قصص و روايات - قصص بوليسية :

مارد و الكورونا فصول خاصة بقلم أسماء جمال الفصل الثالث والأخير

مارد و الكورونا فصول خاصة بقلم أسماء جمال

مارد و الكورونا فصول خاصة بقلم أسماء جمال الفصل الثالث والأخير

مارد قفل و طلع جرى يلبس و همسه طلعت وراه و غرام طلعت من المطبخ ع صوتهم ..
مارد بقلق: مازن تعبان ف المستشفى و بابا معاه
غرام صوتها عيّط لواحده: تعبان ازاى يعنى ؟ ماله ايه اللى فيه ؟
مارد ساب التيشرت على رقبته و راح ضمها عليه: حبيبتى متقلقيش اكيد مفيش حاجه بس بنتطمن مش اكتر
غرام فتحت الاوضه جابت اى لبس و لبست و مارد كمّل لبسه و كانت همسه جهزت و نزلوا راحوا ع المستشفى ..

مراد قابلهم: انا خليت الدكتور حجزه
مارد لسه هينطق شاف ليليان بتكتم ضحكتها ف نوعا ما إتطمن و راح عليها و هى معرفتش تكتم صوتها تانى ف ضحكت بصوت عالى ..
غرام هديت شويه و ليليان لاحظت قلقها و وشها معيط ف حضنتها بحب: حبيبتى اهدى و الله كويس
غرام عيطت: امال ليه بابا جابكوا على هنا ؟ و ليه مازن اتحجز ؟
ليليان بصت لابوها بعتاب بس غصب عنها ضحكت: حبيبتى و الله ابدا كويس .. هو اصلا نزل الصبح كشف و عمل اللازم و الحمد لله النتيجه كويسه و رجع ع البيت
همسه بذهول: اما ايه اللى جابكوا تانى هنا ؟

ليليان بصّت لأبوها و كتمت ضحكتها معرفتش ترد و الكل فهم .. مارد و غرام بصوا لبعض و ضحكوا ف صوت واحد. ..
همسه هزت راسها بغُلب: مفيش فايده
مراد بغيظ: اه مفيش فايده و خليكى ف حالك احسن بدل ما اخليكى زيه
همسه برّقت: هتحبسنى ف المستشفى يا مراد ؟
مراد شدها عليه خدها تحت دراعه و همسلها: لاء انتى هحبسك ف حته تانيه
مارد و غرام ضحكوا و همسه ضحكت معاهم غصب عنها ..

الدكتور خرجلهم: هو زى ما قولتلك كويس و تحاليله سليمه
مراد رفع حاجبه: ده لسه عاملها
الدكتور: قصدى ع اللى عملها الصبح و
مراد بعِند: اما الجديده تبان
الدكتور: دى انفلونزا عاديه
همسه بقلق: بس من كلامكوا نفس اعراض الكورونا .. هو كل اللى يجيله حبة برد هيترعب الرعب ده و لا ايه ؟

الدكتور: لاء طبعا بس فى حاجات فارقه بينهم .. زى الانفلونزا التعب و الارهاق بتاعها بسيط و ممكن تحمّله لكن الكورونا تعبها حاد و صعب تحمّله او الهدوء معاه بالشكل ده .. كمان الانفلونزا تطور اعراضها خفيف و يكاد يكون معدوم، يعنى بتيجى بصداع و رشح و عطس و كحه و تفضل لحد ما تروح مفيش زياده ف كل حاجه .. انما الكورونا بتطور الحاله بسرعه مرييه و مفاجئه .. كمان الانفلوزنزا رشح و انسداد ف الانف لكن الكورونا لاء ..الانفلونزا الصداع معاها بسيط او يمكن لو خفيفه ميبقاش فى لكن الكورونا اساسها الصداع و بيبقى قوى لدرجة متعرفش تفتح عينيك .. الكورونا بتحس بقشعريره ف الجسم كده و تنميله الانفلونزا لاء .. الانفلونزا اساسها عطس و التهاب ف الحلق انما الكورونا لاء مفهاش عطس الا نادر قوى .. الكحه مع الانفلونزا ببلغم انما ف الكورونا بدون بلغم و ناشفه قوى ..

الم الجسم و الصدر و الصداع و تقل الصدر ده مش ف الانفلونزا و لو بقى موجود يبقى خفيف لكن ف الكورونا ده اساسى و تقيل ..
همسه: و مازن مفهوش كل ده صح ؟
الدكتور: لاء خالص و قبل ما يعمل التحاليل من الاول قولتله الكلام ده بس هو صمم ع الكشف يتطمن و الحمد لله
مازن جه على صوتهم بغيظ: قوله و النبى
غرام راحت عليه حضنته بقلق: حبيبى الف بعد الشر .. انفلونزتك تقيله قوى شكلها، باين ف وشك.

الدكتور: يشرب ليمون كتير و ينسون و يشرب حاجات سخنه و مش هو بس، اى حد الفتره دى لازم يشربها لأنها بتكوي أي مرض جوا جسمك
و غسيل الايدين بالصابون طول الوقت او بالمطهر و فركها كتير و ضم صوابع كل ايد و فركها ف كف الايد التانيه و فرق بين اباصابع ف بعض لمده نص دقيقه ع الاقل .. اى حد لان لحد دلوقت العلاج الوحيد المتاح للفيروس هو المناعه و كل ما كانت قويه بتهاجم الفيروس و تتغلب عليه و كل ما كانت المناعه ضعيفه من انفلونزا زى دى بيبقى فريسه سهله للفيروس.

مراد ببرود: يبقى احجزه عندك لحد ما يخف
كلهم ضحكوا و مازن ضحك بغيظ: يخربييتك يا مراد
مراد لف دراع حوالين ليليان و التانى شاور بيه لغرام خدها تحت دراعه و شاور لمارد: يلا
مارد إتحرك وراهم بيضحك قوى و همسه وقفت بذهول ..
مراد وقف و بصّ وراه لها: يلا
همسه رفعت حاجبها: انت هتسيبه بجد ؟

مراد هز راسه ببرود: مسمعتيش كلام الدكتور ؟ مناعته ضعيفه من البرد و جسمه فريسه سهله للفيروس يبقى ايه ؟ يقعد عشان يخف اسرع و يطلّع روحنا
الكل ضحك و مراد عمل نفسه اتلغبط: قصدى يطلع ده روحنا .. مازن ده روحى روحى .. يلا بقا يا روحى
همسه برّقت: انت ما صدقت و لا ايه ؟
مراد ضحك ببرود: الصراحه اه
خدها معاهم و إتحركوا يمشوا مازن صرخ: يخربيتكوا انتوا راضيين ع الكلام ده ؟

بص لمارد مارد رفع إيده بإستسلام: كان على عينى يا حبيبى ده انا واخد نفس الحبس بس بحمد ربنا ان اختك معايا
مازن بغيظ: يعنى انا هايص و اخويا لايص ؟
بص لغرام: انتى يا بت راضيه عن الكلام ده ؟
غرام قلدت مارد ف رفعة إيديها: كان على عينى يا ضنايا
مازن بص لليليان بمحايله: اوعى تقولى انك زيهم .. ازعل ده انتى بنت قلبى
ليليان معرفتش ترد من الضحك ف هزت راسها اه ..

مازن بغيظ: ده انتى بنت صرمه
بص لهمسه اللى لسه هترد مراد شدها و إتحرك يمشى: لاء انتى ملكيش دعوه
مارد شاورله بإيده: مش كنت عايز حظر اشرب بقا .. حظر سعيد لبعد العيد يا ميزووو
سابوه و مشيوا بيضحكوا و مراد شاور للدكتور: اسبوعين حجر ميخسوش ثانيه و انا اللى إستلمه منك .. عارف لو خرج هقتلك
مازن برّق بغيظ و هما مشيوا رجعوا ع البيت..
همسه: مراد انت هتسيبه بجد ؟

مراد ببرود: عشان يتربى، ده علّم بنتى الكدب
همسه بغيظ: قول كده بقا، حرام عليك يا مراد ده له الجنه منك انت و بنتك
مراد ببرود: احسن
مارد قعد جنبهم بضحك: الحمد لله عدت على خير، انا فعلا إترعبت اما كلمتك
مراد: انت اهبل ؟ هو لو فيه حاجه بجد كنت هاخد ليليان معاه او هكلمك تيجى ؟

همسه رفعت حاجبها: هو الواد ده ملهوش اهل يسألوا عليه و لا ايه ؟ انا هكلم مهاب
مراد ضحكلها ببرود: عارف، كلمته و طمنته و ميقدرش يهوّب ناحيته
همسه: طب ليليان ؟
مراد ببرود: اما يخف
همسه تنّحت: عايزُه يقعد اسبوعين ميشوفش مراته ؟ ما تقول ان ده غرضك من الاول
مراد هز راسه بإستفزاز: اه
همسه بغيظ: لاء انت معتش ينفع يتسكت عليك
مارد و غرام ضحكوا و همسه بصتله: انت تعرف تستغنى عنى كده يا مراد ؟ تقعد اسبوعين متشوفنيش ؟ ده انت لو انا دخلت الحمام بتقفلى ع الباب زى العيال الصغيره.

مراد برّق اما مارد و غرام ضحكوا: انتى بتسيّحيلى قدام عيالى يا بنت سليم ؟
همسه رفعت حاجبها و هزت راسها بمعنى مفيش فايده ..
مارد: الموضوع لازم له حملة توعيه على فكره .. كده الوضع بيتأزم و بيخرج عن السيطره و الناس مش ملتزمه و بيخرجوا و استهتارهم حتى لو قليلين هيضيّع الكل
غرام: هتعمل ايه يعنى ؟ هتلف على البيوت تفهّمهم ؟
مارد بجديه: و ايه المشكله ؟ من غير لف ع البيوت الشوارع مليانه لسه و محتاجين توعيه
همسه برّقت: يخربييتك يا مراد انت عايز تلف الشوارع تقول للناس متنزلوش الشارع ؟ و هما كده هيقتنعوا اما يلاقوك نازل ف الشارع عشان تقولهم متنزلوش الشارع؟

مراد كان هيرد على مارد بحاجه بس اما همسه ردت وقف بالكلام و ضحك قوى على لهجتها و كلهم ضحكوا ..
غرام زقته و راحت قعدت جنب همسه و ضحكوا: ده انت غلبت بتوع اسكندريه بقا
ليليان قامت من جنب ابوها راحت جنب همسه و غرام: انت اسكندرانى يالا ؟
غرام ضحكت بإستفزاز و بصت لمراد: بابا اوعى تشجعه لا نصبح تانى يوم نلاقيه نازل الشارع بيكبّر يسقط يسقط حكم الفيروس
همسه ضحكت بتريقه: ايوه ايوه و يهتف بقا ياللى ساكت ساكت ليه، جيبت الكحول و لا ايه ؟

ليليان: و متنساش التكبير و حرق العلم ده مهم
مارد كان مبرّق و اما طوّلوا ف الألش قام عليهم و عمال يتلفّت حواليه و اما معرفش يسكّتهم فضل يشيل من الخداديات حواليه و يحدف عليهم و يميل يكتم وشهم بيها و الكل بيضحك ..

طلعوا يناموا و مارد قعد بتفكير ..
غرام قعدت جنبه بذهول: انت لسه مصمم ع الحمله دى ؟
مارد ضحك: هعمل حاجه اظرف
جاب لوحات و قسّمها و إبتدى يكتب عليها.

توعيه
اما يعطس أو يكح اى حد مصاب من غير ما يكون عارف او لابس كمامه بيخرج الفيروس من الرذاذ المتطاير و بينتشر في المكان حواليه من مقاعد أو طاولات وغيرها من الأسطح و اما يلمس حد غيره الحاجات دى بعدين يلمس عينيه أو بوقه او مناخيره ف بيتنقله الفيروس فورا خاصة ان فيروس كورونا بيفضل نشطا لمدة 48 ساعة على الأسطح.، عشان كده ابعدوا عن لمس العينين أو أي جزء من الوش قدر المستطاع.

معنى كده انك علشان تصاب بالفيروس لازم يدخل من ال3 منافذ دول، غير كده مش هيدخل.
يعني إيه؟ يعني الفيروس مبيتنقلش من الجو، مبيتشمش،
مفيش كائن هلامي في الهوا هنشمه ويموتنا، دي شائعات
الفيروس كمان مبيخترقش الجلد..

يعني من الآخر، علشان تصاب بالفيروس، لازم تكون لمست/قبلت/ عانقت شخص (أو جسم صلب) عليه الفيروس وبعدها رفعت إيدك لمناخيرك أو بوقك أو عينيك وبعدها الفيروس بيبدأ يخش لجهازك التنفسي علشان يهاجم جسمك..
من هنا فكل الكلام اللي جاي ده لو التزمت بيه بنسبة كبيرة فأنت هتحفظ نفسك من الإصابة بالفيروس بنسبة كبيرة ومش بس بتحفظ نفسك
وإنما بتحفظ آلاف وربما ملايين البشر:

1- متحطش إيدك خالص على بوقك أو مناخيرك أو عينيك، ولو مبتقدرش تتحكم في ده انتقل لرقم 2 .
2- اغسل إيدك بالماية والصابون لمدة 20 ثانية، حك إيديك الاتنين جامد بحيث تزيل أي جراثيم عليهم، دول متوفرين عند أي حد،
مش لازم ديتول، مش لازم كحول، (لو وُجد فأهلا وسهلا) لكن الماء والصابون كافيين جدا.

3- بلاش سلام ولا تقبيل
طاب لو سلمت أو قبلت؟
متحطش بعدها إيدك على عينيك أو بوقك أو أنفك، اغسلها 20 ثانية الأول.

4- بلاش خروج من البيت، ولو خرجت بلاش تلمس أجسام غريبة، حافة كرسي المترو، ماكينة التذاكر، متسندش إيدك على السلم الكهربا، متحطش إيدك على السنّادات اللي فوق،
بص من الآخر، أول ما تخرج من بيتك حط إيدك في جيبك ومتخرجهاش إلا للضرورة القصوى، أظن بسيطة دي.

5- متعطسش غير في منديل وبعدين ارميه علطول، معاكش منديل، يبقى امسح في كمك، آه متتكسفش، حط وشك في كوعك على الهدوم واعطس فيه، بس اوعى تعطس أو تكح في إيدك. دي أسرع وأخطر وسيلة لنقل الفيروس.

6- الكمامات ملهاش لازمة لو أنت مش عامل في المجال الطبي، المناديل ومطهر كحول (60% أو أكثر) هتكون أفيد، متشجعش جشع تجار الأزمات وتشتري كمامات بأضعاف تمنها الأصلي.

7- لو حسيت بأعراض الفيروس، واللي هيا ارتفاع درجة الحرارة (فوق 37.3)، السعال (الكحة الناشفة المستمرة)، الرشح، وأعراض الإنفلونزا التانية، بالترتيب كده، يبقى انزل على أقرب مستشفى، ولو مش متوفر، يبقى اعزل نفسك، وبلاش سلام ولا خروج من البيت خالص.

8- لو عملت كل اللي فات ده الفيروس مش هيهزمك بإذن الله، ولو حصل وأصبت بالفيروس فالإحصاءات لحد دلوقتي بتقول إن نسبة الشفاء منه عاليه
لو فتحت السوشيال ميديا هتحس إن العالم نهايته قربت،

وهتلاقي أجواء من الرعب والخوف و دول ضررهم أكبر بكتير من الفيروس نفسه.
الناس في أمريكا وأوروبا نزلوا يخلصوا على كل المنتجات في السوبر ماركت بسبب سيطرة الذعر عليهم،
ده مش صح، إحنا في معركة مع الوقت، بنحاول نكسب وقت لصالح البشرية هنلاقي علاج أو لقاح بإذن الله،
لكن لحد ما ده يحصل دورنا هو تقليل عدد الإصابات قد ما نقدر بالتعليمات"
خلّص وبص لغرام: الصبح هننزل نعلّقهم ف الشارع
مارد و غرام كتبوا كتير من اللوحات دى

تانى يوم ليليان صحيت بدرى و لبست براحه و نزلت من اوضتها بهدوء و لسه بتتحرك سمعت أبوها بيندهلها: باربى

ليليان ضحكت ضحكه صامته بغيظ: حبيبى صباح الخير صاحى بدرى قوى كده ليه ؟
مراد رفع حاجبه: انتى اللى صاحيه بدرى ليه كده ؟
ليليان مثّلت البراءه: الشغل
مراد قرص خدودها: و الله يستاهل يتحبس فى معتقل مش مستشفى اللى علمك الكدب ده.

ليليان ضحكت غصب عنها و مراد لف دراعه حواليها و دخل المطبخ: هو برده تقيل و مناعته ضعيفه و لو خرج هيتعب اكتر و يبقى لا قدر الله سهل يتآذى .. ده غير إنك مناعتك ضعيفه و حتى لو برد بس هيبقى بردوا سهل تاخديه منه .. يبقى الاسلم ايه ؟ يفضل لحد ما يخف
ليليان ضحكت قوى و مش عارفه تقول ايه و مراد خدها و دخل ع المطبخ: يلا يا شيخه بلا مازن بلا بتنجان .. احنا نعمل فطار حلو و حبة شاى بقا و نمزمز فيهم
ليليان دخلت معاه و إبتدوا يجهزوا اكل ..

همسه كانت لسه صاحيه و سمعت حوارهم برّقت بغيظ: لالالا انت لازم حد يلحقك و الله .. ميتسكتش عليك
طلعت اوضتها دخلت سريرها بغيظ رجعت تنام ..

مراد قعد مع ليليان كتير تحت و عملوا اكل و فطروا و شاى بعدها خدها و طلعوا: ادخلى بقا نامى انتى صاحيه بدرى قوى يا ام شغل
ليليان ضحكت و مراد قرصها من خدودها: و اوعى تكدبى تانى لا اخنقهولك
ليليان ضحكت و راحت على اوضتها: لا و على ايه ؟

مراد دخل اوضته لقى همسه نايمه، قرّب منها و لسه هيغلس عليها لقى وشها احمر بشكل استغربه اكتر ما خضّه ..
مراد حط إيده على قورتها لاحظها دافيه ف هزها قوى: همسسه... همسسسه
همسه صحيت بخضه: ايه يا مراد ؟ حد يصحّى حد كده ؟
مراد مردش بس ركز ف صوتها اللى منبوح و بتكح: انتى مالك فيكى ايه ؟
همسه كحت قوى: كويسه، فيا ايه ؟

مراد شدها عليه خدها ف حضنه: لالا انتى جسمك دافى و عماله تكحى ..
همسه عطست مره ورا مره و مراد مرضيش يخرّجها من حضنه ..
همسه بصتله بتوتر: عادى انا اخدت حمام امبارح و نمت تحت التكييف ف اكيد خدت برد
مراد بقلق: لالا اكيد ابن اخوكى الكلب عداكى .. يلا هخدك على المستشفى
همسه: لالا انا كويسه
مراد بحده: يلا احنا هنعمل زى العيال الصغيره و لا ايه ؟

همسه وقفت بتوتر و فضلت تتلفت حواليها و لمّت حاجتها و دخلت لبست اى حاجه ينفع تخرج بيها و لبست كمامه و جوانتى: خلاص انا هخلى السواق يوصلنى و انت خليك هنا مع مارد و غرام
مراد بذهول: انتى عايزانى اسيبك ؟ اتجننتى و لا ايه ؟
همسه بقلق: لو فى حاجه انت هتتأذى .. كمان خد حذرك و لم حاجتك و اخرج من الاوضه
مراد بحده شدها عليه: مش هيحصل و اسكتى بقا مفيش حاجه، انا غلطان اصلا انى قلقتك
همسه حطت إيدها على قورتها و جسمها و وشها قلق: لا يا مراد مش هينفع
مراد بحده: يبقى معاكى
همسه زعقت: بس بقا انت بتقلقنى زياده، لا انا هتصرف.

إتلفتت جابت موبايلها و كلمت أبوها: بابا حبيبى ممكن تبعتلى السواق
سليم بقلق: فى حاجه و لا ايه ؟ و مراد فين ؟
همسه حاولت تهدى: مفيش هروح اكشف و اجى ع طول متقلقش
آبوها: انا جايلك اصبرى
مراد بصّلها بذهول: خلصتى ؟ طب ريّحى نفسك بقا عشان مش هيحصل
أبوها قفل معاها و جالهم ع البيت و همسه نزلتله: حبيبى متقلقش انا كويسه بس عايزه اتطمن بس
أبوها شدها: خلاص يلا هخدك
مراد نزل شدها منه: انت رايح على فين ؟ قفص جوافه انا ؟

أبوها: انا هخدها ف العربيه خليك انت شوف البيت لحد ما اكلمك
قبل ما مراد يرد ابوها كان شدها و خرج و قفل الباب ..
مراد راح ع الباب يفتحه لقاه اتقفل الكترونى ف زعق قوى: بلاش زفت تهريج ..
فضل يزق فيه معرفش طلع على فوق فتح دولابه جاب مسدسه ضرب طلقه عليه ورا التانيه كسره ..
مارد كان نايم قام مفزوع: ايه ده فى ايه ؟
غرام وقفت ع السرير: الحق يا مراد
مارد ببلاهه: يكونشى مازن خرج ؟
غرام ضحكت قوى: مازن ايه ؟ كده ابوك قتله ؟

نزلوا جرى لتحت ع الصوت لقوا مراد متعصب و كسر الباب ..
مارد راح عليه بخضه: حبيبى انت كويس ؟
مراد إتنفس بالعافيه و صوت انفاسه عالى قوى و بينهج زى اللى بيعمل مجهود للكلام فبيتكلم كلام ورا بعض: أمك تعبانه .. خدوها ع المستشفى .. راح بيها .. هى صاحيه تعبانه .. هى كانت كويسه .. سابتنى هنا و مشيت .. سابتنى لوحدى .. مشيت
مارد راح ضمه عليه: طب ششش اهدى اهدى
غرام بقلق: مين ده اللى خدها للمستشفى ؟

مراد صوته مهزوز: ابوها
مارد تقريبا فهم ف كتم ضحكه طلعت غصب عنه: طب تعالى
مراد زقه: انا رايحلهم
خرج و مارد خرج وراه و غرام طلعت بسرعه لبست دريس على وش هدومها و خدت طرحه ف إيدها و نزلت وراهم ..

مشيوا شويه بالعربيه و مراد بص لمارد بإستغراب: انت رايح فين ؟ هو جدك هياخدها ع البيت و لا ايه ؟
مارد حاول ميضحكش: مبيردش ع الموبايل ف ع الاقل هسأله رايحين على فين .. بعدين طالما ماما مرضيتش بيك تروح معاها اكيد مرضيتش بيه هو كمان
مراد زعق: سنتها سوده بس تصبر.

راحوا ع البيت و اول ما وقفوا مراد زق العربيه بحده و نزل خبط ع الباب ورا بعض قوى و اول ما الباب إتفتحله زقه بحده و دخل من غير ما يبص: همسه فين ؟
سليم: لاء انا قولتلك تعالى من غير ما تتصل بس مش لدرجة تكسر عليا الباب
مراد إلتفت له بصدمه: انت هنا ؟ انت سيبتها تروح لوحدها و لا ايه ؟ انت اتجننت ؟
سليم لسه مردش مهاب رد بس معرفش يكمل من الضحك: مرضيتش هى اصلا
مراد رفع حاجبه و لسه هيرد خد نَفس كده بترقب و رجع خد نَفس تانى و تالت و بصّلهم بترقب: همسه هنا صح ؟
الاتنين ضحكوا و مراد كمل: ريحتها اهى .. هى هنا.

سليم ضحك بصوت عالى: يعنى اسيبك تعمل حما لوحدك .. مش حما انا و لا ايه ؟
مراد برّق: ده سنتك انت و بنتك مش معديه .. كمان بتهزر ؟
سليم ضحك اكتر: امال اسيبك تهزر لوحدك ؟ انت فاكر حفيدى موراهوش حد و لا ايه ؟
مهاب رفع إيده و مثّل الخوف: و ربنا ما ليا دعوه
همسه نزلت و مراد برّق ف طلعت تجرى ع الجنينه و مراد جرى وراها لحد ما لقفها و لفها ف حضنه و همسلها: اول و اخر مره تعملى كده.

سليم بإستفزاز: احسن عشان تتربى
مراد شاور على نفسه انا و سليم هز راسه اه: الله يرحم ايام ما كنت مبتعرفش تتنحرر و بتاخد تعليماتك منى .. يابنى ده انت كنت زى اللى ماشى بريموت منى
مازن كان داخل بعربيته و راح عليهم: و ايه كمان افضحه افضحه
سليم: هاا هتتلم و لا اسيّحلك ؟
مراد برّق: يخربييتك يا سليم انت بتنشر غسيلى قدام العيال ؟
سليم شده عليه مسك رقبته من ورا و مراد ميّل بضحك: سيديهاتك كلها معايا و بعدين كان لازم اقرصك عشان متنساش
مارد صفّر: و ربنا كنت عارف ان الجون ده منك ..

مازن صفّر التانى: الله عليييك يا حبيب والدييك و الله كنت عارف انك انت اللى هتجيبه
مارد سقّف: الله عليك يا بنى .. كنت فين من زمان ؟ فين طريقك فيين بيروحوله منين ؟
سليم ضحك جامد: لاء أبوك انا اللى سايبُه ف الملاعب بمزاجى ..
مارد بضحك: لا عجبتنى بعد ما كنت بشحورك ف سرى
سليم لسه ماسك مراد بس بص لمارد و برّق: انت كنت بتشتمنى يا ابن مراد ؟
مارد ضحك: واحد طالع من تحت ايده عاصم المتخلف و يحيي الاهبل و مهاب المجنون و مراد زعيم العصابه عايزنى اعمله ايه ؟ اقراله الفاتحه ؟
سليم ضحك قوى و ساب مراد بس لف دراعه حواليه ..

همسه بصت لمازن: على الله تتنحرر مش كل مره هتيجى معايا سليمه
مازن حدفلها بوسه ف الهوا: قلبك ابيض قوى يا عمتو
همسه رفعت حاجبها: و ياريته هيطمر ياللى كنت عايز تقتلنى
مازن بنفس لهجته حدفلها نفس البوسه: قلبك اسود قوى يا عمتو
مراد زق سليم و راح عليه فصلهم هو و همسه عن بعض بغيظ: ده انت سنتك مش هتعدى انت و عمتك
مازن زقّه لزقه ف همسه اكتر اول ما شاف ليليان داخله: خليهالك انا رايح للباربى بتاعتى
مراد راح عليه بيشده و مازن جرى شد ليليان و خرج جرى: و الله ما يحصل .. تاخد مين انت مديهالى تقسيط و لا ايه ؟

مراد لسه هيرد راح عطس، سكت ثانيه و هيتكلم عطس تانى، سكت و لسه هيتكلم راح عطس ورا بعضه ..
الكل ضحك و هو غصب عنه ضحك معاهم ..
مازن شد ليليان و جرى: يلا يا بت ابوكى عنده مكرونه
الكل ضحك و هما جريوا ف الشارع ورا بعض و مراد بيجرى وراهم راح عطس جامد ورا بعض .. حد كان معدى راح جرى و فضل يبص عليه ..
مراد شاورله و لسه هيتكلم عطس جامد و الراجل جرى بسرعه ..
الكل ضحك ع المنظر و مراد ضحك غصب عنه معاهم ..
مراد جرى ورا مازن: خد يلا
مازن بينهج من الضحك: و الله ما يحصل، هتمشى و لا اخلى العيال ف الشارع تجرى وراك و تقول عنده مكرونه ؟
مراد لسه هيرد راح عطس تانى و تالت و عاشر و مارد اخد همسه و غرام و خرجوا وراه و الكل بيضحك ..

تمت

تمت
نهاية الرواية
أرجوا أن تكون نالت إعجابكم
جميع الفصول
روايات الكاتب
روايات مشابهة
الآراء والتعليقات على الرواية
W