
كلت الظاهر ابوه هنا وهم صارت مشكلة بينهم او نوارس ومؤيد.
بقيت كاعده وايدي على خدي.
وره شويه اندفع باب الغرفة باوعت شفت طفل زغير.
ازغر من آدم ابني.
اول مشفته عرفته. امير ابن ايوب.
نسخه من ايوب.
باوعلي خاف وظل يبجي يريد ينزل.
خفت خاف يوكع شلته ونزلته.
عبالي ابو مؤيد جايبه لو مؤيد.
دخلت اتفاجأت بمنى موجوده هي وامها وابوها!
ايوب جان كاعد وامه هم يمهم..
اتحنطت.
نزلت امير وطلعت حتى بدون مااسلم.
شنو الفلم؟
شتسوي جايه؟
وشيسوي هو كاعد يمها؟
بقيت كاعده بالمطبخ اريد اسمع شيحجون شيكولون.
اسمع عمه يكله: غلطت وتعرف غلطها.
وبينكم ولد احنه كنالها رجعي لابن عمج احسن متقبلين بالرجال الغريب.
عالاقل بينكم ولد ويربى بيناتكم.
حسيت نار واشتعلت بيه.
صعدت للغرفة ظليت كاعده منتظرته يجي حتى افتهم منه شكو.
تأخر.
معقولة لهسه مراحوا؟
مطلعوا؟
هذا متونس كاعد يمها..
حنلها الظاهر.
لازم انزل واكعد على كلبهم مااخليه يتهنى بالكعده وياها.
نزلت اركض عالدرج اريد اسمعه صوتي واني انزل يمكن يحس.
بآخر سلمه انضربت رجلي بالمحجر مالت الدرج حسيت شاغت روحي صحت آخخخ.
اجت خالتي تركض كالت: شبيج؟
شمه: رجلي انضربت بالمحجر..
ظليت لازمه رجلي من الوجع.
لوما الفشلة جان بجيت.
ام ايوب: بالله خل اشوفها.
روحي كعدي خل اجيبلج مي دافي خليها بي.
رحت اعرج للصاله مااكدر امشي عليها.
محد موجود.
حتى ايوب ماكو. وين راح؟
جابتلي خالتي طاسه بيها مي خليت رجلي بيها.
شوية ودخل ايوب كال: شبيج؟
شبيها رجلج؟
شمه: انت بالذات لتحجي وياي؟
ايوب: شنو انت بالذات؟
شنو هالاسلوب؟
شبيج؟
شمه: شبيه ها؟
شعندك كاعد مكابلها من العصر لهسه اشتاقيتلها مو؟ حنيت لايام الراحة؟
ايوب: منو هي؟
شبيج اتخبلتي؟
ام ايوب: صوتكم منا الجيران..
شمه: اي اتخبلت.
اتخلبت لان صدكت حجيك.
سويتها مو زينه وياك وتعبان ومشلوع كلبك وياها مو آدمية مو؟
وهسه شتغير؟
اشوفك مكابلها وكاعد تدك سوالف؟
ايوب: انتي شبيج متفهميني؟
شبيج؟
شتحجين؟
شمه: شحجي؟
احجي عن حب حياتك القديم وبت عمك وام ابنك.
بعد عن منو احجي.
جايه لهنا شكو؟
شتسوي؟
جايه تعرض عليك تتزوجها علمود امير مو؟
وانت مصدكت ركصتلها بجفيه.
احجي وابجي وهو ومتخوصر وواكف يباوعلي.
ايوب: بالله هاي شجاوبها؟
ام ايوب: صوتكم.
عيب منا الجيران.
صوتج شمه يمه امج خاف تسمع.
شمه: اني اريدها تسمع..
خل الجيران يسمعون هم جاوبني شتسوي جايه بالله؟
تقوم بالواجب؟
جايه تتحمدلك السلامة؟
اشوفكم يومية مجتمعين وسادين الباب؟
اثاريك كاعد تخطط لرجعة الحلوة تتناقش وتتباحث شلون ترجعها خو متعوفها تروح من ايدك وتتزوج واحد ثاني..
ايوب: كاااافييييي.
مااريد اسمع صوتج. افتهمتي؟
كلمة وحده بعد متحجين..
ناقص اني دوخة راس واتزوجت.
شمه: دوخة راس؟
صرت هسه دوخة راس؟
اي طبعاً شفتها اليوم جايتلك برجليها وتكولك رجعني نربي ابنه بدل متربي ابن الغريب شلون متطلع شمه دوخة بعد.
مجاوبني اخذ السويج وعافني وطلع.
بقيت ابجي وخالتي لاتحل ولاتربط نعست راحت نامت وخلتني اطحن بروحي.
بقيت كاعده ومخليه كمادات دافيه على رجلي.
ساعة ساعتين ايوب ماكو؟
صارت الساعة بهدعش اجه.
شافني كاعده ومدده رجلي عالقنفة ومخليه عليها كماده.
محاجاني اجه كعد وهو ساكت..
بقى ساكت ومدنك واني ساكته واباوعله.
بعدين كال: اكو عشا لو انام بدون عشا؟
مجاوبته..
نزلت رجلي من القنفه على كيف ومشيت واني اعرج للمطبخ اسويله عشا.
رغم جنت مقهوره وكلبي الف سالفة بي بس حسيت بتأنيب الضمير لان مسويتله عشا.
كملت عشاه وبقيت واكفة ماريد احجي وياه.
شلون اكوله تعال اتعشى؟
كلت خل اصعد اجيب تليفوني وادزله مسج اكوله تعال اتعشى.
وصلت للدرج خليت رجلي على كيف وبديت اصعد سلمه سلمه.
هو جان كاعد كبال الدرج ويباوع.
ايوب: وين رايحة؟
شمه: اجيب تليفوني؟
ايوب: ضروري هسه تجيبيه وانتي رجلج متأذيه؟
والعشا وين صار؟
درت عليه واني عصبيه كتله: اي ضروري لعد شلون اكولك تعال اتعشى؟
رفع راسه باوعي وبعدين فطس من الضحك..
صعدت وعفته يضحك.
جبت التليفون وردت انزل لاكاني عالدرج كلي: ضليتي ياصاعده يانازله لحد متوكعين يالله ترتاحين مو؟
شمه: وانت شيهمك اوكع؟
انكسر.
اموت.
خلص بعد اجتك منى خانم ارتاح كلبك وكع عليه مي بارد.
ضحك كلي: صعدي لتنزلين بعد.
شمه: ليش؟
راح تجي؟
تريد تبقى كاعد وياها ماخذ راحتك؟
لو تريد تتصل بيها؟
ايوب: اي راح تجي ههههه شبيج انتي منين تجيبين هالقصص ههههه والله بلوه.
لزمني من ايدي حتى ارجع للغرفة كلي: صعدي هسه فوتي للغرفة واني هسه اجي.
بجيت كتله: لا بعد لتجي ابقى يمها كابلها واكعد احسنلك.
لتجي بعد.
نزل وهو يضحك واني رجعت للغرفة ابجي واباوع على جف رجلي ازرك ومورم.
شويه وصعد هو جايب صينية العشا خلاها عالجرباية كلي: شنو القصة ممكن افتهم؟
شمه: اني اسأل مو انت.
مو فوك شينه گوات عينه.
ايوب: هم صح. ههههههه
شمه: لتضحك..
ايوب: ماشي بطلنه ضحك ههههه هسه غير اعرف شبيج ههههه يعني كل هذا غيره؟
شمه: لا مو غيرة ليش اغار؟
ايوب: ماادري.
سألي نفسج تبجين وكالبه الدنيا خشمج صاير احمر من البجي على شنو؟
شمه: اي على شنو سوي نفسك متدري.
بدل ملابسه وراح للحمام ورجع كعد يمي وكل شوية يضحك بعدين كلي: شنو سمعتي؟
شمه: كل شي سمعت. كل شي.
ايوب: اوك.
معناها ليش البجي اذا سامعة كل شي؟
اذا سامعة كل شي المفروض سامعتني من رزلتها ورديت عمي وعمتي باللي حجوه.
شمه: لا انت صارلك كم يوم تخطط يوميه رايحين راجعين عليك يومية مسوين اجتماع.
ايوب: ههههههههههههههههه اجتماع الامم المتحدة متدرين هههههه لج بابا يتخيلج..
لو اريد ارجعها ليش طلكتها اصلاً؟
بت عمي وام ابني على عيني وعلى راسي بس لهنا حدنه ماكو شي اكثر..
هي جاي واحد متقدملها ماادري صدك لو جذب بس عمي يكول وعلى اساس همه مقابلين وكايليلها رجعي لابن عمج احسن..
شمه: اي والمن جايه وياهم هي؟
ايوب: اي هي جايه وياهم على اساس جايبين امير اشوفه على اساس امير متعلق بيها ميقبل يجي الاوياها..
هذا عذرهم يعني بس مو صحيح همه جايين لهدف من ذاك اليوم انفتح الموضوع من اجه ابوي.
عمي اللي جايبه اصلاً وله ابوي علاقتنه بي مقطوعة صار اكثر من سنة من يوم اللي صار قبل، حتى من عرف بيه مريض مكلف نفسه يجي.
هسه اجه لان عمي وراه طمع ممكن ينطي فلوس..
سكت اتنهد شويه بعدين كلي: محد يريدها ترجع..
البنات من اجوا كلولي تره هي متندمه وتريد ترجع بس لترجعها وتخرب بيتك وتشلع كلبك وياها.
كتلهم اصلاً مااريدها..
بغض النظر عن طبيعة علاقتنه قبل بس المره إلى تتخلى عن زوجها بعز المرض ومتقبل تتنازل وتجي تشوفه وتكول ماارجع الا هو يجي ويتوسل ويعتذر هاي متفيدني.
هاي متصلح للزواج اصلاً مو ايوب ليرجع لهيج وحده.
لو يصبوها ذهب مااريدها.
امير ابني اذا تريد تتزوج خل تجيبه هنا يتربى ويه ادم وامي وامج وين يلكه هيج دلال واهتمام.
بس هي تريد تضغط علي بامير مثلما سوت قبل من جنتوا بالبصرة وجنت اجي اشوفج وهي جانت زعلانه.
رادت تاخذه بعدما عافته وراحت ومسألت عليه.
رادت تاخذه حتى بس تشلع كلبي لان تعرف امي متكدر تفارك امير.
بس بعدين انجبرت امي تنطيها امير من صار عندي المرض..
بقيت ساكته. كال: فهمتي؟
شمه: احلف متفكر ترجعها؟
ايوب: وحياة الزحلف ههههههه.
دكومي خل نتعشا جعنه.
سحب الصينية كلي: ماادري بيج هلكد تحبيني.
شمه: لا خطية متدري.
ايوب: ههههه انتي متحجين متكولين تره يابه اني احبك واغار عليك شمدريني هههههه.
وطوينه صفحة منى.
وبعدني لحد الان ماشيه على نفس النظام والدايت الغذائي ويه ايوب ومراقبته حيل ممنوع الحلويات ممنوع التدخين ممنوع السهر والقائمة تطول.
لمياء كانت ولازالت اقرب صديقة إلى ومن عرفت بالاحداث اللي صارت اصرت نصورلها فيديو حتى تتأكد احنه سوا واتزوجنه وعلى قيد الحياة ههههههه.
ابو ايوب رجع اختفى وبعد مدة ايوب كال: سمعت ابوي متزوج
شمه: ياخوفي باجر تصير مثل ابوك يومية متزوج.
ايوب: هههههههه الله يسمع منج.
شمه: معناها تريدني ادخل للسجن بتهمة القتل مع سبق الاصرار والترصد..
ايوب: هههههههههه افهم منج هذا تهديد؟
شمه: طبعاً لعد شنو.
---
نوارس بقت علاقتي بيها سطحية لفترة طويله بس بعدين صارت مشكلة جبيرة بينها وبين منى وصارت صديقتي تقريباً.
ادم صار بالمدرسة واخوي سلام بعده لهسه بره العراق.
سمعت من امي حسام متزوج زينب الطالبة إلى جان عنده علاقة بيها، ماادري شلون وافقت على واحد تعرف تاريخة مع البنات وتعرف عنده اربع اولاد!
هبة سمعت من امي ام تيسير كايلتلها متزوجة واحد مقاول.
منى انخطبت لمدة شهر وفسخت وبعدها لحد الان ممتزوجه.
امير بعده عدها يجينه كل اسبوع ومرات يجي خلال الاسبوع ويه خاله مؤيد حتى يلعب ويه آدم.
امي طلع اسمها بقرعة الحج على سنة 2020 ان شاءالله ياربي يطول بعمرها وتحج.
اني وايوب مثل السمن عالعسل.
نتعارك دائما وحياتنه مثل الكل مومثالية لكن منكدر نتحمل زعل بعض بنفس اليوم نتصالح.
اغلب مشاكلنه على الاكل لان مرات يخربط بالاكل ويخليني انقهر واصير عصبيه.
نسولف مرات ونتذكر شكد مرينه بقصص ومواقف وصدمات..
لكن صمدنه واتحملنه وقاومنه للنهاية.
ماكو شي كدر يهزم حبنه.
حتى من تركني سنة..
باول موقف رجع حبه ورجعت الغيرة.
صح من رجع ضربني بس هالكف غير كل شي بميزان حياتي وحياته.
قلب كل الامور لصالحنه..
بعد مرور سنة كاملة يالله فكرنه نسوي طفل وبدا ايوب ياخذ علاج والحمدلله رب العالمين حالياً عدنه محمد.
الحمدلله رب العالمين.
الله عوضني بسند مااكدر اتخيل حياتي بدونه.
كل التعب إلى تعبته واللي لازلت اتعبه وياه خوفاً من رجوع المرض قابله بي المهم نبقى سوا.
---
---
#في ختام قصتنا هذه المره نكتفي بتذكيركم ان بعض الصراعات نِعم.
وللنِعم يجب ان نكون شاكرين..
فهناك صراعات بين جبابرة المال وهناك صراعات بين افراد العائلة الواحدة.
وهناك صراعات بين رجال من اجل الفوز بقلب امرأة.
وهناك صراعات بين المرء ونفسه.
وبين الرجال والمرأة التي يحب. وبين النساء وبعضهن اذا استعرت نيران الغيرة.
واقوى صراع هو صراع الانسان مع المرض، فالمرض قوي حتى لو كان بسيطاً يمكن ان يهزمك.
ان تقاوم مرضاً يحصد حياة ملايين البشر هذا صراع واي شخصٍ يقوى على هزيمته؟
لايقوى على هزيمته الا شخص ٌ جبار.
وهذا الجبار تقف خلفه امراءة لاتقل جبروتاً عنه.
فالمراءة التي تصمد بوجه كل ظروف الحياة وتجابه كل انواع التجبر وتتجاهل كل محاولات استضعافها لانها دون رجل. ماهي الا امراءة حديدية.
#واجهوا دون خوف.
توكلوا دون قلق.
تجاهلوا كل الاساءات.
استمروا في المضي قدماً في الحياة.
لاتتوقفوا عند اي صراع.
فحياتنا ماهي الا زوبعة من الصراعات ولكل منا صراع يخوضه مع نفسه.
وكلنا جبابرة كلٌ في موقعه ولكن فوقنا جميعاً جبار السماوات والارض فلا حق يضيع ولاظلم يستمر ومرض يدوم.
فقط توكلوا على الله بكل يقين.
#شكر خاص للشاعر الشاب #حيدر حطاب لكلماته الجميلة التي زينت قصتنا.
القصة وما فيها من خواطر بقلمي انا: #روز الفياض??
#قصص الحور العين
#اكبر تجمع لكاتبات وكتاب العراق.
مودتي واحترامي
وشكراً لكل التعليقات الجميلة والتفاعل الرائع ??.