قصص و روايات - قصص رومانسية :

رواية أسير عينيها الجزء الثالث للكاتبة دينا جمال الفصل السابع

رواية أسير عينيها الجزء الثالث للكاتبة دينا جمال الفصل السابع

رواية أسير عينيها الجزء الثالث للكاتبة دينا جمال الفصل السابع

نظرت له بتوسل ابنته الصغيرة الحمقاء ترجوه أن يعفو عن حماقتها، ولكن نظراته بقيت باردة خاوية جليدية سمعته يهتف ببرود شديد: أسامحك، لا معلش مش بالسهولة دي
انتي تعرفيني بقالك كام سنة أكتر واحدة عرفاني، ازاي تسلمي عقلك لكلام واحدة أنتي لسه شيفاها من دقايق ما تعرفيش هي كدابة ولا لاء ما فكرتيش دقيقة واحدة أنها ممكن تبقي كدابة ما فكرتيش تسأليني حتى كلامها صح ولا لاء.

فتحت فمها لترد ليجده يبارد ببروده المعتاد: لما تتعلمي تثقي فيا وما تسلميش ودانك لكل من هب ودب ساعتها هبقي اسامحك
وبدون كلمة اخري تركها وخرج من الغرفة وهي تقف تنظر له وهو يغادر بألم تهاوت على الفراش تنساب دموعها بعنف تشهق في بكاء عنيف ترثي طيبتها وسذاجتها المفرطة.

نزل لأسفل ليجد والدته تجلس مع اخته وزوجة اخيه يشاهدون التلفاز القي السلام ليوجه كلامه لوالدته يهتف بجد: أنا خارج يا أمي وهرجع متأخر ما تخليش لينا تستناني عشان ما تتعبش، عن اذنكوا
هتفت زينب سريعا: في رعاية الله يا حبيبى خلي بالك من نفسك، خرج واغلق الباب خلفه لتنظر لياسمين وتالا تهتف بغيظ: شيفين عمايلها منكدة على الواد ليل ونهار عاجبكوا كدة.

ياسمين: والله يا ماما لينا غلبانة أوي وخالد دايما جاي عليها وهي مستحملة وساكتة
زفرت بضيق لتهتف: أنا عارفة أنها غلبانة وطيبة بس دلوعة كدة، عاجبك يعني اخوكي بيتقال عليه مجنون بسببها
ياسمين: المرض النفسي مش جنان يا ماما.

نظرت زينب لها بضيق تلوي شفتيها بتهكم لتتركهم متجهه الي المطبخ لتنظر ياسمين لتالا تهتف على عجل: بقولك ايه تعالي نطلع نشوف لينا شكلها كدة متخانقة هي وخالد وأكيد دلوقتي هتلاقيها مهرية من العياط
هزت تالا رأسها ايجابا بلهفة لتصعد معها الي غرفة لينا.

حمقاء غبية ساذجة لن يسامحها ولن يكمل تلك الجلسات اللعينة كان فقط يذهب إليها لجل خاطرها، كيف بعد كل تلك السنوات لا تثق به.

ادار مقود السيارة منطلقا الي ذلك العنوان يفكر فيها كرهه كونها أصبحت مسيطرة على تفكيره طوال الوقت، اخذ نفسا عميقا ليوقف السيارة أسفل تلك العمارة السكينة ابتسم ساخرا لم يأتي لهنا منذ أعوام، نزل من سيارته يحمل حقيبة جلدية سوداء متجها الي أعلي وقف امام باب تلك الشقة لتعود به ذاكرته لذكري ذلك اليوم الذي عرف فيه خيانتها له، رفع يده يدق الباب عدة مرات بهدوء، ليمسع صوت الباب يفتح بعد لحظات، نظر للواقف أمامه بهدوء لتشخص عينيها بصدمة همست بفزع: خالد.

ابتسم ساخرا يهتف بتهكم: إزيك يا رحاب عاش من شافك
وقفت صامتة كأنها أصيبت بالخرس تنظر له بحقد غضب كره خوف استطاع رؤية كل تلك المشاعر العاصفة من نظرات عينيها الكارهه حمحم يهتف بخشونة: هفضل واقف على الباب كتير.

افسحت له المجال ليدخل الي المنزل ينظر حوله بهدوء ليجد ابيها جالسا على كرسي جوار الشرفة، حمحم ليلفت نظره، ليتلفت له اتسعت عينيه بدهشة ما أن رآه يهتف بحدة: أنت جاي هنا ليه وعايز مننا إيه امشي اخرج برة
فتح فمه ليتحدث ليجد رحاب تهتف ساخرة: استني يا بابا لما نشوف ايه سر الزيارة الغالية دي، تشرب ايه يا باشا
نظر لها بحدة ليهتف ببرود: صايم.

سمع صوت ضحكاتها الساخرة يرتفع ويعلو هتفت من بين ضحكاتها بتهكم: صايم، هي الدنيا جري فيها ايه من امتي والشيطان بيصوم
قطب جبينه بغضب ليهتف بحدة: رحااااب أنا مش عايز اغلط فيكي، لو جينا للحق ما فيش شيطان هنا غيرك، انتي السبب في كل اللي احنا فيه...
قاطعته تصرخ بغضب: أنا السبب، أنا اللي ضحكت عليك وعيتشك في وهم الحب وفي الآخر طلعت بتحب واحدة تانية وبتحبني بس عشان أنا شبهها...

صرخ هو الآخر بغضب ولكن هناك فارق فزمجرته هزت جدران البيت خوفا منه: ما تعشيش في دور الضحية، انتي وافقتي تتجوزيني عشان فلوسي وعشان تبقي حرم حضرة الضابط خالد باشا، عشان كنتي شيفاني بنك فلوس تسحبي منه وقت ما انتي عايزة وأنا ما اتأخرتش اديتك وبزيادة عايزة ايه تاني.

صرخت بجنون: كنت عايزة أحس انك بتحبني أنا مش هي شايفني أنا مش شايفها هي، بتاخدني أنا في حضنك مش بتاخدها هي، تحب اقولك انت غلطت كام مرة في اسمي ونادتني باسمها.

صفع الطاولة الخشبية التي أمامه بكفيه يهتف بحدة: دا مش مبرر يا هانم للخيانة، كان ممكن بمنتهي البساطة تطلبي مني اننا ننفصل، بس طمعك وجشعك صورلك أنك ممكن تضحكي عليا اهو بتستفيدي مني ما أنا بنك فلوس بقي وتفضلي مع ال، ما يستهالش اني أضيع صيامي لما اشتم واحد زيه
ضحكت بقوة لتهتف ساخرة: والله وبقيت شيخ يا خالد دا أنت ما كنتش بتسيب الكاس من ايدك، ولا صحيح عرفت ما هي الست لوليتا رجعت.

دس يديه في جيبي بنطاله يهتف بهدوء: انتي عايزة إيه يا رحاب من الآخر
هتفت بحدة: عايزة حقي وحق بنتي اللي ماتت بسببك.

اغمض عينيه بألم يكور قبضة يده يشد عليها حتى ابيضت مفاصله بدأ صدره يعلو ويهبط بسرعة حينما مر أمام عينيه تلك الذكري البشعة حينما رأي جثة ابنته، فتح عينيه ليرتجف جسدها فزعا عينيه حمراء كالدماء ينظر لها بغضب كفيل بحرقها في الحال زمجر بغضب: البنت ماتت بسببك انتي لو كنتي قولتيلي من الأول ما كنتش خليت اي حاجة في الدنيا تأذيها بنتي ماتت بسبب اهمالك وانانيتك، تعرفي لولا سما كان زماني مخلص عليكي من ساعة ما هي ماتت اللي مانعني عنك أنك أمها، عايزة كام يا رحاب.

نظرت له بغضب لتبتسم بشر: عايزة روح بنتك قصاد روح بنتي هاااا
شهقت بعنف حينما وجدته أمامها في لحظة يده تضعط على عنقها بعنف ليهرول والدها ناحيته يحاول ابعاده عنها يصرخ فيه، ليلقيها ارضا يهتف باشمئزاز: ما تستاهليش اوسخ ايدي بدم واحدة زيك، ابعدي عني يا رحاب احسنلك أنا لحد دلوقتي مش عايز آذيكي..

القي الحقيبة التي في يده على احد المقاعد: دول نص مليون جنية، أنا مش مديهملك عشان خايف منك انتي اتفه بكتير من أنك تهزي شعره مني اعتبريهم هدية مكافأة اي حاجة المهم مش عايز اشوف وشك تاني لا من بعيد ولا من قريب اظن واضح
اتجه الي خارج الشقة يسمع صوتها خلفه تصرخ بجنون: مش هسيبك يا خالد هحرق قلبك على بنتك زي ما حرقت قلبي على بنتي.

خلاص بقي يا لينا كفاية عياط يا حبيبتي هتموتي نفسك هتفت بها ياسمين بشفقة وهي تجلس جوار لينا على الفراش تربط على كتفها بحنو
همست بصوت مبحوح باكي: خالد زعل مني يا ياسمين، عشان أنا غبية صدقت اللي اسمها رحاب من غير ما افكر حتى
ياسمين بشفقة ؛ خلاص بقي يا لوليتا كلنا بنغلط وانتي عارفة أن خالد بيحبك ومش هيفضل زعلان منك كتير، سيبيه بس يومين تلاتة يهدي وهو بنفسه هيجي يصالحك.

اتسعت عينيها بذعر ؛ يومين تلاتة دا أنا امبارح كنت بموت عشان نايمة بعيد عنه، ما عرفتش أنام غير لما حسيت بيه جنبي وعملت نفسي هبلة الصبح ومش عارفة انه دخل الاوضة تقوليلي سيبيه يومين تلاتة
ابتسمت بمكر تهتف بخبث: طب أنا عندي ليكي حل كويس
اتسعت عينيها بترقب تهتف بلهفة: ايه قولي.

ياسمين بمكر: بصي يا ستي خالد وهو خارج قال لماما انه هيتأخر وتخليكي تفطري وما تستنهوش، المغرب فاضل عليه ساعة احنا نستني لبعد المغرب بحوالي كدة نص ساعة ونتصل بيه نقوله أنك تعبتي جامد من العياط وما رضتيش تفطري واغمي عليكي وقاطعة النفس وما بتفوقيش هو طبعا هيجي جري وهينسي حتى انه زعلان منك.

هتفت تالا بضيق: يا سلام يا اختي ولما يعرف أنها كانت بتضحك عليه هينفخها وهينفخك بلاش يا لينا لما يجي حاولي تتكلمي معاه وتعتذرليه
هتفت ياسمين ساخرة: وانتي تفتكري انه هيسامحها بسهولة كدة انتي ما تعرفيش يا ماما خالد لما يقلب
هتفت لينا بحزن: طب افرضي عرف اننا بنضحك عليه.

نظرت لها باهتمام تهتف بحماس: دا بقي يا حلوة يقف على جودة تمثيلك يعني تعملي مغمي عليكي اطول مدة ممكنه ولما يفوقك تعملي تعبانة ومفرهدة وبصوت ضعيف كدة ناعم تهمسي سامحيني يا خالد انا والله بحبك ومش قصدي ازعلك فهماني
بلعت لعابها بارتباك تهز رأسها ايجابا تهمس بقلق ؛ ربنا يستر
أخبرتها ياسمين بما عليها فعله وحفظته هي جيدا.

بعد أذان المغرب اخذت ياسمين بعض الطعام واخبرت والدتها انها ستفطر هي ولينا وتالا في غرفة لينا حتى لا يتركوها بمفردها
صعدت لغرفة لينا لتنظر لها هاتفه بحماس: جاهزة
هزت رأسها ايجابا تنظر لها بقلق لتخرج هاتفها تتصل بخالد
ياسمين: ايوة يا خالد
خالد: خير يا ياسمين.

هتفت بضيق: ابدا أنا كنت متصلة بيك عشان اشتكيلك من مراتك من ساعة ما خرجت وهي ما بطلتش عياط ومش راضية تفطر اديني هو حاطة الاكل قدامها وهي مش راضية تأكل
نظرت لتالا تخبرها بأن تتحدث ابعدت الهاتف عن اذنها تقربه من تالا قليلا التي بدأت تصيح بقلق: يالهوي الحقيني يا ياسمين لينا اغمي عليها
اتسعت عينيه بذعر ليهتف بحدة: الو ياسمين ردي عليا لينا مالها
ردت عليه تصيح بقلق: الحقنا يا خالد لينا قاطعة النفس خالص.

اغلق الخط في وجهها يضعط على دواسة البنزين يقود بجنون متجها اليها
ابتسمت ياسمين بانتصار: دا أنا عليا دماغ خالد جاي على هنا دقايق وهتلاقيه هنا
تالا بضيق: والله يا ياسمين انتي اللي هتجبيلنا التهزيق
بينما كانت تنظر لهم بقلق ليسمع ثلاثتهن صوت سيارته وهي تقف بعنف في حديقة المنزل لتهتف ياسمين بلهفة ؛ خالد جه بسرعة اعملي نفسك مغمي عليكي وانتي يا تالا هاتي ازازة البرفن دي.

في الأسفل فتح الباب ليتجه راكضا الي اعلي وسط دهشة كل من الأسفل يشعر بأن قلبه سيتوقف من الخوف، اقتحم الغرفة بعنف ليجدها مسطحة على الفراش بجوارها اخته تحمل كوب صغير به ماء ترش منه برفق على وجهها وتالا زوجة اخته تحمل زجاجة عطره تمررها أمام أنفها ولكن ما لفت نظره فعلا حركة تنفسها الغير منتظم وجنتيها الحمراء القانية رأي حركة أصابع يدها الخفيفة وهي تقبض على الغطاء فوقها.

ليهتف في نفسه بتوعد: يا ولاد الجزمة بتضحكوا عليا صبرك عليا يا اوزعة على الخضة اللي خضتهالي
اتجه الي داخل الغرفة يهتف بقلق: لوليتا مالك يا حبيبتي
قامت تالا ليجلس مكانها يربط على وجهها برفق يهتف بقلق برع في تمثيله: فوقي يا لوليتا، قومي يا حبيبتي، قومي يا روحي ومش هزعلك تاني، ياسمين خلي بالك منها على ما أجي
خرج من الغرفة بخطي سريعه متلهفة لتفتح عينيها تهمس بحذر: هو راح فين.

همست ياسمين بتعجب: مش عارفة والله، لتهدر بقلق: يا نهار ابيض ليكون راح يجيب دكتور
اتسعت عينيها بذعر تهمس بخوف: يا نهار أبيض منك لله يا ياسمين يا رتني ما سمعت كلامك
غاب لبضعه دقائق ليسمعوا صوت خطواته يقترب من الغرفة لتغلف لينا عينيها سريعا بينما هتفت ياسمين بتوتر: هو أنت كنت فين يا خالد!

جلس جوار لينا على الفراش يفتح تلك الحقيبة الصغيرة التي اشتراها يهتف بلهفة برع للغاية في تمثيلها: كنت في الصيدلية اللي جنبنا
اخرج ما في الحقيبة وبدأ في تجميعه لتتسع عيني ياسمين وتالا بقلق
هتفت ياسمين بقلق: هو إيه اللي في ايدك دا يا خالد
نظر لها بتهكم كأنها من كوكب آخر ليهتف ساخرا: بذمتك انتي شايفة ايه، حقنة! الدكتور بتاع الصيدلية قالي أنها هتفوقها على طول، تعالي يلا ساعديني.

انتفضت لينا واقفة على الفراش تنظر له بذعر لتصفع ياسمين خدها بصدمة
نظر للواقفة على الفراش تنظر له بخوف تحديدا لتلك الإبرة في يده بتوعد ليهتف ساخرا: لاء دا واضح أن الطب أتقدم جامد دا أنا لسه ما ادتهاش الحقنة حتى وقامت نطت
ابقوا فكروني ابعت رسالة شكر لصاحب المصنع الأدوية
بلعت ريقها بذعر تنظر لياسمين علها تنجدها من تلك الورطة التي وضعتها فيها، لتسمعه يهتف بتوعد: ما بتصيش لياسمين دي لسه دورها جاي.

نظر ناحية ياسمين وتالا يهتف بحدة: انتوا الاتنين برة وحسابكوا معايا بعدين
فتحت ياسمين فمها محاولة الدفاع عن تلك المسكينة ليصرخ فيها غاضبا: أنا مش قولت برة، يلا برة
انتفضت الفتاتين ليهرولان من الغرفة سريعا بينما ذهب ناحية هو ناحية باب الغرفة واغلقه جيدا بالمفتاح.

التفت لها ينظر لها بغضب ليخلع سترته يلقيها على أحد المقاعد ومن ثم شمر عن ساعديه لتظهر عضلات يديه وعروقه النافرة ليرتجف جسدها ذعرا، ضمت ذراعيها لصدرها تنظر له بخوف همست بتلجلج: أنا آسفة
اشار بسبابته الي الفراش ليهتف بحزم: اقعدي.

هزت رأسها ايجابا سريعا بخوف لتجلس على الفراش تقدم ناحيتها الي ان جلس امامها لاحظ أنها لا تنظر إليه بل تنظر لتلك الإبرة التي وضعها على المنضدة الصغيرة جوار الفراش بخوف ليبتسم في نفسه على طفولتها حمحم بحدة لتلتفت له اخفضت رأسها بخزي تهمس بخوف: أنا آسفة أنا والله كنت عايزة اصالحك ما كنتش عارفة اعمل ايه، ياسمين هي اللي قالتلي اعمل تعبانة ومغمي عليا فأنت هتنسي أنك زعلان، أنا ما مش عيزاك تزعل مني.

رفع وجهها بأصابعه ينظر لعينيها الحمراء بحزن ليهمس بعتاب: انتي عارفة أنا زعلان منك ليه
انسابت دموعها رغما عنها تهمس بندم ؛ انا آسفة سامحني أنا عارفة أن أنا غبية، بس أنا ما بستحملش اشوف حد بيعيط قلبي بيوجعني أوي، انا عارفة اني ساذجة وهبلة بس والله دي طبيعتي إنت عارف لو شوفت واحدة قدامي بتعيط وهي بتشتم فيا هكره نفسي أوي حتى لو أنا ما عرفهاش اصلا ولا عمري عملتلها حاجة.

ابتسم رغما عنه ليأخذها بين ذراعيه يسرح شعرها بأصابعه يهمس بحنو: انتي طيبة وبريئة واللي زيك في الدنيا ما بقوش موجودين خلاص، أنا بس عايزك تثقي فيا أكتر من كدة
هتفت سريعا: أنا والله بثق فيك جدا، سامحني والله غلطة ومش هتتكرر
أبعد رأسها عن صدره يمسح دموعها بإبهاميه ابتسم بحنان: خلاص يا ستي مش زعلان أنا اصلا ما بعرفش ازعل منك
ابتسمت باتساع لتهتف بحذر: طب ممكن اطلب منك طلب.

ختف بابتسامة حانية: بس كدة انتي تؤمري
فركت يديها بتوتر تهتف بارتباك: رمضان قرب يخلص وأنت ما خرجتنيش ولا يوم نفسي اروح الحسين وخان الخليلي والاماكن دي سمعت انها بتبقي جميلة خالص في رمضان عشان خاطري يا خالد
زفر بضيق: ضروري يعني
مدت يدها تداعب لحيته النامية تهمس بدلال: أنا قولتلك عشان خاطري شوف أنا ليا خاطر عندك ولا لاء
قرص وجنتها برفق: ماشي يا ستي روحي يلا البسي نروح نصلي التراويح واخرجك.

صرخت بحماس لتقبله على وجنته ومن ثم أسرعت الي دولاب ملابسها تخرج منه الملابس سريعا
بعد الانتهاء من صلاة التراويحوقف خالد بسيارته امام منزل والده
محمود: انتوا مش هتنزلوا ولا ايه
خالد مبتسما: لاء يا حج معلش اصل ست لوليتا عايزة تتفسح
محمود مبتسما: ماشي يا سيدي خلي بالك منها
خالد مبتسما: في عينيا يا حج
نزل محمود وزينب من السيارة فادار السيارة وانطلق الي الحسين
خالد: انتي يا اوزعة تعالي اقعدي جنبي.

رفعت رأسها بغرور مصطنع تهتف بترفع: سوق يا سواق وانت ساكت
رفع حاجبيه بدهشة يهتف بذهول: لا يا شيخة بقي كدة، مااااااااشي
ترك مقود القيادة والتف برأسه اليها، لتسع عينيها خوفا تصرخ بفزع: أنت بتعمل ايه انت اتجننت امسك الدريكسيون يا خالد هنتقلب عااااااا
ابتسم بثقة: هتيجي تقعدي جنبي مش كدة
هزت رأسها ايجابا سريعا: طبعا طبعا!

جلست بجانبه تنظر له بغيظ بين الحين والآخر من تصرفاته المجنونة التي ستودي بهما الي الهلاك
وصلت السيارة الي الحسين نزلا منها ليغلق السيارة ومن ثم أخذها وبدآ وهي تنظر حولها بسعادة تفيض من نظراتها لتهتف بسعادة: الله المكان هنا جميل أوي، بس انت ليه ما رضتش ناخد لوليتا معانا
خالد: المكان هنا زحمة جدا وخصوصا في رمضان وأنا مش عايزها تتخبط ولا تعيا من الهوا.

هزت رأسها إيجابا امسك يدها وسار معا وهي تنظر حولها بانبهار كالاطفال حتى وصل بها أمام احد المطاعم يبتسم بخبث: وصلنا
نظرت الي ما يشير لتجده محل غريب الشكل
لينا باستفهام: ايه دا ايه المحل الغريب دا
خالد: دا احسن مصمت في الحسين
عقدت جبينها بتعجب: يعني ايه مصمت دي!
خالد: تعالي وهتشوفي.

دخل بصحبتها ليجد صاحب المحل يهرول ناحيتهم يهلل بصوت عالي: يا اهلا يا اهلا يا باشا احسن ترابيزة للباشا فينك يا باشا بقالنا كتير ما بنشوفش جنابك وحشتنا والله يا باشا
خالد: متشكر يا مرعي بقولك أنا عايزك تظبطلي اكلة محترمة، ما تكسفوناش قدام العروسة
مرعي: يا ألف مبروك يا باشا عنينا يا باشا
جلس خالد ومعه لينا على احدي الطاولات الخشبية.

هتفت باشمئزاز: خالد ايه المكان الغريب دا وايه الريحة دي وبعدين أنت جيت هنا قبل كدة الراجل عارفك
خالد: يااااه دا أنا جيت هنا يجي خمسين مرة بقولك دا احسن مصمت في الحسين
جاء النادل وبدأ يضع الكثير من الاطباق على الطاولة
مرعي: تؤمرني بحاجة تانية يا باشا
خالد: فين الوسكي يا مرعي
مرعي: موصيلك عليك يا باشا دقيقتين ويبقي قدامك أنا عارف ان سيداتك ما بتحبوش حامي
رحل النادل فنظر خالد للينا التي تنظر للأكل باندهاش.

خالد ضاحكا: بتبصي للأكل كدة ليه
اشارت الي احد الأطباق تهتف بهدوء: طب دي كوارع أنا عرفاها عشان دبستني اعملها قبل كدة ايه بقي الحاجات دي
بدأ خالد يشير على الاطباق ويعرفها بهم: دا يا ستي شوربة كوارع ودا طاجن عكاوي ودا ممبار ودي فتة بالموزة ودي كبدة وحلويات ودي لحمة رأس
جاء الرجل يهتف: الوسكي يا باشا
وضع الرجل كوبين كبيرين بهما مادة حمراء اللون
مرعي: تؤمر بحاجة تانية يا باشا
خالد: توشكر يا مرعي.

مرعي: طب اتكل انا، بالهنا والشفا يا باشا
نظر لها يهتف بهدوء: كلي يلا
لينا: خالد أنا أول مرة اسمع عن الأكل دا
خالد مبتسما: هيعجبك، يلا بقي كلي
مدت طبقها له: طب حطلي على ذوقك
وضع لها بعض الطعام
لتهتف باشمئزاز: يييييي ايه البتاعة دي
خالد ضاحكا: دي لحمة رأس
لينا باشمئزاز: لاء شكرا مش عايزة كل انت
خالد: يا بنتي دوقي بس وهيعجبك
لينا: صحيح أنت ازاي تشرب wine وفي رمضان كمان.

خالد ضاحكا: حبيبتي دا مش wine أنا بطلت من زمان
لينا: اومال ايه دا
خالد ضاحكا: دا زي ما سمعتي ويسكي بلدي ماية طرشي
رفعت كوبها وشربت منه القليل ليرتجف جسدها منه: مزز اوي
اكمل خالد طعامه ولينا تحاول أن تأكل من هذه الطعام الغريب بالنسبة لها
خالد: الحساب يا مرعي
جاء النادل ومعه الحساب
دفع خالد الحساب ومعه بقشيش كبير
ثم اخذ لينا ورحل
هتف بزهو: يا سلام اكله ترم بصحيح.

ابتسمت ابتسامة صفراء: أكل جميل فعلا يوم ما تخرجني تجبني المكان الغريب دا
خالد ضاحكا: خلاص تعالي هوريكي الحسين وخان الخليلي على اصولهم
بدأ يتجول معها ويريها الاماكن الاثرية ويشرح لها ما يعرف عنها، واشتري لها العديد من التذكارات لم يغضب حين طلبت برجاء أن ترتدي الزي الفلاحي او الاسكندارني للتصور بهم، ولكنه اشترط أن يكونوا فوق ملابسها.

تضايق كثيرا عندما اردات رسمه تلك الحنة على يديها ولكنه وافق في النهاية أمام رجائها الطفولي الذي يضعف مقاومته هتف بابتسامة صغيرة: مبسوطة
لينا بسعادة: اوي اوي اوي، ربنا يخليك ليا يا رب
اتجه معها الي احد المقاهي ليهتف: تعالي يلا ندخل تشرب حاجة.

ما إن دخلا حتى اتسعت عيني لينا بدهشة رفعت أصبعها تشير الي احدي الطاولات تهتف بتعجب: خالد بص مين هناك دي تمارا بنت عمو يوسف ودا الظابط علاء اللي أنت ضربته آخر يوم في المعسكر، هما بيعملوا إيه مع بعض!

الفصل التالي
جميع الفصول
روايات الكاتب
روايات مشابهة