رواية الأنباري وزوجاته الأربعة للكاتبة زهراء أمجد الفصل التاسع

رواية الأنباري وزوجاته الأربعة للكاتبة زهراء أمجد الفصل التاسع

تصويت وشكرا لانتضاركم الي وتقدير ضروفي احبكم يااحله متابعين بس دراسه ومناسبه عرس وحنه وبعد تعرفون الانشغال ليصير
في بيت الشيخ...
عناد:- 5يله كافي وخروه
دخلني لجوا وباس راسي وطلع
ضلن البنات يركصن وفرحانات واني بس اباوع صبو العشه
واشويه وكالو العريس راح يدخل
اني هناء خفت كلش صعدني للغرفه ونزلن وضليت بس اني موجوده بالغرفة ضليت ارجف وخايفه ماسمع بس خطواته ع الدرج...

وجان ينفتح الباب ويدخل... لابس زي عرب الدشداشه البيضه والعكال وهيبه وعطره اول مفتح الباب شميته... تقرب خطوات لحد ماوصل يمي واني الرجفه بكل جسمي...
عناد:- الف مبروك حبيبتي ربي يسعدنا طول العمر ويحفظج الي... ويقدرني اسعدج...
عنود:- الله يبارك بيك شيخي...
عناد:- حطب اغسل حضريلي ملابس وانتي اخذي راحتج بدلي حته لااضايقج...

عنود:- رحت طلعتله شورت وفانيله وكمت علسريع لبست رووب ابيض بس طويل استحي واخجل لذلك شتريت طويل مستور... طلع من الحمام جابو العشه واني من الخوف مالي نفس اكل بالكوه اكلت لكمتين...
عناد:- يبت عمي ماريد اجبرج عله شي بس هذا معروف والكل ينتضر بياضج فلازم يتم زواجنه لان ينتضروني واكيد ماكدر اتخله بهيج موقف سلميني نفسج وخلي الباقي عليه وان شاء الله مااذيج...

عنود:- تقرب الشيخ عليه واخذني بكل حنان محسيت بشي لان جان كلش حنين وياي وخلص بسرعه وباس راسي وحضني وبعدين كام بدل وطلع من الغرفه ومااسمع بس الرمي والهلاهل جوا... بعدين صعدت عمتي وحماتي رسل... وباركولي وسلمو عليه ودعولي بالذريه الصالحه..

. ونوب رجع شيخ عناد وضلينه اليل كله بعالم ثاني واحساس لايوصف كان كلش حنين ويعاملني برقه وسولفنه هواي شغلات وعلمني الاشياء اليحبها ويكرها ونبهني بتصرفات الي ميريدها مستقبلا حته لصير مشاكل ونمنه الفجر بدون منحس من التعب وكعدنا عله دكت الباب الصبح  انو اخويه ومرته جوي جايبين الريوك صباحيه العرس..

كمت بسرعه غسلت واشيخ هم طب غسل غسلة العرس ولبست كلبيه بيضه ووردي وخليت مكياج خفيف ونزلت سلمت علكل وباركولي... وضلت الشيوخ تردد لمضيف لشيخ عناد يباركوله... مرت اول ايام براحه وسعاده بينه... واجه يوم السابع لبست فستان نيلي حلو بسيط خليت مكياج خفيف اجوي الكل... الخطار حته اهل النجف بيت عمه وجابو كيك وعشه وصارت حفله بسيطه و٠ان يوم حلو بس متعب لان كل الاقارب والخطار واني مالي خلك كلياتي اذني... خلصت كفينه البيت وصعدت لورا شويه اجه الشيخ...

عناد:-عنود حبيبتي جاي ارد احاجيج بموضوع...
عنود:- كول ياشيخ موضوع بخصوص شنوو...
عناد:- بخصوص بنت الشيخ ابو يوسف...
نرررجع لاخت الشيخ رسل...

مرت الايام واني دوم طلعات وونسه ويه صديقاتي وويه حسن تعلقت بيه كلش صار اخويه الثاني وصديقي وكل منشووراته اختي لان ماعده خوات فينشر صووري وياه بكل طلعه نلتم ويكتب اختي سعادتي حيل فرحت بمعرفتي بحسن ضليت يوميه العب بوبجس وياه وسوالف وونسه وحته ابويه يأمني وياه هواي لان يعرفني اني بميت رجال ومستحيل اخون ثقتهم... فبيوووم رحت للمستشفئ وحدي لان اخوي الشيخ مشغول ورحت اني وحدي... هناك وجان يخابرني حسن لان طورت علاقتنه كلش مخابرات وسوالف وطلعات وطبه...

حسن:-الو سوسو وينج...  شفت سنابج منزله صوور انتب وين
رسل:-هلا حسن اني بالمستشفه.. ليش...
حسن:- منو وياج وداج وحدج لو اخوج..
رسل:- وحدي.. وهسه كاعده ليش...
حسن:-  تمام
كبل اخذت سويج سيارتي ورحت للمستشفه..

رسل:- عيط عليه عيطه ببوكتها لان طالعه وحدي وراسن سده ورا ربع ساعه لكيته كبالي كالب الخلقه
حسن:- انتي شلون تجين وحدج َاني شنو لعد ليش مكتيلي
رسل:- اكلت رزاله غسل ولبس منه ماكللهم وجايبلي اكل وحلويات ودب ميكي ماوس لان يعرف احبه كلشششج
والدبدوووب هسه بهل باااارت حخلي صوورته شووفوه...
في مكان اخر في الناصريه...

مها:- قررت ابقى ساكته افضل الي  بذاك اليوم رحنه للمدرسه وجانت المعاونه بلباب واكفه
وطبعآ ما تفوت الفرصه بدون بوسه مني ماعده بنات كله ولد وتموت عليه الى درجه تعزم نفسه ع غده يمي مرات
. ومرات تشتريلي ملابس وهدايه هواي  علاقتي بيه تختلف عن اي مدرسه بكل مراحلي الدراسية   ودخلنه  وبيومه خلص الدوام
وطلعنه اني وميس للمكتبه شويه عن المدرسه  وهناك جان اكو هوايه بنات والبنيه الي واكفه يمي. اخذت  فلوس جان خالهن ع الميز وخلتهن بداخل جنطته وانه خفت وجهي صار ينطي ألوان.

والرجال انتبه وذب السالفه براسي وكال اله أفتش جنطتج وانه رفضت مو لان انه ماخذتهن مثل ما فهم بس  ماعرف ليش رفضت هل رفض التام وكتله مو اني هاي البنيه
الحارس '- تتبالين ع العالم هم
وأحلف بكل طاقتي وهو ما يصدك والبنينه من شافت الرجال مصر ع رئيه كالتله فتش جنطتي كاله لا عموم انه اعرف هيج نماذج هواي ماره عليه بيومه كال اله اهلج يجون يالله اخليج اطلعين..

ههههه انه وياي ميس بس ميس هم بس تحلف ودكله عمو والله مهاوي ما اسويه ههههههه تالي كتله انطيني مبايلك اتصل بابا
الحارس:-  الضاهر انتي وبابا متعلمين ع بوك ومتفقين.

مها:- انه هنا الشياطين كله تربعت بنص راسي والعصبية اشتغلت عندي والكره  جنس الذكر  هم اشتغل  وفجئه كتله  اضفر منك ما يلحك بابا  وأنته شنو ومار عليك هيج حاله انته انسان منحط  وماعندك عداله ابد. هاي جنطتي نفضته كدامه كتاب كتاب ومن ضمن الكتب جان موجود القران بجنطي ابتسم من شافه..

وسحبت الجنطه من البنيه وطلعتله الفلوس  وكتله هسه شنو النماذج الي ماره عليك وانه ارجع الكتب اللجنطه  دخلت المعاونه وشافتني شلون منهاره
المعاونه:-  شبيج ماما مهاوي منو وياج ليش هيج معصبه ع شنو
مها:- كتلها  السالفه كلها ولرجال بقى صافن
وكال لو كايلتي امج المعاونه جان ماحجيت من الأصل..

المعاونه:-  اني مو امه بس  هل بنيه تسوه المدرسه كله  وأخذت اسم البنيه.  ولرجال اعتذر مني وخجل كلش وبنفس الحضه بابا اتصل ع المعاونه وكاله مهاوي اتاخرت
كالتله لا راح اجيبه وياي انه أوصله لا يضل بالك  وكالت يالله امشن اهلجن قلقو زايد وكتله رايحين كالت لا ابني بره راح انوصلجن يالله انروح كتله اوك
وصعدت بسياره  اول مره اشوف ابنه وسلم علينه وامه كالتله هاي ابنيتي..

كاله مهاوي هنا
كالتله ايي شبيك انفجعت
كاله وينه منهن
كالتله ولك استحي   شبيك
كتله انه عندك شي. شبيك  مادكلي
شنو سالفتج دحرك اتأخرنه كال يمه فدوه وعصبيه هم كتله ست اني نازله مشي اروح..

كالت احترمي نفسج كلت لبوج انه اوصلج وكال عمي ماشي ماشي بس كافيج شنو هل يوم الي ماراضي يخلص
ع اساس يومي راضي يخلص ضحك وكال لمه شكو وسولفتله السالفه وراد يرجع ياخذ بثاري ههههههه
وكتله انته معليك محد استنجد بيك  وامه كالتله كمل واسكت وكال راح اعوفه هسه بس والله ما افوته  كتله سبع ونعم منك وصلنه ولكيت  بابا بلباب منتضر خطيه وكتله ست فدوه لادكولين مابيه سين وجيم كالت اوك..

كوليله ست اخراتنه حته نرجع وياها  كتله اوك هو كال لازم تخاف كتله انه ما خاف من بشر.  فهمت لو اعيد كال سباعيه ونعم منج كان طويل اسمر  شعره عالي عيون كبار اسمه محمد
بذاك اليوم نزلت وكتله تاخرنه ماقبلت نرجع وحدنه لان درس سادس والشارع فارغ كال اوك وفتنه وليل  وبغرفتي وجنت جاي اقرى قرأن وفات عليه اخوي...
في مكان اخر في النجف...

ايه:- ضلينه اني ومعتصم ع علاقه علاقتنا حلوه رغم بيها كومه مشاكل يغار كلش واني احب غيرته عليه بيوم ٢/بشهر سادس طبينه رمضان احنا عطلنه اجت فتره المراجعه ودخلت انذار طبعا شغل ع راسي لا اكدر اقرا عدل صارت عدي ضغوط نفسيه..

يمكن بس الي مجربه سادس تحس بلي احسه اقرا اني وبرمضان طبعا معتصم ساعه باليوم احاجي ما اكدر هواي هوه مقدر وضعي داقرا وضغطت ع روحي صرت اسهر وتغير شكلي وضعفت
اجيت لمعتصم راح اموت شلون بيه
معتصم:-  شبيج حبيبتي
ايه:-  كلش تعبانه معتصم والله دأموت من دراسه وضغط الي بالبيت..

معتصم:- ميخالف حياتي الله ميضيعلج تعب ان شاء الله مبقه ايام وتعدي وترتاحين
ايه:- ارتاحيت من حجيت وياه شويه يغير من نفسيتي طبعا اني سادس ادبي هسه يكولون مو كلش صعب مثل علمي لا والله صعب ومينطاق اجه يوم امتحانات طبعا معتصم وصديقتي وياي نروح دوام لان غير مدرستنا ف رحنا صعدت اني سلمت عليه هوه عيونه تلمع
كلي شنو هاي شو ذبلانه يروحي لتاذين نفسج اهم شي انتي كتله شسوي قابل..

معتصم:-  ان شاء الله يروحي تنجحين ميضيع تعب الج
ايه:-  ان شاء الله وصلنا للامتحان طبيت سلمونا دفاتر الأسئله وياها هم امتحنت جاوبت اسئله سهله  طلعت فرحانه صعدنا بسياره
معتصم:-  يمه شنو هاي وجهج مورد
ايه:-  اي والله زينه بالامتحان
معتصم:- ان شاء الله كلهن ضلينه ننتضر صديقتي تجي كتله معتصم مو ضل تباوعلي من تجي البنيه عيب استحي اني وهي
ضل تضحك كلي مالج علاقه بكيفي شلون يعني اسد عيوني..

ايه:-  لا مو هيج بس عفيه والله استحي هوه ضحك
معتصم:-  اوك احاول
اجت البنيه صعدنا وصلنا للبيت كلي حبيبي راح اروح لانبار اني مو يضل بالج كتله شعدك بلانبار غرت بداخلي
معتصم:-  معندي شي هيج نروح لبيت الشيخ وهم لان عرس وشويه نروح صيد وكذا ونسه يعني  اني واصدقائي
ايه:- ضجت اني شافني ضجت كلي
حبيبي ليش ضايجه
ما بيه شي يلا خل انزل..

اوكفي حبيبتي طلعلي ورده حمره اني ابتسمت كتله تخبل هاي
الورد للورد  يلا يعمري ليش ضايجه
غرت ودنكت هوه ضحك
اروح فدوه لهل خدود مال كرط
عيب معتصم شنو هاي
اريد اخطبج اني باوعتله كتله اكمل امتحانات والله كريم
ماشي حياتي ومن  ناحيه الانبار والله ما اشوف غيرج لو ملكه جمال يمي

ابتسمت كتله ماشي رجعت للبيت واني فرحانه بالورده حطيتها بالمي وكلساع اشمها وابتسم وكملت دراسه للامتحان ثاني...
معتصم:-  مرت ايام واجانه رمضان ونكطعت عنها مكدرت اشوفها اني محترك حرك عليها هسه غير تخلص سادس وارتاح واخطبها ضلت خطيه تقرا ومنا بيت جدها ع راسها وبيتهم جبير كلش مساحته ٥٠٠...

خطيه تشتغله كله وبيبيتها مره جبيره متكدر ف بيوم من الايام اجت تبجي الي تشكي من دراسه ضليت اواسيها هدات شويه واجت يوم امتحانات خابرني صديقي كال معتصم شباب تريد تروح للانبار نروح وياهم كتله ماشي نروح شعدنه هم اروح وهم مناك امر لبغداد نروح نزور  ازور واطلبها من الامام الكاظم عليه السلام..

اجت حبيبتي صعدت يمي اشوفها وجها ذبلان راحت الخدود يربي ههههه كتلها ليش حبيبتي هيج كالت من إمتحانات وصلتهن للامتحان رجعت شغلي وره شويه رحت لمحل ورد طبيعي يبيع اخذتلها ورده حمره تجنن ادري بيها تحب هيج شي جهزتها الها طلبت مني ما اباوعلها اذا يمها البنيه عيب تستحي اعشق خجلها كلش..

وراها كتلها ع روحه الأنبار وهي غارت ادري بيها عبالها اشوف غيرها غير هي بقلبي متربعه لا اكدر انساها لحضه من بالي متروح انطيتها لورده ابتسمت ونست روحها ضلت فرحانه ابتسمت ع فطاريتها وصلتها لبيتهم ورجعت ع ولد جماعتي رحنا لانبار خابرت والدي وبلغته هوه راح للمحل بدالي وصلنه لبغداد كتلهم خل نزور محد قبل يردون يتغدون وراها يزورون كتلهم سبقوني ارد ازور اني رحت زرت ودعيت الله يفرحها وينجحها ويسهلنه امرنا اني وياها والله يحفضها الي رجعت للجماعه شو ما همه اتصلت بيهم اسمع صوت نسوان يمهم عرفت جيتهم كلولي تجي رفضت كتلهم راجع للانبار اني ما اريد
الله يهديكم ما عدي هيج سوالف منا اني احب وحده ليش هيج اخونها ليش هوه اني اكدر اخونها اكدر اشوف بنيه غيرها الحمدالله والشكر رحت اشتريت لامي شغلات وشفت سوار ناعم بيه نجوم ابتسمت واني اتخيله ع اديها يطلع يلالي عليها اخذته ورجعت للانبار سلمت علشيخ وضليت لليل وتالي رجعت لان بالي عليها  عدها امتحان فرجعت للنجف...

ايه:- بيومها بالي يم معتصم مراسلني عرفته بغداد بس كمت اشك بي هههه كلت خاف نوبه عده شي هناك والله اموت قهر غير
ضليت افتر بالبيت وبالي مو صافي صار العصر مراسلني هم اني استحي اراسله حته لو جنت حبيبته
جنت اقرا امتحان حته بالي يم امتحان راح تركيزي الهم نعلك يا شيطان وره شوي دزلي مسج معتصم كاتبلي وينها حبيبه قلبي مشتاقلها اني كبل  رديت وينك وليش تاخرت..

معتصم:-  علكيفج حبيبتي ويضحك
كتله لتضحك معتصم اضوج
معتصم:-  فدوه اروح لليغار
اي اغار شنو مو من حقي
معتصم:-  يمه فدوه اي طلعي هل كلام حلو لتستحين مني
كتله مو بيدي هل شي
اوك حبيبي
زرت..

اي والله وتمنيتج وياي ان شاء الله  من نزوج اوديج نزور سويه
ان شاء الله كتله معتصم سؤال
كلي كولي حبي
انت مره كتبتلي عيناك تضيئان عتمتي
تدرين من اول ما صعدتي جنتي لابسه بوشيه منتبهت الج بس انتي رفعتيها شويه شويه وتهفين بوجهج بوكتها شفت عيونج كبار مرسومات تخبل وجهج احمر من بوشيه اختنكتي ضليت صافن وراها اختي خزرتني بس لاحضت عيونج بيهن حزن مو طبيعي ردت اعرف شنو سبب هل حزن اول مره اشوف بعيون واحد هيج شي..

اني ابتسمت كتله هيج عيوني عاجباتك
كلش مو شلون مجان
شكرا ويلا ارد اروح
اي انتي شردي من اتغزل بيج ما اعرف سوالفج يلا يجي يوم ونشوف هل غزل يضل هيج
عفيه كافي شنو هاي
ضحك كلي اوك حبيبي روحي اقري وديري بالج على نفسج كتله تمام حياتي وانت هم وعفته وضليت اقرا لان هوه امتحان بين يوم ويوم مو يوميه ضليت ادرس..

اجت عمتي حلا زياره بوكتها اجت مقهوره اني عفتها طبعا رجال اخذته زوجته ميته وعده جهال ٣ تربيهم بس لو شوفون شلون تعاملهم بكل حنيه تدرون شكد ضجت كلش من تجي جايبه وياها جهال رجلها وتعاملهم بكل امومه بوكتها اجتني القوه بعد كافي ضلم
كتلها عمه
حلا:-  خير ان شاء الله..

ايه:-  لييش هيج شسويتلج واذيتج اني بت اخوج اني اكلج عمي يتحرش بيه طلعتيني ساقطه شوفيني ابجي احتاج حنان ام نحرمت منها  واني عمري ٤ اشهر كلشي ما افتهم وفوك كل هذا نحرمت من حنان الاب ليييش علمود شنوو علمود نفسكم وبس
شسويت اني وهيج تعامليني جاوبيني يجوز اني مسويه شغلات بيكم  واني مادري..

حلا:-  اكلج ليش بس خاف تاثر  عليج اني شفت حياتي وعدي رجال وبيت بس راح اكلج شغله
ايه:-  كتلها كولي
حلا:-   انتي مو بتنا
ضحكت اني كتلها اي دوم اسمعج تكولين مو بتنا شنو جديد
ايه:-  كالت والله مو بتنا انتي...