رواية انشق قلب القمر للكاتبة شاهندة الفصل الخامس
أنا زهقت من قعدة البيت دي. حاسة اني هنفجر وأطربقها علي دماغ الكل.
قالت هيام جملتها بحنق لتستمع قليلا إلى الهاتف قبل أن تقول بحنق: أهدي إيه بس؟ أكيد محدش هيحس بيا. أنا تعبت وخلقي ضاق والحمل كمان معصبني، ده غير ان مالك في الراحة والجاية يقولي استحملي علشان خاطر ابننا خلاص هانت ياحبيبتي. لسة علي الولادة سبع شهور بحالهم ويقولي هانت.
مررت يدها في شعرها بملل وهي تستمع قليلا ثم قالت: بقولك مش سايبني آخد نفسي، النهاردة مثلا قالي انه هينزل الشغل قلت الحمد لله، هقدر أخرج براحتي وأفك شوية عن نفسي أتاري البيه مقعدلي أخته مكانه تحرسني. وكأني بيبي مش هعرف أقعد شوية لوحدي.
جلبة بالخارج جعلتها تقول بسرعة: هقفل دلوقتي وبعدين أكلمك تاني. سلام.
أغلقت الهاتف ثم خرجت من الغرفة لتري سر هذه الجلبة، فوجدت غادة راكعة علي ركبتيها جوارها صينية تحمل عليها بضع زجاج مكسور من الأرض، قالت هيام بدهشة: هو ايه اللي حصل؟
قالت غادة دون أن ترفع عينيها عن الأرض تركز علي لملمة الزجاج المكسور: اتكعبلت في السجادة فالصينية وقعت مني، ادخلي أوضتك لغاية ماألم الإزاز المكسور عشان متتعوريش.
تمام. معلش بقي لو هتعمليلك كابتشينو تاني إعمليلي معاك دماغي هتنفجر.
كنت عاملالك عصير برتقال هعملك تاني لان الكابتشينو مضر للبيبي.
ماشي.
اتجهت هيام إلى غرفتها مجددا، تغلق الباب وهي تعاود الإتصال هامسة بحنق: مبقاش ناقصني غير غادة كمان تديني نصايح. عيشة بجد تقصر العمر.
يعني ايه الكلام ده؟
ملوش معني تاني. عايزة أرجع بيتنا يامالك.
قطب مالك جبينه قائلا: والله رجوعك بيتنا بإرادتك شيء يسعدني لإنه هيسعد ماما اللي كل شوية تكلمني وتعيط دي، بس انت يابنتي مش لسة قايلالي الصبح انك مش هترجعي أبدا. فجأة كدة غيرت رأيك!
أهو أنا راجعة بسبب ماما ياسيدي، عيد جوازها هي وبابا قرب وانت عارف انها لازم بتحتفل بيه وتجمعنا اليوم ده مهما حصل، وكأن تجمعنا في يوم زي ده هيحسسها ان احنا عيلة زي ماكان نفسها، علي فكرة بقي اليوم ده كان مفروض يتحذف من التاريخ بس هنعمل إيه؟ حكمة ربنا. المهم. ماما مش هتقدر تجهز للحفلة لوحدها و لازم أساعدها.
طالعها بنظرة ثاقبة يلمح الحزن بمقلتيها رغم نبراتها المازحة. ليقول: غادة. انت متأكدة ان ده السبب الوحيد لرجوعك؟
حاولت أن تواري حزنها لما سمعته من كلمات زوجة أخيها، تهز رأسها بهدوء قدر استطاعتها تبتلع غصة مريرة بالحلق، فأردف قائلا: وهتكوني مرتاحة هناك؟
أطرقت برأسها قائلة: أكيد لأ. بس مضطرة. معلش هانت وأتخرج وأستقل بحياتي.
أنا هسيبك ترجعي البيت بس توعديني لو في لحظة ضاقت بيك الدنيا ترجعي لحضن أخوك وبيته اللي هيفضل مفتوحلك العمر كله.
رفعت إليه عيون اغروقت بالدموع للحظات قبل أن تندفع إلى حضنه فاستقبلها بين ذراعيه يضمها بحنان بينما تقول هي من بين دموعها: بحبك ياأخويا.
ليضمها أكثر وهو يقول: وأنا بحبك ياحبيبة أخوكي.
في الغربة قد تبدو الوحدة مؤلمة موحشة لغيرها ولكنها لها قدرا أرادته بكامل إختيارها.
من يستطيع أن ينفذ إلى أعماقها ويفهمها يدرك أنه لا شيء بعد رحيله قد يشعل شمعة وجودها فينير عتمة روحها، عجز القلب عن النسيان فصارت الحياة شريط من الذكريات تبث توقا في الكيان لغائب رحل عنها، تري طيفه في كل مكان ولا تستطيع لمسه أو ضمه بين ذراعيها فتكتحل أعينها بالدموع ويفترش مهادها الحزن ويحفها الألم، ولا يخرجها من حالتها هذه سوي ضحكة طفليها ومحادثة لوالدها كهذه المحادثة التي تجريها الآن.
وحشتني قوي يابابا. أخبارك إيه ياحبيبي؟
مش قادر أعيش من غيرك يافيروز، امتي بقي هتيجي؟
هانت يابابا، شهر بالكتير وأخلص انتدابي هنا، أكيد ماجد نسينا دلوقت وهقدر أرجع مصر من غير خوف. مصر وحشتني قوي. وحشتني شوارعها. وحشني نيلها والتمشية علي الكورنيش. وحشني أمانها ودفا وطيبة أهلها.
كل ده مستنيكي يابنتي. انا كمان مستنيكي تنوري حياتي من تاني.
ابتسمت فيروز قائلة: مقلتليش. مرتاح بجد في الشقة الجديدة؟
جدا. الشقة واسعة و مريحة و الشارع هادي. الجيران كمان طيبين وفي حالهم. هعوز إيه اكتر من كدة؟
بمناسبة الجيران. ايه أخبار الست قمر يادرش؟
تنهد مصطفي قائلا: لسة زي ماهي، صعبانة عليا قوي يافيروز. كل يوم والتاني ألاقيها قاعدة في البلكونة تبكي في مكانها وكأن هموم الدنيا اتجمعت فوق راسها. والله واجعة قلبي ولو في ايدي حاجة أخفف بيها عنها كنت هعملهالها بس للأسف مفيش. محروس البواب كتير الكلام زي ماحكيتلك عنه. هي مرة واحدة اللي سألته عنها ومن ساعتها كل لما يشوفني يكلمني عنها وعن جوزها. بيقوللي قد ايه هي ست طيبة ومتستهلش اللي بيعمله فيها. انت عارفة؟ من قسوة حكاياته آخر مرة اديتله فلوس وقلتله ارحمني مبقتش عايز أسمع حاجة عنه وعنها.
قطبت جبينها قائلة: معلش يابابا، الدنيا مليانة هموم وكل واحد همه شكل. ادعيلها ياوالدي وهتكون بخير.
بدعيلها يابنتي. ربنا يفرج همها وكربها. ربنا يهديهولها لإنها حقيقي متستهلش، لو شفتيها هتحبيها يافيروز، شبه مامتك الله يرحمها وطيبة زيها. بتعامل الناس كلها بنفس حلوة وابتسامة مبتفارقش وشها رغم الوجع اللي انا شايفه جوة عنيها وصوتها وبتداريه.
انت كلمتها؟
مرة واحدة، كنت بجيب فول وفلافل من أم إبراهيم وكانت هناك سلمت عليها ومشيت بس كانت مشيتها مكسورة وكأنها شايلة هموم الدنيا علي كتفها.
لا حول ولا قوة إلا بالله. ربنا يسامحه جوزها ويعينها علي اللي هي فيه. ياما في الدنيا ستات مظلومة بس ربنا قادر يرفع عنهم الظلم ويجبر خاطرهم.
ونعم بالله. أمال فين حبايبي الصغيرين؟
في أوضتهم هندهملك. ياكرم ياكرملة. جدكم عايز يسلم عليكم.
خرج طفلان من الحجرة تتشابه ملامحهم حد التطابق يسرعان تجاه والدتهما بسعادة فوجهت شاشة اللاب تجاههما ليريا جدهما الذي حياهما ببشاشة ماإن رآهما فبادلاه التحية والسؤال يخبرانه كم يعدان الأيام ليأتيا إليه فراقبت فيروز محادثتهما بقلب مفعم بالحنان والحب فحين تكون بين هؤلاء الثلاثة تشعر أنها بين أحضان الوطن ودفئه.
كانت تضع قدميه علي حافة الكرسي قبل أن تستقيم وتطالعه للحظة ثم انحنت تعدل له ربطة عنقه فزفر بقوة قائلا: مش كفاية بقي خنقتيني، أنا مش عارف إيه لازمتها الحفلة دي؟ جايبة الناس يتفرجوا علي عزيز قليل الحيلة ولا علي قمر اللي لسة الزمن معداش عليها وسايبها زي ماهي. لأ ومن طيبة قلبها مكملة مع راجل مقعد وواخدة بالها منه وبتعمل حفلة عشان تحتفل انه كان من نصيبها. وكأنها مبتتمناش تخلص منه في كل لحظة.
استقامت تطالعه بقلب ينفطر كل مرة يعاملها فيها بجفاء وكأنها المرة الأولي. وكأنها لم تعتد بعد قسوته فقلبها الطيب يسامح دوما ويأمل في يوم ينعم عليه الله بالهداية جزاءا لصبرها ولكن يبدو أن هذا اليوم لن يأتي أبدا. أخذت نفسا عميقا ثم قالت بهدوء: انا مش هدافع عن نفسي لإني عارفة ان من جواك انت مش مصدق نفسك وكلامك بس قاصد بيه تجرحني لإنك عارف ان اليوم ده هو اليوم الوحيد في السنة اللي بنجمع فيه كعيلة وبنشوف أصحابنا. بنحتفل بيه طول عمرنا ومفيش حاجة بتحسسني بالسعادة قد اليوم ده والكل مبسوط فيه، حتى لو كانت تمثيلية بنتظاهر فيها بالسعادة فسيبني أعيش الدور ياأخي. سيبني أفرح يوم واحد وعشان خاطري ياعزيز متنكدش علينا في يوم زي ده.
طالعها شزرا وهو يقول: منكدش عليكم؟ ماشي ياهانم. عيشي الدور أما نشوف آخرتها إيه؟
طالعته للحظات بصمت قبل أن تذهب وتمسك بكرسيه فقال بحدة: أنا أقدر أمشي لوحدي. متعيشيش الدور قوي كدة وإلا انت حرة. المسلسل هيقلب دراما.
رفعت يدها عن كرسيه وقد خلت ملامحها من المشاعر، تتعجب من نفسها وتتساءل بحسرة.
لماذا تصر حقا علي التظاهر بأنها تحيا في سعادة رغم أنها تعلم أن الجميع يدركون كم هي تعيسة حياتها؟ لماذا لا تتخلي عن هذا اليوم رغم كل مامرت به مع عزيز؟ لماذا تتمسك بسعادة زائفة لا وجود لها؟ ربما وجب عليها أن تعترف أخيرا. لقد كانت تضحي بسعادتها وراحتها من أجل أبنائها وقد كبر الأبناء وصار لكل منهم حياته لذا آن الأوان لتبحث لنفسها عن سعادة حقيقية ولن تحظي بها سوي في الفراق عن هذا الرجل. حسنا لتمضي الليلة في سلام ثم حين يأتي الغد سيأتي بأمل جديد لا محالة.
كانت تتجه إلى حيث زوجها وهي تبحث في محتويات حقيبتها تتأكد من أنها لم تنسي هاتفها وهدية والديها. حين توقفت وصوت حماتها يصلها تقول بسخرية: انت اتجننت ياوليد؟ نيجي معاكم فين؟ بيت الست قمر وجوزها. لا ياحبيبي شكرا، ده أنا مدخلتوش وانت هتخطب هدخله دلوقت بعد مااتجوزت؟ وبعدين حفلة عيد جواز إيه اللي عاملينها دي؟ ماانت قلتلي ان ميسون قايلالك علي مشاكلهم اللي مبتخلصش. أمر نسايبك عجيب ياوليد ومستفز.
خلاص بقي ياناهد. احنا ملناش دعوة.
قال مراد جملته لزوجته ثم وجه حديثه لولده الذي ظهر علي وجهه الحزن قائلا: روح ياابني الحفلة انت ومراتك ومتزعلش من ماما. هي وراها ميعاد مهم مع الدكتور وعشان كدة مش هتقدر تيجي معاكم.
لأ معنديش مواعيد مع دكاترة ولازم ابنك يفهم ان مستحيل تكون ليا صلة بنسايب الهنا دول، هو اختار بنتهم عشان تبقي مراته وساب سوزي بنت رورو صاحبتي. عادي. براحته يبقي يتحمل لإني مش مضطرة أتحمل. انا طالعة أوضتي. باي.
أسرعت ميسون تختبئ خلف العمود بينما مرت ناهد بجوارها تسير بخطوات عصبية تتجه لحجرتها لتسمع ميسون صوت حماها وهو يقول بشفقة: قلتلك متزعلش، انت عارف ناهد كويس. مش هتقتنع غير باللي في دماغها، بص ياابني أهم حاجة في الجواز انك تكون مقتنع بشريكة حياتك وبتحبها، أي حاجة تانية مش مهمة ومادام مبسوطين مع بعض يبقي انت اخترت صح. مش انت بتحبها ياوليد؟
قوي يابابا بس كان نفسي ماما كمان تحبها.
ربت مراد علي كتف ولده قائلا: سيبها للأيام ياابني. يمكن لما مامتك تشوف قد إيه بتحبها تحبها هي كمان. المهم سيبك من الكلام ده دلوقت وخد الهدية دي اديها لحماك وحماتك بالنيابة عننا واعتذرلهم. قولهم ان احنا مقدرناش نيجي لان والدتك تعبانة شوية. وقول الكلام ده لميسون برضه عشان متزعلش. كان نفسي آجي ياابني وأباركلهم بنفسي بس مش هينفع، مادام هنقول ان والدتك تعبانة يبقي لازم أقعد معاها والا هيكتشفوا انها حجة ويزعلوا.
هز وليد رأسه ليربت مراد مجددا علي كتفه قبل أن يسير باتجاه المكتب فرأى ميسون تقف هناك تطالعه بعيون أغروقت بالدموع، أرسل إليها نظرة خجلة معتذرة فهزت رأسها مطالعة إياه بحب امتزج بحزن ليطرق رأسه مواصلا طريقه إلى المكتب، أخذت ميسون نفسا عميقا ومسحت هذه الدمعة التي سقطت سهوا ثم اتجهت إليه قائلة بمرح مفتعل: بقي انت هنا وانا بدور عليك. يلا ياحبيبي اتأخرنا وهنروح بعد مايخلصوا البوفيه وأنا عارفاك تموت في أكل الست قمر.
استدار إليها يقول بارتباك: أنا جاهز بس ماما...
قاطعته قائلة: قابلت باباك واعتذرلي. انا عارفة ان زيارة طنط ناهد للدكتور روتينية بس مينفعش تتأجل. ولا يهمك ياحبيبي تتعوض ونبقي نعملهم حفلة مخصوص.
لتتعلق بذراعه تحثه علي السير قائلة: يلا بقي إتأخرنا.
سار جوارها يزفر بداخله بإرتياح وقد شعر بالسعادة لسعادتها الواضحة علي ملامحها لايدرك أن خلف هذه الإبتسامة قلب ينفطر من الألم ولكنها ستعالجه بالصبر والأمل. ربما ذات يوم تحبها حماتها وتتقبلها، تدرك أنها الفتاة المناسبة لولدها، تماما.