رواية صبرا يا قلبي الجزء الأول للكاتبة روز الفياض الفصل السابع والأربعون
ابو عبدالله: عمي اذا بعدج تعبانه فاحنه منضغط عليج. احنه نريد راحتج اذا تردين تبقين بعد يم امج ترتاحين احنه ماعدنه مانع بالعكس. احنه نريدج ترتاحين وترجعين لبيتج وجهالج ورجلج انت بتنه ومنقبل باذيتج ولاتعبج هواي مشاكل صارت وياج وطلعت من بيتي واجتج بدون ذنب ولاحجيتي ولااشتكيتي بس اني ماسكتت لاوالله وهذول كدامج سأليهم اخوانج. انت عزيزة علينه بوية اعز حتى منه هو ماجد نفسه. بتي سوتلج مشكلة واخذت جزائها اني ابوج واخذتلج حقج منها. تردين ضرب انضربت تردين اهانة انهانت..
بتي هي الغلطانة وهي السبب اني ماارضى بالغلط حتى لو هي بتي طردتها. بيتي بعد متطبله اسراء ومتوصل لعتبته. هاي لخاطرج واذا اكو شي بعد يرضيج حتى ترجعين كولي واتدللي.
ابوي: ابو عبدالله احنه لانريد نجربكم ولا عدنه نية ننتقم وذهب بتكم وتعرفوها لاصاحبة مشاكل ولا تحب تسوي تصفية حسابات والغلط كل الاطراف مشتركة بي حتى هي من طلعت بدون علم رجلها غلطت واحنه هذا الحجي حجيناه وياها مو بس كدامكم وهي تعرف نفسها غلطت بس هو ماجد عصبي وساعة شيطان.
ماجد: واني معترف غلطت وكتلها هالحجي اني مو من إلى تاخذهم العزة بالاثم ويبقى مصر على غلطه وهي اكثر وحده تعرفني اني اذا غلطت اكول غلطت واعتذر عالغلط الغلطته. هي طلعت بدون علمي ومو لاي مكان وتعرف كلش زين اني مااقبل تروح والدليل مكالت راح اروح لان متأكده مستحيل اقبل تروح، ومع ذلك راحت.
ابوي: ميخالف ياعمي. بس العصبية هاي المفرطة مالها داعي انت لشوكت تتعامل بكل شي بعصبية؟ مو كل الامور تتعالج بالعصبية ولا كل موضوع يستوجب العصبية شفت انت بعينك النتيجة موضوع بسيط وصلها للموت بسبب زلة لسان بساعة عصبية وعلى شنو والله طلعت من البيت بدون علمك. قابل طالعة وحدها؟ مو طالعة ويه العلوية؟
ماجد: عمي اني ماانقهرت لان طلعت من وراي، هاي مرتي يعني اعرفها حتى لو طلعت من وراي اعرفها وعندي ثقة بيها ومطالعة وحدها طالعة ويه عمتي قابل ماعندي ثقة حتى بعمتي؟ بس اني انقهرت لان مااريدها تروح لهناك، اني مرتي متنزل نفسها لهيجي ناس وتروحلهم. اني ماعندي مره تدخل نفسها بمتاهات وحجي ومهاترات ويه هيج عالم. وحدة متستحي حشاكم شلون اقبل مرتي تروحلها وتحجي وياها؟ كل شي كدامها جان يصير حتى من جنت احجي وياها بالتليفون افتح السبيكر كدامها حتى تسمع وترتاح ومتبقى بشك وتعرف كل شي جان يصير، تروحلها ليش؟ ليش؟ زغيرون اني ممالي عينها تروح تفاصل علي يم النسوان لتحجن ويه رجلي شنوزغيرون وخاف اتقشمر؟
موضوع مو من مستواي والاكبر من اتكفلوا بي همه يحلونه بمعرفتهم بدون مااتدخل وماانزل نفسي ومااخلي نفسي علج بحلك هيج عالم. ليش مااسمع الكلام وابقى بعيدة؟ مو امي حميدة كلتلها اني اروح واني احل الموضوع؟
ردت اجاوبه بس عمه ابو علي كال: هسه احنه مجايين نكول ليش سوت وليش هيجي صار. الصار صار وانتهى والموضوع اخذ اكبر من حجمة من الطرفين. احنه هسه جايين حتى نكلب الصفحة ونبدي صفحة جديدة بدون مشاكل وعصبية.
احنه جايين نرجع بنيتنه مو نحجي بهالمواضيع ونتعاتب. ومقدرين موقفج عمي والسويتيه الج حق بي مالج علاقة بالحجي اليحجي هذا مره وتعرف اكو وحده حاطه عينها على رجلها وتريد تاخذه منها شتريدها تسوي؟
سكتت هواي عنها مره مرتين مفاد وياها شلون تتحمل وتبقى كاعده ومخلية ايدها على خدها؟ غير تحبك وتغار عليك ومتريد بيتها ينهجم؟ لو وحده ثانية بمكانها جان من اول مره راحت وفضحتها وسوتلها قصة بالشارع كدام امة محمد.
سكتنه كل احنه بعد هالحجي وفهموا همه اني مااكدر ارجع هسه.
وشافوا ماكو نتيجة من الحجي اكثر بالموضوع فكلوا لابوي خليها تبقى ترتاح بعد فد اسبوع اسبوعين.
مرادوا يضغطون علي اكثر ولايحرجون ماجد اكثر.
مر اسبوع والثاني وصار شهر.
مليت من كعدة البيت منتظره الدوام يجي حتى التهي، الاسبوع الجاي عيد ميلاد حبايبي ووراه باسبوع اداوم بلكي التهي وانسى شويه.
ماما قررت تسوي عيد ميلاد رائد وفضل يكون بالحديقه القريبه يمنه لان عائليه وحلوه وزغيره وطبعا هاي خطة عمه حميده اعرفها..
عزمت فطوم والبنات وبيت خالتي ونسرين وعهود والبنات وزينب وطبعا عمه حميده والعلويه كلهم اجوا وماجد هم جان موجود صور كل شي حتى يوديه لنجلاء..
طول هالفتره ماجد يومية يراسلني من رقم واسويله حظر.
احتفلنه بعيد ميلاد رائد وفضل جانت اللمه حلوه واني جنت محتاجه اغير جو شويه.
فرحت بلمتهم ويايه وويه الاولاد بس اتمنيت لو نجلاء ويانه، دزلها ماجد كم صوره واتصلت تبجي خطية.
حجت ويه امها وماجد وبعدين انطاني التليفون حجيت وياها اخذت التليفون ورحت اتمشيت شويه وحجيت وياها تبجي كتلها: مكانج فارغ والله ومحتاجه وجودج ماعندي احد احجي وياه فطوم ملتهيه ويه خطيبها.
نجلاء: اسكتي كافي موتيني سوده عليه.
ذهب: لااسم الله عليج. شوكت تجين؟ اشتاقينالج.
نجلاء: مااجي الا من ترجعين شسوي جايه محد بالبيت ويامن احجي عليمن اضحك.
ذهب: هههههه تردين تضحكين علي انعم الله عليج هاي المرجيه منج.
نجلاء: والله مشتاقتلكم كلكم و( ٢٤ ) ساعه احجي واسولف بيج ويه فراس واصدقائنه هنا. هيج جنه نسوي وهيج كلنه وهيج حجينه وحتى عبودي حبيبي يكوم ويكعد يحجي بيج..
ذهب: حبيبي فديت عمره.
سمعت صوت وراي التفتت لكيت ماجد واكف وراي ومنتجي ارتبكت.
نجلاء: والله بس ترجعين اجي بس رجعي كطعتي كلبنه خطيه تره والله من احجي وياه كوه يحجي ماله خلك كل شي.
ذهب: الله كريم.
نجلاء: يعني شوكت انطيني موعد؟
ذهب: موعديش هو بكيفي من ارتاح من انسى عود يصير خير.
نجلاء: والله يكول مو قصدي اللي فهمته والله، يكول الكلمه اجت على بالي وكلتها حتى ماعندي تكمله حجيتها وظليت ساكت لان مقاصد شي، كتلها هيج وسكتت هي فهمت هيج واني جنت معصب بعد لابررت ولاكتلها مو هيج قصدي.
ذهب: الله كريم..
نجلاء: انتو قصتكم مثل المسلسلات التركيه كلما نكول خلص رجعتوا يصير شي يخرب الموضوع اخاف امج او ابوج اصولهم تركيه.
ذهب: ههههه لا ماكو لاتخافين مواليد كركوك بس مو اكراد.
نجلاء: صدك والله مواليد كركوك؟
ذهب: اي والله.
نجلاء: يااصدقه لله يعني مرت اخوي كرديه.
ذهب: هههه مو كتلج اكراد.
نجلاء: مو مهم خليني اتفيك كدام صديقاتي هنا مرت اخوي كرديه من هيج حلوه.
ذهب: هههههههههه.
سلمت على نجلاء وسديته ومديت ايدي بدون مااحجي انطيته تليفونه اخذه بس لزم ايدي وبقى لازمها..
مدري شصار بيه ظل كلبي يدك بسرعه جريت ايدي مقبل يعوفها ومااريد احجي وياه.
ماجد: اكعدي شويه اريد احجي وياج، مانطول بس حجايتين.
بقيت ساكتة ومكعدت مااريد احد يشوفني كاعده وياه وعبالهم اتصالحنه.
ماجد: اكعدي.
كلي بعصبيه كعدت بعدني اخاف منه ومن عصبيته وبعدني ارجف من يلزمني.
ماجد: منا الناس عبالهم اتحرش بيج ههه.
تره هاي ارقامي يوميه تحضريلي رقم.
غلست. اتنهدت حيل..
ماجد: لشوكت نبقى هيج نجر حسرات؟ تره اني خلص شيبت صرت شايب خاف متلحكين علي.
درت وجهي مااريد اسمعه ولااحجي وياه ادري بروحي مااتحمل واضعف.
ماجد: حبيبي باوعيلي عالاقل.
مااتوقعت ينطيج كلبج هلكد تبقين بعيده عني طلعتي متحبيني، مو جنتي تكولين اذا تعوفني اموت هسه طلعت بالعكس.
اتمنيت عندي الشجاعه واكوله بعد مااحبك ومااشتهيك ومااطيقك.
بس جبانه مكدرت احجي وهو عبالك مسويلي سحر على كولت نجلاء اجذب على روحي اكول مااحبه.
ذهب: الله يخليك مااريد احجي كافي هيجي.
ماجد: اني كافي لو انت. لشوكت يعني هذا رابع شهر انت منتبهه لخاطر الله هو عمر لو خلص بشلاع الكلب تره تعباان والله حرام عليج اني ورائد وفضل وامي وحميده وابو جبار عالاقل لخاطر ابو جبار مادام كلنه مالنه خاطر عندج.
باوعتله كتله: مو اني اللي تنكاللها الحجايه الحجيتها ماجد.
ماجد: قسما بالله مو قصدي اللي فهمتيه اصلا ماادري ليش اجت ابالي هالكلمه بس مو اللي فهمتيه شلون تطلع مني هيج كلمه تصدكين؟
ذهب: حتى لو صحيح مااكدر انساها وكلما اتذكرها تشلع كلبي عبالك توني سامعتها واكرهك من اتذكرها.
سكت هو واتنهد حيل.
ماجد: ميخالف رجعي وبعدين حبيني مثل قبل مو جنتي متحبيني وبعدي على اساس حبيتوني ههه.
ذهب: الله كريم.
ماجد: ونعم بالله بس شوكت اليوم؟ باجر؟ عكب باجر؟
ذهب: ماادري ماجد ماادري هسه مااكدر الاسبوع الجاي عندي دوام ماادري.
ماجد: دوام؟
ذهب: دوامي اجازتي خلصت.
ماجد: امم. يايوم يعني؟
ذهب: الاثنين.
ماجد: معناها اني اوديج وارجعج.
ذهب: لا ماكو هيج حجي بابا راح يوديني ماله داعي.
عصبت وجريت ايدي منه.
ماجد: يصير خير.
كمت اريد اروح لان صارت ماصخه كلهم هسه انتبهوا اكيد انه اجه وراي كاعدين بحدنه شكد فشله شلون ارجع هسه عادي.
ماجد: اوكفي وين رايحه وحدج؟
ذهب: واجيت وحدي مايحتاج.
ماجد: وحدج بس اني وراج.
رحت مالي خلك احجي واترادد وياه بعد مااتحمل ادخل بنقاشات ومواضيع هو بالنسبه اله مهمه بس بالنسبه إلى عاديه ومالها داعي..
وصلت يم الجماعه لكيتهم طاشين كل اثنين يتمشون سوه بس العلويه وعمه حميده باقين ويضحكون ويسولفون.
ذهب: كلهم راحوا يتمشون حتى ماما وبابا؟
العلويه: سويتولهم واهس بس اهلج راحوا للبيت نعسوا.
ذهب: راحوا؟ صدك تحجين؟ شلون يرحون ويخلونه اني والاولاد؟
عمه حميده: احنه نوصلكم لاتخافين منخطفكم ولو اكو واحد ممكن تعجبه الفكره.
اخ ياعمه حميده لو ماهي وياي ماادري شلون اموري تدبر.
فاطمه وخطيبها اجوا سلموا وراحو واخذوا وياهم البنات يوصلوهم بطريقهم.
عبدالله وزينب ونسرين هم راحوا بعدين عهود اخذت امها وخواتها وراحوا بقوا بيت خالتي البنات يردون يبقون بعد.
عمه حميده: اني نعست والعلويه غفت اول مره اشوف واحد ينام وهو كاعد.
ذهب: اذا تردون روحوا اني والاولاد نرجع ويه خاله.
عمه حميده: لا ماكو هيج حجي اكعدي ابوج راح هسه انت ويه رجلج.
ذهب: يمه لاتسوين هيج لخاطرالله كافي خطط.
عمه حميده: هسه هي وينها فايده وياكم؟
اجه ماجد بيده رائد فضل نايم عد عمه حميده كعد يمي كال: كلهم راحوا وامي نامت.
عمه حميده: اي والله يمه اني هم نعست وحبيبي نام هم يالله نروح كافي.
كام وكف كال: يالله اتوكلوا على الله بس خل نكول للجماعه رايحين.
خاله والبنات كالوا شويه ويرحون. احنه رحنه كعدت عمه حميده وفضولي كدام
واني العلويه ورائد بحضني وره.
عمه حميده: وصلنه احنه اول وبعدين مرتك وجهالك.
العلويه: اي والله نريد انام.
وصلنه لبيتهم دخل السياره اني خفت خاف ميقبل يوديني بعد بقيت بالسياره منزلت عمه حميده نزلت وهو نزل ونزل امه ودخلها جوه عمه حميده سلمت علينه وخلت فضولي وره لان نايم وراحت دخلت للبيت.
اجه هو صعد بالسياره باوع بالمرايه.
ماجد: تعاي كدام انت ورائد خلوا فضل نايم.
كمت كعدت كدام قبل لايلعب الشيطان بعقله ويبطل وميخلينه نروح.
شغل السياره وطلعنه كال: كلها نايمه ابو جبار والبنات ميدرون بيج اجيتي.
بقيت ساكته باوعت لرائد بده ينعس كعدته وخليت راسه على صدري حتى يباوع من الشباك وينام وفعلا حبيبي بس اتحركت السياره شويه وغفى.
ماجد: يشبهج.
غلست كال: تره قبل شويه اني اللي جنت كاعد وياج ولازم ايدج واحجي وياج نفسي.
مد ايده شغل الاغاني ونصه الصوت كال: تختارين لو اختار؟
ذهب: انت.
طلع اغنية (انطيني وعد للموت).
باوعتله كلت بكلبي هسه وكتها ناقصين كآبه بس بدت الموسيقى انعصر كلبي درت وجهي عالشباك حتى ميشوف دموعي بس سمع شهكاتي على كيف لازمه نفسي كوه حتى لايطلع صوت..
لزم ايدي سحبت ايدي حضنت رائد.
حسيت الطريق صار شطوله ميريد يخلص.
هو ساكت ميحجي بعدين وكف بالطريق ودار علي.
ماجد: لاتبجين.
ذهب: ماابجي.
ماجد: ليش تشلعين كلبي وكلبج هو بالنهايه ترجعين لان اني ماعندي اختيارات ثانيه.
وصلنه للبيت نزل هو دك الجرس بعدين فتح باب السياره اليمي ودنك علي كلي: رفعي الحظر عن رقمي واعتبرينه تونه مخطوبين محتاجين وقت حتى نتعرف على بعض ورائد وفضل اعتبريهم اخوانج.
بقيت ساكتة اتنهدت كال: تره مااعيد هالحجي مره ثانيه.
فتح بابا الباب اخذ هو رائد حتى انزل وانطاه لبابا وراح جاب فضل وانطانياه باسهم وسلم وراح.