قصص و روايات - قصص رومانسية :

رواية ما بعد الرحيل للكاتبة ياسمين أحمد الفصل الثاني

رواية ما بعد الرحيل بقلم ياسمين أحمد

رواية ما بعد الرحيل للكاتبة ياسمين أحمد الفصل الثاني

جاسم رجع القصر بعد ماوصل داليا الفيلا بتاعتها واول مادخل نده علية ابوة
محمد: جاسم تعالى يابنى عاوز اتكلم معاك شويه.
جاسم بنتهيدة: خير يابابا .
محمد: قلتلك تعالى .

جاسم: نعم يابابا لو حضرتك بتنده عليا علشان تقولى ابعد عن داليا واسيبها فانا بقول لحضرتك اسف مش هايحصل مش هاسيبها لانها حبيبتى وبحبها وهى كمان بتحبنى .
محمد: انا عارف انك مش هاتقتنع بكلامى بس علشان تكون عارف ان الهانم داليا دى اللى انت دايب فى هواها رامية نفسها عليك ومش بتحبك.
جاسم بزهق: حبيبى ممكن افهم بس انت رافضها لية ياريت تقولى اسبابك يمكن اقتنع.

محمد: بصراحة مش بستريح لها لله فى لله كفاية انها تبقى بنت السويفى وسبق قبل ماتروح تخطبها من ورانا انى قلتلك ان السويفى راجل مش سهل يلفك على صابعه وبعدها يرميك مش يمكن يابنى يكون هو اللى زققها عليك علشان يعرف عنك كل حاجه شركاتك ومصانعك وقد اية رصيدك فى البنوك.
جاسم: لا طبعا يابابا انا واثق من داليا جدا وواثق من حبها ليا مش لها يعنى اى غرض تانى من اللى بتكلمنى علية ده ثم هى مش صغيرة علشان حد يتحكم فيها او تسمع لكلام حد لا يابابا داليا مش كدة ابدا.
محمد: علشان انت غبى ونظرتك للامور سطحية.
جاسم: بابا لو سمحت انا مش غبى.

محمد: لا غبى وستين غبى كمان يابنى انت ماشى ورا مشاعرك ولاغى عقلك والصراحة البنت حلوة وواكله دماغك بكلامها الحلو المتذوق ومانتاش فاهم حاجه يابنى انا عارف السويفى دة كويس اوى اكتر منك دة راجل دحلاب واكيد هو اللى مسلط بنته علشان تفضل تحبها وتجرى وراها علشان تعرف منك المعلومات عن كل حاجه وعدد العملاء وحجم المصانع وازاى بتشتغل وخصوصا أننا لنا وزننا فى السوق وعلشان ماهو سيادتك دايب فى غرامها مانتاش عارف الناس دى بتفكر ازاى جاسم يابنى انا مش قلتلك ماتحبش لكن كمان بقولك دقق فى اختياراتك وامشى ورا عقلك وقلبك مع بعض فى خط واحد مش تلغى عقلك وتمشى ورا قلبك القلب يابنى ساعات بيبقى نقمة على صاحبة ويبقى احيانا تفكيرة غلط فى غلط علشان مش بيختار صح انا نصحتك وانت حر.

جاسم: بابا حبيبى متخافش عليا انا تربيتك يعنى مش اى حد ماتقلقش حبيبى انا لوحسيت ببذرة شك من ناحية داليا او فى لحظه واحدة بالغدر منها انا ساعتها هفرمها هى وابوها ... جاسم سكت شويه وبعدين كمل: الله امال فين ندوش محدش يعنى سامع لها صوت ؟
محمد: ندى ياسيدى استاذنت منى ونزلت راحت النادى علشان تقابل الواد الرخم ده اللى اسمة حازم انا عارف مالكم كدة كل اختيارتكم غلط فى غلط سواء انت او اختك ومعرفش انتو ناوين على اية.
جاسم بنرفزة: تانى الزفت اللى اسمة حازم دة انا قلت لها قبل كدة تقطع كل علاقتها بية وبعدين انت ازاى يابابا تسمح لها اوتوافق انها تخرج معاه.

محمد: هى اختك ادتنى فرصة ده انا يدوبك لسة بكلمها وبقول لها الواد دة ماينفعكيش لقيتها باستنى من خدى وبعدين طلعت جرى على النادى.
جاسم: ماشى انا رايح لهم النادى دلوقتى وهاقطم رقبتها ورقبته انا سبق وقلت لها انه كلب فلوس وبيجرى وراها علشان يكسب منها وبس.
محمد بص لابنة باستغراب: ياشيخ اتوكس بلا وكسة ابقى انصح نفسك الاول ماهى الست داليا بتجرى برضة وراك لنفس السبب علشان الفلوس وبس .

جاسم: يابابا لو سمحت متحطش وجه مقارنه بين حبيبتى داليا وبين حتة عيل لاراح ولاجة اية اللى جاب السما من الارض داليا بنت حسب ونسب لكن حازم حتة واد يدوبك لسة متخرج من كام سنه لسة بياخد فلوس من باباه وماماته اللى مسافرين برة وبيبعتولة حبة فلوس يتصرمح بيهم ولما تخلص الفلوس دى يجرى ورا ندى ويتمسح فيها ويقنعها انه بيحبها علشان ياخد منها فلوس دة انا لو طولتة امسكة من رقبته واقتلة وارتاح منه انا هاروح لها بنفسى النادى لما نشوف اخرتها ايه فى الزفت دة.

جاسم طلع من القصر وهو عينه بطق شرار وحلف انه يتصرف مع حازم ويعاقبة على انة بيخدع اخته ركب عربيته وكان بيسوقها بسرعة مخيفه لدرجه انه كسر اشارة المرور اكتر من مرة لحد ماوصل النادى وفضل يدور عليها لحد مالقاها قاعدة معاة وعمالة تهزر وتضحك.

جاسم بعصبية: والله عال ياست ندى سيادتك قاعدة مع البيه دة ولا على بالك مش كدة.
ندى بصدمة: ارجوك ياجاسم اهدى وبعدين احنا قاعدين فى مكان عام محناش بنسرق .
جاسم بحدة: ولكى عين تتكلمى كمان ... وشدها من دراعها بعنف بس حازم رد بعجرفة.
حازم: براحة علينا ياجاسم بية احنا مش قدك.

جاسم بغضب والعرق اللى فى رقبته ظهر وبلغة تحذير: انا بكلم اختى ماتتدخلش فى اللى ملكش فية.
حازم بتريقه: تصدق انى خوفت من صوتك دة انت بتهددنى ياجاسم بية ولاايه وبعدين اختك بتقابلنى بمزاجها مش غصب عنها وعلى العموم يعنى انا مش هاكل منها حته.
جاسم قرب منه وضربه فى وشة بعنف: تصدق انك احقر انسان شوفتة فى حياتى .
حازم: لالا عيب من غير غلط انا بتكلم معاك لحد دلوقتى بادب.
جاسم بقت روحه فى مناخيرة ومش طايق دبان وشة:طب اتفضل أطرق بقى من هنا .
حازم: ولو مش اتطرقت هاتعمل ايه ها .

جاسم مسكه من دراعة ولواة بعنف: هاكسرلك دراعك لو تحب.
ندى بعياط: سيبه ياجاسم ارجوك.
جاسم بحده: انتى بالذات تسكتى خالص ولما نروح لنا كلام تانى .
حازم برغم وجع دراعة الا انه وقف وتحدى جاسم .
حازم: ندى هاتروح معايا.
جاسم: نعم اية؟ يعنى ايه هاتروح معاك ليه هى سايبة ؟
حازم بص لندى وشدها له وجاسم بصله وقرب منه: انما انت قليل الادب اوى ومحتاج اللى يربيك.
حازم وهو لسة مصمم انه يستفز جاسم: اعلى مافى خيلك اركبة.
جاسم: خلاص يبقى انت اللى جنيت على نفسك ... قرب منه اكتر ولوى دراعة من تانى وكسرها وحازم صرخ من شدة الالم وهو شد ندى من ايدها لحد ماطلعوا من النادى وزقها ودخلها العربيه ورزع الباب بعنف وركب وطول السكة ساكت بس كان جواة بيغلى بسبب تصرفات اختة غير المسؤله.

ندى: ارجوك ياجاسم اسمعنى بس.
جاسم: هشششش مش عاوز اسمع صوتك خالص مش كفاية انك بتخرجى مع واحد مهلوش مستقبل اسكتى ياندى لو سمحتى.
ندى بحدة: ماانت كسرت دراعة وبعدين اشمعنى انت بتخرج مع حبيبه القلب داليا ومحدش بيكلمك ها .
جاسم وقف العربية وداس فراميل بعنف وبص لاخته بصه ارعبتها ومسك دراعها واتكلم بتحذير: انتى عاوزة تقارنى حازم ده بداليا ايش جاب حته عيل حيلة امة وابوة بداليا بصى ياندى انتى تسكتى خالص لحد مانوصل القصر وبعدين لنا كلام تانى لما نوصل ... جاسم كان بيسوق العربية وهو خلاص فاض بية لحد ماوصلوا للقصر دخلوا ومسك دراعها وزقها قدامه.

ندى بحدة: انا مش هاسمحلك انك تعاملنى بالاسلوب دة انا مش عيلة صغيرة.
جاسم بزعيق: وكمان مش عاجبك ... وفضل يزعق معاها لحد ماجه ابوهم على صوتهم العالى.
محمد: ماشاء الله على عيالى وعلى صوتهم العالى ايه صوتكم جايب لأخر الدنيا ماتهدوا شوية وتفهمونى إيه حصل.
جاسم:اتفضل يابابا شوف الهانم بنتك مش عاجبها انى اتخانقت مع حازم حيلة امة وشدتها من دراعها ولاكمان زعلانة علشانة حاجه غريبه والله العظيم.
ندى: انت عاملتنى اسوء معاملة قدامه ومش بس كدة دة انت كمان كسرت دراعة .

جاسم: يعنى الحق عليا انى خايف عليكى من الواد التلفان دة .
ندى: انا قلتلك قبل كدة انى مش صغيرة واقدر احمى نفسى كويس اوى سواء كان من حازم اومن غيرة .
جاسم:وانا للمرة الاخيرة بقولهالك ياندى لو شوفتك بتتكلمى مع البنى آدم دة او خرجتى معاة تانى هايبقى حسابك معايا مش حلو وانتى عارفة كويس اوى انا لما بيفيض بيا الكيل بعمل اية والمرة الجاية انا مش هاكسرلة دراعة لا انا هاكسر دماغة كمان دة اللى خايفة علية اوى حتة واد لا راح ولاجه وبعدين مش عيلة المنصورى اللى تناسب اللى بالاشكال دى ... بص لابوة ولها: عن اذنكم انا طالع اوضتى لانى صدعت ... وسابهم وطلع اوضتة .

ندى: عاجبك كدة ياسى بابا اللى عملة ابنك فيا لاوكمان وصغرنى قدام حازم.
محمد بحدة: طبعا عاجبنى اخوكى بيخاف عليكى وعاوز مصحلتك وانتى مش بتراعى خوفنا عليكى .
ندى: لا انا عارفه مصلحتى كويس اوى واة انا بحب حازم هو بقى مش بيحبة هو حر.
محمد: ندى بقولك اية اسمعى كلام اخوكى لان الكلام مش هايتنى تانى خلاص .
ندى: يابابا ارجوك.
محمد: قولنا خلاص .

ندى: ماشى يابابا بس محدش يبقى يزعل منى بقى لو روحت اتجوزته من وراكم ... وسابت ابوها وطلعت اوضتها حاولت تتصل بحازم بس محدش بيرد عليها فضلت تعيط لحد مانامت .
اما محمد فحط ايدة على راسة وفضل يستغفر ربة: ياربى انا كنت عملت اية بس فى دنيتى دى علشان عيالى مش بيسمعوا كلامى ربنا يهديكم ياولادى يارب.

فى اوضه جاسم كان بيفرك ايدة بغيظ على عمايل اختة شوية وهدى وطلب داليا اللى اول مارن عليها ابتسمت وردت على طول .
داليا بدلع: حبيبى وحشتنى .
جاسم بضحك: مااحنا كنا لسة مع بعض من شوية لحقت اوحشك ومع ذلك انتى كمان وحشتينى اوى .
داليا حست ان صوت جاسم متغير فسالتة بسرعة مالة .
داليا: مالك حبيبى .
جاسم: ابدا ياقلبى مافيش .
داليا: لا فى صوتك متغير فيك اية
جاسم: ابدا اصلى انا وندى شدينا مع بعض شوية .
داليا: لية بس احكيلى .
جاسم:ابدا بقالها فترة ياستى مواعدة حتة واد كدة اسمة حازم قال اية بتحبة وابوة وامة بيصرفوا علية وهو اساسا واد صايع ومهلوش مستقبل .

داليا: اسمة حازم ؟
جاسم: ايوة انتى تعرفية .
داليا: اظن سمعت الاسم دة قبل كدة يكونش حازم المنفلوطى ؟
جاسم: داليا انتى تعرفية منين؟
داليا: لا معرفهوش اوى بس دايما بسمع عنه من شريف ابن خالتى .
جاسم بغيرة: وشريف يتكلم معاكى عنه بصفتة اية ولية اصلا تكلمى شريف من اساسه .
داليا: جاسم حبيبى اهدى ومش تنسى ان شريف يبقى ابن خالتى .
جاسم: ولو برضه متكلمهوش .
داليا: ماتبقاش حساس بقى يا بيبى .
جاسم بحدة: سمعتينى ياداليا .
داليا بزهق: حاضر حاضر ... سكتت وجاسم حس انه اتعصب اوى عليها .
جاسم: انا اسف ياحبيبتى انى اتعصبت عليكى بس انتى عارفة انى بغير .
داليا بحزن مصطنع: عارفة .

جاسم: تبقى لسة زعلانة صح طب اصالحك ازاى ؟
داليا بانتصار وابتسمت بخبث: بانك تعزمنى بكرة فى نفس المطعم اللى عزمتنى فيه وتجيبلى كمان هدية حلوة .
جاسم سكت ومردش
داليا: سكت لية حبيبى .
جاسم: ها
داليا: اية هو اللى ها .
جاسم حب يتهرب من الكلام معاها: ربنا يسهل ياداليا معلش ياحبيبتى انا مضطر اقفل معاكى لان اليوم كان طويل جدا محتاج انام علشان عندى شغل كتير تصبحى على خير .
داليا بحب مصطنع: وانت من اهل الخير حبيبى امووووووااااااة .
جاسم قفل تليفونة وفضل صاحى شوية وبعدين نام .

فى فيلا السويفى .
داليا: مش قلتلك ان جاسم دة كنز يابابى .
محمود: اشمعنى ؟
داليا: هايعزمنى بكرة فى اكبر واغنى المطاعم وهايجيبلى هدية حلوة كمان.
محمود: داليا بالراحه واحدة واحدة احنا اتفقنا على ايه.
داليا: متخافش ياحبيبى انا هاخدة واحدة واحدة لحد مايبقى تحت طوعى .
محمود: لما نشوف .

تانى يوم فى المطار كان هانى قاعد سرحان فى البنت الجميلة اللى خطفت قلبة من اول يوم شافها فيه.

فلاش باك .

كان هانى فى مرة مع باباة فى عزبة المنصورى لقى بنت فى غاية الرقة والجمال وبتضحك ضحكة خطفت قلبه ووقع فى حبها لكنه مابينش لها مشاعرة .
هانى بهمس لابوة: مين البنت دى يابابا .
طه: دى ياسيدى ندى بنت محمد بية اللى بأشتغل معاة واللى كنت كلمتك عنهم قبل كدة .
هانى: بس دى جميلة اوى يابابا ورقيقة اوى يابخت اللى هاتكون من نصيبة .
طه: هانى ماتبصش فوق يابنى لاتقع على جذور رقبتك احنا فين وهما فين .
هانى: كلنا ولاد حوا وآدم يابابا .
طه: فعلا يابنى بس الناس مقامات ومهما وصلنا مش هانوصل ربعهم بقولك اية بطل غلبة وكتر كلام .
هانى: حاضر سكت اهو ... فضل هانى متابع ندى لحد مااختفت من قدام عينه واخوها كان ملاحظ دة واكتر من مرة وهما يشدوا مع بعض بسبب نظراته واعجابه بيها.

انتهى الفلاش باك .

مجد راح وطبطب على كتفه .
مجد: امممممممممم اللى واخده عقلك ههههههههه.
هانى انتبه: ها كنت بتقول حاجه يامجد .
مجد بضحك: كنت بقولك اللى واخده عقلك .
هانى: ابدا مافيش .
مجد: عليا انا برضه ده انا صاحبك .
هانى: صدقنى يامجد مافيش بقولك اية احنا كدة خلصنا رحلات النهاردة وعاوز انزل اشوف اهلى واقعد معاهم واطمن عليهم .
مجد: اوك يلا ... وهما ماشين نده عليهم شريف .
شريف: استنوا هانمشى مع بعض .
مجد بهمس: الله الوكيل ماهى نقصاك .
شريف: بتقول حاجه يامجد .
هانى وضغط على ايد مجد علشان يسكت .
مجد: مابقولش حاجه .
هانى: يلا ياجماعة علشان نروح .
شريف: ماشى يلا .

فى بيت عم طه البحراوى كانت مايسة بتساعد أمها فى تحضير الغدا .
مايسة: مش كنا المفروض نستنى لحد ماهانى يجى علشان نأكل مع بعض ...ولسة هاتكمل امها بصت لها وضحكت: اهو الباب بيخبط اهوة هههههههههه.
مايسه بصت لامها باستغراب: انا نفسى اعرف بس انتى بتبقى عارفة ازاى انه هو اللى بيخبط ها ازاى ها ازاى .
فوزية بضحك: مافيش ام مابتعرفش دة يبقى احساس نابع من جواها ايش فاهمك انتى بصى يابنتى بكرة لما تبقى ام وابنك يبقى بعيد عنك ويرجع بيبقى قلبك حاسس بدة هاتعرفى ساعتها يعنى اية معنى كلمة امومة واتفضلى بقى ياغلاباوية روحى افتحى الباب لاخوكى ولا هاتسيبة ملطوع على الباب كدة كتير .
مايسة باست امها وراحت فتحت الباب واخدت اخوها بالحضن وباستة من خدودة وهى فرحانة
مايسة: حمدا لله على السلامة ياهانى .

هانى بضحك: الله يسلمك ياحبيبتى وبعدين تعالى هنا انتى محسسانى انى بقالى قرن مش يومين وبعدين انتى ناسية انى كابتن طيار يعنى مش حاجه سهلة بس تعرفى ياميوس .
مايسة: خير ياهانى .
هانى: برضة بتوحشنى لمضتك يالمضة .
مايسة: والله وانت اكتر ياهانى ادخل غير هدومك علشان نقعد نتغدى مع بعض .
هانى:فعلا انا جعان جدا اممممممممم الله الله انا شامم ريحة ملوخية ومحشى وحاجات حلوة كتير صح ولاانا متهيألى .
مايسة بضحك: ايوة ياطفس هو كدة بالظبط انت راجع من السفريات همك على بطنك ههههههههه.
هانى وهو بيعاكس اختة: مالكيش دعوة يارخمة اوعى كدة اما اروح اسلم على ست الحبايب ...دخل المطبخ وسلم على امة وفضل يبوس فى ايديها وهى كمان فضلت تحضن وتبوس فية .
فوزية: ياحبيبى يابنى حمدا لله على سلامتك .

هانى بضحك: اية ياجماعة مالكم ده يدوبك يومين اتنين بس .
فوزية: اليومين اللى بتتكلم عليهم دول كانهم سنتين مش يومين بس الظاهر انك انت واختك مش حاسين بمعنى كلامى غير لما تخلفوا ويبقى عيالكم بعاد عنكم .
هانى وطى على ايد امة وباسها بحب: ربنا يخليكى ياست الكل مانتحرمش من وجودك انتى وبابا .
فوزية بامل:يااااااااارب ياحبيبى.
هانى سكت شوية وبعدين كمل كلامة: الله امال بابا فين يعنى مش شايفه.
فوزية: فى عزبة المنصورى يابنى .
هانى: تانى ياماما عزبة المنصورى .

مايسة: والنبى قولها الكلام دة ياهانى لاحسن هى مش مقتنعة بكلامى .
فوزية: ياولاد ابوكم بيشتغل عند الراجل وهو الله الوكيل مش مقصر معنا فى حاجة وبعدين يابنى انت عارف البير وغطاة ولولا الراجل دة كنا زمنا بنشحت فى الشوارع .
هانى: ياامى ماتحمليش هم انتى وبابا ومايسة انتو على دماغى من فوق .
فوزية: يابنى انت هاتعمل اية ولااية بس مش كفاية انك بتسافر كل شوية فى رحلات علشان تصرف علينا ومش بتتاخر عننا فى شىء الحمل كتر عليك يابنى كتر الف خيرك .
هانى:حبيبتى ياماما خيركم سابق علينا مش كفاية انك انتى وبابا ربتونا انا ومايسة وعلمتونا احسن علام ارجوكى ياامى مش عاوز اسمع منك كدة تانى علشان مزعلش منك ... وباس راسها: انا رايح العزبة اجيب بابا علشان نتغدى مع بعض .

فوزية برجاء: والنبى يابنى روح بس بلاش علشان خاطرى ملكش دعوة بندى ومش تتخانق مع جاسم زى المرة اللى فاتت دول ناس اغنياء جدا يابنى واحنا مش قدهم ولا من مقامهم .على الاقل اعمل اعتبار لابوك وبعدين انا مش عاوزة الامور تتصعب علينا علشان خاطرى .
هانى بضيق: جاسم دة انسان غريب جدا ياماما احيانا بحس انه انسان معقد اى حد بيبص لاخته بيبقى كأنه عاوز يأكله .
فوزية: يابنى هو معاة حق يعنى انت ترضى على نفسك ان حد يبص لاختك اويعاكسها طبعا لا وعلشان كدة كل اللى بطلبة منك علشان خاطرى روح هات ابوك من هناك ومالكش دعوة بأخت جاسم خليك فى حالك ومش تتاخروا علشان الاكل مايبردش .

هانى حاضر ياماما هاروح واجيب بابا وماليش دعوة بندى ...هانى راح فعلا عزبة المنصورى وهناك لمح ندى وجاسم وابوهم .
هانى: السلام عليكم ورحمة الله وبركاتة .
الكل: وعليكم السلام ورحمة الله وبركاتة .
محمد: ابن حلال حماتك بتحبك .
هانى بيكلم نفسة: وانا بحب بنتها: شوية وانتبة: خير يامحمد بية .
محمد: لابية اية لا كدة ازعل منك بجد هو انت مش معتبرنى زى ابوك ولااية هانى يابنى بلاش الالقاب دى بية وباشا مش بحب اسمعها .
هانى: مش القصد والله انا بس ماينفعش ماقولش غير كدة .
محمد: ماعلينا اقعد بقى علشان تتغدى معنا .
هانى: لامعلش وقت تانى ان شاء الله ... بص لابوة اللى كان قاعد معاهم: مش يلا احنا يابابا .
طه: يلا يابنى .

محمد: والله ماهايحصل ابدا لازم تقعدوا تتغدوا ... واصر على انهم يفضلوا قاعدين معاهم .
هانى: ايوة بس اصل يعنى ماما ومايسة .
محمد بص لجاسم: جاسم روح هات الجماعة من البيت ونتغدى كلنا مع بعض .
طه مقاطعا: لا معلش حضرتك اعفينا .
محمد: وانا قلتها كلمة وكلامى مابرجعش فية ... وبعد محايلة من محمد قعد هانى وطه وجاسم ركب عربيتة لحد ماوصل بيت عم طه وهو طالع عمال ينهج: ياااااااه سلم متعب اوى الله يكون فى عونهم ... اخيرا رن الجرس مايسة راحت وفتحت له الباب .
مايسة باستغراب: جاسم ؟

جاسم: ازيك ياانسة مايسة عاملة اية .
مايسة: الحمد لله انا كويسة اتفضل .
جاسم: متشكر ...دخل وقعد على اقرب كرسى وهو عمال باصص باستغراب على الشقة البسيطة المتواصغة وبعدين مايسة استاذنت منة وراحت بلغت امها .
فوزية: هو قاعد برة .
مايسة: ايوة .
فوزية: طيب استنى انا جاية معاكى اهوة .
فوزية طلعت ورحبت اوى بجاسم: اهلا وسهلا يابنى معلش البيت مش على قد المقام اتفضل يابنى .
جاسم: معلش ياطنط اصل بابا طلب منى اجى ابلغ حضرتك انك انتى ومايسة لازم تيجوا معايا علشان عازمنينكم عندنا.

فوزية: ايوة يابنى بس .
جاسم: من غير بس ياطنط اتفضلوا اجهزوا علشان تيجوا معايا ... وفعلا فى خلال دقايق قليلة جدا كانت فوزية ومايسة جهزوا ونزلوا مع جاسم وركبوا معاة وجاسم طول ماهو سايق العربية عينة مانزلتش من على مايسة وكل شوية يفضل يبصلها من مرايا العربية ومايسة لاحظت كدة بس اتجاهلتة لحد ماوصلوا العزبة وهناك محمد رحب بيهم وشوية وكان الاكل جهز واتغدوا كلهم وهانى كمان عينه منزلتش من على ندى اللى كانت متجاهلة نظراتة لها وبالرغم من تحذيرات امة الا انة مقدرش مايبصلهاش وجاسم لاحظ كده وكان بيبص لهانى بتحذير فى الوقت اللى جاسم نفسة كان بيخطف نفس النظرات لمايسة لحد ماموبايلة رن وكانت داليا استاذن منهم وراح علشان يكلمها .

جاسم: عن اذنكم بس هارد على المكالمة وراجع تانى .
طه: اتفضل يابنى .
جاسم بعد بعيد عنهم علشان يعرف يتكلم براحتة .
محمد: والله منورين ياجماعة النهاردة العزبة منورة بيكم .
طه:النور نوركم ياسعادة البية ربنا يجعلة عامر ومفتوح بحسك ... فضلوا شوية وبعدين حبوا سياذنوا علشان يمشوا .
طه: معلش ياسعادة البية لازم اروح استريح شوية علشان اقدر اجى الصبح فايق لطلبات حضرتك .
محمد: خلاص بيتوا معنا هنا .
طه: لامعلش انا مش بستريح غير فى بيتى .

محمد: على العموم مش هاغصب عليك فى حاجه بس ياريت تكررها تانى وتيجى انت والمدام والاولاد مرة تانية .
طه: ان شاء استاذن حضرتك بقى يلا ياهانى .
محمد: مع السلامة ياراجل ياطيب ... مشيوا وكان جاسم خلص كلام مع داليا رجع لقاهم مشيوا .
جاسم: الله هما لحقوا يقعدوا .
محمد بضحك: ههههههههه صح النوم يااستاذ انت بقالك ساعة عمال ترغى وتلك مع الست داليا طبعا مش حاسس بالوقت .
جاسم: هما روحوا فى عربية هانى صح .
محمد:ايوة انما انت بتسأل لية ؟

جاسم: ها ولاحاجه مجرد سوال بس .
محمد: ايوة ياسيدى مشيوا فى عربية هانى ارتحت كدة ...جاسم كان مشتت حيران مابين داليا الجميلة اللى اخترها بنفسه علشان تكون خطيبته ومابين مايسة اللى ظهرت فجأة فى حياتة اللى اول ماشاف عيونها الخضرا تاه فى جمالهم شاف فيهم سحر غريب جدا وحس بحاجة غريبة حنيتها هو مش فاهم هى اية بالظبط ياترى دة اعجاب بجمالها وخفة دمها ولااية .

خلصت حلقتنا بس ياترى الامور مخبية اية لابطالنا ياترى هاتفضل الامور زى ماهى كدة ولااية اللى هايحصل معاهم ده اللى هانعرفة بعدين.

الفصل التالي
جميع الفصول
روايات الكاتب
روايات مشابهة
الآراء والتعليقات على الرواية
W