قصص و روايات - قصص رومانسية :

رواية ما بعد الرحيل للكاتبة ياسمين أحمد الفصل الحادي والعشرون

رواية ما بعد الرحيل بقلم ياسمين أحمد

رواية ما بعد الرحيل للكاتبة ياسمين أحمد الفصل الحادي والعشرون

مايسه كانت نايمه فى المستشفى بعد ما الكل سابوها فتحت عينها لقت جاسم جنبها ومحاوطها بدراعاته ومستغرق فى النوم فضلت تتأمله وهو نايم ولعبت فى شعره وهى بتدعى ربها انه يخليه لها جاسم فتح عينه شويه وظبطها وهى متلبسه بتأمله بعشق وعمل نفسه نايم وبعدين ضمها بقوة ودفن وشه فى رقبتها ولما حس انها عرفت انه صحى ابتسم لها وهى بادلته ابتسامتها وهى لسه فى حضنه وفضل باصص لها بحب جارف.

جاسم: عامله إيه النهاردة .
مايسه دفنت وشها فى صدرة واتمسكت بيه اوى من هدومة وجاسم رفع وشها وهو لسه بيتأملها وهو ساكت:أنا كويسه ياجاسم صحيح اللى حصل أمبارح فى العزبه ماكنش سهل عليا وكنت هاموت من الخوف ساعه لما قربت العفريته اوشبح الست المرعبة دى واللى أنا عندى يقين أنها داليا بس الحمد لله وجودك جنبى هدانى وحسيت بالأمان معاك.

جاسم وهو بيملس بايدة على وشها وهو مبتسم:روح قلبى طول ما انتى معايا ومهما حاولوا يعملوا هاتفضلى هنا...... وشاور بايدة على قلبه: مهما حاولوا يبعدونى عنك مش هأبعد ابدا وهافضل جاسم حبيبك وانتى حبيبتى وكل ماليا وبس .

مايسه بخوف :أنا خايفه آوى ياجاسم الأيام تبعدنا وتفرقنا عن بعض خايفه أوى.
جاسم بهيام وقرب شفايفه وباسها برقه من جانب شفايفها ورجع ملس بايدة على شفايفها برقه :متخافيش لا يمكن أسمح لحد أنه يفرقنا عن بعض مهما حصل.

مايسه بأمل:ربنا يخليك ياجاسم وتفضل تحبنى طول العمر.
جاسم حضنها أوى وغمض عينه:ويخليكى ليا ياقلب جاسم.
شويه والباب خبط وجاسم بعد عنها وإذن للطارق بالدخول.
جاسم:أدخل.
الكل دخل علشان يطمنوا على بنتهم.
طه:إزيك دلوقتى يابنتى.
مايسه:الحمد لله يابابا أحسن الحمد لله.

فوزيه بحزن :ياعينى عليكى يابنتى دايما يحصل لك كل شويه حاجه كدة.
جاسم بثقه:اطمنى ياطنط أنا بعت واحده ورا داليا تعرف عنها كل حاجه وتراقبها كويس وفى خلال يومين على الاكتر هاعرف بنفسى إيه اللى حصل.
مايسه:طيب وليه ماقلتليش ياجاسم.

جاسم:مايسه أنا من أول ماشوفت الصوابع معلمه على رقبتك وبعدها قلتيلى أنك عندك شك أنها داليا وأنا كلفت واحده تدخل الفيلا على أنها خدامه وتراقبها وتقولى على كل حاجه بتحصل أول بأول بس اطمنى لان لو طلع احساسى صح والله ماهعتقها .
مايسه بخوف:لا ياجاسم ارجوك بلاش أبعد عنها علشان خاطرى.
جاسم بضيق:ولحد إمتى هافضل ساكت عليها يامايسه أنا لازم أعلمها إنها ماتجيش جنب حاجه تخصنى وانتى تخصينى يامالكه قلبى.
شويه وتليفون جاسم رن فتحه ورد على طول.

جاسم:أيوة ياست فاطمه وصلتى الفيلا ولا لسه.
فاطمه:أيوة ياسعادة البيه لسه وصله حالا.

جاسم:تمام اوى وزى مااتفقنا أمبارح تطلبى منها أنك تشتغلى خدامه عندها على اساس الوظيفه اللى نشرتها فى الجرنال وتسمعى كل كلمه هاتقولها وتبلغينى بكل حاجه اول باول مفهوم.
فاطمه :حاضر ياسيدى.
جاسم قفل معاها وبص لمايسه:خلاص الست اللى كلفتها راحت الفيلا دلوقتى وبعدها بيومين هاتبلغنى بكل حاجه وياويلها منى لو اتاكدت شكوكى وظنى طلع فى محله ........سكت شويه وبعدها وكمل كلامه: المهم تستريحى انتى وماتشغليش بالك خالص.

فى فيلا السويفى .
الجرس رن وفتحت داليا بقميص نوم زهرى قصير وعليه روب خفيف وبصت لفاطمه من فوقها لتحتها واتكلمت بعجرفة.
داليا :أيوة.
فاطمه:أنا خدامتك فاطمه ياستى.
داليا: اه أنتى الشغالة الجديدة.
فاطمه:أيوة ياستى وحضرتك كنتى بتدورى فى الجرنال على خدامه تخدم عندك قرأت الخبر وجيت علشان أشتغل .
داليا بعجرفه واستعلاء:طيب ادخلى اغسلى المواعين وامسحى الفيلا وحضريلى الفطار.
فاطمه:أمرك ياستى.
بعد شويه تليفون داليا رن وكان المتصل شريف أخدت تليفونها وفتحت الاسبيكر وردت عليه وراحت اوضه نومها وقفلت الباب وراها بس سابته مفتوح شويه .

داليا:أيوة يا شريف عرفت حاجه ريح قلبى بقى.
شريف باسف :للأسف ياداليا لسه عايشه ولما كنتى بتخنقيها فقدت وعيها بس لكن مامتتش.
داليا كان فى ايدها كوبايه عصير وبكل الغل اللى جواها راحت رمياها على اخر دراعها ومرايه التسريحه اتكسرت كلها.
داليا بغضب وغل:لا كده كتير ازاى عايشه ازاى ده أنا كنت بخنقها بايدى الإتنين دول أنا هاتجنن ياشريف هاتجنن.
شريف:أهدى ياداليا خلينا نفكر بالراحه وبالصح.

داليا بكرة:أنا عاوزة اقتلها يا شريف عاوزة افش غلى منها.
شريف بعصبيه :وبعدين معاكى ياداليا قلتلك أهدى مش كده.
داليا وهى لسه بتتكلم بعصبيه وغل:غصب عنى يا شريف بجد أنا اتخنقت كل ماافكر فى مصيبه اعملها علشان أخلص منها تنجى منها برضه.
شريف بمكر:أنا هاخلصك منها.
داليا بحماس:ازاى؟ .
شريف:هاقولك بعدين سلام ياقمر.
داليا:أوك سلام يا شريف.

فاطمه كانت قريبه من اوضه داليا وسمعت الحوار اللى بينها وبين شريف وبدأت تسجل كل كلمه بتقولها ولما خلصت داليا كلام فاطمه بعدت عن اوضتها وعملت نفسها أنها شغاله فى البيت وبتنظفه. فات يومين وفاطمة على الحال دة بتراقب داليا حاولت بعد كدة تسمع اى حاجه بينها وبين شريف لكن داليا كل مكالماتها بعد كدة كانت بالهمس علشان محدش يسمعها.وبعد اليومين فاطمه طلعت فى جنينه الفيلا و بعدت بعيد واتصلت على جاسم.

جاسم فتح فونه ورد:أيوة ياست فاطمه عرفتى حاجه؟
فاطمه:أيوة يابيه الست داليا فعلا كانت فى عزبه حضرتك هى وسى شريف وسمعتها وهى بتقوله انها كانت بتخنق الست مايسه علشان تخلص منها وحاجات كتيرة كدة حاولت افهمها لكن للاسف معرفتش لانها كانت بتقفل على نفسها باب اوضتها وتقريبا كل كلامها كان بالهمس .

جاسم بغضب:كنت شاكك أنها هى بس خلاص اتاكدت شكرا ياست فاطمه كفايه عليكى كدة المهم عاوزك تخرجى حالا من الفيلا وتعاليلى العزبه علشان تاخدى أجر اليومين اللى اشتغلتى فيهم عند داليا.
فاطمه:خيرك سابق يابيه .
جاسم:معلش ياست فاطمه تعالى علشان خاطرى .وآه ماعنتيش تروحي الفيلا تانى.
فاطمه:حاضر يابيه أى خدمه تانيه.
جاسم:لا متشكر ياست فاطمه.
جاسم قفل فونه وبص لمايسه واتكلم بثقه:هى اللى كانت بتخنقك يامايسه وهى اعترفت بلسانها على كدة هى الجانيه على نفسها...لسه هايقوم بس مايسه مسكت ايدة برجاء.

مايسه:جاسم داليا بتعمل كده علشان تروح لها لانها بتستفزك أرجوك حبيبى بلاش انفعال وتهور علشان الامور مش تتعقد اكتر.
جاسم:اللى زى داليا دى لازم تتربى علشان تبعد عنك وعنى.
مايسه برجاء:علشان خاطرى بلاش.

جاسم:متخافيش أنا مش هاعمل لها حاجه أنا هاخوفها بس...سكت شويه وبعدين بص لهانى:هانى.خدوا مايسه ورجعوها العزبه على مااجى.
هانى بص لجاسم واتكلم بتأكيد على كلام اخته:جاسم مايسه معاها حق بلاش تهور.
جاسم:صدقونى ياجماعه أنا مش هاعمل لها حاجه دى يدوبك هاتبقى قرصه ودن بس علشان تبطل تاذى حبيبتى.
محمد:خد بالك منها يابنى دى شرها فاق الحد.
جاسم:ماتقلقش يابابا أنا هاعرف أتصرف كويس أوى معاها المهم لما الدكتور يجى يكتب لمايسه على خروج خدوها علشان تستريح على مااروح اادب داليا وراجع على طول.

 

فى فيلا السويفى .
جرس الفيلا رن وكانت الخادمه الجديدة جت بعد ما فاطمه ما سابت الفيلا وقالت لداليا أن فى واحده جديدة هاتيجى تخدم لها بدلها لأن بنتها تعبانه ولازم تفضل جنبها فتحت الباب وكان جاسم واقف بكامل اناقته وهيبته واتكلم بصوت رجولى.
جاسم:ستك هنا.
الخادمه:أيوة ياسيدى موجوده تحب نقول لها مين.
جاسم:قولى لها جاسم المنصورى.

الخادمه :حاضر اتفضل أقعد وأنا هاطلع ابلغها.
الخادمه طلعت الدور التانى من الفيلا ووصلت لحد اوضه داليا خبطت وداليا اذنت لها بالدخول.
الخادمه:فى واحد تحت ياستى بيقول إسمه جاسم المنصورى.
داليا بكره وغل وحقد:طيب أنا نازله اهوة.

داليا نزلت بقميص قصير أسود بحملات وفردة شعرها ومخبيه اثر خربشه مايسه اللى رقبتها وهى بتدافع عن نفسها وظهر على جانب شفايفها ابتسامه سخريه وشماته.
داليا بتريقه:والله زمان ياجاسم نورت فيلتى.
جاسم قرب منها والشر طالع من عينه ووجه سبابته لها بتحذير.
جاسم بغضب:أنا بحذرك ياداليا وده هايبقى آخر تحذير لكى لو فكرتى تيجى جنبى او جنب مايسه تانى مش هايحصلك كويس وقد أعذر من أنذر.

داليا فضلت باصه له بغل واتكلمت بتريقه : قال وأنا اللى فاكره أنك جاى تعتذرلى عن ضربك ليا وكمان وسبتنى.خلاص نسيت حبك ليا نسيت وعدك ليا أنك عمرك ماهتتخلى عنى ......سكتت شويه وكملت بفحيح افعى:اه صحيح نسيت أن فى واحده تانيه حلت فى قلبك محلى وبعدين أنا مش فاهمه أنت بتتكلم عن إيه؟.

جاسم اتكلم بحدة :إنتى عارفه كويس آوى إنا بتكلم عن ايه عن إنك مجرمه كنتى عاوزة تخلصى من مايسه على طريقة افلام الرعب الامريكيه وأنك لبستى لبس واحده فى فيلم مرعب وإنك كنتى بتخنقيها علشان تموتيها وتحرقى قلبى عليها.

قرب منها وبعد خصله من شعرها وظهرت الخربشه اللى فى رقبتها ابتسم بخسريه وكمل : واكيد الخربشه اللى على رقبتك دى اكبر دليل على ان مايسه كانت بتحاول تدافع عن نفسها وانتى بتخنقيها .وقبلها واللى أنا متأكد منه أنك برضه ورا حادثه الاسطبل وبعدها كلفتى حد يحط لها التعبان فى الأوضة اللى بتنام فيها فى العزبه علشان تخلصى منها زى ماحاولتى تخلصى منى انتى وشريف يوم مسابقه الخيل تحبى أعد لك المصايب اللى أنتى وراها ولا كفايه كدة على فكرة سايبك بمزاجى بس صدقيني صبرى عليكى هايخلص وساعتها هدوقك من نفس الكأس اللى عماله تشربيه لنا وهاتشوفى منى وش عمرة ماهايعجبك فبلاش تلعبى لعبه أنتى مش قدها ماشى ياداليا.

داليا بارتباك :إيه حيلك حيلك كل دى اتهامات ليا وبعدين إيه اللى يثبت أنى ورا كل ده ها .....سكتت شويه وبعدها وبلعت ريقها بصعوبه :اما الخربشه اللى على رقبتى دى فدى كانت خربشه القطه اللى بربيها عندى خربشتنى اما بالنسبه للكلام اللى قلته دة فكله كلام مرسل .

جاسم ابتسم بسخريه لانه فاهم الاعبيها كويس وطلع من جيبه شريط تسجيل وحب يسمعها الحوار اللى دار بينها وبين شريف....جاسم :ماشى تحبى تسمعى اوك أسمعك.... فتح شريط التسجيل وهى سامعه ومصدومه ازاى عرف؟ هاسمعتى كويس الشريط اللى ضدك عن محاولتك خنق مايسه وأن خطتك فشلت واللى قالك أنها عايشه هو شريف بنفسه وانك طلعتى اكبر كدابه.ها فى دليل أكتر من كده؟

داليا بصدمه وارتباك وكانت لسه بتبلع ريقها بصعوبة بعد مااتاكدت ان جاسم اكتشف كدابها:بص انا هاقولك على كل حاجه انا فعلا لبست اللبس المرعب وحاولت فعلا انى اخنقها بس ده كان تأديبا لها مش أكتر علشان اخدتك منى وسبق وقلتلك انى كنت بعيد عن اللى حصل يوم مسابقه الخيل اما عن حادثه الاسطبل وحكايه التعبان اللى انت بتتكلم عنها فأنا معرفش حاجه ومش هاسمحلك أنك تتهمنى بحاجات مافيش أى دليل واحد ضدى أنى عملت حاجه من دول.

جاسم كان بيتفحص ملامحها وهو عارف أنها لسه مستمرة فى كدبها واتكلم بزهق:ماشى ياداليا انا هاعمل نفسى مصدقك ولو أنى متأكد انك لسه بتكدبى كدبه ورا التانيه وأنك ورا اللى بيحصل ده من يوم ماسيبتك وارتبطت بيها بس للمرة الاخيرة بحذرك اهوة ابعدى عنى وعن مايسه ياداليا احسنلك .......سابها ومشى ورزع باب الفيلا بعنف.

داليا بحقد وغل :ولو برضه مش هاسيبك تتهنى بيها يا جاسم و هاندمك وهاتدفع التمن غالى أوى وهاخليك تجيلى راكع ومذلول مش داليا السويفى اللى تنهزم أبدأ.
بعد شويه اتصلت داليا بشريف وطلبت منه يجى لها الفيلا.
داليا:شريف عاوزاك ضرورى.

شريف:وبعدين معاكى ياداليا انا قلتلك قبل كدة ان التحقيق بخصوص واقعه الطيارة لسه شغال معايا.
داليا : وهما لسه بيحققوا معاك ؟
شريف : ايوة لسه بالاضافه ان مصلحه الطب الشرعى قدامهم وقت طويل اوى على ما يجيبوا دليل ضدى ان موت مجد لانى كنت بعيد عنه وقت القطار مادهسه.
داليا : طب انت فين دلوقتى ؟
شريف : عاوزة ايه ؟

داليا بحقد دفين: تعالى علشان عاوزاك ومن غير أى مناقشه.
شريف بقله حيله:طيب .
بعد شويه وصل شريف الفيلا رن الجرس وفتحت له الخادمه ودخل وقعد بعدها داليا جت عليه وقعدت معاه.
شريف:افندم .
داليا بمكر وخبث :عاوزاك المرة دى تخليه يشك فيها أنا عاوزة أشوفه وهو ييموتها بايدة.
شريف:والمطلوب.

داليا :عاوزاك تروح العزبه و................
شريف:أنتى شيطان ياداليا.
داليا وملست بأيدها على وش شريف زى التعبان :ههههههههه تلميذتك يا استاذ
شريف:طيب ربنا يسترها بقى وجاسم مش يقتلنى انا.

تانى يوم شريف راح العزبه واستغل انشغال الكل وشاف مايسه لوحدها عند حوض الورد وكانت معطيه ظهرها له قرب منها وحاوطها بايدة مايسه افتكرته انه جاسم .
مايسه ضحكت ببراءة:جاسم بس بقى يامجنون.
شريف بخبث:أنا مش جاسم أنا شريف ياحبيبتى.

مايسه بخضه والتفت له وبعدته عنها واتكلمت بعصبيه:أنت؟ أنت هنا بتعمل إيه؟ ماكفكش المصايب اللى بتحصل كل يوم من وراكم انتى والهانم داليا ماكفكش اللى عملته فى هانى وكنت عاوز تلبسه تهمه وتخلص منه هات من الآخر يا شريف أنت عاوز منى إيه بالظبط.
شريف بشهوة:عاوزك ليا.

مايسه زقته بقوة واتكلمت بحدة :أنت أكيد مجنون أنا على ذمه جاسم ولا يمكن اخونه أبدأ فاهم مش ممكن اخونه.
شريف بخبث:سيبك منه أنا أولى بيكى منه.

مايسه اتعصبت من كلامه و مسكت فى ايدها حاجه تشبه الشوكة بيحروصوا بيها الأرض بس كانت كبيرة وضخمه حاولت تبعده بيها بس شريف بعد عنها المغرزة وهجم عليها فجأة وفضل يبوسها بعنف حاولت تقاومه بكل قوتها ودافعت عن نفسها و كانت بتصدة وتبعدة عنها على قد ماتقدر وكل ده وشريف كان متعمد يعمل كدة علشان جاسم يشوفه وكأن كل دة بيتم بمزاجها وبرضاها اما جاسم فكان بيراقب المشهد من بعيد والدم غلى فى عروقه مايسه أخيرا بعدته عنها وضربته بكل قوتها فى بطنه واتالم.

مايسه بتحذير:إذا قربت منى تانى هاقتلك فاهم هاقتلك.
شريف:ماشى يامايسه بكره هاتندمى وتجيلى بعد ماجاسم يرميكى رميه الكلاب مع السلامه يا حلوة.

شريف قبل مايمشى كان جاسم راح وهو بيغلى من جواة والغيرة ماليه قلبه وعقله وعينه كانت بطق شرار وضاغط على ايدة بقوة لحد مامفاصله ابيضت من كتر الضغط عليها وكان بيجز على اسنانه بقوة لدرجه من كتر جزة عليها صدرت صوت خفيف وزعق فيه بكل قوته.

جاسم بغيرة وصوت جهورى : ابعد عن مراتى ياشريف ولو شوفت خلقتك هنا تانى مش هايحصلك كويس فاهم ولالا.
شريف ماشى وجاسم بص لمايسه والغضب والغيرة ماليه عينه .
جاسم بغيرة :ما لسه بدرى ياست هانم كنتى سيبته يكمل فيكى بوس.
مايسه بصت له بصدمه ودمعت وحست ان كلامه وجعها وجرحها :أنت تقصد إيه ياجاسم بكلامك دة.
جاسم :أقصد البيه شريف اللى نازل فيكى بوس عينى عينك وكأنك ملكه .
مايسه باستغراب : انت بتشك فيا ياجاسم ؟ ده أنا مايسه مراتك وحبيبتك ومش ممكن اخونك ابدا على فكرة كلامك دة وجعنى اوى

جاسم بتريقه:لا ماهو واضح بدليل أنك سيبته يبوسك.
مايسه بصتله بعتاب واتكلمت بحدة شديدة:على فكره أنا ضربته وكنت بحمى نفسى منه بس الظاهر أنك مش بتحب تشوف غير اللى عاوز تشوفه وبس...سكتت شويه بس لقت فى عينه برود وجمود. وبعدين كملت كلامها: بس أنا بقى مش هاسمحلك أنك تتهمنى فى شرفى أنا لو كنت عاوزه أعمل حاجه غلط كنت هاعملها فى الخفى ومن وراك مش من قدامك أنا أشرف من أن اى حد يلوث سمعتى. ومادمت أنك شاكك فيا فياريت نسيب بعض بالمعروف وكل واحد يروح لحال سبيلة.

جاسم شدها من دراعها وقربها منه بعنف وبصلها بتحذير واتكلم بغضب:دة على اساس انى هاسمحلك انك تسيبنى لاوالف لا يامايسه ولعلمك أنا مش هاستنى أسبوعين على جوازنا...... قربها منه أكتر واتقابلت عيونهم فى نظرة طويله نظرات كتيرة اوى مليانه حب وغيره وكمان عتاب ولوم.

مايسه بعدته عنها واتكلمت بعند وتحدى :ماشى ياجاسم بس صدقنى أنت بكده بتخسرنى........سابته ومشيت ودموعها على خدها بس قبل ماتبعد عنه كان جاسم بيكلمها بكل عصبية.
جاسم: مش هاسمحلك أنك تكونى لغيرى يامايسه.مش هاسمح ان حد تانى ياخدك منى هاقتله قبل مايفكر انه يجى جنبك .

مايسه دخلت عند أبوها وأمها وهى بتعيط وبتشهق بعنف.
فوزيه بخضه:مالك يابنتى.
مايسه:مسحت دموعها بألم :مافيش يا ماما.
فوزيه:لا فى آمال دموعك دى ليه.
مايسه:مافيش حاجه يا ماما أنا وجاسم شدينا مع بعض بس شويه ماتشغليش بالك.
طه:فوزيه سيبك من بنتك هى وجاسم أحرار هى مراته وهو جوزها يتخاصموا يتصالحوا مالناش أننا نتدخل ما بينهم.
فوزيه:أيوة يا طه بس.
طه:مافيش بس يافوزيه اطلعى أنتى منها ماتتدخليش فى حياة بنتك.وسبق لما يهدوا هما هايتصافوا لوحدهم.

جاسم ملس على شعرة بعنف واتنهد بقوة لانه مش حمل سخارتها وبعد شويه راح لحماة خبط وطه فتح له وقابله بترحاب ودخل وقعد فترة كبيرة ساكت ووشه فى الارض وكان باين فى عينه الحزن ومش عارف يعمل ايه اوحتى يتصرف ازاى وطه ومراته منتظرين منه انه يتكلم وبعد مدة رفع وشه اتكلم بمرارة واصرار.

جاسم:عمى لو سمحت أنا قررت أعمل الفرح الأسبوع الجاى.
طه بصدمه من تسرعه دة :أيوة يابنى بس.
جاسم:عارف ياعمى حضرتك عاوز تعرف اخواتك لك عليا حاضر ابلغهم بنفسى.
طه:والله يابنى اللى تشوفه بس أحنا كنا متفقين أن الجواز بعد أسبوعين مش الأسبوع الجاى.
جاسم: مفرقش من أسبوع ياعمى.
مايسه بصتله بعتاب وعرفت انه بيشك فيها لكنها ابدا مش هاتسمح ان كرامتها تتذل واتكلمت بتحدى:وإنا موافقه ياجاسم.
جاسم ببرود بعكس اللى جواة من غيرة .

جاسم:تمام يبقى الفرح الخميس الجاى.
محمد كان بيتمشى فى العزبه ومر بالصدفه من الشقه اللى فيها طه ومراته وسمع الحوار اللى دار بين جاسم وحماة راح لهم واستاذن ودخل واتكلم مع ابنه بحدة:إيه الكلام الغريب اللى بسمعة دة يعنى إيه الفرح الأسبوع الجاى أحنا مش اتفقنا أنه كمان أسبوعين هو لعب عيال ولا ايه.

جاسم:لا يابابا مش لعب عيال ولاحاجه .......سكت وبص لمايسه ببرود. وقرب منها وحاوطها من خصرها بعنف وكمل كلامه :بس أنا عاوز مايسه تبقى معايا وفى حضنى فى اقرب فرصه وأبتسم لها ابتسامه صفرا:مش كده ياروحى.
مايسه بنفس الابتسامه الصفرا :كده ياحبيبى.
محمد بغضب :والله أنتو عيال وتفكيركم اعيل منكم هو مش المفروض ان فى ترتيبات بتتعمل الاول دة احنا لسه معملناش حاجه بالاضافه اننا معزمناش حد ولاحتى جيبت لها اوضه نوم.

جاسم:هايحصل يابابا هما يومين بس وتكون الأوضة موجوده وجاهزة مافضلش غير حبيبتى تنورها معايا.
جاسم قرب وهمس فى ودنها:أما ربيتك من اول وجديد مابقاش أنا جاسم المنصوري يا بنت البحراوي
مايسه ببرود وعند وبنفس الهمس:هانشوف إذا كنت هاتنفذ تهديدك دة ليا ولالا يا ابن المنصوري.

عدى الأسبوع بسرعة وكان فاضل يومين بالظبط على حفل زفاف مايسه على جاسم كانت حزينه ومهمومه كانت بتتمنى ان فرحها يبدأ من غير اى شك من ناحيتها اما جاسم فكان اللى معصبه انه شاف شريف بيبوسها وحب يعجل بالجواز علشان الامور مش تتعقد اكتر من كدة .

 

فى الشركه
جاسم كان قاعد فى مكتبه شارد وسرحان وحاطط ايدة على خدة دخل عليه أمجد المكتب وشافه وهو سرحان وفى دنيا تانيه.
أمجد :ههههههه طبعا ياعم مين قدك كلها 48 ساعه وتدخل قفص الزوجيه برجليك.
جاسم بضيق :والنبى ياامجد سيبنى فى حالى دلوقتى الله يخليك أنا فيا اللى مكفينى.
امجد:مالك ياجاسم فى إيه شكلك مش كويس.
جاسم:فعلا ياامجد أنا مش كويس خالص.
أمجد :ممكن أفهم ليه.

جاسم:من أسبوع لقيت الزفت اللى اسمه شريف فى العزبه وكان بيبوس مايسه جن جنونى ساعتها وروحت وحذرته انه لو قرب منها تانى مش هايحصله كويس ومشى ولما واجهتها قالتلى أنها ضربته فى بطنه ودافعت عن نفسها.
أمجد :طالما دفعت عن نفسها يبقى انت زعلان ليه؟
جاسم: الموقف نفسه كله على بعضه عصبنى وضايقنى.
أمجد بتحذير:أوعى تكون بتشك فيها ياجاسم؟
جاسم:لا طبعا أنا مستحيل اشك فيها بس كنت عاوز اقتله ساعتها أنا بحبها أوى ياامجد وبغير عليها لدرجه مش هاتتخيلها.

أمجد :بس خد بالك لما تتحول الغيرة لشك بتبقى العواقب مش كويسه.
جاسم:عارف الكلام ده كويس وبعدين بينى وبينك أنا تعبت ياامجد أنا عاوزها معايا النهاردة قبل بكرة أنت ماتعرفش أنا بحبها وبعشقها قد إيه. ده كفايه لما بتضحك والغمزتين اللى فى خدودها بتبان ولا عينها الخضرا اللى بيسكرونى .

أمجد :طب وهو اللى بيحب واحده يغير عليها لدرجه الشك ياجاسم.
جاسم: ياعم إيه المشكله لما أفرح بحبيبتى بدرى إيه بلاش يعنى.
أمجد بضحك:لا طبعا ألف مبروك ياصاحبى.
جاسم:الله يبارك فيك ياامجد عقبالك .
أمجد : أن شاء الله قريب.

جاسم رجع العزبه بعد يوم طويل من الشغل.والكل فرحان واللمه الحلوة موجوده ومايسه برغم خوفها من عقاب جاسم وحزنها أنها هاتتجوز وهو شاكك فيها إلا أن القاعدة الحلوة ماكنتش بتخلو من خفه دم ندى وضحكها مع مايسه.

جاسم دخل وقعد معاهم ومايسه كانت زعلانه منه وبتتجنبه .
جاسم بصلها ببرود:اعملى حسابك تلبسى وتجهزى علشان تنزلى معايا تنقى هدوم لكى علشان فرحنا بعد يومين ولازم تبقى حاجتك موجودة وجاهزة .
مايسه باصرار وبعند :مش نازله ومش جايبه حاجه.
جاسم بص لحماه:بعد إذنك ياعمى عاوز اتكلم مع بنتك شويه.
طه:اهى قدامك إهى يابنى.

جاسم آخد مايسه وطلعوا جنينه العزبة وشدها من دراعها وقربها منه لحد التصقت بصدرة القوى وانفاسه السخنه لفحت وشها وبصلها بتحذير.
جاسم بتحدى :كلامى هايتنفذ وهايتسمع يامايسه ومش هاكررة تانى.

مايسه بعند انثى وبالرغم انها كانت مستمعه بقربه منها اوى لكنها تمالكت نفسها واتكلمت بتحدى واضح على كل ملامحها:قلت مش هاجيب حاجه يعنى مش هاجيب حاجه.
جاسم بصلها بهيام لكن حاول انه مش يبين ضعفه لها واتكلم باصرار:وأنا قلت كلامى هايتنفذ سواء كان بمزاجك أو غصب عنك بلاش لعب عيال انا مش هاتجوز طفله اتفضلى يلا اجهزى علشان اجيب لك هدوم جديدة ومش تخلينى اتعصب عليكى .

مايسه بغيظ:أوعى بقى تكونش فاكر نفسك اشترتنى بفلوسك لا فوق مش مايسه البحراوى اللى يتلوى دراعها أبعد عنى ياجاسم وسيبنى فى حالى.
مايسه جت تبعد عنه لكنه قربها منه وتقابلت عينهم من تانى بحب:أنتى ملكى فاهمه ملكى أنا .
مايسه بعتاب :مش بلوى الدراع ياجاسم عن إذنك .
سابته ومشيت وهى غضبانه منه حتى مش اعطت له فرص للكلام.
جاسم ابتسم وبمكر:كلها يومين ياماسه قلبى وتبقى ملكى ومش هاتطلعى من حضنى ابدا.

نزلت مايسه هى وندى وأمها وكان معاهم جاسم واشتروا أحسن لبس وهدوم لها وهو كان فرحان بس الفرحه كانت ممزوجه بشىء من الخوف والقلق من الجاى.

قصص مشابهة:
الآراء والتعليقات على القصة