حكايات منار 3 اللي بيزرع بيحصد

حكايات منار 3 اللي بيزرع بيحصد

انا ياسمين اول سنة كلية سياسة واقتصاد
خالى اصر مدام هدرس في القاهرة يبقي اروح اعيش معاه
وامى وافقت خصوصا ان خالى مقتدر ماديا وبيته واسع
ومعندوش غير بنت فى اولى ثانوى وولد فى اولى اعدادى
يعنى هكون براحتى هناك
خالى جه خدنى بعربيته من بيتنا

ودعت امى وابويا واخواتى وانا بعيط دى اول مرة ابعد عنهم بس ما باليد حيلة
طول الطريق وخالى بيحكيلي عن ايام ما كان في الجامعة وان دى هتبقى اجمل سنين حياتى ومش هتتعوض
اتمنى يكون معاه حق يا رب الموضوع يطلع يستاهل بعدى عن اهلى انا معرفش حد فى الجامعة لسه
صحابي اللي فى بلدنا ياما اتجوزو ياما راحو كليات ومعاهد قريبة من البلد يروحوها بالقطر او بالمواصلات بس بيروحو ويجو من البيت
وصلنا بيت خالى انا اعرف مراته وولاده بنشوفهم في الاجازات والاعياد بيجو يقضو معانا فى البلد يومين
مرات خالى كانت عاملة علشانى وليمة مش مجرد غدا

وشكلها كان تمام ومش متضايقة من وجودى الحمد لله انا كنت خايفة تكون متضايقة وخالى جبرها تتقبل انى هقعد معاهم
قعدت مع بنت خالي فى نفس الاوضة
هى شاطرة وبتجيب درجات عالية فى المدرسة
فكان الوضع بينا تمام بنزاكر سوا وننام فى نفس الوقت تقرييا او حتى لو كنت مخلصتش مذاكرة بطلع اذاكر فى الصالة علشان مزعجهاش دى اوضتها في الاول والاخر وانا ضيفة عليها

بنت خالى كويسة جميلة وشاطرة وخالى ومراته بيحبوها وبيميزوها عن احمد اخوها
هو شقى اوى وملوش في الدراسة وهما رمو طوبته
خالى تقريبا بيتخانق معاه بس طول الوقت بيزعقلو واحيانا للاسف بيضربو قدامنا
فى حين ان بسملة اخته بتتعامل معاملة الاميرات
وطول الوقت تشجيع ليها ومدح وطلباتها مجابة من قبل متطلبها

بعد ما روحت اعيش مع خالى بشهر السلسلة الذهب بتاعتى اللى والدى جبهالى هدية مجموعى في الثانوية العامة اختفت
كنت بدور عليها قلبت عليها الدنيا وملقتهاش
خالى دخل وسالنى بعمل ايه
وبسملة قالتله ان السلسلة بتاعتى ضايعة ومش لقياها
خالى علي طول راح لاحمد اوضته
كامل:سلسلة بنت عمتك فين يا احمد
احمد:انا معرفش وانا ايه دخلي بالسلسلة بتاعتها

كامل بصوت عالى: يعنى علشان حرمتك من المصروف عقاب ليك علشان ضربت ابن الجيران وابوه جه اشتكالى تقوم تسرق سلسلة بنت عمتك هتعمل بيها ايه ها هتبيعها ازاى ولا ملموم علي شلة صيع هيتصرفو فيها اخرتها هتبقي حرامى يا احمد
وقلع حزامه ونزل بيه ضرب علي جسم احمد
احمد: والله يا بابا انامعملتش كده يا بابا اقسم بالله مخدتها
انا رحت مسكت ايد خالى وقلتله
ياسمين: افتكرت انا نسيتها فى البيت عندنا لما كنت هناك من يومين ومجبتهاش معايا اصلا
كامل:اوعى تكونى بتدارى عليه
ياسمين: وهو لو عمل كده انا هدارى عليه برضه
خالى خرج من غير ما يقول حاجة لاحمد
واحمد بصلي بانكسار وهو بيعيط:
انا مخدتهاش يا ياسمين والله مخدتها

ياسمين وهى بطبطب عليه: انا عارفة انك معملش كده
احمد: بجد
ياسمين: اه يا حبيبي بجد
احمد:امال بابا مش مصدقنى ليه ازاى انتى مصدقانى وهو لا ليه مبيصدقنيش يا ياسمين ليه دايما بيتخانق معايا وبيضربنى بيكرهنى ليه هو انا مش ابنه هو مش المفروض يكون بيحبنى
ياسمين:متقولش كده يا احمد هو اكيد بيبحبك
احمد:لا مبيحبنيش ولا ماما كمان امال سيباه يعمل فيا كده ليه ومبتدافعش عنى حتى بسملة مبتحبنيش وشايفة انها احسن منى عندها حق بابا بيحبها وشايفها احسن منى ودايما بيقول كده انها احسن منى الف مرة

وان يا ريته مخلفنى محدش في البيت بيحبنى
امال جابونى الدنيا ليه بس علشان يكرهونى ويعاملونى وحش حرام كده والله حرام
ياسمين:اهدى بس يا احمد خالى بيحبك ده انت ابنه فى حد مبيحبش ابنه ده انت الراجل يا احمد يعنى سنده في الدنيا عارف عندنا في البلد بيفرحو بخلفة الولاد ويضايقو من خلفة البنات
شايفين الولاد عزوة وبيشيلو اسامى اهاليهم وحتى لو ماتو مدام ولادهم عايشين يبقي عمر اسمهم مهيتقطع من الدنيا
خالى بيحبك وخايف عليك هو بس بيعبر عن خوفه بالطريقة الغلط هو خايف اخلاقك تبوظ يا حبيبي علشان كده بيقسي عليك لانه عايز يشوفك احسن واحد فى الدنيا احسن منه هو شخصيا
احمد:تفتكرى

ياسمين:انا متاكده من كده
عارف انت لو بطلت تعاند وذاكرت كويس وبطلت تعمل مشاكل في المدرسة وفى البيت
هتلاقى معاملته معاك اختلفت تماما صدقنى هو بيعمل كده من خوفه عليك
احمد:بابا مش شايف غير بسملة ومهما عملت مش هيفرق معاه اللى بعمله
ياسمين:لا طبعا مش صح انتو الاتنين ولادو وهو بيحبكم انتم الاتنين
كمان انت لازم تعمل كده علشان نفسك علشان تبقي حاجة كويسة لما تكبر انت نفسك تبقى ايه لما تكبر
احمد:منفسيش ابقي حاجة

ياسمين بابتسامة:محدش فى الدنيا منفسوش يبقي حاجة ومعندوش حلم
يلا بقي قولى حلمك تبقى ايه
احمد:مهندس ميكانيكا
ياسمين:اشمعنى مهندس ميكانيكا
احمد:علشان انا بحب العربيات
ياسمين بابتسامة:اه علشان كده معلق صور كل العربيات دى
احمد:اه انا بحبهم جدا

ياسمين:يعنى عايز تبقي مهندس ميكانيكا بالمذاكرة الكلابى اللي انت بتذاكرها دى ينفع برضه
احمد باستغراب:يعنى ايه مذاكرة كلابى دى
ياسمين:يعنى بتذاكر مزاكرة اى كلام بتفتح الكتاب فى اوقات فراغك
احمد وهو بيضحك:كده يبقي مذاكرتى مذاكرة كلابى فعلا
ياسمين:طيب ايه رايك تذاكر مذاكرة بنى آدمين
احمد:قصدك ارجع من المدرسة اذاكر واروح الدرس اقفل الامتحان وانام وانا بذاكر عالكتاب
لا صعبة يفتح الله يا ستى

ياسمين وهى بتضربه على دماغه:يفتح الله ايه هو انت جاى تشترى منى طماطم
ده مستقبلك فاهم يعنى ايه مستقبلك ويا سيدى مش لازم تنام عالكتاب وانت بتذاكر نام عالسرير عادى
احمد:طيب بصى السنة دى فاكس نذاكر صح من السنة الجاية
ياسمين:فاكس ليه الدراسة بدءت من شهر واحد يعنى الترم الاول لسه باقى فيه شهرين
والترم التانى لسه مجناش يمته يا ظالم يا مفترى بتفكس لسنة كاملة علشان شهر
احمد:الله مش ناخد السنة من اولها اجتهاد يا ياسمين
ياسمين:يا سيدى ابدءها من ربعها انا موافقة
احمد:هفكر

ياسمين:تفكر في ايه خلاص من بكرة تجيب كتبك ونقعد سوا نشوف خدتو ايه وهتذاكره ازاى
اتفقنا
احمد:بس لو مكنتيش تحلفى اتفقنا
ياسمين:ايوه كده يابوحميد برافو عليك

وبقينا بنذاكر انا واحمد بقيت بذاكر معاه في اوضته علشان ميلعبش ويذاكر في الاول كان مطلع عينى بس مع الوقت بدء يحترم نفسه ويذاكر وفي يوم لقيته راجع فرحان اوى

احمد بسعادة:ياسمين قفلت امتحان الرياضة انا واربعة بس في المجموعة كلها اللي قفلناه المستر مكنش مصدق نفسه انى قفلت الامتحان شكله كان مسخرة وهو عمال يسالنى انت احمد كامل وانا اقوله ايوه يا مستر يقولى متاكد اقوله ايوه متاكد انا يعنى هنسي اسمى يعينى ده اتصدم
انا فرحان اوووى انا اخر مرة قفلت كان في اغسطس اربعة وتمانين في عز الحر
ياسمين وهى بتضحك:انت مكنتش اتولدت ساعتها ده انا نفسي مكنتش اتولدت
خد الكبيرة خالى مكنش اتجوز مرات خالى اساسا
احمد:احم احم ليه الاحراج ده انا بهزر يا ياسمين
المهم انا كده براءة ومش هذاكر النهاردة

ياسمين:يعنى علشان فرحان انك قفلت الامتحان تقوم متذاكرش
احمد:طبعا امال اكافئ نفسي بايه
ياسمين:ماشي هعديها النهاردة بس متتعودش على كده
احمد بتوتر:هو اااه ...اناااا .. مش المفروض اقول لبابا
ياسمين:طبعا روح قوله وفرحه
احمد:متيجى معايا
ياسمين:لا روح فرحه لوحدك
احمد:تمام

كامل:فى حاجة يا احمد
احمد:اااا ...بابا انا حليت امتحان الرياضة كله صح
كامل:بجد ولا بتضحك عليا
احمد:لا والله بجد خد شوف الورقة بنفسك
كامل وهو بيشوفها:شاطر يا احمد
ايوه كده انا عايزك تقفل كل الامتحانات وليك عندى اخر السنة الهدية اللي تطلبها مهما كانت
احمد:مهما كانت
كامل:كلام رجالة الهدية اللي انت عايزها مهما كانت هاجيبهالك بس انت هات درجات عالية في النتيجة
احمد:اتفقنا

احمد فى نص السنة جاب درجات حلوة جدا اعلي من درجاته قبل كده بكتير وخالي مجبلوش الهدية اللي اتفقو عليها لانهم متفقين علي اخر السنة
بس خالى اداله ميتين جنيه حلاوة النتيجة تشجيع ليه
وانا رجعت قضيت اجازة نص السنة مع اهلي ورجعت قبل الدراسة متبدء بيوم
كامل:حمدلله علي سلامتك يا ياسمين
ياسمين:الله يسلمك يا خالى
احمد:حمدلله علي السلامة اخيرا جيتى البيت كان وحش اوى من غيرك وحشتينى
ياسمين:وانت كمان وحشتنى
اتفضل
احمد:ايه دى

ياسمين:افتحها وانت تعرف
احمد وهو بيفتحها:بلاي ستيشن وايه كل اسطوانات العاب العربيات دى
ياسمين:انا قلت اجيبلك هدية بمناسبة النتيجة الحلوة اللي فرحتنا بيها
اجبلك حاجة تفرحك وكمان تفكرك بحلمك
عربيات.. هندسة ..ميكانيكا ..مذاكرة كتير
احمد:مش سهلة انتى برضه بس الهدية حلوة اوى
احلي هدية جاتلى في حياتى شكرا يا ياسمين
ياسمين:انت تستاهلها يا احمد انا بجد فخورة بيك
وطول الاجازة بحكلهم عنك في البيت
احمد:الاجازة الجاية هرجع معاكى اقضي معاكم شهر في الاجازة
ياسمين:وانا موافقة عبدالرحمن اخويا قدك فى اولي اعداى برضه وهيفرح بيك اوى

بعد اسبوعين من الدراسة
دخلت الاوضة بعد ما رجعت من الكلية وبسملة كانت فى الصالة بتتفرج عالتلفزيون
خبطت شنطة المدرسة بتاعتها بالغلط وقعت عالارض وكل الكتب اللي فيها وقعت لانها مكنتش قافلة السوستة كويس
قعدت المهم ولقيت السلسلة بتاعتى في وسط كتاب منهم
انا يوم مقلت لخالي انى نسيتها في البيت كنت عارفة انى جبتها معايا بس قلت كده علشان يبطل يضرب احمد شكله كان بيقول انه مبيكدبش وكمان هو مبيدخلش اوضتنا كتير

لما دورت كتير وملقتهاش قلت يمكن اتسرقت منى وانا في المترو او حاجة معقول بسملة اللي خدتها
مكنتش عارفة اعمل ايه رجعت الكتب مكانها
وخدت سلسلتى ولبستها وخرجت نتغدى
بسملة لما شافتنى لبساها اتصدمت
وانا بصيت لخالى وقلتله
ياسمين:السلسة بتاعتى يا خالى شفت زي ما قلتلك كنت نسياها فى البيت وامى معرفش ليه اصرت عليا اخدها والبسها
كامل:البسي يا حبيبتى وافرحى ربنا يبارك لصفية وعلي فيكى ويباركلنا كلنا فيكى انتى زى بسملة بالنسبالى يا ياسمين والله
ياسمين:تسلم يا خالى

احمد قام من عالاكل وبسملة كمان
- خالى بصلى وبعدين قام ورا احمد وانا دخلت الاوضة لبسملة
في اوضة احمد
كامل:احمد
احمد:
كامل:احمد انت مش هترد عليا
احمد:نعم يا بابا
كامل:انت زعلان منى
احمد:بابا هو انت ليه مصدقتنيش ساعتها مع انى قلتلك انى مخدتهاش وحلفتلك
كامل:حقك عليا يا ابنى بس انا والله كنت خايف عليك

انا عملت كده من خوفي عليك يا احمد ده انتى ابنى الوحيد سندى وسند امك واختك من بعدى
احمد بدموع في عينيه:يعنى انت بتحبنى يا بابا
كامل وهو بيحضنه: انا بحبك انت واختك اكتر من نفسي يا حبيبي انا مليش في الدنيا غيركم ومنا عينى اشوفكم احسن ناس احسن منى انا شخصيا
احمد:ياسمين قالتلي كده برضه
كامل:ياسمين بتتكلم صح
انت مخدتش بالك انا بقيت فرحان ازاى انك ركزت في مذاكرتك والمدرسين بتوعك بقو بيشكرو فيك بعد ما كانو بيشتكو منك
انا ميهمنيش غير انك تكون بخير وشاطر فى دراستك يا حبيبي
احمد:انا بحبك اوى يا بابا
كامل:وانا كمان والله بحبك

عارف يوم ما انت جيت الدنيا حسيت انى بقيت مطمن انى هيكونلى عكاز اتسند عليه لما اكبر
احمد:ربنا يخليك لينا يا رب
فى اوضة بسملة
بسملة بتوتر:انتى لقيتى سلسلتك فين
ياسمين:انت مش سمعتينى وانا بكلم خالى
هكون لقيتها فين فى شنطتك وسط كتبك مثلا
بسملة:مش ممكن طبعا
اكيد احمد اللى حطها وسط كتبي
ياسمين:واحمد هيعمل كده ليه
بسملة:عادى يعنى هو بيعمل حاجات غلط دايما
وبيغير منى لانى اشطر منه

ياسمين:كنتى اشطر منه دلوقتى احمد بقا زيه زيك
وواضح كده ان انتى اللي بتغيرى منه
بطلى كدب يا بسملة انتى عارفة كويس اوى ان مش احمد اللي خد السلسة
بسملة:محدش هيصدقك لو قلتى ان انا اللي خدتها
بابا وماما مستحيل يصدقوكى
ياسمين:لو كنت عايزة اقول لخالى كنت ندهتله لما لقتها وسط كتبك وتوترك ده كان هيبقي اكبر دليل علي صدق كلامى
بس انا مش عايزة اعمل كده
بسملة:امال عايزة ايه

ياسمين:عايزة اعرف عملتى كده ليه
بسملة:ملكيش دعوة مش سلسلتك معاكى خليكى في حالك بقي
ياسمين:بسملة اتكلمى عدل وجاوبى سؤالى بدل ما اقول عليا وعلى اعدائى واخرج اقول لخالى
اللى صدقينى خلاص مش هيصدق ان احمد اللي عملها
واكيد انا مش هتبلي عليكى يعنى
فصدقينى انتى مش فى موضع قوة واحسنلك تجاوبينى بسرعة
بسملة:كنت عايزة البسها قدام البنات صحابى في المدرسة محدش فيهم عنده واحدة زيها
ياسمين:يعنى سرقتى حاجة مش بتاعتك علشان تتباهى بيها قدام صحابك وتذليهم انهم معندهمش زيها
بسملة:انا مسرقتش

ياسمين:امال بتسمى اللي عملتيه ايه لو مش سرقة
بسملة:انا مكنتش هعمل بيها حاجة غير انى هلبسها علشان يشوفوها عليا وبس
ياسمين:يا سلام واحمد اللي خالي اتهمه ظلم بسببك وعاقبه علي غلط انتى اللي عملتيه
وانتى كنتى واقفة تتفرجى عليه
وان شاء الله كنتى ناوية تعملي ايه بعد ما تفرجيهم عليها وانتى لبساها بس
كنتى هترجعيالى ازاي فكرتى في الموضوع ده
انتى انانية يا بسملة ومبتفكريش غير فى نفسك
واحمد اشطر واحسن منك الف مرة
بسملة:انتى ازاى تقوليلي كده
لا طبعا انا احسن منه

ياسمين: تحبى احكى لخالي وهو يحكم من فيكم احسن بنفسه
بسملة وبدات تعيط:لا يا ياسمين علشان خاطرى متقوليلوش بابا مش هيسامحنى لو عرف وماما هتزعل منى واحمد كمان هيكرهنى
ياسمين:فارق معاكى اوى احمد
بسملة:طبعا فارق ده اخويا الوحيد انا بحبه
ياسمين:وسبتيه يضرب ليه وانتى عارفة انه معملش حاجة
بسملة: انا مكنش قصدى كل ده يحصل
لما بابا جه وسالك بتعملي ايه وقلتله ان سلسلتك ضاعت قلت ان هيقولك دورى عليها كويس او اسالى عمتى عليها يمكن تكونى نسيتيها هناك او حتى تكون اتسرقت منك بره وانتى في الكلية

والله العظيم مكنتش اعرف انه هيفتكر احمد اللي عملها ولما راحله وبدء يضربه مكنتش عارفة اعمل ايه
كنت عايزة بابا ميضربوش بس خفت اقوله ان انا اللي خدتها خفت والله مقدرتش اقوله
بس انتى قلتي لبابا انك نسيتيها عندكم في البيت وهو بطل يضربه ساعتها انا حمدت ربنا
ياسمين:ومرجعتيهاش ليه
بسملة بحرج:بصراحة مكنتش عارفة ارجعهالك ازاى
وكمان اا...

ياسمين:كان ممكن تحطيها وسط حاجاتى او تحت السرير او تقوليلي انك لقيتيها في الحمام وانى نسيتها فيه
كان ممكن تعملي حاجات كتير يا بسملة
بس انتى كنتى لسه عايزة تتباهي بيها قدام زمايلك
بسملة بندم:انا اسفة يا ياسمين والله انا اسفة
ياسمين:هسامحك بس علي شرطين
بسملة:ايه هما
ياسمين:اولا توعدينى انك مش هتعملى كده تانى ابدا
بسملة بسرعة:اوعدك والله العظيم مهعمل كده تانى
ياسمين:ثانيا تقربي من احمد وتعامليه كويس انتى قلتى انك بتحبيه وانه اخوكى الوحيد
هو بقى مفكر انك بتكرهيه

بسملة:بكرهه
ياسمين:ايوه مفكر كده عملتي ايه انتى يحسسه انك بتحبيه شايفة نفسك احسن منه وبتتعاملي معاه عالأساس ده
بسملة:خلاص والله مش هعمل كده تانى
وكمان هو بقي شاطر في المدرسة وبطل يتخانق ويعمل مشاكل وبابا وماما بقو بيعاملوه حلو زيى
ياسمين:تمام اتفقنا
بسملة:هو انا ممكن اطلب منك طلب
ياسمين:اطلبي
بسملة:هو احنا ممكن نبقي اصحاب زى ما انتى واحمد بقيتو صحاب
ياسمين وهى بتحضنها:طبعا ممكن اصحاب واخوات كمان

احنا بنات زي بعض وممكن نعمل حاجات كتير سوا وعايشين في نفس الاوضة بصي هنخربها انا وانتى
بسملة:بتتكلمى بجد
ياسمين:بتكلم جد جدا انا معنديش اخوات بنات كل اخواتى ولاد وانتى هتكونى اختى
بسملة:انا بحبك اوى واتبسطت لما لقيت ان احمد اتغير بسببك وبابا بطل يتخانق معاه
ياسمين:وانا كمان بحبك يا حبيبتي

بسملة طيبة ومش وحشة بس خالي عودها متفكرش غير في نفسها وان مفيش حد احسن منها هو اللي خلاها انانية كده خصوصا انه كان بيفرق بينها وبين احمد وبيضربه قدامها تحترم اخوها ازاى وهى شايفاه بيضرب قدامها
انا قربت منها وخدتها معايا الجامعة يوم عرفتها علي صحباتى هناك وبقيت اخدها ونخرج نجيب هدومنا سوا
نتفسح انا وهى واحمد واوقات كنا بنخرج كلنا وخالي ومرات خالي معانا
لما خلصنا اول سنة ورجعت البيت
بسملة كانت بتكلمنى كل يوم وتعيط علشان انا مش معاها
خالي جابهم هى واحمد قضو معانا شهر وانا رجعت اعيش معاهم تانى قبل الدراسة باسبوعين خالي طلب من ماما وبابا وهما وافقو وكانو فرحانين ان خالي وعياله بيحبونى اوى كده وعايزنى معاهم
بسملة دخلت ادبى في تانية ثانوى

قالتلي انها عايزة تدخل زىى كلية سياسة واقتصاد وتبقي معايا في الكلية ونقضى سوا اخر سنة ليا
وفعلا في تالتة ثانوى الحمد لله جابت مجموعها واكتر منه كمان ودخلت معايا سياسة واقتصاد
انا خلصت الكلية واليوم اللي كنت همشي فيه ارجع بلدنا لاهلي
مرات عمى حضنتنى وقالتلي انى بنتها اللي هى مخلفتهاش وانها مهما شكرتنى مش هتوفينى حقي على اللي عملته مع بسملة واحمد وانها زعلانة علي فراقى كان بسملة اللي بتسيب البيت بالظبط والله
وخالى قالى ان البيت ده بيتى اى وقت احب اجى هلاقيه مفتوحلى دايما واصر يوصلنى لحد البيت عند اهلي
بسملة كانت بتعيط بقالها تلت ايام اساسا

ووعدتها انى هكلمها كل يوم وانها هتيجى كمان شهر علشان تجيب معايا حاجات فرحى
اختى لازم تكون معايا حضنتني وهى بتعيط وقالتلي انى بالنسبالها اكتر من اختها
احمد كمان كان متضايق اوى كان في دموع في عينه بس منزلهاش قالى ان البيت هيضلم من غيرى
وانه هيلعب مين عالبلاي ستيشن ويكسبه بعد ما امشي
قلتله يلعب مع بسملة يقنعها تلعب معاه وهيكسبها لانها ملهاش فيه زيى بالظبط
وقلتله انه فاضل علي حلمة تكة كلها سنتين ويدخل الكلية مينساش حلمه وميضيعوش من ايده
قلتله انه اخويا الخامش ومعزته من معزة سليم ومحمد وعمر وعبدالرحمن اخواتى بالظبط
احمد اصر وجه معانا انا وخالي يوصلونى

وبعدها بشهرين انا اتجوزت ابن عمى انا مخطوباله من يوم ما وعيت عالدنيا معروف ان ياسمين لعلى وعلي لياسمين
علشان كده مكنش حد بيتقدملي اصلا من البلد
وفي ناس جيران خالي طلبو ايدى منه وهو قالهم انى مخطوبة لابن عمى ساعتها اتخطبنا رسمى وجبنا الشبكة ولبست الدبلة علشان الي حصل ده ميتكررش
علي ابن عمى راجل وطيب وجدع ومفيش في بلدنا كلها حد زيه انا عمرى مفكرت انى ممكن اتجوز حد غيره
وبسملة جت قبل الفرح بشهر وخالي ومرات خالى واحمد جم قبله باربع ايام
واتجوزنا انا وعلي وخلفنا

محمد واحمد وسمية واية وعلياء
بسملة اتجوزت واحد جارهم وخلفت منه ياسمين وعمر
والبشمهندس احمد الحمد لله حقق حلمه ودخل هندسة وبعد اعدادى اول سنة في كلية الهندسة اختار قسم ميكانيكا طبعا

اوقات بنعبر عن خوفنا غلط فيتفهم كره
واوقات بنشجع ولادنا غلط فيطلعو انانيين ومغرورين
فبدل منربيهم كويس ويطلعو سند لينا وعمل صالح لينا في الدنيا ينفعنا في دنيتنا واخرتنا
بيطلعو مصدر تعب ومشاكل بيبقو حسرة وخيبة امل كبيرة عمل غير صالح يشقينا في الدنيا ونتحاسب عنه في الاخرة قدام ربنا
لان ولادنا بيكونو زى ما بنربيهم لو ربناهم عالدين والاخلاق والحب والخير هتبقي دى اخلاقهم معانا ومع ولادهم ومع اللي حواليهم
انما لو معرفنهمش دينهم مربينهمش عالاخلاق مخليناش الحب والخير اساس حياتهم يبقي منلومش غير نفسنا علي اي حاجة هيعملوها فينا او في نفسهم او في اللي حواليهم
اللي بيزرع بيحصد فازرعو فيهم الخير علشان تحصدوه