رواية ست الحسن الجزء الثاني للكاتبة أمل نصر الفصل السابع
دخل بيته وهو بينظر لكل حته فيه واحشاه. بعد ما بِعد عنه بالشهور. لا نومة كويسة ولا أكل كويس ولا صحبه تفتح نفسه. بس اللى كان مهون عليه وجود والده معاه وطبعاً فلوس والده كانت اكبر حامى ليهم هما الاتنين وميسره طلباتهم. لكن السجن بيبقى سجن حتى لو في قصر!
- دى برضوا نضافة يا جبيصى الزفت؟
قالها معتصم وهو بيمسح بطرف صوابعه على الطرابيزه الصغيره الموجوده في الصاله.
جاوبه التانى وهو واقف وراه.
- يعنى اعمل ايه بس يا معتصم بيه؟ البيت كبير وبجالوا شهور محدش دخله. دا انا ومرتى طلع عنينا فيه امبارح في تنضيفه.
نظرله بسخريه
- وهو مدام اللى نضف يبجى انت ومرتك. يبجى انا هاتوقع ايه غير كده!
مال بدماغه يتكلم بعتب
- الله يسامحك يا معتصم بيه.
- خلاص ما تزعلش. انت برضوا عملت اللى عليك.
قالها وهو بيقعد ويميل بضهره على كنبه قريبه وكمل
- هو مافيش حد من البنته اخواتى كان بيجى هنا واصل؟
- لا يابيه. ولا حتى اجوازهم. دا لولا ان الهانم الكبيره كانت موصيانى على الجنينه. لكان الشجر نشف والزرع مات من جلة الميه والمراعية.
طلع شتيمه الاول وبعدين كمل بغيظ
- ان ماكنت اربيهم هما واجوازهم مبجاش انا. فالحين بس يهبشوا من خير الارض ويبيعوا على كيفهم. كانوا فاكرين ان ماحدش فينا هايطلع من السجن تانى. يبجوا يورنى هايطولوا جرش ولا ورث ازاى منى؟
دا هز بدماغه يوافقه والتانى نهض من مكانه يؤمروا.
- انا داخل اتسبح. عايز اطلع الاجى الغدا جاهز عشان اريح شويه. وبعد كده روح وما تنساش تشوفلى شغالين للبيت.
رد عليه جبيصى بطاعه
- حاضر يابيه.
قاعده مشبكه ايدها تحت الطرابيزه ومية فكره بتدور في عقلها. حاسة بعدم راحه وشعور القلق مسيطر عليها. داست بطرف صوابعها على جبهتها ونزلت بعيونها عالارض. لفتت نظر وائل فسألها
- مالك يا نهال؟ انتى مصدعه!
رفعت راسها تجاوب بعدم تركيز
- همم. انت بتجول حاجه؟
ابتسم وائل.
- ايه يابنتى انتى روحتى فين؟ انا بسألك انتى مصدعه؟
هزت بدماغها تفوق نفسها
- لا مفيش حاجه متشغلش بالك انت؟
- طيب انتى تعرفى البنات اللى هناك دول؟ اصلهم بيشاورولك وانتى مش واخده بالك.
قالها وائل وهو بيشاور بدماغه. فرفعت عينها تنظر خلفها. لقت بثينه ونوها فقامت بسرعه تشارولهم يقربوا وتقول ل وائل: - دول اصحابى اللى مستنياهم.
وائل اتعدل في قعدته يركز. والبنات قربوا من نهال يكلموها ويسالوا
بثينه باستغراب.
- ايه يابنتى؟ جيتى وسبقتينا عالكفتيريا ليه؟
نهال بارتباك
- اصلى جابلت واحد جريبى. ااا دا وائل!
- اهلاً بيك يا استاذ وائل.
قالتها بثينه و نوها هزت بدماغها وقالت بصوت واطى وخجول
- اهلا بيك حضرتك
رد عليهم وائل بعمليه وعينه ركزت على نوها وهي بتستأذن مع صاحبتها من نهال ويقعدوا على طرابيزه تانيه
بعد مابعدوا اللتفتت نهال تسأله بتوتر
- هي دى بجى العروسه اللى انت تجصدها؟
عينه راحت عالبنات وهو بيسأل.
- قصدك مين فيهم؟!
انتبهت له مستغربه
- جصدى على نوها البنت اللى بتتكسف. انت ماخدتش بالك منها؟
هز دماغه بنفى
- مش هي يا نهال؟ هي تشبها شويه في الشكل ويمكن في خجلها. لكن برضو مش هى؟!
خدت نفس الاول براحه نسبيه وبعدين ردت
- معجوله! امال انت تجصد مين؟
اتنهد بيأس
- انا كنت حاطط امل كبير. تطلع هي المقصوده!
ردت هي بحماس.
- ولا يهمك يا وائل. انا هادورلك تانى في كل البنات اصحابى على واحده مواصفاتها جريبه من نوها وان شاء الله هالاجيلك البنت اللى بتحلم بيها.
- وايه تانى يامدام
شهقت مخضوضه لما سمعتها بهمسه في ودنها وهي عارفه مصدرها كويس. قامت منصوبه تنظرله برعب
- مدحت!
مردش. كان بينظر بس بعنيه اللى بتبعت اشارات ورسايل فاهماها هي كويس اوى! عكس وائل اللى اتكلم بابتسامه
- اهلا بيك يادكتور مدحت! اخبارك ايه؟
رفع عينه عنها ببطئ مخيف لناحية وائل يرد باقتضاب
- أهلا...
اختفت ابتسامة وائل وحل محلها التوتر. وهو شايف مدحت بطوله المهيب وايديه في داخل جيوبه ونظرته الغريبه.
نهال قلبها كان هايوقف وهي شايفه نظرته المخيفه ناحية وائل وهدوئه المُريب. لدرجه وقفت الكلام على لسانها هي و وائل.
كسر الصمت رائف اللى وصل فجأه
- هو في ايه؟
اتجهت نظرات التلاته عليه وهو مستغرب من هيئتهم.
ومين غير مايرد على رائف. نظر ل نهال بطرف عينه يقول
- حصلينى عالمكتب.
ومشى بعدها على طول. حطت ايدها على قلبها اللى كانت حاساه هايخرج من صدرها من سرعة دقاته. وهي بتمسك فونها وادواتها
- عن اذنكم ياجماعه.
قالتها وهي بتحاول تسيطر على توترها. وقفها رائف
- هو في ايه؟
جاوبت بصوت واطى كالهمس
- ماطلعتش نوها المجصوده. خليك انت مع وائل انا رايحه اشوف اخوك.
مشيت تحصل مدحت و رائف نظر لاثرها مصدوم. كان نفسه يستفسر منها. فاق على سؤال وائل
- هو الدكتور مدحت زعلان منى؟
رد عليه يبتسم بارتياح
- لا ياراجل، هو بس تلاجيه مضايج شويه. جولى بجى انت لجيت البنت اللى عايز تخطبها؟
نزل يقعد على الكرسى باحباط.
- للأسف لأ
قرب يقعد هو كمان جمبه فلمح نوها على مسافه قريبه. ابتسم بسعاده يقول
- ياسيدى بكره ربنا يعدلها وتنول اللى في بالك. بس انت قول يارب، يارب.
فتحت الباب تدخل غرفة مكتبه. لاقته قاعد عالمكتب بتحفز وهو مشبك ايديه. ونظرة عيونه تبين كمية الغضب اللى جواه. بس هي مهماش واتكلمت بتحدى
- ممكن افهم انت عامل كده ليه؟
ضيق عيونه وبعدها اتنهد وهو بيزيح عيونه عنها وهو بيحاول يسطر على نفسه فكملت
- ايه يادكتور ساكت ليه؟ ماتتكلم وطلع اللى جواك!
داس على شفته بغيظ وهو بيتحرك ويقوم من مكانه وهي عنيها متابعه خطواته اللى وقفت قصادها وبكل هدوء سأل.
- مكنتيش بتردى على اتصالاتى عليه؟
فجأها بسؤاله الغير متوقع فردت بارتباك
- ااا، ما انا امم.
بهدوء مريب كرر وراها
- انتى ايه؟
فتحت بقها الاول وقفلته تانى بتردد وبعدين جاوبت
- بصراحه كده انا عارفاك عصبى. وهتسألنى مية سؤال على حاجه مش مستاهله
فجأه مسكها من ذراعيها بقوة وهو بيجز على اسنانه
- هو ايه اللى مش مستاهل؟ تجعدى في الكافتيريا مع وائل وعلى طرابيزه واحده...
- وانا مالى طيب؟ جدى اتصل بيا وجالى استجبلى وائل وعرفيه على نوها يمكن تكون هي البنت اللى شافها وعايز يتجوزها.
كانت بتتكلم بسرعه ولهفه في الرد وهو تابع اسئلته بعصبيه اكبر
- وماردتيش عليا ليه تجوليلى؟
جاوبت والالم بيزيد على ايديها
- كنت مرتبكه ومش عارفه اتصرف. عشان رائف وموقفه بخصوص البنت. سيب دراعى
ولا اكنه سمع شكوتها. سألها بشراسه.
- ولما الزفت يونس كلمك وباركلك ياعروسه رديتى ليه؟ وانا منبه عليكى. كلام مع الزفت دا ممنوع!
- برقت بعنيها والكلام وقف على لسانها
فشد اكتر على ذراعيها وهو بيهزها بجنون
-. سيبانى اتصل عليكى زى المغفل وانتى جاعده في الكافتيريا وعايشه حياتك وبتتحدينى وتتكلمى مع واحد. انتى عارفه كويس انه عايزك وعينه منك. سكتى ليه ماترودى يادكتوره يامحترمه؟ ارفعى راسك دى منزلاها في الارض ليه؟ ارفعى راسك.
قال الاخيره بصوت اعلى واشد وهي على وضعها ماتحركتش. ساب دراعها وبكف ايده مسك فكها ورفعه لفوق يشوف وشها. قبضه قويه عصرت قلبه. لما شاف الدموع اللى مغرقه وشها وهي مغمضه عينها بتعب والم وبتشهق بصوت مكتوم. محسش بنفسه غير وهو بيرفعها عن الارض وهو حاضنها بقوه وبيهمس في ودانها بصوت مبحوح من المشاعر اللى جواه
- سامحينى، سامحينى ياحبيبتى انا اسف.
صوت شهقتها بقى اعلى وهو بيزيد في ضمته ليها ويهديها.
بعد ما رائف اطمن من ناحية وائل بخصوص نوها عمل فيها دور الشهم وهو بيقولوا على اسامى البنات اصحاب نهال ومواصفاتهم. لعل وائل يتعرف على واحده فيهم. دا غير انه قام بواجب الضيافه معاه على اكمل وجه واخدوا وفسحه في المدينه. عشان كمان ينسيه موقف اخوه مدحت وبعدها اصر انه يروح معاه بعربيته وعند مدخل البلد وائل كانت عينه في شباك العربيه بينظر للطريق وهو محتار في اللى شغلت عقله واختفت واكنها حلم وهو مش عارف لها طريق فجأه شافها قصاده على طول في شباك التاكسى اللى ماشى قبالهم بالعكس. في الاول كدب عنيه ليكون بيحلم وبعد ما استوعب صرخ في رائف.
- البنت يا رائف. اهى يا رائف البنت.
رائف اللى كان مركز في الطريق. اتفزع من صرخته.
- في اى ياعم مالك؟
شاور بايديه بلهفه
- كانت في التاكسى دا اللى ورانا. عدت جامبى وشفتها حالاً رائف بالظبط.
رائف وعينه في المرايه
- التاكسى دا اللى حصل الطريج السريع.
رد بخيبة امل
- ايوه يا رائف. التاكسى مشى وخلاص اختفى!
نظرله بأسف في المرايه يقول.
- معلش ياحبيبى. انت عارف ماينفعش ارجع بالعربيه معاكس. بس ان شاء الله هانعرفها ماتيأسش.
اتنهد بأسى
- ان شاء الله. يارب
وعند البيت الكبير. الاولاد الصغيرين كانوا مقسمين نفسيهم فرقتين كوره و ياسين الصغير. كان كابتن وسطهم وهو بيلعب بحرفنه واندماج لدرجة. انه شاط الكوره بقوه كسرت ازاز العربيه اللى كانت ماشيه قصادهم بالصدفه. جرى ياسين ياخد الكوره لقى معتصم هو اللى خارج منها بشراره وناره.
- بتكرسلى عربيتى ياواد راجح؟
رد الطفل بشجاعه
- ماتجيبش سيرة ابويا على لسانك بدل ما اربيك.
هجم عليه بكل اندفاع يمسكه من الفانله
- تربى مين؟ ياكل، انت ياصغير؟ دا انا كنت...
- كنت ايه ياطويل ياهايف انت. انت بتعمل عقلك بعقل عيل صغير.
ودى كانت نورا اللى كانت خارجه بالصدفه وشافت المنظر. فقاطعت معتصم وهو بتزيحه بأيدها وتبعده عن ياسين.
معتصم وهو متفاجى باللى حصل
- انتى مين؟ ومالك يالواض ده؟
كشرت في وشه.
- و انت مالك انا مين وصفتى ايه؟ هاتعملى بطاقه! خد كورتك يا ياسين خلينا نمشى. بلا قرف.
معتصم سهم و ياسين اخد الكوره ومشى معاها مين غير ما يعبره. ودى بصوتها العالى وهي ماشيه
- قال عايز يضربك قال. جاته ضربه في أيده!