رواية صبرا يا قلبي الجزء الأول للكاتبة روز الفياض الفصل الأول
اتصلوا اهل الولد حتى يجون يشوفوني وماما اصرت يجون يوم جمعه حتى اني ماعندي دوام واكدر اجهز نفسي وعندي وقت ادرس لان اني مستوايه زين والحمدلله واجه يوم الجمعه وجهزنه كل شي اني وماما ولبست تنوره قصيره اوف وايت وقميص سمائي وبي طوبات لون ازرق وفتحت شعري وشعري ناعم واشقر شقار خفيف وخليت مكياج جدا خفيف واجو الجماعه عالموعد وطلعت سلمت عليهم وقدمتلهم الضيافه وجانت ام الولد جايه واخته ومرت اخوه المهم حسيتهم انعجبوا بيه وامه كعدت بصفي واحسها سوتلي سكان ( تصوير ) من فوك ليجوه ومبطلت مدح بجمال واخلاق ابنها وكالت اسمه ( سراج ) واكبر مني ( ب5 ) سنوات ويشتغل بشركه مال صديقه المهم خلص اليوم وكالوا راح يتصلون بماما حتى يجي الولد اشوفه ويشوفني.
وثاني يوم رحت للدوام وحجيت لصديقتي المقربه فاطمه بس محجيت شي للشله ساره وحنين وزينب واسراء ونور المهم صديقتي شجعتني وكالت
فاطمه: اي شكو بيها لج يجوز يطلع خوش ولد ونخلص منج.
ذهب: ايا قليلة الادب تردين تخلصين مني!
فاطمه: يمعوده مو ملينه يوميه واحد جاي وتطلعين بي الف عيب بعدين اني هم اريد اتزوج بلكي خطيبج يطلع عنده اخ يستاهل.
ذهب: اي والله اني هم مليت من الاحراج كل يوم افشل واحد بس ماادري ليش ممرتاحه للموضوع
فاطمه: هو انتي منو ارتاحيتيله اشو كلهم نفس العذر
ذهب: تدرين فطوم اني مااعرف اعبر عن مشاعري واخجل حيل افكر بهيج اشياء حتى بيني وبين نفسي.
فاطمه: ادري ادري اشك انتي عندج مشاعر
ذهب: شدعوه مو لهدرجه شايفتني ماعندي احساس.
فاطمه: لعد اكو وحده لاتعجبها العلاقات ولايعجبها انو يكون عدها معجبين ولا يعبجها تنخطب ولايعجبها العجب هاي شتسميها بالله؟
ذهب: لج اكولج اخجل مو بيدي بعدين مااحب هالسوالف مال العلاقات والحب والغرام مااكدر ضميري يأنبني بابا خطيه والمعجبين خليهم الج.
فاطمه: لايمعوده شسوي بيهم خل افتك من اللي عندي صدك نسيت اكولج البارحه استاذ حازم سألني عنج.
ذهب: عابت على شنو تضحكين مو كتلج لاتلكينه وجه ومن يسالج عني كوليله مااعرف شي عنها غير لزكه هذا.
فاطمه: اي والله لزكه المصيبه ماعنده احساس ميكول دا احرجها بوكفتي وياها يالله يمعوده انخطبي وفكينه من هاللزكه.
وبنفس اليوم بالليل اتصلوا الناس على ماما وكلولها الولد يريد باجر يجي يشوف ذهب وماما كلتلهم عالجمعه بس مقبلوا وكلولها هي كولها ساعه والولد مستعجل عنده سفره فماما وافقت بعد ماسألت ابوي.
طبعا بابا جان مكتئب مقدماً عبالك خلص اني اتزوجت ومراح يشوفني بعد.
ثاني يوم رحت للكليه وحجيت لفاطمه وكتلها اليوم حيجي واشوفه ويشوفني خلصنه محاضرات ورجعنه للبيت الساعه ( 2 ) اتغديت وسبحت وساعدت ماما وكعدت ساعه اختار ملابس ملائمه لان مااعرف شنو البس اخر شي طلعت بنطرون نيلي وقميص نيلي وبي ورد ملون ولبست حجابي طبعا شعري مو طويل جوه الجتف بشويه بس ناعم وخليت ميكب خفيف جدا ومن اجوا وكعدوا وره شويه اجت ماما صاحتني لان استحي ادخل دخلت ويه ماما وكلت (السلام عليكم) وكعدت بصف ماما بالضبط ومدنكه راسي مرفعته فردوا السلام امه وهو حسيت نفسي ميته من المستحه امه صاحتني كلتلي:.
تعالي اكعدي يمي مو يم امج امج شايفتج احنه نريد نشوف لعد المن جايين.
بصراحه ضجت احرجتني المهم ماما اشرتلي ميخالف روحي كعدي يمها كمت بس اني مستحيه وخايفه لا اوكع من كدما مرتبكه حسيت راسه يندار ويايه يعني باوعلي من كمت من راسي لرجلي وظل يباوعلي لحد ماكعدت يم امه رأسا اندار على ماما وكللها:
ماشاءالله بنتج حلوه.
فماما ابتسمت حسيتها مثلي انصدمت من جرأته فامه ضحكت كلتله:.
مو كتلك اسم على مسمى بس ليش لابسه حجاب هاي رؤيه شرعيه يحقله يشوف شعرج.
مدت ايدها على حجابي فاني راسا لزمته كتلها:
لا ميحتاج انتي شفتي شعري كافي.
كالت:
لا هو اهم شي يشوف مو اني خل يشوف شعرج.
مرديت عليها وغلست وهو احسه يراقبني ويباوعلي بصوره مباشره محسيته خجول ابد وبده يسألني عن الكليه والدراسه واني اجاوب عادي بس استحي اباوعله اخر شي كلي:.
ليش متباوعيلي تره اني هم حلو وهذا حقج وهذا الهدف من هالزياره اشوفج وتشوفيني.
متت من الخجل من كلي هيج وكتله:
لاعادي يعني داباوعلك.
ورفعت عيني وباوعتله شويه ورجعت دنكت شفته عالسريع فعلا حلو شعره اسود وعنده لحيه خفيفه وره شويه كال:
يالله احنه نترخص كافي هيج ميحتاج نشوف اكثر اني شخصيا قابل وابصم بالعشره والباقي يم ذهب اذا هي اقتنعت بيه وعجبتها؟
مجاوبته حسيته جريء زياده عن اللزوم.
ماما كلتلهم:.
الله كريم اللي بي الخير يقدمه رب العالمين واحنه نرجعلكم الخبر ان شاءالله.
فسلمت امه على ماما وعليه وهو سلم على ماما ودار عليه كلي:
ميخالف اخذ رقمج حتى اتصل اعرف الجواب منج؟
ذهب:
ميحتاج خاله عدها رقم ماما هي تتصل وتعرف.
سراج:
هاا زين واذا كتلج اريد اتعرف عليج اكثر؟
ذهب:
اذا اكو نصيب راح تتعرف عليه بفترة الخطوبه.
أبتسم وكال:
براحتج.
وطلعوا وراحوا.
ظليت طول الليل اتكلب بالفراش ماادري شبيه خايفه ومتردده ومااعرف شنو مشاعري بس كلت الله كريم خل بابا يسال عنه اول وبعدين يصير خير. خابرت لفطوم وحجيتلها وهي تضحك:
لج هذا حيل جرئ يعني حتى مخجل من امج.
ذهب:
اسكتي لعبت نفسي من جرأته.
فاطمه:
ههههههه لج خبله شنو لعبت نفسج مو تكولين حلو ومرتب بعدين تره الرجال الجرئ احلى.
ذهب:
ماادري بس ممرتاحه مااحس اي شي تجاهه.
فاطمه:.
لج بس لاتطلعين من الجنس الثالث شنو ماحسيت شنو ماحبيت
بده بابا يسال عن سراج واهله بمنطقتهم وبالشركه اللي يشتغل بيها استمر تقريبا اسبوع بعدين صاحني وكلي:.
بابا اني سالت عن الولد واهله واهله خوش ناس وهو كلما اسال عنه يكلولي خوش ولد بس لو السيد جان الله يحبكم منو اساله يكلي نفس الحجي ويكلولي مدام صديق السيد ميحتاج تسال عنه فاخر شي رحت سألت عنه بالشركه مالت صديقه اللي يشتغل بيها سألت الحارس بره واكف كلي والله خوش ولد وهو يصير صاحب السيد فكتله منو السيد كلها تمدح بي كال السيد صاحب الشركه هم ولد شاب بس خوش ولد متدين وحباب واخلاقه عاليه وابن عائله المهم اتشكرت من الحارس وانطيته المقسوم وسلمت عليه ورجعت فانتي هسه شقررتي شنو نرد عالجماعه نكللهم يجون لو شنو؟
ذهب:
كيفك بابا.
بابا:
ميصير هذا زواج وهاذي حياتج اني ماادخل قرارج انتي تاخذيه
صفنت فكرت بيني وبين نفسي مااحس بشي تجاهه وخايفه بس فطوم كلتلي عادي اخاف لان هذا قرار مو سهل.
ذهب:
اوك خل يجون بس متتصلون بيهم انتظروا هم يتصلون يسألون عن الجواب.
خلال هالاسبوع جان سراج يجي للكليه هو وصديقه يوكف اباب القسم اللي اداوم بي وحسيت وجوده احرجني بس اتصرفت بصوره طبيعيه ولا كأني شايفته كدامي الى ان اجه مره اني والشله كاعدين بالكافتيريا وسلم.
سراج:
السلام عليكم شلونج ذهب؟ من رخصتج اريد احجي وياج.
حسيت باحراج كدام صديقاتي لان اني لحد هسه محاجيتلهم عنه.
ذهب:
وعليكم السلام اهلا سراج.
سراج:
ممكن نحجي على انفراد؟
ذهب:.
اتفضل احجي ماكو احد غريب صديقاتي مااضم شي عنهم.
سراج:
مراح اعطلج ( 5 )دقايق مو اكثر.
باوعت شفت صديقه واكف ويباوعلي ومن شافني انتبهت عليه نزل عينه ودنك بالكاع حسيته خجل وشكله بالضبط يشبه ممثل امريكي اموت عليه رغم اصلع.
ذهب:
تعذرني مااوكف ويه ولد وحدي.
سراج:
هنا منروح مكان يم صديقاتج.
ذهب:
اعتذر مااحب تجيني حجايه واني ممتعوده اوكف ويه ولد وحدي فاذا سويتها هسه اكيد حيكولون اكو شي.
سراج:.
طبعا اكو شي ليش احنه مو بحكم المخطوبين هسه؟
ذهب:
لاانت شخص غريب لحد متم الخطبه بعدين لكل حادث حديث.
سراج:
يعني ماكو امل؟ يالله ميخالف نصبر مبقى شي.
انتبهت على صاحبه رجع يباوعلي فترخصت اني والبنات كتله عدنه محاضره. والبنات اكلوا راسي يردون يعرفون منو هذا فكعدنه بالقاعه منتظرين الاستاذ ومااجه فحجيتلهم الموضوع وطبعا اكلوا راسي يخبل ويجنن وشعره يخبل وعيونه شلون حلوه وشلون كشخه وشلون ولتضيعينه من ايدج.
خلص الاسبوع على نفس الموال يوميه اشوف سراج وصديقه جايين للكليه واشوف صديقه مره يحجي ويه رئيس القسم مره ويه الطلاب مره ويه طالبات فكلت الظاهر صديقه جان طالب هنا ويعرف الاساتذه بس ظليت محتاره بنظراته احسه ينظرلي نظرات مو عبالك خطيبة صديقه حتى لو بعدنه ماكو شي رسمي المفروض ميتجرأ فمن حجه بابا عن السيد صديق سراج كلت يمكن هو هذا.