حكايات منار الحكاية 18 بعنوان دوام الحال من المحال
عالية بصوت نايم:كريم انت ايه اللى مصحيك لحد دلوقتى ايه ده انت بتعيط
كريم وهو بيحاول يدارى وشه عنها:مفيش حاجة يا عالية ادخلي انتى نامى وانا شوية كده وهنام
عالية بخوف:كريم فى ايه مالك حصل ايه
كريم:مش عايز اتكلم يا عالية روحى نامى وانا هبقي كويس
عالية:تفتكر هعرف انام واسيبك في الحالة دى طيب اهون عليك تسبنى كده قلبي واجعنى عليك مش انا عالية حبيبتك
كريم وهو بيعيط:سابتنى يا عالية وملقتش غير اعز اصحابي ترتبط بيه قلبي بيوجعنى اوى يا عالية حاسس انه بيتحرق حاسس انى بموت حياتى انتهت خلاص
عالية:بعد الشر عليك يا حبيبي
عارف انا كمان حسيت كده لما اعز اصحابي وانا في اعدادى بعدت عنى واتعرفت علي بنات تانين
وحسيت كده تانى لما مجبتش مجموع طب وانا في ثانوى ودخلت كلية علوم
وحسيت كده واكتر من كده لما بابا مات من سنتين
بس الحقيقة ان ولا مرة كان احساسي صح ولا مرة كانت نهاية حياتى فعلا بالعكس بعدها كنت بكتشف ان ده اولها مش اخرها وان لسه هيحصلى حاجات كتير
مين دى اللي عملا فيك كل ده
كريم:مى زميلتى انا بحبها يا عالية بتعامل معاها علي اساس اننا زملا وبس مبحاولش اتكلم معاها غير في حدود لحد ما ادخل كلية واشتغل وابقي قادر اخطبها كنت عايز ادخل هندسة علشانها علشان لما اتقدملها اهلها يفرحو بيا محاولتش ارتبط بيها علشان محدش يقول عليها نص كلمة علشان واخد الموضوع جد والله علشان ميبقاش لعب عيال
وفي الاخر هى ارتبطت بوائل صاحبي خدها منى يا عالية مع انه عارف انى بحبها ده هو الوحيد اللي يعرف انا محكتش لحد غيره
وفي الاخر عمل فيا كده ليه يا عالية ليه انا عملتله ايه علشان يعمل فيا كده انا استاهل منه كده طيب انا مستهلهاش
وبكى كريم بصوت عالي
ردى عليا يا عالية هى كتير عليا
عالية وهى بتحضنه:لا يا حبيبي والله لا انت اللي كتير عليها انت اغلي واحسن منها الف مرة يا كريم انت حافظت عليها وهى محافظتش على نفسها انت غليتها وهى رخصت نفسها يا كريم
هى اللي متستهلكش دلوقتى ولا تستاهلك لما تنجح وتبقي مهندس قد الدنيا قدام
ووائل ده مش صاحبك ده واحد ندل احمد ربنا يا حبيبي انه عرفهولك علي حقيقته ولا واحد فيهم يستاهلك يا كريم
انت اللي كتير علي الاتنين يا حبيبي وهما يستاهلو بعض وانت تستاهل الاحسن من الاتنين وربنا هيرزقك ويعوضك باللي تستاهله يا حبيبي
كريم بصوت حزين:بجد انتى شايفة كده
عالية:انا متاكدة من كده عارف يا كريم انا لو كنت لقيت واحد يحبنى ويخاف عليا ويحافظ عليا كده زيك كنت اتقدمتله انا
كريم وهو بيضحك:ويبقي الشبكة عليكى
عالية وهى بتضحك:والمهر كمان وعمرى كله علشانه يا كريم لانه هيبقي يستاهل كل ده واكتر
كريم بابتسامة:ايه ده ما انتى طلع عندك قلب زى البنات ونفسك تحبي وتتجوزى اهو
عالية:طبعا امال انت مفكرنى هترهبن ولا ايه
كريم:امال بترفضى اللي بيتقدمولك ليه
عالية:اقولك سر
كريم:قولى
عالية:علشان خايفة وملقتش حد فيهم يستاهل احارب خوفي علشانه
كريم:ايه يا عالية الكلام الكبير ده
عالية بغرور مصطنع:دى اقل حاجة عندى
المهم يا كيمو انا مش عايزة اللي حصل ده يأثر علي دراستك انت بتقرب من حلمك متضيعهوش من ايدك حققه علشان نفسك وعلشانا انت واحنا نستاهل تحققه علشانا يا كريم صح
كريم:صح
عالية:انا عايزاك تشيل مى ووائل دول من حساباتك انا معاك وهتقدر تنساهم عارف ليه
كريم:ليه
عالية:علشان انت راجل يا كريم مش عيل انت راجل بجد والرجالة اللي بجد متضيعش وقتها في التفكير في ناس متستاهلش
كريم:انا راجل انتى شايفانى راجل
عالية:طبعا بعد بابا الله يرحمه انت راجلي انا وماما ومنة انت راجل البيت ده احنا ملناش غيرك يا كريم اوعى تخذلنا اوعى تضيع حلمك وتضيع نفسك لاننا ملناش غيرك يا راجلنا
كريم بابتسامة:حاضر يا احن اخت كبيرة في الدنيا كلها
عالية:يلا ننام بقي انا عندى محاضرات بدرى بكرة وانت عندك دروس ولا ايه يا باشمهندس
كريم:لسه مبقتش باشمهندس
عالية بابتسامة:هتبقي ان شاء الله
كمان انا اعتبرتك بقيت خلاص مش انت عايز تبقي باشمهندس يبقي هيحصل لان الرجالة لما بتعوذ حاجة بتعملها
كريم بابتسامة:صح الرجالة لما بتعوذ حاجة بتعملها
انا هدخل انام علشان الدروس بتاعت بكرة
تصبحي علي خير يا عالية
عالية:وانت من اهل الجنة يا قلب عالية
يا رب فرح قلبه يا رب هون عليه يا رب اجبره وعوضه يا رب احميهولنا واحفظه يا رب ربيه من عندك يا رب باركلنا فيه يا رب اجعله عبد صالح يا رب اهديه لكل ما تحب وترضي يا رب كريم ابن عبدك على وامتك فاطمة استجيب دعايا ليه يا رب انك ولى ذلك والقادر عليه اللهم امين وصلي اللهم وسلم علي سيدنا محمد وعلى آله وصحبه اجمعين
انا عالية اتنين وعشرين سنة واللي كنت بدعيله ده كريم اخويا انا اكبر منه باربع سنين مليش اخوات غيره هو ومنة اختى الصغيرة في اولي اعدادي
عايشة معاهم هما وامى لان ابويا مات
انا كنت بحبه اوى ومتعلقة بيه جدا بس عمرى متمنيت اتجوز واحد زيه بالعكس دايما بدعى ربنا يرزقنى بواحد يصونى وميعملش فيا اللي بابا عمله فى امى
بابا وماما كانو بيحبو بعض امى بتحبه لدرجة انها اكتفت بالثانوية العامة ومدخلتش الكلية علشانه علشان هو كان عايز يتجوزها ورفض تخش الكلية وهى سمعت كلامه علشان بتحبه حاجات كتير اوى عملتها علشان بتحبه
بابا كان بيحب ماما بس حبها مكنش كفاية يخليه ميبصش لغيرها مكنش كفاية يخليه ميخونهاش
كان بيخونها وهى كانت عارفة ولانها بتحبه عمرها محاولت تسيبه وحتى مكنتش بتلومه ده كان طبع في بابا وهى قبلت بيه مش بس علشانا هى اكيد بتحبه وعلشان كده اتحملت
كانت بتتخانق معاه كتير بس علشان مصروف البيت علشانا وعلشان دلعه فينا علشان طلبت منه حاجة ونسى يعملها
علشان اي حاجة ما عدا السبب الحقيقي اللي مخليها بتتخانق وهو كان بيتحملها عمره مضربها كان بينزل ويسيبها وهى تنهار في الارض وتعيط ويرجع البيت بحاجة هى بتحبها ويتكلم عادى وهى تتكلم عادى وخلاص علي كده
هو اكيد كان عارف هى بتعمل كل ده ليه
ابويا كان بيحب امى بس بطريقته وطريقته دى كانت صعبة اوى وقاسية اوى بيحبها ومبيتحملش بعدها عن البيت ليلة واحدة بس في نفس الوقت يعرف غيرها وميكتفيش بيها بس هى لازم تكتفي بيه ابويا كان بيغير علي امى من كل الناس حتى عمو عمر أخوه كان بيغير منه
انا خدت قرار انى مش هعمل في نفسي اللي امى عملته في نفسها وانا فى ثانوى مكنتش بتكلم مع ولاد خالص ولا بسمحلهم يتكلمو معايا
لحد ما دخلت الكلية والوضع زى ما هو بابا مات وانا فى تانى سنة زعلت اوى عليه وجزء منى مات معاه بابا كان اب كويس بس مكنش زوج كويس
لما مات لقيت نفسي اقتناعى بانى لازم معملش زى امى بيقل في الاول والاخر انا بنت واكيد محتاجة احب واتحب
خصوصا ان بابا مبقاش موجود علشان افكر نفسي انى مش عايزة واحد زيه كنت محتاجة دافع قوى اشجع نفسي بيه ولقيته قريت في الدين وعرفت حكم ربنا فى تعاملي مع الرجالة وفي لبسي في كل حاجة في حياتى
انا كنت محتاجة دافع قوى واكيد مفيش دافع اقوى من انى ابقي عايزة ربنا يرضى عنى
بعدها وسعت لبسي هو انا مكنتش بلبس ضيق بس وسعت لبسي اكتر ومبحطش مكياج خالص صوتى مبيعلاش طول مانا بره البيت ولا ضحكتى تعاملي مع الرجالة في حدود ضيقة اوى مبحاولش الفت نظر اي حد فيهم ليا ولا بحاول اشغل نفسي بحد فيهم
امى وقعت في غلطتين انا كنت بتجنب اقع فيهم
اولا مكملتش كلية مع انها كان ممكن تدخلها وبابا مرضاش علشان ميضمنش تتعامل مع مين هناك طبعا من كتر الغلط اللي كان بيعمله كان بيخنق عليها جامد ويغير وساعات للاسف يشك كمان
ودى حاجة انا معملتهاش لما دخلت كليتى وركزت فيها
ثانيا حبت بابا وحبها ليه هو اللى ذلها كده لانها مكنتش بتقدر تبعد عنه
وانا قررت انى مش هحب قبل متجوز هفضل بتاعت نفسي لحد ما الاقي اللى يستاهل ابقي بتاعته ومش هبقي بتاعته غير لما احس انه يستاهل أامنه علي نفسي وانه هيصونى
وده اللي انا عملته لما محاولتش اقرب من حد حافظت علي نفسي علشان استاهل يجيلي واحد محافظ علي نفسه زيى وادينى مستنياه
بعد اسبوعين فى البلكونة
عالية وهى بتضحك:لا اتحايلي عليا شوية مش هحكيلك بالساهل انا
مريم باصرار:يا عالية احكى بقي فضولى هيموتنى بالله عليكى احكى
عالية:خلاص خلاص هحكى يباى علي زنك
بعد ما خلصت السكشن لقيته بيوقفنى وبيقولي لو سمحتي ممكن رقم والدك
مريم:اوبا بقي وقولتيله ايه
عالية:قولته والدى الله يرحمه وسبته ومشيت
مريم:يا قلبك يا عالية بقي ياسر اللي كل بنات الدفعة هتموت عليه يطلب رقم والدك وترفضي لا وايه ده كمان معيد معييييييييد
عالية:معيد علي نفسه يا ماما انما انا ولا يدخل فى ذمتى بقرش واحد لامملي البنات حواليه وفرحان بلمتهم ميلزمنيش على اخر الزمن انا اتجوز ياسر نحنحة
مريم وهى بتضحك:عندك حق هو منحنح فعلا
طيب هتعملي ايه لو كلمك تانى وطلب رقم عمك ولا حاجة
عالية وهى بتفكر:هقوله اي حاجة مبفكرش في الموضوع دلوقتى مركزة في دراستى متكلمين عليا ومحجوزة ان شاء الله حتى اقوله عليا طار بس ملبسش البسة السودا دى
مريم:بقي معيد وزى القمر وعنده عربية وتقولي لبسة سودا
عالية:تغور العربية والشكل الحلو وانه معيد مدام عينه زايغة وبتاع بنات يبقي ميملاش عينى ولا يلزمنى هى ناقصة قرف يبنتى
مريم:هو انتى معاكى حق بس انا ممكن قصاد كل الحاجات دى أضعف بصراحة
عالية:وبعدين هتندمى يا مريم الحاجات دى بتزغلل العين في الاول بس صدقينى مبتدومش اللي هيدوم اخلاقه وحبه ليكى وانه يحافظ عليكى غير كده يبقي حياتك معاه هتبقي جحيم وعذاب ربنا في ارضه
مريم:ربنا يرزقك الخير يا حبيبتى
تصبحى علي خير اشوفك بكرة في الكلية انتى عارفة مكنتش هتحمل استنى بكرة تحكيلي
عالية:اللهم امين واياكى يا حبيبتي
عارفة ياختى عارفة
اشوفك بكرة في حفظ الله
قال ياسر نحنحة عايز يتقدملي قال دى هزلت بقي
بعد اسبوع عمى طلب ايدى لعلي ابنه
هو في ايه كل بتوع البنات اللي عينيهم زايغة بيتقدوملي ليه اقبالهم عليا تاريخى يا فندم ليه كده
على ابن عمى عايشين في نفس البيت بس هما في شقة واحنا في الشقة اللي تحتهم
نسخة من بابا الله يرحمه مش واخد اسمه بس للاسف واخد طبعه كمان وطبعا مكنش ينفع ارفض من غير مقعد معاه لانى بحب عمى جدا وفي الاول والاخر هو ابن عمى برضه
بس حسيت انه انانى زيه زي كل الشباب
يغلط ويعمل بلاوى وفي الاخر عايز يتجوز واحدة صفحة بيضا وهما صفحتهم سودا ومهببة علي دماغهم
انا كنت واخدة قرار انى هرفض علي
علي ده اسوء كوابيسي ده بالظبط اللي انا مش عايزاه ودعيت ربنا يبعده عنى واكيد مش هعمل كده في نفسي
المهم علي جه وماما وعمى سابونا نقعد لوحدنا
على:هو انا مش عارف اقول ايه احنا المفروض نعرف بعض ومتربين مع بعض
عالية:لا هو انت مش المفروض تقول حاجة لان الموضوع ده مش هيكمل اساسا فمتتعبش نفسك وتدور علي حاجة تقولها
على بصدمة:ايه ..ليه
عالية:علشان زى ما انت قلت يا على متربين سوا ونعرف بعض يعنى انا اعرف انك بتاع بنات وانك بعيد كل البعد عن الانسان اللي انا نفسي ارتبط بيه
انا مش هعمل فى نفسي كده مش هرمى نفسي فى النار بايدى
علي:نار للدرجة دى
عالية:طبعا نار انا عمرى مهثق في حاجة بتقولها هشك في كل كلامك مش هصدق لما تعمل حاجة حلوة علشانى انك بتعملها عادى ومش علشان تلهينى عن غلط في حقي بتغلطه او بتريح ضميرك اللي بيأنبك من ناحيتى
مش هعرف اخلي واحدة في اصحابى تجيلي البيت لانى مش هضمن انك علي الاقل متبصلهاش بصة مش من حقك ولا ينفع تبصهالها
انا حافظت علي نفسي يا على واستاهل واحد حافظ علي نفسه زيى
على:يعنى تستاهلي واحد احسن منى ده اللي عايزه تقوليه
عالية:مش لازم الصيغة القاسية دى
تقدر تقول عايزة واحد مختلف عنك انا منفعلكش ولا انت تنفعلي يا علي لا انا هكون سعيدة معاك ولا هقدر اسعدك
على:بس انا عايز اتغير يا عالية ساعدينى اتغير
انا مش عايز اخسرك انا عارف انى بعيد عنك ومختلف عن الانسان اللي انتى عايزاه ساعديني اقربلك ساعدينى ابقي شبهه ساعدينى ابقي هو
ادينى فرصة مش طالب منك اكتر من فرصة
عالية:مخاطرة كبيرة اوى يا علي
مقدرش اكدب عليك واقولك انى هقدر اخاطر مخاطرة زى دى
على:حاولى مش عايز منك غير انك تحاولى
فكرى يا عالية انا والله العظيم شارى ومش بايع
وعارف انى علشان استاهلك محتاج اتعب وعندى استعداد اتعب ادينى فرصة اتعب علشانك يا عالية معقول انا مستاهلش منك فرصة واحدة
عالية:
على:زى مقلتلك فكرى وانا مستنى قرارك
اتمنى يكون لصالحى بجد اتمنى
بعد اذنك
ومشى علي وفضلت يومين بفكر وكل ما افتكر كلامه وافتكر مواقف جدعنته معانا بعدها افتكر ماما وهي بتعيط بسبب بابا افتكر علي نفسه وبصاته القذرة لاى بنت فى الشارع او في مناسبة بتجمعنا كعيلة هو بصراحة عمره مبصلي البصة دى بس شفته بيبصها لغيرى شفت فيه بابا وانا مش هقدر اكون ماما مش هقدر اعمل في نفسي كده
قررت انى هرفض انا مش هقدر ادى لعلي الفرصة دى لو خسرها انا هخسر نفسي وانا مش عايزة اخسر نفسي
بس قبل مبلغ عمى بقرارى عمى جالنا وطلب يقعد معايا لوحدى
عمر:عالية انتى عارفة انك بنتى زيك زى منى وابتهال بناتى صح
عالية:صح يا بابا عمر طبعا
عمر:انا عارف انك تستاهلى واحد احسن من علي انا نفسي متمناهوش لواحدة في اخواته وزى مقلتلك والله انتى زيك زيهم بالنسبالى
بس انا محتاج مساعدتك يبنتى ابوكى محتاج مساعدتك
عالية باستفهام:مساعدتى انا فى ايه
عمر:فى ان علي يتغير انا حاولت اغيره كتير مقدرتش قلتله يخاف علي اخواته اللي بيعمله ده هيترد فيهم قالي ان اخواته متربين كويس ومستحيل يعملو كده
قلتله يخاف من ربنا كان بيحاول وبعدين كان بيضعف
لما قالي انه عايز يتجوزك انا رفضت انتى بنتى وامانة في رقبتى من بعد موت ابوكى
بس هو اصر واترجانى يبنتى علي لاول مرة في حياته يترجانى علشان حاجة
انا مقدرتش افضل اقوله لا هو برضه ابنى وعايزك وانتى هتقدرى تغيريه يا عالية ساعديه وساعدينى يبنتى
اديله فرصة ولو ضيعها انا بنفسي هجبلك حقك منه ومش هطلب منك تديله فرصة تانية
بس اديله فرصة يمكن يتغير ويبقي علي تانى غير اللي نعرفه يبقي علي يستاهلك
عالية:
عمر:فرصة واحدة بس يبنتى وانا حاسس انه مش هيضيعها
عالية:حاضر يا بابا عمر حاضر
بس انا محتاجة اقعد مع علي مرة كمان
عمر وهو فرحان:ربنا يباركلنا فيكى يبنتى
حاضر هخليه يجلكم النهاردة حقك يا حبيبتى تقعدى معاه مرة واتنين وتلاتة زى ما تحبي
ومشي عمى وانا فضلت افكر اللي عملته صح ولا غلط
انا مقدرتش ارفض الرجاء اللي كان في عيون عمى مكنش ينفع ارفضه مكنتش هقدر اقوله لا عمى طول عمره زى بابا وبيعاملنا زى ولاده ومن قبل ما بابا يموت كمان
بس كان لازم اقعد مع علي واحطله النقط عالحروف كان لازم نبدء صح
بالليل علي جه وقعدت معاه لوحدى
على بابتسامة:بابا بلغنى انك وافقتى انا مصدقتش نفسي من الفرحة
عالية:فى كام حاجة لازم تعرفهم قبل ما تحصل اي حاجة
على:اتفضلى قولى
عالية:انا مبثقش فيك يا على انت محتاج تخلينى اثق فيك محتاج تعمل اللي يخلينى اثق فيك
انا هديلك فرصة وفرصة كاملة ومش هدور وراك واستنالك غلطة ولا حاجة
بس صدقنى لو غلطت في حقى هعرف ربنا هيخلينى اعرف هيكشفك ليا مهما حاولت تخبي
لانى هدعى دايما انك لو خير يقربك ولو شر يبعدك
ولما تغلط في حقي هتبقي شر يا علي مستحيل تبقي خير
وعلشان كده صدقنى انا واثقة ان ربنا هيخلينى اعرف
وعايزاك تبقي فاهم انى ساعتها والله العظيم مهتردد لحظة واحدة انى اسيبك ورحمة ابويا مهفكر مرتين قبل ما اعملها
واكيد مش عايزة اقولك انك لو خسرت الفرصة دى ملكش معايا فرص تانية
انا عارفة ان كلامى صعب شوية بس دى الحقيقة وانت لازم تعرفها علشان ابقي من الاول عرفتك علشان تعرف انك لو غلطت هتبقي غلطان لوحدك ونتيجة غلطك هتتحملها لوحدك
بالمناسبة انا مش عايزاك تخسر الفرصة دى انت في الاول وفي الاخر ابن عمى وانا اتمنى انك تبقي احسن واحد في الدنيا علشانك وعلشان عمى قبل ميكون علشانى او علشان اي حد
على:وانا مش هخسر الفرصة دى بإذن الله
عالية:تمام احنا هنتخطب علي الاقل سنة ان مكنش اكتر
على باستغراب:سنة ليه انتى هتخخرجى كمان كام شهر
عالية:علشان انا مش هتجوزك غير لما أتأكد انى اقدر أامنك علي نفسي يا علي مش هتجوزك غير لما اشوف فيك زوج صالح ليا واب صالح لولادى
ولو مشوفتش فيك كل ده في سنة ساعتها هتبقي سنة ونص او اتنين هنفضل كده لحد ما اطمن لانى خايفة يا علي
على:خايفة منى
عالية:اه خايفة منك خايفة تضعف وترجع للي كنت فيه خايفة تغلط في حقي خايفة اكرهك يا علي لانى وقتها هكرهك وصدقنى هنهى كل حاجة
على:وانا مش هعمل اللي يخليكى تكرهينى
انتى قولتى اننا هنفضل مخطوبين لحد ما تطمنى يعنى لو اطمنتى قبل سنة ساعتها ممكن نتجوز
عالية:هو ممكن طبعا
بس دى هتعتمد عليك انت وشطارتك بقي واستعدادك للتغيير
على:مستعد والله مستعد
عالية:تمام والمواقف والوقت هيثبتو
كمان احنا هنتخطب بس مش هنخرج سوا لوحدنا
مش هتقول كلام مش من حقك تقوله ولا من حقي اسمعه غير واحنا متجوزين انا يهمنى ربنا يكون راضي عنى وعنك
على:بس انا هبقي خطيبك
عالية:خطيبي مش جوزى يا علي
ابحث في احكام الخطوبة بنفسك لو عايز انا عن نفسي بحثت وبقولك اللي مقتنعة بيه واللي مش هعمل غيره
على:يعنى مش هنتكلم سوا
عالية:لا طبعا هنتكلم امال هعرفك وتعرفنى ازاى
على:وهنتكلم ازاى
عالية:هتنورنا هنا فى البيت ونتكلم زى ما انت عايز
علي:مش هنتكلم في الموبايل
عالية:اممممم ممكن نتكلم في الموبايل بس مش فى وقت متاخر وكمان عايزاك تعرف انى هكون بكلمك قدام ماما او كريم ومنة مش هبقى لوحدى لانى ببساطة لا هقول ولا هسيبك تقول حاجة مينفعش اهلي يسمعوها
مش عدم ثقة فيك بس انا مضمنش نفسي قبل ما اكون مش ضمناك زى مقلتلك انا يهمنى يكون ربنا راضى عننا ولو كان حد غيرك برضه كنت هعمل كده لان ده الصح مش بسببك انت يعنى ولا حاجة
على:هى صعبة بس تمام مدام انتى عايزة كده
عالية:مش انا اللي عايزه كده ربنا اللي عايز كده وانا بس بحاول ارضيه واعمل اللي هو عايزه
علي بابتسامة:خلاص وانا هحاول معاكى وربنا يرضى عننا احنا الاتنين
عالية:اللهم امين
تحب انت تقول حاجة انا اتكلمت كتير
مش حابب انت تتكلم في حاجة
على بابتسامة:لا انا كفاية عليا انك وافقتى مش عايز حاجة اكتر من كده
عالية:تمام يبقي نحدد ميعاد للخطوبة
ونزلنا نجيب الشبكة انا وعلي ووالداته وامى وبس
عالية:الدبلة دى عجباك بس دى كبيرة يا علي ضخمة كده ومش رقيقة
علي:معلش انا عايزها ضخمة انا بحب الدبل التى يراها اي كفيف انا عايز اي حد يشوفها يعرف انك مخطوبة علي طول كمان نزلي بوست عالفيس وقولي فيك انك اتخطبتى عايز صحابك في الجامعة يعرفو ولو تنزلي بوست علي جروب الدفعة يكون أفضل والله
عالية وهى بتضحك:وعلى ايه كل ده
على:انا عايز الكل يعرف انك اتخطبتى يا عالية واظن حقى
عالية:هو حقك وحاضر يا سيدى هعرف كل الناس انى اتخطبت وهنزل بوست وهغير الحالة الاجتماعية بتاعتى عالفيس لمخطوبة كمان مرضى كده
على بابتسامة:مرضى جداااا
واتخطبنا وعلي كان بيجلنا البيت يقعد معايا يوم في الاسبوع مكنش بيفوت اسبوع ميجيش فيه
وكان بيكلمنى عالموبايل يوم ويوم مكالماتنا مكنتش طويلة بس هو كان حريص عليها
ومع انى زى مقلتله مش هدور وراه
بس اخباره كانت بتجيلي لحد عندى
ايام كتير بيرجع البيت بدرى مبيسهرش زى الاول ركز في شغله واترقي بعد خطوبتنا باربع شهور
علاقته بمنى وابتهال اتحسنت كتير بقي بيتكلم معاهم اكتر وبيخرج معاهم ومش خانقهم بتحكماته زى الاول
منى وابتهال تؤام الإتنين اصغر منى بسنتين بس احنا اصحاب وعلي نفسه اكبر منى بتلت سنين
عمى فرحان بالتغيير اللي بيحصل لعلي وكتير بيقعد يدعيلي لانه شايف انى سبب التغيير ده
علاقة على باهله اتحسنت كتير لان بقي بيقعد معاهم قبل كده كان البيت بالنسباله زى البنسيون بينام وياكل فيه بس دلوقتى الوضع الحمد لله اختلف
انا اتخرجت ودورت على شغل لحد ما الحمد لله اشتغلت مدرسة كيميا انا اللي كنت عايزة كده كنت عايزه ابقي مدرسة حسيتها هتبقي مناسبة اكتر ليا انا بحب اشرح جدا وكمان علشان فكرة انى هكون متجوزة ومسئولة عن بيت واسرة اشتغلت في مدرسة اعدادى
علي بعد سبع شهور من خطوبتنا طلب نتجوز
على:عالية هو انتى لسه مطمنتيش طول السبع شهور اللي فاتو معملتش اللي يخليكى تطمنيلي وتصدقي انى اتغيرت
عالية:اتطمنت شوية الوضع بقي احسن من الاول كتير
على:طيب مينفعش بقية الاطمئنان ده يجى وانتى في بيتى
عالية:
على:طيب بلاش وانتى في بيتى علي الاقل نكتب الكتاب اعرف اتعامل معاكى براحتى وانتى كمان
عالية:هو اصل
على قاطعها:انا عايز اكون في حياتك بشكل اكبر يا عالية وانتى كمان تكونى في حياتى بشكل اكبر
الخطوبة حدودها كتير كمان يعنى انا معملتش اللي يطمنك ويخليكى علي الاقل توافقي علي كتب الكتاب
انا مش عايز اضغط عليكى او الصراحة انا عايزك توافقي بس هحاول مضغطش عليكى
بس فكرى يا عالية واستخيرى وان شاء الله توافقى انا حاسس انك هتوافقى
فكرت كتير مش هنكر انى بدات احب علي واتعلق بيه بستنى ميعاد مكالمته اللي بقيت ارد عليها في الصالة وانا مقعدة امى وكريم ومنه احتياطى لانى فعلا مبقتش ضامنة نفسي بفرح بمكالمته جدا وبستناها
بعد الساعات لحد ما يجى الميعاد اللي بيجى فيه البيت لو شفته عالسلم وانا طالعة او نازلة بحس انى فرحانة اوى وان يومى هيبقي جميل وزى الفل
وعلى معملش حاجة تخسره الفرصة اللي ادتهاله او انا معرفتش حاجة تخليه يخسرها بس احساسي بيقولى انه معملش انا مرتاحة ومبسوطة وكل يوم احساسي بالراحة والسعادة بيزيد
بس فكرة الجواز دى مخوفانى انا بثق فيه بس لسه بخاف منه وبخاف علي نفسي انا دلوقتى بقيت بحبه وحسا انى لما هحب هبقي زى امى في حبها حبى جامد وابقي مستعدة اضحى بالدنيا كلها علشانه وحتى لو مستحملتش انى مكنش كفاية ليه ومقبلتش يخونى وبعدت عنه معتقدش انى هحب بعده امى لحد دلوقتى بتحب ابويا.
محستش ان حبها ليه قل بالعكس
وهو عايش كانت بتحبه وموجوعة من خيانته ليها
دلوقتى بعد ما مات بقت بتحبه وموجوعة بس علي فراقه
حبها ليه بقي انقى واقوى
وانا حسا انى زيها في حبى وخايفة علي قلبي يتكسر
انا طول السبع شهور كنت بدعى ربنا لو علي خير يقربه ولو شر يبعده بس بقالي شهرين بزود عليهم انه يصلحنا لبعض وانه ميكسرش قلبي ولا يجرح كرامتى
فكرت كتير واستخرت كنت حاسة براحة وشوية خوف بس احساسي بالراحة كان اكبر
كمان علي تعب والتزم بكلامى ومحاولش يتعدى الحدود اللي انا حطيتها واكيد يستاهل منى اقدر كل ده
ووافقت وكتبنا الكتاب
على بابتسامة:الحمد لله واخيرا بقيتى مراتى
ها نبدء بايه بقي
عالية بابتسامة:نبدء بايه في ايه
على:فى اللي عندى وعايز اقولهولك ومكنتش عارف يا زوجتى العزيزة
ابدء بايه..ابدء بايه..اه اولا انا بحبك جدا جدا جدا يعنى والله العظيم ما عرفت يعنى ايه حب ولا يعنى ايه راحة وسعادة الا معاكى ومحستش ان ربنا بيحبنى وراضى عنى غير لما دخلتى حياتى
ثانيا انا متابعك من زمان يا عالية بس كنتى بالنسبالى حلم بعيد حاجة حلوة انا مستاهلهاش
لانى عارف ان ربنا عادل وبعدله انتى تستاهلي واحد احسن منى فكنت براقبك من بعيد وكل ما كنت اركز معاكى اكتر كل ما كنت احبك اكتر واكتر
انتى عارفة انا دايما كنت بسمعك لما كنتى بتتكلمى في البلكونة دايما وكل ما اسمعك واعرفك احبك اكتر واحس انك كتير عليا اكتر
سمعتك وانتى بتكلمى كريم ساعة صاحبه ما اخد منه البنت اللي بيحبها ساعتها حسيت ان يبخت ولادك بيكى ومع انى كنت عارف انه صعب بس لقتنى بدعى ربنا ان ده يحصل وان يجى يوم تبقي بتدعى ربنا علشانى زى ما كنتى بتدعيه علشان كريم كده
ولما كنتى بتكلمى صاحبتك وبتحكيلها عن المعيد اللي كان عايز يتقدم وانتى رفضتيه علشان زيى او انا كنت زيه
ساعتها حسيت انى غضبان وغيران وكنت حاسس بألم لما فكرت انك رفضتيه بس ما انتى اكيد هيجى يوم وتقبلى بغيره ساعتها لقتنى بدعى ربنا وبقوله انى عارف انى بعدله مستاهلكيش بس انا طمعان في كرمه قلتله يا رب مش هتحمل تبقي لحد غيرى والله مهتحمل قلتله يا رب خلاص توبة نصوحة المرة دى علشانى وعلشانها علشان انا تعبت من احساسي أنى بغضب ربنا انى اقل من انى استحقك انى لا ابويا ولا انا نفسي نتمنى لواحدة في اخواتى واحد زيى قلتله يا رب انت كريم وفضلك واسع اكرمنى بيها يا رب من عليا بيها وارحمنى من وجع قلبي ده يا ارحم الراحمين مليش غيرك يا رب فرحلي قلبي
وكلمت بابا ورفض في الاول بس انا اصريت وكلمته مرة واتنين وتلاتة واربعة لحد ما وافق
لما جيت وقعدت معاكى وانتى قولتى اللي قولتيه
حسيت انى صغير اوى في نظر نفسي وفى نظرك
بس مكنتش هقدر استسلم علي الاقل مش قبل متدينى فرصة ولو فرصة واحدة امسك فيها بايدى وسنانى
علشان انا كنت عايز اتغير بجد المرة دى
مشيت من عندك محبط وخايف ودعيت ربنا كتير وانا طمعان في رحمته وكرمه وفضله والحمد لله وافقتى
ورغم كلامك اللي حسسنى قد ايه انا غلطت وقد ايه انا بعيد عن الانسان اللي انتى بتتمنيه
بس كنت حاسس انى اخترت صح لانك بتفكرى في ربنا دايما قبل متكونى بتفكرى فيا او في نفسك
فترة خطوبتنا بجد كانت صعبة عليا بس كنت مرتاح لاحساسي انى مبعملش حاجة تغضب ربنا بالعكس انا بجاهد نفسي علشانه حبيت الاحساس ده اوى وعلشان كده حاولت احسه مع اهلي وفي شغلي كمان
بس مع الوقت الموضوع كان بقي بجد صعب ولا يحتمل قربك وبعدك في نفس الوقت ده تعبنى ومبقتش قادر اتحمله وطلبت نتجوز وشفت في عينيكى خوف فقلت اخليها كتب كتاب فشفت فيهم حيرة وتردد بس اهم ارحم من الخوف وقررت اقولك تستخيرى لانى كنت عارف ان ربنا مطلع علي قلبي وعارف انى اتغيرت ولسه بحاول اتغير اكتر.
وعارف كمان انى تعبت ومحتاجك جنبي وقريبة منى اكتر من كده وسبحانه مخذلنيش حاشاه ولا ردلى دعايا
وبس بقي لحد ما الحمد لله وصلنا للحظة الجميلة دى
انا رغيت كتير كان عندى كلام كتير اقوله انتى مش عايزة تقولي حاجة طيب
عالية بابتسامة:ربنا استجاب دعاك لانك صادق المرة دى يا علي صادق معاه صادق في توبتك ليه قبل متكون صادق مع نفسك ومعايا وانا دلوقتى وبس أتأكدت انى خدت القرار الصح لما وافقت اديلك فرصة لانك تستحقها
علي بابتسامة:بجد
عالية بابتسامة:بجد جدا يا زوجى العزيز
علي براحة:الحمد لله واخيرا بقيت زوجك العزيز
بعد اربع شهور انا وعلى اتجوزنا انا كنت اطمنت وكان في جزء جوايا خايف اعيد اللي حصل مع ابويا وامى بس الجزء ده مكنش هيطمن غير لما اتجوز علي مكنتش هقدر اطمنه لوحدى وكنت هفضل خايفة
قررت اتوكل علي ربنا واثق في رحمته وكرمه واثق في علي وفي نفسي انا مش ماما وعلى مش بابا
ومش لازم نغلط غلطهم احنا نقدر نتجنب أخطائهم
اتجوزنا وبعد سنتين خلفنا مروة وبعدها باربع سنين خلفنا عبدالرحمن
حياتى مع علي وولادنا حياة جميلة بنحاول نرضى ربنا فيها دايما ونربي ولادنا صح نربيهم علي حب ربنا وحبنا وحب بعض
طبعا في لحظات وحشة بتعدى علينا وبنتخانق زى اي زوجين بس الحمد لله ولا مرة اتخانقنا بسبب خيانة من علي ليا لان علي بقي بيخاف من ربنا بجد وده الاهم وبيخاف يخسرنى وبيخاف يترد في مروة بنتنا
علي اتغير بجد
اللي قال ان دوام الحال من المحال كان عنده حق
احنا بنتغير ومحدش بيفضل علي حاله بس نقدر نخلي تغيرنا ده للأحسن لو عايزين بجد لان اللي عايز حاجة من قلبه بيعملها ربنا بيساعده وبيقدره انه يعملها
يس ياخد بالأسباب وميتمناش وخلاص لا يتعب علشان يوصل للى هو عايزه
كريم حقق حلمه ودخل هندسة واختار قسم معمارى
لما خد بالأسباب وذاكر وركز في دراسته
وبعد الكلية بسنة خطب واحدة اخت صاحبه اتعرف عليه في الكلية
وربنا عوضه بايمن صاحبه ده عن وائل وباخت صاحبه عن مى لانه حبها بجد وعرف ان مى دى كانت لعب عيال
وميرنا مراته هى الحب اللي بجد
انا حققت حلمى واتجنبت انى اعيش الألم اللي عاشته امى
لما خدت بالاسباب وحافظت علي نفسي ودعيت ربنا يرزقنى الخير لما قربت من ربنا ووثقت في كرمه
وعلى حقق حلمه واتجوزنى لما خد بالأسباب وتعب علشان يتغير ويبعد عن الغلط اللي كان فيه
لما بقي لما يعرف اللي يرضي ربنا يعمله
ولما يعرف اللي يغضب ربنا بيتجنبه ومبيعملوش
الاحلام بتتحقق بس للي بياخدو بالاسباب
اتعب علشان حلمك بجد علشان ربنا يفرحك بيه ويبقي حقيقة انت عايش فيها ومش مجرد حلم