رواية صبرا يا قلبي الجزء الثاني للكاتبة روز الفياض الفصل الأول
أحتلني حبكِ كأنكِ تعانقين قلبي بكل قواكِ؟
ذهب: اكول نجلاء عندي شي اريد اكوله بس مااعرف شلون اكوله.
نجلاء: خير حبي شمسويه من مصيبة؟
ذهب: مصيبتيش؟ ماكو شي.
نجلاء: شوفي. اعرفج اني مادام كلتي ماكو شي معناها تأثرتي بكلمة مصيبة وخفتي. كولي شعندج؟
ذهب: شوكت تجين؟
نجلاء: شنو يومية جاية. تره اني هم عندي بيت ورجال مو بس انت.
ذهب: مبين كاعد يمج فراس. الح بعد لو كافي؟
نجلاء: لا عيني لا مااكدر اجي واعوف فروسي حبيبي مااكدر اشتاقله وهو هم حبيبي ميكدر بدوني يوم واحد.
ذهب: اكلج اني مااعرف امثل فتحي السبيكر خل اكله احجزلها ووديها ومتاكدة هو هسه ولايمه الحجي فخليني احجي وياه كبل احسن.
نصت صوتها وكالت: لااا لج يسمع بس يغلس. انت ظلي لحي علي واني اتعزز وارفض راح افتح السبيكر.
ذهب: ديالله.
جانت هاي خطة نجلاء حتى يخليها فراس تجي للعراق.
وبعد عدة محاولات والحاااح عظيم مني استحى فراس وقبل يحجزلهم هي واولادها حتى يجون.
اجت بعد شهر ودخلت من الباب تصيح بعدما راح ماجد جابهم من المطار: وينها؟
وينها؟
بس لانايمة؟
تره ماعدنه جناين تنام للظاهري، كلولها اجت حماتج خل تفز تجي تستقبلني.
اني جنت كاعدة ارتبلهم الغرفة الجوه واسمعها تحجي بصوت عالي حتى تسمعني.
ضحكت ومديت راسي كتلها: اوووي شنو هالازعاج من الصبح الواحد ميكدر ينام وياخذ راحته ابيته.
نجلاء: صدقة. لج تعاي شنو هاي شصاير بيج؟ ليش انت هيج تحلوين كل مره اكثر وتضعفين واني اتمدد واتمدد واتمدد.
ضحكت ورحت سلمت عليها وعالجهال وكعدنه نسولف ونضحك ساعة كاملة بالغرفة لحدما دخل علينة ماجد: صدك جذب؟
ذهب: ها حبيبي؟ شكو؟
ماجد: يعني انتن من تكعدن سوه تنسن نفسجن؟ من شوكت من كعدتن تسولفن صار ساعة كاملة هاي عود بس سلام شوفن بيش الساعة صارت؟
نجلاء: بالثنتين. اي وخير ياطير شكو؟
ماجد: خير ياطير؟ هو اليشوفج انت وجربزتج يشوف خير؟ هاي اولها كتلنه الجوع.
ذهب: ياا سودة علي حقك والله. راح عنك الجوع هسه دقايق واصب الغدا مو تدلل كم ابو رائد عندي.
ماجد: اي هسه كم ابو رائد. صار ساعة ابو رائد محد بحالة.
ذهب: لا اموت اني. شلون محد بحالة.
نجلاء صافنة علي تباوعلي بعين ونص بعدين كالت: شوفي توني واصلة مااحب المغثة ولا الحلاة الزايدة وانت ورجلج حلاتكم ترفع السكر والضغط مااتحمل اني هذا الجو لان معناها تتسببون بطلاكي وتتحملون ذنبي وذنب جهالي. بطلوا هاي الافلام العربية وخلوا عدكم احساس اكو غيركم متزوج صحيح بس حالة حال الحدايق تره. لا يمكن الحدايق ارحم عالاقل يكدرون يباوعون يدورون ماكو شي لازمهم بس احنه بالضيم.
ضحكت حيل وماجد واكف اباب الغرفة وماد راسه يضحك على سوالفها: نجلاء الله يساعد فراس عليج.
نجلاء: ليش خوية ليش؟ مو اني اختك الوحيدة ليش هيجي تجرح مشاعري.
ماجد: والله الله يساعده. النسوان شيجرعجن. وانت كومي يالله كتلني الجوع مو وكت سوالف.
كمت ركض اصبله الاكل ويه البنات وجهزت كل شي وهو الجهال يلعبون ونجلاء راحت تغسل وتبدل.
العلوية جانت نايمة لان متغدية وشاربة علاجها وعمه حميدة عد بيت عمو ابو عبدالله.
راحت تشوفهم بعدما سمعت امهم مريضة اللي هي خالة ماجد ام اسراء.
بعد الغدا ماجد راح ينام صعد وصاح علي صعدتله: نعم حبيبي؟ صحتلي؟
ماجد: متردين تنامين؟
ذهب: ومن شوكت اني انام الظهر؟ يومية ابقى كاعده ويه الجهال وانت تنام شعندك اليوم؟
ماجد: ماكو. عود ردت راحتج.
ذهب: ايبااه اشمعنه اليوم رايد راحتي؟ كول شكو؟
ماجد: ماكو، عبالي اكو مقبلات شي تنتوس بيها.
ذهب: نتنوس شنو؟
ضحك كال: نتونس.
ذهب: ههههههههه لاحبيبي اتنوس بحدك اني نازلة هي ماتنوس بهالظهر والبنية اليوم واصله.
ماجد: يعني اذا هي اليوم واصلة احنه نصوم؟
ذهب: هههههه وانت ميحلالك تتونس الا من تجي هي؟
ماجد: لان ادري بيج هسه تكابليها وتكعدين وتنسين اكو رجال موجود محتاج اهتمام وراحة محتاج يتنوس شوية حتى يكدر يشتغل ويجيبلكم اكل ويدللكم.
ذهب: هههههههههه هاي التمثيلية جديدة اليوم صاير تتمسكن.
ماجد: هسه شنو؟ اكو شي تحت الحساب لو الف راسي وانام.
اتدنيت يمه بسته كتله: هاي تحت الحساب. يالله نام وراك كعده العصر.
ماجد: خير شعدج العصر؟
اجيت اكله اريد اروح اسوي تحليل بس خفت وسكتت: هاا؟ ماعندي. شعندي. بس غير تكول وراك شغل.
نزلت يم نجلاء واني افكر شلون لو صدك طلعت حامل؟
يصير انزله لو حرام؟
معقولة حرام هو بس شهر واحد؟
ممنوع علي الحمل لان عندي ذبحة وماادري شسوي لو طلع اكو حمل.
نجلاء: شبيج صافنة وساكتة؟
ذهب: مابيه.
نجلاء: شلون مابيج كل مااخابر تكولين عندي شي اريد اكوله وبعدين تضيعين السالفة علي وانسى اسألج.
ذهب: هاا؟ اي صح عندي. بس مالي خلك اكوله.
نجلاء: واذا مالج خلك ليش تبثين علج بحلكي وتخليني افر باذاناتي لحدما اعرف؟
ذهب: ههههه..
مو هو الموضوع يضوج. ماادري كلما اتذكره اتنكد.
نجلاء: شنو تره خوفتيني؟ شنو حامل وضامه الموضوع؟
صفنت بوجه نجلاء عبالك تقرا افكاري.
نجلاء: احجي شبيج؟ خاف حامل وتخافين تحجين؟
ضحكت وبعدين دمعت عيوني.
نجلاء: عزا العزه وهيبة هي وعشيرتها.
ضحكت حيل كالت: والله عرفتج.
بقيت ساكته اتوقعت تفرح بس رد فعلها ضوجني اكثر.
نجلاء: لج مو تاخذين علاج لمنع الحمل؟
هزيت راسي وطاحت دموعي.
نجلاء: اووف. والله انتو لازم بعد تصير عدكم بنية ووراها قفلوا المعمل.
ذهب: يابنية. اني هسه مجرد شك والرعب موتني.
نجلاء: لا اسم الله شدعوه هيج خايفة قابل من اول شهر خطر؟
ذهب: اني مخايفة من الحمل بس ياخوفي من اخوج لو عرف.
نجلاء: اي حقج. هو كلش ميتفاهم بسوالف الصحة. وانت اصلاً مو اي مرض عندج. حقه ما الومه. يخاف على زوجته وام جهاله.
ذهب: على طرف لساني قبل شوية اكله نروح نسوي تحليل بس خفت.
نجلاء: والله خوافة انت. المشكلة تخليني اتمنى اني بمكانج حتى استغل الوضع. لج بابا انت صحتج على كدج وهو يخاف عليج من اقل شي سبحان الله يمكن الله خلاج تتمرضين حتى يتغير ويغير اطباعه كلها علمودج. متتذكرين قبل شلون جان عصبي هسه هادىء اصلا ويخليج اتطلعين وترحين للسوك وتباتين عند اهلج كم مرة. اول تالي ماجد يتفاهم بهيج سوالف!
اتنهدت كتلها: المرض مينراد. بس يمكن على كولتج اتمرضت حتى يتغير شوية ويقلل عصبيته ويبطل سوالفه.
نجلاء: ياسوالف؟ كولي غيرته. الرجال بلا غيرته مينراد.
كل إلى صار بينكم لان يحبج ويريدج اله وبس الانسان من يحب يصير قاسي ويه اللي يحبه من كدما يحبه ويريده بس اله.
ذهب: والله يانجلاء اليحب المفروض ميكدر يقسى عااللي يحبه.
نجلاء: والله اني ماافهم بسوالف الحب عفتها الكم انت واخوي. ماادري شوكت اخوي صار رومانسي اشو قبل اتذكره دفش. ابد ماعنده رومانسية حتى اغاني ميسمع ولايخليني اسمع. مره رزلني رزاله لان متمددة واسمع ام كلثوم ومندمجه صلخني ذاك الكف المعدل ورفس الراديو. جان عندي راديو عشتوا اسمع بي اغاني بالليل يايابة. انسحلت سحله بيومها. عباله احب..
ذهب:؟
نجلاء: بس اني صدك جنت احب فريس ومخلية صورته جوه ملابسي بالكنتور وعايشة قصة حب من طرف واحد على اساس تالي طلعت كلها تدري حميدة فاضحتني؟
ذهب: يمه متت؟
نجلاء: والله رجلج مجرم تره.
ذهب: توه تكولين الحب والحبيب ويصير قاسي لان يحب اتحملي اخوج ومحبته العنيفة بس اني لازم اتحملها.
نجلاء: اييي. اخ منك يالساني. مااتوب الا اسوي نفسي مصلحة اجتماعية وتالي احجي حجي مااعرف اركعه شلون.
ذهب: ههههههههههههههه.
بقينة اسبوع متونسين ويه نجلاء بعدها راحت لبيت عمها تشوفهم وتبقى عدهم كم يوم.
كاعدين بالليل نتعشى اني وماجد والعلوية والجهال.
حسيت لعبت نفسي.
كمت غسلت وكعدت اتحججت اوكل فضولي.
ماجد: ليش متاكلين؟
ذهب: جاي اوكل فضولي.
العلوية: هو ياكل لتعودينه الا واحد يوكله.
ذهب: مياكل يبقى يصفن وهو بنفس اللكمة.
خلصوا عشى وماجذ اخذ امه ينطيها علاجها ويخليها بفراشها.
شالوا البنات الماعين واخذت الجهال غسلتلهم.
دخل ماجد: ليش شالوا الاكل؟ مااكلتي؟
ذهب: مااشتهي هسه.
ماجد: شبيج؟
ذهب: مابية. مجوعانة من اجوع انزل اكل.
كعدنه نباوع عالتلفزيون شوية بعدين اخذت الجهال بغرفة نجلاء انومهم وبعدين اصعدهم.
غفيت بمكاني وهمه كاعدين يلعبون.
دخل ماجد كال: تردين تنوميهم؟ اشو انت نايمة وهمه كاعدين؟
ذهب: ميستسلمون للنوم بسهولة. اني نعست وهمه لا.
ماجد: كومي ناخذهم فوك حتى ينامون كبل بفراشهم.
ذهب: مابيه حيل اكوم ميصير انام هنا وانت تاخذ اولادك وتنامون فوك؟
ماجد: الف مرة كتلج زوجيني حتى ترتاحين متقبلين شسويلج.
ذهب: اي خطية ميت على راحتي.
ماجد: كيفج بعد اذا متصدكين. جربي وشوفي.
ذهب: اي، شكو بيها نجرب هو زواج قابل شنو.
صعدنه اني اخذت فضل انومه وهو اخذ رائد.
دزلي مسج: نام؟
ذهب: لا كوه فاتح عيونه بس ميريد يستسلم ويغمض وينام.
ماجد: خاف تفوته لقطه ههههه.
ذهب: ورائد نام؟
ماجد: لا هم ميريد يستسلم.
ذهب: هههههه
ماجد: هسه نريد نلحك نتنوس قبل لاانام.
ذهب: ههههههه اليوم شقصتك؟
ماجد: ماكو قصة واحد يريد مرته شنو بيها من قصة؟
ذهب: اممم. يمكن راح ازوجك.
ماجد: الله ويدج.
ذهب: بس بشرط. اني اختار العروس.
ماجد: موافق. بس خوما تختارين وحده رجليها بالكبر. اريد وحده زغيرة وحلوه ودمها خفيف؟
ذهب: تتشرط بعد؟
ماجد: انت مسوية جميل كملي جميلج.
ذهب: يصير خير. بسيطة.
ماجد: شنو بسيطة؟ تهدديني يعني؟
مجاوبته باوعت فضل شفته نام واخيراً خليت راسي واتمددت يمه. كلش مالي خلك اليوم.
وره شوية دخل ماجد شايل رائد نايم شافني متمدده كال: شنو نمتي؟
ذهب: لا. منتظرتك.
ابتسم ابتسامة عريضة: شنو خفتي؟
ذهب: من شنو؟
ماجد: خاف اتزوج عليج؟
ذهب: دتعال شيل ابنك خليه بفراشة وخليني اروح انام تعبانه.
خله رائد واجه شال فضل بعدين اجه وكف على راسي: اليوم اكو شي بيج متغير.
ذهب: شنو؟
ماجد: ماادري. بس صايره احلى.
ضحكت كتله: بلا هالافلام مابيه حيل اي شي ومالي خلك.
كعدت اريد اروح لغرفتنه دنك باسني من رگبتي.
قشعرت ورجفت.
ماجد: شبيج مالج خلك؟ انت هيج تنطيني عذر اتزوج تره.
ذهب: اوكي. اتزوج. منو تقبل تتزوج واحد متزوج وعنده كومه جهال؟
رحت لغرفتنه نمت واتغطيت.
اجه وراي نزع التيشيرت واتمدد بالشورت كال: اووه اخبارج قديمة هسه يركضن ركض وره المتزوج بس كون هو يقبل.
اتدنه راح يبوسني. حسيت لعبت نفسي. دفعته.
رفع راسه وصفن بوجهي.
ذهب: شبيك؟
ماجد: انت شبيج؟
ذهب: مابيه.
بقى كاعد ويباوعلي حسيته ضاج كلش كلت خل اكله واخلص.
درت وجهي وانطيته ظهري وكتله: اريد اروح باجر اسوي تحليل.
ماجد: ماليش؟
بقيت ساكتة.
سحبني من ايدي حيل: لتكولين اللي ابالي؟
ذهب: اووي شلعت ايدي.
ماجد: يعني حامل؟
صرخ بوجهي.
ذهب: على كيفك شبيك؟ كتلك اريد اسوي تحليل ماكتلك سويت.
ماجد: يحتاج تحليل يعني؟ تردين تفهميني متعرفين نفسج؟ محاسه بشي؟ ممتأخره عن موعدها؟
ذهب: التاخير مو مقياس ولاحتى احساسي اني ماخذه كل الاحتياطات يعني مو ذنبي اذا صار شي.
ماجد: ومغلسه؟ شمنتظره يعني؟ من تجي الاسعاف تاخذج يالله تحجين؟
ذهب: استغفر الله.
ماجد: صار شكد من رجعت واتعشينه وسولفنه وكعدنه لا صدك انت مااتعشيتي، لعبانه نفسج لان حامل ومغلسه. شمنتظرة بس اريد افتهم؟!
صرخ بوجهي وشمر المخدة حيل عالميز تواليت ووكعت العطور والمزهرية وكعت وانكسرت.
فز رائد وظل يبجي.
كمتله اني تمددت يمه بفراشة نومته وبقيت يمه.
بقيت كاعده وصافنة عالسكف.
اسمعه راح للحمام ورجع يلم الكزاز.
بعدين صار هدوء. نام.
نمت بغرفة الجهال نومه عميقة. كعدت الصبح حتى للصلاة مكعدت ولا ماجد كعدني الظاهر بعده عصبي.
دخلت لغرفتنه باوعت عالميز تواليت على اساس مرتبه هو ولام الكزاز.
رحت اتوضيت ورجعت حسيت بشي زرف رجلي اذاني. اكيد كزازة زغيرة.
كلش اذتني بس مااشوفها ولااكدر اطلعها لان الدم ميخليني اشوفها.
عقمت الجرح ولفيت عليه شاش لحدما يتوقف الدم واحاول اطلعها.
نزلت لكيته طالع.
العلوية: نايمين الجهال؟
ذهب: اي خالة نايمين.
العلوية: اي خوش. اريد اسبح بس بالاول ردت اخلي حنة. اختي ام عبدالله جابتلي ذاك اليوم حنه مال الفاو. من زماان ماحنيت راسي. متعجنيها إلى وتحنين شعري؟
ذهب: اي وينها انطينياها اعجنها.
العلوية: شبيها رجلج؟ تعرجين؟
ذهب: كزازة يمكن البارحة بالليل انكسرت المزهرية.
العلوية: يا ديري بالج لتروح تدخل برجل واحد من الجهال كزازة.
ذهب: سديت باب الغرفة لحد ميكعدون وارجع انظف الغرفة بالمكناسة الكهربائية حتى اذا اكو شي تشفطه. ،
عجنت الحنة لام ماجد وخليتها ساعة بالشمس وبعدين خليتها لشعرها.
من اتزوجت ماجد لليوم حتى صبغ متصبغ شعرها هي بس هالمرة لان الحنة من اختها عجبها تخليها.
صارت ايدية حمر من الحنة اتذكرت من جنت زغيرة امي جانت تخلي لايدي حنه بليلة العيد وبالعطلة الجبيرة مال نهاية السنة.
كعدوا الجهال خليتهم جوه وصعدت نظفت الغرفة خاف باقي بيها بعد كزاز.
نزلت جهزت الغدا وواتصلت نجلاء: ها شلونكم؟
ذهب: هلو. الحمدلله انت شلونج؟
نجلاء: الحمدلله. اكلج شبي رجلج؟
ذهب: شبي؟
نجلاء: ماادري راسلته سألته على امي وعليج وعالجهال مجاوبني قرا المسج وغلس!
ذهب: يجوز مشغول لو بالسيارة. جان راسلتيني وسألتيني ليش هاللفة كلها؟
نجلاء: لا مو اني مخليه خطه عود ردت امهدله واكله مرتك حامل.
ذهب: خطتج فشلت. كتله البارحة واتخبل.
نجلاء: اععع. شصار؟ شسوه؟
ذهب: خلصها صياح يصيح بوجهي بعدين كسر المزهرية وسوالنه فلم باخر الليل.
نجلاء: جذابة؟ ادري المزهرية شعليها؟
ذهب: انت خايفة عالمزهرية يعني؟ مخايفه علي!
نجلاء: لا مخايفة عليج مو كتلج انت مريضة يخاف عليج بس المزهرية حرامات.
ذهب: يا يخاف علي. هذا الصياح كله والعصبية كلها ويخاف علي.
نجلاء: وتالي؟
ذهب: ماكو. رحت نمت بغرفة الجهال وحتى للصلاة مكعدني.
نجلاء: يالله ميخالف المهم كتيله وخلصتي.
ذهب: شخلصت بعد وراي من يتاكد اذا سويت تحليل استلمي حركات.
نجلاء: الله كريم هسه هو ليش هيجي متشائم يجوز ماكو خطورة يجوز يطلع ماكو حمل اصلا مجرد خربطه بالهرمونات؟
ذهب: الله كريم.
نجلاء: امي وين؟
ذهب: كاعده بالحديقة اليوم حنيتلها شعرها.
نجلاء: جذذب؟
ذهب: والله خالتج جايبتلها حنه ورادت احنيها.
نجلاء: امي الظاهر خرفت.
ذهب:؟