رواية الوقح والراقية جزء 2 للكاتبة ياسمين علاء الدين الفصل الأول
في بيت العائله
كانت لوزه تجلس وبجانبها ملك الصغيره ابنه حياه فهي عمرها 8 سنوات الان
لوزه: ملك تعالي اتغدي
ملك: هو خالو حازم مش هياكل معانا
لوزه: حازم مش هنا. ده في العياده
ملك. /: طيب جدو
لوزه: جدو مع حاتم في القهوه. ومش جاين دلوقتي. يلا انتي كلي
ملك: طيب كلي معايا يا نانا
لوزه: حاضر.
في العياده الخاصه به
كان حازم يتابع عمله كطبيب للعظام ليجد الباب يفتح ويدخل صخر وشذي والممرضين خلفهم
الممرضه: والله يا دكتور قولتله ينتظر أبلغكم وهو مش راضي
حازم وهو يبتسم: صخر يجي في أي وقت. روحي انتي
خرجت الممرضه. صخر: انت هتعملنا فيها دكتور. صدقت نفسك ياض وله ايه
حازم: دكتور يا عم والله
صخر: دكتور على نفسك مش علينا
شذي بابتسامه: حازم عامل ايه
حازم وهو يقبل يدها: الحمد لله يا خالتو.
شذي: ما بلاش خالتو دي.
صخر بهزار: اللي فضحاني في كل مكان والناس مش مصدقه أنها امي. ومخليه رقبتي قد السمسمه مين
شذي: بس انت يا قليل الادب. اتكتم
ضحك حازم: عملك ايه بس الواد ده يا شوشو
شذي باستنكار: السافل ده طول ما هو سائق عمال يشتم في الناس. هو اللي حمار ومش عارف يسوق
علت ضحكت حازم. بينما صخر نظر لها: مش هرد عليكي علشان انتي امي.
شذي: وله تعرف تعمل
صخر: عندك حق. للاسف.
حازم وهو ينظر لها ويضحك: خير يا شوشو. تعبانه وله ايه
شذي: رجلي بتوجعني يا حازم.
صخر: قولتلها خليكي وهو اللي يجعلنا بس مردتش. وقالتلي اروحله احسن
حازم: نورتي العياده والله.
شذي: بنورك يا حازم
وقف حازم وأمسك يدها ليجلس على سرير كي يفحصها
وبعد وقت
حازم: انتي عندك التهابات في العظام. هكتبلك على علاج وان شاءالله هترتاحي
شذي: أن شاء الله. متقولش لفيصل أن انا كنت هنا.
حازم: هو ميعرفش انك جايه.
شذي: لا. يعرف أن انا كنت عند دكتور الاسنان بس
صخر: ليه منقولش
شذي: كده وخلاص. محدش يقوله علشان هزعل
حازم باندهاش: لا خلاص مش منقوله
صخر: وانا مش هقول كمان
شذي وقفت: هنمشي احنا وكفايه كده عطلتك
حازم: انتي تعملي اللي انتي عايزاه. ده انا اقفل العياده علشانك
ابتسمت بسعاده لذوقه فهو طبعه مثل بندق
صخر: ما تلم نفسك ياض. واتكلم عدل.
حازم: ياض انا عملتلك حاجه.
شذي: بطل رخامه يا صخر ويلا نرجع البيت
صخر: يلا.
شذي: حازم هستناك انهارده تيجي تتغدا أو تتعشا معانا.
حازم: خليها يوم الاجازه احسن.
شذي: خلاص اتفقنا. أن شاء الله يوم الاجازه تقضيه مع بعض
حازم: أن شاء الله.
في المساء وقت العشاء
كانت مريم تجهز المائده مع شذي
فيصل وصخر وجيل وعمير يجلسون معا
ذهب عمير إلى المطبخ: شوشو عامله ايه
شذي: الحمد لله يا عمير.
مريم: اشمعانه
عمير: بطمن عليها.
شذي: الحمد لله يا حبيبي انا كويسه
عمير: لا يا ماما. انتي تعبانه.
شذي: وطي صوتك يا عمير. بجد انا كويسه
مريم بخوف: مالك يا ماما. تعبانه ازاي
شذي بحده: قولتلكم انا كويسه. قفلو على الموضوع ده مش عايزه فيصل يعرف حاجه..
عمير نظر لمريم بعدم فهم
جلس الجميع معا يتناولون العشاء...
فيصل وضع يده على يدها: سرحانه ليه يا شذي
شذي: مفيش حاجه. قولي اخبار الشغل ايه
فيصل: الحمد لله. انتي كويسه
حركت رأسها بنعم.
في بيت لوزه وبندق
كانت تتناول العشاء مع حازم وحاتم وبندق وملك
حاتم: انتي هتقعدي معانا كتير يا بت
ملك: اه. بيت جدي
ضحك بندق: جدعه يا ملك. ملكش دعوه بيها ياض
لوزه: دي ملك مخليه البيت ليه روح. بدل ما بقعد لوحدي طول النهار هي بتقعد معايا
حازم: ملك دي عسل.
حاتم برخامه: عسل اسود
بندق: دي عسل ابيض يا حمار.
أخرجت لسانها له لتغيظه.
شذي كانت تقف أمام المرآة في غرفتها وهي تنظر إلى وجهها وملامحها بحزن
لتشعر بيد فيصل: مالك يا شذي
شذي وهي تنظر لانعكاسه في المرآة: مفيش يا فيصل
امسك يدها واجلسها على الفراش وهو بجانبها
: هتخبي عليا أنا. مش انا حبيبك
تجمعت الدموع في عينها وهي تنظر له بحزن
فيصل: في ايه يا شذي. هتقلقيني عليكي ليه. مالك بس
شذي بدموع: انا كبرت يا فيصل.
نظر لها بعدم فهم. شذي: بقت وحشه.
ضحك على تفكيرها الطفولي: انتي مش وحشه. انتي اجمل واحده شافتها عيوني.
شذي ببكاء: انا خايفه يا فيصل. خايفه تسبني علشان انا كبرت ومش زي الاول
فيصل: براحه كده ومتعيطيش. وبعدين انتي كبرتي وانا لسه صغير. انا اكبر منك. انتي شكلك قمر وكل اما تكبري بتحلوي اكتر.
شذي: بجد يا فيصل
فيصل: بجد يا قلب فيصل.
ضمها لتمسك دموعها وهي تشعر بالراحه
فهي تمر بسن اليأس وتلك الفتره تمر المراه بفتره اكتئاب وعدم ثقه بنفسها.
لا تريده أن يعلم أنها مريضه أو تشكو من شي حتى لا يشعر انه كبرت وعجزت.
فيصل يحبها ويعلم أنها حزينه لذلك يحاول أن يهدأها
فيصل: ايه رائيك بكره نخرج انا وانتي
شذي: لوحدنا
فيصل: اه. لوحدنا فيها ايه. الولاد دلوقتي كبرو
شذي: هنروح فين
فيصل: انتي عايزه تروحي فين.
ابتسمت له: مش عايزه اروح مكان. انا عايزاك انت وبس
قبلها: انا معاكي على طول يا بسكوته قلبي.
وضعت رأسها على صدره بسعاده وراحه واهم من كل هذا أنها اطمئنت أنه ما زال يراها جميله ويحبها.
في اليوم التالي
كان جبل في مكتبه فهو مهندس معماري
ليدخل السكرتير يخبره بقدوم عميله.
دخلت فتاه جميله جدا بشعر مموج بني وعيون خضراء بشره بيضاء
جبل باحترام: اتفضلي
الفتاه: تاليا مختار
جبل: تشرفت يا فندم. انا جبل فيصل مهندس معماري زي ما حضرتك عارفه. اقدر اساعدك بايه
تاليا: عندي ارض وعايزه ابني عليها مركز تجميل.
جبل: مساحه الارض قد ايه وفين
أخبرته تاليا بكل التفاصيل.
جبل: تمام. تحبي شكل المركز ازاي. في تصميم معين في دماغك
تاليا بوقاحه: انت عايزني انا اللي افكرك. انا جايلك ليه. كنت صممته انا
رفع حاجبيه باندهاش من طريقتها ليشعر بالغضب: مفيش تصميم وله شغل بينا. وروحي شوفي مكتب تاني
تاليا بغضب اكبر: ليه بقي. انا هدفعلك فلوس
جبل: اتكلمي بأدب. فلوسك دي انا مش محتاجها.
وقفت وهي تحمل حقيبتها: احسن برضو. انت الخسران
أشار بيده لتخرج. فتحت الباب وخرجت بغضب
وهي تلعنه.
جبل: صحيح الحلو ميكملش.
صعدت إلى سيارتها وذهبت إلى بيتها
تاليا: انسان وقح وقليل الادب
خرجت فتاه نسخه منها ولكن شعرها مفروض على ضهرها
تالا: بتشتمي مين يا تاليا
تاليا: بشتم الزفت المهندس. وقح طردني من مكتبه
تالا تعلم اختها جيدا: هو طردك كده من غير سبب
حكت تاليا ما حدث لاختها
تالا: انتي الغلطانه يا تاليا. هو بيسألك سؤال عادي. وانتي رديتي باسلوب مش كويس
تاليا: هو مستفز. يعني أنا رايحه ليه.
تالا: هو قصده في شكل معين تحبيه. بس انتي إلى طول كده متسرعه
تاليا نفخت: اهو اللي حصل بقي. اعمل ايه
تالا: اتاسفي
تاليا: مش ممكن اتاسف لحد
تالا: خلاص براحتك. بس انتي عارفه أنه مهندس شاطر وهينفذ اللي نطلبه باسرع وقت. متنسيش عمو قال ايه عنه. انه امين وشاطر
تاليا: مش هتكلم معاه تاني
تالا: خلاص انا هروح بكره اتكلم معاه.
تاليا نظرت للامام بصمت.