قصص و روايات - قصص رومانسية :

رواية سجينة قلبه للكاتبة شاهندة الفصل الثاني عشر

رواية سجينة قلبه للكاتبة شاهندة الفصل الثاني عشر

رواية سجينة قلبه للكاتبة شاهندة الفصل الثاني عشر

كان قصى يجلس على سريره يتلمس مكان اميرة فى شوق وحنين ثم ما لبث ان امسك بوسادتها وضمها الى صدره يستنشق عطر اميرة الذى مازال فى الوسادة رغم مرور ستة أشهر كاملة على رحيلها، شهور مضت عليه كالسنين، لقد تركها فقط فى ذلك اليوم كى تهدأ وذهب اليها فى اليوم التالى ليجدها قد رحلت من المستشفى ولم تترك خلفها أى أثر، بحث عنها طويلا ولم يجدها، سأل عنها كل معارفها وأصدقائها، ولا أحد يعلم عنها شيئا، لقد فقدها وفقد جنينهما فى نفس الوقت، نتيجة خطأ، خطأ كان السبب فيه عشقه لها ورغبته اياها وهو يعلم علم اليقين ان كبرياؤها الأحمق لم يكن ليجعلها تقبل الزواج منه، ولكن ليته لم يكذب، ليته لم يخدعها كى يتزوجها، انه نادم الآن ولكن بم يفيد الندم، سقطت من عينيه دمعة مسحها بسرعة عندما سمع طرقات الباب فقال بصوت أجش:.

اتفضل
دلفت سعاد الى الداخل ونظرت الى ملامحه الحزينة فى أسف، اقتربت منه وجلست الى جواره وربتت على يده قائلة:
لسة مفيش أخبار عنها؟
هز رأسه نفيا وهو يقول:
لأ، اكيد لو فيه كنتى هتبقى اول واحدة تعرف ومكنتش هقعد هنا زى العاجز ياماما، كأن الأرض انشقت وبلعتها
ثم نهض وهو يدور كالأسد الحبيس قائلا:.

نفسى اعرف ازاى قدرت تسيبنى، ازى هنت عليها تعذبنى بالشكل ده، ازى حرمتنى منها، حرمت عينى تشوفها وايدى تلمسها وحضنى يضمها، ازاى سابتنى اموت من قلقى عليها
وضرب يده بالحائط عدة مرات وهو يردد بلوعة:
ازاى، ازاى؟
أسرعت اليه سعاد قائلة فى جزع وهى ترى الدماء تتساقط من يده:
استهدى بالله ياحبيبى، ايه اللى بتعمله فى نفسك ده؟
امسكت يده تتفحصها وهى تستطرد قائلة:
كدة ياابنى ايدك، تعالى معايا اما اشوف مطهر وضمادة.

مشى معها قصى باستسلام وهو يشعر بكيانه كله ينهار، أجلسته سعاد وأسرعت تحضر شنطة الاسعافات الأولية ثم جلست أمامه وأخرجت المطهر لتطهر به جرحه ثم ضمدته ناظرة اليه فى حزن وهى تقول:
أميرة وحشتنا كلنا ياقصى، ربنا العالم قلبى وجعنى عليها اد ايه، بس قلبى بيقولى بردو انها كويسة، هى بس متضايقة مننا ومحتاجة وقت عشان تنسى، وساعتها هترجعلنا
نظر اليها قصى وقد ترقرقت الدموع فى عينيه قائلا فى مرارة:.

تبقى لسة معرفتيش بنتك ياماما، أميرة حاسة دلوقتى انها مخدوعة، وفى اقرب الناس ليها، وخسرت جنينها فى نفس الوقت، اميرة لو بتموت فى بعدنا كبريائها الغبى هيخليها بردو بعيد عننا، وانا تعبت، تعبت اوى فى بعدها عنى، حاسس انى بموت
ترقرقت الدموع فى عينى سعاد وهى تقول:
بعد الشر عنك ياحبيبى، مكنتش اعرف انك بتحبها اوى كدة ياقصى
نظر قصى الى الأمام يستحضر صورتها الملائكية وهو يقول فى عشق:.

انا مش بحبها بس، انا بعشقها ومن زمان اوى، دى روحى اللى لو غابت عنى، أبقى انتهيت
وحانت منه التفاتة الى الكومود بجانب السرير وامسك قصى صورته التى تجمع بينه وبين اميرته فى حفل زفافهم وتأملها فى حزن قائلا:
ياترى انتى فين يااميرة؟

أهى قاعدة ع البحر زى عادتها كل يوم ياجاسر
نطقت غادة بتلك العبارة فى الهاتف وهى تنظر الى اميرة الجالسة امام البحر يبدو عليها الشرود والحزن، استمعت غادة الى صوت جاسر يقول:
واخبارها ايه دلوقت؟
تنهدت غادة فى حزن قائلة:
لسة زى ما هى، حزينة، دموعها علطول على خدها، حاساها بتموت ادامى، نفسها ترجع وتشوفهم بس بتعاند قلبها وبتكابر
زفر جاسر بقوة قائلا:.

انا مش عارف ازاى لغاية دلوقتى قدرت أسكت على اللى هى بتعمله فى نفسها وفى قصى، انا لولا حلفانى ليها انى مقولش لقصى على مكانها، كنت قلتله ياغادة. انتى مش شايفة حالته بقت ازاى، ده بقى زى المجنون
ترقرقت الدموع فى عينيها وهى تقول:
يمكن مش شايفاه بس حاسة بيه ياجاسر، كل ما بيكلمنى قلبى بيوجعنى عليه، ساعتها بحاول اكلم اميرة بشوف فى عينيها رفض وعصبية بتخوفنى عليها، وبخاف تهرب منى انا كمان
تنهد جاسر قائلا:.

بس كدة حرام، صحيح قصى غلط بس اكيد ليه مبرراته، اكيد من حبه اللى باين للكل الا هى
قالت غادة فى حزن:
ربنا يستر، انا قلقانة اوى
قال جاسر فى حنان:
متقلقيش ياقلبى، باذن الله الامور هتتحل وقريب اوى، وساعتها نشوف نفسنا بقى، هتجوزك وابعد بيكى عن جوز المجانين دووول
ابتسمت غادة قائلة:
انسى، مش هتجوز غير لما الاقى اخواتى ياجاسر، عشان تبقى فرحتى كاملة
قال جاسر:.

وانا عند وعدى ليكى، انا خدت العناوين من قصى وتقريبا معدتش غير خيطين همشى وراهم، وبإذن الله ربنا يوفقنى، ويكون ساعتها جوز المجانين دول اتصالحوا
قالت غادة بمشاكسة:
هما اللى مجانين بردو؟
ابتسم جاسر قائلا:
ياستى عاقلين بس يتصالحوا وأتجوزك بقى، أحسن والله أخطفك وأتجوزك ان شالله فى القسم
ضحكت غادة قائلة:
مجنووون
ابتسم جاسر قائلا:
مجنون بيكى وبضحكتك اللى منورالى دنيتى
صمتت غادة ثم قالت فى تردد:
جاسر أنا، أنا...

قال جاسر:
انتى ايه ياحبيبتى؟
قالت غادة:
أنا بحبك
ثم أغلقت الهاتف بسرعة فنظر جاسر الى السماعة غير مصدق وهو يقول:
وربنا قالتها، قالتلى بحبك، انا سمعت صح، قالت بحبك، قالتها
ثم قبل الهاتف قائلا فى سعادة:
وانا بحبك وبموت فيكى يااحلى غادة فى الدنيا.

نظر آوس وحور الى قائل هذه العبارة ليتفاجئوا بسوسن التى تقف بضعف تستند الى الباب والدموع تغرق وجهها، وقفت حور فى ثوان قائلة بلهفة:
ماما
ثم اندفعت اليها ترتمى فى حضنها الذى اشتاقت اليه تبكى بقوة لتضمها امها اليها وهى تقول فى انكسار:.

ازاى كنت عامية ومشفتش خوفك منه؟ازاى ما شفتش رفضك لوجوده معانا؟ازاى مخدتش بالى انى ربيت أفعى فى بيتى، سيبتها تكبر وتكبر لغاية ما كانت هتموت بنتى، أغلى ما عندى، ازااااى؟
ضمت حور امها المنهارة وهى تقول:
ابوس ايدك ياامى متحسيش بالذنب، سعيد زى ما قلتى كان افعى وانا خفت عليكى منه، بس الحمد لله جه اللى خلصنا من أرفه.

وابتعدت عن امها قليلا وهى تنظر الى آوس الذى اقترب منهم يشعر داخله بالحزن والألم على محبوبته وامها اللتان ذاقتا العذاب على يد سعيد ليجئ هو ويكمل عذابهم بخطفها، أمسكت حور بيده فى لهفة قائلة لأمها وعينيها لا تفارق عينى آوس:
آوس ياماما يبقى جوز حنان بنت خالى الله يرحمها واللى سعيد قتلها عشان اكتشفت سرقته منك، آوس هو اللى جابلنا حقنا منه، آوس يبقى الراجل اللى حبيته من اول عينى ما جت فى عنيه.

نظر آوس الى عينيها فى صدمة، وفى أمل، لا يصدق ما تقوله حور ولكنه يود من كل قلبه أن يصدق، قالت عيناه دون أن ينطق:
بجد ياحور
ونطقت عيناها قبل لسانها لتجيبه بصوت عاشق:
بجد ياقلب حور
تابعت سوسن نظراتهم بسعادة وهى تشعر بان الله عوض ابنتها عن كل معاناتها، لقد ذاقت حلاوة الحب من قبل لتدركه فى تلك العيون التى تتبادل الآن احلى نظرات العشق، ابتسم آوس وكاد ان يقول شيئا لولا ان قاطعه صوت بغيض يقول:.

والله وعرفت تلعبها صح يآوس
التفت الجميع ليرو سعيد يمسك بمسدسه ويوجهه باتجاههم قائلا بغل:
بس بردوا انا اللى هضحك فى الآخر، هتموتوا كلكم بس هبتدى باكتر حد هيوجعكم موته.

واتجه بمسدسه الى حيث حور وانطلقت رصاصته باتجاهها وايقنت حور انها النهاية حتى وجدت من يدفعها والذى لم يكن سوى آوس الذى تلقى هو الرصاصة ليسقط وسط صرخات حور ليسمع الجميع صوت طلقة أخرى استقرت فى جبهة سعيد ليسقط جثة هامدة دخل طارق وقوة البوليس معه ليقبضوا على الرجال وينقلون جثة سعيد الى المشرحة، فى حين انطلق طارق الى حيث صديقه الذى تحتضن حور رأسه وهى تبكى بانهيار قائلة:.

لأ ياآوس، انت مش هتضيع منى، انا ما صدقت لقيتك، ابوس ايدك خليك جنبى، انت اول حب فى حياتى، اول واحد احس معاه بالأمان، اول واحد يجينى فى احلامى واتمنى احلامى تتحقق معاه، عشان خاطرى ياآوس متسيبنيش
فتح آوس عينيه بصعوبة وهو ينظر اليها بحنان قائلا بصةدوت متقطع النبرات:
انتى، كمان، كنتى، فى احلامى، وكان نفسى، معاكى تتحقق، أنا حبيتك اوى ياحور، خلى بالك من نفسك، ومن أسامة..

وضعت حور يدها على فم آوس قائلة فى لهفة:
متكملش، انت اللى هتاخد بالك منى ومن أسامة
قبل يدها فازاحتها خجلا ليقول طارق بلهفة:
الاسعاف جت، متقلقيش ياحور، متخافش ياصاحبى
نظر آوس الى طارق بامتنان وحمل رجال الاسعاف آوس واصرت حور على الركوب معه، يتبعهم طارق وسوسن فى سيارة طارق، ابتسم آوس بضعف ليقول لحور:
بحبك ياحور، والله العظيم بحبك.

ثم اغمض عينيه مستسلما للنوم لتقول حور بانهيار مخاطبة الطبيب الذى يركب معهم عربة الاسعاف:
بسرعة من فضلك، قولهم بسرعة
قال الطبيب:
متقلقيش يامدام، جوزك اصابته مش خطيرة وباذن الله هيبقى تمام
لم تنفى حور صفة زواجها من آوس بل أحست بالفخر والسعادة لارتباط اسمها باسمه، نظرت الى آوس ثم نظرت الى السماء قائلة فى تضرع:
يارب قومهولى بالسلامة، ياااارب.

أفاقت اميرة من شرودها على صوت غادة يقول:
الجميل سرحان فى ايه؟
نظرت اميرة الى غادة وهى تبتسم فى حزن ثم نظرت الى البحر مرة أخرى قائلة بشرود:
فى حاجات كتير ياغادة نفسى مفكرش فيها، نفسى اتولد من جديد، وانسى كل اللى فات
جلست غادة الى جوارها تنظر الى البحر هى الأخرى قائلة:
وتفتكرى هتقدرى تهربى من قدرك؟
التفتت اليها اميرة قائلة:
قصدك ايه ياغادة؟
نظرت غادة الى عينى اميرة مباشرة وهى تقول:.

قصدى ان قصى قدرك يااميرة، توأم روحك ونصك التانى، ولو اتولدتى من جديد الف مرة، هيكون قصى حبيبك فى كل مرة، انتوا اتخلقتوا لبعض و...
قاطعتها اميرة فى حدة قائلة:
غادة!
قالت غادة فى هدوء:
ايه، مش قادرة تستحملى الحقيقة؟، ولا مش قادرة تسمعى اللى انتى عارفاه كويس؟مش قادرة تسمعى انك بتحبى قصى وهو كمان بيحبك وانكوا لايمكن تكونوا غير لبعض
قالت اميرة فى غضب:
اسكتى ياغادة
قالت غادة فى انفعال:.

لا مش هسكت، ولازم اقول اللى كبريائك مانعك تعترفى بيه، لسة قصى بيجرى فى دمك، واحشك وهتموتى وترجعى وتشوفيه، عارفة انك قبل ماعاقبتيه عاقبتى نفسك، اعترفى يااميرة، اعترفى
ظهرت مشاعر اميرة واضحة ونزلت دموعها تبكى ضعفها وهى تقول فى انكسار:
ايوة لسة بحبه وايوة مش قادرة أنساه، وأيوة واحشنى وبعده عنى قاتلنى، قاتلنى ياغادة.

ضمتها غادة فى حنان لتفرغ اميرة انهيارها داخل حضن غادة التى شاركتها دموعها، ظلا هكذا للحظات ثم ابتعدت اميرة عن غادة بهدوء وهى تمسح دموعها قائلة:
بس رغم حبى وشوقى ليه مش قادرة اسامحه ياغادة، مش قادرة انسى انه ضحك علية وخدعنى عشان يتجوزنى، مش قادرة انسى ان سبب جوزانا كان مجرد تحدى بالنسبة له
قالت غادة بسرعة:
ابدا والله، انتى فاهمة غلط، قصى كان...
قاطعتها اميرة قائلة:.

عشان خاطرى ياغادة، ياريت نقفل الموضوع ده ومنتكلمش فيه تانى. انا تعبانة اوى ومحتاجة ارتاح
ثم نهضت اميرة واتجهت الى المنزل تتابعها عينى غادة التى قالت فى همس حزين:
سامحينى يااميرة بس انا معتش ينفع اسكت اكتر من كدة، انا لازم اكلم قصى وبأسرع وقت.

الفصل التالي
جميع الفصول
روايات الكاتب
روايات مشابهة