رواية صبرا يا قلبي الجزء الثاني للكاتبة روز الفياض الفصل الثالث والعشرون والأخير
وتحت مقُولة إختر لقلبك ما يليقُ به إخترتُك.؟
بعدما اتوفت ام عبدالله خالة ماجد سبحان الله بدت نفسيتي ترتاح وماشفت لاخيال ولاظل ولا اي شي..
زينب كالت اسراء رجعت لزوجها وعلى اساس يردون يسافرون لاوكرانيا لان هو يريد يدرس ماادري شنو.
اما شيماء فاختفت.
العلوية رجعت من العراق بعد شهرين جانت منفوخة علي ماادري شبيها يوم يومين تلاثه وهي مغندبة بعدين كالت: شلون صرتي؟
ذهب: الحمدلله زينة.
العلوية: اي خوش، قابل ليش ماتصيرين زينة هاي اختي المرحومة راحت بسببج.
جنت جاي اكل فاكهة، غصيت.
ذهب: بسببي؟ شنو اني مرضتها اسم الله؟
العلوية: غير انت الحلمتي جريذي مدري شنو دستي عليه ومات؟
ذهب: لا والله؟ يعني هي هذا الجريذي اللي جان يريد يعضني؟ يعني اعوفه يعضني علمودها؟
ههههه والله غريبة الموت والحياة بيد الله خالة اني حلمت حلم بس لافسرته ولا اني سويته ولااني مرضت اختج.
دخل ماجد سكتنه.
بعد العشا هي راحت نامت كال ماجد: امي مااتعشت لكمتين وراحت، ماكلة شي العصر؟
ذهب: لا بس زعلانه مني.
ماجد: ليش؟ مانرتاح احنه من الطلايب شصار؟
ذهب: شمدريني اشو تكلي اختي ماتت بسببج.
ماجد: بسببج انتِ؟
ذهب: تكول انت حلمت بالجريذي ودستي عليه ومات، يعني الجريذي اختها تقصد.
ماجد: صدك عود؟
ذهب: اي والله هههه.
ماجد: والله ماادري، عموما خليها هي يومين بحدها ترجع طبيعية هههه يعني اذا اختها جريذي شنسويلها مثلا قابل حطيتيله مصيادة؟ ههههه.
ذهب: استغفر الله اخاف احجي وتزعل.
ماجد: شنو؟ احجي؟
ذهب: يعني اني صدك من اتوفت خالتك احس براحة من كل النواحي ماادري ليش حتى خيالات مااشوف، ياريت لو خالتي الله يهديها وتبطل من سالفة الحجي وبنات اختها حتى نرتاح كافي مشاكل وتعب ونكد.
ماجد: الله يهديها ان شاءالله..
بعد مرور شهر ابوي طلع تقاعد وقرروا اهلي يأجرون بيتنه بالعراق ويجون يستأجرون يمنه شقة صغيرة على كدهم.
وفعلا هيجي صار..
كلش فرحت وحسيت بالراحة والامان والطمئنينة.
من صاروا اهلي يمي ابويه حجه ويه ماجد علمود يخليني اشترك بدورة رسم جانت قريبة علينه.
جنت اخلي الاولاد يم امي واروح يومية العصر ساعتين.
جنت محتاجة هيج شي يخليني اشغل تفكيري باشياء ايجابية.
كلش اتونست واتعلمت هواي اشياء ومعلومات.
ومن خلصت الدورة مال الرسم دخلت دورة خياطة.
اتعلمت بيها شغلات بسيطة.
بديت الهي نفسي واطلع ويه ام نور اللي صارت صديقتي.
ظلينه نطلع سفرات احنه وياهم واهلي، نغير جو ونتونس.
العلوية ظليت اتعامل وياها طبيعي لحدما هي بحدها هدأت وسكتت والله هداها.
عمة حميدة تجينة كل شهرين تبقى يمنه اسبوعين وتروح.
عمة حميدة: اكلج ماناوين تجيبولنه بعد بنيه اخت لهذا الكمر؟
ذهب: يااا عزا العزاج وهيبة، عمه على بختج منيلي حيل وصحة بعد احمل واجيب ههههه بدون شي مسكربة انوب بعد حمل وولادة غير ابن اختج هو بيده يعدمني حتى ميفكر هههههه.
عمة حميدة: هههههه لا يمه اسم الله عليج ما باللازم خلينه على شموسه نعمة من الكريم.
ذهب: اكلج عمه ظال بنفسي اروح للعمرة.
عمة حميدة: ليش ظاله بنفسج؟ روحي. كلي لماجد وخل ياخذكم ويروح. واذا متردون تاخذون الجهال وياكم خلوهم يمي.
ابقى اني والعلوية ونبقي الجهال يمنه وانتو روحوا بالعافية عليكم.
ذهب: لا يمه شلون اخليهم مااكدر، اشتاقلهم مااتحمل يبتعدون عني.
عمة حميدة: لج هو اسبوع قابل سنة.
ذهب: لا مااكدر حتى لو اسبوع.
عمة حميدة: بكيفج بعد احجي ويه رجلج وشوفي شيكول وكلولي، شعندي اني ماعندي شي ابقى يمهم.
ذهب: ليش مانروح كل احنه؟
انت وخالتي هم؟
عمة حميدة: خوش فكرة والله محتاجين نروح بس خاف العلوية تخرب علينه وتكول مااروح؟
ذهب: لا ان شاءالله تقبل انت احجي وياها واني راح احجي ويه ماجد ونشوف شيكولون ونقرر.
حجيت ويه ماجد كال: اممم، اني وعدتج اخذج بس مصارت فرصة نروح.
ذهب: هسه ماكو شي يمنع.
ماجد: ماعندي مانع بس امي شلون؟
ذهب: تروح ويانه هي وعمة حميدة شتكول؟
ماجد: علواه، افرح اني مااكول لا بالعكس اخذكم كلكم واكسب بيكم اجر ههههه.
ثاني يوم رحت لاهلي وكتلهم: راح اروح للعمرة
امي: اللهم صل على محمد وال محمد. شوكت؟
ذهب: على الشهر الجاي.
امي: ياالله..
خلي ياخذج من شوكت من كلج اخذج، علواه ابوج هم ياخذني حسره علي الزيارة بالسنة حسنة يحن علي.
ذهب: ههههه اتذكرتي؟ تعالوا ويانه حتى نروح كل احنه، حتى العلوية وعمة حميدة راح يرحون ويانه.
العلوية هم الله هداها وقبلت ورحنه كل احنه اني وماجد والاولاد وعمة حميدة والعلوية وامي وابوي.
يمكن جان احلى شي عشته بحياتي مشاعر اول مرة اجربها واحس بيها.
احساس مينوصف من تكون بأعظم بقعة بالعالم واطهر مكان الخشوع اللي تحس بي مستحيل تكون حاس بي بالايام العادية لو بغير مكان.
كلها جانت تكول تعب وخاف اتعبين بس اني جنت مصره اروح والحمدلله محسيت بأي تعب بالعكس كل شي جان سهل ومريح.
كل شي جان حلو مااتمنيت نرجع.
لكن للاسف هي مجرد ايام وتنقضي.
رجعنة للعراق بالسلامة والكل اتلكانه بالمطار عبالك راجعين مت الحج مو من العمرة.
بقينة بالعراق اسبوع وبعدين رجعنه لتركيا.
الحمدللع رب العالمين حياتنه استقرت ماكو مشاكل بعد ولا اكو سحر ولااكو حجي.
العلوية رجعت حبابة مثل قبل مرات شوية من تحجي ويه وحده من بنات اختها تضوج وتضوجنه بس تاخذلها يوم يومين وترجع طبيعية.
اسراء وزوجها سافروا.
شيماء حسب مسمعت صار عدها ولد ونقلوا زوجها لديالى وراحت وياه.
اهلي بعدهم يمنه بنفس المنطقة مسافة عشر دقايق مشي مرات اخذ الاولاد واروحلهم شوية.
ماجد بعده شغله ويه ابو نور بتركيا وويه ولد عمه بالعراق.
نجلاء هم حياتها مستقرة ومرتاحة من زماان مااجت بس وعدتنه بزيارة قريبة من توصل للوزن اللي تريده لان مسوية رجيم قاسي على كولتها هههه.
ماجد: حبيبي؟
ذهب: اممم؟
ماجد: ليش نايمه هناك عالحافة؟ تعاي هنا.
ذهب: خير؟ شتريد؟
سحبني من ايدي لحضنه: مااريد شي شبيج خفتي..
بس نريد نتنوس شوية؟؟؟؟
ذهب: هههههه رجعت علينه سالفة التنوس.
ثمّ أنك في أكثر الأوطان أمنًا مادُمت في قلبي.؟
كم يجب ان يتحمل هذا القلب من هموم لكي تمنحه الحياة هدنة لوقف القتال؟
كم من قلب لم يحتمل طول الاختبار، وكم من قلب قد مل من الانتظار، وكم من قلب قد استسلم من شدة الظلم والقهر والمرار..
رفقاً بقلوبنا بني البشر فكلنا يحمل في قلبه هموماً تخنقه.
تمت