حكايات منار الحكاية 16 بعنوان حلالي
بيقولو ان الجنة تحت اقدام الامهات
بس فى حالتى انا الجنة هتكون تحت رجلين مرات ابويا
وامى بالنسبالى هى الجحيم
انا فيروز عندى واحد وعشرين سنة كلية علوم
ابويا فضل سنين كتير مش عايز يتجوز شايف انه لسه بدرى ولما فاق من وهم ان لسه بدرى وانه مش محتاج ست في حياته ده كان بقي عنده تلاته وتلاتين سنة
ساعتها اتجوز امى هو اتجوزها علشان حلوة وهى اتجوزته علشان ماديا كويس ومفرقش معاها انه اكبر منها بتلتاشر سنة بعد سنة من جوازهم خلفونى
امى مكنتش عايزة تبقي ام ولا زوجة هى كانت عايزة تعيش حياتها لبس خروج شوبينج كتير وبس
وأبويا كان متحمل علشانى ويمكن كان بيحبها
بس الصراحة هى متتحبش هى جميلة من بره انما من جوه قبيحة وحشة بجد
لما بقي عندى ست سنين امى مرضيتش تخلف فيهم تانى غيرى علشان جسمها ميبوظش وعلشان متتلهيش في تربية اطفال قال يعنى هى كانت بتهتم بيا او تعرف عنى حاجة المهم امى هربت مع واحد
حتى مطلقتش من بابا سافرت معاه اليونان هربت من بابا ومنى ومن اهلها بابا طلقها غيابى
وانا لما بقي عندى سبع سنين بقالي ام واخيرا
بابا اتجوز تانى بس المرة دى اختار صح ماما زينب
هى الأم الوحيدة اللي عرفتها في حياتى
انا مليش ومعرفش ام غيرها
قبل بابا هى كانت متجوزة وجوزها مكنش بيخلف صبرت عليه خمس سنين لحد ما خلفو
خلفت منه ولد وسموه فادى ولما فادى بقي عنده اربعتاشر سنة والده مات
بابا كان يعرف جوزها كان من عيلته من الفرع الفقير في عيلته
بابا بعد موته عرض عليها فلوس اكتر من مرة ومع انها كانت محتاجة الفلوس دى الا انها كانت بترفض بكل عزة نفس
لما ضاقت عليها اوى طلبت من بابا يشوفلها شغل ساعتها بابا طلب ايديها للجواز
بابا كان محتاج ام علشانى وشاف فيها انسانة مناسبة وعرف انه يقدر يامنها علي اسمه
وبعد ما اتجوزها عرف انه مش بس كان محتاج ام علشانى
هو كمان كان محتاج زوجة ليه عرف معاها ان عمره ما كان متجوز لأن امى مكنتش زوجة ليه
ده اللي عرفه مع ماما زينب من معاملتها ليه وليا
بابا كمان بقي اب لفادى
انا قلت لماما زينب ماما بعد اقل من شهر بعد متجوزت بابا وفادى فضل سنة بس بعدها قال لبابا يا بابا
وعشنا سوا احنا الأربعة وبعد جوازهم باربع سنين خلفو ملك وبعدها بتلت سنين خلفو احمد
وبقا عندى تلت اخوات فادى وملك واحمد
طول ما فادى في البيت انا بكون لابسة حجابى ماما زينب هى اللى عودتنى علي كده
لما كبرنا فادى قال لبابا انه ممكن يعيش بره مع اصحابه بس بابا رفض وقاله ان ده بيته
وكمان بابا بيسافر كتير هيبقي البيت من غير راجل لما يسافر وقال لفادى انه ابنه وانه بيثق فيه اكتر ما بيثق في نفسه وفضل فادى عايش معانا
انا وفادى اخوات واصحاب هو يعتبر اقرب انسان ليا في الدنيا
دايما بيشجعنى ويقوينى ويطمنى
في امتحانات الثانوية العامة كان بيجى يستنى قدام اللجنة لحد ما اخلص الامتحان
صحابي كان بيبقي معاهم امهاتهم وانا كان بيبقي معايا فادى
لما نتيجتى ظهرت فادى علشان يفرحنى بمجموعى لانى كنت مضايقة منه خلانا نعمل احتفال في البيت وجابلي سلسلة هدية وشيكولاتة كتييييير
اول يوم في الجامعة اصر يجى معايا
حاولت اقنعه ان ملوش لازمة بس هو اصر
واول يوم في امتحاناتى دايما بيجى معايا
وقبل اي امتحان دايما بيقولي انى هحل كويس وان هدية نجاحى هو جايبها من قبل ما امتحن اصلا لانه واثق من نجاحى ثقته فيا كانت بتخلينى اثق في نفسي وكلامه بيطمنى
انا مبعرفش اعمل اي حاجة في حياتى من غير فادى
حتى هدومى بيجى معايا وانا بجيبها ونختار سوا
وبعد كده نروح نجيبله هو هدوم وبرضه بنختار سوا
عمرى مطلعت رحلة في المدرسة ولا حتى في الكلية
فادى كان بيشوف الرحلة هتروح فين ويودينى هو
او نروح انا وهو ماما وبابا واخواتنا
عمرى ما بيت ليله واحدة بره البيت
ولما ببقي رايحة مثلا عند عمتى فادى بيودينى ويجبنى
ولو طلبت ابات معاها بابا بيوافق بس فادى مكنش بيسبنى اعملها
فادى:يا فيرو اجى اخدك ولا ايه الوقت اتاخر
فيروز:فادى بنات عمتى ماسكين فيا ابات متيجى تاخدنى بكرة
فادى:كفاية طول اليوم معاهم يا فيروز
فيروز:يا فادى هى ليلة واحدة سواد اليل بس والصبح هكون في البيت
فادى:ماشى براحتك
فيروز:موافق بجد
فادى:اه بس كده هيفوتك الفيلم الجديد بتاع شاروخان انا جبته وجبت شيبسى وحاجات ساقعة وشيكولاتات
فيروز:شيكولاتات كتير
فادى:شيكولاتات كتير جدااااا
بس خلاص بقي انا هروح اتفرج عليه واكلهم وانتى بكرة ابقي اتفرجى عليه بعد ما تيجى من عند عمتك
فيروز:قدامك نص ساعة تيجى تاخدنى
فادى:طيب وبنات عمتك اللي ماسكين فيكى
فيروز:بنات عمتى مين انت بتقول فيلم شاروخان وشيكولاتات كتير فادى أنجز يلا
فادى وهو بيضحك:بعتيهم في ثانية انزلي طيب انا تحت البيت
بعد خمس دقايق
فيروز:انت كنت عارف انى هوافق فبتكلمنى وانت تحت البيت افرض كنت رفضت
فادى:لا انا عارف انك مش هتقدرى تقاومى
يومك كان عامل ازاى
فيروز:ولا اي حاجة قعدت مع بنات عمتى نرغى واتغدينا وبعد رجعنا نرغى تانى وكنا هنبات سوا علشان نكمل رغى
فادى:ايه ده بترغو بس معندكوش حاجة تانية تعملوها
طيب وزفت الطين ابن عمتك كان فين
فيروز:طارق جه عالغدا وقعد معانا شوية وبعدين نزل علشان يشوف صحابه
كمان انت مش ناوى تقول اسمه صح بقي
يا خوفي ليسمعك مرة وانت بتقول زفت الطين دى
فادى:ميسمعنى وانا هخاف منه ولا ايه
فيروز:اموت واعرف مبتطيقهوش ليه مع انه معملكش حاجة
فادى:وهو يقدر اصلا بس هو كده انا مبطيقهوش مبينزليش من زور مجرد مبشوفه بحس انى عايز العب في وشه اكس اوو
فيروز باستفهام:تلعب في وشه اكس اوو ازاي يعنى
فادى وهو بيضحك:يعنى اشوهله منظره يا فيرو اشلفطله خلقته
فيروز:والله حرام عليك ده طارق طيب ولطيف جدا
فادى:وانتى عرفتى منين ان شاء الله انه طيب ولطيف
فيروز:الله مش ابن عمتى واكيد اعرفه
فادى:انت بتتكلمى معاه
فيروز:اه لما بشوفه
فادى:بتتكلمو كتير
فيروز:مش اوى
فادى:بتتكلمو في ايه
فيروز:عادي يا فادى عن دراستى وشغله بنهزر احنا واخواته حاجات عادية يعنى
فادى:انتو اصحاب يعنى
فيروز:لا مش لدرجة صحاب بس هو ابن عمتى
فادى:يعنى مثلا لو اتقدملك توافقي عليه
فيروز:لا طارق بعيد اوى عن الانسان اللي انا ممكن ارتبط بيه
كمان اساسا هو بيحب واحدة جارتهم
فادى:عرفتى منين هو حكالك
فيروز:لا طبعا قلتلك اننا مش صحاب علشان يحكيلي حاجة خاصة زى دى
بس عرفت من اخواته
فادى: بيحبها بيحبها يعنى وهيتقدم ولا بيضيع وقت وخلاص
فيروز:طارق محترم وملوش في كده
فادى:وانتى ايش عرفك انتى انه محترم
فيروز:علشان عمره محاول يتعدى حدوده معايا
فادى:طيب كان يحاول يتعداها علشان اعدى عليه تسع مرات انا بعربيتى
فيروز وهى بتضحك:وانت مسمى البطة البلدى بتاعتك دى عربية
فادى:اه عربيتى وبحبها كمان
فيروز:حبها براحتك يا عم يا رب نوصل بس انا حسا ان النهار هيطلع واحنا لسه موصلناش
فادى:برضه مقولتيش زفت الطين ده واخد الموضوع جد ولا لأ
فيروز:لا واخده جد حتى فاتح عمتى في الموضوع وهى رفضت بس هو بيقنعها ومتمسك بالبنت جدا
فادى:رفضت ليه عمتك انا قلبي مش مطمن
فيروز:معرفش يا فادى ميخصناش واحنا مالنا
فادى:اتمنى يكون ميخصناش يا فيروز اتمنى
فيروز:اخيرا وصلنا بتقفل ايه خايف عليها من ايه
دى متتسرقش دى يتسابلك جمبها فلوس يا فادى
فادى:ها ها ها لا خفيفة اوى يا بت
فيروز:طبعا هو انا في حد في خفة دمى
المهم شغل الفيلم بقي لحسن انا هموت واشوفه
فادى:بعد الشر خلاص هشغله اهو
بعد شهر
فيروز:انت بتعمل ايه
فادى:بدور عالجبنة جعان وعايز اكل
فيروز:جعان الساعة واحدة بالليل
فادى:اه جعان هو الجوع بمواعيد ولا ايه
فيروز:وسع طيب اجبلك انا الجبنة
فادى:مش فاهم ايه كل الأنواع اللي ماما بتجيبها دى
حاسس انى فاتح تلاجة سوبر ماركت مش تلاجة بيتنا
فيروز:وانت دونا عن كل الأنواع دى بتحب الجبنة التلاجة
مش الرومى مثلا ولا الاسطمبولى زيى
فادى:اعمليلي سندويتشات جعان بجد
فيروز:اسمها اعمللنا
فادى:ليه هو انتى كفالله الشر جعانة الساعة واحدة بالليل
فيروز:اه جعانة هو الجوع بمواعيد ولا ايه
فادى:مقولنا كده معجبش المهم انك لقيتيها انا مبحسش ان بقية الانواع دى جبن اصلا كلهم عندى زى بعض لا ليهم طعم ولا شكل
فيروز:والجبنة التلاجة هى الملكة المتوجة على عرش الجبن صح دى اللي ليها طعم ولما انت بتحبها كده مبتعرفهاش ليه من بين كل الانواع يا عاشق الجبنة التلاجة انت
فادى:علشان تيجى انتى وتجبيهالي
انا مش محتاج اعرفها كفاية انتى بتعرفيها وبتجبيهالى
فيروز:وبعملك السندويتشات كمان وهقوم اعمل الشاى اهو متنساش ومتنكرش مجهوداتى العظيمة في حياتك
فادى:لا من ناحية عظيمة فهى عظيمة يا فيرو ده انتى بابا وانتى ماما وانتى انور وجدى
فيروز:يعنى ايه
فادى وهو بيضحك:هو المفروض انه افيه بس بما انك مفهمتيهوش فبقي ولا حاجة وشكلي بقي مسخرة
مش عارف اودى جمايلك عليا فين
فيروز:ها ها ها اضحك ولا ابين سنانى
ما انت اللي بتقول حاجات مش مفهومة يا فادى
فادى:لا انتى اللي جاهلة يا فيرو ده انتى بتسالي علي معنى نص كلامى وحاجة اخر حلاوة
فيروز:الله مش اخويا ولازم اسأله امال أسأل مين يعنى
فادى:روحى اعمليلى شاى
فيروز:ما الشاى في ايدك يبنى سلامة نظرك
فادى:ها... خلاص روحى اعمليلي نسكافية
فيروز:والشاى
فادى:مبقتش عايزه روحى اعمليلى نسكافيه بقي
فيروز:اسمها اعمللنا هفضل اعلم فيك لحد امتى
فادى:مش هتشربى الشاى
فيروز:مدام انت مش هتشربه يبقي انا كمان مش هشربه انا معاك في اى حاجة يا كبير
فادى بابتسامة:تسلميلي يا فيرو طيب يلا اعملي النسكافية بسرعة قصدى اعمللنا حلو كده
فيروز:حلو جدا هعمله وارجعلك
بعد عشر دقايق
فيروز:اللي واخد عقلك
فادى:النجوم شكلها حلو اوى والسما جميلة والقمر فيها بدر منظر يجنن بجد سحر
فيروز:ويحسس الواحد انه بيحب وعايز يقول بحبك ان شالله لعابر سبيل حتى
بس معاك حق المنظر حلو فعلا الليل ليه سحره
انا كنت بحب انام بدرى بس بقيت زيك بحب السهر وبكره النوم بدرى
فادى:يعنى هو اي حاجة انا بحبها تحبيها
فيروز بابتسامة:اه طبعا
فادى:تمام يبقي انا بحبنى
فيروز:طب مانا بحبك يبنى
فادى:لا انا قصدى انى بحبنى ولو كنت بنت كنت اتجوزتنى
فيروز:انت بتهزر ولا قصدك اللي فهمته
فادى:لا مبهرزش
فيروز بتوتر:يعنى ..انت..يعنى انت..
فادى:يعنى انا بحبك وعايز اتجوزك يا فيروز
فيروز بصدمة:انت بتقول ايه مينفعش
فادى:ليه
فيروز:علشان احنا اخوات
فادى:لا احنا مش اخوات يا فيروز
لما احنا اخوات بتلبسي قدامى حجاب ليه طول الوقت
فيروز:علشان حرام اكون قدامك من غير حجاب
فادى:علشان احنا مش اخوات
فيروز:انا...انا مش هقدر مش هينفع احنا مننفعش لبعض
فادى بغضب:ليه يا فيروز ليه ربنا محرمكيش عليا تحرمى انتى نفسك عليا ليه
فيروز:يا فادى اهدى بس صدقنى مش هينفع
فادى:ليه
فيروز:علشان..اا
فادى:علشان انا مش من عيلة غنية زى والدك صح
عايزة حد احسن منى مش كده
فيروز:يا فادى والله الموضوع مش كده انا..
فادى قاطعها:خلاص مش عايز اسمع حاجة خلصت علي كده يا فيروز
ومشى دخل اوضته لم هدومه ومشى انا فضلت واقفة في البلكونة مش قادرة اروح امنعه مش عارفة اقوله ايه ولما شفته بيفتح باب الشقة من غير ميبصلي عينيا اتجمع فيها دموع ولما شفته من البلكونة بيركب عربيته وبيمشى فضلت اعيط انهارت في ارض البلكونة وفضلت اعيط لحد الصبح وبعدين قمت لبست ونزلت الكلية بدرى قبل ما ماما تصحى وتسالنى في ايه مكنتش هقدر اجاوبها معنديش حاجة اقولها رحت الكلية مدخلتش ولا محاضرة
فضلت قاعدة في مكان لوحدى بعيط ومش عارفة اعمل ايه ومش فاهمة ايه اللي هيحصل بعد كده وخايفة ارجع البيت مش متخيلة ارجع البيت وفادى مش فيه
بعد ست ساعات فضلت فيهم قاعدة في مكانى بحاول استوعب اللي حصل لقتنى مش مستوعبة قمت رجعت البيت واول حاجة عملتها دخلت اوضة فادى وانا نفسي الاقيه جواها قاعد او نايم او واقف في شباكها زى عوايده
انما لا فتحت لقيتها فاضية وهو مش فيها ودولابه مفتوح ومتاخد منه هدوم من بتوعه
ماما زينب جات لقتنى واقفة فيها
زينب:كلمنى النهاردة وقالي ان واحد صاحبه ابوه مات وهو هيروح يقعد معاه علشان ميقعدش لوحده مقالش اكتر من كده
فيروز وهى بتحاول تمسك نفسها علشان متعيطش:و...ومقالش هيرجع امتى
زينب:لا بس اكيد مش هيطول انتى عارفة فادى ميقدرش يبعد عن البيت ولا عننا مدة طويلة
مرديتش عليها ودخلت اوضتى وفضلت اعيط هيقدر يا ماما زينب المرة دى هيقدر وانا السبب
ومخرجتش من اوضتى يومها وفضلت اسبوع مبروحش الجامعة وبعدين رجعت اروح الجامعة تانى بس وانا حسا انى بجر رجلى جر خطوتى بقت تقيلة اوى
مبتكلمش مع حد خالص فى الجامعة ولا فى البيت
هما في البيت قالو ان ده اكيد بسبب بعد فادى عما عارفين انا متعلقة بيه ازاى ماما زينب كتير كانت بتقولي انه شوية كده وهيرجع بس انا كنت ببقي عايزة اقولها انه مش هيرجع لانه مش عايز يشوفنى تانى
بس كنت بسكت يمكن علشان معنديش حاجة اقولها ويمكن علشان كان نفسي اصدق انه هيرجع
بعد تلت اسابيع عرفت من ملك ان فادى جه وانا في الجامعة قعد معاهم شوية ومشى قبل ما اجى
مرديتش عليها دخلت اوضتى ولما البيت كله نام دخلت اوضته وفضلت اعيط
عدى شهر ونص مشفتوش فيهم ولا سمعت صوته
كان عندى امتحان اول امتحان في امتحانات اخر السنة
انا كنت مذاكرة كويس لانى اصلا مكنتش بعمل حاجة في يومى غير المذاكرة والعياط والنوم
بس ليلتها معرفتش انام فضلت احاول لحد الساعة سبعة الصبح ومعرفتش حسا انى هموت من الخوف والتوتر
لقتنى بكلم فادى مكنتش عارفة هيرد ولا لا بس انا كنت محتاجاه انا خايفة ومليش غيره يطمنى
رنيت وهو رد فورا
فادى بقلق:فيروز في ايه
فيروز:
فادى:فيروز حصل ايه
فيروز وهى بتعيط:انا اسفة انا عارفة انى مش المفروض اتصل وانك مش عايز تسمع صوتى بس..بس انا خايفة اوى يا فادى
فادى:اهدى ومتعيطيش وقوليلي في ايه
فيروز:عندى امتحان النهاردة
فادى:مش انتى مذاكرة كويس
فيروز:اه
فادى:يبقي خلاص تهدى وتطمنى مش باقى وقت كتير علي امتحانك وانتى طبعا منمتيش
فيروز:لا معرفتش انام
فادى:خلاص اقفلي معايا وروحى افطرى واعملي لنفسك قهوة دوبل علشان تفوقي
فيروز بصوت مخنوق:انت عايزنى اقفل
فادى:لا خلاص خشي المطبخ وانا معاكى عالتليفون
واعملي لنفسك سندويتشات جبنة تلاجة جربيها بقي بما انى بحبها وانا كمان هعمل زيك
فيروز:انا مباكلش غيرها بقالي شهر ونص
انت بقيت بتعرف تجبها
فادى:لا بروح السوبر ماركت واخليه البياع يجبهالي هو اكيد خبرته واسعة عنى في عالم الجبنة
فيروز وهى بتضحك:كأنك ببتكلم عن حاجة مهمة مش سندويتش جبنة
فادى:انتى مستقليه بيها يبنتى ده انا بفطر بيها وبتعشى كمان
فيروز بنبرة حزينة:ومبقتش محتاجنى اجبهالك
فادى:اعملى القهوة يلا وشوفي هتلبسي ايه
وبلاش بنى انا عارف بتلبسيه وانتى مضايقة متفوليش علي نفسك الله يباركلك
فيروز وهى بتضحك:كنت هلبس هدوم لونها بنى فعلا
بس خلاص البس ايه طيب
فادى:الوان الدنيا كتير البسي ابيض بمبى ازرق رمادى حتى
انما بنى بلاش انتى بتكرهى اللون ده اصلا
وجايبة هدومك البنى دى تعذبى نفسك بيها
فيروز:ما هو لون ميتحبش كئيب ورخم وقفيل
فادى:خلاص شوفى لون حلو ومش رخم البسيه
فيروز:هلبس ازرق انا عارفة انك بتحبه
فادى:
فيروز:فادى انت نمت ولا ايه
فادى:لا معاكى البسي وكلمينى وانتى نازلة
فيروز بخوف:هترد عليا
فادى:هرد يا فيروز هرد يلا بقي علشان متتاخريش
ولبست وكلمته وفضلت بكلمه لحد ما جيت داخلة اللجنة
فادى عنده قدرة غير عادية انه يطمنى انا بيتهيالي لو الدنيا بتولع حواليا وفادى معايا ولا هيهمنى هطمن ومش هخاف ومن غيره الدنيا تخوف حتى لو مبيحصلش فيها حاجة تخوف انا بحس انى خايفة ووحيدة من غيره حتى لو كنت وسط كل الناس بس هو مش موجود
المهم خلصت الامتحان وكنت عايزة اكلمه بس مكنتش عارفة هيرد ولا لا وحتى مش عارفة من حقي اكلمه ولا لا
خرجت لقيته مستنينى قدام باب الجامعة
رحت عنده جرى وانا مبسوطة
فيروز بابتسامة شديدة:انت بتعمل ايه هنا
فادى:ايه مضايقة امشي
فيروز:لا تمشي ايه احنا هنهزر ده انا مصدقت تيجى
فادى:طيب يلا علشان اوصلك
فيروز:يلا
وركبت وفضلت بصاله وبس بجد كان وحشنى اوى
فضلت خمس دقايق بصاله وهو مركز مع الطريق وفجأة لقتنى بعيط بصوت عالي فادى وقف العربية بسرعة
فادى:فيروز فيه ايه اهدى خلاص والله متقلقيش انتى حليتى كويس انا متأكد
فيروز وهى بتعيط:انت وحشتنى اوى انت عملت فيا كده ليه يا فادى انا ذنبي ايه انت كدبت عليا
فادى بصدمة:انا كدبت عليكى في ايه
فيروز:قولتلي عمرى مهبعد قولتلي هفضل جنبك
لما كنت بقولك متعودنيش علي وجودك في حياتى بالشكل ده كنت دايما بتقولى لا اتعودى لانى هفضل موجود
وفي الاخر سبتنى لوحدى مش عارفة اعمل ايه من غيرك
فادى:انا مكدبتش عليكى يا فيروز
فيروز بصوت عالي:لا كدبت وبعدت وفضلت شهر ونص مبتشوفنيش ومتعرفش عنى حاجة
فادى بصوت عالي:لا مكدبتش مين قالك انى مكنتش بشوفك مين قالك انى معرفش عنك حاجة
اخبارك كلها عندى وانا حتى معرفش كام مرة اجى واشوفك من بعيد لبعيد من كترهم بطلت اعد
انا مش عايز ابعد يا فيروز انتى اللي مش عايزة تكونى معايا انا اللي مش مالي عينك انا اللي مش عاجبك اصله
ورغم انى عارف كل ده مجرد محتاجتينى جتلك دوست علي كرامتى وعلي قلبى وجتلك
فيروز:مين قالك انى مستقلية بيك
انت احسن واحد في الدنيا يا فادى وتستاهل احسن واحدة في الدنيا بس انا مش احسن واحدة في الدنيا
فادى:يعنى ايه
فيروز وهى بتعيط:يعنى انت مش خايف اعمل فيك زى ما امى عملت في ابويا مش خايف اهرب واسيبك انت وولادنا مش خايف اطلع زيها
انا خايفة اكون زيها يا فادى
فادى:امك مين
فيروز:امى صفية
فادى:لا انتى امك اسمها زينب اللي ربتك اللي عشتى معاها عمرك كله انما صفية دى انا معرفهاش اصلا ولا انتى تعرفيها علشان أخاف تطلعيلها
انا وانتى اللي ربانا ماما زينب وبابا عبدالرحمن اللي عشت معاه اكتر ما عشت مع ابويا الله يرحمه
احنا الاتنين نفس التربية ونفس الاخلاق يا فيروز
وانا متمناش غيرك مراتى وشايلة اسمى ولا هلاقي لولادى ام احسن منك فى الدنيا كلها
ثم انتى ازاى متكلمنيش في مخاوفك دى قبل كده
فيروز:مقدرتش احنا اخوا...
فادى:وحياة ربنا لو قولتى احنا اخوات دى تانى لكون قاطع لسانك وعامل عليه سلطة
فيروز:صحاب احنا اصحاب يا فادى حلو كده
فادى:اه دى اهون همشيها صحاب
فيروز:بس مقدرتش اتكلم معاك ولا مع اي حد
كمان ما يمكن انتى بتحبنى علشان متعرفش غيرى
فادى:انتى هبلة يا فيروز
ودفعتى في الجامعة وزميلاتى في الشغل وجيرانا وقرايبنا
انا اعرف غيرك بس مش شايف غيرك ولا عايز غيرك
لما حاولت اركز مع حد غيرك لقتنى مركز في عيوبهم اللي مش فيكى ولو خدت بالى من مميزات مبحسش ان ده فارق معايا فى حاجة كأنه ميخصنيش هما نفسهم ميخصونيش انتى وبس اللي تخصينى
فيروز بخوف:وده ...يعنى...مت...متغيرش دلوقتى بعد اللي عملته
فادى:لا مع انى حاولت بس اللي اتبنى جوايا في سنين مقدرتش اهده في شهر ونص
انا كمان مكنتش عارف اعمل ايه في بعدك
مكنتش عارف انا بعاقبك ولا بعاقب نفسي
انا بحبك يا فيروز وعمرى مشوفتك ولا عمرى هشوفك اختى
اختى ايه بس وانتى بتختارى معايا كل حاجة حتى جراب موبايلي وتعرفي عنى كل اسرارى وانا كمان كده ليكى
تفتكرى ينفع غيرك تعملي كل ده
فيروز:لا
فادى:طيب تفتكرى ينفع غيرى يعملك كل ده
فيروز:لا
فادى:ولما هو لا ياللي يجيلك ويحط عليكى يبقي رافضة ليه ومقضياها احنا زفت علي دماغك
فيروز:يعنى ايه يجيلك ويحط عليكى دى انا حسا انها حاجة وحشة انتى بتدعى عليا
فادى وهو بيضحك:طيب والله وحشتينى ووحشتنى اسئلتك اللي بتفصلنى دى
لا يا ستى انا قصدى يجيلك كل حاجة حلوة ويحط عليكى كل شئ جميل
فيروز بشك:مش عارفة حساك بتشتغلنى
فادى:وانا اقدر برضه
المهم وصلنا
فيروز:هو..انت مش هتنزل معايا
فادى:انتى عايزانى انزل معاكى
فيروز:طبعا ده سؤال برضه
فادى بخبث:انزل علي اساس انى اخوكى وكده
فيروز:لا انا معنديش اخوات غير ملك واحمد اصلا
فادى وهو بيضحك: ايوه كده برافو يا فيرو
فيروز:
فادى:ساكتة ليه
فيروز وهى بتعيط:وحشتنى فيرو منك وانت وحشتنى حتى البطة البلدى اللي انت راكبها ومفكرها عربية دى وحشتنى
فادى:بطلى عياط ومتغلطيش في الليموزين بتاعتى
كمان وحشاكى كل الحاجات دى بإيدك تخليها بتاعتك ومتبعديش عنها
فيروز:ولا هى تبعد عنى
فادى:والله يا فيروز هى لا تقدر ولا عايزة من اصله تبعد عنك
فيروز:ولا انا
فادى:ولا انتى ايه
فيروز:ولا انا اقدر ولا عايزة ابعد عنك انا بحبك يا فادى
فادى بصدمة:قولتى ايه
فيروز:قولت ابويا اللي هو في نفس الوقت ابوك فوق مش عايزة تقوله حاجة ولا هنقضيها نحنحة
فادى وهو بيضحك:اسيبك شهر ونص ارجع الاقيكى بيئة كده
فيروز:من بعض ما عندكم
المهم هتكلمه ولا اغير رايي وارجع لاسطوانة احنا اخوات تانى
فادى:ترجعي ايه ده بموتك لو سمعت منك كلمة فيها حرف الخاه او التاه تانى
فيروز وهى بتضحك:اسيبك شهر ونص ارجع الاقيك عربجى كده
طيب علي الاقل في الاول جر ناعم علشان اوافق طيب وبعدين اعمل ما بدالك
فادى:انا طول عمرى عربجى
كمان انا هعمل ما بدالي ومن دلوقتي ومش محتاج اجر ناعم انتى هتوافقي هتوافقي يا فيرو ده احنا هنقولك علي ميعاد الخطوبة من باب العلم بالشئ مش اكتر
انما الخطوبة والجواز تحصيل حاصل علشان يكون في معلومك يعنى
فيروز:وانا موافقة
فادى وهو بيطلع بسرعة:وانا طالع اطلب ايدك من بابا
فيروز وهى بتضحك:طيب استنانى يا مجنون انت
فادى يومها طلب ايدى من بابا وبابا بالليل جالي اوضتى وفاتحنى في الموضوع وقالي ان فادى مفيش في اخلاقه وانه بيعتبره ابنه وراجل البيت من بعده هو واحمد
وان لو علي عيلته واصله فاحنا عيلته والاصل مش بالفلوس المهم المعدن الأصيل الطيب وانا قولتله اللي تشوفه واتخطبنا في الاجازة بعد ما خلصت امتحانات علي طول
وبعدها بشهرين طارق ابن عمتى خطب جارتهم
عمتى مجتش خطوبتى انا وفادى بس ولادها جم
ساعتها فادى قالي
فادى:انا كنت عارف ان عينها منك لزفت الطين ابنها
فيروز:وزفت الطين عينه مش منى مش هتنطق اسمه صح بقي مرة من نفسك
كمان المهم انا عينى من مين
فادى:وانتى عينك من مين
فيروز:عينى من البطة البلدى بتاعتك فيها الطمع بصراحة
فادى وهو بيضحك:لا يا شيخة
فيروز:ايه يا فادى هيكون عينى من مين يعنى وانا بتخطبلك ودبلتك في ايدى هكون مخطوبالك شفقة يعنى او تخليص حق مبلاش غباء
فادى:مبقتش لوحدى اللي عربجي
فيروز وهى بتضحك: لا مبقتش لوحدك
ويوم خطوبة طارق فادى اصر نلبس نفس الألوان انا وهو
حاولت اقنعه ان خلاص طارق هيخطب اللي هو بيحبها وانا اصلا مش فارقة معاه مقتنعش وفضل اللي في دماغه فى دماغه
فيروز:يا فادى دى خطوبته فاهم يعنى ايه خطوبته
فادى:ولو فرحه حتى ميخصنيش
فيروز:هو بيخطب الانسانة اللي بيحبها واختارها ودافع عن اختياره ليها يعنى انا مش فى دماغه اصلا متقلقش
فادى: ما هو ده احسنله انك مش في دماغه بدل ما كنت افصل دماغه دى عن جسمه
كمان انا مش قلقان يا فيروز انا غيران فاهمة الفرق
فيروز بابتسامة:فاهمة والله فاهمة
بس صدقنى انت مش محتاج تغير
انا مش شايفة في الدنيا غيرك ولا يملا عينى غيرك
والبصة في عيونك اللي قد الدنيا دى عندى اغلي من اى حاجة في الحياة
فادى بابتسامة:عيونى اللي قد الدنيا يعنى ايه
فيروز بابتسامة:يعنى عيونك بالنسبالى قد الدنيا و اكبر منها كمان
انا بشوف الدنيا كلها بعيونك حتى انا نفسي بشوفنى بعيونك وبحبنى بحب فيروز اللي انت بتحبها دى وبحس انها تستاهل الحب.
فادى بابتسامة:لانك تستاهلى يا فيروز
انتى زى اسمك حاجة غالية ومميزة وجميلة
بس برضه هنلبس زى بعض نفس الالوان
فيروز وهى بتضحك:والله انا بقول بلاها مرواح احسن
فادى:لو عليا مش عايز نروح
بس انا عايز عمتك وزفت الطين ابنها يشوفونا سوا
فيروز:خلاص اللي يريحك
انا وفادى اتخطبنا سنة لحد ما انا خلصت كليتى
وفضل هو عايش مع صاحبه مكنش ينفع يقعد معانا في نفس البيت واحنا مخطوبين
بصراحة انا حبيت كده علي قد ما كان واحشنى علي قد ما كنت مبسوطة وهو بيوحشنى وانا بتعامل معاه علي اساس انه خطيبي مش اخويا اللي متربين سوا
كنت بعرف قيمته وهو بعيد وبستنى الدراسة تخلص علشان تتجوز ونرجع نعيش انا وهو تانى سوا
في حاجات مبنعرفش قيمتها غير لما تبعد
مبنشوفهاش وهى قريبة كويس لما تبعد عن عنينا شوية
بنشوفها بشكل اوضح وبندقق في تفاصيلها بنعرفها علي حقيقتها
بعد فادى هو اللى خلانى عرفت قيمته حددت هو ايه بالنسبالى فهمت ان حياتى متمشيش ولا تبقي حياة من غيره واننا مش اخوات انا وفادى عمرنا مكنا ولا هنكون اخوات
وقربه هو الامان بالنسبالي ووجوده هو الراحة والسعادة وعينيه هى الدنيا دنيتى انا دنية فيروز
وهو حلالى وانا حلاله فادى مسجلنى كده علي موبايله"حلالى.
انا وفادى اتشاركنا الاب والام والبيت والاخوات
والاهم والاحلي من ده كله اننا اتشاركنا الحياة بكل ما فيها من افراح وأحزان ومخاوف ومواجع
يمكن انا كنت محتاجاه يبعد علشان اشوفه صح
لان قربه كان مخلينى شايفاه غلط او كان مخلينى مبفكرش اصلا في حقيقة مشاعرى تجاهه
هو كده كده موجود ومشاركنى كل حاجة في حياتى
انا حتى مكنتش بفكر هيحصل ايه لو هو اتجوز او انا اتجوزت كأن ده مش هيحصل في يوم من الايام
بس لما فكرت لقيت انى مش هتحمل انه ده يحصل
انا بحب فادى وبحب فيروز اللي بيحبها فادى فيروز اللي مش ممكن تبقي زى صفية فيروز اللي ملهاش ام غير زينب
وصفية دى ملهاش وجود في حياتها ومش علشان واخده شكلها يبقي هكون شبهها من جوا وهاخد طبعها
ثقة فادى فيا خلتنى اثق فيا وحبه ليا خلانى احبنى
ووجوده بيطمنى الامان يعنى فادى والسعادة يعنى قربه والدنيا يعنى عيونه والجنة يعنى بيتنا انا وهو وزينب ومازن ولادنا وماما زينب وبابا عبدالرحمن وملك واحمد
هما دول عيلتى هما دول كل ما املك في الحياة
هما دول الحياة بالنسبالى
ربنا يديمهم في حياتى