رواية صبرا يا قلبي الجزء الأول للكاتبة روز الفياض الفصل الحادي والأربعون
ظليت افور احتاريت شنو اسوي كلبي حسيته عبالك واحد طلعه بيده ظليت صافنه عالصور اختنكت متت..
طلع ماجد شافني اكلب بتليفونه كال: ها شنو اليوم عندج جوله تفتيشيه؟
شمرت عليه التليفون وظليت اصيح هو ارتبك شال التليفون وشاف الصور سكت بعدين راح سد الباب ورجع يريد يسكتني: اششش..
صوتج..
لحد يسمع جوه انت متفتهمين.
اني مستمره شيسكتني اتخبلت: شنو قصوري وياك بس فهمني؟ شنو الشي المو زين إلى شفته بيه؟ شنو الماعاجبك بيه؟ شنو العجبك بيها؟ شنو التحبه بيها جسمها لبسها مكياجها تصرفاتها؟
كلي..
كلي حتى افتهم يمكن اكدر اسويلك مثلها حتى تشبع.
وصلت للصور؟ وصلت للصور ماجد تدزلك صورها مصلخخخة!
محسيت الا ضربني كف حتى اذني حسيت صفرت.
ماجد: احترمي نفسج. ونصي صوتج. لا اكص لسانج افتهمتي..
مجاوبته رحت لغرفة الجهال وسديت الباب الجهال نايمين وظليت مكابلتهم وكاعده اباوعلهم بدون صوت حتى مبجيت بس جنت احس روحي مشتعله.
وره شويه سمعت باب غرفتنه انفتح وانسد اكيد هو نزل بعدين اجت ساره جايبتلي عشا كتلها مااريد.
ظليت افتر بالغرفه مثل المخبله شلون. شسوي. شلون اتصرف؟ المن اشتكي عمه حميده مراح تنطي بي وراح تحاول تسد الموضوع وامه اكيد متصدك واصلا هي مريضه يروح يصير بيها شي بسببي ونجلاء اكيد راح تروح تكله اذا حجيت وياها اسألمن؟
منو يفهمني؟
منو يعلمني شسوي ياربي؟
ظليت مثل الطير المذبوح احس روحي تطلع ومااكدر اسوي شي اتمددت بالكاع بين السريرين مال الاولاد فكرت اتصل بيها واطيح حظها..
فكرت اروحلها بس منو يوديني..
فكرت اسوي هوسه وقصه واخليها كلها تعرف..
فكرت الف فكره بس لكيت بالنهاية كلهم اني بس الخسرانه بيهم..
كمت رحت لغرفتي جبت سجادتي واحرامي وسبحتي واتوضيت وكعدت ادعي واني ساجده مبجيت ولاطاحتلي دمعه بس كلت: ربي اني استخاريتك قبل لا اوافق على هالزواج وانت مضيكت صدري بالعكس بس من اتزوجت ولهسه اني ماارتاحيت بلوه وره بلوه ياربي مالي غيرك اشكيله همي واحجيله إلى بخاطري ربي مالي معين ولا عندي نصير غيرك ربي اني ضعيفه وقوتي بيك ربي لاتكسرني وتشمت الناس بيه ربي اني اتحملت التعب والمهانه والضرب مخافتك ولخاطر رضاك وانت كيفك ترحمني لو تشلع كلبي..
حسيت الباب انفتح ودخل كعد عالكرسي اني بقيت ساجده مرفعت راسي بقيت ادعي بس حسيت دموعي راح تطيح بالوقت الغلط مااريده يشوفني ابجي شوية وطلع وسد الباب.
بعدين رائد كعد اخذته رضعته ورجعته بسريره ودخلت للحمام شفت وجهي اثر اصابعه بوجهي احمر انقهرت على روحي شسويت بحياتي حتى استاهل كل هالضرب..
طلعت خليت مخده بالكاع واتمددت بلكي تغفى عيني مااريد افكر مااريد انقهر بعد ولا اتوجع علموده مادام هيج معناها ميستاهل حتى هالدموع اللي من تنزل وتشلع كلبي شلع.
ظليت اتكلب ردت بس تغمض عيني ماكو مااكدر انام كمت اخذت حبتين فاليوم ابو العشرة حتى انام مااريد افكر بعد راسي راح ينفجر وفعلا غفيت ورحت بسابع نومه.
محسيت الا ماادري بيش الساعه حسيت بروده بس مااكدر افتح عيوني من النعاس بس اسمع ماجد يصيح ويضربني على وجهي ومي بارد يطيح على جسمي.
ماجد: ذهب تسمعيني؟ ذهب حاجيني؟
ذهب: اممم.
ماجد: فتحي عيونج فتحي عيونج باوعيلي تكدرين تحجين؟
فتحت عيوني هو لازمني من جتفي جوه الدوش والمي بارد واسمع صوت عمه حميده تكله: شلون هيجي يصير وانت يمها شلون؟ وليش هيجي تسوي اكيد شي جبير صاير؟ الله يستر علينه الله يستر..
ماجد: يمه هسه مو وكته هالحجي هاي هي كعدت انطيني بس منشفه الفها.
اني مثل المخدره اسمع واشوف بس مااستوعب وجسمي منتهي بايد وماادري شكو شصاير.
كعدني عالكرسي بدلوا ملابسي ولفني بالمنشفه وشالني لغرفتنه خلاني عالجربايه وطلع عمه حميده واكفه وتحجي وتدردم كعدت يمي خلت ايدها على كصتي.
عمه حميده: دافيه راح تصخن خل اروح اشوف الجهال واجيبلها حليب دافي.
بدت عيوني تغمض نعسااانه ميته من النعاس دخل هو وسد الباب وكعد عالكرسي ميحجي بس يباوعلي غمضت عيوني اجه كعد يمي رفع راسي فتحت عيوني.
ماجد: لاتنامين كعدي..
ذهب..
كعدني عدل بس اني ميته النعاس ذبحني غمضت عيوني ضربني على وجهي على كيف فتحت عيوني.
ماجد: لاتنامين باوعيلي احجي شي تسمعيني؟
هزيت راسي اي.
ماجد: ليش هيجي تسوين؟
ماجد: اكو وحده عاقله تتصرف هالتصرف؟ اكو ام تسوي هيج؟
اني من كال ام كلت اولادي بيهم شي شهكت ومديت ايدي عليه.
ذهب: شبيهم؟
ماجد: ليش هيجي تسوين بنفسج وبيه وبيهم مو حرام هالتصرف؟
بلحظتها جنت افكر شكله معصب اكيد صاير شي.
شصاير وليش هيج معصب مني وشبيهم اولادي.
ذهب: اريدهم اولادي شبيهم؟
ماجد: مابيهم شي.
ذهب: وينهم شبيهم لاتجذب شبيهم.
ماجد: مابيهم شي جوه نايمين لان شبعوا بجي بحدهم وانت متدرين بالدنيا شاربه هالسم..
اريد اكوم اشوفهم بس مااكدر جسمي نحلان والنعاس موتني.
ذهب: اريد انام.
عصب هو ولزمني من وجهي.
ماجد: متتنامين بعد افتهمتي..
كومي نروح للمستشفى خل يسوولج غسيل معده شوف شيسوون.
ذهب: مااروح اريد انام بس اريد اولادي.
ماجد: تردين اولادج وترحين تشربين هلكد حبوب ليش مفكرتي بيهم قبل لتشربين هالسم؟ كومي خل البسج خل نروح بسرعه.
ذهب: مشربت شي ماكو سم. يا سم؟
طلع من جيبه طبقة الفاليوم حطها بيدي باوعتلها وباوعتله.
ذهب: هذا مو سم فاليوم.
ماجد: تردين تنامين تاخذين نص وحده وحده مو طبقه كامله.
ذهب: وحده بس اخذت مااريد افكر وانقهر وابجي عليك.
ماجد: حاجيني كم وحده اخذتي وين راح الباقي؟
ذهب: مااخذت بس وحده بيها باقيه وشربتها عفيه اريد انام.
ماجد: يعني بس وحده شربتي؟ اكيد؟ وين الباقي لعد؟
ذهب: ماادري ماجد، ماادري وحده لو اثنين ماادري عفيه خليني انام. بس حده هي بس وحده والله ماكو باقي..
اتنهد هو حضني اني غمضت ونمت مااكدر بعد احجي ولا اتحرك.
الظهر كعدت كوه سمعت صوت فضولي يمي عالجربايه شفته بحضن ماجد يشربه حليب.
ماجد: هاي ماما كعدت.
شلون صرتي؟
هزيت راسي زينه ومديت ايدي على فضولي خلاه بحضني رضعته ونومته يمي.
ماجد: كومي سبحي واتنشطي خل يروح مفعول الحبايه..
ذهب: مابيه حيل خليني بحالي..
مااريد احجي وياه ولا اريد اشوفه.
لزمني كومني ودخلني للحمام فتح المي وطلع.
بقيت جوه المي ماادري شكد، بعدين هو دك الباب لبست وطلعت.
رجعت اتمددت يم ابني اباوعله واحاجيه بكلبي عبالهم شربت الطبقه مال الفاليوم كلها.
عبالهم انتحرت شلون يفكرون اسوي هيج واعوفك واعوف اخوك بحدكم بدون ام؟.
مااكدر اتخيل تبجون علي ومتلكوني تكبرون بدون ام لو تجيكم ام ثانيه ممكن تأذيكم وتضربكم لو تقسى عليكم.
شلون؟.
ماجد: كومي لبسي ونزلي اتريكي تره الجماعه خافوا عليج البارحه ومناموا من خوفهم عبالهم شربتي الفاليوم كله.
مجاوبته مسحت دموعي وكعدت مشطت شعري هو كاعد يباوعلي.
ماجد: ليش شربتي الحبايه؟
باوعتله وكملت تمشيط.
ذهب: اريد انام.
ماجد: اكو وحده عاقله تشرب فاليوم ابو العشره حبايه كامله وبدون اكل وبدون متكول وتحجي؟ حباية لو اثنين اخذتي؟
مجاوبته غلست..
ماجد: تدرين شسويتي بينه البارحه؟
ذهب: مسويت شي ردت انام بدون تفكير بدون ماابجي وانقهر وكلبي ينعصر على ناس متستاهل ميصير يعني؟
ماجد: ماكو شي من اللي ابالج تره صحيح.
ذهب: ما ابالي شي.
كمت نزلت هو نزل وراي لزمني من ايدي خاف اوكع بعدني مثل السكرانه محجيت شي ولا علقت.
عمه حميده: ها يمه سلامات بنيتي شبيج البارحه خبلتينه عبالنه صايرلج شي؟
ذهب: مابيه شي عمه شربت حبه فاليوم ردت انام تعبانه بس الظاهر قويه م حسيت بشي بعد..
عمه حميده: وهذا البوجهج شنو؟
ذهب: شنو؟
ماجد بالحديقه ورائد نايم يم ام ماجد وفضولي نايم فوك.
عمه حميده: ضاربج مو وشربتي الحبايه؟
محجيت بس دمعت عيوني ومااريد ابجي كمت فتحت الثلاجه طلعت كيكه اكلتها.
عمه حميده: والله تعبت منكم شكبركم تصيرون ومتتغيرون متعقلون صاروا عدكم اطفال وانتوا ماعدكم تفاهم.
دخل ماجد كعد يمنه اني رحت للمطبخ ساعدت البنات بالغدا وبعدين اخذت تليفوني كعدت اكلب بي وغيرت خلفية الواتساب حتى يشوفها خليت: (انهم يؤذونك اولئك الذين تخشى عليهم من الوجع)..
خلصت رحت يم فضولي خاف يكعد اتمددت ونمت دك تليفوني وسكت هو يرمش اكيد علمود الغدا.
حاول يبرر ويحجي وياي بس اني ملكيته وجه يحجي ويبرر.
مرت هالايام بسكته لا اني احجي وياه ولاهو وعمه حميده ساكته مطيتنه مجال على كولتها.
اليوم اروح لاهلي محتاجه اطلع واغير جو واصلا هو مهر بنت خالتي ولازم اكون موجوده بس المشكله بالاولاد مااكدر اخذهم ولااكدر ابقيهم.
بابا اتصل بماجد وصاه يجيبني العصر حتى بس العصر وارجع علمود الاولاد.
الظهر سبحت وسشورت شعري وبعدين غسلت للاولاد ولبستهم ورضعتهم ونومتهم ورحت لبست فستان اسود قصير للركبه ضيق وردنه شفافه والصدر شفاف وبي حزام ذهبي عريض وخليت شعري مفتوح ولبست تراجي ناعمه بس طويله وكفت باوعت بالمرايه الفستان حلو علي لان سمنانه بس حسيت بطني بعد ينرادلها رجيم قوي حتى تختفي بس هسه عالسريع لبست كورسيه..
لبسته وكمت اتفرجت هسه كل شي اوكي خليت مكياج بنفسجي ولبست عدسات عسلي.
صعدت عمه حميده عجبها اللوك.
عمه حميده: صلاوات على محمد شنو هالجمال والكشخه لايحسدوج يمه خلي شويه ملح بصدرج.
ذهب: شيحسدوني يمه على شنو؟
عمه حميده: ياا. هسه عبالهم بعدج متزوجة اذا شافج ماجد ميوديج اليوم هههه، كاعد جوه ينتظرج الله يستر من هدوءه اليوم.
ذهب: اي والله الله يستر.
عمه حميده: الهدوء الذي يسبق العاصفه ها هههه، لا ان شاءالله ماكو عاصفه روحي واتونسي غيري جو شويه وصوري ودزيلي صورج انت والعروسه.
ذهب: ان شاءالله يمه.
عمه حميده: يالله ماما لبسي عبايتج ونزلي لايسويلنه قصه.
لبست عباية الجتف وغطيت شعري ونزلت الحجاب على وجهي حتى لايظل يحجي عالمكياج والعدسات ونزلت.
هو شافني نزلت راح شغل السياره اني طلعت وراه كعدت بالسياره وطلعنه هو ساكت واني ساكته بس كل شويه احسه يدور يتفحصني ويتنهد واني ايدي على كلبي بس لايكولي بطلت ماترحين.
شغل الاغاني شويه ارتاحيت من الهدوء إلى موترني.
طلعت اغنية عبد المجيد عبدالله غيرها طلعت اغنية (يردون) حسيته اتعمد يطلعها لان من خلصت عادها من جديد حصرتني الضحكه.
ياربي لاتخليني ضعيفه خليني قويه مااريده يستغل ضعفي.
وصلنه ردت انزل كال: وين؟ اصبري امج تطلع واني اوديكم.
باوعتله ماادري شحجي وشكول.
ذهب: بابا يودينه هو اصلا رايح.
ماجد: وشنو يعني يريد يروح خلي امج تروح وياه انت وياي اني اوديج بس اتصلي عليهم شوفيهم جاهزين..
سكتت مالي خلك اسوي مشكله اتصلت بماما طلعوا هي وبابا صعدوا بسيارتهم وراحوا واحنه وراهم.
وصلنه لبيت خالتي نزلت كلي: دخلي بسرعه وتليفونج بيدج خاف اتصل بيج حتى نروح.
معناها ميروح راح يبقى ينتظرني.
دخلت وكعدت وكلهم يسلمون ويبوسون صار فتره مشايفيني.
خاله: يمه شهالكيك هذا صدقه للامهات الشابات شنو هالجمال ماجد مشافج؟
ذهب: ياماشافني واكف بره تصدكين الا هو يجيبني وهو يرجعني حتى ويه بابا ماقبل.
خاله: حقه حبيبتي زوجته ويغار عليج شلون ميغار وانتي اليوم طالعه كمر..
كعدت يم البنات واخذنه صور واتونسنه وركصنه وكل شويه وحده تجي تسأل ماما لو خاله بنتج متنطوها وماما تجاوبهم متزوجه.
البنات: شهالجسم بالله هذا جسم مال وحده جايبه قيصريه عبالك بعدج بنيه.
ماما: ومن شر حاسد اذا حسد اعوذ بالله.
هسه تنحسدين هسه، جان لبستيلج شي ازرك بركبتج من العين.
ماطولت هي ساعه يمكن ودك تليفوني ماجد: الو؟
ذهب: الو.
ماجد: ها نروح خلصتوا؟
ذهب: لا ماخلصوا بس يالله جايه الاولاد ويه امي حميده بالي يمهم بس البس عباتي واطلع.
سلمت عالكل وعلى ماما وطلعت مااريد يسولي قصه.