رواية الحب الضائع الجزء الأول للكاتب عبد الرحمن أحمد الفصل الحادي والعشرون
عاد محمد من العمل مرهق من ما رأه طوال اليوم واولهم ذلك الكمين الذى نجا منه بأعجوبة والبحث الشاق
دخل الى الفيلا فإشتم رائحة طعام شهية جدا وكان جائعا
محمد لنفسه: إيه ريحة الاكل الجامدة دى
نزلت ملك من اعلى
ملك: إيه ده انت جيت يا مودى
محمد: ايوة، بس قوليلى إيه الريحة المغرية دة علشان انا جعان
ملك: يلا بس تعالى ساعدنى انا ويارا نحط السفرة وهقولك
ولا اقولك استريح علشان دراعك
محمد: لا هساعدكو.
ساعدهم محمد فى تحضير السفرة وجلسو
محمد وهو يتذوق الطعام: الله، إيه ده انا مكلتش اكل حلو كدا من ساعة وفاه ماما الله يرحمها
مش معقولة انتى يا ملك خاااالص
ملك: ايوة علشان يويو هى اللى عاملة الاكل
محمد بحب: بجد تسلم ايدك يا يارا، الاكل تحفة
يارا بكسوف: بجد حلو
محمد: جدا، يااااه ده انا بعد الايام علشان تبقى مراتى والاكل والحلاوة دى كلها تبقى ليا
ملك: مينفعش تقول كدا وانت لسة مكتبتش الكتاب.
محمد: وانتى مالك انتى يا رخمة
ملك: الله، مش انت بتقول كدا ل رامى لما يجى يقولى كلام حلو
محمد: كدا انا كدا، اطفحى بقا علشان ملبسكيش طبق الشوربة ده
ملك: بس اسكت انت بتموت فيها، مش هيهون عليك ترميها فى وشى
محمد: صح طبق الشوربة اهم من انى ارميه فى وشك يا روحي
ملك: عاجبك كدا يا يارا، صاحبتك بتتهزق قدامك وساكتة
يارا: انا مالى يا ستى، اتنين اخوات بيتخانقو
محمد: شوفتى العقل
ملك: خلى بالك رامى هيضربك.
التفت محمد بسرعة ولكن لم يجد احد فضحكت ملك بصوت عالى
محمد: اه يا كلبة، ماشى استنى اخلص اكل بس
ملك: بس مكنتش فكراك هتيجى بدرى كدا
محمد: مكنتش هاجى خالص
يارا: لية
محمد ممازحا: كنتو هتسمعو خبر تفجيرى على التلفزيون
يارا: إيه انت بتهزر
محمد: لا، والله كنت هموت النهاردة وخدت بالى فى اخر لحظة
وحكى لهم محمد ما حدث
يارا بخوف: الناس دى مش هيسيبوك فى حالك انا عارفة.
ملك: ايوة والمرة دى جت سليمة لكن المرة الجاية الله اعلم
محمد: ربنا يستر، لو مكتوبلى حاجة هشوفها
يارا: خلى بالك من نفسك
محمد: خايفة عليا!
يارا بكسوف: ايوة
محمد: بحبك
ملك: نحن هنا
محمد: يحرقك يا شيخة.
خالد: إيه يا كيمو قاعد سرحان كدا لية
كريم: بفكر فى شوية مواضيع كدا
خالد: مواضيع إيه
كريم: متشغلش بالك انت
خالد: بخصوص يارا بردو
كريم: حاجة زى كدا
خالد: وناوى تعمل إيه
كريم: لسة مش عارف، بس ادينى بفكرلها فى حل اهو.
رشدى: يااااه اخيرا وصلنا
دولت: الحمدلله، تصدق يا رشدى وحشتنى البلد اوى، بقالنا 10 سنين ما بننزلش مصر
رشدى: ايوة علشان كدا المرة دى هنطول هنا شوية
دولت: مى نامت يا عينى
رشدى: اطلعى نيميها على سريرها وشوفى الدادة اللى جايبها تخلى بالها منها عقبال ما نخلص المشوار ونيجى
دولت: حاضر.
محمد: إيه ده، عمى ازيك، يااااااه من 10 سنين مشوفتكش
رشدى: وحشتنى يا محمد والله
محمد: قولى بقا إيه اخبار باريس
رشدى: حلوة وتمام
محمد: إيه يا دودو بقى تنسينا كدا، عمى نسى وتنسى أنتى كمان
دولت: والله يا محمد مشغولين بطريقة كبيرة ولسة رشدى كان بيستقر على شركته الجديدة وبيظبطها ولحد ما وقفت على رجليها
محمد: واية اخبار مي اللى انا معرفهاش غير من على النت
رشدى: كويسة الحمدلله وسيبناها نايمة فى البيت.
محمد: لا لازم تجيبوها المرة الجاية علشان عايز اتعرف عليها
رشدى: من عنيا، امال فين ادهم
محمد: مانت عارف يا عمى هتلاقيه فى الشركة
رشدى: طول عمره بيحب الشغل
محمد: اوى
رشدى: انا هروحلو
محمد: خلاص هوصلك فى طريقى ودودو هتقعد هنا مع ملك ويارا، اه صح نسيت
اعرفك ب يارا
وقام ونادى على يارا وملك وبعد سلامات واحضان من ملك
محمد: دى يارا خطيبتى يا عمى وقريب جدا هنتجوز
رشدى: ما شاء الله، ربنا يخليكو لبعض.
محمد: يلا بينا بقا و دودو خليها مع يارا وملك
رشدى: ماشى يلا بينا.
رشدى: قولى يا محمد، هى خطيبتك قاعدة معاكو فى البيت ايه
محمد: يااااه دى حكاية طويييلة
وحكى له محمد كل شئ منذ البداية فى الطريق
رشدى: ياااه دى حكاية كبيرة اوى، الله يكون فى عونها، فقدت ناس كتير اوى
محمد: ايوة، ومن ساعة اللى حصل ده علشان اامنها قاعدة فى الفيلا مع ملك فى اوضتها
رشدى: ربنا يتمملك بخير وتتجوزو
محمد: يارب.
دولت: ياااه دى حكاية صعبة اوى
يارا بحزن: هو ده اللى حصل
دولت: اسفة انى فكرتك
يارا: لا ابدا، احنا خلاص هنبقا صحاب واخوات كمان
دولت: وانا يشرفنى يا يويو
يارا: تسلميلى يا دودو
دولت: ده مى لما تشوفك هتحبك اوى
يارا: المرة الجاية هبقى اتعرف عليها.
ادهم بفرحة وحضن لرشدى: ايية ده رشدى، عاش من شافك يا راجل
رشدى: وحشنى اوى يا ادهم، بقالنا 10 سنين مبنتقابلش
ادهم: مانت اللى مبلط هناك فى باريس ومش عايز ترجع
رشدى: والله الشغل بقا وانت عارف
ادهم: الله يكون فى عونك
رشدى: يارب، قولى بقا إيه الاخبار والمستجدات وكدا
ادهم: هحكيلك يا سيدى.
كريم: إيه هدهد كيفك
هدير: تمام يا كيمو
كريم: إيه مبتجيش غير لو فيه مصلحة
هدير: كدا ظالمنى علطول يا كوكو
كريم: كوكو كمان، ده انا اتأكدت كدا ان فيه مصلحة
هدير: اه الصراحة فيه
كريم: بخصوص محمد و يارا صح
هدير: إيه الدماغ دى، عليك نور
كريم: واية بقا اللى عايزاه بخصوص الموضوع ده
هدير بدلع: صبلى بس كاس وهشرحلك خطتى بالتفصيل
كريم: ماشى يا دودو.